មេរៀនទី ៣១ ៖ ថ្ងៃទី ៤
វិវរណៈ ៨-១១
សេចក្ដីផ្ដើម
សាវកយ៉ូហានបានឃើញការបើកត្រាទីប្រាំពីរហើយបានរៀនពីបេសកកម្មរបស់លោក ដើម្បីចូលរួមក្នុងការប្រមូលផ្ដុំសាសន៍អ៊ីស្រាអែលនៅថ្ងៃចុងក្រោយ ។ ទោះបីជាមានសេចក្តីវេទនាជាច្រើន ការបំផ្លិចបំផ្លាញ និង ការជំនុំជម្រះដែលនឹងកើតឡើងលើប្រជាជននៅលើផែនដីនេះក្តី យ៉ូហានបានឃើញថា អស់អ្នកដែលមានភាពសក្តិសមត្រូវបានទុកឲ្យមានជីវិតពីបញ្ហាទាំងនោះ ។
វិវរណៈ ៨-៩
យ៉ូហានឃើញការបើកត្រាទីប្រាំពីរ
សូមមើលតារាងដែលភ្ជាប់មកជាមួយនៅក្នុងគម្ពីរវិវរណៈនេះ ។ សូមកត់សម្គាល់ពីចំនួនខគម្ពីរដែលនិយាយអំពីព្រឹត្តិការណ៍ទាំងនោះក្នុងត្រាទីប្រាំមួយ បើប្រៀបធៀបទៅនឹងចំនួនខគម្ពីរដែលនិយាយអំពីព្រឹត្តិការណ៍ទាំងនោះក្នុងត្រាទីប្រាំពីរ ។
សាវកយ៉ូហានបានសរសេរអំពីព្រឹត្តិការណ៍ដែលទាក់ទងជាមួយនឹងរយៈពេល ១០០០ ឆ្នាំ ទីប្រាំពីរ ច្រើនជាងលោកបានសរសេរអំពីព្រឹត្តិការណ៍នានាដែលទាក់ទងនឹងរយៈពេល ១០០០ ឆ្នាំ ផ្សេងទៀត ។ លោកបានសរសេរជាពិសេសអំពីព្រឹត្តិការណ៍ ដែលកើតមានឡើងចន្លោះពេលនៃការបើកត្រាទីប្រាំពីរ និងការយាងមកជាលើកទីពីររបស់ព្រះយេស៊ូវគ្រីស្ទ ។
ហេតុអ្វីអ្នកគិតថាយ៉ូហានបានសរសេរយ៉ាងច្រើនអំពីព្រឹត្តិការណ៍ក្នុងត្រាទីប្រាំពីរ ?
នៅពេលអ្នកសិក្សាការនិមិត្តរបស់យ៉ូហាននៅក្នុង វិវរណៈ ៨–១១ សូមពិចារណាពីអ្វីដែលយើងអាចរៀនពីអ្វីដែលលោកបានសរសេរអំពីព្រឹត្តិការណ៍ទាំងនេះ ។
វិវរណៈ ៨:១–៦ ពិពណ៌នាថាព្រះអង្គសង្គ្រោះបើកត្រាទីប្រាំពីរ ។ យ៉ូហានបានឃើញទេវតាប្រាំពីរអង្គ ដែលបានទទួលត្រែប្រាំពីរ ។ « ត្រែត្រូវបានប្រើកាលពីសម័យបុរាណដើម្បីធ្វើជាសំឡេងប្រកាស សញ្ញា [ របស់កងទ័ព ] ក្នុងចម្បាំង ឬ ប្រកាសពីការយាងមករបស់ស្តេច ។ ហេតុដូច្នោះហើយសំឡេងត្រែ ប្រាប់ដំណឹងជាមុន ឬ ប្រកាសអំពីអ្វីមួយដែលសំខាន់បំផុត » ( ហ្គើរ៉ល អិន ឡាន់ « Seeing the Book of Revelation as a Book of Revelation » Ensign ខែ ធ្នូ ឆ្នាំ ១៩៨៧ ទំព័រ ៥០ ) ។
សូមអាន គោលលទ្ធិ និង សេចក្តីសញ្ញា ៧៧:១២ ដោយរកមើលសំឡេងត្រែទាំងប្រាំពីរជាសញ្ញានៃអ្វី ។
នៅក្នុង វិវរណៈ ៨:១–៦ ការផ្លុំត្រែគឺជាសញ្ញាមួយនៃការចាប់ផ្តើមនៃសេចក្តីវេទនា និង ការបំផ្លិចបំផ្លាញផ្សេងៗ នៅក្នុងការរៀបចំសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ និង ការសោយរាជ្យរបស់ទ្រង់ពេញទាំងសហស្សវត្សរ៍ ។
សូមអានខគម្ពីរយោងនីមួយៗដូចតទៅនេះ ដែលពន្យល់ពីព្រឹត្តិការណ៍ដែលទាក់ទងនឹងសំឡេងត្រែទាំងប្រាំមួយដំបូង ។ នៅពេលអ្នកអាន សូមរកមើលចម្លើយចំពោះសំណួរទាំងនេះ ។
ទីមួយ—វិវរណៈ ៨:៧ ។ តើមានអ្វីកើតឡើង ដែលជាលទ្ធផលនៃ « ព្រិល និង ភ្លើង » ដែលធ្លាក់មកលើផែនដី នៅពេលទេវតាទីមួយបានផ្លុំត្រែរបស់ទ្រង់នោះ ?
ទីពីរ—វិវរណៈ ៨:៨–៩ ។ តើមានអ្វីបីយ៉ាង ដែលបានប៉ះទង្គិចនៅពេលសំឡេងត្រែទីពីរបានបន្លឺឡើង ?
ទីបី—វិវរណៈ ៨:១០–១១ ។ តើមានអ្វីកើតឡើងនៅពេលផ្កាយបានធ្លាក់ចុះពីលើមេឃមកនោះ ? « សូមកត់សម្គាល់ថា ស្លែងគឺជាមើមរុក្ខជាតិម្យ៉ាង វាគឺជានិមិត្តសញ្ញានៃ « គ្រោះភ័យ ទុក្ខសោកដ៏ជូរចត់ » [ សូមមើល Bible Dictionary « Wormwood »] ) ។
ទីបួន—វិវរណៈ ៨:១២ ។ បន្ទាប់ពីឮសំឡេងត្រែទីបួន តើមានអ្វីបីយ៉ាងទៀតដែលផ្នែកខ្លះរបស់វាបានប្រែជាងងឹតនោះ ?
ទីប្រាំ—វិវរណៈ ៩:១–៣ ។ តើមានអ្វីបានចេញមកពីជម្រៅនៃជង្ហុកធំនោះ នៅពេលទេវតាទីប្រាំបានបើកវានោះ ?
ទីប្រាំមួយ—វិវរណៈ ៩:១៣-១៦, ១៨ ។ តើមានពលទ័ពប៉ុន្មាននាក់ដែលចូលរួមនឹងចម្បាំងដ៏ធំនោះ ដែលយ៉ូហានបានឃើញបន្ទាប់ពីត្រែទីប្រាំមួយបានផ្លុំឡើងនោះ ? តើមនុស្សប៉ុន្មានភាគបានស្លាប់នៅក្នុងចម្បាំងនោះ ?
សូមអាន វិវរណៈ ៩:២០–២១ ដោយរកមើលរបៀបដែលពួកទុច្ចរិត ដែលនៅរស់ពីសេចក្តីវេទនានោះនឹងឆ្លើយតប ។
វិវរណៈ ១០
ទេវតាមួយអង្គណែនាំយ៉ូហានអំពីបេសកកម្មរបស់លោកនៅថ្ងៃចុងក្រោយ
វិវរណៈ ១០ មានការផ្អាកពីការពិពណ៌នាអំពីសំឡេងត្រែទីប្រាំពីរ និង គ្រោះកាចដែលទាក់ទងនឹងសេចក្តីវេទនា ។ នៅក្នុងជំពូកនេះ យើងអានថាយ៉ូហានត្រូវបានណែនាំដោយទេវតាមួយអង្គផ្សេងទៀត ។
តើមានបទពិសោធន៍ណាខ្លះនៅក្នុងជីវិតនេះ ដែលអាចចាត់ទុកថាជាបទពិសោធន៍ផ្អែមល្ហែម និង ជូរចត់ ?
សូមអាន វិវរណៈ ១០:១-៣ ដោយរកមើលថាតើទេវតានោះកំពុងកាន់អ្វី ។
សូមអាន វិវរណៈ ១០:៨-១១ ដោយរកមើលអ្វីដែល យ៉ូហានត្រូវបានប្រាប់ឲ្យធ្វើជាមួយនឹងក្រាំងតូច ។ សូមកត់សម្គាល់ថាតើវាមានរសជាតិដូចម្តេចចំពោះគាត់ ។
សូមអាន គោលលទ្ធិ និង សេចក្តីសញ្ញា ៧៧:១៤ ដោយរកមើលថាក្រាំងតូចនោះតំណាងឲ្យអ្វី ។
សាវកយ៉ូហានបានទទួលពរពីព្រះយេស៊ូវគ្រីស្ទ ឲ្យរស់នៅរហូតដល់ការយាងមកជាលើកទីពីររបស់ទ្រង់ និង នាំមនុស្សមកកាន់ទ្រង់ ( សូមមើល យ៉ូហាន ២១:២០–២៤; គ. និង ស. ៧:១–៤ ) ។ បេសកកម្មរបស់ យ៉ូហាន គឺជាការជួយប្រមូលផ្តុំកូនចៅនៃសាសន៍អ៊ីស្រាអែល ។ តើបេសកកម្មបែបនេះអាចជាបេសកកម្មទាំងផ្អែមល្ហែម ផង និង ជូរចត់ផងតាមរបៀបណាខ្លះ ?
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមប្រើ វិវរណៈ ១០:៨–១១ ដើម្បីសរសេរចម្លើយចំពោះកង្វល់មួយ ឬ ទាំងពីរខាងក្រោមនេះ ៖
-
ខ្ញុំបានស្តាប់ឮពីការលំបាកក្នុងការបម្រើបេសកកម្ម ។ ខ្ញុំមានការលំបាកដែលគេបដិសេធខ្ញុំ ។ ខ្ញុំពុំប្រាកដទេថាខ្ញុំចង់ទៅបម្រើបេសកកម្មនោះ ។
-
ខ្ញុំបានព្យាយាមធ្វើអ្វីដែលត្រឹមត្រូវ ។ ខ្ញុំអានព្រះគម្ពីរ អធិស្ឋាន ហើយព្យាយាមចែកចាយដំណឹងល្អ ប៉ុន្តែជីវិតរបស់ខ្ញុំហាក់ដូចជានៅតែមានមិនល្អ—ហើយគ្មាននរណម្នាក់ចង់ចូលរួមសាសនាចក្រនេះដោយសារខ្ញុំឡើយ ។ ប្រហែលជាខ្ញុំនឹងបរាជ័យហើយ ។
-
វិវរណៈ ១១
យ៉ូហានឃើញព្យាការីពីរនាក់ត្រូវបានសម្លាប់នៅក្នុងក្រុងយេរូសាឡិម និង សំឡេងត្រែទីប្រាំពីរ
វិវរណៈ ១១ ចាប់ផ្តើមជាមួយនឹងការពិពណនារបស់សាវកយ៉ូហានអំពីព្រឹត្តិការណ៍ ដែលនឹងកើតឡើងចន្លោះពេលនៃសំឡេងត្រែទីប្រាំពីរ និង ការយាងមកជាលើកទីពីររបស់ព្រះយេស៊ូវគ្រីស្ទ ។ អំឡុងពេលគ្រានោះ ពួកទុច្ចរិតនឹងមានអំណាចខ្លាំង ហើយគ្រប់គ្រងលើផែនដី ហើយមានពលទ័ពមួយកងនឹងព្យាយាមច្បាំងដណ្តើមយកក្រុងយេរូសាឡិម ដែលជាផ្នែកមួយនៃចម្បាំងដ៏ធំចុងក្រោយនៅអើម៉ាគេដូន ។
យ៉ូហានបានពិពណ៌នាពីទីក្រុងយេរូសាឡិម និង ការវាយឈ្នះទីក្រុងនោះដោយពួកសាសន៍ដទៃ ( អស់អ្នកដែលពុំបានចុះសេចក្តីសញ្ញា និង រក្សាសេចក្តីសញ្ញា ជាមួយព្រះអម្ចាស់ ) រយៈពេល ៤២ ខែ ដែលស្មើនឹងបីឆ្នាំកន្លះ ។
សូមអាន វិវរណៈ ១១:៣-៦ ដោយរកមើលថាតើស្មរបន្ទាល់ទាំងពីររបស់ព្រះអង្គសង្គ្រោះ នឹងធ្វើអ្វីខ្លះនៅក្នុងក្រុងយេរូសាឡិមភ្លាម ពីមុនការយាងមកជាលើកទីពីររបស់ទ្រង់ ។
ព្យាការីទាំងពីរនាក់នោះគឺអេលីយ៉ា និង ម៉ូសេ មានសិទ្ធិអំណាច និង អំណាចដើម្បីផ្សារភ្ជាប់នៅលើឋានសួគ៌ ហើយធ្វើឲ្យផែនដីកើតមានសេចក្តីទេវនាគ្រប់យ៉ាង ។ ភ្លើងដែលនឹងចេញពីមាត់នៃស្មរបន្ទាល់ពីរនាក់នេះ អាចជានិមិត្តសញ្ញានៃអំណាច និង ទីបន្ទាល់ដែលពួកលោកនឹងថ្លែង ( សូមមើល យេរេមា ៥:១៤, ២០:៩ ) ។
សូមអាន គោលលទ្ធិ និង សេចក្តីសញ្ញា ៧៧:១៥ ដោយរកមើលថាតើនរណាជាស្មរបន្ទាល់ទាំងពីរនាក់នោះ ។
សូមអាន វិវរណៈ ១១:៧-១២ ដោយរកមើលអ្វីដែលនឹងកើតឡើងចំពោះព្យាការីទាំងពីរនាក់នោះ ។ សូមកត់សម្គាល់ពីប្រតិកម្មរបស់ពួកទុច្ចរិត ។
សូមអាន វិវរណៈ ១១:១៣–១៥ ដោយរកមើលអ្វីដែលបានកើតឡើង បន្ទាប់ពីព្យាការីទាំងពីរត្រូវបានប្រោសឲ្យរស់ពីស្លាប់ ហើយឡើងទៅលើមេឃវិញនោះ ។
បន្ទាប់ពីសំឡេងត្រែទីប្រាំពីរបន្លឺឡើង តើនរណានឹងគ្រងរាជ្យលើ « នគរទាំងប៉ុន្មាននៅលោកីយ៍ » ( វិវរណៈ ១១:១៥ ) ?
នៅក្នុង វិវរណៈ ១១:១៦–១៩ យើងអានថាមានពួកចាស់ទុំ ២៤ នាក់ ដែលអង្គុយនៅជិតបល្ល័ង្កព្រះ ថ្វាយអំណរគុណ និង សរសើរតម្កើងដល់ព្រះ ចំពោះរង្វាន់នៃសេចក្តីសុចរិត ព្រមទាំងការដាក់ទោសចំពោះពួកទុចរិត ។
-
រំឭកពីមេរៀនមុនអំពីគោលការណ៍ដូចតទៅនេះដែលមាននៅក្នុង វិវរណៈ ៧ ៖ ប្រសិនបើយើងស៊ូទ្រាំនឹងសេចក្តីទុក្ខលំបាកដោយស្មោះត្រង់ ហើយប្រែជាបរិសុទ្ធតាមរយៈដង្វាយធួនរបស់ព្រះយេស៊ូវគ្រីស្ទ នោះយើងនឹងរីករាយនឹងសិរីល្អសេឡេស្ទាលជាមួយព្រះ ។ សូមពិចារណាអំពីព្រឹត្តិការណ៍ក្នុងត្រាទីប្រាំពីរដែលអ្នកបានរៀនថ្ងៃនេះ ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពីរបៀបដែលគោលការណ៍ទាំងនេះអាចផ្តល់ការលួងលោម និង ភាពសុខសាន្តដល់អស់អ្នក ដែលជួបប្រទះនូវគ្រោះភ័យដ៏គួរឲ្យភ័យខ្លាច ដែលនឹងកើតឡើងពីមុនពេលការយាងមកជាលើកទីពីររបស់ព្រះអម្ចាស់ ។
អែលឌើរ នែល អិល អិល អាន់ឌើរសិន ក្នុងកូរ៉ូមនៃពួកសាវកដប់ពីរនាក់ បានបង្រៀនថាទោះបីជាមានគ្រោះភ័យក្នុងជំនាន់យើងក្តី យើងអាចទន្ទឹងរង់ចាំការយាងមករបស់ព្រះអម្ចាស់ ដោយគារវភាព និង ការគិតត្រៀមខ្លួនជាមុន ៖
« បងប្អូនប្រុសស្រី យើងរស់នៅក្នុងសម័យមុនការយាងមកជាលើកទីពីររបស់ព្រះអម្ចាស់ ជាពេលដែលត្រូវចូលរួមជាបន្តបន្ទាប់ដោយពួកអ្នកជឿគ្រប់សម័យកាល ។ យើងរស់នៅក្នុងសម័យនៃសង្គ្រាម និង ពាក្យចចាមអារ៉ាមអំពីសង្គ្រាមទាំងឡាយ សម័យនៃគ្រោះធម្មជាតិ សម័យដែលពិភពលោកត្រូវបានប៉ះទង្គិចដោយការភាន់ច្រឡំ និង ចលាចល ។
« ប៉ុន្តែ យើងក៏រស់នៅក្នុងយុគ្គសម័យនៃការស្តារឡើងវិញដ៏រុងរឿងផងដែរ ជាពេលដែលដំណឹងល្អត្រូវបាននាំទៅកាន់ពេញសព្វផែនដី—ជាពេលមួយដែលព្រះអម្ចាស់បានសន្យាថា ‹ នឹងបង្កើតឡើងនូវ…ប្រជាជនបរិសុទ្ធមួយ › [ គ. និង ស. ១០០:១៦ ] ហើយប្រដាប់ ‹ ដោយអាវុធនៃសេចក្តីសុចរិត និង ដោយព្រះចេស្តានៃព្រះ › [ នីហ្វៃទី ១ ១៤:១៤ ] ។
« យើងរីករាយក្នុងជំនាន់នេះ និង អធិស្ឋានថាយើងអាចនឹងប្រឈមមុខជាមួយឧបសគ្គ និង ភាពមិនប្រាកដប្រជារបស់យើងដោយចិត្តក្លាហាន ។ ការលំបាករបស់មនុស្សមួយចំនួនមានច្រើនជាងមនុស្សដទៃទៀត ប៉ុន្តែគ្មាននរណាដែលមិនត្រូវបានការពារឡើយ ។ …
« ថ្វីដ្បិតតែព្រះអម្ចាស់បានអះអាងនឹងយើងម្ដងហើយម្ដងទៀតថា យើង ‹ ពុំចាំបាច់ភ័យខ្លាចឡើយ › ក្ដី [ គ. និង ស.១០:៥៥ ] ក៏ការរក្សាទស្សនវិស័យច្បាស់លាស់ និងការសម្លឹងមើលហួសពីពិភពលោកនេះ ពុំងាយស្រួលជានិច្ចនោះទេ នៅពេលយើងស្ថិតនៅក្នុងការសាកល្បងនោះ ។ …
« សេចក្តីជំនឿយើងកើនឡើង នៅពេលយើងរំពឹងចាំនូវថ្ងៃដ៏រុងរឿងនៃការត្រឡប់មកវិញរបស់ព្រះអង្គសង្គ្រោះនៅលើផែនដីនេះ ។ គំនិតអំពីការយាងមករបស់ទ្រង់ធ្វើឲ្យព្រលឹងខ្ញុំរំភើបណាស់ ។ វាគឺជាការបំផុសគំនិតមួយដ៏អស្ចារ្យណាស់ ។ ព្រំដែន និង ភាពធំសម្បើម ភាពធំធេង និង សិរីរុងរឿងនេះនឹងមានហួសពីភ្នែកនៃជីវិតរមែងស្លាប់ធ្លាប់បានឃើញ ឬ បានជួបប្រទះ ។ …
« …យើងនឹងលុតជង្គង់ចុះដោយគាវរភាព ‹ ហើយព្រះអម្ចាស់ ទ្រង់នឹងបន្លឺសំឡេងរបស់ទ្រង់ ហើយអស់ទាំងចុងផែនដីនឹងបានឮ [ គ. និង ស. ៤៥:៤៩ ] ។ ‹ ហើយសំឡេងនោះនឹង… ដូចជាសូរទឹកច្រើន ហើយដូចផ្គរលាន់យ៉ាងខ្លាំង [ គ. និង ស. ១៣៣:២២ ] ។ ‹ [ ហើយ ] ព្រះអម្ចាស់…ព្រះអង្គសង្គ្រោះទ្រង់នឹងឈរនៅកណ្តាលរាស្ត្រទ្រង់ › [ គ. និង ស. ១៣៣:២៥ ] » ( « Thy Kingdom Come » Ensign ឬ Liahona ខែ ឧសភា ឆ្នាំ ២០១៥ ទំព័រ ១១៩–២០, ១២២ ) ។
-
សូមសរសេរឃ្លាខាងក្រោមនេះ ពីក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា វិវរណៈ ៨-១១ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖