មេរៀនទី ២០ ៖ ថ្ងៃទី ២
កិច្ចការ ២៣-២៨
សេចក្តីផ្ដើម
បន្ទាប់ពីការចាប់ខ្លួននៅក្នុងក្រុងយេរូសាឡិមមក ប៉ុលត្រូវគេបញ្ជូនទៅ សេសារា នៅទីនោះលោកបានការពារខ្លួនលោកជំទាស់នឹងការចោទប្រកាន់ខុសឆ្គងនៅចំពោះមុខថ្នាក់ដឹកនាំសាសន៍រ៉ូមជាច្រើននាក់ ។ លោកបានតំណាលប្រាប់ពីការប្រែចិត្តជឿរបស់លោក ហើយថ្លែងទីបន្ទាល់ពីព្រះយេស៊ូវគ្រីស្ទ ។ អំឡុងពេលធ្វើដំណើរទៅទីក្រុងរ៉ូមក្នុងនាមជាទណ្ឌិត នោះប៉ុលបានរសាត់អណ្តែតទៅលើកោះមួយ នៅទីនោះលោកនៅតែគ្មានគ្រោះថ្នាក់ បន្ទាប់មកពស់ពិសមួយបានចឹកលោក ថែមទាំងបានព្យាបាលមនុស្សជាច្រើនដែលមានជំងឺ ។ ទីបំផុត ប៉ុលត្រូវគេនាំយកទៅទីក្រុង រ៉ូម ។ អំឡុងពេលនៅទីនោះលោកត្រូវគេដាក់ឃុំនៅក្នុងផ្ទះមួយក្នុងនាមជាទណ្ឌិតអស់រយៈពេលពីរឆ្នាំ ហើយបានបង្រៀន ព្រមទាំងថ្លែងទីបន្ទាល់អំពីព្រះយេស៊ូវគ្រីស្ទ ។
កិច្ចការ ២៣-២៦
ប៉ុលត្រូវគេបៀតបៀន ចាប់ដាក់គុក ហើយកាត់ទោសនៅចំពោះព្រះភក្ត្រស្តេច អ័គ្រីប៉ា
តើពរជ័យអ្វីខ្លះ ដែលអ្នកបានទទួល តាមរយៈការធ្វើតាមព្រះបញ្ញត្តិ និង ការបង្រៀនរបស់ព្រះ ?
តើមានកត្តាអ្វីខ្លះដែលអាចបង្វែរមនុស្សម្នាក់ចេញពីព្រះ ហើយឈប់រស់នៅតាមព្រះបញ្ញត្តិ និង ការបង្រៀនរបស់ទ្រង់នោះ ?
សូមពិចារណាពីអ្វីដែលអាចជាលទ្ធផលកើតឡើង នៅពេលមនុស្សងាកបែរចេញ និង ផ្តាច់ខ្លួនពួកគេចេញឆ្ងាយពីព្រះ ។
នៅពេលអ្នកសិក្សា កិច្ចការ ២៣-២៦ សូមរកមើលសេចក្តីពិតដែលនឹងជួយអ្នក នៅពេលអ្នកមានអារម្មណ៍ថា អ្នកបានផ្តាច់ខ្លួនអ្នកចេញពីព្រះ និង ពីពរជ័យរបស់ទ្រង់ ។
សូមចាំថា ប៉ុលត្រូវគេចាប់ខ្លួននៅខាងក្រៅព្រះវិហារបរិសុទ្ធនៅក្រុងយេរូសាឡិម ហើយបាននាំយកទៅមុខពួកថ្នាក់ដឹកនាំសាសន៍យូដា ( សូមមើល កិច្ចការ ២១:៣០–៣៣, ២២:២៣–៣០ ) ។ នៅក្នុង កិច្ចការ ២៣-២៥ យើងរៀនអំពីជំនួបរបស់លោកជាមួយថ្នាក់ដឹកនាំសាសន៍យូដា ហើយថាប៉ុលត្រូវគេចាប់ដាក់គុក ។ អំឡុងពេលប៉ុលនៅ ក្នុងគុក ព្រះអម្ចាស់បានយាងមកលួងលោម ហើយបានលើកទឹកចិត្តលោកឡើង ( សូមមើល កិច្ចការ ២៣:១១ ) ។ មេទ័ពរ៉ូមដែលបានចាប់ខ្លួនប៉ុលបានបញ្ជូនលោកទៅ សាសេរា ដើម្បីរារាំងពួកសាសន៍យូដាមួយក្រុមកុំឲ្យសម្លាប់លោក ។ នៅទីនោះប៉ុលបានប្រកាសពីការ គ្មានទោសរបស់លោកនៅចំពោះមុខអភិបាលរ៉ូម ឈ្មោះភេលីច ។ បើទោះបីជាលោក ភេលីចបានជឿថាប៉ុលគ្មានទោសក្តី លោកភេលីចនៅតែបន្តឃុំខ្លួនលោកនៅក្នុងផ្ទះ ក្នុងនាមជាទណ្ឌិតអស់រយៈពេលពីរឆ្នាំ ។ លោកភេស្ទុស បានមកជំនួសតំណែងលោក ភេលីចធ្វើជាអភិបាលសាសន៍រ៉ូមលើពួកសាសន៍យូដា ចំណែកឯស្តេច ហេរ៉ូឌ អ័គ្រីប៉ា ដែលសោយរាជ្យនៅតំបន់មួយដែលមានទីតាំងនៅទិសឦសាននៃសមុទ្រកាលីឡេ បានជួបជាមួយលោកភេស្ទុស ហើយមានព្រះទ័យចង់ស្តាប់រឿងក្តីរបស់ប៉ុល ។ ក្រោយមក ប៉ុលត្រូវនាំទៅចំពោះព្រះភក្ត្រស្តេច អ័គ្រីប៉ា ។
សូមអាន កិច្ចការ ២៦:៤-១១ ដោយរកមើលថាតើប៉ុលបានពិពណ៌នាហេតុការណ៍ដែលបានកើតឡើងចំពោះលោកបែបណាខ្លះប្រាប់ស្តេច អ័គ្រីប៉ា ។
ដូចបានកត់ត្រានៅក្នុង កិច្ចការ ២៦:១២-១៦ ប៉ុលបានប្រាប់ម្តងទៀតអំពីការនិមិត្តរបស់លោកអំពីព្រះអង្គសង្គ្រោះនៅតាមផ្លូវទៅក្រុង ដាម៉ាស ។
សូមអាន កិច្ចការ ២៦:១៦-១៨ ដោយរកមើលបេសកកម្មដែលព្រះអម្ចាស់បានប្រទានដល់ប៉ុល ។ ពាក្យ ទទួលមរដក ដូចបានប្រើនៅក្នុង ខទី ១៨ សំដៅលើការទទួលចូលទៅក្នុងនគរសេឡេស្ទាលនៃព្រះ ។
សូមគិតពីសំណួរខាងក្រោមនេះ ៖ តើអ្នកគិតថា ការជួយបើកភ្នែកខាងវិញ្ញាណរបស់នរណាម្នាក់ជាអ្វី ? តើមានអ្វីខ្លះដែលអាចបង្វែរមនុស្សម្នាក់ចេញពីភាពខ្មៅងងឹត ហើយបែរឆ្ពោះទៅរកពន្លឺ និង ព្រះបញ្ញត្តិ ព្រមទាំងពរជ័យរបស់ព្រះនោះ ?
សូមអាន កិច្ចការ ២៦:១៩-២៣ ដោយរកមើលអ្វី ដែលប៉ុលបាននិយាយថា លោកបានបង្រៀនទាំងពួកសាសន៍យូដា និង ពួកសាសន៍ដទៃថាពួកគេត្រូវធ្វើ ដើម្បីទទួលបានពរជ័យដែលបានចែងនៅក្នុង ខទី ១៨ ។
យោងតាម ខទី ២០ តើប៉ុលបានបង្រៀនអ្វីខ្លះដល់សាសន៍យូដា និង សាសន៍ដទៃ ?
សេចក្តីពិតមួយដែលយើងអាចរៀនពីខគម្ពីរទាំងនេះគឺថា ប្រសិនបើយើងប្រែចិត្ត ហើយងាកទៅរកព្រះ នោះយើងអាចយកឈ្នះលើអំណាចរបស់សាតាំងនៅក្នុងជីវិតរបស់យើង ទទួលការអត់ទោសពីអំពើបាបយើង ហើយសក្ដិសមចូលក្នុងនគរសេឡេស្ទាល ។ សូមគិតពីការសរសេរសេចក្តីពិតនេះនៅក្នុងព្រះគម្ពីររបស់អ្នកក្បែរ កិច្ចការ ២៦:១៨-២០ ។
ដើម្បីជួយអ្នកឲ្យយល់ពីគោលលទ្ធិនេះ សូមអានសេចក្ដីថ្លែងការណ៍ខាងក្រោមដោយអែលឌើរ នែល អិល អាន់ឌើរសិនក្នុងកូរ៉ុមនៃពួកសាវកដប់ពីរនាក់ ៖
« នៅពេលយើងមានបាប យើងងាកចេញពីព្រះ ។ នៅពេលយើងប្រែចិត្ត យើងត្រឡប់មករកព្រះវិញ ។
ការអញ្ជើញឲ្យប្រែចិត្តគឺកម្រជាសំឡេងមួយនៃការដាក់ទណ្ឌកម្មណាស់ ផ្ទុយទៅវិញវាជាសំឡេងអង្វករឲ្យងាកក្រោយ និង ដើម្បី ‹ ត្រឡប់ › ទៅរកព្រះវិញ [ សូមមើល ហេលេមិន ៧:១៧ ] ។ វាគឺជាការដង្ហោយហៅរបស់ព្រះវរបិតាដែលពេញដោយក្តីស្រឡាញ់ និង ព្រះរាជបុត្រាបង្កើតតែមួយរបស់ទ្រង់ ដើម្បីធ្វើឲ្យយើងក្លាយជាមនុស្សដែលលើសពីអ្វីដែលជាខ្លួនយើង ដើម្បីឈានជើងឡើងទៅផ្លូវមួយដែលខ្ពស់ជាងនេះនៃជីវិតនេះ ដើម្បីផ្លាស់ប្តូរ ហើយទទួលអារម្មណ៍នៃសុភមង្គលក្នុងការគោរពព្រះបញ្ញត្តិ » ( « Repent … That I May Heal You » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ៤០ ) ។
-
សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ ផ្អែកទៅលើអ្វីដែលអ្នកបានរៀនពីប៉ុល និង អែលឌើរ អាន់ឌើរសិន តើយើងអាចសម្រេចបានអ្វីខ្លះ នៅពេលយើងប្រែចិត្ត ហើយត្រឡប់មករកព្រះវរបិតាសួគ៌ និង ព្រះយេស៊ូវគ្រីស្ទវិញ ?
នៅពេលអ្នកបន្តសិក្សា កិច្ចការ ២៦ សូមរកមើលអ្វីដែលបានរារាំងភេស្ទុស និង ស្តេច អ័គ្រីប៉ា កុំឲ្យប្រែចិត្ត ប្រែទៅរកព្រះ ហើយប្រែចិត្តជឿលើព្រះយេស៊ូវគ្រីស្ទ ។
សូមអាន កិច្ចការ ២៦:២៤-២៩ ដោយរកមើលរបៀបដែលភេស្ទុស និង ស្តេច អ័គ្រីប៉ាមានប្រតិកម្មចំពោះការបង្រៀន និង ទីបន្ទាល់របស់ប៉ុលអំពីព្រះអង្គសង្គ្រោះ ។ នៅក្នុងតារាងខាងក្រោម សូមសរសេរឃ្លាដែលពិពណ៌នាពីប្រតិកម្មរបស់ពួកគាត់ចំពោះការបង្រៀនរបស់ប៉ុល ៖
|
ប្រតិកម្មចំពោះការបង្រៀនរបស់ប៉ុល | |
|---|---|
|
ភេស្ទុស |
ស្ដេច អ័គ្រីប៉ា |
សូមកត់ចំណាំថា ភេស្ទុស ពុំជឿការបង្រៀនរបស់ប៉ុលឡើយ ។ ស្តេច អ័គ្រីប៉ា បានជឿប្រសាសន៍របស់ព្យាការីនានា ប៉ុន្តែពុំបានតាំងចិត្តខ្លួនទាំងស្រុងធ្វើជាគ្រិស្តសាសនិកឡើយ ។
ប៉ុល នៅចំពោះព្រះភក្ត្រស្ដេច អ័គ្រីប៉ា
សេចក្តីពិតមួយដែលយើងរៀនពីភេស្ទុស និង ស្តេច អ័គ្រីប៉ានោះគឺថា ដើម្បីប្រែចិត្តជឿលើព្រះយេស៊ូវគ្រីស្ទ យើងត្រូវតែជ្រើសរើសជឿ ហើយត្រូវតាំងចិត្តរស់នៅ តាមដំណឹងល្អទាំងស្រុង ។
សូមអានដំណើររឿងខាងក្រោមនេះដោយប្រធាន ឌៀថើរ អេស្វ អុជដូហ្វ ក្នុងគណៈប្រធានទីមួយ ដោយរកមើលអ្វីដែលលោកបានបង្រៀនអំពីការតាំងចិត្ត ៖
« មានបងប្អូនប្រុសពីរនាក់ បានឈរនៅលើច្រាំងថ្មចោតតូចមួយ ដើម្បីគយគន់មើលទឹកដ៏ថ្លាឆ្វង់នៅក្នុងបឹងខៀវស្រងាត់មួយ ។ វាគឺជាកន្លែងមុជទឹកមួយដ៏ល្បីល្បាញ ហើយជារឿយៗបងប្អូនប្រុសទាំងពីរនាក់នេះ បាននិយាយគ្នាពីការលោតចុះទៅក្នុងបឹងនោះ—ជាអ្វីមួយដែលពួកគេបានឃើញអ្នកដទៃធ្វើ ។
ទោះបីពួកគេទាំងពីរនាក់ចង់លោតចុះទៅក្ដី ប៉ុន្តែគ្មាននរណាម្នាក់ចង់លោតទៅមុនឡើយ ។ កម្ពស់នៅច្រាំងថ្មចោតនោះ គឺវាពុំសូវខ្ពស់ប៉ុន្មានទេ ប៉ុន្តែចំពោះក្មេងប្រុសទាំងពីរនាក់នេះ វាហាក់ដូចចម្ងាយនោះកាន់តែកើនឡើង ពេលណាពួកគេបានចាប់ផ្ដើមឱនទេរទៅមុខ—ហើយសេចក្ដីក្លាហានរបស់ពួកគេបានរសាយបាត់មួយរំពេច ។
នៅទីបំផុត មានម្នាក់បានដាក់ជើងម្ខាងរបស់ខ្លួននៅគែមច្រាំងថ្មចោតនោះ ហើយបានរំកិលទៅមុខបន្តិចម្ដងៗ ។ នៅពេលនោះប្អូនប្រុសរបស់គាត់ម្នាក់ទៀតបានខ្សឹបថា ‹ ប្រហែលជាយើងត្រូវចាំរហូតដល់រដូវក្ដៅឆ្នាំក្រោយ › ។
ប៉ុន្តែកម្លាំងរបស់ក្មេងប្រុសទីមួយបានទាញគាត់ទេរទៅមុខរួចជាស្រេចហើយ ។ គាត់បានតបថា ‹ បងប្រុសខ្ញុំតាំងចិត្តរួចហើយ ! ›
គាត់បានលោតគ្រាំចូលទៅក្នុងបឹងនោះ ហើយបានងើបចេញពីទឹកមកវិញដោយសម្រែកនៃភាពជោគជ័យ ។ ក្មេងប្រុសទីពីរក៏បានលោតទៅតាមភ្លាមដែរ ។ ក្រោយមកទៀត ពួកគេទាំងពីរបានអស់សំណើចពីពាក្យចុងក្រោយរបស់ក្មេងប្រុសទីមួយ ពីមុនគាត់លោតចូលទៅក្នុងទឹកថា ៖ ‹ បងប្រុសខ្ញុំតាំងចិត្តរួចហើយ › ។
ការតាំងចិត្តគឺដូចគ្នានឹងការលោតចូលទៅក្នុងបឹងនោះផងដែរ ។ អ្នកអាចតាំងចិត្តធ្វើវា ឬ ក៏ដកថយ ។ អ្នកអាចរំកិលទៅមុខ ឬ ឈរនៅស្ងៀម ។ វាពុំមែនបញ្ចប់ត្រឹមតែពាក់កណ្ដាលផ្លូវនោះឡើយ ។ ក្នុងនាមជាសមាជិកនៃសាសនាចក្រនេះ យើងត្រូវតែសួរខ្លួនឯងថា ‹ តើខ្ញុំនឹងលោតចុះទៅ ឬ គ្រាន់តែឈរនៅត្រង់គែមនោះ ? តើខ្ញុំនឹងឈានជើងទៅមុខ ឬ គ្រាន់តែដាក់ជើងរបស់ខ្ញុំឲ្យប៉ះទៅនឹងផ្ទៃទឹកនោះ ? › …
អស់អ្នកណាដែលមានការតាំងចិត្តបែបនេះ អាចរំពឹងទុកថានឹងទទួលបានពរជ័យនៃទីបន្ទាល់អំណរ និង សេចក្ដីសុខសាន្ត ។ ទ្វារនៃស្ថានសួគ៌អាចនឹងបើកឡើងចំពោះពួកគេ ។ …
ភាគច្រើនយើងម្នាក់ៗឈរនៅត្រង់ចំណុចនៃការសម្រេចចិត្តមួយដែលឈរមើលពីលើផ្ទៃទឹកនោះ ។ នេះគឺជាការអធិស្ឋានរបស់ខ្ញុំថា យើងនឹងមានសេចក្ដីជំនឿឆ្ពោះទៅមុខ ប្រឈមមុខនឹងសេចក្ដីភ័យខ្លាចទាំងឡាយ និង មន្ទិលសង្ស័យរបស់យើងដោយក្ដីក្លាហាន រួចហើយនិយាយទៅកាន់ខ្លួនឯងថា ‹ ខ្ញុំបានតាំងចិត្តហើយ ! › » ( « Brother, I’m Committed » Ensign ខែ កក្កដា ឆ្នាំ ២០១១ ទំព័រ ៤–៥ ) ។
យោងតាមប្រធាន អុជដូហ្វ ហេតុអ្វីវាសំខាន់ដែលត្រូវមានការតាំងចិត្តទាំងស្រុងជាជាងមាន « ការតាំងចិត្តតែមួយផ្នែក » ដើម្បីរស់នៅតាមដំណឹងល្អ ?
-
សូមបំពេញសកម្មភាពមួយ ឬ ទាំងពីរខាងក្រោមនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
សូមសរសេរអំពីរបៀបដែលការតាំងចិត្តរបស់អ្នកដើម្បីរស់នៅតាមព្រះបញ្ញត្តិ ឬ គោលការណ៍មួយនៃដំណឹងល្អបានជួយពង្រឹងការប្រែចិត្តជឿរបស់អ្នកចំពោះព្រះយេស៊ូវគ្រីស្ទ ។
-
សូមសរសេរព្រះបញ្ញត្តិ ឬ គោលការណ៍នៃដំណឹងល្អនានា ដែលអ្នកមានអារម្មណ៍ថាអ្នកបានតាំងចិត្តទាំងស្រុងដើម្បីរស់នៅតាម ។ សូមគិតពីគោលការណ៍មួយចំនួននៃដំណឹងល្អដែលអ្នកមានអារម្មណ៍ថា « នៅបន្តិចទៀត » ប៉ុន្តែពុំមែន « យូរទៅទៀត » ( កិច្ចការ ២៦:២៩ ) បានតាំងចិត្តដើម្បីរស់នៅតាម ។ សូមសរសេរគោលដៅអំពីអ្វីដែលអ្នកអាចធ្វើបាន ដើម្បីបង្កើនការយល់ដឹង និង ការតាំងចិត្តរបស់អ្នកចំពោះគោលការណ៍ទាំងនេះ ។
-
សូមអធិស្ឋានសុំជំនួយ នៅពេលអ្នកព្យាយាមប្រែចិត្តជឿដ៏ពិតចំពោះព្រះយេស៊ូវគ្រីស្ទ ដោយការរស់នៅកាន់តែពេញលេញតាមដំណឹងល្អរបស់ទ្រង់ ។
នៅក្នុង កិច្ចការ ២៦:៣០–៣២ យើងអានថា ភេស្ទុស និង ស្តេច អ័គ្រីប៉ា បានឃើញថា ប៉ុលគ្មានកំហុស ហើយចង់ដោះលែងលោក ប៉ុន្តែដោយសារប៉ុលបានប្តឹងរឿងក្តីរបស់ខ្លួនដល់សេសា នោះពួកគេតម្រូវឲ្យបញ្ជូនលោកទៅទីក្រុង រ៉ូម ។
កិច្ចការ ២៧-២៨
ប៉ុលត្រូវគេបញ្ជូនទៅទីក្រុង រ៉ូម ជាកន្លែងដែលលោកបង្រៀន និងថ្លែងទីបន្ទាល់អំពីព្រះយេស៊ូវគ្រីស្ទ
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ បានហៅឧបសគ្គ និង ការសាកល្បងនៃជីវិតនេះថាជា « ខ្យល់គួចខាងវិញ្ញាណ » ( សូមមើល « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ទំព័រ ១៨–២១ ) ។
សូមពិចារណាអំពីឧទាហរណ៍នានានៃការសាកល្បង និង ទុក្ខវេទនា ដែលអាចប្រដូចទៅនឹងខ្យល់គួចនៅក្នុងជីវិតរបស់មនុស្សម្នាក់ ។
នៅពេលអ្នកសិក្សា កិច្ចការ ២៧–២៨ សូមរកមើលគោលការណ៍មួយ ដែលអាចជួយអ្នកឲ្យស៊ូទ្រាំដោយស្មោះត្រង់ក្នុងខ្យល់គួចខាងវិញ្ញាណដែលអ្នកជួប ។
កិច្ចការ ២៧ ប្រាប់ពីរបៀបដែលប៉ុលត្រូវគេនាំខ្លួនទៅក្រុងរ៉ូមដោយឆ្លងកាត់សមុទ្រនៅក្នុងរដូវរងា ។ សំពៅនោះស្ទើរតែត្រូវបំផ្លាញខ្ទេចខ្ទីអំឡុងពេលខ្យល់ព្យុះ ហើយប៉ុល និង អស់អ្នកដែលនៅលើសំពៅនោះបានរសាត់អណ្តែតទៅដល់កោះ មេលីត ឬ ម៉ាល់តា ( សូមមើលផែនទីក្នុងព្រះគម្ពីរប៊ីប ល.រ.១៣ « ដំណើររបស់សាវកប៉ុលទៅផ្សាយសាសនា » នៅក្នុង Bible appendix ) ។
-
សូមអាន កិច្ចការ ២៨:១–១០ និង កិច្ចការ ២៨:១៦–២៤ ដោយរកមើលអ្វីដែលប៉ុលបានជួបនៅលើកោះនោះ និង នៅក្នុងទីក្រុងរ៉ូម ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមគូររូបភាពមួយ ហើយសរសេរចំណងជើងកាសែតដែលសង្ខេបពីព្រឹត្តិការណ៍ទាំងនេះ ដែលមានរៀបរាប់នៅក្នុងវគ្គបទគម្ពីរទាំងនេះ ។
សូមពិចារណាពីការសាកល្បង ដែលប៉ុលបានជួបដែលបានកត់ត្រានៅក្នុង កិច្ចការ ២៣–២៨ ៖ លោកត្រូវគេចាប់ដាក់គុកដោយអយុត្តិធម៌ រសាត់អណ្តែតលើផ្ទៃសមុទ្រ ពស់ពិសចឹក ហើយត្រូវគេនាំខ្លួនទៅទីក្រុងរ៉ូម ជាកន្លែងដែលលោកត្រូវបានឃុំខ្លួនក្នុងផ្ទះក្នុងនាមជាទណ្ឌិត ។
សូមអាន កិច្ចការ ២៨:៣០-៣១ ដោយរកមើលអ្វី ដែលប៉ុលអាចធ្វើនៅក្នុងទីក្រុង រ៉ូម ទោះបីជាលោកត្រូវជាប់ឃុំក្នុងផ្ទះក្នុងនាមជាទណ្ឌិតក្តី ។
តើប៉ុលបានធ្វើអ្វីខ្លះ ដែលបង្ហាញថា លោកនៅតែបន្តស្មោះត្រង់ចំពោះព្រះ ទោះបីជាលោកជួបនូវការសាកល្បងក្តី ?
តើការណ៍ល្អអ្វីខ្លះបានកើតឡើងពីការសាកល្បង ដែលប៉ុលបានជួបអំឡុងពេលនៅលើសមុទ្រ អំឡុងពេលរសាត់អណ្តែតលើទឹកសមុទ្រ និង អំឡុងពេលជាប់គុកនៅទីក្រុងរ៉ូម ?
គោលការណ៍មួយដែលយើងអាចរៀនពីបទពិសោធន៍របស់ប៉ុលគឺថា ប្រសិនបើយើងស្មោះត្រង់ ព្រះអាចជួយយើងឲ្យបំប្លែងការសាកល្បងទៅជាពរជ័យសម្រាប់ខ្លួនយើង និងអ្នកដទៃទៀតវិញបាន ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើមានឧទាហរណ៍ណាខ្លះ អំពីរបៀបដែលព្រះអាចជួយមនុស្ស ឲ្យបំប្លែងការសាកល្បងទៅជាពរជ័យសម្រាប់ខ្លួនពួកគេ និង អ្នកដទៃទៀតវិញបាន ?
-
តើនៅពេលណាដែរ ដែលព្រះបានជួយអ្នក ឬមនុស្សដែលអ្នកស្គាល់ ដោយបំប្លែងការសាកល្បងទៅជាពរជ័យសម្រាប់ខ្លួនអ្នក ឬ អ្នកដទៃទៀត ?
-
សូមជ្រើសរើសធ្វើតាមគំរូរបស់ប៉ុល ហើយបន្តស្មោះត្រង់ នៅពេលអ្នកជួបនូវការសាកល្បងនានា ប្រយោជន៍ឲ្យព្រះអាចជួយបំប្លែងការសាកល្បងទាំងនោះទៅជាពរជ័យសម្រាប់ខ្លួនអ្នក និង អ្នកដទៃទៀត ។
-
សូមសរសេរឃ្លាខាងក្រោមនេះ ពីក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា កិច្ចការ ២៣-២៨ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖