ព្រះគម្ពីរសញ្ញាថ្មី សូមស្វាគមន៍
តើព្រះគម្ពីរសញ្ញាថ្មីគឺជាព្រះគម្ពីរអ្វី ?
ព្រះគម្ពីរសញ្ញាថ្មីមានសំណេរនានារបស់សាវកកាលពីជំនាន់ដំបូង និង ពួកសិស្សរបស់ព្រះយេស៊ូវគ្រីស្ទកាលពីជំនាន់ដើម ដែលបានសរសេរវាឡើងក្រោមការបំផុសគំនិតពីព្រះវិញ្ញាណបរិសុទ្ធ ។ វាមានដំណឹងល្អទាំងបួន ដែលជាទីបន្ទាល់របស់ ម៉ាថាយ ម៉ាកុស លូកា និង យ៉ូហាន អំពីព្រះយេស៊ូវគ្រីស្ទថាទ្រង់គឺជាព្រះមែស៊ីដែលបានសន្យានោះ—ជាព្រះអង្គសង្គ្រោះ និង ព្រះប្រោសលោះ—ព្រមទាំងជាព្រះអម្ចាស់ដែលមានព្រះជន្មរស់ ។ ដំណឹងល្អទាំងបួនបានពិពណ៌នាអំពីផ្នែកនានានៃព្រះជន្មរបស់ព្រះយេស៊ូវ និង ជាកំណត់ត្រាមួយអំពីការបង្រៀនជាច្រើនរបស់ទ្រង់ ។ ព្រះគម្ពីរសញ្ញាថ្មីមាននូវគោលលទ្ធិ និង គោលការណ៍នានាដែលបានបង្រៀនដោយព្រះអង្គសង្គ្រោះ ព្រមទាំងពួកសាវករបស់ទ្រង់ ដើម្បីជួយមនុស្សដទៃឲ្យរៀនពីរបៀបត្រឡប់ទៅរស់នៅជាមួយព្រះ ជាព្រះវរបិតា ហើយទទួលបានជីវិតដ៏នៅអស់កល្បជានិច្ចវិញ ។ សម្រាប់ពួកបរិសុទ្ធថ្ងៃចុងក្រោយ ព្រះគម្ពីរប៊ីបគាំទ្រព្រះគម្ពីរមរមន គោលលទ្ធិ និង សេចក្ដីសញ្ញា និង មុត្តាដ៏មានតម្លៃមហិមា ជាព្រះគម្ពីរដ៏បរិសុទ្ធទាំងឡាយ ( សូមមើលមាត្រានៃសេចក្តីជំនឿ ១:៨) ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់ បានសង្ខេបពីមាតិកាសំខាន់នៃព្រះគម្ពីរសញ្ញាថ្មី ៖ « ព្រះគម្ពីរសញ្ញាថ្មី…ពិពណ៌នាអំពីការបំពេញនូវការសន្យាកាលពីបុរាណ ប្រាប់ពីការប្រសូត និង ការងារបម្រើ ព្រមទាំងការពលិកម្មដ៏ធួននៃព្រះមួយអង្គដែលបានសន្យា បរិយាយពីគោលលទ្ធិនៃសេចក្តីសង្គ្រោះរបស់ដំណឹងល្អដ៏អស់កល្បអស់កាលជានិច្ចរបស់ទ្រង់ កត់ត្រានូវការរីកចម្រើន និង ការពង្រីកវិសាលភាពនៃដំណឹងល្អនៅក្នុងកាលដ៏ខ្ពង់ខ្ពស់បំផុត ព្យាករពីការធ្លាក់ទាំងស្រុងចេញពីសេចក្តីជំនឿដែលគ្រានោះបានប្រទានដល់ពួកបរិសុទ្ធ សន្យាពីការស្តារឡើងវិញដ៏រុងរឿងនៃដំណឹងល្អនៅក្នុងថ្ងៃចុងក្រោយ និង ព្យាករយ៉ាងក្បោះក្បាយ និងអស្ចារ្យអំពីព្រឹត្តិការណ៍ពីមុនពេល អំឡុងពេល និង បន្ទាប់ពីការយាងមកជាលើកទីពីររបស់កូនមនុស្សប្រកបដោយជោគជ័យ ។ គោលបំណងចម្បងរបស់គម្ពីរនេះគឺថ្លែងទីបន្ទាល់អំពីព្រះគ្រីស្ទ » ( A New Witness for the Articles of Faith [ ឆ្នាំ ១៩៨៥ ] ទំព័រ ៣៩២ ) ។
ហេតុអ្វីការសិក្សាព្រះគម្ពីរសញ្ញាថ្មីសំខាន់ ?
ដូចព្រះគម្ពីរទាំងអស់ដែរ ព្រះគម្ពីរសញ្ញាថ្មីបង្រៀន និង ថ្លែងទីបន្ទាល់អំពីព្រះយេស៊ូវគ្រីស្ទ និង ភាពជាព្រះរបស់ទ្រង់ ។ សាវកយ៉ូហានបានថ្លែងថា គោលបំណងរបស់លោកក្នុងការសរសេរដំណឹងល្អរបស់លោកគឺដើម្បីទាក់ទាញមនុស្សដទៃទៀតឲ្យ « ជឿថា ព្រះយេស៊ូវជាព្រះគ្រីស្ទ គឺជាព្រះរាជបុត្រានៃព្រះពិត ហើយឲ្យអ្នករាល់គ្នាបានជីវិត ដោយសារព្រះនាមទ្រង់ ដោយមានសេចក្តីជំនឿ » ( យ៉ូហាន ២០:៣១ ) ។ តាមរយៈការសិក្សាព្រះគម្ពីរសញ្ញាថ្មី អ្នកនឹងរៀនអំពីការប្រសូតដ៏អស្ចារ្យរបស់ព្រះអង្គសង្គ្រោះ ឃើញពីអព្ភូតហេតុ និង ការព្យាបាលរបស់ទ្រង់ ឮពីសេចក្តីពិតដ៏សំខាន់បំផុតនៃដំណឹងល្អរបស់ទ្រង់ ហើយចងចាំពីជំនាន់នៃការពលិកម្មដ៏ធួន ការឆ្កាង និង ការមានព្រះជន្មរស់ឡើងវិញដ៏រុងរឿងរបស់ទ្រង់ ។ នៅពេលអ្នកសិក្សាពីព្រះជន្ម និង ការបង្រៀនរបស់ព្រះអង្គសង្គ្រោះ នោះអ្នកនឹងរៀនពីរបៀបទៅរកទ្រង់ ដើម្បីទទួលបាននូវសេចក្តីសង្ឃឹម ការអត់ទោស ភាពសុខសាន្ត និង សុភមង្គលដ៏អស់កល្បជានិច្ច ។ ការសិក្សាព្រះគម្ពីរសញ្ញាថ្មីដោយចិត្តស្មោះសរ អាចពង្រឹងសេចក្តីជំនឿរបស់អ្នកលើព្រះយេស៊ូវគ្រីស្ទ ហើយជួយអ្នកឲ្យពឹងផ្អែកលើការបង្រៀន និង ដង្វាយធួនរបស់ទ្រង់ ។
អែលឌើរ អិល ថម ភែរី ក្នុងកូរ៉ុមនៃពួកសាវកដប់ពីរនាក់បានបង្រៀនថាព្រះគម្ពីរសញ្ញាថ្មី « គឺជាព្រះគម្ពីរដ៏សំខាន់មួយនៃប្រវត្តិសាស្ត្រព្រះគម្ពីរ គឺដូចជាព្រះអង្គសង្គ្រោះផ្ទាល់ដែលទ្រង់គួរតែជាអង្គដ៏សំខាន់នៃជីវិតយើង ។ យើងត្រូវប្តេជ្ញាចិត្តខ្លួនឯង ដើម្បីសិក្សា ហើយទុកវាជារតនសម្បត្តិ !
« មាននូវមុក្តានៃប្រាជ្ញាជាច្រើនដែលមិនអាចកាត់ថ្លៃបាននៅក្នុងការសិក្សាព្រះគម្ពីរសញ្ញាថ្មីរបស់យើងនេះ » ( « The Sabbath and the Sacrament » Ensign ឬ Liahona ខែ ឧសភា ឆ្នាំ ២០១១ ទំព័រ ៦ ) ។
ខាងក្រោមគឺជាមុក្តានៃសេចក្តីពិត និង ប្រាជ្ញាមួយចំនួនដែលពុំអាចកាត់ថ្លៃបាន ដែលមាននៅក្នុងព្រះគម្ពីរសញ្ញាថ្មី ៖
-
ព្រះយេស៊ូវគ្រីស្ទគឺជា « ផ្លូវ ជាសេចក្តីពិត ហើយជាជីវិត » ហើយតាមរយៈទ្រង់អ្នកអាចស្គាល់ព្រះវរបិតាសួគ៌ ( សូមមើល យ៉ូហាន ១៤:៦–៧ ) ។
-
ព្រះវិញ្ញាណបរិសុទ្ធគឺជា « ព្រះដ៏ជាជំនួយ… [ ដែល ]បង្រៀនអ្នកនូវការណ៍គ្រប់យ៉ាង ហើយក៏នឹងរំឭកអ្នកពីគ្រប់ទាំងសេចក្តី » (យ៉ូហាន ១៤:២៦) ។
-
ពួកសិស្សរបស់ព្រះយេស៊ូវគ្រីស្ទមានការទទួលខុសត្រូវ ដើម្បីប្រកាសដំណឹងល្អនៅក្នុងពិភពលោកទាំងមូល ( សូមមើល ម៉ាថាយ ២៨:១៩ ) ។
-
ព្រះអង្គសង្គ្រោះបន្តដឹកនាំសាសនាចក្ររបស់ទ្រង់តាមរយៈវិវរណៈដល់ពួកអ្នកបម្រើដែលទ្រង់បានរើស ( សូមមើល កិច្ចការ ១:២ ) ។
-
អ្នកគឺជាពូជ ឬ កូនរបស់ព្រះ ( សូមមើល កិច្ចការ ១៧:២៨–២៩ ) ។
-
ដោយសារការមានព្រះជន្មរស់ឡើងវិញរបស់ព្រះអង្គសង្គ្រោះ នោះមនុស្សទាំងអស់នឹងឈ្នះលើសេចក្តីស្លាប់ ហើយរស់ឡើងវិញម្តងទៀត ( កូរិនថូសទី ១ ១៥:២១–២៦ ) ។
-
ប្រសិនបើអ្នកខ្វះប្រាជ្ញា អ្នកអាចទូលសូមដល់ព្រះដោយការអធិស្ឋាន ហើយទ្រង់នឹងឆ្លើយតប ( សូមមើល យ៉ាកុប ១:៥–៦ ) ។
-
ពួកបរិសុទ្ធដ៏ស្មោះត្រង់ដែលយកឈ្នះលើអំពើអាក្រក់នឹងទទួលជីវិតដ៏នៅអស់កល្បជានិច្ច ( សូមមើល វិវរណៈ ៣ ) ។
បទពិសោធន៍នៅក្នុងជីវិតរបស់ព្យាការីយ៉ូសែប ស្ម៊ីធ ផ្តល់ជាគំរូអំពីរបៀបសិក្សាព្រះគម្ពីរសញ្ញាថ្មី អាចជះឥទ្ធិពល និង ផ្លាស់ប្តូរជីវិតរបស់អ្នក ។ កាលជាយុវជន យ៉ូសែប ស្ម៊ីធ មានការលំបាកក្នុងការស្វែងរកដោយខ្លួនលោកថាតើសាសនាចក្រណាមួយដែលត្រឹមត្រូវ ។ លោកបានបើកព្រះគម្ពីរប៊ីប ហើយថ្ងៃមួយលោកបានអានវគ្គបទគម្ពីរនៅក្នុង យ៉ាកុប ១:៥។ ក្រោយមកលោក បានសរសេរ ៖ « ពុំដែលមានបទគម្ពីរណាមួយ ដែលមានប្រសិទ្ធភាពទៅលើចិត្តមនុស្ស ដូចជាបទគម្ពីរនេះមានប្រសិទ្ធភាពមកលើចិត្តខ្ញុំឡើយ ។ មើលទៅហាក់បីដូចជាចូលមកពេញដួងចិត្តដោយឥទ្ធិពលដ៏មហិមា ។ ខ្ញុំតែងតែពិចារណាគិតអំពីរឿងនោះម្ដងហើយម្ដងទៀត » ( យ៉ូសែប ស្ម៊ីធ—ប្រវត្តិ ១:១២ ) ។
បន្ទាប់ពីអាន និង សញ្ជឹងគិតពីពាក្យទាំងនោះពីព្រះគម្ពីរសញ្ញាថ្មី យ៉ូសែប បានសម្រេចចិត្តធ្វើតាមសេចក្តីពិតដែលលោកបានសិក្សា ហើយបានទូលសួរព្រះ ដូចយ៉ាកុបបានបង្រៀន ។ ការសម្រេចចិត្តរបស់លោកបានផ្តល់ផ្លែផ្កាជាការនិមិត្តដំបូងដ៏អស្ចារ្យ ។ នៅពេលអ្នកព្យាយាមសិក្សាព្រះគម្ពីរសញ្ញាថ្មី នោះអ្នកនឹងមានអារម្មណ៍ពីព្រះវិញ្ញាណបរិសុទ្ធរំជួលដួងចិត្តរបស់អ្នកផងដែរ ហើយជួយអ្នកឲ្យរកឃើញវិធីនានាដើម្បីអនុវត្តគោលលទ្ធិ និង គោលការណ៍នៃដំណឹងល្អនៅក្នុងជីវិតរបស់អ្នក ។
នៅពេលអ្នកសិក្សាព្រះគម្ពីរសញ្ញាថ្មីប្រកបដោយការអធិស្ឋាន នោះសូមធ្វើតាមការបំផុសគំនិតមកពីព្រះវិញ្ញាណបរិសុទ្ធ ។ តាមរយៈការធ្វើបែបនេះ អ្នកអាចប្រែចិត្តជឿកាន់តែពេញលេញចំពោះព្រះអម្ចាស់ ។ ការផ្លាស់ប្រែចិត្តជឿពិត ជាកើតមាន នៅពេលអ្នកបន្ដធ្វើសកម្មភាពលើគោលលទ្ធិនានាដែលអ្នកដឹងថាពិត ហើយរក្សាបទបញ្ញត្តិ នោះពីមួយថ្ងៃទៅមួយថ្ងៃ ពីមួយខែទៅមួយខែ ពេញមួយជីវិតរបស់អ្នក ។
អំពីព្រះគម្ពីរសញ្ញាថ្មី
ព្រះគម្ពីរប៊ីបមិនមែនជាគម្ពីរតែមួយទេ ។ វាជាបណ្តុំនៃគម្ពីរនានា ។ ភាសាក្រិកពាក្យថា ប៊ីប គឺមានន័យមួយទៀតថាជា « ព្រះគម្ពីរទាំងឡាយ » ។ « ព្រះគម្ពីរប៊ីបរបស់ពួកគ្រីស្ទានមានពីរភាគ គឺដែលគេស្គាល់ទូទៅថា ព្រះគម្ពីរសញ្ញាចាស់ និងសញ្ញាថ្មី » ( សេចក្ដីណែនាំដល់បទគម្ពីរទាំងឡាយ « ព្រះគម្ពីរប៊ីប » scriptures.lds.org ) ។ ពាក្យដែលបានបកប្រែថា សញ្ញា ក៏អាចបកប្រែថា សេចក្តីសញ្ញាផងដែរ ។ ដូច្នេះព្រះគម្ពីរសញ្ញាថ្មីគឺជាសេចក្តីសញ្ញាថ្មី ។
នៅក្នុងបរិបទនៃដំណឹងល្អ សេចក្តីសញ្ញាគឺជាកិច្ចព្រមព្រៀងពិសេសមួយរវាងព្រះអម្ចាស់ និង មនុស្សម្នាក់ ឬ ក្រុមមួយ ។ ព្រះគម្ពីរសញ្ញាចាស់ ឬ សេចក្តីសញ្ញាចាស់ គឺជាក្រឹត្យវិន័យដែលព្រះអម្ចាស់បានប្រទានដល់ប្រជារាស្ត្រពីជំនាន់ដើមរបស់ទ្រង់ ។ « នៅពេលព្រះអង្គសង្គ្រោះបានយាងមកក្នុងកាលដ៏ខ្ពង់ខ្ពស់បំផុត ទ្រង់បានស្តារដំណឹងល្អដល់សាសន៍យូដានៅក្នុងស្រុកភីលីស្ទីន ។ ដោយសារពួកគេបានវង្វេងចេញពីក្រឹត្យវិន័យលោកម៉ូសេ វាគឺជាសេចក្តីសញ្ញាថ្មីមួយចំពោះពួកគេ » ( Bible Dictionary « Bible » ) ។
ជាទូទៅ ព្រះគម្ពីរសញ្ញាថ្មីគឺត្រូវបានចែកចេញជាដំណឹងល្អនានា កិច្ចការពួកសាវក សំបុត្ររបស់ប៉ុល សំបុត្រទូទៅ និង គម្ពីរវិវរណៈ ។
-
ដំណឹងល្អនានា ។ គម្ពីរម៉ាថាយ ម៉ាកុស លូកា និង យ៉ូហាន ត្រូវបានហៅថាដំណឹងល្អ ហើយគម្ពីរនីមួយៗត្រូវបានដាក់ឈ្មោះតាមអ្នកនិពន្ធសៀវភៅនោះ ។ ពាក្យ ដំណឹងល្អ មានន័យថា « សេចក្ដីល្អដែលត្រូវដឹង » ។ ទោះបីជាដំណឹងល្អទាំងបួនមានភាពខុសគ្នានៅក្នុងសេចក្ដីលម្អិត និងទស្សនក្ដី ក៏វានិទានព្រឹត្តិការណ៍នៃព្រះជន្ម និង ការបម្រើនៅលើផែនដីរបស់ព្រះអង្គសង្គ្រោះនៅក្នុងចំណោមសាសន៍យូដាដូចគ្នា ។ ដំណឹងល្អទាំងបួនបង្រៀន និង ថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះរាជបុត្រានៃព្រះ និងជាព្រះអង្គសង្គ្រោះនៃពិភពលោក ។ « កំណត់ត្រារបស់ម៉ាថាយ ម៉ាកុស និង លូកាបង្ហាញពីដំណើររឿងដែលស្រដៀងគ្នា ហើយមានរបៀបរៀបពាក្យសរសេរដូចគ្នាយ៉ាងច្រើនគគោក ព្រមទាំងមានចំណុចសំខាន់ស្រដៀងគ្នា ដូច្នោះហើយពេលខ្លះត្រូវបានគេចាត់ទុកថាជា ‹ ដំណឹងល្អដែលសង្ខេបសរុប › ( មានន័យថា ‹ មើលទៅដូចគ្នា › ) ។ ទោះជាដូច្នោះក៏ដោយ គម្ពីរនីមួយៗមានលក្ខណៈពិសេស ហើយមានព័ត៌មានលម្អិតជាច្រើនដែលមិនដូចគ្នាទេ ។ កំណត់ត្រារបស់យ៉ូហានរៀងផ្សេងបន្តិចពីកំណត់របស់អ្នកផ្សេងទៀត ដូចជាវេយ្យាសព្ទ របៀបរៀបពាក្យសរសេរ និង ការបង្ហាញពីព្រឹត្តិការណ៍នានា » ( សេចក្តីណែនាំដល់បទគម្ពីរទាំងឡាយ « ដំណឹងល្អ » ) ។
-
កិច្ចការពួកសាវក ។ កិច្ចការពួកសាវកត្រូវបានសរសេរដោយលូកា ហើយវាមាននូវដំណើររឿងនៃការរីកចម្រើនរបស់សាសនាចក្រក្រោមការដឹងនាំរបស់ពេត្រុស និង សាវកដទៃផ្សេងទៀត ( សូមមើល សេចក្តីណែនាំដល់បទគម្ពីរទាំងឡាយ « កិច្ចការនៃពួកសាវក » ) ។
-
សំបុត្ររបស់ប៉ុល ។ សំបុត្រ ឬ លិខិតរបស់ប៉ុលត្រូវបានដាក់ឈ្មោះតាមសាខានៃសាសនាចក្រ ឬ តាមបុគ្គល ឬ ក្រុមដែលទទួលសំបុត្រនោះ ។ សំបុត្ររបស់ប៉ុលបានរៀបចំឡើង « តាមប្រវែង តាមលំដាប់ចុះពីសំបុត្រវែងជាងគេបង្អស់ ( រ៉ូម ) រហូតដល់សំបុត្រខ្លីជាងគេបង្អស់ ( ភីលេម៉ូន ) ។ នេះគឺជារបៀបដែលសំបុត្ររបស់ប៉ុលត្រូវបានរៀបចំឡើង លើកលែងតែសំបុត្រដែលបានសរសេរទៅពួកហេព្រើរប៉ុណ្ណោះ ដែលបានដាក់នៅក្រោយគេ ដោយសារមានមនុស្សមួយចំនួនបានសួរថា តើវាជាការសរសេររបស់ប៉ុលឬក៏ពុំមែន » ( សេចក្ដីណែនាំដល់បទគម្ពីរទាំងឡាយ « សំបុត្ររបស់ប៉ុល » ) ។
-
សំបុត្រទូទៅ ។ គម្ពីរយ៉ាកុបរហូតដល់គម្ពីរយូដាសជាញឹកញាប់ត្រូវបានហៅថាសំបុត្រទូទៅលែកលែងតែគម្ពីរយ៉ូហានទី ២ និង ទី ៣ចេញ ដោយសារសំបុត្រទាំងនោះពុំបានបញ្ជាក់បង្ហាញថាសរសេរផ្ញើទៅបុគ្គល ឬ សាខានៃសាសនាចក្រជាក់លាក់ណាមួយឡើយ ។ សំបុត្រទាំងនោះដាក់ឈ្មោះតាមអ្នកនិពន្ធ ។ ( សូមមើល Bible Dictionary « General Epistles » ) ។
-
គម្ពីរវិវរណៈ ។ គម្ពីរវិវរណៈ ( ពេលខ្លះហៅថាជាអ័ប៉ូកាលិព្ស ) ត្រូវបានសរសេរដោយសាវកយ៉ូហាន ជាអ្នកដែលបានសរសេរដំណឹងល្អ និង សំបុត្រដែលដាក់ឈ្មោះរបស់លោកផងដែរ ។ វាគឺជាដំណើររឿងរបស់យ៉ូហានអំពី វិវរណៈដែលលោកបានទទួលពីព្រះអម្ចាស់ ។ ( សូមមើល សេចក្តីណែនាំដល់បទគម្ពីរទាំងឡាយ « វិវរណៈរបស់យ៉ូហាន ») ។
ការបកប្រែដោយយ៉ូសែប ស៊្មីធ និង យ៉ូសែប ស៊្មីធ–ម៉ាថាយ
ព្រះអម្ចាស់បានបញ្ជាព្យាការីយ៉ូសែប ស្ម៊ីធឲ្យបកប្រែ ឬធ្វើកំណែថ្មីនៃព្រះគម្ពីរប៊ីបរបស់ស្តេចជេមស៍ ។ ការបកប្រែដោយយ៉ូសែប ស្ម៊ីធ ( ពេលខ្លះសរសេរជាអក្សរកាត់ថា ក.យ.ស. ) គឺពុំមែនជាការបកប្រែនៃព្រះគម្ពីរប៊ីបពីភាសាមួយទៅភាសាមួយទៀតទេ ។ ផ្ទុយទៅវិញ វាមាននូវការកែប្រែនានាដែលព្រះអម្ចាស់បានបំផុសគំនិតដល់ព្យាការីឲ្យកែលើអត្ថបទនៃព្រះគម្ពីរប៊ីបនោះ ។
យ៉ូសែប ស៊្មីធបានចាប់ផ្តើមការបកប្រែរបស់លោកនៅក្នុងខែ មិថុនា ឆ្នាំ ១៨៣០ ហើយបានបញ្ចប់នៅក្នុងខែ កក្កដា ឆ្នាំ ១៨៣៣ ទោះជាយ៉ាងណាក្តី លោកបានបន្តធ្វើការកែប្រែការសរសេរដោយដៃរបស់លោកនោះ រហូតដល់មុនពេលលោកទទួលមរណភាពនៅក្នុងឆ្នា ១៨៤៤ ( សូមមើល សេចក្តីណែនាំដល់បទគម្ពីរទាំងឡាយ « ការបកប្រែដោយយ៉ូសែប ស៊្មីធ » ) ។ អំឡុងពេលដែលផ្នែកនានានៃការបកប្រែដោយយ៉ូសែប ស្ម៊ីធត្រូវបានបោះពុម្ពពេលលោកនៅរស់ នោះការបកប្រែព្រះគម្ពីរប៊ីបប្រកបដោយការបំផុសគំនិតទាំងអស់របស់លោកត្រូវបានបោះពុម្ពជាលើកដំបូងនៅក្នុងឆ្នាំ ១៨៦៧ ដោយពួកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែលបានរៀបចំឡើងវិញ ( ដែលឥឡូវនេះមានឈ្មោះថា សហគមន៍នៃព្រះគ្រីស្ទ ) ។ ចាប់តាំងពីឆ្នាំ ១៩៧៩មក ការបោះពុម្ពកំណែថ្មីនៃព្រះគម្ពីរប៊ីបរបស់ស្តេចជេមស៍របស់ពួកបរិសុទ្ធថ្ងៃចុងក្រោយជាភាសាអង់គ្លេស មាននូវវគ្គបទគម្ពីរគោលលទ្ធិសំខាន់ៗរាប់រយពាន់ដែលបានមកពីការបកប្រែដោយយ៉ូសែប ស៊្មីធ នៅក្នុងលេខយោង និង លិបិក្រម ។ ( សូមមើល រ៉ូប៊ើត ជេ ម៉ាថាយ « Joseph Smith’s Efforts to Publish His Bible ‹ Translation › » Ensign ខែ មករា ឆ្នាំ ១៩៨៣ ទំព័រ ៥៧–៦៤ សេចក្តីណែនាំដល់បទគម្ពីរទាំងឡាយ « ការបកប្រែដោយយ៉ូសែប ស៊្មីធ ») ។ ចាប់តាំងពីឆ្នាំ ២០០៩ មក ការបោះពុម្ពព្រះគម្ពីរប៊ីបរបស់ពួកបរិសុទ្ធថ្ងៃចុងក្រោយជាភាសាអេស្បាញ កំណែថ្មីនៃ រៀណា វ៉ាលើរ៉ាក៏មាននូវវគ្គបទគម្ពីរនៅក្នុងលេខយោង និង លិបិក្រមផងដែរ ។ នៅក្នុងឆ្នាំ ២០១៥ ការបោះពុម្ពព្រះគម្ពីរប៊ីបរបស់ពួកបរិសុទ្ធថ្ងៃចុងក្រោយត្រូវបានបោះពុម្ពជាភាសាព័រទុយហ្គាយ ។
យ៉ូសែប ស្ម៊ីធ—ម៉ាថាយនៅក្នុងមុក្តាដ៏មានតម្លៃមហិមា គឺជាការដកស្រង់ចេញមកពីការបកប្រែដោយយ៉ូសែប ស្ម៊ីធ ( ការបកប្រែដោយយ៉ូសែប ស្ម៊ីធ ម៉ាថាយ ២៣:៣៩–២៤:៥៦ ) ។ វាគឺជាការបកប្រែប្រកបដោយការបំផុសគំនិតនៃ ម៉ាថាយ ២៣:៣៩–២៤:៥៥ ។
ការបកប្រែដោយយ៉ូសែប ស្ម៊ីធបានចូលរួមចំណែកដល់ការយល់ដឹងរបស់យើងអំពីព្រះគម្ពីរសញ្ញាថ្មី ដោយការស្តារឡើងវិញនូវសេចក្ដីពិតដ៏ច្បាស់ និងពិសេសៗ ដែលបានបាត់បង់ពីព្រះគម្ពីរប៊ីប ( សូមមើល នីហ្វៃទី ១ ១៣:២០–៤១ ) ហើយបន្ថែមនូវការពន្យល់ និង ការបញ្ជាក់របស់ព្រះអម្ចាស់ ។