មេរៀនទី ៨៥
កិច្ចការ ៤-៥
សេចក្ដីផ្ដើម
បន្ទាប់ពីការព្យាបាលបុរសខ្វិននៅព្រះវិហារបរិសុទ្ធ ( សូមមើលកិច្ចការ ៣) នោះពេត្រុស និងយ៉ូហាន ត្រូវបានគេចាប់ខ្លួន ។ ពួកសានហេឌ្រីន បានបញ្ជាឲ្យពួកគេឈប់បង្រៀននៅក្នុងព្រះនាមនៃព្រះយេស៊ូវ ។ ទោះជាយ៉ាងណាក៏ដោយ ក៏ពួកសាវកបានបន្ដផ្សាយដំណឹងល្អ ហើយព្យាបាលនៅក្នុងព្រះនាមរបស់ព្រះយេស៊ូវដែរ ។ ពួកគេត្រូវបានចាប់ខ្លួនម្ដងទៀត ហើយបានត្រូវវាយចំពោះការបដិសេធ ដើម្បីអនុវត្តតាមបញ្ជារបស់ពួកអ្នកដឹកនាំសាសន៍យូដា ។ សមាជិកសាសនាចក្របានរស់នៅតាមក្រឹត្យវិន័យនៃការថ្វាយ ប៉ុន្តែមានពីរនាក់ក្នុងចំណោមពួកគេបានស្លាប់ដោយសារតែកុហកពេត្រុស និងព្រះ ។
យោបល់សម្រាប់ការបង្រៀន
កិច្ចការ ៤:១-៣១
សមាជិកនៃពួកសានហេឌ្រីនបានបញ្ជាឲ្យពេត្រុស និងយ៉ូហានបញ្ឈប់បង្រៀននៅក្នុងព្រះនាមនៃព្រះយេស៊ូវ ។
ចូរសូមឲ្យសិស្សពិចារណាអំពីអ្វី ដែលពួកគេនឹងធ្វើនៅក្នុងស្ថានភាពដូចខាងក្រោម ៖
-
មិត្តភក្ដិម្នាក់បានបង្ហោះអ្វីមួយ ដែលមិនពិតអំពីសាសនាចក្រនៅលើប្រព័ន្ធផ្សព្វផ្សាយសង្គម ។
-
គ្រូបង្វឹកដាក់កាលវិភាគប្រកួត ដែលតម្រូវឲ្យក្រុមរបស់អ្នកលេងនៅថ្ងៃអាទិត្យ ។
-
មិត្តរបស់អ្នកបានសួរយោបល់អ្នកអំពីបញ្ហាខាងសង្គមមួយ ដែលរឿងនោះមានប្រជាប្រិយភាព និងមានការគាំទ្រជាទូទៅ ប៉ុន្តែវាផ្ទុយទៅនឹងការបង្រៀនរបស់សាសនាចក្រ ។
ក្រោយពីមានពេលគ្រប់គ្រាន់ហើយ សូមសួរ ៖
-
តើស្ថានភាពមួយចំនួនណាផ្សេងទៀត ដែលយើងអាចនឹងចាំបាច់ត្រូវចែកចាយ ឬការពារជំនឿរបស់យើង ?
-
តើវាជាឧបសគ្គឬទេ ក្នុងការចែកចាយ ឬការការពារសេចក្ដីជំនឿរបស់យើងនោះ ?
សូមអញ្ជើញសិស្សឲ្យរកមើលសេចក្ដីពិត នៅពេលពួកគេសិក្សាកិច្ចការ ៤-៥ដែលអាចនឹងដឹកនាំពួកគេនៅក្នុងស្ថានភាពប្រភេទនេះ ។
សូមអញ្ជើញសិស្សឲ្យសង្ខេបអំពីអ្វី ដែលពួកគេចងចាំអំពីព្រឹត្តការណ៍ និងការបង្រៀននានា ដែលបានកត់ត្រានៅក្នុងកិច្ចការ ៣។ បើចាំបាច់ សូមរំឭកពួកគេថា បន្ទាប់ពីការព្យាបាលបុរសខ្វិនម្នាក់ ពេត្រុស និងយ៉ូហាន បានបង្រៀនក្រុមមនុស្សមួយក្រុម ដែលបានមករុំព័ទ្ធជុំវិញពួកគេនៅឯព្រះវិហារបរិសុទ្ធ ។
សូមអញ្ជើញឲ្យសិស្សម្នាក់អាន កិច្ចការ ៤:១-៤ ឮៗ ។ ចូរសុំឲ្យសិស្សផ្ទៀងតាម ហើយរកមើលថាមានអ្វីបានកើតឡើងចំពោះពេត្រុស និងយ៉ូហាន នៅពេលពួកគាត់បានបង្រៀនមនុស្សនៅព្រះវិហារបរិសុទ្ធ ។
-
តើមានអ្វីបានកើតឡើងចំពោះពេត្រុស និងយ៉ូហាន ?
សូមសង្ខេបកិច្ចការ៤:៥-៦ដោយពន្យល់ថា ពេត្រុស និងយ៉ូហាន ត្រូវបានគេចាប់ខ្លួន ហើយនាំទៅចំពោះមុខក្រុមប្រឹក្សាគ្រប់គ្រងរបស់ពួកសាសន៍យូដា ដែលហៅថាពួកសានហេឌ្រីន ( សូមមើល Bible Dictionary« Sanhedrin ») ។ សូមរំឭកសិស្សថា សមាជិកជាច្រើនរបស់ពួកសានហេឌ្រីន បានចូលរួមក្នុងការចាប់ខ្លួន និងឆ្កាងព្រះអង្គសង្គ្រោះ ។
សូមអញ្ជើញឲ្យសិស្សម្នាក់អាន កិច្ចការ ៤:៧ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលសំណួរដែលអ្នកដឹកនាំយូដាបានសួរដល់ពេត្រុស និងយ៉ូហាន ។
-
តើពួកអ្នកដឹកនាំយូដាបានសួរអ្វីខ្លះដល់ពេត្រុស និងយ៉ូហាន ?
-
តើមានអ្វីអាចកើតឡើងចំពោះពេត្រុស និងយ៉ូហាន ប្រសិនបើពួកគាត់បានបង្ហាញប្រាប់ថា ពួកគេជាអ្នកដើរតាមព្រះយេស៊ូវគ្រីស្ទ ?
សូមឲ្យសិស្សបីបួននាក់ប្ដូរវេនគ្នាអានឮៗពី កិច្ចការ ៤:៨-២១ ។ សូមអញ្ជើញសិស្សឲ្យរកមើលនូវអ្វី ដែលពេត្រុសបានប្រកាសដល់ពួកក្រុមប្រឹក្សា ។
-
យោងតាមកិច្ចការ ៤:១០-១២តើសេចក្ដីពិតណាខ្លះដែលពេត្រុសបានបង្រៀនដល់ក្រុមប្រឹក្សា ? ( សិស្សគប្បីប្រាប់អំពីសេចក្ដីពិតជាច្រើន ប៉ុន្តែចូរប្រាកដថា បានគូសបញ្ជាក់ព្រះនាមនៃព្រះយេស៊ូវគ្រីស្ទ គឺជាព្រះនាមតែមួយគត់ ដែលយើងអាចទទួលបានសេចក្ដីសង្គ្រោះ )។
-
យោងតាមខទី ១៣ហេតុអ្វីក្រុមប្រឹក្សាមានចិត្តអស្ចារ្យចំពោះពេត្រុស និងយ៉ូហាន ?
សូមអញ្ជើញសិស្សឲ្យរំឭកកិច្ចការ ៤:៨ដោយស្ងាត់ស្ងៀម ហើយរកមើលនូវអ្វីដែលមានឥទ្ធិពលដល់ពេត្រុស ហើយបានជួយគាត់ឲ្យនិយាយដោយអង់អាចទៅកាន់ក្រុមប្រឹក្សា ។
-
តើអ្នកគិតថា ការណ៍ដែលត្រូវបានពេញដោយព្រះវិញ្ញាណបរិសុទ្ធ បានជះឥទ្ធិពលដល់សមត្ថភាពរបស់ពេត្រុស ដើម្បីបង្រៀនដោយក្លាហានយ៉ាងដូចម្ដេច ?
-
តើគោលការណ៍ណាខ្លះ ដែលយើងអាចរៀនមកពីគំរូរបស់ពេត្រុស ដូចបានកត់ត្រានៅក្នុងខទី ៨ និង ១៣ ? ( សិស្សអាចនឹងប្រើពាក្យផ្ទាល់ខ្លួនផ្សេងៗគ្នា ប៉ុន្តែសូមប្រាកដថា ពួកគេប្រាប់នូវគោលការណ៍ដូចតទៅនេះ ៖នៅពេលយើងបានពេញដោយព្រះវិញ្ញាណបរិសុទ្ធ នោះយើងអាចចែកចាយដំណឹងល្អដោយភាពក្លាហាន ។
ចូរអញ្ជើញសិស្សឲ្យស្វែងរកមើលគំរូបន្ថែមទៀតអំពីគោលការណ៍នេះ នៅពេលពួកគេបន្ដសិក្សាកិច្ចការ ៤–៥ ។
-
យោងតាមខទី ១៨តើក្រុមប្រឹក្សាបានបញ្ជាអ្វីខ្លះដល់ពេត្រុស និងយ៉ូហាន ?
-
យោងតាមខទី ១៩-២០ តើពេត្រុស និងយ៉ូហាន បានឆ្លើយតបចំពោះបញ្ជារបស់ក្រុមប្រឹក្សាយ៉ាងដូចម្ដេច ?
សូមសង្ខេបកិច្ចការ ៤:២៣-២៨ដោយពន្យល់ថា បន្ទាប់ពីពេត្រុស និងយ៉ូហានត្រូវបានគេដោះលែង នោះពួកគេបានជួបជុំនឹងពួកអ្នកជឿផ្សេងទៀត ហើយបានអធិស្ឋានជាមួយនឹងពួកគេ ។
សូមអញ្ជើញសិស្សម្នាក់អានកិច្ចការ ៤:២៩-៣០ឮៗ ហើយសុំសិស្សក្នុងថ្នាក់ឲ្យរកមើលនូវអ្វីដែលពួកអ្នកជឿបានទូលសូមពីព្រះ ។
-
តើពួកអ្នកជឿបានទូលសូមអ្វីខ្លះពីព្រះ ?
សូមអញ្ជើញសិស្សម្នាក់ឲ្យអានកិច្ចការ ៤:៣១ឮៗ ហើយសុំឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលបានកើតឡើងបន្ទាប់ពីការអធិស្ឋានរបស់ពួកគេ ។
-
តើមានអ្វីកើតឡើង បន្ទាប់ពីមនុស្សបានអធិស្ឋាន ?
-
អាស្រ័យទៅលើខគម្ពីរទាំងនោះ តើយើងអាចធ្វើអ្វីខ្លះ ដើម្បីអញ្ជើញព្រះវិញ្ញាណបរិសុទ្ធឲ្យជួយយើងថ្លែងពីព្រះបន្ទូលនៃព្រះដោយក្លាហាន ?
សូមយោងទៅលើស្ថានភាពមួយចំនួនដែលបានប្រាប់នៅដើមមេរៀន ។
-
តើយើងអាចក្លាហាននៅក្នុងការចែកចាយដំណឹងល្អនៅក្នុងស្ថានភាពនានា ដូចជាស្ថានភាពទាំងនេះតាមរបៀបណា ?
-
តើយើងអាចចែកចាយ និងការពារដំណឹងល្អជាមួយអ្នកដទៃដោយក្លាហាន ខណៈដែលយើងនៅតែផ្ដល់ការគោរព ហើយភាពរាបសារបានយ៉ាងដូចម្ដេច ?
-
តើនៅពេលណាដែលព្រះវិញ្ញាណបរិសុទ្ធ បានជួយអ្នកឲ្យថ្លែងពីព្រះបន្ទូលនៃព្រះដោយក្លាហាន ?
កិច្ចការ ៤:៣២-៥:១១
សមាជិកនៃសាសនាចក្ររស់នៅតាមក្រឹត្យវិន័យនៃការថ្វាយ ប៉ុន្តែអាន៉្នានាស និងសាភីរ៉ា កុហកពេត្រុស ។
ចូរសុំឲ្យសិស្សគិតពិចារណាអំពីស្ថានភាពដូចខាងក្រោម ៖
-
ក្រុមយុវវ័យមួយក្រុម កំពុងរៀបផែនការធ្វើពិធីបុណ្យជ្រមុជទឹកសម្រាប់មរណជននៅព្រះវិហារបរិសុទ្ធ ។ សមាជិកម្នាក់ក្នុងក្រុមដឹងថា គាត់ចាំបាច់ត្រូវជួបនឹងប៊ីស្សពសុំបណ្ណ ប៉ុន្តែនាងក៏បានដឹងថា នាងបានធ្វើអំពើបាបមួយចំនួនដែលពុំទាន់បានសារភាព ។
-
ក្មេងប្រុសម្នាក់កំពុងរៀបចំខ្លួនបម្រើបេសកកម្ម ។ គាត់ដឹងថា ប៊ីស្សពនឹងសួរសំណួរអំពីភាពសក្ដិសមរបស់គាត់ ដើម្បីបម្រើបេសកកម្ម ។ គាត់បានព្យាយាមរិះរកវិធីដើម្បីឆ្លើយសំណួរទាំងនោះ ដោយពុំប្រាប់ប៊ីស្សពអំពីកំហុសមួយចំនួនដែលគាត់បានធ្វើខុស ។
សូមអញ្ជើញសិស្សឲ្យស្វែងរកគោលការណ៍មួយ នៅពេលពួកគេសិក្សាកិច្ចការ ៤:៣២-៥:១១ដែលអាចជួយពួកគេយល់អំពីសារៈសំខាន់នៃការស្មោះត្រង់ជាមួយនឹងអ្នកបម្រើរបស់ព្រះ ។
សូមអញ្ជើញឲ្យសិស្សម្នាក់អាន កិច្ចការ ៤:៣២-៣៥ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលសមាជិកនៃសាសនាចក្របានធ្វើជាមួយនឹងទ្រព្យសម្បត្តិរបស់ពួកគេ ។
-
តើសមាជិកនៃសាសនាចក្របានធ្វើអ្វីខ្លះជាមួយនឹងទ្រព្យរបស់ពួកគេ ?
-
យោងតាមខទី ៣៤–៣៥ តើដំណើរការរបស់ពួកគេក្នុងការចែកចាយទ្រព្យខាងរូបកាយរបស់ពួកគេមានអ្វីខ្លះ ?
សូមអញ្ជើញឲ្យសិស្សម្នាក់អាន កិច្ចការ ៥:១-២ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលគូស្វាមីភរិយាដែលបានរៀបការ ឈ្មោះ អាន៉្នានាស និងសាភីរ៉ា បានធ្វើជាមួយនឹងប្រាក់ ដែលពួកគេបានទទួលមកពីការលក់ដីនោះ ។
-
តើអាន៉្នានាស និងសាភីរ៉ា បានធ្វើអ្វីដែលជារឿងដ៏ធ្ងន់ធ្ងរនោះ ?
សូមអញ្ជើញសិស្សម្នាក់អានកិច្ចការ ៥:៣-៤ឮៗ ហើយសុំសិស្សក្នុងថ្នាក់ឲ្យរកមើលថា ពេត្រុសបាននិយាយអ្វីទៅកាន់អាន៉្នានាស ។
-
យោងតាមខទី ៤ តើទីបំផុតអាន៉្នានាសបានកុហកដល់នរណា ?
-
ចេញមកពីចម្លើយរបស់ពេត្រុស តើគោលការណ៍អ្វីខ្លះ ដែលយើងអាចរៀនអំពីការកុហកដល់អ្នកបម្រើរបស់ព្រះអម្ចាស់ ? ( សិស្សអាចនឹងប្រើសម្ដីរបស់ពួកគេផ្ទាល់ ដើម្បីប្រាប់ពីគោលការណ៍ខាងក្រោមនេះ ៖ប្រសិនបើយើងកុហកដល់ពួកអ្នកបម្រើរបស់ព្រះ នោះដូចជាយើងកុហកដល់ទ្រង់ដែរ )។
-
ហេតុអ្វីក៏អ្នកគិតថា ការកុហកដល់ពួកអ្នកបម្រើរបស់ទ្រង់ គឺដូចគ្នានឹងការកុហកទ្រង់ដូច្នេះ ?
សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗពី កិច្ចការ ៥:៥-១១ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលអ្វីដែលបានកើតឡើងដល់ អាន៉្នានាស និងសាភីរ៉ា ជាលទ្ធផលនៃការបំពានលើសេចក្ដីសញ្ញារបស់ពួកគេ និងការកុហកពេត្រុស ។
-
តើមានអ្វីបានកើតឡើងចំពោះអាន៉្នានាស និងសាភីរ៉ា ?
-
ទោះជាយើង ឬអ្នកទាំងឡាយដែលយើងស្គាល់ពុំជួបប្រទះនឹងផលវិបាកដ៏ធ្ងន់ធ្ងរ ឬវិបត្តិភ្លាមៗក្នុងការកុហកក្ដី តើផលវិបាកមួយចំនួនដែលយើងអាចជួបប្រទះមានអ្វីខ្លះ បើយើងកុហកព្រះអម្ចាស់ ឬបំពានលើសេចក្ដីសញ្ញារបស់យើងនោះ ?
សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមឲ្យឮៗ ដោយប្រធាន ហ្គរដុន ប៊ី ហ៊ិងគ្លី ។ សូមឲ្យសិស្សស្ដាប់មើលផលវិបាកមួយចំនួនដែលកើតមកពីភាពមិនស្មោះត្រង់ ៖
« នៅក្នុងជំនាន់របស់យើង អ្នកទាំងឡាយដែលរកឃើញថា មានភាពមិនស្មោះត្រង់ពុំស្លាប់ដូចជាអាន៉្នានាស និងសាភីរ៉ាទេ ប៉ុន្តែមានអ្វីមួយនៅក្នុងខ្លួនគេបានស្លាប់ ។ មនសិការត្រូវរងគ្រោះ ឥរិយាបទចុះទន់ខ្សោយ ការគោរពខ្លួនឯងត្រូវអន្ដរាយ សេចក្ដីសុចរិតត្រូវស្លាប់ » (« We Believe in Being Honest »Ensign ខែ តុលា ឆ្នាំ ១៩៩០ ទំព័រ ៤ ) ។
-
ស្របតាមប្រធាន ហ៊ិងគ្លី តើផលវិបាកមួយចំនួននៃការកុហកមានអ្វីខ្លះ ? សូមយោងទៅលើស្ថានភាពមកពីដើមវគ្គនៃមេរៀននេះ ។
-
តើបុគ្គលម្នាក់ៗនៅក្នុងស្ថានភាពទាំងនេះចាំបាច់ត្រូវដឹងអ្វីខ្លះ ដែលនឹងកើតឡើងចំពោះយើង ប្រសិនបើយើងកុហកដល់អ្នកដឹកនាំបព្វជិតភាព ?
-
តើមានពរជ័យអ្វីខ្លះ ដែលកើតចេញមកពីការស្មោះត្រង់ជាមួយនឹងអ្នកបម្រើរបស់ព្រះអម្ចាស់ ?
កិច្ចការ ៥:១២-៤២
ពួកសាវកគឺត្រូវបានគេដាក់ក្នុងគុក ដោយសារការព្យាបាលនៅក្នុងព្រះនាមនៃព្រះយេស៊ូវគ្រីស្ទ
ចូរសុំឲ្យសិស្សនឹកស្រមៃថា ពួកគេកំពុងរស់នៅក្នុងជំនាន់របស់ពេត្រុស និងយ៉ូហាន ហើយគឺជាអ្នកយកសារព័ត៌មានសម្រាប់កាសែតមួយ ។ ចូរពន្យល់ថា ពួកគេនឹងត្រូវបានអញ្ជើញឲ្យសិក្សាផ្នែកនៃកិច្ចការ ៥:១២-៣២រួចហើយសរសេរដើមរឿងសង្ខេបអំពីអ្វីបានកើតឡើង ។ ( ដើម្បីផ្ដល់បរិបទសម្រាប់វគ្គសិក្សាទាំងឡាយ សូមរំឭកសិស្សថា ពួកសានហេឌ្រីនបានបញ្ជាដល់ពេត្រុស និងយ៉ូហាន ឲ្យឈប់និយាយនៅក្នុងព្រះនាមនៃព្រះយេស៊ូវគ្រីស្ទទៀត ) ។ សូមធ្វើតាមការណែនាំ ដែលបានផ្ដល់ឲ្យជាមួយនឹងបណ្ដុំបទគម្ពីរនីមួយៗ ។
-
កិច្ចការ ៥:១២-១៦( សូមអានវគ្គគម្ពីរនេះជាថ្នាក់ ហើយសរសេរដើមរឿងជាមួយគ្នា ) ។
-
កិច្ចការ ៥:១៧-២៣( ចូរសុំឲ្យសិស្សអានវគ្គគម្ពីរនេះជាមួយនឹងដៃគូ ហើយសរសេរដើមរឿង ។ សូមឲ្យដៃគូមួយចំនួន ចែកចាយដើមរឿងរបស់ពួកគេដល់សិស្សក្នុងថ្នាក់ ) ។
-
កិច្ចការ ៥:២៤-៣២( ចូរសុំឲ្យសិស្សក្នុងថ្នាក់អានផ្សេងៗពីគ្នា ហើយសរសេរដើមរឿង ។ សូមឲ្យសិស្សមួយចំនួន ចែកចាយដើមរឿងរបស់ពួកគេដល់សិស្សក្នុងថ្នាក់ ) ។
បន្ទាប់ពីសិស្សចែកចាយដើមរឿងរបស់ពួកគេហើយ ចូរសួរថា
-
យោងតាមខទី ២៩ហេតុអ្វីក៏ពេត្រុស និងពួកសាវកផ្សេងទៀត និយាយថា ពួកគេបានបន្ដផ្សាយនៅក្នុងព្រះនាមនៃព្រះយេស៊ូវ ថ្វីបើមានបញ្ជាពីក្រុមប្រឹក្សាក្ដី ?
សូមសរសេរប្រយោគមិនពេញលេញខាងក្រោមនេះនៅលើក្ដារខៀន ៖ប្រសិនបើយើងជ្រើសគោរពតាមព្រះជាងមនុស្ស នោះ …
-
ចេញមកពីអ្វីដែលអ្នកបានអាននៅក្នុងកិច្ចការ ៤-៥តើវិធីមួយចំនួន ដែលយើងអាចបំពេញសេចក្ដីថ្លែងការណ៍នេះមានអ្វីខ្លះ ? ( បន្ទាប់ពីសិស្សបានឆ្លើយហើយ សូមបំពេញសេចក្ដីថ្លែងការណ៍នៅលើក្ដារខៀន ដូចតទៅ ៖ប្រសិនបើយើងជ្រើសរើសគោរពតាមព្រះជាជាងមនុស្សនោះទ្រង់នឹងគង់នៅជាមួយយើង ) ។
-
តើព្រះគង់នៅជាមួយនឹងពេត្រុស និងពួកសាវកដទៃទៀតដោយរបៀបណា នៅពេលពួកគេបានគោរពទ្រង់ជាងពួកក្រុមប្រឹក្សានោះ ? ( ព្រះបានបំពេញពួកគេដោយព្រះវិញ្ញាណបរិសុទ្ធ [ សូមមើលកិច្ចការ ៤:៨, ៣១] បានជួយពួកគេធ្វើអព្ភូតហេតុ [ សូមមើលកិច្ចការ ៥:១២-១៦] ហើយបានបញ្ជូនទេវតារបស់ទ្រង់ដើម្បីរំដោះពួកគេពីក្នុងគុក [ សូមមើលកិច្ចការ ៥:១៧-២១] ) ។
-
តើអ្នក ឬនរណាម្នាក់ដែលអ្នកស្គាល់បានជ្រើសរើសគោរពតាមព្រះជាជាងមនុស្សនៅពេលណា ? តើព្រះបង្ហាញថាទ្រង់គង់នៅជាមួយអ្នក ឬបុគ្គលម្នាក់នេះដោយរបៀបណា ?
សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗមកពីកិច្ចការ៥:៣៣-៤២ ។ សូមអញ្ជើញសិស្សក្នុងថ្នាក់ផ្ទៀងតាម រកឃើញគំរូបន្ថែមអំពីរបៀបដែលព្រះអម្ចាស់គង់នៅជាមួយពេត្រុស និងពួកសាវកដទៃទៀត ។
សូមចង្អុលបង្ហាញថា យើងរៀននៅក្នុងកិច្ចការ ៥:៣៣ ថាក្រុមប្រឹក្សាព្យាយាមសម្លាប់ពេត្រុស និងយ៉ូហាន ។
-
យោងតាម ខទី ៤១-៤២តើពួកសាវកបន្ដស្មោះត្រង់ចំពោះព្រះអម្ចាស់ ក្នុងពេលប្រឈមមុខនឹងការគម្រាមគំហែងនេះយ៉ាងដូចម្ដេច ? តើព្រះអម្ចាស់គង់នៅជាមួយពួកគេក្នុងគ្រានេះយ៉ាងដូចម្ដេច ?
-
តើសេចក្ដីពិតដែលយើងបានសំគាល់ឃើញ នៅក្នុងមេរៀននេះ អាចជួយយើងនៅពេលយើងរស់នៅតាមដំណឹងល្អ ហើយចែកចាយវាជាមួយនឹងអ្នកនៅជុំវិញយើងយ៉ាងដូចម្ដេច ?
សូមចែកចាយទីបន្ទាល់របស់អ្នក អំពីសេចក្ដីពិតទាំងឡាយដែលបានបង្រៀននៅក្នុងថ្ងៃនេះ ។