មេរៀនទី ១៥៦
វិវរណៈ ១២-១៣
សេចក្ដីផ្ដើម
យ៉ូហានបានឃើញការនិមិត្តមួយអំពីនាគមួយកំពុងគម្រាមកំហែងដល់ស្ត្រីម្នាក់ និងកូនរបស់នាង ដែលតំណាងឲ្យបំណងរបស់សាតាំងដើម្បីបំផ្លាញសាសនាចក្ររបស់ព្រះអម្ចាស់ និងសមាជិកដ៏ស្មោះត្រង់ ។ យ៉ូហានបានសរសេរអំពីសង្គ្រាមនៅស្ថានសួគ៌ និងអំពីនគរទាំងឡាយរបស់លោកិយដែលប្រយុទ្ធទាស់នឹងពួកអ្នកដើរតាមព្រះ ។
យោបល់សម្រាប់ការបង្រៀន
វិវរណៈ ១២
យ៉ូហានបានបង្ហាញឲ្យឃើញថា សាតាំង និងបរិវាររបស់វាតែងប្រឆាំងទាស់នឹងព្រះអម្ចាស់ និង សាសនាចក្ររបស់ទ្រង់ជានិច្ច ។
មុនចាប់ផ្ដើមថ្នាក់ សូមចម្លងសកម្មភាពផ្គូរផ្គងខាងក្រោមនេះដាក់នៅលើ ក្ដារខៀន ៖ ក្រោយពីថ្នាក់ចាប់ផ្ដើម សូមអញ្ជើញសិស្សពីរបីនាក់ឲ្យគូសបន្ទាត់ភ្ជាប់ការគម្រាមកំហែងនីមួយៗនៅជួរឈរខាងឆ្វេង ទៅនឹងរបៀបដើម្បីតស៊ូនឹងវាដែលមាននៅជួរឈរខាងស្ដាំ ។
ការគម្រាម |
របៀបដើម្បីតស៊ូនឹងការគម្រាម |
---|---|
រលាកនឹងកម្ដៅថ្ងៃ |
សេចក្ដីពិតនៅក្នុង វិវរណៈ ១២ |
ពួកទ័ពសត្រូវ |
ថ្នាំពេទ្យ ឬការសម្រាក |
ជំងឺ |
ឡេការពារ ឬសម្លៀកបំពាក់ការពារកម្ដៅថ្ងៃ |
អំពើបាប និងកំហុស |
ការប្រែចិត្ត និងការទុកចិត្តលើព្រះយេស៊ូវគ្រីស្ទ |
ឥទ្ធិពលរបស់សាតាំង |
គ្រឿងសព្វាវុធសង្គ្រាម |
-
តើក្នុងចំណោមការគម្រាមកំហែងទាំងនេះ ការគម្រាមណាមួយ ដែលអ្នកបានតតាំងជាមួយនៅពេលថ្មីៗនេះ ? តើអ្នកគិតថា ការគម្រាមមួយណាគ្រោះថ្នាក់បំផុត ? ហេតុអ្វី ?
នៅពេលសិស្សសិក្សាវិវរណៈ ១២សូមអញ្ជើញពួកគេឲ្យរកមើលសេចក្ដីពិតដែលអាចជួយពួកគេឲ្យតតាំងនឹងឥទ្ធិពលរបស់សាតាំង ។ សូមពន្យល់ថា វិវរណៈ ១២–១៤ កត់ត្រានូវចន្លោះពេល ឬការផ្អាកនៅក្នុងការនិមិត្តរបស់យ៉ូហានអំពីព្រឹត្តិការណ៍នៃត្រាទីប្រាំពីរ ។ ព្រះអម្ចាស់ប្រហែលជាជួយយ៉ូហានឲ្យយល់ពីអត្ថន័យនៃឃ្លា « នគរទាំងប៉ុន្មាននៅលោកីយ៍ » និង « នគររបស់ព្រះអម្ចាស់ »នៅក្នុង វិវរណៈ ១១:១៥ ។
សូមបង្ហាញសិស្ស រូបភាព របស់ស្ត្រីម្នាក់ដែលមាននាគនៅពីក្រោយខ្នងនាង ។ សូមអញ្ជើញសិស្សឲ្យពិចារណាថា និមិត្តរូបទាំងនេះតំណាងឲ្យអ្វីខ្លះ ។
សូមអញ្ជើញសិស្សម្នាក់អាន វិវរណៈ ១២:១-២, ៥ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថាមានរឿងអ្វីបានកើតឡើងដល់ស្ត្រីនោះ ។ សូមពន្យល់ថា ការបកប្រែដោយ យ៉ូសែប ដាក់ ខទី ៥ ដោយផ្ទាល់បន្ទាប់ពី ខទី ២ ។
-
តើមានរឿងអ្វីកើតឡើងចំពោះ ស្ត្រីនោះ ? ( នាងសំរាលបានកូនប្រុស « ដែលត្រូវឃ្វាលគ្រប់អស់ទាំងសាសន៍ » [ ខទី ៥ ] ) ។
-
តើអ្នកគិតថាវាន័យដូចម្ដេច កាលដែលទ្រង់ « ត្រូវឃ្វាលគ្រប់អស់ទាំងសាសន៍ដោយដំបងដែក » ? ( ខទី ៥ ) ។ ( កូននោះនឹងប្រើដំបងដែក ដែលអាចតំណាងឲ្យដំណឹងល្អ បព្វជិតភាព និងព្រះបន្ទូល ព្រមទាំងព្រះចេស្ដានៃព្រះ ដើម្បីគ្រប់គ្រងប្រជាជាតិនៅក្នុងពិភពលោកនេះដោយសុចរិត [ សូមមើល Bruce R. McConkie Doctrinal New Testament Commentary វ៉ុលទី ៣ ( ឆ្នាំ១៩៦៥–៧៣ ) ៣:៥១៧ ] ) ។
សូមអញ្ជើញសិស្សម្នាក់អាន វិវរណៈ ១២:៣-៤ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលនិមិត្តរូបដែលបានរៀបរាប់នៅក្នុងខគម្ពីរទាំងនេះ ។
-
តើអ្នកគិតថា និមិត្តរូបដែលបានរៀបរាប់នៅក្នុង ខទី ១–៥អាចតំណាងឲ្យអ្វី ?
សូមអញ្ជើញសិស្សឲ្យអានការបកប្រែដោយ យ៉ូសែប ស្ម៊ីធ វិវរណៈ ១២:៧-៨ ( នៅក្នុងសេចក្ដីណែនាំដល់បទគម្ពីរទាំងឡាយ ) ដោយស្ងាត់ស្ងៀម ។ សូមឲ្យពួកគេរកមើលថា នាគ ស្ត្រី និងកូននោះតំណាងឲ្យអ្វី ។
-
យោងតាម ការបកប្រែដោយ យ៉ូសែប ស្ម៊ីធ វិវរណៈ ១២:៧–៨ តើនាគ ស្ត្រី និងកូននៅក្នុងការនិមិត្តរបស់យ៉ូហានតំណាងឲ្យអ្វី ? ( នាគតំណាងឲ្យសាតាំង [ សូមមើល ខទី ៨ ] ស្ត្រីតំណាងឲ្យ « សាសនាចក្រនៃព្រះ » ហើយកូនតំណាងឲ្យ « នគរនៃព្រះ និងព្រះគ្រីស្ទរបស់យើង » [ ខទី ៧ ]ដែលជានគរមួយ ដែលព្រះអម្ចាស់នឹងស្ថាបនាឡើងនៅសហសវត្សរ៍ ដែលទ្រង់នឹងដឹកនាំគ្រប់ជាតិសាសន៍ទាំងអស់ ។ [ សូមមើល New Testament Student Manual ( Church Educational System manual ឆ្នាំ ២០១៤ ) ទំព័រ ៥៥០–៥២ សម្រាប់ការពន្យល់បន្ថែមពីនិមិត្តរូបនៅក្នុងវគ្គទាំងនេះ ] ) ។
-
យោងតាម វិវរណៈ ១២:៤តើនាគនោះមានបំណងចង់ធ្វើអ្វី ? ហេតុអ្វីអ្នកគិតថា សាតាំងខិតខំយ៉ាងខ្លាំងដើម្បីបំផ្លាញនគរព្រះ និងព្រះគ្រីស្ទ ?
សូមអញ្ជើញសិស្សម្នាក់អាន វិវរណៈ ១២:៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា ស្ត្រីនោះបានធ្វើអ្វីខ្លះ ដោយសារតែនាគដ៏គម្រាមកំហែងនោះ ។
-
តើមានរឿងអ្វីកើតឡើងចំពោះ ស្ត្រីនោះ ? តើការណ៍នេះអាចតំណាងឲ្យអ្វី ? ( ស្ត្រីបានរត់គេចខ្លួនចូលទៅក្នុងទីរហោស្ថានតំណាងឲ្យសាសនាចក្រ ដែលចូលទៅក្នុងការក្បត់សាសនាដ៏ធំ និងបព្វជិតភាពត្រូវបានដកចេញពីផែនដីនេះ បន្ទាប់ពីការស្លាប់របស់ពួកសាវកទាំងឡាយ [ សូមមើលផងដែរ គ. និង ស. ៨៦:៣ ] ) ។
សូមពន្យល់ថា បន្ទាប់ពីយ៉ូហានបានឃើញនាគនោះគម្រាមកំហែងដល់ស្ត្រី និងកូននាង លោកបានឃើញសង្គ្រាមនៅស្ថានសួគ៌រវាងសាតាំង និងពួកបរិសុទ្ធនៃព្រះ ។ សូមអញ្ជើញសិស្សផ្សេងទៀតឲ្យប្ដូរវេនគ្នាអានឮៗនៅក្នុងការបកប្រែដោយយ៉ូសែប ស្ម៊ីធ វិវរណៈ ១២:៦-១១( នៅក្នុងសេចក្ដីណែនាំដល់បទគម្ពីរទាំងឡាយ ) ។ ចូរសុំឲ្យសិស្សពាក់កណ្ដាលថ្នាក់រកមើលរឿង ដែលបានកើតឡើងដល់សាតាំង នៅក្នុងសង្គ្រាមនៅស្ថានសួគ៌ ហើយពាក់កណ្ដាលទៀតរកមើលថាពួកបរិសុទ្ធនៃព្រះបានយកឈ្នះលើសាតាំង និងពួកបរិវាររបស់វាបានយ៉ាងដូចម្ដេច ។
-
តើមានរឿងអ្វីបានកើតឡើងដល់សាតាំង និងពួកបរិវាររបស់វា ? ( អ្នកអាចចង្អុលបង្ហាញថា វិវរណៈ ១២:៤ ចែងថា កន្ទុយនាគនោះ « ទាញផ្កាយនៅលើមេឃមួយភាគក្នុងបីគ្រវាត់ចោលទៅផែនដី » ។ នេះគឺជានិមិត្តរូបនៃចំនួនដ៏ច្រើននៃកូនវិញ្ញាណរបស់ព្រះវរបិតាសួគ៌ ដែលជ្រើសដើរតាមសាតាំង ។ អ្នកក៏គួរពន្យល់ផងដែរថា « មីកែល និងពួកទេវតារបស់លោក » [ ការបកប្រែដោយយ៉ូសែប ស្ម៊ីធ វិវរណៈ ១២:៦ ] គឺលោកអ័ដាម និងកូនចៅវិញ្ញាណសុចរិតផ្សេងទៀតរបស់ព្រះ ) ។
-
យោងតាម ខទី ១១ តើពួកពលបរិវារស្ថានសួគ៌ដ៏សុចរិតបានយកឈ្នះសាតាំងយ៉ាងដូចម្ដេច ? ( « ដោយសារឈាមនៃកូនចៀម » ឬ តាមរយៈដង្វាយធួនរបស់ព្រះអង្គសង្គ្រោះ ហើយដោយបន្តស្មោះត្រង់ចំពោះទីបន្ទាល់របស់ពួកគេអំពីដំណឹងល្អ ។ សូមសរសេរចម្លើយទាំងនេះនៅលើក្ដារខៀន ) ។
-
យោងតាម ខទី ៨ តើសាតាំង និងពួកបរិវាររបស់វាត្រូវបានបញ្ជូនទៅទីណាបន្ទាប់ពីការបះបោររបស់ពួកគេមក ?
សូមអញ្ជើញសិស្សម្នាក់អានការបកប្រែដោយយ៉ូសែប ស្ម៊ីធ វិវរណៈ ១២:១២, ១៧ ( នៅក្នុងសេចក្ដីណែនាំដល់បទគម្ពីរទាំងឡាយ ) ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា សាតាំងធ្វើសង្គ្រាមទាស់នឹងនរណាបន្ទាប់ពីវាត្រូវបានបណ្ដេញចេញពីស្ថានសួគ៌ ។
-
តើសាតាំងបានធ្វើសង្គ្រាមទាស់នឹងនរណា បន្ទាប់ពីវាត្រូវបានបណ្ដេញចេញពីស្ថានសួគ៌ ?
-
ដោយផ្អែកលើអ្វី ដែលយើងបានរៀននៅក្នុង ខទី ១១ តើយើងអាច ធ្វើអ្វីខ្លះ ដើម្បីយកឈ្នះលើឥទ្ធិពល និងការវាយប្រហាររបស់សាតាំងនៅជំនាន់របស់យើង ? ( សូមជួយសិស្សឲ្យស្គាល់គោលការណ៍មួយ ដែលស្រដៀងគ្នានឹងគោលការណ៍ដូចតទៅ ៖ យើងអាចយកឈ្នះលើឥទ្ធិពលរបស់សាតាំងតាមរយៈដង្វាយធួនរបស់ព្រះអង្គសង្គ្រោះ និងដោយបន្តស្មោះត្រង់ចំពោះទីបន្ទាល់របស់យើងអំពីដំណឹងល្អ ។ សូមសរសេរគោលការណ៍នេះនៅលើក្ដារខៀន ) ។
សូមអញ្ជើញឲ្យសិស្សម្នាក់អានឮៗពីសេចក្ដីថ្លែងការណ៍ខាងក្រោមនេះដោយអែលឌើរ ជេម ជេ ហាមូឡា នៃពួកចិតសិបនាក់ ។ ចូរសុំឲ្យសិស្សក្នុងថ្នាក់ស្ដាប់រកថា សាតាំងកំពុងវាយប្រហារមកលើជំនាន់របស់យើងយ៉ាងដូចម្ដេច ។
« បុត្រាបុត្រីដ៏ក្លាហាន ហើយស្វាហាប់មួយចំនួនរបស់ព្រះវរបិតា ត្រូវបានរក្សាទុកសម្រាប់ថ្ងៃចុងក្រោយនេះ ហើយធ្វើការសម្រាប់ព្រះវរបិតារបស់យើង និងព្រះរាជបុត្រារបស់ទ្រង់ ។ ភាពក្លាហាន និងភាពស្វាហាប់របស់ពួកគេបានបង្ហាញនៅក្នុងចម្បាំងជាមួយនឹងសាតាំង កាលពីជីវិតមុនផែនដីនេះ ។ …
« ដោយមាននគរព្រះបានស្ដារឡើងវិញនៅលើផែនដីនេះ និងការចាប់កំណើតរបស់បងប្អូនមកលើផែនដីនេះ សាតាំងដឹងថា ‹ ពេលវេលាវាខ្លីណាស់ហើយ › [ វិវរណៈ ១២:១២ ] ។ ដូច្នេះហើយ សាតាំងកំពុងត្រៀមរាល់ធនធាន ដែលវាមានដើម្បីអូសទាញបងប្អូនឲ្យធ្លាក់ចូលក្នុងអំពើរំលង ។ វាដឹងថា ប្រសិនបើវាអាចនាំបងប្អូនចូលទៅក្នុងអំពើរំលងបាន វាអាចរារាំងបងប្អូនពីការបម្រើបេសកកម្មពេញម៉ោង ការរៀបការនៅក្នុងព្រះវិហារបរិសុទ្ធ និងការការពារកូនចៅរបស់បងប្អូននាពេលអនាគតនៅក្នុងសេចក្ដីជំនឿ ហើយអ្វីៗទាំងនេះនឹងធ្វើឲ្យបងប្អូន និងសាសនាចក្រចុះអន់ថយ ។ វាដឹងថា គ្មានអ្វីអាចផ្ដួលរំលំនគរព្រះបានឡើយ ‹ លើកលែងតែអំពើរំលងនៃរាស្ត្រ [ របស់ទ្រង់ ] ប៉ុណ្ណោះ › [ ម៉ូសាយ ២៧:១៣ ] ។ និយាយមិនខុសមែន—ឥឡូវនេះការផ្ដោតនៃសង្គ្រាមរបស់វាគឺទៅលើបងប្អូន » ( « Winning the War against Evil » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ៥០, ៥១ ) ។
-
តើសាតាំង និងពួកបរិវារវាខិតខំធ្វើឲ្យយើងចុះខ្សោយតាមរបៀបណា ?
សូមអញ្ជើញសិស្សឲ្យពិចារណាពីរបៀប ដែលសាតាំងកំពុងធ្វើសង្គ្រាមទាស់នឹងពួកគេដោយផ្ទាល់ ។
-
តើមានរឿងណាខ្លះដែលយើងអាចធ្វើ ដើម្បីបង្កើនសេចក្ដីជំនឿរបស់យើងលើព្រះយេស៊ូវគ្រីស្ទ ហើយពង្រឹងទីបន្ទាល់របស់យើងអំពីទ្រង់ ? ( សូមសរសេរចម្លើយរបស់សិស្សនៅលើក្ដារខៀន ) ។
សូមអានប្រយោគពីរខាងក្រោមនេះឲ្យឮៗ ហើយអញ្ជើញសិស្សឲ្យឆ្លើយសំណួរមួយ ក្នុងសៀវភៅកំណត់ចំណាំក្នុងថ្នាក់ ឬកំណត់ហេតុការសិក្សាព្រះគម្ពីររបស់ពួកគេ ៖
-
សូមសរសេរអំពីបទពិសោធន៍មួយ កាលដែលទីបន្ទាល់របស់អ្នក និងសេចក្ដីជំនឿរបស់អ្នកលើដង្វាយធួនរបស់ព្រះអង្គសង្គ្រោះ បានជួយអ្នកឲ្យតស៊ូនឹងឥទ្ធិពលរបស់សាតាំង ។
-
សូមកត់ត្រាទីបន្ទាល់របស់អ្នកអំពីដង្វាយធួនរបស់ព្រះយេស៊ូវគ្រីស្ទ ហើយពន្យល់ថា ដង្វាយធួនអាចជួយយើងនៅក្នុងសង្គ្រាមរបស់យើងប្រឆាំងសាតាំង និងបរិវាររបស់វាបានយ៉ាងដូចម្ដេច ។
ក្រោយពីមានពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យចែកចាយអំពីអ្វីដែលពួកគេបានសរសេរ ។
សូមលើកទឹកចិត្តសិស្សឲ្យជ្រើសយកគំនិតមួយ ឬច្រើនដែលមានសរសេរនៅលើក្ដារខៀន ហើយអនុវត្តវានៅក្នុងចម្បាំងរបស់ពួកគេទាស់នឹងសាតាំង និងបរិវារវា ។
វិវរណៈ ១៣
យ៉ូហានសរសេរអំពីនគរទាំងឡាយនៅលើផែនដីថានឹងទទួលអំណាចមកពីសាតាំង
សូមសង្ខេប វិវរណៈ ១៣ ដោយអញ្ជើញសិស្សម្នាក់អានសេចក្ដីសង្ខេបសម្រាប់ជំពូកនោះឮៗ ។ ( ប្រសិនបើអ្នកចង់ធ្វើ អ្នកអាចពន្យល់ថា យ៉ូហានបានឃើញការនិមិត្តមួយអំពីសត្វសាហាវ ដែលតំណាងឲ្យនគរទុច្ចរិតនៅលើផែនដីដែលសាតាំងគ្រប់គ្រង ។ យ៉ូហានក៏បានឃើញថា តាមរយៈនគរទាំងនេះ សាតាំងនឹងធ្វើកិច្ចការដ៏អស្ចារ្យ និងអព្ភូតហេតុក្លែងក្លាយដើម្បីបោកបញ្ឆោតកូនចៅមនុស្សទាំងអស់លើផែនដី ។
ការរំឭកពីចំណេះចំណានខគម្ពីរ
អំឡុងសប្ដាហ៍ចុងក្រោយនៃថ្នាក់សិក្ខាសាលា ចូរពិចារណាធ្វើការផ្ដល់ការប្រឡងចំណេះចំណានខគម្ពីរចុងក្រោយដល់សិស្ស ។ អ្នកអាចលើកទឹកចិត្តសិស្សឲ្យសិក្សានៅផ្ទះ ឬ សិក្សាភ្លាមៗពីមុនការប្រឡង ។ ខាងក្រោមនេះ គឺជាការប្រឡងពីរបីប្រភេទដែលអ្នកអាចប្រើ ( អ្នកអាចសម្របគំនិតទាំងនេះដើម្បីបំពេញតាមសេចក្ដីត្រូវការរបស់សិស្ស ) ៖
ការប្រឡងអំពីសេចក្ដីយោង ៖ផ្ដល់តម្រុយដល់សិស្សចេញមកពីវគ្គបទគម្ពីរចំណេះចំណានបទគម្ពីរ ។ តម្រុយទាំងនេះអាចជាពាក្យ គោលលទ្ធិ ឬគោលការណ៍គន្លឹះ ឬសេចក្ដីសង្ខេបនៃអត្ថន័យរបស់វគ្គបទគម្ពីរ ។ សូមអញ្ជើញសិស្សឲ្យសរសេរសេចក្ដីយោងទៅវគ្គបទគម្ពីរនៅលើក្រដាសមួយសន្លឹក បន្ទាប់ពីអ្នកផ្ដល់នូវតម្រុយនីមួយៗហើយ ។
ការប្រឡងគោលលទ្ធិ ៖ សរសេរគោលលទ្ធិគ្រឹះនៅលើក្ដារខៀន ។ ចូរសុំឲ្យសិស្សសរសេរសេចក្ដីយោងចំណេះចំណានខគម្ពីរឆ្លើយឆ្លងគ្នានៅក្រោមគោលលទ្ធិនីមួយៗ ។ ពួកគេអាចធ្វើកិច្ចការនេះ ដោយរំឭកពីវគ្គចំណេះចំណានខគម្ពីរចេញពីការចងចាំ ឬដោយប្រើបញ្ជីមួយនៃចំណេះចំណានខគម្ពីរ ។
ការប្រឡងទន្ទេញចាំ ៖ សូមអញ្ជើញសិស្សឲ្យប្រើពាក្យ ដែលបានទន្ទេញចាំ និងគោលការណ៍ទាំងឡាយចេញមកពីវគ្គចំណេះចំណានខគម្ពីរ ដើម្បីពន្យល់អំពី គោលលទ្ធិគ្រឹះមួយចំនួន ។ សូមអញ្ជើញពួកគេឲ្យសរសេរនូវការពន្យល់របស់ពួកគេ ហើយអានវាឲ្យឮៗដល់សិស្សក្នុងថ្នាក់ ។
សូមចាំថា អ្នកត្រូវសរសើរដល់សិស្សក្នុងថ្នាក់របស់អ្នកចំពោះកិច្ចខិតខំរបស់ពួកគេ ក្នុងការទន្ទេញចាំវគ្គបទគម្ពីរគន្លឹះ និងគោលលទ្ធិគ្រឹះទាំងនេះ ។ ចូរថ្លែងទីបន្ទាល់អំពីព្រះចេស្ដាខាងវិញ្ញាណ និងទីបន្ទាល់ដែលយើងអាចទទួលបាន នៅពេលយើងទន្ទេញចាំវគ្គចំណេះចំណានខគម្ពីរ និងគោលលទ្ធិនានា ។