មេរៀនទី ៣០ ៖ ថ្ងៃទី ៤
យូដាស
សេចក្ដីផ្ដើម
យូដាសដាស់តឿនសមាជិកសាសនាចក្រឲ្យ « ខំតយុទ្ធ ដើម្បីការពារសេចក្តីជំនឿ » ( យូដាស ១:៣ ) ទាស់នឹងគ្រូបង្រៀនក្លែងក្លាយ ។ លោកបានពិពណ៌នាអំពីគ្រូបង្រៀនក្លែងក្លាយ ហើយបានទូន្មានពួកបរិសុទ្ធឲ្យស្ថាបនាជីវិតរបស់ពួកគេ លើដំណឹងល្អរបស់ព្រះយេស៊ូវគ្រីស្ទ ។
យូដាស ១:១-១៩
យូដាសដាស់តឿនសមាជិកសាសនាចក្រឲ្យខំតយុទ្ធ ដើម្បីការពារសេចក្តីជំនឿទាស់នឹងគ្រូបង្រៀនក្លែងក្លាយ
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេររបៀបផ្សេងគ្នាមួយចំនួន ដែលអ្នកអាចឆ្លើយតបទៅនឹងស្ថានភាពនីមួយៗខាងក្រោម ៖
-
នៅលើគេហទំព័រប្រព័ន្ធផ្សព្វផ្សាយសង្គមមួយ មិត្តភក្តិម្នាក់បានចុះផ្សាយឃ្លារិះគន់ដល់ គោលជំហររបស់សាសនាចក្រចំពោះអាពាហ៍ពិពាហ៍ភេទដូចគ្នា ។
-
អ្នកជិតខាងម្នាក់ដឹងថា អ្នកជាសមាជិកសាសនាចក្រ ។ គាត់បានប្រាប់អ្នកថា គាត់បានអានព្រះគម្ពីរមរមន ហើយមានអារម្មណ៍ថាគឺជាអក្សរសិល្បិ៍មួយដែលលើកស្ទួយចិត្ត ប៉ុន្តែមិនមែនជាព្រះបន្ទូលរបស់ព្រះទេ ។
-
អំឡុងពេលពិភាក្សាមេរៀននៅក្នុងថ្នាក់នៅសាលារៀន មានមនុស្សម្នាក់បានប្រកែកថា ការមើលការណ៍អាសគ្រាមគ្មានគ្រោះថ្នាក់ទេ ហើយពុំគួរបំបាក់ទឹកចិត្តមិនឲ្យធ្វើបែបនោះឡើយ ។
-
សំបុត្ររបស់យូដាសសរសេរទៅកាន់គ្រិស្ដសាសនិកស្មោះត្រង់ដែលបានសរសេរឡើងនៅគ្រាដែលសមាជិកសាសនាចក្រជួបប្រទះនឹងការជំទាស់យ៉ាងខ្លាំង ។ សូមអាន យូដាស ១:៣–៤ ដោយរកមើលអ្វីដែលយូដាស បានលើកទឹកចិត្តឲ្យសមាជិកសាសនាចក្រធ្វើនាគ្រាជួបនូវការជំទាស់នេះ ។
សូមកត់សម្គាល់ថា យូដាសបានលើកទឹកចិត្តឲ្យពួកបរិសុទ្ធ « ខំតយុទ្ធ ដើម្បីការពារសេចក្តីជំនឿ » ( ខទី ៣ ) ។ នេះមានន័យថា ពួកគេត្រូវតែការពារ បង្រៀន និង ថ្លែងទីបន្ទាល់អំពីដំណឹងល្អដោយចិត្តក្លាហាន ។ « ជាមនុស្សទមិលល្មើស » ( ខទី ៤ ) ជាមួយនឹងបំណងអាក្រក់បានចូលមកសាសនាចក្រដោយឆ្លាតវៃ ។ សមាជិកសាសនាចក្រទាំងនេះបានបង្កើននូវអំពើពុករលួយ ការប្រតិបត្តិភាពអសីលធម៌ ដោយការបង្រៀនថា គោលលទ្ធិនៃព្រះគុណបានអនុញ្ញាតឲ្យមានសេរីភាពទាំងស្រុងពីអំពើបាប ដោយសារព្រះនឹងអភ័យទោសដោយក្តីមេត្តា ។ ពួកគេក៏បានបដិសេធសេចក្តីពិតជាក់លាក់នានា អំពីព្រះវរបិតាសួគ៌ និង ព្រះយេស៊ូវគ្រីស្ទ ។
សេចក្តីពិតមួយដែលយើងអាចរៀនចេញពីការណែនាំរបស់យូដាសគឺថា ពួកសិស្សរបស់ព្រះយេស៊ូវគ្រីស្ទ គប្បីខំតយុទ្ធដើម្បីដំណឹងល្អរបស់ព្រះយេស៊ូវគ្រីស្ទ ទាស់នឹងការបង្រៀន និង ការប្រតិបត្តិពុករលួយ ។
ខំតយុទ្ធដើម្បីដំណឹងល្អពុំមែនមានន័យថា យើងឈ្លោះប្រកែកគ្នានៅក្នុងវិញ្ញាណឡើយ ។ យើងគប្បីមានចិត្តសប្បុរស ហើយក្លាហាន ប៉ុន្តែមិនប្រើអំណាចជិះជាន់គេឡើយ នៅពេលយើងការពារ និង ថ្លែងទីបន្ទាល់អំពីសេចក្តីពិត ( សូមមើល អាលម៉ា ៣៨:១២, នីហ្វៃទី ៣ ១១:២៩ ) ។ ដើម្បីខំតយុទ្ធយ៉ាងមានប្រសិទ្ធភាពសម្រាប់ដំណឹងល្អនោះគឺ—ការពារ បង្រៀន និង ថ្លែងទីបន្ទាល់ —ក៏មានន័យថា យើងត្រូវតែដឹងពីគោលលទ្ធិ និង គោលការណ៍ត្រឹមត្រូវរបស់ដំណឹងល្អផងដែរ ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើយើងអាចខំតយុទ្ធដើម្បីដំណឹងល្អ ដោយមិនឈ្លោះប្រកែកយ៉ាងដូចម្ដេច ?
-
សូមរំឭកពីស្ថានភាពដែលបានបង្ហាញនៅក្នុងលំហាត់ទី ១ ។ នៅក្នុងស្ថានភាពទាំងនេះ និង ស្ថានភាពស្រដៀងគ្នានេះ តើមានវិធីណាខ្លះ ដែលយើងអាចខំតយុទ្ធសម្រាប់ដំណឹងល្អ ទាស់នឹងការបង្រៀនក្លែងក្លាយ និង ការប្រតិបត្តិពុករលួយនោះ ?
-
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ បានចែកចាយដំណើររឿងមួយអំពីយុវនារីម្នាក់ ដែលខំតយុទ្ធសម្រាប់ដំណឹងល្អ ៖
« ថ្មីៗនេះ ខ្ញុំបាននិយាយនឹងក្មេងស្រីថ្នាក់ឡូរ៉លម្នាក់ រស់នៅសហរដ្ឋអាមេរិក ។ ខ្ញុំសូមដកស្រង់ពីអ៊ីម៉ែលរបស់នាង ៖
« ‹ កាលពីឆ្នាំមុន មិត្តភក្ដិរបស់ខ្ញុំនៅលើហ្វេសប៊ុកខ្លះ បានចាប់ផ្ដើមប្រកាសពីគោលជំហររបស់ពួកគេអំពីអាពាហ៍ពិពាហ៍ ។ មនុស្សជាច្រើនពេញចិត្តនឹងអាពាហ៍ពិពាហ៍ភេទដូចគ្នា ហើយពួកយុវវ័យអិល. ឌី. អេស. ជាច្រើនបានបង្ហាញថា ពួកគេ « ចូលចិត្ត » ការចុះផ្សាយទាំងនោះ ។ ខ្ញុំមិនបានបញ្ចេញមតិអ្វីនោះទេ ។
« ‹ ខ្ញុំបានសម្រេចចិត្តប្រកាសពីជំនឿខ្ញុំ លើការរៀបការរវាងបុរស និង ស្ត្រីតាមវិធីដ៏ប្រុងប្រយ័ត្នមួយ ។
« ‹ ដោយដាក់រូបភាពលើប្រូហ្វាលរបស់ខ្ញុំ ខ្ញុំបានបន្ថែមចំណងជើងថា « ខ្ញុំជឿលើអាពាហ៍ពិពាហ៍រវាងបុរស និងស្ដ្រី » ។ មិនបានមួយសន្ទុះផង ខ្ញុំបានចាប់ផ្ដើមទទួលសារជាច្រើន ។ « អ្នកអាត្មានិយមពេកហើយ » ។ « អ្នកកំពុងតែកាត់សេចក្ដីគេ » ។ មានម្នាក់ បានប្រៀបធៀបខ្ញុំទៅនឹងម្ចាស់ទាសករម្នាក់ ។ ហើយខ្ញុំបានទទួលការប្រកាសនេះមកពីមិត្តដ៏អស្ចារ្យរបស់ខ្ញុំ ដែលជាសមាជិកនៃសាសនាចក្រដ៏រឹងមាំម្នាក់ ៖ « ឯងត្រូវរស់នៅតាមសម័យកាល ។ អ្វីៗប្រែប្រួល ហើយឯងក៏គួរតែប្រែប្រួលដែរ » ។
នាងបានថ្លែងថា « ‹ ខ្ញុំមិនបានឈ្លោះតបទេ តែខ្ញុំក៏មិនបានដកយកពាក្យខ្ញុំវិញដែរ › ។
នាងបានបញ្ចប់ដោយនិយាយថា ‹ ពេលខ្លះ ដូចជាប្រធានម៉នសុន បានមានប្រសាសន៍ថា « អ្នកត្រូវតែឈរតែម្នាក់ឯង » ។ សង្ឃឹមថា ក្នុងនាមជាយុវវ័យ យើងនឹងឈរជាមួយនឹងគ្នាយ៉ាងពិតចំពោះព្រះ ហើយចំពោះការបង្រៀនទាំងឡាយរបស់ព្យាការីដែលនៅរស់របស់ទ្រង់ › » ( « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ទំព័រ ១៩–២០ ) ។
សូមគិតពីគ្រាមួយនៅពេលអ្នក ឬ នរណាម្នាក់ដែលអ្នកស្គាល់បានខំតយុទ្ធដើម្បីដំណឹងល្អរបស់ព្រះយេស៊ូវគ្រីស្ទ ។ សូមពិចារណាពីអ្វីផ្សេងទៀត ដែលអ្នកអាចធ្វើដើម្បីការពារ និង គាំទ្រសេចក្តីពិត ។ សូមធ្វើតាមការបំផុសគំនិតទាំងឡាយដែលអ្នកទទួល ។
នៅក្នុង យូដាស ១:៥–៧ យូដាសបានប្រៀបធៀបសមាជិកដែលបះបោរ ទៅនឹងអស់អ្នកដែលពុំស្មោះត្រង់នៅក្នុងចំណោមពួកសាសន៍អ៊ីស្រាអែលពីបុរាណ ដែលត្រូវបាននាំចេញពីស្រុកអេស៊ីព្ទ ជាអស់អ្នកដែលបានបះបោរប្រឆាំងទាស់នឹងព្រះនៅក្នុង « សណ្ឋានទីមួយរបស់ពួកគេ » ( យូដាស ១:៦ សូមមើលផងដែរ អ័ប្រាហាំ ៣:២២–២៦ ) ឬ ជីវិតមុនឆាកជីវិតនេះ និង មនុស្សទុច្ចរិតនៅក្នុង និង បរិវេណក្រុង សូដុំម និង កូម៉ូរ៉ាដែលត្រូវបានបំផ្លាញចោល ។
ដូចបានកត់ត្រានៅក្នុង យូដាស ១:៨–១៦ យូដាសបានពិពណ៌នាអំពីបុគ្គលិកលក្ខណៈជាច្រើន ដែលនឹងជួយសមាជិកសាសនាចក្រឲ្យស្គាល់ពីអស់អ្នកដែលកំពុងផ្សាយទស្សនៈ និង ការប្រតិបត្តិពុករលួយនៅក្នុងសាសនាចក្រ ។ ឧទាហរណ៍ លោកបានពិពណ៌នាពីពួកគេថាជា « ពពក…ឥតទឹក ដែលត្រូវខ្យល់បក់ផាត់ទៅមក » និង « ជាដើមឈើឥតផ្លែ » ( យូដាស ១:១២ ) ។ តើគ្រូបង្រៀនក្លែងក្លាយអាចដូចជាពពកឥតទឹក និង ដើមឈើឥតផ្លែដូចម្តេច ?
យូដាសអាចនិយាយសំដៅលើព័ត៌មានដែលមាននៅក្នុងសៀវភៅ អ័ប៉ូគ្រីផា ដែលជាគម្ពីរសន្និដ្ឋាននៃគម្ពីរម៉ូសេ និង គម្ពីរហេណុកនៅក្នុងសំបុត្ររបស់លោក ។ ការសន្និដានរបស់ម៉ូសេពិពណ៌នាអំពី « មីកែល ជាមហាទេវតា … ទាំងប្រកែកជាមួយអារក្ស … ពីដំណើរសពរបស់លោកម៉ូសេ » ( យូដាស ១:៩ ) ។ គម្ពីរនេះប្រាប់ជោគជ័យដ៏អស្ចារ្យបំផុតរបស់មីកែល ហើយថាម៉ូសេបានប្រែរូបនៅចុងបញ្ចប់ជីវិតរបស់លោក ( សូមមើល អាលម៉ា ៤៥:១៩ ) ។ គម្ពីរហេណុក មានការព្យាករមួយចេញពីហេណុកអំពីការយាងមកជាលើកទីពីរ ( សូមមើល យូដាស ១:១៤–១៥) ។ ព្រះអម្ចាស់បានបើកសម្តែងថា មានអ្វីៗជាច្រើននៅក្នុងគម្ពីរអ័ប៉ូគ្រីផាគឺត្រឹមត្រូវ ហើយអស់អ្នកណាដែលត្រូវបានបំភ្លឺដោយព្រះវិញ្ញាណអាចទទួលបានផលប្រយោជន៍ពីការអានគម្ពីរនោះ ។ ប៉ុន្តែគម្ពីរមួយចំនួនមានព័ត៌មានបន្ថែមដែលធ្វើឲ្យអត្ថបទដើមរបស់វាពុករលួយ ( សូមមើល គ. និង ស. ៩១) ។ ( សម្រាប់ព័ត៌មានបន្ថែមអំពីគម្ពីរអ័ប៉ូគ្រីផា សូមមើលសេចក្តីណែនាំដល់បទគម្ពីរទាំងឡាយ « អ័ប៉ូគ្រីផា » ) ។
សូមអាន យូដាស ១:៨, ១០, ១៤–១៩ ដោយរកមើលលក្ខណៈបន្ថែមទៀតរបស់គ្រូបង្រៀនក្លែងក្លាយ ។ អ្នកអាចគូសចំណាំ ឬ កត់ចំណាំអ្វីដែលអ្នករកឃើញ ។ នៅក្នុងតារាងដែលមានភ្ជាប់មកជាមួយ សូមបំពេញនៅក្នុងចន្លោះ ដោយផ្អែកលើអ្វីដែលអ្នករៀននៅក្នុងខគម្ពីរទាំងនេះ ។ ឃ្លាមួយចំនួននៅក្នុងតារាងត្រូវបានដាក់ឲ្យ ដើម្បីជួយអ្នកយល់ពីការសរសេររបស់យូដាស ។ ( សូមកត់ចំណាំថា « នៅជាន់ក្រោយបង្អស់ » [ ខទី ១៨ ] សំដៅលើរយៈពេលមួយ ដែលយូដាសបានរស់នៅ ព្រមទាំងថ្ងៃចុងក្រោយដែលយើងរស់នៅផងដែរ ) ។
|
លក្ខណៈនៃគ្រូបង្រៀនក្លែងក្លាយ | |
|---|---|
|
|
ហេតុអ្វីវាសំខាន់ដើម្បីស្គាល់ពីលក្ខណៈរបស់គ្រូបង្រៀនក្លែងក្លាយ ?
មិនមែនមនុស្សណាដែលមានលក្ខណៈមួយ ឬ ច្រើនជាងមួយនៃលក្ខណៈទាំងនេះជាគ្រូបង្រៀនក្លែងក្លាយឡើយ ។ ហើយមិនមែនមនុស្សណាដែលបង្រៀនអ្វីដែលមិនត្រឹមត្រូវគឺជាគ្រូបង្រៀនក្លែងក្លាយទេ ។ ពួកគេអាចធ្វើខុសដោយមិនដឹងខ្លួននៅក្នុងការយល់ដឹងអំពីប្រធានបទមួយ ។ ប៉ុន្តែការស្គាល់ពីលក្ខណៈទាំងនេះអាចជួយយើងស្គាល់គ្រូបង្រៀនក្លែងក្លាយ ដែលមានបំណងចង់ធ្វើឲ្យសេចក្តីជំនឿ និង ការគោរពប្រតិបត្តិរបស់អ្នកដទៃចុះខ្សោយ ដោយការបោកបញ្ឆោតពួកគេ និង ផ្សាយសេចក្តីអាក្រក់ ។
នៅក្នុង យូដាស ១:១៧ សូមកត់សម្គាល់ថា យូដាសបានរំឭកពួកបរិសុទ្ធថា សាវករបស់ព្រះអម្ចាស់បានព្រមានសមាជិកសាសនាចក្រអំពីគ្រូបង្រៀនក្លែងក្លាយ ។ ចេញពីខគម្ពីរនេះ យើងរៀនថា សាវក និង ព្យាការីព្រមាន និង ជួយយើងឲ្យស្គាល់អស់អ្នកដែលព្យាយាមធ្វើឲ្យសេចក្តីជំនឿ និង ការគោរពប្រតិបត្តិរបស់យើងចុះខ្សោយ ។
ព្យាការី និង សាវកសព្វថ្ងៃនេះបន្តព្រមានយើងអំពីគ្រូបង្រៀនក្លែងក្លាយ ។
អែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍ថា « ក្នុងនាមជាសាវករបស់ព្រះអម្ចាស់យេស៊ូវគ្រីស្ទ វាគឺជាកាតព្វកិច្ចរបស់យើង ក្នុងការធ្វើជាអ្នកយាមនៅលើប៉ម ព្រមានសមាជិកសាសនាចក្រ ឲ្យស្គាល់ព្យាការីក្លែងក្លាយ និង គ្រូបង្រៀនក្លែងក្លាយ ដែលដេកចាំដាក់អន្ទាក់ ហើយបំផ្លាញសេចក្តីជំនឿ និង ទីបន្ទាល់ ។ សព្វថ្ងៃនេះ យើងព្រមានអ្នកថា មានព្យាការីក្លែងក្លាយ និង គ្រូបង្រៀនក្លែងក្លាយកំពុងកើនឡើង ហើយប្រសិនបើយើងពុំប្រុងប្រយ័ត្នទេ នោះសូម្បីតែអស់អ្នកដែលនៅក្នុងចំណោមសមាជិកស្មោះត្រង់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នឹងធ្លាក់ខ្លួនជាជនរងគ្រោះចំពោះការបោកបញ្ឆោតរបស់ពួកវាដែរ » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦២ ) ។
តើមានគ្រូបង្រៀនក្លែងក្លាយ ឬ ការបង្រៀនក្លែងក្លាយអ្វីខ្លះដែល ព្យាការី និងសាវកសម័យទំនើបនេះបានព្រមានដល់យើងនោះ ?
សូមពិចារណាពីអ្វីដែលអ្នកបានរៀនពីសំបុត្ររបស់យូដាស តើហេតុអ្វីវាសំខាន់ដើម្បីសិក្សាប្រសាសន៍របស់សាវក និង ព្យាការី ?
យូដាស ១:២០-២៥
យូដាសបានទូន្មានពួកបរិសុទ្ធឲ្យស្ថាបនាជីវិតរបស់ពួកគេ លើដំណឹងល្អរបស់ព្រះយេស៊ូវគ្រីស្ទ និង ជួយសង្គ្រោះអ្នកដទៃ
សូមអាន យូដាស ១:២០-២១ ដោយរកមើលអ្វីដែលយូដាសបានទូន្មានដល់ពួកបរិសុទ្ធឲ្យធ្វើ ដើម្បីបន្តស្មោះត្រង់នឹងសេចក្តីជំនឿ ។ ឃ្លា « អធិស្ឋានដោយនូវព្រះវិញ្ញាណបរិសុទ្ធ » នៅក្នុង ខទី ២០ មានន័យថា អធិស្ឋានដោយមានជំនួយមកពីការបំផុសគំនិតនៃព្រះវិញ្ញាណបរិសុទ្ធ ។
សូមប្រើសេចក្តីដែលអ្នករៀននៅក្នុងខគម្ពីរទាំងនេះ ដើម្បីបំពេញសេចក្តីពិតតទៅនេះ ៖ យើងអាចបន្តស្មោះត្រង់ចំពោះសេចក្តីជំនឿដោយ ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
ហេតុអ្វីការបន្តនៅស្មោះត្រង់នឹងសេចក្តីជំនឿមានតម្លៃសមទៅនឹងកិច្ចខិតខំនោះ ?
-
តើការរស់នៅតាមការទូន្មានរបស់យូដាបានជួយអ្នក ឬ អ្នកដទៃដែលអ្នកស្គាល់បន្តនៅស្មោះត្រង់នឹងសេចក្តីជំនឿយ៉ាងដូចម្តេច ?
-
-
នៅលើក្រដាសមួយសន្លឹកផ្សេងទៀត សូមសរសេររបៀបមួយដែលអ្នកអាចកែលម្អការធ្វើតាមការទូន្មានរបស់យូដាស ហើយដាក់ក្រដាសនោះនៅកន្លែងណាមួយ ដែលអ្នកនឹងមើលឃើញវាញឹកញាប់ ដែលជាការរំឭកដល់អ្នកដើម្បីអនុវត្តអ្វីដែលអ្នកបានសរសេរ ។ នៅពេលអ្នកបានធ្វើកិច្ចការនេះហើយ សូមសរសេរ បានបញ្ចប់ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
ដូចបានកត់ត្រានៅក្នុង យូដាស ១:២២–២៥ យូដាសបានទូន្មានដល់សមាជិកស្មោះត្រង់របស់សាសនាចក្រឲ្យជួយអ្នកដទៃ ដែលមានការលំបាកខាងវិញ្ញាណ ប្រហែលជាដោយសារមកពីឥទ្ធិពលរបស់គ្រូបង្រៀនក្លែងក្លាយ ។ លោកក៏បានថ្វាយការសរសើរដល់ព្រះផងដែរ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាគម្ពីរយូដា ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖