មេរៀនទី ១៥ ៖ ថ្ងៃទី ២
យ៉ូហាន ១២
សេចក្តីផ្ដើម
ម៉ារាមកពីភូមិ បេថានី ជាបងស្រីរបស់ម៉ាថា និង ឡាសារបានលាបប្រេងតាំងលើព្រះបាទារបស់ព្រះយេស៊ូវ ដែលជានិមិត្តសញ្ញានៃការសុគត និង ការបញ្ចុះសពរបស់ទ្រង់ដែលនឹងខិតចូលមកដល់ ។ នៅថ្ងែស្អែកឡើងព្រះយេស៊ូវបានយាងចូលទៅក្នុងទីក្រុងយេរូសាឡិមដោយជោគជ័យ ហើយបានព្យាករពីការសុគតរបស់ទ្រង់ ។ ទោះបីជាមានអព្ភូតហេតុរបស់ទ្រង់ក្តី មនុស្សមួយចំនួនពុំជឿថាទ្រង់គឺជាព្រះអង្គសង្គ្រោះ ជាព្រះមែស៊ីដែលបានសន្យានោះឡើយ ។ ទ្រង់បានបង្រៀនពីលទ្ធផលនៃការជឿ និង ពុំជឿទៅលើទ្រង់ ។
យ៉ូហាន ១២:១-១៩
ម៉ារាបានលាបប្រេងតាំងលើព្រះបាទារបស់ព្រះយេស៊ូវ ហើយព្រះយេស៊ូវធ្វើការយាងចូលទៅក្នុងក្រុងយេរូសាឡិមដោយជោគជ័យ
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមគូររូបភាព ឬ សរសេរអព្ភូតហេតុមួយរបស់ព្រះអង្គសង្គ្រោះដែលបានកត់ត្រានៅក្នុងព្រះគម្ពីរសញ្ញាថ្មី ។ សូមសញ្ជឹងគិតថាតើការធ្វើជាសាក្សីចំពោះអព្ភូតហេតុដូច្នោះ អាចជះឥទ្ធិពលដល់ជំនឿរបស់អ្នកលើព្រះអង្គសង្គ្រោះខ្លាំងប៉ុណ្ណា ។
នៅពេលអ្នកសិក្សា យ៉ូហាន ១២សូមរកមើលរបៀបផ្សេងៗគ្នាដែលមនុស្សបានឆ្លើយតបចំពោះអព្ភូតហេតុរបស់ព្រះអង្គសង្គ្រោះ ព្រមទាំងរកមើលសេចក្តីពិតដែលអាចជួយយើងឲ្យយល់ពីចម្លើយរបស់ពួកគេ ។
នៅក្នុង យ៉ូហាន ១២:១–៩ យើងអានថា ប្រាំមួយថ្ងៃបន្ទាប់ពីបុណ្យរំលង នោះព្រះយេស៊ូវបានសោយអាហារពេលយប់ជាមួយមិត្តភក្តិមួយចំនួននៅភូមិ បេថានី ជាទីប្រជុំជនតូចមួយនៅក្រៅទីក្រុងយេរូសាឡិម ។ ម៉ារាជាបងស្រីរបស់ម៉ាថា និង ឡាសារបានលាបប្រេងតាំងលើព្រះបាទារបស់ព្រះយេស៊ូវ ជាមួយនឹងប្រេងទេព្វិរូដ៏មានតម្លៃ ។ យូដាស-អ៊ីស្ការីយ៉ុត បានបដិសេធការប្រើប្រេងទេព្វិរូដ៏មានតម្លៃនេះ ដោយនិយាយថា លក់វាយកប្រាក់ចែកអ្នកក្រីក្រវិញ ( សូមមើល យ៉ូហាន ១២:៤–៥) ។ ប៉ុន្តែក្នុងចិត្តពិតរបស់វានោះ « មិនមែនដោយព្រោះវាយកចិត្តទុកដាក់នឹងមនុស្សក្រីក្រទេ គឺដោយព្រោះវាជាចោរ វាកាន់ថង់ប្រាក់ » (យ៉ូហាន ១២:៦) ។ ឃ្លាថា « វាកាន់ថង់ប្រាក់ » សំដៅលើតួនាទីរបស់យូដាសជាអ្នករក្សាទ្រព្យសម្បត្តិនៃអស់អ្នកដែលបានធ្វើដំណើរជាមួយព្រះអង្គសង្គ្រោះ ។
មនុស្សជាច្រើនបានឮថាព្រះយេស៊ូវគង់នៅភូមិ បេថានី ហើយពួកគេបានមកជួបទ្រង់ ព្រមទាំង ឡាសារដែលព្រះយេស៊ូវបានប្រោសឲ្យគាត់រស់ពីស្លាប់កាលពីពេលមុននោះ ។ សូមចាំថា ដោយសារព្រះយេស៊ូវបានប្រទានជីវិតឲ្យឡាសារបានរស់ឡើងវិញ នោះពួកអ្នកដឹកនាំសាសន៍យូដាបានចាប់ផ្តើមផែនការពីរបៀបដែលពួកគេអាចធ្វើគុតទ្រង់ ។
សូមអាន យ៉ូហាន ១២:១០-១១ដោយរកមើលអ្វីដែលពួកសង្គ្រាជចង់ធ្វើចំពោះឡាសារ ។
ហេតុអ្វីពួកសង្គ្រាជចង់សម្លាប់ឡាសារ ?
ពួកសង្គ្រាជចង់សម្លាប់ឡាសារ ដើម្បីបំផ្លាញភស្តុតាងនៃអព្ភូតហេតុរបស់ព្រះអង្គសង្គ្រោះ ។ តើអ្នកនឹងពិពណ៌នាពីប្រតិកម្មខុសៗគ្នារបស់អ្នកដែលបានឃើញ ឬ បានដឹងពីការប្រោសឡាសារឲ្យរស់ពីស្លាប់ឡើងវិញដោយរបៀបណា ?
នៅក្នុង យ៉ូហាន ១២:១២–១៦ យើងរៀនថានៅថ្ងៃបន្ទាប់ពី ម៉ារាបានលាបប្រេងលើព្រះបាទារបស់ព្រះយេស៊ូវ នោះទ្រង់បានយាងចូលក្នុងក្រុងយេរូសាឡិមដោយជោគជ័យ ។ សូមអាន យ៉ូហាន ១២:១៧–១៩ដោយរកមើលអ្វីដែលមនុស្សបានឮពីព្រះយេស៊ូវដែលបានប្រោសឲ្យឡាសាររស់ពីស្លាប់ឡើងវិញ អំឡុងពេលការយាងចូលក្នុងក្រុងយេរូសាឡិមដោយជោគជ័យ ។
សូមកត់ចំណាំនៅក្នុង ខទី ១៩ នូវចម្លើយរបស់ពួកផារិស៊ី ចំពោះអ្វីដែលបានកើតឡើង ។ ពួកគេមានអារម្មណ៍ថាការខិតខំរបស់ពួកគេដើម្បីរារាំងមនុស្សកុំឲ្យដើរតាមព្រះយេស៊ូវនោះពុំបានជោគជ័យឡើយ ។ តើអ្នកគិតថា ហេតុអ្វីមនុស្សមួយចំនួនដែលឮពីអព្ភូតហេតុរបស់ព្រះយេស៊ូវបានជឿ និង ធ្វើតាមទ្រង់ ខណៈដែលមនុស្សដទៃទៀតជ្រើសបដិសេធទ្រង់យ៉ាងដូច្នេះ ?
យ៉ូហាន ១២:២០-៣៦
ព្រះយេស៊ូវបានប្រាប់ពីការសុគតរបស់ទ្រង់
នៅក្នុង យ៉ូហាន ១២:២០–២២ យើងរៀនថា « សាសន៍ក្រេក » (យ៉ូហាន ១២:២០) ដែលអាចប្រែចិត្តជឿជាពួកយូដា ដែលបានមកទីក្រុងយេរូសាឡិមដើម្បីប្រតិបត្តិបុណ្យរំលង បានស្នើសុំជួបជាមួយព្រះយេស៊ូវ ។ នៅពេលព្រះយេស៊ូវបានត្រាស់ដឹងពីសំណើរបស់ពួកគេ នោះទ្រង់បានបង្រៀនអំពីការរងទុក្ខ ការសុគត និង ការរស់ឡើងវិញរបស់ទ្រង់ដែលឈានចូលមកដល់ ។
សូមអាន យ៉ូហាន ១២:២៣–២៤ដោយរកមើលអ្វី ដែលព្រះបានបង្រៀនអំពីការសុគតរបស់ទ្រង់ ។ អ្នកអាចគូសចំណាំនូវអ្វីដែលអ្នករកឃើញ ។
ព្រះបន្ទូលរបស់ព្រះអង្គសង្គ្រោះអំពី « គ្រាប់ស្រូវ [ គ្រាប់ធញ្ញជាតិ ] » ត្រូវតែ « ធ្លាក់ចុះទៅដី ហើយងាប់ » (យ៉ូហាន ១២:២៤) ដើម្បីបង្កើតផលជាច្រើនឡើង គឺជារឿងប្រៀបប្រដូចទៅនឹងជ័យជំនះរបស់ទ្រង់លើសេចក្តីស្លាប់ និង អំពើបាប ។ ដង្វាយធួនរបស់ទ្រង់ នឹងធ្វើឲ្យមនុស្សទាំងអស់រស់ឡើងវិញ ហើយវានឹងនាំមកនូវជីវិតអស់កល្បជានិច្ចដល់អស់អ្នកដែលមានសេចក្តីជំនឿលើទ្រង់ ប្រែចិត្ត ហើយគោរពតាមព្រះបញ្ញត្តិទ្រង់ ។ នៅក្នុង យ៉ូហាន ១២:២៥-២៦ យើងអានថាព្រះអម្ចាស់បានលើកទឹកចិត្តដល់មនុស្សទាំងអស់ឲ្យលះបង់ខ្លួនពួកគេដើម្បីបម្រើទ្រង់ ។
នៅក្នុង យ៉ូហាន ១២:២៧–៣១ យើងរៀនថា ដោយដឹងពីការរងទុក្ខជាទម្ងន់របស់ទ្រង់ដែលនឹងកើតឡើង នោះព្រះយេស៊ូវបានតាំងព្រះទ័យបន្តឆ្ពោះទៅមុខដើម្បីសម្រេចឲ្យបាននូវព្រះរាជបំណងរបស់ទ្រង់ ។ ទ្រង់បានអធិស្ឋានថា ព្រះនាមរបស់ព្រះវរបិតានឹងត្រូវបានសរសើរតម្កើង ហើយអស់អ្នកដែលស្តាប់ បានឮសំឡេងមួយដែលថ្លែងទីបន្ទាល់ថាព្រះនាមព្រះវរបិតានឹងត្រូវបានសរសើរតម្កើង ។ សេចក្តីថ្លែងរបស់ព្រះវរបិតា បានឆ្លុះបញ្ចាំងពីទំនុកចិត្តទាំងស្រុងរបស់ទ្រង់លើព្រះរាជបុត្រារបស់ព្រះអង្គដើម្បីបំពេញនូវដង្វាយធួន ។
សូមអាន យ៉ូហាន ១២:៣២-៣៣ដោយរកមើលសេចក្តីស្លាប់បែបណាដែលព្រះអង្គសង្គ្រោះបានមានព្រះបន្ទូលអំពីការរងទុក្ខ និង អ្វីដែលវាជះឥទ្ធិពលលើមនុស្សលោក ។
បន្ទាប់ពីស្តាប់ឮការបង្រៀនរបស់ព្រះយេស៊ូវហើយ ហ្វូងមនុស្សបានសួរ ថានរណាគេជា « កូនមនុស្ស » ដែលត្រូវ « លើកឡើង » (យ៉ូហាន ១២:៣៤) ។ នៅក្នុង យ៉ូហាន ១២:៣៥-៣៦ យើងរៀនថាព្រះយេស៊ូវបានឆ្លើយតបដោយមានបន្ទូលអំពីខ្លួនទ្រង់ថាជា « ពន្លឺ » ។ ព្រះយេស៊ូវបានលើកទឹកចិត្តហ្វូងមនុស្សឲ្យដើរនៅក្នុងពន្លឺ ខណៈដែលទ្រង់គង់នៅជាមួយពួកគេ ។
យ៉ូហាន ១២:៣៧-៥០
ព្រះយេស៊ូវបង្រៀនពីលទ្ធផលនៃការជឿ និង ពុំជឿលើទ្រង់
តើអ្នកចាំដែរឬទេ ពីការអាននៅក្នុង យ៉ូហាន ១២:៩–១១ ពីរបៀបដែលហ្វូងមនុស្សមានប្រតិកម្មចំពោះអព្ភូតហេតុរបស់ព្រះអង្គសង្គ្រោះនោះ ? សូមអាន យ៉ូហាន ១២:៣៧ដោយរកមើលថាតើមនុស្សមួយក្រុមផ្សេងទៀតបានឆ្លើយតបយ៉ាងណាចំពោះអព្ភូតហេតុរបស់ព្រះយេស៊ូវ ។
ប្រតិកម្មផ្សេងៗគ្នាទាំងនេះ ចំពោះអព្ភូតហេតុដែលព្រះយេស៊ូវបានសម្តែងឡើងបង្ហាញថា អព្ភូតហេតុតែមួយមុខគត់នោះនឹងមិនបណ្តាលឲ្យយើងជឿលើព្រះយេស៊ូវគ្រីស្ទឡើយ ។
បើទោះបីជាអព្ភូតហេតុតែមួយគត់នោះពុំបណ្តាលឲ្យយើងជឿលើព្រះយេស៊ូវគ្រីស្ទក្តី សូមគិតអំពីរបៀបដែលអព្ភូតហេតុទាំងនោះអាចជះឥទ្ធិពលលើសេចក្តីជំនឿរបស់យើងទៅលើទ្រង់ ។
នៅក្នុង យ៉ូហាន ១២:៣៨–៤១ យើងរៀនថាការព្យាករនានាដែលត្រូវបានធ្វើឡើងដោយព្យាការីអេសាយ ( សូមមើល អេសាយ ៦:៩–១០; ៥៣:១–៣) ត្រូវបានបំពេញ តាមរយៈមនុស្សទាំងនោះដែលជ្រើសរើសពុំជឿលើព្រះយេស៊ូវ ។ ទោះបីជាមានកិច្ចការដ៏អស្ចារ្យរបស់ព្រះអង្គសង្គ្រោះក្តី មនុស្សមួយចំនួនជ្រើសយកការបិទភ្នែកខ្លួនឲ្យមើលមិនឃើញ ហើយពង្រឹងចិត្តរបស់ខ្លួនប្រឆាំងនឹងទ្រង់ ។
អែលឌើរ ហ្គែរីឌ ដ័បុលយូ ហ្កង នៃពួកចិតសិបនាក់ បានថ្លែងទីបន្ទាល់ពីពរជ័យដែលកើតមានឡើងតាមរយៈការជ្រើសជឿ និង ធ្វើតាមព្រះយេស៊ូវគ្រីស្ទ ៖
« ជំនឿគឺជាជម្រើសមួយ [ សូមមើល ម៉ូសាយ ៤:៩] ។ …
« នៅពេលយើងជ្រើសជឿ យើងយល់ ហើយឃើញកិច្ចការនានាក្នុងរបៀបជាច្រើន ។ នៅពេលយើងឃើញ និង រស់នៅតាមរបៀបនោះ យើងនឹងរីករាយ ហើយមានអំណរនៅក្នុងរបៀបមួយដែលមានតែដំណឹងល្អតែប៉ុណ្ណោះដែលអាចធ្វើឲ្យវាកើតមានឡើង » (« Choose Goodness and Joy » New Era ខែ សីហា ឆ្នាំ ២០១១ ទំព័រ ៤៤ ) ។
-
សូមគិតអំពីសេចក្តីថ្លែងរបស់អែលឌើរ ហ្កងដែលថា « សេចក្តីជំនឿគឺជាជម្រើស » ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពីអ្វី ដែលសេចក្តីថ្លែងនេះមានន័យចំពោះអ្នក ។
សូមអាន យ៉ូហាន ១២:៤២-៤៣ដោយរកមើលមូលហេតុដែលពួកសង្គ្រាជរបស់អ្នកប្រាជ្ញាច្បាប់សាសន៍យូដា ពុំទទួលស្គាល់ដោយបើកចំហដល់ជំនឿរបស់ខ្លួនលើព្រះយេស៊ូវឡើយ ។
សូមពន្យល់ជាពាក្យសម្តីខ្លួនផ្ទាល់ពីអ្វី ដែលអ្នកគិតថាវាមានន័យចំពោះអ្នកដើម្បីស្រឡាញ់ « សេចក្ដីសរសើររបស់មនុស្សជាជាងសេចក្ដីសរសើររបស់ព្រះវិញ » (យ៉ូហាន ១២:៤៣) ៖
ចេញពីខគម្ពីរទាំងនេះយើងរៀនថា ការខ្វល់ខ្វាយកាន់តែច្រើនពីការបំពេញចិត្តរបស់មនុស្សដទៃ ជាជាងបំពេញព្រះទ័យដល់ព្រះ អាចរារាំងយើងពីការទទួលស្គាល់ដោយបើកចំហពីជំនឿរបស់យើងលើព្រះយេស៊ូវគ្រីស្ទ និង ដំណឹងល្អរបស់ទ្រង់ ។ សូមគិតពីការសរសេរសេចក្តីពិតនេះ ដាក់ក្នុងព្រះគម្ពីររបស់អ្នក ។
-
សូមឆ្លើយនឹងសំណួរខាងក្រោមមួយ ឬ ច្រើនជាងនោះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើមានឧទាហរណ៍អ្វីខ្លះនៅក្នុងជំនាន់របស់យើងនេះ អំពីការខ្វល់ខ្វាយយ៉ាងខ្លាំងចំពោះអ្វីដែលមនុស្សដទៃគិត ដែលរារាំងមនុស្សពីការទទួលស្គាល់ដោយចំហពីជំនឿរបស់ខ្លួនលើព្រះគ្រីស្ទ និង ដំណឹងល្អរបស់ទ្រង់ ?
-
តើមានវិធីណាខ្លះដែលយើងអាចបង្ហាញថា យើងខ្វល់ខ្វាយច្រើនពីអ្វី ដែលគាប់ព្រះទ័យព្រះ ជាជាងអ្វីដែលបំពេញចិត្តរបស់មនុស្សដែលនៅជុំវិញយើងនោះ ?
-
តើលទ្ធផលវិជ្ជមានអ្វីខ្លះ ដែលអាចកើតមានឡើងពីការបង្ហាញថាយើងជឿលើព្រះយេស៊ូវគ្រីស្ទ និង ដំណឹងល្អរបស់ទ្រង់ ?
-
សូមគិតអំពីបទពិសោធន៍មួយនៅពេលដែលអ្នកនៅក្នុងភាពងងឹតទាំងស្រុង ។ សូមគិតថាអ្នកនឹងមានអារម្មណ៍យ៉ាងណា ។ តើអ្នកមានអារម្មណ៍ថាអ្នកនៅក្នុងស្ថានភាពដែលនឹងមានគ្រោះថ្នាក់ឬទេ ? តើការមានពន្លឺបានជួយអ្នកនៅក្នុងស្ថានភាពនោះយ៉ាងដូចម្តេច ?
តើការនៅក្នុងស្ថានភាពងងឹតនៃរូបកាយស្រដៀងគ្នាទៅនឹងការងងឹតខាងវិញ្ញាណយ៉ាងដូចម្តេច ?
តើគ្រោះថ្នាក់អ្វីខ្លះអាចកើតឡើងមកពីការរស់នៅក្នុងភាពងងឹតខាងវិញ្ញាណនោះ ?
សូមអាន យ៉ូហាន ១២:៤៤-៤៦ដោយរកមើលរបៀបដែលអស់អ្នកដែលជឿលើព្រះយេស៊ូវគ្រីស្ទអាចបានទទួលពរ ។
គោលការណ៍មួយដែលយើងអាចរៀនចេញពី ខទី ៤៦ គឺថា ប្រសិនបើយើងជឿលើព្រះយេស៊ូវគ្រីស្ទ នោះយើងនឹងពុំរស់នៅក្នុងក្នុងភាពងងឹតខាងវិញ្ញាណឡើយ ។
សូមសញ្ជឹងគិតពីរបៀបដែលព្រះយេស៊ូវគ្រីស្ទគឺជាពន្លឺ និង របៀបដែលការជឿលើទ្រង់អាចដកចេញនូវភាពងងឹតខាងវិញ្ញាណចេញពីជីវិតរបស់មនុស្សម្នាក់ ។
-
សូមរើសយកប្រធានបទដូចតទៅនេះ ហើយឆ្លើយសំណួរពីរនៅក្នុងសៀវភៅកំណត់ហេតុសិក្សាព្រះគម្ពីររបស់អ្នក ៖ គោលបំណងនៃរូបកាយរបស់យើង, ប្រព័ន្ធកម្សាន្ត និង ផ្សព្វផ្សាយ, ទទួលបាននូវភាពសុខសាន្ត និង សុភមង្គល, អាពាហ៍ពិពាហ៍ និង ក្រុមគ្រួសារ, ជីវិតបន្ទាប់ពីជីវិតនេះ ។ ប្រសិនបើមានមនុស្សម្នាក់ទៀត អ្នកអាចពិភាក្សាសំណួរទាំងនេះជាមួយបុគ្គលនោះ ហើយសរសេរអំពីអ្វីដែលអ្នកពិភាក្សា ។
-
តើមនុស្សដែលមានភាពងងឹតខាងវិញ្ញាណអាចជឿលើប្រធានបទនេះឬទេ ?
-
តើពន្លឺ ឬ ការណែនាំ និង ភាពច្បាស់លាស់អ្វីខ្លះដែលព្រះយេស៊ូវគ្រីស្ទ និង ដំណឹងល្អរបស់ទ្រង់បានប្រទានឲ្យអំពីប្រធានបទនេះនោះ ?
-
សូមគិតអំពីប្រធានបទដែលបានបង្រៀននៅក្នុង យ៉ូហាន ១២:៤៦ ដែលអាចជួយយើងយល់ពីមូលហេតុដែលយើងអាចឃើញពីប្រធានបទជាក់លាក់ និង បញ្ហានានាខុសពីមនុស្សដទៃអាចឃើញ ។ សូមចងចាំថាយើងក៏អាចឃើញពីប្រធានបទ និង បញ្ហាជាក់លាក់នានា ស្រដៀងទៅនឹងមនុស្សដែលនៅក្នុងជំនឿផ្សេងអាចឃើញផងដែរ ។ មានមនុស្សដែលពុំមានអំណោយទាននៃព្រះវិញ្ញាណបរិសុទ្ធ ដែលនៅតែមានជំនឿរឹងមាំលើព្រះយេស៊ូវគ្រីស្ទ ហើយជម្រើសរបស់ពួកគេត្រូវបានបំភ្លឺដោយពន្លឺនៃព្រះគ្រីស្ទ ( សូមមើល មរ៉ូណៃ ៧:១៦–១៩, គ. និង ស. ៨៨:៧, ១១) និង តាមរយៈការបង្រៀនរបស់ទ្រង់ ។
ដូចបានកត់ត្រានៅក្នុង យ៉ូហាន ១២:៤៧–៥០ព្រះយេស៊ូវបានពន្យល់ថាអស់អ្នកដែលពុំជឿលើព្រះបន្ទូលរបស់ទ្រង់ ហើយបដិសេធទ្រង់នឹងត្រូវជំនុំជម្រះ ដោយព្រះបន្ទូលទ្រង់ដែលបានមានព្រះបន្ទូល ជាព្រះបន្ទូលព្រះវរបិតាសួគ៌បានប្រទានឲ្យទ្រង់ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា យ៉ូហាន ១២ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖