មេរៀនទី ១ ៖ ថ្ងៃទី ៣
ការសិក្សាព្រះគម្ពីរ
សេចក្តីផ្តើម
មេរៀននេះនឹងជួយអ្នកឲ្យយល់ពីសារៈសំខាន់នៃការសិក្សាព្រះគម្ពីរប្រចាំថ្ងៃ និង ការអានព្រះគម្ពីរសញ្ញាថ្មីទាំងមូលដែលជាផ្នែកមួយនៃវគ្គសិក្សានេះ ។ អ្នកក៏អាចរៀនពីវិធីកែលម្អការសិក្សាព្រះគម្ពីររបស់ខ្លួនផងដែរ ។
សេចក្ដីត្រូវការសម្រាប់ការសិក្សាព្រះគម្ពីរប្រចាំថ្ងៃឲ្យមានប្រសិទ្ធភាព
សូមពិចារណាពីសេចក្តីថ្លែងការណ៍ខាងក្រោម ហើយគូសចម្លើយរបស់អ្នកនៅលើការវាស់វែងនេះ ។ អ្នកនឹងពុំត្រូវបានសុំឲ្យរាយការណ៍ពីចម្លើយរបស់ខ្លួនដល់គ្រូបង្រៀនឡើយ ។
នៅពេលអ្នកសិក្សាមេរៀននេះ សូមពិចារណាពីរបៀបដែលអ្នកអាចកែលម្អការសិក្សាព្រះគម្ពីររបស់អ្នក ។
សូមអានសេចក្ដីថ្លែងការណ៍ខាងក្រោមដោយអែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់ ៖
« ព្រះគម្ពីរមាននូវព្រះបន្ទូលរបស់ព្រះគ្រីស្ទ ហើយជាអាងនៃទឹករស់ដែលយើងមានសិទ្ធិប្រើបាន ហើយដែលយើងអាចផឹកបានយ៉ាងច្រើន ហើយយូរអង្វែង ។ …
« តាមរយៈសកម្មភាពធម្មតាជារៀងរាល់ថ្ងៃ អ្នក និង ខ្ញុំបាត់បង់សារជាតិទឹកយ៉ាងច្រើនដែលទឹកនោះវាជួយគាំទ្រយ៉ាងខ្លាំងដល់រូបកាយរបស់យើង ។ ការស្រេកគឺជាការត្រូវការទឹកពីកោសិការាងកាយ ហើយសារជាតិទឹកនៅក្នុងរូបកាយយើងត្រូវតែបំពេញបន្ថែមជារៀងរាល់ថ្ងៃ ។ តាមពិតទៅ វាមិនសមឡើយដែលត្រូវ ‹ បំពេញ › សារជាតិទឹកម្ដងកាល ខណៈដែលមានកង្វះទឹកក្នុងខ្លួនយ៉ាងយូរនៅចន្លោះពេលនោះទេ ។ វាគឺជារឿងពិតដូចគ្នាចំពោះខាងវិញ្ញាណដែរ ។ ការស្រេកខាងវិញ្ញាណគឺជាសេចក្ដីត្រូវការមួយសម្រាប់ទឹករស់ ។ លំហូរទៀងទាត់មួយនៃទឹករស់គឺមានភាពប្រសើរខ្លាំងណាស់ចំពោះការភ្លក់ម្ដងម្កាល » ( « A Reservoir of Living Water » [ ការប្រជុំពិសេសនៃប្រព័ន្ធអប់រំសាសនាចក្រ ថ្ងៃទី ៤ ខែ កុម្ភៈ ឆ្នាំ ២០០៧ ] ទំព័រ ២, ៩ គេហទំព័រ speeches.byu.edu) ។
សូមបំពេញគោលការណ៍ខាងក្រោម ដែលយើងអាចរៀនពីសេចក្តីថ្លែងការណ៍របស់អែលឌើរ បែដណា អំពីអ្វីដែលយើងទទួលបានពីការសិក្សាព្រះគម្ពីរប្រចាំថ្ងៃ ៖ នៅពេលយើងសិក្សាព្រះគម្ពីរប្រចាំថ្ងៃ នោះយើងទទួលបាន ដែលយើងត្រូវការ ។
គុណតម្លៃនៃព្រះគម្ពីរដ៏បរិសុទ្ធនៅសម័យរបស់យើង
ជំនួសឲ្យការអានសេចក្តីថ្លែងការណ៍ខាងក្រោមដោយអែលឌើរ ឌី ថត គ្រីស្តូហ្វឺសិន នោះអ្នកមើលវីដេអូ Mormon Message « The Blessings of Scripture » ( ៣:០៤ ) ដែលមាននៅលើគេហទំព័រ LDS.orgដែលមានដំណើររឿងរបស់អែលឌើរ គ្រីស្តូហ្វឺសុន អំពីលោក វិល្លិម ធីនឌេល និង ដំបូន្មានអំពីសារៈសំខាន់នៃព្រះគម្ពីរ ។
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានរៀបរាប់ពីការលះបង់ដែលបុរសម្នាក់បានធ្វើដើម្បីជួយឲ្យមនស្សជាច្រើនអាចអានព្រះគម្ពីរប៊ីប ។
« នៅថ្ងៃទី ៦ ខែតុលា ឆ្នាំ ១៥៣៦ មានបុរសកម្សត់ម្នាក់ត្រូវបាននាំខ្លួនទៅគុកងងឹតនៅប្រាសាទវិលវ័រឌេ ជិតប្រ៊ុសសេល ប៊េលជីម ។ ប្រហែលជាជិតមួយឆ្នាំកន្លះ បុរសម្នាក់នេះបានរងទុក្ខដោយភាពឯកោនៅក្នុងគុកដ៏កខ្វក់មួយ ។ ឥឡូវនេះ នៅខាងក្រៅជញ្ជាំងប្រាសាទ អ្នកទោសនោះត្រូវគេចងភ្ជាប់នឹងបង្គោលមួយ ។ គាត់មានពេលបន្លឺសំឡេងអធិស្ឋានខ្លាំងៗជាចុងក្រោយ ពីមុនគាត់ត្រូវគេប្រហារជីវិតដោយការព្យួរ-ក ដោយពោលថា ‹ ឱ! ព្រះអម្ចាស់អើយ សូមបើកព្រះនេត្រស្ដេចប្រទេសអង់គ្លេសផង › ។ រំពេចនោះ រូបកាយគាត់ត្រូវគេដុតត្រង់បង្គោលនោះ ។ តើបុរសនេះជានរណា តើត្រូវគេដាក់ទោសដោយរឿងហេតុអ្វីដែរ … ? គាត់ឈ្មោះ វិល្លិម ធីនឌេល បទឧក្រិដ្ឋរបស់គាត់គឺដោយសារគាត់បានបកប្រែ ហើយបោះពុម្ពព្រះគម្ពីរប៊ីបជាភាសាអង់គ្លេស ។
« … នៅក្នុងការប្រកែកគ្នាមួយជាមួយនឹងបព្វជិតភាពម្នាក់ដែលជំទាស់នឹងការយកព្រះគម្ពីរមកឲ្យមនុស្សសាមញ្ញ លោក ធីនឌេល បានសច្ចាថា ‹ ប្រសិនបើព្រះទុកជីវិតឲ្យខ្ញុំតែបន្តិចទៀត ខ្ញុំនឹងធ្វើឲ្យក្មេងប្រុសកសិករម្នាក់ចេះដឹងព្រះគម្ពីរច្រើនជាងសម្ដេចសង្ឃទៅទៀត ! › …
« លោក វិល្លិម ធីនឌេល ពុំមែនជាមនុស្សដំបូង ឬក៏ចុងក្រោយគេនៃជនរស់នៅក្នុងប្រទេស និង ភាសាជាច្រើនដែលបានលះបង់រហូតស្លាប់ ដើម្បីនាំព្រះបន្ទូលនៃព្រះឲ្យចេញផុតពីភាពអាប់អួរឡើយ ។ … តើពួកគេបានដឹងអ្វីខ្លះអំពីសារៈសំខាន់នៃដំណឹងល្អដែលយើងក៏ត្រូវដឹងដែរនោះ ? តើមនុស្សដែលបានរស់នៅប្រទេសអង់គ្លេសក្នុងសវត្សរ៍ទី ១៦ ជាអ្នកដែលបានចំណាយប្រាក់យ៉ាងច្រើន ហើយបានប្រថុយប្រថាននឹងគ្រោះថ្នាក់ដើម្បីមានព្រះគម្ពីរប៊ីបនោះបានយល់ដឹងអ្វីខ្លះ ជារឿងដែលយើងក៏គួរតែយល់ដឹងដែរនោះ ? (« The Blessing of Scripture » Ensign ឬ Liahona ខែ ឧសភា ឆ្នាំ ២០១០ ទំព័រ ៣២ ) ។
តើអ្នកគិតថាហេតុអ្វីមនុស្សបានធ្វើការលះបង់ដ៏ធំធេងបែបនេះ ដើម្បីឲ្យមានព្រះគម្ពីរដូច្នេះ ?
អែលឌើរ គ្រីស្តូហ្វឺសិន បានបន្ដ ៖ « ក្នុងសម័យលោក ធីនឌេល ភាពអវិជ្ជមានខាងបទគម្ពីរកាន់តែរីកសាយភាយដោយសារមនុស្សគ្មានព្រះគម្ពីរប៊ីបប្រើច្រើន ជាពិសេសភាសាដែលពួកគេអាចយល់បាន ។ សព្វថ្ងៃនេះព្រះគម្ពីរប៊ីប និង ព្រះគម្ពីរផ្សេងទៀតមានគ្រប់ទីកន្លែង ប៉ុន្តែមានការកើនឡើងនូវភាពអវិជ្ជាខាងបទគម្ពីរ ដោយសារមនុស្សពុំបើកវា ។ ជាលទ្ធផល ពួកគេបានបំភ្លេចអ្វីដែលជីដូនជីតាពួកគេដឹង » (« The Blessing of Scripture »ទំព័រ ៣៣ ) ។
ហេតុអ្វីអ្នកគិតថាមនុស្សមួយចំនួន នៅសម័យយើងនេះមិនអានព្រះគម្ពីរដូចដែលពួកគេគួរតែអាន ?
អែលឌើរ គ្រីស្តូហ្វឺសិន បានបញ្ចប់ ៖ « សូមពិចារណាអំពីទំហំនៃពរជ័យរបស់យើងក្នុងការមានព្រះគម្ពីរប៊ីប និងព្រះគម្ពីរ ៩០០ ទំព័របន្ថែមទៀតរួមមាន ព្រះគម្ពីរមរមន គោលលទ្ធិ និង សេចក្តីសញ្ញា និង មុក្តាដ៏មានតម្លៃមហិមា ។ … ប្រាកដណាស់ តាមរយៈពរជ័យនេះព្រះអម្ចាស់កំពុងមានបន្ទូលប្រាប់យើងថា សេចក្ដីត្រូវការរបស់យើងសម្រាប់ការប្រើព្រះគម្ពីរឲ្យបានញឹកញាប់គឺធំជាងជំនាន់ណាៗទាំងអស់ » (« The Blessing of Scripture »ទំព័រ ៣៥) ។
សេចក្តីពិតមួយដែលយើងរៀនពីសេចក្តីថ្លែងការណ៍របស់អែលឌើរ គ្រីស្តូហ្វឺសិន នោះគឺថា យើងត្រូវការព្រះគម្ពីរនៅសម័យយើងនេះជាងជំនាន់មុនៗទៅទៀត ។
-
សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើអ្នកគិតថាហេតុអ្វីនៅសព្វថ្ងៃនេះយើងត្រូវការព្រះគម្ពីរជាងជំនាន់មុនៗទៅទៀត ?
សាវកប៉ុលបានសរសេរលិខិតមួយដែលនៅក្នុងនោះលោកបានរៀបរាប់ពីស្ថានភាពមួយចំនួននៃពិភពលោកនៅថ្ងៃចុងក្រោយ ។ សូមអាន ធីម៉ូថេទី ២ ៣:១–៥, ១៣ដោយរកមើលអំពើបាប និង ឥរិយាបថមួយចំនួនដែលលោកបាននិយាយដែលនឹងកើតមានជាទូទៅនៅក្នុងជំនាន់យើងនេះ ។ ( អ្នកគួរមើលទៅលេខយោងដើម្បីទទួលបានជំនួយក្នុងការយល់ន័យពាក្យ ឬ ឃ្លាពិបាកៗនៅក្នុងខគម្ពីរទាំងនេះ ) ។
តើអំពើបាប និង ឥរិយាបថមួយចំនួនដែលមាននៅក្នុងខគម្ពីរទាំងនេះដែលអ្នកធ្លាប់ឃើញនៅក្នុងសង្គមយើងសព្វថ្ងៃមានអ្វីខ្លះ ?
សូមអាន ធីម៉ូថេទី ២ ៣:១៤–១៧ដោយរកមើលរបៀបដែលយើងអាចស្វែងរកសុវត្ថិភាពនៅអំឡុងគ្រាដ៏គ្រោះថ្នាក់ទាំងនេះ ។ អ្នកអាចគូសចំណាំនូវអ្វីដែលអ្នករកឃើញ ។
ចេញពីអ្វីដែលយើងបានរៀននៅក្នុង ធីម៉ូថេទី ២ ៣:១៥–១៧តើយើងទទួលបានពរជ័យអ្វីខ្លះ នៅពេលយើងសិក្សាព្រះគម្ពីរ ហើយរស់នៅតាមការបង្រៀនរបស់វា ? សូមសរសេរចម្លើយរបស់អ្នក នៅក្នុងចន្លោះដែលបានផ្តល់ឲ្យដើម្បីបំពេញប្រយោគខាងក្រោម ៖ នៅពេលយើងសិក្សាព្រះគម្ពីរ នោះយើងអាចទទួលបាន ដែលនឹងនាំយើងឆ្ពោះទៅរកសេចក្តីសង្គ្រោះ ។
សេចក្ដីថ្លែងការណ៍ដែលអ្នកបានបំពេញនេះគឺជាឧទាហរណ៍មួយនៃគោលការណ៍ដំណឹងល្អ ។ គោលការណ៍ និង គោលលទ្ធិទាំងឡាយនៃដំណឹងល្អរបស់ព្រះយេស៊ូវគ្រីស្ទ គឺជាសេចក្ដីពិតដែលពុំផ្លាស់ប្ដូរ ដែលផ្ដល់ការដឹកនាំនៅក្នុងជីវិតរស់នៅរបស់យើង ។ ចំណុចមួយនៃគោលបំណងសំខាន់របស់ព្រះគម្ពីរ គឺដើម្បីបង្រៀនគោលលទ្ធិ និង គោលការណ៍ទាំងឡាយនៃដំណឹងល្អ ។ យើងអាចធ្វើឲ្យការសិក្សាព្រះគម្ពីរផ្ទាល់ខ្លួនរបស់យើងកាន់តែមានអត្ថន័យ ដោយការស្រាវជ្រាវរកគោលលទ្ធិ និង គោលការណ៍នានា ការពិចារណាពីអត្ថន័យរបស់វា និង ការអនុវត្តវានៅក្នុងជីវិតរបស់យើង ។
-
សូមមើលទៅគោលការណ៍ដែលអ្នកបានបំពេញខាងលើ ។ រួចសូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើនៅពេលណាដែរ ដែលអ្នកធ្លាប់មានអារម្មណ៍ថា អ្នកបានទទួលប្រាជ្ញា ពន្លឺ សេចក្តីពិត ការកែតម្រូវ ឬ ការណែនាំជាលទ្ធផលមកពីការសិក្សាព្រះគម្ពីរ ?
អានព្រះគម្ពីរសញ្ញាថ្មីប្រចាំថ្ងៃ
ការរំពឹងទុកមួយសម្រាប់វគ្គសិក្សានេះក្នុងថ្នាក់សិក្ខាសាលាគឺឲ្យអ្នកអាន ព្រះគម្ពីរសញ្ញាថ្មីទាំងមូល ។ នេះគឺជាតម្រូវការមួយដើម្បីទទួលបានសញ្ញាបត្រថ្នាក់សិក្ខាសាលា ។ ការអានព្រះគម្ពីរសញ្ញាថ្មីទាំងមូលនឹងតម្រូវឲ្យមានការខិតខំជាប់លាប់ ។
តើអ្នកធ្លាប់សាកល្បងបឺតទឹក ឬ ទឹកក្រូចដោយប្រើទុយោច្រើនជាងមួយឬទេ ? ប្រសិនបើអ្នកមានទុយោច្រើន សូមសាកល្បងបឺតទឹក ឬ ទឹកក្រូចមួយកែវដោយប្រើទុយោ ៧ដើមរួមគ្នា ។ វាមានការលំបាកដើម្បីបឺតទឹកទាំងអស់ពីក្នុងកែវ ។ ប៉ុន្តែប្រសិនបើអ្នកបឺតវាយឺត និង ជាប់ជានិច្ចដោយប្រើទុយោតែមួយ នោះអ្នកនឹងឃើញថាអ្នកអាចបឺតទឹកទាំងអស់យ៉ាងស្រួល ( ហើយបទពិសោធន៍នេះគឺមានសេចក្តីអំណរកាន់តែខ្លាំង ! ) ។
តើសកម្មភាពនេះមានទំនាក់ទំនងយ៉ាងណាដែរទៅនឹងគោលដៅមេរៀនរបស់យើងចំពោះការអានព្រះគម្ពីរសញ្ញាថ្មីទាំងមូលអំឡុងពេលវគ្គសិក្សានេះ ?
សូមប្រើសមីការខាងក្រោមនេះដើម្បីជួយអ្នកឲ្យឃើញពីរបៀប ដែលអ្នកអាចបំពេញគោលដៅនៃការអានព្រះគម្ពីរសញ្ញាថ្មីទាំងមូល តាមរយៈការអានផ្នែកតូចៗជារៀងរាល់ថ្ងៃ ៖
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពីកិច្ចការមួយចំនួន ដែលអាចជួយអ្នកបង្កើតទម្លាប់សិក្សាព្រះគម្ពីរប្រចាំថ្ងៃ ដូច្នេះអ្នកអាចទទួលបាននូវប្រាជ្ញា ពន្លឺ សេចក្តីពិត ការកែតម្រូវ ឬ ការណែនាំពីព្រះគម្ពីរ ។ សូមសរសេរគោលដៅមួយដើម្បីញែកពេលវេលារាល់ថ្ងៃ សម្រាប់ការសិក្សាព្រះគម្ពីរផ្ទាល់ខ្លួន ហើយអានព្រះគម្ពីរសញ្ញាថ្មីទាំងមូល ។
វិធីសាស្ត្រ និង ជំនាញសិក្សាព្រះគម្ពីរ
-
បញ្ជីនៃវិធីសាស្ត្រ និង ជំនាញសិក្សាព្រះគម្ពីរខាងក្រោម អាចពង្រីកការសិក្សាព្រះគម្ពីររបស់អ្នក ។ សូមជ្រើសយកវិធីសាស្ត្រ និង ជំនាញពីរខាងក្រោម ហើយសាកល្បងដោយប្រើវគ្គបទគម្ពីរដែលទាក់ទងគ្នា ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមពន្យល់ពីរបៀបដែលជំនាញទាំងពីរនេះ អាចជួយអ្នកនៅក្នុងការសិក្សាព្រះគម្ពីរប្រចាំថ្ងៃរបស់អ្នក ។
វិធីសាស្ត្រ និង ជំនាញសិក្សាព្រះគម្ពីរ
ការដាក់ជំនួសឈ្មោះ ៖ ដើម្បីជួយអ្នកឲ្យភ្ជាប់គោលលទ្ធិ និងគោលការណ៍នានាមកពីបទគម្ពីរទៅក្នុងជីវិតរបស់អ្នក សូមដាក់ឈ្មោះអ្នកជំនួសឈ្មោះដែលនៅក្នុងបទគម្ពីរ ។ សូមសាកល្បងប្រើជំនាញសិក្សាព្រះគម្ពីរនេះជាមួយនឹងឈ្មោះរបស់ ស៊ីម៉ូន ពេត្រុស នៅក្នុង ម៉ាថាយ ១៦:១៥–១៧ ។
បុព្វហេតុ និង លទ្ធផល ៖ ដើម្បីជួយអ្នកស្គាល់គោលការណ៍ទាំងឡាយនៃដំណឹងល្អនៅក្នុងបទគម្ពីរនានា សូមរកមើលពាក្យទំនាក់ទំនងគ្នានៃឃ្លា « ប្រសិនបើ-នោះ » និង « ពីព្រោះ-ហេតុដូច្នោះហើយ » ។ សូមសាកល្បងប្រើជំនាញនេះជាមួយនឹង ម៉ាថាយ ៦:១៤-១៥ ។
បញ្ជីទាំងឡាយនៃបទគម្ពីរ ៖ ពេលខ្លះបទគម្ពីរ មាននូវបញ្ជីនៃរឿងដូចជា ការណែនាំ ឬការព្រមាន ។ នៅពេលអ្នករកឃើញបញ្ជីទាំងឡាយ សូមគិតពីការដាក់លេខលើលក្ខខណ្ឌនីមួយៗ ។ សូមសាកល្បងប្រើជំនាញនេះជាមួយនឹង កាឡាទី ៥:២២-២៣ ។
ភាពផ្ទុយគ្នា ៖ ពេលខ្លះបទគម្ពីរមានភាពផ្ទុយគ្នានៃគំនិត ព្រឹត្តិការណ៍ និង មនុស្ស ។ ភាពផ្ទុយទាំងនេះគូសបញ្ជាក់ពីគោលការណ៍ទាំងឡាយនៃដំណឹងល្អ ។ សូមស្វែងរកភាពផ្ទុយក្នុងខគម្ពីរនីមួយៗក្នុងជំពូក និងពេញមួយជំពូក និងពេញមួយព្រះគម្ពីរ ។ សូមសាកល្បងជំនាញនេះជាមួយនឹង ម៉ាថាយ ៥:១៤-១៦ ។
ការនឹកគិតក្នុងចិត្ត ៖ សូមស្វែងរកការពិពណ៌នាលម្អិត ដែលអាចជួយអ្នកឲ្យបង្កើតរូបភាពក្នុងគំនិត ពេលអ្នកអាន ។ រូបភាពត្រូវបានបង្ហាញនៅចំព្រឹត្តការណ៍ជាក់លាក់ ។ ការណ៍នេះអាចជួយពង្រឹងទីបន្ទាល់របស់អ្នកអំពីភាពពិតនៃអ្វីដែលអ្នកអាននៅក្នុងបទគម្ពីរ ។ សូមសាកល្បងជំនាញនេះជាមួយនឹង ម៉ាថាយ ៨:២៣-២៧ ។
និមិត្តសញ្ញា ៖ ពាក្យដូចជា ដូច, ដូចជា ឬ ប្រៀបប្រដូច អាចជួយអ្នកស្គាល់និមិត្តសញ្ញានានា ។ សូមរកមើលឲ្យលើសពីនិមិត្តសញ្ញា តាមរយៈការរុករកលក្ខណៈធម្មជាតិរបស់វា ហើយពិចារណាអំពីចរិតលក្ខណៈរបស់វា ។ ជំនួយនានាសម្រាប់ការសិក្សាព្រះគម្ពីរ ដូចជាលេខយោង Bible Dictionaryនិង Topical Guide ឬ សេចក្ដីណែនាំដល់បទគម្ពីរទាំងឡាយ អាចជួយអ្នកឲ្យបកស្រាយពីនិមិត្តសញ្ញាមួយចំនួនបាន ។ សូមសាកល្បងប្រើជំនាញសិក្សានេះជាមួយ ម៉ាថាយ ១៣:២៤-៣០ ។ ( អ្នកអាចប្រៀបធៀបការបកស្រាយរបស់អ្នកអំពីរឿងប្រដូចដែលមាននៅក្នុង គោលលទ្ធិ និង សេចក្ដីសញ្ញា ៨៦:១–៧) ។
សេចក្តីយោងបទគម្ពីរ ជាញឹកញាប់វគ្គបទគម្ពីរមួយអាចពន្យល់ ឬ បញ្ជាក់ច្បាស់នូវឃ្លា ឬ បរិបទមួយដែលមាននៅក្នុងវគ្គបទគម្ពីរផ្សេងទៀត ។ សូមតភ្ជាប់វគ្គបទគម្ពីរជាមួយគ្នា ដោយប្រើលេខយោង លិបិក្រម ឬ Topical Guide ឬ សេចក្ដីណែនាំដល់បទគម្ពីរទាំងឡាយ ដើម្បីជួយបង្ហាញអត្ថន័យនៃវគ្គបទគម្ពីរមួយ ។ សូមអនុវត្តជំនាញនេះដោយអាន យ៉ូហាន ១០:១៦ រួចរកមើលសេចក្តីយោងបទគម្ពីរនៅក្នុងលេខយោងក នៅ នីហ្វៃទី ៣ ១៥:២១។ តើការអាន នីហ្វៃទី ៣ ១៥:២១ ជួយអ្នកឲ្យយល់អត្ថន័យក្នុង យ៉ូហាន ១០:១៦កាន់តែប្រសើរឡើងដោយរបៀបណា ?
ការពិចារណា ៖ ការពិចារណារួមបញ្ចូលទាំង ការគិត ការស្មឹងស្មាធ ការសួរសំណួរ និង ការវាយតម្លៃលើអ្វីៗដែលអ្នកដឹង និង អ្វីៗដែលអ្នកបានរៀន ។ ជាញឹកញាប់ ការពិចារណាជួយយើងឲ្យយល់អំពីអ្វី ដែលយើងត្រូវធ្វើដើម្បីអនុវត្តគោលការណ៍ទាំងឡាយនៃដំណឹងល្អ ។ សូមពិចារណាពីរបៀបដែលអ្នកអាចអនុវត្តសេចក្ដីពិតទាំងនេះនៅក្នុង ហេព្រើរ ១២:៩ ។
ការអនុវត្ត ៖ នៅពេលអ្នកស្គាល់ ហើយយល់គោលលទ្ធិ និង គោលការណ៍ទាំងឡាយដែលមាននៅក្នុងព្រះគម្ពីរ អ្នកអាចទទួលបានចំណេះដឹងយ៉ាងជ្រាលជ្រៅដោយធ្វើតាមសេចក្ដីពិតដែលអ្នករកឃើញ ។ ព្រះយេស៊ូវគ្រីស្ទបានមានបន្ទូលថា « បើអ្នកណាចង់ធ្វើតាមព្រះហឫទ័យ [ របស់ព្រះវរបិតា ] នោះនឹងបានដឹងជាសេចក្តីបង្រៀននេះមកពីព្រះ ឬជាខ្ញុំនិយាយដោយអាងខ្លួនខ្ញុំ » (យ៉ូហាន ៧:១៧) ។ សូមរកមើលឱកាសដើម្បីអនុវត្តអ្វីដែលអ្នករៀន ឬ ប្រដូចវាទៅនឹងជីវិតរបស់អ្នក ពេលអ្នកសិក្សាព្រះគម្ពីរដោយខ្លួនឯង ( សូមមើល នីហ្វៃទី ១ ១៩:២៣) ។
សូមរកមើលរបៀបដើម្បីអនុវត្តជំនាញសិក្សានិមួយៗនៅសប្តាហ៍ខាងមុខៗ នៅពេលអ្នកសិក្សាព្រះគម្ពីរសញ្ញាថ្មី ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាមេរៀនអំពី « ការសិក្សាព្រះគម្ពីរ » ហើយបានបញ្ចប់វានៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖