សេចក្ដីផ្ដើមនៃសំបុត្រទីពីររបស់យ៉ូហាន
ហេតុអ្វីត្រូវសិក្សាគម្ពីរនេះ ?
នៅក្នុងសំបុត្រទីពីររបស់លោក យ៉ូហានបានបង្ហាញកង្វល់អំពីឥទ្ធិពលនៃការក្បត់សាសនានៅក្នុងសាសនាចក្រ ។ ទន្ទឹមនឹងគ្នានេះ លោកក៏បានបង្ហាញអំណរចំពោះសមាជិកសាសនាចក្រដែលបានបន្តមានចិត្តរឹងមាំ ហើយមានភក្ដីភាពចំពោះដំណឹងល្អ ( សូមមើល យ៉ូហានទី២ ១:៤ ) ។ ពាក្យទាំងនេះបង្ហាញពីអំណរ និងការដឹងគុណដែលថ្នាក់ដឹកនាំសាសនាចក្រមានចំពោះជនដែលបន្តមានចិត្តស្មោះត្រង់ចំពោះព្រះអម្ចាស់ ។ នៅពេលសិស្សសិក្សាយ៉ូហានទី ២ ពួកគេអាចទទួលបានភាពរឹងមាំ ដោយការរំឭករបស់យ៉ូហានឲ្យចេះស្រឡាញ់គ្នា គោរពតាមព្រះបញ្ញត្តិរបស់ព្រះ ហើយរស់នៅដោយស្មោះត្រង់តាមគោលលទ្ធិនៃព្រះគ្រីស្ទ ។
តើនរណាជាអ្នកសរសេរគម្ពីរនេះ ?
អ្នកនិពន្ធបានបង្ហាញខ្លួនលោកជា « អ្នកចាស់ទុំ » ( យ៉ូហានទី២ ១:១ ) ហើយយោងតាមប្រពៃណី នោះគឺយ៉ូហានដែលជាសាវកមួយរូបក្នុងចំណោមពួកសាវកដើមទាំងដប់ពីរនាក់ បានសរសេរសំបុត្រនេះ ( សូមមើលសេចក្ដីណែនាំដល់បទគម្ពីរទាំងឡាយ « យ៉ូហាន, កូនប្រុសរបស់សេបេដេ » ) ។
តើគម្ពីរនេះត្រូវបានសរសេរនៅពេលណា និង នៅកន្លែងណា ?
គ្មាននរណាម្នាក់ដឹកពិតប្រាកដពីពេលវេលា និងទីកន្លែងដែលយ៉ូហានទី២ ត្រូវសរសេរឡើងនោះទេ ។
ប្រសិនបើទម្លាប់នៃការស្នាក់នៅដ៏យូររបស់យ៉ូហាននៅអេភេសូរត្រឹមត្រូវ នោះលោកអាចសរសេរសំបុត្រនេះនៅទីនោះនៅចន្លោះ គ.ស. ៧០ និង ១០០ ។
តើគម្ពីរនេះត្រូវបានសរសេរឡើងសម្រាប់នរណា ហើយតើហេតុអ្វីដែរ ?
សំបុត្រទីពីររបស់យ៉ូហានបានសរសេរទៅកាន់ « លោកស្រីរើសតាំង និងកូនចៅរបស់លោកស្រី » ( យ៉ូហានទី២ ១:១ ) ។ យើងមិនបានដឹងថា យ៉ូហានកំពុងតែលើកមកនិយាយអំពីគ្រួសារលោក ឬមនុស្សមួយក្រុមផ្សេងទៀតជាក់លាក់ ឬកំពុងថ្លែងទៅកាន់សាសនាចក្រដែលប្រើជាពាក្យប្រៀបធៀបនោះទេ ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានសរសេរថា យ៉ូហានទី ២ និងយ៉ូហានទី ៣ ប្រហែលជាសំបុត្រដែលយ៉ូហានសរសេរទៅសមាជិកគ្រួសារលោកផ្ទាល់ ( សូមមើល Doctrinal New Testament Commentary វ៉ុល ៣ [ ឆ្នាំ ១៩៦៥–៧៣ ] ៣:៤០៩–១០, ៤១២–១៤ ) ។
គេអាចនិយាយម្យ៉ាងទៀតបានថា « លោកស្រីរើសតាំង » គឺសំដៅទៅលើក្រុមជំនុំសាសនាគ្រីស្ទមួយ ( សូមមើល យ៉ូហានទី២ ១:១៣ ) ។ ពាក្យក្រិកសម្រាប់ ព្រះវិហារ ជានាមភេទស្រី ហើយវាជារឿងសមញ្ញ ដែលប្រដូចសាសនាចក្រទៅនឹងស្ត្រីម្នាក់ ( សូមមើល អេភេសូរ ៥:២៥–២៧, ៣២, ការបកប្រែដោយ យ៉ូសែប ស្ម៊ីធ, វិវរណៈ ១២:១–៣, ៧ [ នៅក្នុងសេចក្ដីណែនាំដល់បទគម្ពីរទាំងឡាយ ], វិវរណៈ ១៩:៧–៨ ) ។
ដូចជានៅក្នុងយ៉ូហានទី១ ដែរ យ៉ូហានទំនងជាសរសេរសំបុត្រនេះដើម្បីឆ្លើយតបនឹងការបង្រៀនខុសឆ្គងថា ព្រះយេស៊ូវគ្រីស្ទមិនបានយាងមកកាន់ផែនដីនេះក្នុងរូបកាយជាសាច់ឈាមនោះទេ ។ សូមពន្យល់ថា សមាជិកដែលបានបង្រៀនថា ព្រះគ្រីស្ទគ្មានព្រះកាយខាងសាច់ឈាមនោះ មិនគួរឲ្យទទួលចូលទៅក្នុងផ្ទះ ឬក្រុមជំនុំរបស់នរណាម្នាក់ឡើយ ( សូមមើល យ៉ូហានទី២ ១:៧–១០ ) ។
តើគម្ពីរនេះមានលក្ខណៈពិសេសអ្វីខ្លះ ?
នៅក្នុងសំបុត្រនេះ យ៉ូហានបានព្រមានអំពីគ្រូបង្រៀនក្លែងក្លាយដែលបានចូលទៅក្នុងសាសនាចក្រ ។ លោកបានណែនាំមិនឲ្យសមាជិកសាសនាចក្រស្ដាប់ ឬសេពគប់នឹងបុគ្គលទាំងនេះឡើយ ។
គម្រោង
យ៉ូហានទី ២ ១ យ៉ូហានរំឭកសាសនាចក្រពីព្រះបញ្ញត្តិឲ្យចេះស្រឡាញ់គ្នា ។ លោកព្រមានពីពួកគ្រូបង្រៀនក្លែងក្លាយ និងពួកបោកបញ្ឆោតទាំងឡាយដែលមាននៅក្នុងសាសនាចក្រ ហើយទូន្មានដល់សមាជិកសាសនាចក្រថា កុំបណ្ដោយឲ្យពួកគេបន្តនៅក្នុងក្រុមជំនុំរបស់ខ្លួនឡើយ ។