មេរៀនសិក្សានៅផ្ទះ
ផែនការនៃសេចក្ដីសង្គ្រោះ–សេចក្ដីផ្ដើម និង បរិបទនៃព្រះគម្ពីរសញ្ញាថ្មី(មេរៀនទី ១ )
ការរៀបចំសម្ភារ សម្រាប់ គ្រូបង្រៀន ដល់ សិស្ស ដែល សិក្សា នៅ ផ្ទះ
សេចក្ដីសង្ខេប នៃ មេរៀន សិក្សា នៅ ផ្ទះប្រចាំថ្ងៃ
ខាងក្រោមនេះគឺជាសេចក្ដីសង្ខេបមួយអំពីព្រឹត្តិការណ៍ គោលលទ្ធិ និង គោលការណ៍នានាដែលសិស្សបានរៀន នៅពេលពួកគេសិក្សាមេរៀនចំនួនបួនសម្រាប់សិស្សសិក្សានៅផ្ទះសម្រាប់ មេរៀនទី ១ ។ ការដឹងពីអ្វីដែលសិស្សនឹងត្រូវសិក្សា នឹងជួយអ្នកឲ្យរៀបចំខ្លួនដើម្បីបង្រៀន ។ សេចក្ដីសង្ខេបនេះពុំមែនជាផ្នែកមួយនៃមេរៀនទេ ហើយពុំមានន័យថាត្រូវយកវាទៅចែកចាយជាមួយនឹងសិស្សដែរ ។ ដោយសារមេរៀនដែលអ្នកនឹងបង្រៀនសម្រាប់វគ្គទី ១ ផ្ដោតសំខាន់ទៅលើគោលលទ្ធិ និង គោលការណ៍តែពីរបីដែលបានរៀបរាប់នៅក្នុងសេចក្ដីសង្ខេបនេះ ពេលខ្លះអ្នកអាចមានអារម្មណ៍ត្រូវពិនិត្យមើល ឬពិភាក្សាគោលលទ្ធិ និង គោលការណ៍ផ្សេងទៀត ស្របតាមការបំផុសគំនិតនៃព្រះវិញ្ញាណ និង សេចក្ដីត្រូវការនៃសិស្សរបស់អ្នក ។
ថ្ងៃទី ១ (ផែនការនៃសេចក្ដីសង្គ្រោះ )
នៅក្នុងការសិក្សារបស់ពួកគេអំពីផែនការនៃសេចក្ដីសង្គ្រោះ សិស្សទាំងឡាយបានរៀនថា ព្រះយេស៊ូវគ្រីស្ទត្រូវបានជ្រើសរើសនៅក្នុងជីវិតមុនឆាកជីវិតនេះឲ្យធ្វើជាព្រះដ៍ប្រោសលោះនៃមនុស្សលោក ហើយថានៅក្រោមការដឹកនាំរបស់ព្រះវរបិតាសួគ៌ ទ្រង់បានបង្កើតផែនដីនេះ ។ ពួកគេក៏បានរៀនផងដែរពីសេចក្ដីពិតដូចតទៅនេះ ៖ ព្រះយេស៊ូវគ្រីស្ទបានយាងមកសង្គ្រោះពួកយើងពីអំពើបាបរបស់យើង ។ ដោយសារការមានព្រះជន្មរស់ឡើងវិញរបស់ព្រះយេស៊ូវគ្រីស្ទ នោះមនុស្សទាំងអស់នឹងបានរស់ឡើងវិញ ។ ព្រះយេស៊ូវគ្រីស្ទនឹងកាត់សេចក្ដីមនុស្សលោកទាំងអស់ ។ ប្រសិនបើយើងអនុវត្តសេចក្ដីជំនឿលើព្រះយេស៊ូវគ្រីស្ទ ហើយរស់នៅស្របតាមដំណឹងល្អរបស់ទ្រង់ នោះទើបយើងអាចទទួលបានជីវិតដ៏នៅអស់កល្បជានិច្ច ។
ថ្ងៃទី ២ ( តួនាទីរបស់សិស្ស )
សិស្សទាំងឡាយបានរៀនថា ព្រះវិញ្ញាណបរិសុទ្ធបង្រៀនអំពីសេចក្ដីពិត ។ ពួកគេបានដឹងផងដែរថា ប្រសិនបើយើងខិតខំរៀនសូត្រដោយសេចក្ដីជំនឿ នោះទើបយើងអាចយាងព្រះវិញ្ញាណបរិសុទ្ធឲ្យចូលមកក្នុងដួងចិត្តរបស់យើង ដើម្បីបង្រៀន ហើយថ្លែងទីបន្ទាល់ពីសេចក្ដីពិត ។
ថ្ងៃទី ៣ ( ការសិក្សាបទគម្ពីរ )
សិស្សទាំងឡាយបានរៀនពីសារៈសំខាន់នៃការអានទាំងស្រុងនៅក្នុងព្រះគម្ពីរសញ្ញាថ្មី និង ការសិក្សាព្រះគម្ពីរប្រចាំថ្ងៃ ។ លើសពីនេះទៀត សិស្សបានរកឃើញថា សេចក្ដីត្រូវការរបស់យើងចំពោះព្រះគម្ពីរនៅសព្វថ្ងៃនេះគឺធំជាងជំនាន់មុនៗទៅទៀត ហើយថានៅពេលយើងសិក្សាព្រះគម្ពីរ នោះយើងអាចទទួលបានប្រាជ្ញា ពន្លឺ សេចក្តីពិត ការកែតម្រូវ និង ការណែនាំដែលនឹងដឹកនាំយើងទៅរកសេចក្ដីសង្គ្រោះ ។ ពួកគេក៏បានដឹងផងដែរថា នៅពេលយើងសិក្សាព្រះគម្ពីរប្រចាំថ្ងៃ យើងនឹងទទួលបាន « ទឹករស់ » ឬការចិញ្ចឹមបីបាច់ខាងវិញ្ញាណ ដែលយើងត្រូវការ ។
ថ្ងៃទី ៤ ( សេចក្ដីផ្ដើម និង បរិបទនៃព្រះគម្ពីរសញ្ញាថ្មី )
សិស្សទាំងឡាយបានរៀនថា នៅពេលពួកគេដឹងច្បាស់ពីបរិបទខាងប្រវត្តិសាស្ត្រ និង ខាងវប្បធម៌ក្នុងព្រះគម្ពីរសញ្ញាថ្មី នោះពួកគេអាចយល់ដឹងកាន់តែប្រសើរ ហើយអនុវត្តតាមការបង្រៀនរបស់វា ។ ពួកគេក៏បានរៀនដែរថា ព្រះយេស៊ូវគ្រីស្ទត្រូវបានបញ្ជូនមក ដើម្បីនាំយកសេចក្ដីសង្គ្រោះទៅឲ្យមនុស្សគ្រប់រូប ហើយថានៅពេលយើងមករកព្រះយេស៊ូវគ្រីស្ទ យើងនឹងមានបំណងប្រាថ្នាដ៏ធំមួយដើម្បីអញ្ជើញមនុស្សដទៃទៀតឲ្យមករកទ្រង់ ។
សេចក្ដីផ្ដើម
មេរៀននេះមានគោលបំណងដើម្បីរៀបចំខ្លួន ហើយលើកទឹកចិត្តសិស្សឲ្យសិក្សាព្រះគម្ពីរសញ្ញាថ្មី ដោយណែនាំពួកគេឲ្យស្គាល់ប្រធានបទដ៏សំខាន់មួយដែលមាននៅក្នុងការបង្រៀនរបស់ព្រះយេស៊ូវគ្រីស្ទ និង ពួកសាវករបស់ទ្រង់កាលពីជំនាន់បុរាណ ។ នៅពេលសិស្សសិក្សាព្រះគម្ពីរសញ្ញាថ្មី នោះពួកគេនឹងរៀនពីរបៀបឆ្លើយតបទៅនឹងការអញ្ជើញដដែលៗរបស់ព្រះអង្គសង្គ្រោះ ថាឲ្យមករកទ្រង់ ហើយទទួលបានជំនួយរបស់ទ្រង់ និង ព្រះបន្ទូលណែនាំរបស់ទ្រង់នៅក្នុងជីវិតរបស់ពួកគេ ។
យោបល់សម្រាប់ការបង្រៀន
សេចក្ដីផ្ដើមអំពីព្រះគម្ពីរសញ្ញាថ្មី
ព្រះគម្ពីរសញ្ញាថ្មីជួយយើងឲ្យមករកព្រះយេស៊ូវគ្រីស្ទ
សូមសរសេរសំណួរខាងក្រោមនេះដាក់លើក្ដារខៀន មុនពេលចាប់ផ្ដើមបង្រៀន ៖ តើបន្ទុកដ៏លំបាកមួយចំនួនដែលយុវវ័យជួបនៅសម័យយើងនេះមានអ្វីខ្លះ ?
សូមយកប្រអប់ទទេរ ឬកាបូបស្ពាយមួយ ហើយយករបស់ធ្ងន់ៗមកដាក់នៅក្នុងប្រអប់ ឬកាបូបនោះដូចជា ដុំថ្ម ឬសៀវភៅទៅថ្នាក់រៀន ។ សូមអញ្ជើញសិស្សម្នាក់ឲ្យមកខាងមុខក្ដារខៀន ហើយឲ្យគាត់កាន់ប្រអប់ទទេរ ឬស្ពាយកាបូបនោះ ។ ចូរសុំឲ្យសិស្សផ្សេងទៀតឆ្លើយនឹងសំណួរដែលមាននៅលើក្ដារខៀន ហើយសុំឲ្យសិស្សម្នាក់ទៀតឡើងមកសរសេរចម្លើយរបស់សិស្សនៅលើក្ដារខៀន ។ បន្ទាប់ពីទទួលបានចម្លើយនីមួយៗ សូមដាក់របស់ធ្ងន់មួយនៅក្នុងប្រអប់ ឬកាបូបនោះរហូតដល់វាពេញ ។
-
តើអ្នកមានអារម្មណ៍បែបណាដែរ ប្រសិនបើអ្នកត្រូវទ្របន្ទុកនេះពេញមួយថ្ងៃ ?
សុំឲ្យសិស្សពន្យល់ពីការប្រឈម ឬការលំបាកនានាដែលបន្ទុកមួយចំនួនដែលបានសរសេរនៅលើក្ដារខៀននេះ អាចបង្កហេតុអ្វីដល់មនុស្សម្នាក់ ។
សូមពន្យល់ថា ព្រះគម្ពីរសញ្ញាថ្មីបង្រៀនយើងអំពីការបម្រើនៅក្នុងជីវិតរមែងស្លាប់ និង ក្រោយពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ រួមបញ្ចូលទាំងការបង្រៀនទាំងឡាយ អព្ភូតហេតុនានា ពលិកម្មធួន និងការយាងមករបស់ទ្រង់ទៅជួបនឹងពួកសិស្សនៃសាសនាចក្រកាលពីបុរាណ ។ តាមរយៈការបង្រៀនទាំងឡាយ និងទំនាក់ទំនងរបស់ទ្រង់ជាមួយមនុស្សដទៃទៀត វាគឺជាសេចក្ដីពិតមួយដែលបានលើកឡើងម្ដងហើយម្ដងទៀត ដែលវាអាចជួយយើងសម្រាលបន្ទុកដែលយើងមាន ។
សូមពន្យល់ថា ម៉ាថាយ ១១ រួមបញ្ចូលនូវឧទាហរណ៍មួយនៃប្រធានបទដ៏សំខាន់នេះដែលសិស្សនឹងមើលឃើញជារឿយៗ នៅក្នុងការសិក្សារបស់ពួកគេអំពីព្រះគម្ពីរសញ្ញាថ្មីនៅឆ្នាំនេះ ។ សូមអញ្ជើញសិស្សម្នាក់អាន ម៉ាថាយ ១១:២៨ ឲ្យឮៗ ។ សុំឲ្យសិស្សផ្សេងទៀតផ្ទៀងតាម ដោយរកមើលការអញ្ជើញរបស់ព្រះអង្គសង្គ្រោះទៅកាន់អស់អ្នកដែលមានបន្ទុកធ្ងន់ ។
-
តើអ្នកគិតថា ការនឿយព្រួយ ហើយមានផ្ទុកធ្ងន់ មានន័យដូចម្ដេច ?
-
តើព្រះអង្គសង្គ្រោះបានមានបន្ទូលថាយើងត្រូវធ្វើអ្វីខ្លះ ដើម្បីទទួលបានការឈប់សម្រាករបស់ទ្រង់ ? ( សូមសរសេរគោលការណ៍ខាងក្រោមនេះនៅលើក្ដារខៀនដោយប្រើពាក្យរបស់សិស្ស ៖ នៅពេលយើងមករកព្រះយេស៊ូវគ្រីស្ទរួមជាមួយនឹងបន្ទុករបស់យើង នោះទ្រង់នឹងឲ្យយើងឈប់សម្រាក ) ។
-
តើអ្នកគិតថា ការមករកព្រះយេស៊ូគ្រីស្ទមានន័យដូចម្ដេច ?
ដើម្បីជួយសិស្សឲ្យយល់ដឹងពីអត្ថន័យនៃការមករកព្រះគ្រីស្ទ សូមអញ្ជើញសិស្សម្នាក់ឲ្យអាន ម៉ាថាយ ១១:២៩–៣០ ឲ្យឮៗ ។ សុំឲ្យសិស្សក្នុងថ្នាក់ផ្ទៀងតាម ហើយរកមើលបន្ទូលណែនាំរបស់ព្រះអង្គសង្គ្រោះទៅកាន់អស់អ្នកដែលមានបំណងប្រាថ្នាចង់មករកទ្រង់ ។
-
យោងតាមខគម្ពីរទាំងនេះ តើយើងត្រូវធ្វើអ្វីខ្លះ ដើម្បីមករកព្រះគ្រីស្ទ ?
សូមគូរ រូប នឹមគោមួយនៅលើក្ដារខៀន ឬបង្ហាញរូបនឹមមួយ ។
សូមពន្យល់ថា នឹម គឺជា ធ្នឹម ឈើមួយ ដែលភ្ជាប់ ឬដាក់គោ ឬសត្វដទៃទៀតមួយនឹម ដើម្បីឲ្យវាអាចទាញបន្ទុកមួយរួមគ្នា ។
-
តើអ្វីទៅជាគោលបំណង និង អត្ថប្រយោជន៍របស់នឹម ? ( ទោះបីជា នឹមនោះគឺជាទម្ងន់ ឬបន្ទុកមួយក្ដី ប៉ុន្តែវាអនុញ្ញាតឲ្យសត្វទាំងពីរក្បាលរួមថាមពល និង កម្លាំងរបស់វាជាមួយគ្នា ដើម្បីបង្កើននូវផលិតភាពរបស់វា ) ។
-
តើអ្នកគិតថា ការទទួលយកនឹមរបស់ព្រះអង្គសង្គ្រោះដាក់មកលើយើង មានន័យដូចម្ដេច ?
សូមឲ្យសិស្សម្នាក់អានសេចក្ដីថ្លែងការណ៍ខាងក្រោមនេះដោយអែលឌើរ ដាវីឌ អេ បែដណា នៃកូរ៉ុមនៃពួកសាវកដប់ពីរនាក់ឲ្យឮៗ ។ សុំឲ្យសិស្សស្ដាប់ ហើយគិតពីរបៀបដែលយើងអាចយកនឹមរបស់ព្រះអង្គសង្គ្រោះមកដាក់លើយើង ហើយថាតើពរជ័យអ្វីខ្លះដែលយើងអាចទទួលបានតាមរយៈការធ្វើដូច្នេះ ។
« នឹមមួយទឹម សត្វឲ្យដើរទន្ទឹមគ្នា ដើម្បីវាអាចឈានទៅមុខទាំងអស់គ្នា ក្នុងការសម្រេចកិច្ចការមួយ។
« ចូរពិចារណាអំពីការអញ្ជើញដ៏ពិសេសរបស់ព្រះអម្ចាស់ដល់យើងម្នាក់ៗថា ‹ ចូរទទួលនឹមខ្ញុំចុះ › ។ ការចុះនិងការរក្សាសេចក្តីសញ្ញាពិសិដ្ឋ គឺជាការទឹមយើងជាមួយនឹងព្រះអម្ចាស់ព្រះយេស៊ូវគ្រីស្ទ ។ មានន័យថា ព្រះអង្គសង្គ្រោះ កំពុងតែអញ្ជើញយើង ឲ្យពឹងផ្អែក ហើយទាញជាមួយនឹងទ្រង់ ទោះជាសមត្ថភាពល្អបំផុតរបស់យើង មិនស្មើ ឬមិនអាចប្រៀបនឹងទ្រង់ក៏ដោយ ។ កាលណាយើងទុកចិត្ត ហើយទាញបន្ទុកយើងជាមួយទ្រង់ ក្នុងដំណើរនៃជីវិតរមែងស្លាប់នេះ នោះនឹមទ្រង់ពិតជាងាយ ហើយបន្ទុកទ្រង់ពិតជាស្រាល ។
« យើងនឹងពុំនៅម្នាក់ឯងឡើយ ។ យើងអាចឆ្ពោះទៅមុខក្នុង ជីវិតប្រចាំថ្ងៃរបស់យើង ដោយមានជំនួយពីស្ថានសួគ៌ ។ តាមរយៈដង្វាយធួនរបស់ព្រះអង្គសង្គ្រោះយើងអាចទទួលបានសមត្ថភាព និង ‹ លើសកម្លាំង[របស់យើង] › (‹ ខ្ញុំនឹងដើរតាមព្រះអង្គ › ទំនុកតម្កើង លេខ ១៣៥) » (« Bear Up Their Burdens with Ease » ឬ Liahona ខែ ឧសភា ឆ្នាំ ២០១៤ ទំព័រ ៨៨) ។
-
តើអ្វីទៅ «ទឹម » យើងជាមួយនឹងព្រះអង្គសង្គ្រោះ ព្រះយេស៊ូវគ្រីស្ទ ?
-
យោងតាមអែលឌើរ បែដណា តើពរជ័យនៃការជាប់នឹមជាមួយព្រះអង្គសង្គ្រោះមានអ្វីខ្លះ ?
សូមចង្អុលបង្ហាញថា ការសន្យារបស់ព្រះអង្គសង្គ្រោះអំពី « ការឈប់សម្រាក » នៅក្នុង ម៉ាថាយ ១១:២៨–២៩ ពុំមែនមានន័យថា ទ្រង់នឹងដកយកបញ្ហា ឬការប្រឈមរបស់យើងចេញនោះឡើយ ។ ជារឿយៗ ព្រះអង្គសង្គ្រោះនឹងប្រទានសេចក្ដីសុខសាន្តដល់យើង និង កម្លាំងដែលយើងត្រូវការដើម្បីយកឈ្នះ ឬស៊ូទ្រាំនឹងការសាកល្បងរបស់យើង ហេតុដូច្នេះហើយទើបធ្វើឲ្យបន្ទុករបស់យើងបានធូរស្រាល ។ ប្រសិនបើយើងស្មោះត្រង់នៅក្នុងការប្រឈមទាំងឡាយនៃជីវិតរមែងស្លាប់នេះ នោះការឈប់សម្រាកដែលយើងនឹងទទួលបានគឺជាភាពតម្កើងឡើងជាមួយនឹងព្រះ ( សូមមើល គ. និង ស. ៨៤:២៣–២៤ ) ។
សុំឲ្យសិស្សពិចារណាពីរបៀបដែលព្រះអង្គសង្គ្រោះបានប្រទាននូវការឈប់សម្រាកដល់ពួកគេ នៅពេលពួកគេមករកទ្រង់ ។ សូមអញ្ញើញសិស្សពីរបីនាក់ ចែកចាយនូវបទពិសោធន៍របស់ពួកគេជាមួយនឹងសិស្សក្នុងថ្នាក់ ។
សូមអញ្ជើញសិស្សឲ្យដាក់គោលដៅជាក់លាក់នានាអំពីរបៀបដែលពួកគេអាចមករកព្រះយេស៊ូវគ្រីស្ទពេញមួយឆ្នាំ ក្នុងការសិក្សាអំពីព្រះគម្ពីរសញ្ញាថ្មីនេះ ។ សូមលើកទឹកចិត្តពួកគេឲ្យដាក់បញ្ចូលការសិក្សាព្រះគម្ពីរប្រចាំថ្ងៃ និង ការអានព្រះគម្ពីរសញ្ញាថ្មីទាំងស្រុងនៅឆ្នាំនេះក្នុងគោលដៅរបស់ពួកគេ ។
សេចក្ដីសង្ខេបទិដ្ឋភាពទូទៅនៃព្រះគម្ពីរសញ្ញាថ្មី
គម្ពីរទាំងឡាយនៅក្នុងព្រះគម្ពីរសញ្ញាថ្មីធ្វើទីបន្ទាល់ថា ព្រះយេស៊ូវគ្រីស្ទគឺជាព្រះរាជបុត្រានៃព្រះ និង ជាព្រះអង្គសង្គ្រោះរបស់យើង ។
សូមសរសេរឈ្មោះអ្នកនិពន្ធនៃដំណឹងល្អទាំងបួននៅលើក្ដារខៀន ៖ ម៉ាថាយ, ម៉ាកុស, លូកា និង យ៉ូហាន ។ សូមពន្យល់ថា ក្នុងពួកសិស្សរបស់ព្រះយេស៊ូវគ្រីស្ទទាំងនេះ ពួកគាត់ម្នាក់ៗបានកត់ត្រាព្រឹត្តិការណ៍ និង ការបង្រៀនទាំងឡាយចេញពីជីវប្រវត្តិរបស់ព្រះអង្គសង្គ្រោះ ។ កំណត់ត្រារបស់ពួកគាត់ត្រូវបានហៅថា ដំណឹងល្អ ។ ពាក្យ ដំណឹងល្អ មានន័យថា « សេចក្ដីល្អដែលត្រូវដឹង » ។ សូមចង្អុលបង្ហាញថា ការបកប្រែរបស់យ៉ូសែប ស្ម៊ីធបានប្ដូរចំណងជើងនៃដំណឹងល្អនីមួយទៅជា ទីបន្ទាល់ ដូចជានៅក្នុង « The Testimony of St. Matthew « ទីបន្ទាល់របស់ម៉ាថាយ » ។
-
ហេតុអ្វីបានជាវាជាការល្អ ដើម្បីមានដំណឹងល្អ ឬទីបន្ទាល់អំពីជីវប្រវត្តិ និង ការបង្រៀននៃព្រះយេស៊ូវគ្រីស្ទច្រើនជាងមួយ ?
សូមពន្យល់ថា ទោះបីជាដំណឹងល្អទាំងបួនមានភាពខុសគ្នាខ្លះៗនៅក្នុងសេចក្ដីលម្អិត និងទស្សនៈក្ដី ក៏វានិទានព្រឹត្តិការណ៍នៃជីវប្រវត្តិ និង ការបម្រើនៅលើផែនដីរបស់ព្រះអង្គសង្គ្រោះនៅក្នុងចំណោមសាសន៍យូដាដូចគ្នា ។ ដំណឹងល្អទាំងបួនថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះរាជបុត្រានៃព្រះ និងជាព្រះអង្គសង្គ្រោះនៃពិភពលោក ។ សុំឲ្យសិស្សបើកទៅតារាង « ជីវប្រវត្តិដ៏សំខាន់របស់ព្រះយេស៊ូវគ្រីស្ទនៅក្នុងជីវិតរមែងស្លាប់ » នៅចុងបញ្ចប់នៃវគ្គទី ១ ៖ មេរៀនថ្ងៃទី ៤ ។ សូមអញ្ជើញសិស្សឲ្យប្រើតារាងនេះដើម្បីដឹងពីព្រឹត្តិការណ៍សំខាន់ៗមួយចំនួននៃការបម្រើក្នុងជីវិតរមែងស្លាប់របស់ព្រះអង្គសង្គ្រោះ ។
-
យោងតាមតារាងនេះ តើការបម្រើក្នុងជីវិតរមែងស្លាប់របស់ព្រះអង្គសង្គ្រោះមានរយៈពេលយូរប៉ុណ្ណា ?
-
តើនៅក្នុងការបម្រើរបស់ទ្រង់ តើព្រះអង្គសង្គ្រោះគង់នៅកន្លែងណាច្រើនជាងគេ ?
សូមអញ្ជើញសិស្សឲ្យប្រើតារាងនេះដើម្បីមានការយល់ដឹងកាន់តែប្រសើរទៅលើបរិបទនៃដំណឹងល្អទាំងបួន នៅពេលពួកគេសិក្សាព្រះគម្ពីរសញ្ញាថ្មី ។
សូមអញ្ជើញសិស្សឲ្យបើកទៅតារាងមាតិកានៃព្រះគម្ពីរប៊ីប ។ សូមពន្យល់ថា កាលដំណឹងល្អទាំងឡាយនិទាននូវដំណើររឿងមួយអំពីការបម្រើរបស់ព្រះអង្គសង្គ្រោះ នោះគម្ពីរចាប់ពីគម្ពីរកិច្ចការរហូតដល់វិវរណៈ កត់ត្រាពីការបម្រើនៃពួកសាវករបស់ព្រះគ្រីស្ទកាលពីបុរាណ បន្ទាប់ពីការឆ្កាង ការមានព្រះជន្មរស់ឡើងវិញ និង ការយាងឡើងទៅស្ថានសួគ៌វិញរបស់ទ្រង់ ។ ពួកសាវកទាំងនេះបានធ្វើដំណើរទូទាំងដែនដីអ៊ីស្រាអែល និង ចក្រភពរ៉ូម ដើម្បីផ្សព្វផ្សាយដំណឹងល្អ និង ស្ថាបនាសាខាទាំងឡាយរបស់សាសនាចក្រ ។ ដោយសិក្សាពីសកម្មភាព និង ការសរសេររបស់ពួកសាវកទាំងនេះ យើងអាចពង្រឹងសេចក្ដីជំនឿរបស់យើងលើព្រះអង្គសង្គ្រោះ ហើយរៀនពីរបៀបដើម្បីទទួលបានពរជ័យនានានៃដង្វាយធួនរបស់ទ្រង់ ។ យើងក៏អាចឃើញពីភាពដូចគ្នានៃសាសនាចក្រនៃពួកបរិសុទ្ធថ្ងៃចុងក្រោយ និងសាសនាចក្ររបស់ព្រះយេស៊ូវគ្រីស្ទកាលពីបុរាណ ។
សូមពិចារណាចែកចាយទីបន្ទាល់របស់អ្នកអំពីព្រះគម្ពីរសញ្ញាចាស់ ហើយអញ្ជើញសិស្សឲ្យរកមើលសេចក្ដីពិតនានាដែលនឹងផ្ដល់ពរជ័យឲ្យពួកគេ នៅពេលពួកគេសិក្សាពីជីវប្រវត្តិ និង ការបង្រៀនរបស់ព្រះយេស៊ូវគ្រីស្ទ និង ពួកសាវករបស់ទ្រង់នៅក្នុងព្រះគម្ពីរសញ្ញាថ្មី ។
វគ្គបន្ទាប់ ( ម៉ាថាយ ១–៥ )
សូមពន្យល់ថា នៅក្នុងវគ្គបន្ទាប់ សិស្សនឹងសិក្សាពីសេចក្ដីលម្អិតមួយចំនួនជុំវិញការប្រសូតរបស់ព្រះរាជបុត្រានៃព្រះ ។ ពួកគេក៏នឹងសិក្សាផងដែរនូវការបង្រៀនរបស់ព្រះយេស៊ូវគ្រីស្ទ អំពីរបៀបដើម្បីមានសុភមង្គលពិតនៅក្នុងជីវិតនេះ ហើយប្រែជាល្អឥតខ្ចោះដូចជាព្រះវរបិតាសួគ៌ដែរ ។