ពេត្រុសទី ២

សេចក្ដីផ្ដើម

សាវកពេត្រុសបានលើកទឹកចិត្តពួកបរិសុទ្ធឲ្យ រីកចម្រើននៅក្នុងចំណេះដឹងអំពីព្រះគ្រីស្ទ តាមរយៈការប្រែក្លាយដូចជាទ្រង់ ។ ពេត្រុសក៏បានព្រមានផងដែរថា ព្យាការី និង គ្រូបង្រៀនក្លែងក្លាយដឹកនាំប្រជាជនឲ្យវង្វេង ។ លោកបានព្យាករថា នៅថ្ងៃចុងក្រោយ ពួកទុច្ចរិតនឹងចំអកដាក់ពួកសុចរិតដោយសារសេចក្តីជំនឿរបស់ពួកគេដែលថាព្រះយេស៊ូវគ្រីស្ទនឹងយាងមកវិញ ។ ពេត្រុសបានលើកទឹកចិត្តពួកបរិសុទ្ធឲ្យរៀបចំខ្លួនដោយឧស្សាហ៍ព្យាយាម សម្រាប់ការយាងមកជាលើកទីពីររបស់ព្រះអង្គសង្គ្រោះ ។

ពេត្រុសទី ២ ១:១-១១

ពេត្រុសបង្រៀនអំពីរបៀប ទទួលទាននិស្ស័យនៃព្រះយេស៊ូវគ្រីស្ទ

សូមគិតអំពីបុគ្គលិកលក្ខណៈ ឬ គុណសម្បត្តិដែលអ្នកពេញចិត្តនៅក្នុងសមាជិកគ្រួសារ ឬ មិត្តភក្ដិ ។ តើអ្នកជឿថា អ្នកអាចអភិវឌ្ឍបុគ្គលិកលក្ខណៈ ឬ គុណសម្បត្តិល្អៗដូច្នោះបានដែរឬទេ ? ប្រសិនបើអ្នកជាយុវនារី សូមគិតអំពីបាវចនានៃយុវនារី ដែលមានផ្នែកមួយចែងថា ៖ « យើងគឺជាបុត្រីនៃព្រះវរបិតាសួគ៌របស់យើង ទ្រង់ស្រឡាញ់យើង ហើយយើងស្រឡាញ់ព្រះអង្គ » ។ សូមគិតពីគុណតម្លៃដែលមាននៅក្នុងបាវចនានេះជាពិសេសនិស្ស័យនៃព្រះ ។

មិនថាអ្នកជាយុវជន ឬ យុវនារីឡើយ តើ « និស្ស័យនៃព្រះ » មានន័យបែបណាចំពោះអ្នក ?

សាវកពេត្រុសបានសរសេរសំបុត្រទៅកាន់សមាជិកសាសនាចក្រ ដែលបានទទួលសេចក្តីជំនឿលើព្រះយេស៊ូវគ្រីស្ទ ។ ដូចបានកត់ត្រានៅក្នុង ពេត្រុសទី ២ ១:១–៤ លោកបានបង្រៀនថា ពួកគេអាច « បានចំណែកជានិស្ស័យនៃព្រះ » ( ខទី ៤ ) ។ ឃ្លា « និស្ស័យនៃព្រះ » សំដៅលើលក្ខណៈរបស់ព្រះវរបិតាសួគ៌ និង ព្រះយេស៊ូវគ្រីស្ទ ។

សូមអាន ពេត្រុសទី ២ ១:៥-៧ ដោយរកមើលលក្ខណៈមួយចំនួននៃនិស្ស័យនៃព្រះរបស់ព្រះវរបិតា និង ព្រះរាជបុត្រា ។ នៅក្នុងតារាងខាងក្រោមនេះ សូមសរសេរលក្ខណៈដែលអ្នករកឃើញនៅក្នុងវគ្គបទគម្ពីរនេះ ។ បន្ទាប់មកនៅលើរង្វាស់ពី ១ ដល់ ១០ សូមវាយតម្លៃថា តើអ្នកមានអារម្មណ៍ឧស្សាហ៍ខ្លាំងប៉ុណ្ណា នៅពេលអ្នកកំពុងព្យាយាមទទួលបាននូវលក្ខណៈនៃព្រះទាំងនេះនៅក្នុងជីវិតអ្នក (១ = ពុំព្យាយាមទទួលបាន ១០ = ព្យាយាមយ៉ាងខ្លាំងដើម្បីទទួលបាន ) ។ លក្ខណៈនៃព្រះដំបូងគេត្រូវបានសរសេររួចហើយ ។ ពាក្យ អត់សង្កត់ នៅក្នុង ខទី ៦ មានន័យថា ចេះគ្រប់គ្រងខ្លួនឯង ។

លក្ខណៈនៃព្រះ
សេចក្ដីជំនឿ	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០
	១ ២ ៣ ៤ ៥ ៦ ៧ ៨ ៩ ១០

សូមអាន ពេត្រុសទី ២ ១:៨-១១ ដោយរកមើលពរជ័យអ្វីខ្លះ ដែលអាចកើតឡើងដល់អស់អ្នកដែលឧស្សាហ៍ព្យាយាម នៅក្នុងការអភិវឌ្ឍន៍លក្ខណៈនៃព្រះរបស់ព្រះវរបិតា និង ព្រះយេស៊ូវគ្រីស្ទ ។ ឃ្លា « ធ្វើឲ្យដំណើរដែលទ្រង់ហៅ ហើយរើសតាំងអ្នករាល់គ្នា បានពិតប្រាកដឡើង » នៅក្នុង ខទី ១០ មានន័យថា អំឡុងពេលនៃជីវិតរមែងស្លាប់ អ្នកទទួលបានការបញ្ជាក់ ឬ ការសន្យាថា អ្នកបានទទួលជីវិតដ៏នៅអស់កល្បជានិច្ច ពេត្រុសនិយាយពីការណ៍នេះថាជា « ពាក្យទំនាយដ៏ពិតជាង » ( ពេត្រុសទី ២ ១:១៩ ) ។

រូបភាព
ព្យាការី យ៉ូសែប ស្ម៊ីធ

ព្យាការី យូសែប ស្ម៊ីធ បានបង្រៀនថា ការហៅ និង ការរើសតាំងរបស់មនុស្សម្នាក់ ត្រូវបានធ្វើឲ្យពិតប្រាកដឡើង បន្ទាប់ពីបុគ្គលម្នាក់នោះបានបង្ហាញថាស្មោះត្រង់ចំពោះព្រះអម្ចាស់ ៖ « បន្ទាប់ពី មនុស្សម្នាក់មានសេចក្តីជំនឿលើព្រះគ្រីស្ទ ប្រែចិត្តពីអំពើបាបរបស់ខ្លួន ហើយបានជ្រមុជទឹកសម្រាប់ការផ្តាច់បាបខ្លួន ហើយទទួលព្រះវិញ្ញាណបរិសុទ្ធ ( ដោយការការដាក់ដៃលើក្បាល ) ដែលជាព្រះដ៏ជាជំនួយដំបូងគេ បន្ទាប់មកទុកឲ្យគាត់បន្តបន្ទាបខ្លួនចំពោះព្រះ ដោយស្វែងរកសេចក្តីសុចរិតដោយអន្ទះសា ហើយរស់នៅតាមគ្រប់ទាំងព្រះបន្ទូលនៃព្រះ នោះមិនយូរប៉ុន្មានព្រះអម្ចាស់នឹងមានបន្ទូលទៅគាត់ថា កូនប្រុស ចូរឯងទទួលភាពតម្កើងឡើងចុះ ។ នៅពេលព្រះអម្ចាស់បានធ្វើការសាកល្បងយ៉ាងខ្លាំងជាមួយគាត់ ហើយឃើញថាគាត់សម្រេចចិត្តដើម្បីបម្រើទ្រង់គ្រប់យ៉ាង នោះគាត់នឹងឃើញថាការហៅ និង ការរើសតាំងរបស់ខ្លួនត្រូវបានធ្វើឲ្យប្រាកដឡើង » ( នៅក្នុង History of the Church ៣:៣៨០ ) ។

ពេត្រុសទី ២ ១:១២-២១

ពេត្រុសចែកចាយទីបន្ទាល់អំពីព្រះយេស៊ូវគ្រីស្ទ និង បង្រៀនអំពីព្រះគម្ពីរ

តើអ្នកគិតថា ហេតុអ្វីមនុស្សមួយចំនួនមានការរិះគន់ពីអាយុរបស់ព្យាការី និង សាវកមួយចំនួនយ៉ាងដូច្នេះ ? តើអ្នកនឹងឆ្លើយបែបណា ទៅនឹងនរណាម្នាក់ដែលនិយាយថា ព្យាការី និង ពួកសាវកមានភាពចាស់ជរាពេកដើម្បីធ្វើជាអ្នកដឹកនាំដ៏មានប្រសិទ្ធភាព ? នៅពេលអ្នកបន្តសិក្សា ពេត្រុសទី ២ ១ សូមរកមើលសេចក្តីពិតអំពីព្យាការី និង សាវកដែលថា មានសារៈសំខាន់ជាងអាយុរបស់ពួកគេទៅទៀត ។

ដូចមានកត់ត្រានៅក្នុង ពេត្រុសទី ២ ១:១២–១៩ សាវកពេត្រុសបានដឹងថា លោកនឹងស្លាប់ក្នុងពេលខាងមុខយ៉ាងឆាប់ ហេតុដូច្នេះហើយលោកបានចែកចាយទីបន្ទាល់របស់លោកអំពីព្រះយេស៊ូវគ្រីស្ទ ។ នៅក្នុងទីបន្ទាល់នោះ លោកបានថ្លែងថា « ពាក្យទំនាយដ៏ពិតជាង » ( ពេត្រុសទី ២ ១:១៩ ) ។ ឃ្លា « ពាក្យទំនាយដ៏ពិតជាង » ត្រូវបានផ្តល់ន័យឲ្យយល់កាន់តែច្បាស់នៅក្នុង គោលលទ្ធិ និង សេចក្តីសញ្ញា ១៣១:៥ ថាជាចំណេះដឹងមួយដែលបុគ្គលម្នាក់អាចទទួលបាននៅក្នុងជីវិតនេះ តាមរយៈវិវរណៈដែលគាត់ « បានភ្ជាប់ទុកចំពោះជីវិតដ៏នៅអស់កល្បជានិច្ច » ។ ការណ៍នេះក៏សំដៅដូចទៅនឹង « [ ការធ្វើឲ្យ ] ការហៅ និង ការរើសតាំងអ្នករាល់គ្នាបានពិតប្រាកដឡើង » ( ពេត្រុសទី ២ ១:១០ ) ដែលអ្នកបានសិក្សានៅក្នុងផ្នែកដំបូងនៃ ពេត្រុសទី ២ ១ ។

សូមអាន ពេត្រុសទី ២ ១:២០-២១ ដោយរកមើលអ្វីដែលពេត្រុសបានបង្រៀនអំពីតួនាទីរបស់ « មនុស្សបរិសុទ្ធរបស់ព្រះ » ឬ ព្យាការី ។ សូមកត់សម្គាល់ថា ការបកប្រែដោយយ៉ូសែប ស្ម៊ីធ ពេត្រុសទី ២ ១:២០ ( នៅក្នុង ពេត្រុសទី ២ ១:២០ ) អានថា « ដោយដឹងសេចក្តីនេះជាមុនដំបូងថា គ្មានពាក្យទំនាយណាក្នុងគម្ពីរ ដែលស្រាយបានតាមតែចិត្តមនុស្សនោះឡើយ » ។

ផ្អែកលើអ្វីដែលពេត្រុសបានបង្រៀន នោះយើងអាចឃើញសេចក្តីពិតដូចតទៅនេះ ៖ ព្យាការីទទួលព្រះគម្ពីរតាមរយៈព្រះវិញ្ញាណបរិសុទ្ធ ។ ( អ្នកអាចសរសេរ ឬ កត់ចំណាំគោលការណ៍នេះ នៅក្នុងព្រះគម្ពីររបស់អ្នក ) ។ ព្រះគម្ពីរ « ជាពាក្យពេចន៍ ព្រមទាំងពាក្យសរសេរ និងពាក្យនិយាយ » ( សេចក្ដីណែនាំដល់បទគម្ពីរទាំងឡាយ « ព្រះគម្ពីរ » scriptures.lds.org សូមមើលផងដែរ គ. និង ស. ៦៨:២–៤ ) ។

ព្រះគម្ពីរមួយចំនួនត្រូវបានទទួលស្គាល់ថាជាបទដ្ឋានព្រះគម្ពីរ ។ កាណុងគឺជា « ការប្រមូលផ្តុំនៃសៀវភៅពិសិដ្ឋៗដែលបានទទួលស្គាល់ហើយមានសិទ្ធិអំណាច ។ នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនោះ គម្ពីរកាណុងទាំងប៉ុន្មាន ហៅថា គម្ពីរបមាណីយ ហើយមានទាំងព្រះគម្ពីរសញ្ញាចាស់ និងព្រះគម្ពីរសញ្ញាថ្មី ព្រះគម្ពីរមរមន គោលលទ្ធិ និងសេចក្ដីសញ្ញា ព្រមទាំងមុក្ដាដ៏មានតម្លៃមហិមា » ( សេចក្ដីណែនាំដល់បទគម្ពីរទាំងឡាយ « កាណុង » scriptures.lds.org) ។

រូបភាព
អែលឌើរ ដាល្លិន អេក អូក

នៅពេលអ្នកអានទីបន្ទាល់ដូចតទៅនេះដោយ អែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ សូមរកមើលទីបន្ទាល់របស់លោកដែលថា ព្យាការីបន្តទទួលព្រះគម្ពីរ ៖ « តំណបព្វជិតភាពគឺជាបណ្ដាញទាក់ទងដែលព្រះបានមានបន្ទូលមកកាន់កូនចៅរបស់ទ្រង់ តាមរយៈព្រះគម្ពីរកាលពីអតីតកាល ។ ហើយតាមរយៈខ្សែស្រឡាយនេះហើយ ដែលទ្រង់មានបន្ទូលតាមរយៈការបង្រៀន និង ការទូន្មានរបស់ព្យាការី និង សាវក និង ថ្នាក់ដឹកនាំដ៏បំផុសគំនិតផ្សេងទៀតដែលរស់នៅសព្វថ្ងៃនេះ » ។( « Two Lines of Communication » Ensign ឬ Liahona ខែ វិច្ឆិកា ឆ្នាំ ២០១០ ទំព័រ ៨៤ ) ។

សូមពិចារណាពីសារៈសំខាន់នៃការដឹងថាព្រះបានប្រើ ហើយនៅតែប្រើព្យាការីឲ្យផ្តល់ព្រះគម្ពីរដល់កូនចៅរបស់ទ្រង់ ។

សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើមានវគ្គបទគម្ពីរណាខ្លះមកពីព្រះគម្ពីរ ឬ មកពីព្យាការីជំនាន់បុរាណ ឬ ព្យាការីជំនាន់បច្ចុប្បន្ននេះ ដែលមានឥទ្ធិពលលើជីវិតរបស់អ្នកនោះ ?
2. តើអ្នកធ្លាប់បានទទួលពរជ័យ តាមរយៈខគម្ពីរនោះយ៉ាងដូចម្តេច ?

សូមពិចារណាម្តងទៀតអំពីទីបន្ទាល់របស់អែលឌើរ អូក ហើយរកមើលឱកាសនានានៅថ្ងៃខាងមុខ ដើម្បីថ្លែងទីបន្ទាល់ប្រាប់អ្នកដទៃ តាមការដឹកនាំពីព្រះវិញ្ញាណ អំពីភាពពិតនៃព្យាការី និង សារៈសំខាន់នៃការទទួល និង ការសិក្សាព្រះគម្ពីរ ។

ពេត្រុសទី ២ ២

ពេត្រុសព្រមានពីការបោកបញ្ឆោតដោយគ្រូបង្រៀនក្លែងក្លាយ

ហេតុអ្វីមនុស្សអាចជ្រើសរើសធ្វើអំពើបាប ទោះបីជាពួកគេដឹងថាអ្វីដែលពួកគេកំពុងធ្វើគឺជារឿងខុសឆ្គងនោះ ?

នៅក្នុង ពេត្រុសទី ២ ២ យើងអានថា សាវកពេត្រុសបានព្រមានពួកបរិសុទ្ធអំពីមនុស្សដែលបានព្យាយាមបោកបញ្ឆោតពួកគេ ។ នៅពេលអ្នកសិក្សា ពេត្រុសទី ២ ២ សូមរកមើលសេចក្តីពិតដែលអាចជួយអ្នកឲ្យស្គាល់ និង ចៀសវាងពីការបោកបញ្ឆោតដែលនាំទៅរកអំពើបាប ។

សូមអាន ពេត្រុសទី ២ ២:១-៣ ដោយរកមើលការព្រមានរបស់ពេត្រុសថា តើនរណាដែលព្យាយាមបោកបញ្ឆោតពួកបរិសុទ្ធ ។ « បក្សពួកដែលបង្ខូចបំផ្លាញ » ( ពេត្រុសទី ២ ២:១ ) គឺជាការបង្រៀនក្លែងក្លាយ និង បំផ្លិចបំផ្លាញ ។

សេចក្ដីពិតមួយដែលយើងអាចរៀនចេញពីខគម្ពីរទាំងនេះគឺថា គ្រូបង្រៀនក្លែងក្លាយព្យាយាមបោកបញ្ឆោតពួកយើង ។

សូមអានសេចក្ដីថ្លែងការណ៍ខាងក្រោមដោយអែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ ដោយរកមើលអ្វីដែលគ្រូបង្រៀនក្លែងក្លាយសព្វថ្ងៃនេះធ្វើដើម្បីបោកបញ្ឆោតពួកយើង ៖

រូបភាព
អែលឌើរ អិម រ័សុល បាឡឺដ

« ពួកព្យាការីក្លែងក្លាយ និងពួកគ្រូបង្រៀនក្លែងក្លាយ គឺជាពួកអ្នកដែលប្រកាសថា ព្យាការី យ៉ូសែប ស្ម៊ីធ ជាអ្នកបោកប្រាស់ចម្លងសំណៅ ពួកគេមានការសង្ស័យថា ការនិមិត្តដំបូងជាបទពិសោធន៍ដ៏ពិតមួយ ឬយ៉ាងណា ។ ពួកគេប្រកាសថា ព្រះគម្ពីរមរមន និងកិច្ចការផ្សេងៗទៀតដែលមានចែងក្នុងសាសនា ពុំមែនជាបញ្ជីព្រះគម្ពីរពីបុរាណនោះទេ ។ ពួកគេក៏ព្យាយាមបំលែងលក្ខណៈនៃក្រុមព្រះផងដែរ ហើយពួកគេបដិសេធថា ព្រះបានប្រទាន និងបន្តប្រទានវិវរណៈនៅសព្វថ្ងៃនេះ ដល់ព្យាការីរបស់ទ្រង់ដែលត្រូវបានតែងតាំង និងគាំទ្រ ។

« ព្យាការី និង គ្រូបង្រៀនក្លែងក្លាយគឺជាអស់អ្នកដែលព្យាយាមបកស្រាយព្រះគម្ពីរតាមបែបថ្មីមួយយ៉ាងក្រអឺតក្រទម ដើម្បីបង្ហាញថា អត្ថបទពិសិដ្ឋទាំងនោះគួរតែពុំត្រូវបានអានថាជាព្រះបន្ទូលព្រះ ចំពោះកូនចៅរបស់ទ្រង់ឡើយ ប៉ុន្តែថាវាជាពាក្យដែលមកពីមនុស្សដែលគ្មានការបំផុសគំនិតសោះ ដែលកំណត់ដោយការបង្ខូច និង វប្បធម៌ដែលលំអៀងផ្ទាល់ខ្លួនរបស់ពួកគេ ។ ហេតុដូច្នោះហើយ ពួកគេជំរុញថា ព្រះគម្ពីរត្រូវតែបកស្រាយសារជាថ្មី ហើយថាពួកគេមានគុណសម្បត្តិពិសេសដើម្បីធ្វើការបកស្រាយនោះ ។

« ប្រហែលអ្វីដែលហិនហោចខ្លាំងបំផុត គឺពួកគេបដិសេធនឹងការមានព្រះជន្មរស់ឡើងវិញ និងដង្វាយធួនរបស់ព្រះគ្រីស្ទ ដោយប្រកែកថា គ្មានព្រះឯណាអាចសង្គ្រោះយើងបានឡើយ ។ ពួកគេបដិសេធសេចក្ដីត្រូវការដើម្បីមានព្រះអង្គសង្គ្រោះមួយអង្គ ។ និយាយឲ្យខ្លីទៅ ពួកអ្នកបង្ខូចទាំងនេះ ព្យាយាមបកស្រាយគោលលទ្ធិនៃសាសនាចក្រជាថ្មី ដើម្បីឲ្យសមទៅនឹងទស្សនៈប្រឌិតទុកមុនរបស់ពួកគេផ្ទាល់ ហើយនៅក្នុងដំណើរការនោះ ក៏បដិសេធព្រះគ្រីស្ទ និងតួនាទីជាព្រះមេស៊ីរបស់ទ្រង់ ។

« ពួកព្យាការីក្លែងក្លាយ និងគ្រូបង្រៀនក្លែងក្លាយក៏ជាពួកអ្នកដែលព្យាយាមផ្លាស់ប្ដូរគោលលទ្ធិដែលព្រះប្រទាន និងគោលលទ្ធិដែលផ្អែកលើព្រះគម្ពីរ ដែលការពារភាពស័ក្ដិសិទ្ធិនៃអាពាហ៍ពិពាហ៍ លក្ខណៈដ៏ទេវភាពនៃក្រុមគ្រួសារ និងគោលលទ្ធិចាំបាច់សម្រាប់សីលធម៌ផ្ទាល់ខ្លួន ។ ពួកគេគាំទ្រដល់ការផ្ដល់និយមន័យជាថ្មីដល់សីលធម៌ ដើម្បីធ្វើឲ្យសមដល់អំពើកាមគុណ ផិតក្បត់ និងទំនាក់ទំនងភេទដូចគ្នា ។ មានអ្នកខ្លះគាំទ្រដោយបើកចំហនូវការដាក់ឲ្យស្របច្បាប់អំពីការរៀបអាពាហ៍ពិពាហ៍ភេទដូចគ្នា » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦៣–៦៤ ) ។

សូមគិតពីគ្រានានា នៅពេលអ្នកអាចជួបនឹងការបង្រៀន ឬ សារលិខិតមកពីគ្រូបង្រៀនក្លែងក្លាយ ។ ហេតុអ្វីវាជាការល្អដើម្បីដឹងពីសារលិខិត និង ការបង្រៀនរបស់គ្រូបង្រៀនក្លែងក្លាយ ?

នៅក្នុង ពេត្រុសទី ២ ២:៤–១៧ យើងអានឧទាហរណ៍មួយចំនួន អំពីអ្វីដែលបានកើតឡើងចំពោះ មនុស្សដែលបានធ្វើតាមគ្រូបង្រៀងក្លែងក្លាយកាលពីជំនាន់ដើម រួមមានទាំងអស់អ្នកដែលធ្វើតាមសាតាំងនៅក្នុងជីវិតមុនឆាកជីវិតនេះ មនុស្សដែលបានរស់នៅអំឡុងជំនាន់ណូអេ និង មនុស្សនៃទីក្រុង សូដុំម និង កូម៉ូរ៉ា ។ ពេត្រុសក៏ពន្យល់ផងដែរអំពីមនុស្សដែលពុំទទួលរងឥទ្ធិពលរបស់គ្រូបង្រៀនក្លែងក្លាយ ដូចជាណូអេ និង ឡុត ។ ពេត្រុសបានពិពណ៌នាពីអាកប្បកិរិយាទុច្ចរិតរបស់គ្រូបង្រៀនក្លែងក្លាយ ។

រូបភាព

ជន្លេនជាប់ផ្លែសន្ទូច

តើអ្នកនេសាទត្រីចាប់ត្រីតាមរបៀបណា ?

ល្បិចរបស់អ្នកនេសាទត្រីដើម្បីចាប់ត្រី គឺដូចជាល្បិចកលរបស់គ្រូបង្រៀនក្លែងក្លែងអញ្ចឹងដែរ ។ សូមអាន ពេត្រុសទី ២ ២ :១៨-១៩ ដោយរកមើលរបៀបដែលគ្រូបង្រៀនក្លែងក្លាយដាក់អន្ទាក់ពួកបរិសុទ្ធឲ្យធ្វើតាមការបង្រៀនរបស់ពួកគេ ។

តើការបង្រៀនរបស់ព្យាការី និង គ្រូបង្រៀនក្លែងក្លាយដូចគ្នាទៅនឹងនុយនៃសន្ទូចស្ទូចត្រីយ៉ាងដូចម្តេច ?

នៅក្នុង ពេត្រុសទី ២ ២:១៩ យើងរៀនថា គ្រូបង្រៀនក្លែងក្លាយសន្យានូវសិទ្ធិសេរីភាព ។ ឬពាក្យម៉្យាងទៀត ជាជាងការគោរពព្រះបញ្ញត្តិ ពួកគេបង្រៀនថា អំពើបាបនាំឲ្យមានសេរីភាពដ៏ធំមហិមា ។

យើងអាចរៀនសេចក្ដីពិតមួយចេញពីខគម្ពីរទាំងនេះថា គ្រូបង្រៀនក្លែងក្លាយព្យាយាមបោកបញ្ឆោតពួកយើង ឲ្យជឿថាអំពើបាបនាំឲ្យមានសេរីភាពដ៏ធំមហិមា ។

សូមអាន ខទី ១៩ ម្តងទៀត ដោយរកមើលអ្វីដែលកើតឡើងចំពោះ មនុស្សដែលយកឈ្នះលើការបង្រៀនក្លែងក្លាយ និង អំពើបាប ។

នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរ ឧទាហរណ៍ពីរ ឬ បីអំពីការបង្រៀនក្លែងក្លាយ ដែលបង្ហាញថា ជំរុញឲ្យមានសេរីភាព ប៉ុន្តែភាពពិតនាំទៅរកការជាប់ឃុំឃាំងទៅវិញ ។

សូមអាន ពេត្រុសទី ២ ២:២០–២២ ដោយរកមើលអ្វីដែលពេត្រុសបានបង្រៀនអំពីអ្នកដែលបានត្រឡប់ទៅធ្វើអំពើបាបវិញ បន្ទាប់ពីគេចពុំធ្វើបានធ្វើវា ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. ហេតុអ្វីអ្នកគិតថា អស់អ្នកដែល « រួចពីសេចក្តីស្មោកគ្រោក របស់លោកីយ៍នេះ ដោយបានស្គាល់ព្រះអម្ចាស់យេស៊ូវគ្រីស្ទ ជាព្រះអង្គសង្គ្រោះហើយ » ( ពេត្រុសទី ២ ២:២០ ) អាចត្រូវបានល្បួងឲ្យត្រឡប់ទៅផ្លូវដែលពោរពេញដោយអំពើបាបរបស់ពួកគេវិញ ?
2. តើដំបូន្មានអ្វីខ្លះដែលអ្នកនឹងទូន្មាន ដើម្បីជួយដល់មនុស្សម្នាក់ឲ្យបន្តស្មោះត្រង់ចំពោះព្រះយេស៊ូវគ្រីស្ទ និង ដំណឹងល្អរបស់ទ្រង់ ជាជាងត្រឡប់ទៅរកអំពើបាបពីមុនៗរបស់គេវិញ ?

ពេត្រុសទី ២ ៣

ពេត្រុសថ្លែងទីបន្ទាល់ពីការយាងមកលើកទីពីររបស់ព្រះយេស៊ូវគ្រីស្ទ

នៅពេលសាវកពេត្រុសបានបញ្ចប់សំបុត្រនេះ ប្រហែលជាសំបុត្រចុងក្រោយនៃទីបន្ទាល់របស់លោក ដែលលោកបានរំឭកពួកបរិសុទ្ធអំពីការយាងមកជាលើកទីពីររបស់ព្រះយេស៊ូវគ្រីស្ទ ហើយបានបង្រៀនពួកគេពីរបៀបដើម្បីរៀបចំខ្លួនសម្រាប់ហេតុការណ៍នោះ ។ ដូចបានកត់ត្រានៅក្នុង ពេត្រុសទី ២ ៣:១–៩ លោកបានបង្រៀនថា នៅថ្ងៃចុងក្រោយមានមនុស្សមួយចំនួននឹងសើចចំអក ហើយឡកឡើយដល់អស់អ្នកដែលជឿលើការយាងមកជាលើកទីពីរ ។

សូមអាន ពេត្រុសទី ២ ៣ :១០-១៤ ដោយរកមើលអ្វីដែលពេត្រុសបានបង្រៀនអំពីការយាងមកជាលើកទីពីរ ។ ពាក្យ កិរិយា នៅក្នុង ខទី ១១ សំដៅលើការប្រព្រឹត្តិ ឬ អាកប្បកិរិយា ( សូមមើល ធីម៉ូថេទី ១ ៤:១២ ) និង ពាក្យ « ឆាប់មកដល់ » នៅក្នុង ខទី ១២ មានន័យថាចង់បានអ្វីមួយដោយអស់ពីចិត្ត ។

តើពាក្យទូន្មានអ្វីខ្លះដែលពេត្រុសបានទូន្មានដល់ពួកបរិសុទ្ធ ឲ្យរៀបចំខ្លួនពួកគេ សម្រាប់ការយាង មកជាលើកទីពីរ ?

ឃ្លា « ឥតសៅហ្មង ហើយឥតកន្លែងបន្ទោសបាន » នៅក្នុង ខទី ១៤ មានន័យថាការបានជ្រះស្អាតពីអំពើបាប ។ អស់អ្នកដែលជ្រះពីអំពើបាប បានស្រុះស្រួលនឹងព្រះ ឬ បានស្តារនូវភាពចុះសម្រុងគ្នា និង សាមគ្គីភាពជាមួយទ្រង់ ហើយនឹងឃើញថាមានភាពសុខសាន្តជាមួយព្រះអង្គសង្គ្រោះ នៅពេលទ្រង់យាងមក ។ ចេញពីការបង្រៀនរបស់ពេត្រុស យើងរៀនថា យើងអាចរៀបចំសម្រាប់ការយាងមកជាលើកទីពីរ តាមរយៈការរស់នៅស្របតាមការបង្រៀនរបស់ព្រះ ហើយទន្ទឹងរង់ចាំចំពោះការយាងមករបស់ទ្រង់ ដោយស្មោះអស់ពីចិត្ត ។ សូមគិតពីការសរសេរ ឬ កត់ចំណាំគោលការណ៍នេះនៅក្នុងព្រះគម្ពីររបស់អ្នកក្បែរ ពេត្រុសទី ២ ៣:១១–១៤ ។

តើមានអ្វីខ្លះដែលយើងអាចធ្វើ ដើម្បីរស់នៅស្របតាមការបង្រៀនរបស់ព្រះ នៅពេលយើងទន្ទឹងរង់ចាំចំពោះការយាងមកជាលើកទីពីរដោយស្មោះអស់ពីចិត្តនោះ ?

នៅក្នុង ពេត្រុសទី ២ ៣:១៥-១៨ យើងអានថា ពេត្រុសបានទទួលស្គាល់ថា ការបង្រៀនមួយចំនួនរបស់ប៉ុលមានការពិបាកយល់ ។ លោកក៏ព្រមានផងដែរអំពីការធ្លាក់ទៅក្នុងអំពើទុច្ចរិត ។ លោកបានអញ្ជើញពួកបរិសុទ្ធឲ្យ « ចម្រើនឡើងក្នុងព្រះគុណ ហើយក្នុងការស្គាល់ដល់ព្រះអម្ចាស់របស់យើង » ( ពេត្រុសទី ២ ៣:១៨ ) ។

សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា ពេត្រុសទី ២ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖