មេរៀនទី ១ ៖ ថ្ងៃទី ៤
សេចក្ដីផ្ដើម និង បរិបទនៃព្រះគម្ពីរសញ្ញាថ្មី
សេចក្តីផ្តើម
ព្រះគម្ពីរសញ្ញាថ្មីគឺជាកំណត់ត្រាមួយអំពីព្រះជន្មរមែងស្លាប់ ការបង្រៀន និង ដង្វាយធួនរបស់ព្រះយេស៊ូវគ្រីស្ទ ការស្ថាបនាសាសនាចក្ររបស់ទ្រង់ និង ការបម្រើ ព្រមទាំងការបង្រៀននៃពួកសិស្សរបស់ទ្រង់ ។ ក្នុងមេរៀននេះ អ្នកនឹងរៀនពីបរិបទនៃប្រវត្តិសាស្ត្រ និងវប្បធម៌នៃព្រះគម្ពីរសញ្ញាថ្មី ដោយរួមបញ្ចូលទាំងកត្តានានាដែលធ្វើឲ្យសាសន៍យូដាជាច្រើនបានបដិសេធព្រះយេស៊ូវថាជាព្រះមែស៊ី និង ព្រះអង្គសង្គ្រោះ ។ អ្នកក៏នឹងអានផងដែរអំពីពួកមនុស្សដែលបានទទួលយកយ៉ាងរាបទាបថា ព្រះយេស៊ូវគ្រីស្ទជាអង្គសង្គ្រោះ ហើយបានជ្រើសធ្វើតាមទ្រង់ ។
បរិបទនៃព្រះគម្ពីរសញ្ញាថ្មី
សូមដាក់ដៃរបស់អ្នកនៅលើរូបភាពនៅខាងស្តាំដៃ ។ ផ្អែកលើអ្វីដែលអ្នកឃើញនៅក្នុងរូបភាពនៅខាងឆ្វេងដៃនេះ តើអ្នកគិតថាមានអ្វីកំពុងកើតឡើងនៅក្នុងរូបភាពនេះ ? សូមដកដៃរបស់អ្នកចេញពីរូបភាពនៅខាងស្តាំ ។
តើការឃើញរូបភាពទាំងមូលជួយអ្នកឲ្យយល់អ្វីដែលកំពុងកើតឡើងដោយរបៀបណា ?
បុរសម្នាក់ដែលជួតក្បាលនឹងក្រណាត់ពណ៌ខៀវនោះគឺជាស្ទេផាន ជាសិស្សម្នាក់របស់ព្រះយេស៊ូវគ្រីស្ទ ។ សូមអានក្បាលជំពូក កិច្ចការ ៧ ដើម្បីរៀនពីព្រឹត្តិការណ៍អ្វីបានបើកបង្ហាញនៅក្នុងរូបភាពនេះ ។
សូមគិតពីរបៀបដែលអ្នកអាចប្រដូចការបើករូបភាពទាំងមូល ទៅនឹងការយល់ដឹងពីព្រះគម្ពីរ ។
សកម្មភាពនេះឆ្លុះបញ្ចាំងពីសារៈសំខាន់នៃការយល់ដឹងពីបរិបទនៃព្រះគម្ពីរ ។ ពាក្យ បរិបទ សំដៅទៅលើកាលៈទេសៈដែលកើតមាននៅជុំវិញ ឬផ្ដល់ជាសាវតាដល់វគ្គបទគម្ពីរ ព្រឹត្តិការណ៍ ឬដំណើររឿងនៅក្នុងព្រះគម្ពីរ ។ នៅពេលអ្នកដឹងច្បាស់នូវបរិបទខាងប្រវត្តិសាស្ត្រ និង ខាងវប្បធម៌ក្នុងព្រះគម្ពីរសញ្ញាថ្មី នោះអ្នកអាចយល់ដឹង ហើយអនុវត្តការបង្រៀនរបស់វាបានកាន់តែប្រសើរឡើង ។
វគ្គខាងក្រោមនៅក្នុងមេរៀននេះ មានព័ត៌មានដែលនឹងជួយអ្នកឲ្យយល់បន្ថែមទៀតអំពីបរិបទនៃព្រះគម្ពីរសញ្ញាថ្មី ។
ពួកអ្នកដឹកនាំសាសនាសាសន៍យូដាអំឡុងពេលនៃការបម្រើរបស់ព្រះអង្គសង្គ្រោះ
យ៉ាកុបជាព្យាការីនៅក្នុងព្រះគម្ពីរមរមនបានកត់ត្រានូវការព្យាករ ដែលជួយយើងឲ្យយល់ពីស្ថានភាពជុំវិញការបម្រើនៅក្នុងព្រះជន្មរមែងស្លាប់របស់ព្រះយេស៊ូវគ្រីស្ទ ។ សូមមើល នីហ្វៃទី ២ ១០:៣–៥ដោយរកមើលពាក្យ ឬ ឃ្លាដែលយ៉ាកុបបានប្រើដើម្បីពិពណ៌នាពីស្ថានភាពខាងវិញ្ញាណនៅក្នុងចំណោមពួកយូដាអំឡុងពេលនៃការបម្រើរបស់ព្រះអង្គសង្គ្រោះ ។
ពាក្យ ឧបាយកលផ្នែកសង្ឃ ក្នុង នីហ្វៃទី ២ ១០:៥ សំដៅលើការផ្សព្វផ្សាយដើម្បីស្វែងរក « កម្រៃ និង ការសរសើរតម្កើងពីមនុស្សលោក » ជាជាងសុខុមាលភាពនៃរាស្ត្ររបស់ព្រះ (នីហ្វៃទី ២ ២៦:២៩) ។ ជនដែលមានកំហុសនៃឧបាយកលផ្នែកសង្ឃគឺជាពួកអ្នកដឹកនាំសាសនាដ៏ទុច្ចរិតនៅក្នុងចំណោមពួកសាសន៍យូដា ដែលកំពុងដឹកនាំប្រជាជនទៅរកភាពវិនាស ។
សេចក្ដីបន្ថែមទៅនឹងក្រឹត្យវិន័យរបស់ម៉ូសេ និងទស្សនវិជ្ជាមិនពិតផ្សេងទៀត
ដើម្បីយល់បន្ថែមទៀតពីរបៀបដែលពួកអ្នកដឹកនាំសាសនាបានដឹកនាំមនុស្សឲ្យវង្វេង សូមគូររង្វង់មួយជុំវិញរង្វង់ដែលមានស្រាប់នៅខាងក្រោមនេះ ដែលជាតំណាងឲ្យក្រឹត្យវិន័យរបស់ម៉ូសេ ហើយសរសេរថា ក្រឹត្យវិន័យតាមមាត់ ។
ក្រឹត្យវិន័យរបស់ម៉ូសេសំដៅលើព្រះបញ្ញត្តិ និង ការបង្រៀនដែលព្រះបានប្រទានដល់សាសន៍អ៊ីស្រាអែលពីបុរាណតាមរយៈព្យាការីម៉ូសេ ។ ពួកគ្រូបង្រៀន និង ពួកអ្នកដឹកនាំសាសន៍យូដាបានបន្ថែមច្បាប់ និងការបកស្រាយផ្ទាល់ខ្លួនទៅលើក្រឹត្យវិន័យនោះ ។ អ្វីដែលគេស្គាល់ថាជាក្រឹត្យវិន័យតាមមាត់ ឬ ទំនៀមទម្លាប់តាមមាត់ ច្បាប់ និង ការបកស្រាយបន្ថែមទាំងនេះមានគោលបំណងដើម្បីការពារកុំឲ្យមានការបំពានទៅលើក្រឹត្យវិន័យរបស់ព្រះ ។ ឧទាហរណ៍ យោងតាមក្រឹត្យវិន័យតាមមាត់នោះ ការស្រាយចំណងដោយដៃទាំងសងខាងនៅថ្ងៃឈប់សម្រាកត្រូវបានហាមឃាត់ ។ ការធ្វើបែបនេះត្រូវគេគិតថាជាការធ្វើការ ហេតុដូច្នេះហើយវាគឺជាការរំលោភបំពានមួយចំពោះថ្ងៃឈប់សម្រាក ។ ទោះជាយ៉ាងណាក៏ដោយ ការស្រាយចំណងដោយប្រើដៃតែម្ខាងត្រូវបានគេអនុញ្ញាតឲ្យធ្វើ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរអ្វីដែលអ្នកគិតថាអាចជាគ្រោះថ្នាក់នៃការការបន្ថែមច្បាប់ដែលមនុស្សបង្កើតទៅនឹងបញ្ញត្តិរបស់ព្រះ ។
អែលឌើរ ប្រ៊ូស អ័រ ម៉ាក់ខនឃី ក្នុងកូរ៉ុមនៃពួកសាវកដប់ពីរនាក់បានពន្យល់ថា « ដ្បិតនៅជំនាន់មុន និង បន្ទាប់ពីជំនាន់នៃការបម្រើរបស់ព្រះអម្ចាស់របស់យើង » នោះពួកអ្នកដឹកនាំសាសនាសាសន៍យូដាមួយចំនួន « បានយករឿងដែលច្បាស់លាស់ ហើយសាមញ្ញនៃសាសនាដ៏បរិសុទ្ធ ហើយបានបន្ថែមនៅក្នុងនោះនូវការបកស្រាយយ៉ាងច្រើនរបស់ខ្លួន ពួកគេបានបញ្ចេញបញ្ចូលដោយបន្ថែមពិធីសាសនា និង ការអនុវត្ត ហើយពួកគេបានយករបៀបថ្វាយបង្គំដ៏រីករាយ ហើយមានក្ដីអំណរ រួចបង្វែរវាឲ្យទៅជាប្រព័ន្ធនៃការធ្វើពិធីសាសនា និង ការអនុវត្តដ៏តឹងរឹង ហើយខ្លី និងធ្វើឲ្យបាក់ទឹកចិត្ត ។ វិញ្ញាណដ៏រស់រវើកនៃក្រឹត្យវិន័យរបស់ព្រះអម្ចាស់បានក្លាយទៅជាលិខិតគ្មានន័យនៃពិធីសាសនារបស់សាសន៍យូដានៅក្នុងកណ្ដាប់ដៃពួកគេ » (The Mortal Messiah ៖ From Bethlehem to Calvary វ៉ុល ៤ [ ឆ្នាំ ១៩៧៩–៨១ ] ១:២៣៨ ) ។
យោងតាមអែលឌើរ ម៉ាក់ខនឃី តើពួកអ្នកដឹកនាំសាសនាសាសន៍យូដាបានធ្វើអ្វីខ្លះចំពោះក្រឹត្យវិន័យរបស់ព្រះជាមួយការបកស្រាយបន្ថែមរបស់ពួកគ ?
ពួកសាសន៍យូដាក្នុងសម័យព្រះយេស៊ូវបានស្ថិតនៅក្នុងស្ថានភាពនៃការក្បត់សាសនា ។ ទោះជាសិទ្ធិអំណាច និង ពិធីបរិសុទ្ធនៃបព្វជិតភាព អើរ៉ុនបានបន្តមាននៅក្នុងចំណោមពួកគេក៏ដោយ មានពួកសាសន៍យូដាជាច្រើនបានវង្វេងពីការអនុវត្តពិតនៃសាសនារបស់ខ្លួនដែលបានបើកសម្ដែងតាមរយៈព្រះទៅកាន់ម៉ូសេ ( សូមមើល គ. និង ស. ៨៤:២៥–២៨) ។ ទំនៀមទម្លាប់តាមមាត់ដែលត្រូវបានបន្ថែមដោយអ្នកដឹកនាំសាសន៍យូដា បានទទួលនូវអាទិភាពជាងសាសនាពិត និង បន្ទូលរបស់ព្រះដែលបានសរសេរទុក ។
សូមអាន ម៉ាថាយ ១២:១៤ដោយរកមើលអ្វីដែលពួកផារិស៊ីបានប៉ងធ្វើទៅលើព្រះយេស៊ូវគ្រីស្ទ ដោយសារទ្រង់បានបដិសេធក្រឹត្យវិន័យ និង ទំនៀមទម្លាប់តាមមាត់របស់ពួកគេ ។
ច្បាប់បរទេស និង ការរំពឹងទុកឲ្យមានព្រះមែស៊ីមួយអង្គដើម្បីសង្គ្រោះអ៊ីស្រាអែល
ក្រៅពីទំនៀមទម្លាប់ក្បត់សាសនារបស់សាសន៍យូដា នោះការរំពឹងទុកខុសឆ្គងនៃការយាងមករបស់ព្រះមែស៊ីក៏បាននាំពួកសាសន៍យូដាជាច្រើនឲ្យបដិសេធព្រះយេស៊ូវគ្រីស្ទផងដែរ ។
-
សូមអានកថាខណ្ឌខាងក្រោម ហើយក្រោយមកឆ្លើយសំណួរដែលអមមកជាមួយដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ក្រៅពីគ្រាដ៏ខ្លីនៃឯករាជ្យភាព នោះនៅសម័យព្រះគម្ពីរសញ្ញាថ្មី ពួកសាសន៍យូដាបានរស់នៅជាប្រជាជនស្ថិតនៅក្រោមអាណានិគមជាង ៥០០ឆ្នាំ ។ មានការបះបោរមួយដែលដឹកនាំដោយពួកម៉ាកាប៊ី ជាពួកអ្នកស្រឡាញ់ជាតិមួយក្រុមដែលជាសាសន៍យូដា បានដឹកនាំទៅរកឯករាជ្យភាពបាន ១៦០ឆ្នាំពីមុនការប្រសូតរបស់ព្រះគ្រីស្ទ ។ ទោះជាយ៉ាងក៏ដោយ លុះដល់ពេលដែលព្រះគ្រីស្ទបានប្រសូតមក ពួករ៉ូមបានច្បាំងដណ្តើមយកសាសន៍អ៊ីស្រាអែល ។ ស្ដេចហេរ៉ូឌដែលបានរៀបអភិសេកចូលទៅក្នុងគ្រួសារម៉ាកាប៊ី ត្រូវបានពួករ៉ូមតែងតាំងឲ្យគ្រប់គ្រងលើសាសន៍អ៊ីស្រាអែល ។ ពួកសាសន៍យូដាមិនបានសប្បាយចិត្តនឹងច្បាប់របស់ពួករ៉ូមទេ ហើយពួកគេបានទន្ទឹងរង់ចាំយ៉ាងអន្ទះសារចំពោះព្រះមែស៊ីដែលបានសន្យាថានឹងយាងមកសង្គ្រោះពួកគេពីពួករ៉ូម ។ ដោយសារពួកសាសន៍យូដាជាច្រើនបានរំពឹងចង់ឲ្យព្រះមែស៊ីយាងមកសង្គ្រោះពួកគេចេញពីច្បាប់បរទេស នោះពួកគេបានបដិសេធព្រះយេស៊ូវគ្រីស្ទថាជាព្រះអង្គសង្គ្រោះរបស់ពួកគេ ។
-
តើពួកសាសន៍យូដាជាច្រើនបានរំពឹងអ្វីខ្លះពីព្រះមែស៊ីដែលនឹងយាងមក ?
-
ហេតុអ្វីការរំពឹងទុកដ៏ខុសឆ្គងនេះបានដឹកនាំពួកសាសន៍យូដាជាច្រើនឲ្យបដិសេធព្រះយេស៊ូវថាជាព្រះមែស៊ី ?
-
ពួកសាសន៍យូដាជាច្រើនបានបន្ទាបខ្លួន ហើយបានទទួលស្គាល់ព្រះយេស៊ូវថាជាព្រះមែស៊ី ឬ ព្រះអង្គសង្គ្រោះ
ខណៈដែលពួកសាសន៍យូដាមួយចំនួនបានបដិសេធព្រះយេស៊ូវគ្រីស្ទ មានពួកគេផ្សេងទៀតបានមានចិត្តរាបសា ហើយស្តាប់តាមព្រះវិញ្ញាណបរិសុទ្ធបានទទួលស្គាល់ទ្រង់ជាព្រះមែស៊ី ឬ ជាព្រះអង្គសង្គ្រោះ ។
សូមអាន លូកា ២:២៥–៣៣ដោយរកមើលអ្វីដែលបុរសសុចរិតម្នាក់ឈ្មោះស៊ីម្មានបានធ្វើ និង ថ្លែងកាលយ៉ូសែប និង ម៉ារាបាននាំព្រះឱរសយេស៊ូវទៅព្រះវិហារបរិសុទ្ធ ។
យោងតាម លូកា ២:៣០-៣២ហេតុអ្វីព្រះយេស៊ូវត្រូវបានបញ្ជូនមកផែនដី ?
ចេញពីខគម្ពីរទាំងនេះយើងរៀនថា ព្រះយេស៊ូវគ្រីស្ទត្រូវបញ្ជូនមកដើម្បីនាំសេចក្ដីសង្គ្រោះដល់មនុស្សគ្រប់គ្នា ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរនូវអ្វីដែលព្រះយេស៊ូវគ្រីស្ទ បានធ្វើដើម្បីឲ្យមនុស្សទាំងអស់បានសង្គ្រោះ ។
យ៉ូហាន បាទីស្ទ ត្រូវបានហៅដោយព្រះដើម្បីរៀបចំមនុស្សសម្រាប់ការយាងមកនៃព្រះយេស៊ូវគ្រីស្ទ ។ នៅថ្ងៃបន្ទាប់ពីគាត់បានជ្រមុជទឹកឲ្យព្រះយេស៊ូវ យ៉ូហានបានថ្លែងទីបន្ទាល់ពីទ្រង់ដោយថ្លែងថា « នុ៎ះន៍ កូនចៀមនៃព្រះ ! » (យ៉ូហាន ១:៣៦) ។ សូមអាន យ៉ូហាន ១:៣៧–៤២ដោយរកមើលអ្វីដែលពួកសិស្សពីរនាក់របស់យ៉ូហានបានធ្វើ ក្រោយពីស្ដាប់ឮទីបន្ទាល់របស់លោកអំពីព្រះយេស៊ូវ ។
តើអនទ្រេបានធ្វើអ្វីខ្លះក្រោយពីលោកបានឮទីបន្ទាល់របស់យ៉ូហាន បាទីស្ទ ថា ព្រះយេស៊ូវគឺជាព្រះមែស៊ី ? តើអ្នកគិតថា ហេតុអ្វីគាត់មានចិត្តត្រេកអរដើម្បីចែកចាយដំណឹងនេះដល់ប្អូនប្រុសរបស់លោកឈ្មោះស៊ីម៉ូន-ពេត្រុស ?
ដូចបានកត់ត្រានៅក្នុង យ៉ូហាន ១:៤៣–៤៤ព្រះអង្គសង្គ្រោះបានអញ្ជើញបុរសម្នាក់ឈ្មោះភីលីពឲ្យធ្វើជាសិស្សរបស់ទ្រង់ ។ សូមអាន យ៉ូហាន ១:៤៥–៤៦ដោយរកមើលថាតើភីលីពបានធ្វើអ្វីខ្លះក្រោយពីលោកបានដឹងថាព្រះយេស៊ូវគឺជាព្រះមែស៊ី ។
តើការអញ្ជើញរបស់ភីលីពដល់ណាថាណែលគឺជាអ្វីទៅ ?
ផ្អែកលើគំរូទាំងនេះចេញពីព្រះគម្ពីរសញ្ញាថ្មី សូមបំពេញគោលការណ៍ខាងក្រោមនេះ ៖ នៅពេលយើងមករកព្រះយេស៊ូវគ្រីស្ទ នោះយើងនឹងមានបំណងប្រាថ្នាដ៏កាន់តែធំធេងមួយដើម្បី ។
តើអ្នកគិតថា ហេតុអ្វីយើងនឹងមានបំណងប្រាថ្នាដ៏កាន់តែធំធេងមួយដើម្បីអញ្ជើញមនុស្សដទៃទៀតឲ្យមករកព្រះគ្រីស្ទ នៅពេលយើងមករកទ្រង់ដោយខ្លួនឯងនោះ ?
ប្រធាន ហិនរី ប៊ី អាវរិង នៃគណៈប្រធានទីមួយបានមានប្រសាសន៍ថា មានពរជ័យដ៏អស្ចារ្យមួយដែលយើងទទួលបាន នៅពេលយើងអញ្ជើញមនុស្សដទៃទៀតឲ្យមករកព្រះយេស៊ូវគ្រីស្ទ ៖ « នៅពេលអ្នកអញ្ជើញមនុស្សដទៃទៀតឲ្យមករកព្រះគ្រីស្ទដោយអស់ពីចិត្ត នោះដួងចិត្តអ្នកនឹងមានការផ្លាស់ប្ដូរ ។ … តាមរយៈការជួយមនុស្សដទៃទៀតឲ្យមករកព្រះគ្រីស្ទ អ្នកនឹងឃើញថា អ្នកបានមករកទ្រង់ដោយខ្លួនឯង » (« Come unto Christ » Ensign ខែមីនា ឆ្នាំ ២០០៨ ទំព័រ ៥២ ) ។
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើអ្នកគិតថា ហេតុអ្វីបានជាការអញ្ជើញមនុស្សដទៃទៀតឲ្យមករកព្រះគ្រីស្ទអាចជួយយើងឲ្យខិតកាន់តែជិតនឹងទ្រង់ផងដែរ ?
-
តើនរណាបានអញ្ជើញអ្នកឲ្យមករកព្រះអង្គសង្គ្រោះ និង ដំណឹងល្អរបស់ទ្រង់ ? តើជីវិតរបស់អ្នកមានពរយ៉ាងណាដែរដោយសារទង្វើនេះ ?
-
សូមពិចារណាពីមនុស្សដែលអ្នកអាចអញ្ជើញមករកព្រះយេស៊ូវគ្រីស្ទ ។ តើអ្នកអាចធ្វើអ្វីខ្លះដើម្បីអញ្ជើញមនុស្សដទៃទៀតឲ្យមករកទ្រង់ ?
-
នៅពេលអ្នកសិក្សាព្រះគម្ពីរសញ្ញាថ្មីនាឆ្នាំនេះ អ្នកនឹងមានអារម្មណ៍ពីការទូលអង្វរជាបន្តបន្ទាប់របស់ព្រះអង្គសង្គ្រោះឲ្យមករកទ្រង់ ។ នៅពេលអ្នកទទួលយកការអញ្ជើញនេះ អ្នកនឹងពេញដោយបំណងប្រាថ្នាមួយដើម្បីជួយមនុស្សដទៃឲ្យមកទ្រង់ផងដែរ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាមេរៀនអំពី « សេចក្ដីផ្ដើម និង បរិបទនៃព្រះគម្ពីរសញ្ញាថ្មី » ហើយបានបញ្ចប់វានៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖
តារាងនៅក្នុងទំព័រខាងក្រោម អាចជួយអ្នកឲ្យយល់បានកាន់តែប្រសើរឡើងពីបរិបទនៃដំណើររឿងនៃព្រះជន្មរបស់ព្រះយេស៊ូវគ្រីស្ទ ដែលអ្នកនឹងសិក្សានៅក្នុងដំណឹងល្អរបស់ម៉ាថាយ ម៉ាកុស លូកា និង យ៉ូហាន ។