មេរៀនទី ៦ ៖ ថ្ងៃទី ២
យ៉ូសែប ស្ម៊ីធ--ម៉ាថាយ ម៉ាថាយ ២៤
សេចក្តីផ្តើម
ព្រះយេស៊ូវគ្រីស្ទបានព្យាករអំពីការបំផ្លិចបំផ្លាញក្រុងយេរូសាឡិម និងព្រះវិហារបរិសុទ្ធ ។ ទ្រង់បានបើកសម្ដែងទីសម្គាល់អំពីការយាងមកជាលើកទីពីររបស់ទ្រង់ ហើយបានបង្គាប់ពួកអ្នកស្មោះត្រង់ឲ្យចាំយាម ហើយរៀបចំខ្លួនសម្រាប់ថ្ងៃនោះ ។
យ៉ូសែប ស្ម៊ីធ--ម៉ាថាយ ១:១–២០
ព្រះយេស៊ូវព្យាករអំពីការបំផ្លិចបំផ្លាញនៃក្រុងយេរូសាឡិម និងព្រះវិហារបរិសុទ្ធ
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរសំណួរមួយ ឬច្រើនដែលអ្នកមានអំពីការយាងមកជាលើកទីពីររបស់ព្រះយេស៊ូវគ្រីស្ទ ។ នៅពេលអ្នកសិក្សា យ៉ូសែប ស្ម៊ីធ--ម៉ាថាយ នៅថ្ងៃនេះ សូមស្វែងរកចម្លើយចំពោះសំណួរដែលអ្នកបានសរសេរ ។
យ៉ូសែប ស្ម៊ីធ--ម៉ាថាយ គឺជាការបកប្រែដោយ យ៉ូសែប ស៊្មីធ ម៉ាថាយ ២៣:៣៩–២៤:៥៦ ។ វាមាននៅក្នុងមុក្តាដ៏មានតម្លៃមហិមា នៅបន្ទាប់ពីគម្ពីរអ័ប្រាហាំ ។
សូមអាន យ៉ូសែប ស្ម៊ីធ--ម៉ាថាយ ១:៤ ដោយស្វែងរកសំណួរ ដែលពួកសិស្សបានទូលសួរព្រះយេស៊ូវ ។ អ្នកអាចនឹងចង់គូសចំណាំសំណួរទាំងនេះ នៅក្នុងព្រះគម្ពីររបស់អ្នក ។
នៅក្នុង យ៉ូសែប ស្ម៊ីធ--ម៉ាថាយ ១:៥–២០ ព្រះអង្គសង្គ្រោះបានឆ្លើយសំណួរទីមួយ—អំពីពេលដែលក្រុងយេរូសាឡិម និង ព្រះវិហារបរិសុទ្ធនឹងត្រូវបំផ្លិចបំផ្លាញចោល ។ នៅក្នុង ខទី ២១–៣៧ ទ្រង់បានឆ្លើយសំណួរទីពីរ—អំពីទីសម្គាល់នៃការយាងមកជាលើកទីពីររបស់ទ្រង់ និង ការបំផ្លិចបំផ្លាញពួកទុច្ចរិត ។
សូមអាន យ៉ូសែប ស្ម៊ីធ--ម៉ាថាយ ១:៥–១២ ដោយស្វែងរកទីសម្គាល់នានា ដែលទាក់ទងនឹងការបំផ្លិចបំផ្លាញក្រុងយេរូសាឡិម ។
ទោះជាព្រះយេស៊ូវបានមានបន្ទូលថាពួកសិស្សរបស់ទ្រង់នឹងត្រូវរងទុក្ខនៅពេលនេះក្ដី ក៏ទ្រង់បានធ្វើការសន្យាមួយដ៏សំខាន់ដែរថា ប្រសិនបើយើងបន្តខ្ជាប់ខ្ជួន ហើយពុះពារ នោះយើងនឹងបានសង្គ្រោះ ។ អ្នកអាចចង់គូសចំណាំនូវអ្វីដែលអ្នករកឃើញនៅក្នុង ខទី ១១ ។
ការបន្តខ្ជាប់ខ្ជួនមានន័យថា ការមិនព្រមចុះចាញ់ការល្បួង និង អារក្ស ។ នៅក្នុងព្រះគម្ពីរ ពាក្យ ខ្ជាប់ខ្ជួន ពេលខ្លះត្រូវបានប្រើជាមួយពាក្យ នឹងនរ ( ឧទាហរណ៍ សូមមើល ម៉ូសាយ ៥:១៥ ) ។
គណៈប្រធានយុវជន និង យុវនារីទូទៅ បានពន្យល់អំពីអត្ថន័យនៃឃ្លា « ខ្ជាប់ខ្ជួន ហើយនឹងនរ » ៖ « តើការមានភាពខ្ជាប់ខ្ជួន ហើយនឹងនរមានន័យដូចម្ដេច ? ការមានភាពខ្ជាប់ខ្ជួនគឺជាការប្រកាន់ដោយមុតមាំ និង មិនអាចកែប្រែបាន ជាការមុតមាំក្នុងជំនឿ និង ការប្ដេជ្ញាចិត្ត និង ការមានភក្ដីភាព ព្រមទាំងស្មោះត្រង់ ។ ដូចគ្នានេះដែរ ការមានភាពនឹងនរគឺជាការមិនទោរទន់ និងការមិនអាចងាករេ ឬ បង្វែរបាន ។ ការមានភាពខ្ជាប់ខ្ជួន និង ភាពនឹងនរនៅក្នុងដំណឹងល្អនៃព្រះយេស៊ូវគ្រីស្ទ គឺជាការតាំងចិត្តដើរតាមទ្រង់ ដែលពោរពេញដោយកិច្ចការល្អៗជានិច្ច » (« Steadfast and Immovable » New Era ខែ មករា ឆ្នាំ ២០០៨ ទំព័រ ៨ ) ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានផ្ដល់ការយល់ដឹងដូចខាងក្រោម ។ សូមគូសចំណាំលក្ខណៈសម្បត្តិដែលលោកបានលើកឡើងអំពី « បុគ្គលម្នាក់ដែលខ្ជាប់ខ្ជួន ហើយនឹងនរ » ។ ( អ្នកអាចនឹងសរសេរពាក្យដែលលោកបានប្រើ ដាក់នៅលើគែមព្រះគម្ពីររបស់អ្នកក្បែរពាក្យ នឹងនរ នៅក្នុង យ៉ូសែប ស្ម៊ីធ--ម៉ាថាយ ១:១១ ) ។
« ពាក្យ ‹ ខ្ជាប់ខ្ជួន › ត្រូវបានប្រើដើម្បីប្រាប់អំពីការនៅជាប់នឹងកន្លែងមួយ រឹងមាំ មិនអាចរង្គោះរង្គើ និង មាំមួន ( Oxford English Dictionary Online ការបោះពុម្ពលើកទី ២ [ ឆ្នាំ១៩៨៩ ] « Steadfast » ) ។ … បុគ្គលម្នាក់ដែលខ្ជាប់ខ្ជួន ហើយនឹងនរគឺរឹងមាំ មាំមួនខ្លាំង ហើយមិនងាយងាករេពីគោលបំណង ឬ បេសកកម្មសំខាន់មួយឡើយ » (« Steadfast and Immovable, Always Abounding in Good Works » New Era ខែ មករា ឆ្នាំ ២០០៨ ទំព័រ ២ ) ។
ពាក្យ បានសង្គ្រោះ នៅក្នុង យ៉ូសែប ស្ម៊ីធ--ម៉ាថាយ ១:១១ ពុំមែនមានន័យថា យើងនឹងបានសង្គ្រោះចេញពីភាពលំបាកទាំងឡាយក្នុងជីវិតនោះទេ ។
សូមអានសេចក្ដីថ្លែងការណ៍ខាងក្រោមដោយព្យាការី យ៉ូសែប ស៊្មីធ រួចគូសចំណាំថាតើការបានសង្គ្រោះមានន័យដូចម្ដេច ៖ « វាគឺជាគំនិតខុសឆ្គងមួយ ដែលថាពួកបរិសុទ្ធនឹងចៀសផុតពីការជំនុំជម្រះ ខណៈដែលពួកទុច្ចរិតរងទុក្ខ ដ្បិតគ្រប់សាច់ឈាមគឺស្ថិតនៅក្រោមការរងទុក្ខ ហើយ ‹ ពួកបរិសុទ្ធនឹងពិបាកចៀសផុតណាស់ › [ សូមមើល គ. និង ស. ៦៣:៣៤ ] … ពួកសុចរិតជាច្រើន នឹងក្លាយជាជនរងគ្រោះនឹងជំងឺ គ្រោះចង្រៃជាដើម ដោយសារតែមូលហេតុនៃភាពទន់ខ្សោយខាងសាច់ឈាម តែនឹងត្រូវបានសង្គ្រោះនៅក្នុងនគរនៃព្រះវិញ » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ២៥៣ ) ។
នៅក្នុង យ៉ូសែប ស្ម៊ីធ--ម៉ាថាយ ១:១៣-២០ យើងរៀនថា ព្រះយេស៊ូវបានព្រមានពួកសិស្សរបស់ទ្រង់ឲ្យត្រៀមខ្លួនភៀសខ្លួនឡើងទៅលើភ្នំ ហើយកុំត្រឡប់មកផ្ទះរបស់ពួកគេវិញឡើយ ដោយសារក្រុងយេរូសាឡិមនឹងមានការវាយប្រហារ ហើយបំផ្លាញចោល ។ ទ្រង់បានព្យាករថា សេចក្តីឈឺចាប់នៅពេលនោះគឺអាក្រក់ហួសពីអ្វីដែលពួកអ៊ីស្រាអែលធ្លាប់ជួបប្រទះទៅទៀត ។
ក្នុងឆ្នាំទី ៧០ នៃ គ.ស. ប្រហែលជា ៤០ ឆ្នាំក្រោយពីព្រះយេស៊ូវបានមានបន្ទូលអំពីរឿងទាំងនេះ ពួករ៉ូមបានឡោមព័ទ្ធក្រុងយេរូសាឡិម ហើយបានសម្លាប់ពួកយូដាជាងមួយលាននាក់ និង ពួកយូដាជិត ១០០,០០០ នាក់ត្រូវបានចាប់ធ្វើជាឈ្លើយ ។ ព្រះវិហារបរិសុទ្ធត្រូវបានបំផ្លាញចោលសូម្បីតែថ្មមួយដុំបន្តុបលើគ្នាក៏គ្មាននៅសេសសល់ដែរ—ដូចដែលព្រះអង្គសង្គ្រោះបានព្យាករ ( សូមមើល យ៉ូសែប ស្ម៊ីធ--ម៉ាថាយ ១:៣ ) ។ ប៉ុន្តែជនដែលបានស្ដាប់តាមការព្រមានរបស់ព្រះយេស៊ូវបានរត់គេចដោយសុវត្ថិភាពទៅកាន់ប៉េលឡា ជាក្រុងមួយមានចម្ងាយប្រហែលជា ៨០ គីឡូម៉ែត្រនៅទិសឦសាន្តនៃក្រុងយេរូសាឡិម ( សូមមើល Bible Dictionary « Pella » ) ។
តើបទពិសោធន៍របស់ពួកយូដា ឆ្លុះបញ្ចាំងអំពីសារៈសំខាន់នៃការបន្តខ្ជាប់ខ្ជួននៅក្នុងការគោរពតាមព្រះបន្ទូលរបស់ព្រះអង្គសង្គ្រោះយ៉ាងដូចម្ដេច ?
សូមពិចារណាថាតើការគោរព និង ការធ្វើតាមព្យាការីដែលកំពុងរស់នៅក្នុងជំនាន់យើងនេះ មានសារៈសំខាន់ដូចគ្នាទៅនឹងការស្ដាប់តាមបន្ទូលព្រមានរបស់ព្រះយេស៊ូវយ៉ាងដូចម្ដេច ។
យ៉ូសែប ស្ម៊ីធ--ម៉ាថាយ ១:២១-៣៧
ព្រះយេស៊ូវព្យាករអំពីទីសម្គាល់នៃការយាងមកជាលើកទីពីររបស់ទ្រង់
សូមអាន យ៉ូសែប ស្ម៊ីធ--ម៉ាថាយ ១:២១–២៣ ដោយស្វែងរកមូលហេតុដែលព្រះអម្ចាស់បានបើកសម្ដែងទីសម្គាល់នៃការយាងមកជាលើកទីពីររបស់ទ្រង់ ។
សូមកត់ចំណាំថា ព្រះអង្គសង្គ្រោះបានមានបន្ទូលព្រមានប្រឆាំងនឹង « ព្រះគ្រីស្ទក្លែងក្លាយ » និង « ពួកព្យាការីក្លែងក្លាយ » ( យ៉ូសែប ស្ម៊ីធ--ម៉ាថាយ ១:២២ ) ។ ពាក្យទាំងនេះសំដៅទៅលើមនុស្ស—ទាំងនៅក្នុង និងក្រៅសាសនាចក្រ—ដែលអះអាងថាខ្លួននិយាយតំណាងឲ្យព្រះអម្ចាស់ដោយគ្មានសិទ្ធិអំណាច ឬអ្នកដែលលើកកម្ពស់ការបង្រៀនដែលផ្ទុយពីពាក្យសម្ដីនៃពួកព្យាការីដែលកំពុងរស់នៅ ។ ឃ្លា « អ្នករើសតាំងស្របតាមសេចក្ដីសញ្ញា » នៅក្នុង ខទី ២២ សំដៅទៅលើសមាជិកនៃសាសនាចក្រនៃព្រះយេស៊ូវគ្រីស្ទ ។
ទាក់ទងនឹងពួកព្រះគ្រីស្ទ និងពួកព្យាការីក្លែងក្លាយទាំងនេះ យើងអានថា « ដរាបដល់ពួកគេអាចបញ្ឆោតទាំងពួករើសតាំង បើសិនជាធ្វើទៅបាន » ( យ៉ូសែប ស្មីធ—ម៉ាថាយ ១:២២ ) ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានផ្ដល់ការព្រមានអំពី ព្រះគ្រីស្ទក្លែងក្លាយ និង ពួកព្យាការីក្លែងក្លាយ ៖ « ព្រះគ្រីស្ទក្លែងក្លាយគឺជាប្រព័ន្ធសាសនាខុសឆ្គងនានាក្នុងលោកិយ រីឯព្យាការីក្លែងក្លាយគឺជាគ្រូបង្រៀន និង អ្នកបង្កើតប្រព័ន្ធទាំងនោះ ។ គោលលទ្ធិរបស់ពួកគេនឹងមានភាពស៊ីជម្រៅ ហើយមានគេស្គាល់ កិច្ចការរបស់ពួកគេនឹងមហិមា ហើយអស្ចារ្យ … ដែលអ្នករើសតាំងដ៏ជម្រើសនឹងស្ទើរតែត្រូវបានបញ្ឆោត » ( Doctrinal New Testament Commentary វ៉ុល ៣ [ ឆ្នាំ ១៩៦៥–៧៣ ] ១:៦៤៧ ) ។
តើមានអ្វីខ្លះដែលយើងអាចធ្វើ ដើម្បីចៀសវាងពីការត្រូវគេបញ្ឆោត ដែលទោះជាអ្នកបញ្ឆោតខ្លះជាសមាជិកនៃសាសនាចក្រយ៉ាងណាក្ដីនោះ ?
ប្រធាន យ៉ូសែប អេហ្វ ស៊្មីធ បានផ្ដល់ការដាស់តឿនដល់សមាជិកនៃសាសនាចក្រដូចតទៅនេះ ៖
« យើងមិនអាចទទួលអ្វីថាជាផ្លូវការបានទេ លុះត្រាវាមកតាមរយៈបណ្ដាញដែលបានតែងតាំងដោយផ្ទាល់ អង្គការនៃបព្វជិតភាពដែលបានបង្កើត ជាបណ្ដាញដែលព្រះបានតែងតាំងដើម្បីធ្វើឲ្យពិភពលោកស្គាល់ព្រះទ័យ និងព្រះឆន្ទៈរបស់ទ្រង់ ។
« … ហើយនៅគ្រាដែលបុគ្គលទាំងឡាយមើលទៅប្រភពផ្សេងទៀត គ្រានោះពួកគេបានបើកចិត្តទៅរកឥទ្ធិពលទាក់ទាញរបស់សាតាំង ហើយបង្ហាញខ្លួនថាជាពួកបរិវាររបស់អារក្ស នោះពួកគេបានមើលពុំឃើញរបៀបដ៏ពិតដែលរីករាយនឹងពរជ័យនៃបព្វជិតភាពនោះទេ ពួកគេបានឈានជើងដើរចេញពី [ ព្រំដែន ] នៃនគរព្រះ ហើយស្ថិតនៅកន្លែងដ៏គ្រោះថ្នាក់ ។ នៅពេលណាអ្នកឃើញបុរសម្នាក់ក្រោកឡើងអះអាងថាបានទទួលវិវរណៈដោយផ្ទាល់ពីព្រះអម្ចាស់សម្រាប់សាសនាចក្រ ដែលឯករាជ្យផ្សេងពីរបៀប និងបណ្ដាញនៃបព្វជិតភាព អ្នកអាចចាត់ទុកថាគាត់គឺជាអ្នកក្លែងបន្លំ » ( Gospel Doctrine ការបោះពុម្ពលើកទី ៥ [ ឆ្នាំ ១៩៣៩ ] ទំព័រ ៤២ ) ។
សូមអាន យ៉ូសែប ស្ម៊ីធ--ម៉ាថាយ ១:២៤–២៦ ដោយស្វែងរកថាតើព្រះអង្គសង្គ្រោះបានមានព្រះបន្ទូលដូចម្ដេច អំពីរបៀបដែលទ្រង់នឹងបង្ហាញអង្គទ្រង់នៅពេលការយាងមកជាលើកទីពីរ ។
សូមអាន យ៉ូសែប ស្ម៊ីធ--ម៉ាថាយ ១:២៧-៣១ ដោយស្វែងរកទីសម្គាល់ដែលនឹងកើតឡើង ពីមុនការយាងមកជាលើកទីពីរ ។
សូមរាយបញ្ជីទីសម្គាល់ ៖
សូមកត់ចំណាំថា មិនមែនទីសម្គាល់ទាំងអស់សុទ្ធតែជារឿងអវិជ្ជមាននោះទេ ។ ស្របតាម ខទី ២៧ និង ៣១ ពីមុនការយាងមកជាលើកទីពីររបស់ព្រះយេស៊ូគ្រីស្ទ អ្នករើសតាំងរបស់ព្រះអម្ចាស់នឹងត្រូវបានប្រមូលផ្ដុំ ហើយដំណឹងល្អនឹងត្រូវប្រកាសទៅកាន់ពិភពលោកទាំងមូល ។
-
សូមសរសរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក អំពីរបៀបដែលការព្យាករនេះកំពុងតែត្រូវបានបំពេញសព្វថ្ងៃនេះ ។ សូមបញ្ចូលយោបល់អំពីរបៀប ដែលអ្នកអាចធ្វើជាចំណែកមួយក្នុងការបំពេញការព្យាករនេះ ។
ព្រះអង្គសង្គ្រោះបានព្រមានថា នៅថ្ងៃចុងក្រោយបង្អស់ « ព្រះគ្រីស្ទក្លែងក្លាយ និងពួកព្យាការីក្លែងក្លាយ » នឹងព្យាយាម « បោកបញ្ឆោតរាល់អ្នករើសតាំង » ( យ៉ូសែប ស្ម៊ីធ--ម៉ាថាយ ១:២២ ) ។ សូមអាន យ៉ូសែប ស្ម៊ីធ--ម៉ាថាយ ១:៣៧ ដោយស្វែងរករបៀបដែលយើងអាចចៀសវាងពីការត្រូវគេបញ្ឆោត ។
នៅក្នុងព្រះគម្ពីររបស់អ្នកក្បែរ យ៉ូសែប ស្ម៊ីធ--ម៉ាថាយ ១:៣៧ អ្នកអាចនឹងចង់សរសេរគោលការណ៍នេះ ៖ ប្រសិនបើយើងសន្សំទុកព្រះបន្ទូលរបស់ព្រះអម្ចាស់ នោះយើងនឹងមិនត្រូវគេបោកបញ្ឆោតឡើយ ។
សូមអានដំណើររឿងខាងក្រោមដោយអែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ ។ សូមគូសចំណាំផ្នែកនៃដំណើររឿង ដែលបង្ហាញគោលការណ៍ដែលមានបង្រៀននៅក្នុង យ៉ូសែប ស្ម៊ីធ--ម៉ាថាយ ១:៣៧ ។
« អ្នកផ្សព្វផ្សាយសាសនាដ៏ល្អរបស់ខ្ញុំម្នាក់ដែលបានបម្រើជាមួយខ្ញុំ កាលខ្ញុំជាប្រធានបេសកកម្មនៅទីក្រុង តូរ៉ង់តូ [ ប្រទេសកាណាដា ] បានមកជួបខ្ញុំនៅប៉ុន្មានឆ្នាំក្រោយមក ។ ខ្ញុំបានសួរគាត់ថា ‹ អែលឌើរ តើអ្នកមានអ្វីដែលខ្ញុំអាចជួយបាន ? ›
« គាត់បានពោលថា ‹ ប្រធាន ខ្ញុំគិតថាខ្ញុំបានបាត់បង់ទីបន្ទាល់របស់ខ្ញុំហើយ › ។
« ខ្ញុំមិនចង់ជឿទេ ។ ខ្ញុំបានសួរគាត់ថាតើរឿងនេះអាចកើតឡើងយ៉ាងដូចម្ដេចបាន ។
« គាត់បានពោលថា ‹ ពីដំបូងឡើយ ខ្ញុំបានអានសៀវភៅមួយចំនួនដែលប្រឆាំងនឹងមរមន › ។ ‹ ខ្ញុំមានសំណួរមួយចំនួន ហើយគ្មាននរណាម្នាក់អាចឆ្លើយនឹងសំណួរទាំងនោះបានឡើយ ។ ខ្ញុំមានអារម្មណ៍ច្របូកច្របល់ ហើយខ្ញុំគិតថាខ្ញុំកំពុងបាត់បង់ទីបន្ទាល់របស់ខ្ញុំហើយ › » ( « When Shall These Things Be? » Ensign ខែ ធ្នូ ឆ្នាំ ១៩៩៦ ទំព័រ ៦០ ) ។
តើអ្នក ឬ បុគ្គលទាំងឡាយដែលអ្នកស្គាល់ ធ្លាប់មានបទពិសោធន៍ស្រដៀងទៅនឹងអតីតអ្នកផ្សព្វផ្សាយសាសនារូបនេះដែរឬទេ ? តើការប្រឹក្សាអ្វីខ្លះដែលអ្នកនឹងផ្ដល់ទៅឲ្យមនុស្សម្នាក់ដែលស្ថិតនៅក្នុងស្ថានភាពបែបនេះ ? ហេតុអ្វី ?
អែលឌើរ បាឡឺដ បានបន្ដ ៖
« ខ្ញុំបានសួរគាត់ថាសំណួររបស់គាត់ជាអ្វីទៅ ហើយគាត់ក៏បានប្រាប់ខ្ញុំ ។ វាគឺជាបញ្ហាបទដ្ឋានដែលប្រឆាំងនឹងសាសនាចក្រ ប៉ុន្តែខ្ញុំត្រូវការពេលវេលាតែបន្តិចបន្តួចប៉ុណ្ណោះប្រមូលឯកសារដើម្បីខ្ញុំអាចផ្ដល់ចម្លើយដែលមានអត្ថប្រយោជន៍ ។ ដូច្នេះយើងបានធ្វើការណាត់ជួបមួយនៅ ១០ ថ្ងៃក្រោយដោយខ្ញុំបានប្រាប់គាត់ថា ខ្ញុំនឹងឆ្លើយរាល់សំណួរទាំងអស់របស់គាត់ ។ នៅពេលគាត់បានចាប់ផ្ដើមចាកចេញទៅ ខ្ញុំហៅឲ្យគាត់ឈប់ ។
« ខ្ញុំបានពោលថា ‹ អែលឌើរ ថ្ងៃនេះអ្នកបានសួរខ្ញុំនូវសំណួរមួយចំនួន › ។ ‹ ឥឡូវខ្ញុំមានសំណួរមួយសម្រាប់អ្នក › ។
« ‹ តើអ្វីទៅប្រធាន ? ›
ខ្ញុំបានសួរថា « ‹ តើវាមានពេលយូរប៉ុណ្ណាហើយ ចាប់តាំងពីអ្នកបានអានព្រះគម្ពីរមរមន ? ›
« គាត់បានឈ្ងោកមុខចុះ ។ គាត់បានមើលទៅក្រោមមួយសន្ទុះ ។ រួចក៏មើលមុខខ្ញុំ ។ គាត់បានសារភាពថា ‹ ប្រធានខ្ញុំខានអានយូរហើយ › ។
« ខ្ញុំបានពោលថា ‹ មិនអីទេ › ។ ‹ អ្នកបានឲ្យកិច្ចការមកឲ្យខ្ញុំធ្វើ ។ ដើម្បីឲ្យយុត្តិធម៌ខ្ញុំក៏មានកិច្ចការសម្រាប់អ្នកដែរ ។ ខ្ញុំចង់ឲ្យអ្នកសន្យានឹងខ្ញុំថា អ្នកនឹងអានព្រះគម្ពីរមរមនយ៉ាងហោចណាស់ឲ្យបានមួយម៉ោងជារៀងរាល់ថ្ងៃចាប់ពីពេលនេះរហូតដល់ការណាត់ជួបរបស់យើងនៅពេលក្រោយ › ។ គាត់បានយល់ព្រមថាគាត់នឹងធ្វើវា ។
« ដប់ថ្ងៃក្រោយមក គាត់បានត្រឡប់មកការិយាល័យរបស់ខ្ញុំ ហើយខ្ញុំបានត្រៀមខ្លួនជាស្រេច ។ ខ្ញុំបានដកយកក្រដាសខ្ញុំចេញមកដើម្បីចាប់ផ្ដើមឆ្លើយសំណួររបស់គាត់ ប៉ុន្តែគាត់បានបញ្ឈប់ខ្ញុំ ។
« គាត់បានពោលថា ‹ ប្រធាន វាពុំចាំបាច់ទៀតទេ › ។ បន្ទាប់មកគាត់បានពន្យល់ថា ៖ ‹ ខ្ញុំដឹងថា ព្រះគម្ពីរមរមន ពិត ។ ខ្ញុំដឹងថា យ៉ូសែប ស្ម៊ីធ ជាព្យាការីរបស់ព្រះ › ។
« ខ្ញុំបានពោលថា ‹ វាជាការល្អណាស់ › ។ ‹ ប៉ុន្តែទោះជាយ៉ាងណាអ្នកនៅតែត្រូវស្ដាប់ចម្លើយចំពោះសំណួររបស់អ្នកដដែល ។ ខ្ញុំបានចំណាយពេលយ៉ាងច្រើនចំពោះរឿងនេះ ដូច្នេះអ្នកគ្រាន់តែអង្គុយចុះនៅត្រង់នោះ ហើយស្ដាប់ទៅបានហើយ › ។
« ហេតុដូច្នេះហើយខ្ញុំបានឆ្លើយរាល់សំណួររបស់គាត់ រួចសួរថា ‹ អែលឌើរ តើអ្នកបានរៀនអ្វីខ្លះពីការណ៍នេះ ? ›
« ហើយគាត់បានពោលថា ‹ ថ្វាយពេលវេលាស្មើគ្នាដល់ព្រះអម្ចាស់ › »( « When Shall These Things Be ? » ទំព័រ ៦០ ) ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមកត់ត្រាវិធីមួយដែលអ្នកអាច « សន្សំទុកព្រះបន្ទូល[ របស់ព្រះអម្ចាស់ ] ឲ្យបានកាន់តែប្រសើរឡើង » ( យ៉ូសែប ស្ម៊ីធ—ម៉ាថាយ ១:៣៧ ) ។
ការរក្សាទុកព្រះបន្ទូលរបស់ព្រះអម្ចាស់ ជួយយើងចៀសវាងពីការត្រូវគេបញ្ឆោត រីឯវិវរណៈសម័យទំនើបព្រមានយើងឲ្យ « ឈរ …នៅក្នុងទីបរិសុទ្ធទាំងឡាយ ហើយចូរកុំរើឡើយ រហូតដល់ថ្ងៃនៃព្រះអម្ចាស់មកដល់ » ( គ. និង ស. ៨៧:៨ ) ។ បន្ថែមលើការសិក្សាព្រះគម្ពីរដើម្បីជួយយើងសន្សំទុកព្រះបន្ទូលរបស់ព្រះអម្ចាស់ យើងអាចទទួលបានព្រះបន្ទូលរបស់ព្រះអម្ចាស់បានដោយការឈរនៅក្នុង ឬ ចូលរួមនៅក្នុងទីបរិសុទ្ធទាំងឡាយមានដូចជា ព្រះវិហារបរិសុទ្ធ និង សាលាជំនុំ និង ការខិតខំធ្វើឲ្យគេហដ្ឋានរបស់យើងក្លាយជាបរិសុទ្ធ ។ សូមពិចារណាថាតើការស្ថិតនៅក្នុងទីកន្លែងទាំងនេះ អាចជួយអ្នករៀនគោលលទ្ធិពិត ហើយចៀសវាងពីការត្រូវគេបញ្ឆោតបានយ៉ាងដូចម្ដេច ។
យ៉ូសែប ស្ម៊ីធ--ម៉ាថាយ ១:៣៨–៥៥
ព្រះយេស៊ូវណែនាំពួកសិស្សរបស់ទ្រង់ អំពីការត្រៀមខ្លួនសម្រាប់ការយាងមកជាលើកទីពីររបស់ទ្រង់
ព្រះអង្គសង្គ្រោះបានបញ្ចប់ដោយបានណែនាំពួកសិស្សរបស់ទ្រង់អំពី របៀបរក្សាព្រះបន្ទូលរបស់ទ្រង់ ហើយត្រៀមខ្លួនសម្រាប់ការយាងមកជាលើកទីពីរ ។
នៅក្នុងប្រអប់ដែលមាននៅក្នុងតារាងខាងក្រោម សូមគូររូបសាមញ្ញៗដែលបង្ហាញឧទាហរណ៍នានាដែលព្រះអង្គសង្គ្រោះបានប្រើដើម្បីបង្រៀនអំពីការត្រៀមខ្លួនសម្រាប់ការយាងមកជាលើកទីពីររបស់ទ្រង់ ។ ក្រោយមក នៅក្រោមគំនូរនីមួយៗ សូមសរសេរសេចក្ដីពិតមួយដែលអ្នកបានរកឃើញអំពីការត្រៀមខ្លួនសម្រាប់ការយាងមកជាលើកទីពីរ ។
យើងរៀនចេញពីឧទាហរណ៍ទាំងនេះថា មានតែព្រះវរបិតាសួគ៌ប៉ុណ្ណោះដែលជ្រាបថាការយាងមកជាលើកទីពីររបស់ព្រះអង្គសង្គ្រោះនឹងកើតឡើងពេលណានោះ ហើយប្រសិនបើយើងចាំយាមមើលទីសម្គាល់នានា ហើយគោរពប្រតិបត្តិតាមព្រះបញ្ញត្តិរបស់ព្រះអម្ចាស់ នោះយើងនឹងត្រៀមខ្លួនជាស្រេចសម្រាប់ការយាងមកជាលើកទីពីររបស់ព្រះអង្គសង្គ្រោះ ។
សូមរំឭកសេចក្ដីពិតដែលបានរកឃើញនៅក្នុង យ៉ូសែប ស្ម៊ីធ--ម៉ាថាយ រួចពិចារណាអំពីរបៀបដែលសេចក្ដីពិតទាំងនេះ ជួយឆ្លើយសំណួរដែលអ្នកបានសរសេរនៅដើមមេរៀននេះ ។
វិធីមួយដ៏ប្រសើរបំផុតដើម្បីត្រៀមខ្លួនសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ គឺតាមរយៈការធ្វើតាមការបង្រៀនរបស់ពួកព្យាការី និង ពួកសាវកសម័យទំនើប ។ សូមពិចារណាអំពីសេចក្ដីថ្លែងការណ៍ខាងក្រោមដោយអែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ ៖
« ចុះបើថ្ងៃនៃការយាងមករបស់ទ្រង់ជាថ្ងៃស្អែកវិញ ? ប្រសិនបើយើងបានដឹងថា យើងត្រូវជួបនឹងព្រះអម្ចាស់នៅថ្ងៃស្អែក —តាមរយៈការស្លាប់មុនអាយុ ឬតាមរយៈការយាងមកដែលមិនអាចរំពឹងទុកបានមុនរបស់ទ្រង់ —តើយើងនឹងធ្វើអ្វីនៅថ្ងៃនេះ ? តើយើងនឹងសារភាពអ្វីខ្លះ ? តើយើងនឹងបញ្ឈប់ការអនុវត្តអ្វីខ្លះ ? តើយើងនឹងលើកយកដំណើររឿងណាមួយមកដោះស្រាយ ? តើការអត់ទោសណាខ្លះដែលយើងនឹងធ្វើ ? តើយើងនឹងថ្លែងទីបន្ទាល់ដូចម្ដេច ?
« ចុះបើយើងនឹងត្រូវធ្វើការណ៍ទាំងនោះនៅពេលនោះ ហេតុអ្វីយើងមិនធ្វើឥឡូវនេះ ? » ( « Preparation for the Second Coming » Ensign ឬ Liahona ខែ ឧសភា ឆ្នាំ២០០៤ ទំព័រ ៩ ) ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ ប្រសិនបើអ្នកបានដឹងថា អ្នកនឹងជួបព្រះអង្គសង្គ្រោះនៅថ្ងៃស្អែក តើអ្នកនឹងផ្លាស់ប្ដូរអ្វីខ្លះនៅថ្ងៃនេះ ?
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា យ៉ូសែប ស្ម៊ីធ--ម៉ាថាយ, ម៉ាថាយ ២៤ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖