ម៉ាថាយ ៤-៩ ( មេរៀនទី ៨ )

ការរៀបចំសម្ភារសម្រាប់គ្រូបង្រៀនដល់សិស្ស ដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

សេចក្ដីសង្ខេបខាងក្រោមអំពីព្រឹត្តការណ៍ គោលលទ្ធិ និងគោលការណ៍ទាំងឡាយដែលសិស្សបានរៀន នៅពេលពួកគេបានសិក្សា ម៉ាកុស ៤-៩ ( មេរៀនទី ៨ ) ពុំមែនត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀនផ្ដោតតែលើគោលលទ្ធិ និង គោលការណ៍ពីរបីប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតពីតម្រូវការរបស់សិស្ស ។

ថ្ងៃទី ១ ( ម៉ាកុស ៤-៥ )

សិស្សបានរៀនថា ប្រសិនបើយើងស្វែងរកជំនួយរបស់ព្រះអម្ចាស់ នៅគ្រាមានបញ្ហា ឬភ័យខ្លាច នោះទ្រង់អាចនាំសេចក្ដីសុខសាន្ដកើតមានមកដល់យើង ។ ពួកគេក៏បានរៀនផងដែរថា នៅពេលយើងមានបទពិសោធន៍ព្រះចេស្ដារបស់ព្រះអង្គសង្គ្រោះនៅក្នុងជីវិតរបស់យើង នោះយើងអាចថ្លែងទីបន្ទាល់ទៅដល់អ្នកដទៃអំពីពរជ័យ និងក្ដីមេត្តាករុណារបស់ទ្រង់ ។ ចេញមកពីរឿងនៃកូនស្រីរបស់យ៉ៃរ៉ុស និងស្ត្រីដែលមានធ្លាក់ឈាម នោះសិស្សបានរៀនថា ប្រសិនបើយើងបង្ហាញសេចក្ដីជំនឿរបស់យើងទៅលើព្រះយេស៊ូវគ្រីស្ទ តាមរយៈកិច្ចខិតខំរបស់យើង ដើម្បីមករកទ្រង់ នោះទ្រង់អាចធ្វើឲ្យយើងបានជាសះស្បើយ ហើយថាការអនុវត្តសេចក្ដីជំនឿទៅលើព្រះយេស៊ូវគ្រីស្ទ តម្រូវឲ្យយើងបន្ដជឿលើទ្រង់ ទោះជានៅក្នុងគ្រាពុំពិតប្រាកដក្ដី ។

ថ្ងៃទី ២ ( ម៉ាកុស ៦-៨ )

ចេញមកពីអព្ភូតហេតុនៃការប្រទានចំណីអាហារដល់មនុស្ស ៥០០០ នាក់ នោះសិស្សអាចរៀនថា នៅពេលយើងថ្វាយព្រះអង្គសង្គ្រោះអ្វីៗទាំងអស់ដែលយើងមាន នោះទ្រង់អាចតម្កើងការថ្វាយរបស់យើង ឲ្យសម្រេចតាមព្រះរាជបំណងទ្រង់ ។ សិស្សក៏រៀនផងដែរថា យើងអាចធ្វើតាមគំរូរបស់ព្រះអង្គសង្គ្រោះ ដោយការដឹងអំពីតម្រូវការរបស់អ្នកដទៃ រួចហើយជួយបំពេញតម្រូវការទាំងនោះ ។

ថ្ងៃទី ៣ ( ម៉ាកុស ៩: ១-២៩ )

ចេញមកពីដំណើររឿងរបស់ព្រះយេស៊ូវ បណ្ដេញវិញ្ញាណអសោចចេញពីក្មេងប្រុសម្នាក់ នោះសិស្សអាចរៀនថា ប្រសិនបើយើងជឿទៅលើព្រះយេស៊ូវគ្រីស្ទ នោះអ្វីៗគ្រប់បែបយ៉ាងអាចទៅរួចសម្រាប់យើង ។ គោលការណ៍ផ្សេងទៀតមកពីមេរៀននេះ រួមមានដូចខាងក្រោម ៖ ប្រសិនបើយើងកាន់ជាប់នូវអ្វីដែលយើងជឿ ហើយស្វែងរកជំនួយរបស់ព្រះអម្ចាស់ នោះទ្រង់នឹងជួយយើងពង្រឹងសេចក្ដីជំនឿរបស់យើង ។ យើងអាចបង្កើនសេចក្ដីជំនឿរបស់យើងទៅលើព្រះយេស៊ូវគ្រីស្ទ តាមរយៈការអធិស្ឋាន និងការតមអាហារ ។

ថ្ងៃទី ៤ ( ម៉ាកុស ៩:៣០-៥០ )

នៅពេលសិស្សបានសិក្សាម៉ាកុស ៩:៣០-៥០ពួកគេបានរៀនថា ប្រសិនបើយើងមានឥទ្ធិពលលើអ្នក ដែលជឿលើព្រះយេស៊ូវគ្រីស្ទឲ្យធ្វើអំពើបាប នោះយើងនឹងទទួលខុសត្រូវនៅចំពោះមុខព្រះ ។ ចេញមកពីការបង្រៀនរបស់ព្រះអង្គសង្គ្រោះនៅក្នុងខគម្ពីរទាំងនេះ នោះសិស្សបានរៀនថា វាល្អប្រសើរ ដើម្បីញែកខ្លួនយើងពីឥទ្ធិពលមិនសុចរិត ជាជាងយើងត្រូវបានបំបែកចេញពីព្រះនៅទីបំផុតនោះ ។

សេចក្ដីផ្ដើម

មេរៀននេះ អាចជួយសិស្សឲ្យយល់ថា ការព្យាយាមដើម្បីផ្គាប់ចិត្តអ្នកដទៃជាជាងឲ្យការធ្វើនូវអ្វី ដែលយើងដឹងថាត្រឹមត្រូវ អាចនាំទៅរកការជ្រើសរើសខុសឆ្គង ការសោកស្ដាយ និងវិប្បដិសារី ។

យោបល់សម្រាប់ការបង្រៀន

ម៉ាកុស ៦:១-២៩

ព្រះយេស៊ូវត្រូវបានគេបដិសេធនៅស្រុកណាសារ៉ែត ហើយបានបញ្ជូនពួកដប់ពីរនាក់ឲ្យចេញទៅផ្សព្វផ្សាយ ការស្លាប់របស់យ៉ូហាន បាទីស្ទត្រូវបានដំណាលប្រាប់

សូមចាប់ផ្ដើមថ្នាក់រៀនដោយការអញ្ជើញសិស្ស ឲ្យគិតអំពីគ្រាពីមុន ដែលពួកគេមានអារម្មណ៍ថាក្រោមសម្ពាធក្នុងការធ្វើអ្វីមួយ ដែលពួកគេដឹងថាវាពុំត្រឹមត្រូវ ។

សូមសរសេរនូវសេចក្ដីថ្លែងការណ៍ដូចខាងក្រោម នៅលើក្ដារខៀន ( សេចក្ដីថ្លែងការណ៍នេះត្រូវបានរកឃើញនៅក្នុង« Making the Right Choices » Ensignខែ វិច្ឆិកា ឆ្នាំ ១៩៩៤ ទំព័រ ៣៧ ) ។

« បុគ្គលម្នាក់ៗដែលធ្វើខុស ចង់ឲ្យអ្នកចូលរួមនឹងពួកគេ ដោយសារពួកគេនឹងមានអារម្មណ៍កាន់តែសុខស្រួលចំពោះអ្វីដែលគេកំពុងតែធ្វើនោះ ព្រោះមានអ្នកដទៃធ្វើវាដែរ » ( អែលឌើរ រីឆាត ជី ស្កត ) ។

តើមានឧទាហរណ៍ណាខ្លះអំពីរបៀប ដែលអ្នកដទៃអាចនឹងព្យាយាមដាក់សម្ពាធមកលើអ្នកឲ្យធ្វើអ្វីមួយ ដែលអ្នកដឹងថាវាខុសឆ្គង ?

សូមអញ្ជើញសិស្សឲ្យរកមើលសេចក្ដីពិតមួយ នៅពេលពួកគេសិក្សាម៉ាកុស ៦ដែលអាចជួយពួកគេចៀសវាងពីការចុះញ៉មនឹងសម្ពាធអវិជ្ជមានរបស់មិត្តភក្ដិ ។

ចូរសុំឲ្យសិស្សម្នាក់អាន ម៉ាកុស ៦:១៧-១៨ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលនូវអ្វីដែលហេរ៉ូឌបានធ្វើចំពោះយ៉ូហាន បាទីស្ទ ។ សូមឲ្យសិស្សរាយការណ៍ពីអ្វីដែលពួកគេបានរកឃើញ ។

តើហេរ៉ូឌបានធ្វើអ្វីខ្លះដល់យ៉ូហាន ហើយហេតុអ្វី ?

ហេរ៉ូឌ បានលែងលះមហេសីរបស់ទ្រង់ ហើយបានរៀបការនឹងហេរ៉ូឌាស ជាមហេសីរបស់អនុជទ្រង់ គឺភីលីព ។ ទង្វើនេះគឺជាការល្មើសនឹងច្បាប់របស់សាសន៍យូដាយ៉ាងជាក់ច្បាស់ ( សូមមើលលេវីវិន័យ ១៨:១៦) ហើយយ៉ូហាន បាទីស្ទបានដាក់បណ្ដាសារ ។ ការជំទាស់របស់យ៉ូហានចំពោះការរៀបការនេះ បានធ្វើឲ្យហេរ៉ូឌាសខ្ញាល់ជាខ្លាំង ដូច្នេះហេរ៉ូឌបានចាប់យ៉ូហានដាក់គុកដើម្បីឲ្យស្កប់ចិត្តនាង ។

ចូរសុំឲ្យសិស្សម្នាក់អាន ម៉ាកុស ៦:១៩-២០ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលហេរ៉ូឌាសបានធ្វើចំពោះយ៉ូហាន បាទីស្ទ ។

តើហេរ៉ូឌាសចង់ធ្វើអ្វីខ្លះចំពោះយ៉ូហាន បាទីស្ទ ?
ហេតុអ្វីក៏នាងមិនអាចសម្លាប់គាត់បាន ? ( ដោយសារតែហេរ៉ូឌខ្លាចយ៉ូហាន ហើយបានដឹងថាគាត់ជាមនុស្សរបស់ព្រះ ) ។

សូមអញ្ជើញសិស្សបីបួននាក់ប្ដូរវេនគ្នាឲ្យអានឮៗនៅក្នុង ម៉ាកុស ៦:២១-២៩ ។ សូមអញ្ជើញសិស្សក្នុងថ្នាក់ឲ្យផ្ទៀងតាម រកមើលនូវអ្វីដែលហេរ៉ូឌបានធ្វើចំពោះយ៉ូហាន បាទីស្ទ ។

យោងតាមខ ២៦តើហេរ៉ូឌមានអារម្មណ៍យ៉ាងណា អំពីការសម្លាប់យ៉ូហាន បាទីស្ទ ?
ហេតុអ្វីក៏ហេរ៉ូឌត្រូវកាត់ក្បាលយ៉ូហាន បើទ្រង់ដឹងថាទង្វើនេះខុស ហើយពុំចង់ធ្វើវាផងនោះ ? ( ហេរ៉ូឌមានកង្វល់អំពីមតិរបស់អ្នកទាំងឡាយដែលជាភ្ញៀវនៅជាមួយទ្រង់ ) ។
តើគោលការណ៍អ្វីខ្លះ ដែលយើងអាចរៀនមកពីការជ្រើសរើសរបស់ហេរ៉ូឌអំពីអ្វីដែលបានកើតឡើង នៅពេលយើងព្យាយាមផ្គាប់ចិត្តអ្នកដទៃ ជំនួសឲ្យធ្វើនូវអ្វីដែលត្រឹមត្រូវនោះ ? ( សិស្សអាចនឹងប្រើពាក្យផ្សេង ប៉ុន្តែចូរប្រាកដថាពួកគេគួរស្គាល់គោលការណ៍ដូចខាងក្រោមនេះ ៖ ការព្យាយាមដើម្បីផ្គាប់ចិត្តអ្នកដទៃ ជាជាងការធ្វើនូវអ្វីដែលយើងដឹងថាត្រឹមត្រូវ អាចនាំទៅរកការជ្រើសរើសខុសឆ្គង ការសោកស្ដាយ និងវិប្បដិសារី )។

ដើម្បីជួយសិស្សយល់បន្ថែមទៀតអំពីសេចក្ដីពិតនេះ សូមចាត់ពួកគេជាក្រុមដែលមានគ្នាពីរទៅបួននាក់ក្នុងមួយក្រុម ហើយសុំឲ្យពួកគេប្រាប់នូវឧទាហរណ៍អំពីស្ថានភាពជាច្រើន ដែលយុវវ័យត្រូវតែជ្រើសរើស រវាងការព្យាយាមដើម្បីផ្គាប់ចិត្តអ្នកដទៃ និងការធ្វើអ្វីដែលពួកគេដឹងថាត្រឹមត្រូវ ។ បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញឲ្យក្រុមនិមួយៗឲ្យរាយការណ៍ ។ នៅពេលពួកគេរាយការណ៍ ចូរសរសេរឧទាហរណ៍មួយចំនួនរបស់ពួកគេនៅលើក្ដារខៀន ។

តើអ្នកធ្លាប់ឃើញថាការចុះញ៉មចំពោះសម្ពាធទាំងឡាយដូចនៅក្នុងឧទាហរណ៍ទាំងនេះ នាំមកនូវការសោកស្ដាយ និងវិប្បដិសារីតាមរបៀបណាខ្លះ ?
តើអ្នកធ្លាប់បានឃើញនរណាម្នាក់ជ្រើសរើសធ្វើនូវអ្វី ដែលត្រឹមត្រូវជំនួសឲ្យការព្យាយាមផ្គាប់ចិត្តដល់អ្នកដទៃ នៅពេលណា ?
តើអ្វីខ្លះអាចជួយយើងឲ្យជ្រើសរើសធ្វើអ្វី ដែលយើងដឹងថាត្រឹមត្រូវ ជំនួសឲ្យការព្យាយាមផ្គាប់ចិត្តអ្នកដទៃ ?

សូមអានសេចក្ដីថ្លែងការណ៍ខាងក្រោមនេះឮៗដោយប្រធាន ស្ពែនស៊ើរ ដបុលយូ ឃឹមបឹល អំពីការធ្វើការសម្រេចចិត្តត្រឹមត្រូវ ៖

រូបភាព
ប្រធាន ស្ពែនស៊ើរ ដបុលយូ ឃឹមបឹល

« ការសម្រេចចិត្តត្រឹមត្រូវ គឺងាយធ្វើណាស់ នៅពេលយើងធ្វើវាទុកជាមុនយ៉ាងយូរមកហើយនោះ … ការណ៍នេះវាជួយមិនឲ្យមាននូវការឈឺចាប់នៅពេលត្រូវសម្រេចចិត្ត [ ពេលធ្វើការសម្រេចចិត្ត ] ពេលយើងធុញទ្រាន់ ឬត្រូវល្បួងយ៉ាងខ្លាំងនោះ » (Teachings of Presidents of the Church: Spencer W. Kimball [ឆ្នាំ ២០០៦] ទំព័រ ១០៨)។

សូមអញ្ជើញសិស្សឲ្យគិតពិចារណាអំពីសប្ដាហ៍ក្រោយ ហើយប្រាប់អំពីស្ថានភាពដែលអាចកើតមាន ដែលពួកគេអាចនឹងចាំបាច់ត្រូវជ្រើសរើសរវាងការផ្គាប់ចិត្តអ្នកដទៃ និងការធ្វើអ្វីដែលត្រឹមត្រូវ ។ សូមលើកទឹកចិត្តពួកគេឲ្យដាក់ផែនការអំពីរបៀបដែលពួកគេនឹងតបតចំពោះសម្ពាធនេះ ខណៈពេលដែលពួកគេនឹងជួបប្រទះនោះ ។

ចូរពន្យល់ថា នៅពេលហេរ៉ូឌស្ដាប់ឮអំពីអព្ភូតហេតុជាច្រើន ដែលព្រះយេស៊ូវបានធ្វើនៅស្រុកកាលីឡេ នោះទ្រង់ភ័យខ្លាចថាយ៉ូហាន បាទីស្ទបានរស់ឡើងវិញពីស្លាប់ ហើយធ្វើអព្ភូតហេតុទាំងនេះ ( សូមមើល ម៉ាកុស ៦:១៤-១៦ ) ។

ម៉ាកុស ៧-៨

ព្រះយេស៊ូវបានព្យាបាលមនុស្សពីរនាក់ ហើយបង្រៀនដល់ពួកសិស្សរបស់ទ្រង់

ចូរពន្យល់ថាម៉ាកុស ៧-៨មាននូវដំណើររឿងចំនួនពីរអំពីព្រះអង្គសង្គ្រោះព្យាបាលនរណាម្នាក់ ។ សូមចែកសិស្សជាគូៗ ។ សូមចាត់សិស្សម្នាក់នៅក្នុងក្រុមនីមួយៗឲ្យអានម៉ាកុស ៧:៣១-៣៥ ហើយសិស្សម្នាក់ទៀតអានម៉ាកុស ៨:២២-២៥ ។ បន្ទាប់មកអញ្ជើញសិស្សឲ្យពិពណ៌នាទៅដៃគូរបស់ពួកគេអំពីអព្ភូតហេតុនៃការព្យាបាល នៅក្នុងខគម្ពីរទាំងឡាយដែលពួកគេអាននោះ ។

ក្រោយពីមានពេលគ្រប់គ្រាន់ហើយ សូមអញ្ជើញសិស្សឲ្យពន្យល់អំពីរបៀប ដែលព្រះអង្គសង្គ្រោះយាងទៅធ្វើការព្យាបាលដល់មនុស្សទាំងពីររូបនេះ ។

តើមេរៀនអ្វីខ្លះដែលយើងអាចរៀនមកពីភាពពិត ដែលបុរសខ្វាក់ពុំបានជាទាំងស្រុងនៅលើកដំបូង ?

សូមអញ្ជើញសិស្សម្នាក់ឲ្យអានឮៗពីសេចក្ដីថ្លែងការណ៍ខាងក្រោមនេះដោយអែលឌើរប្រ៊ូស អ័រ ម៉ាក់ខន់ឃី នៃកូរ៉ុមនៃពួកសាវកដប់ពីរនាក់ ។ ចូរសុំឲ្យសិស្សផ្ទៀងតាម ហើយស្ដាប់មើលនូវមូលហេតុនានាដែលព្រះយេស៊ូវអាចនឹងបានព្យាបាលបុរសនោះបន្ដិចម្ដងៗ ឬនៅក្នុងដំណាក់ការផ្សេងៗ ។

រូបភាព
អែលឌើរប្រ៊ូស អ័រ ម៉ាក់ខន់ឃី

« អព្ភូតហេតុនេះគឺខុសពីគេ វាត្រូវបានកត់ត្រាតែក្នុងគ្រាដែលព្រះយេស៊ូវបានព្យាបាលបុរសម្នាក់បន្ដិចម្ដងៗ ។ វាអាចថា ព្រះអម្ចាស់របស់យើងបានធ្វើតាមរបៀបនេះ ដើម្បីពង្រឹងសេចក្ដីជំនឿដែលទន់ខ្សោយតែកំពុងតែរីកចម្រើនរបស់បុរសខ្វាក់ភ្នែកនោះ ។ វានឹងបង្ហាញឲ្យឃើញថា គំរូនៃហេតុការណ៍ជាលំដាប់លំដោយ នៃការការប៉ះព្រះកាយជាមួយនឹងព្រះយេស៊ូវមានឥទ្ធិពលបន្ថែមជាសេចក្ដីសង្ឃឹម ការអះអាង និងសេចក្ដីជំនឿទៅដល់បុរសខ្វាក់ភ្នែក ។ ព្រះយេស៊ូវផ្ទាល់ (១) បានដឹកដៃរបស់បុរសខ្វាក់ចេញពីក្រុង (២) បានដាក់ទឹកមាត់របស់ទ្រង់ផ្ទាល់ទៅលើភ្នែករបស់បុរសខ្វាក់នោះ (៣) បានធ្វើពិធីបរិសុទ្ធនៃការដាក់ដៃលើ ហើយ (៤) បានដាក់ព្រះហស្តរបស់ទ្រង់ជាលើកទីពីរនៅលើភ្នែករបស់បុរសនោះ ។

« ប្រាកដណាស់ របៀបដែលការព្យាបាលនេះធ្វើឡើង បង្រៀនថាមនុស្សគប្បីស្វែងរកព្រះគុណព្យាបាលរបស់ព្រះអម្ចាស់ដោយអស់ពីកម្លាំង និងអស់ពីសេចក្ដីជំនឿរបស់ពួកគេ ដ្បិតរឿងដូច្នេះគឺគ្រប់គ្រាន់ល្មមសម្រាប់តែការព្យាបាលខ្លះៗប៉ុណ្ណោះ បន្ទាប់ពីទទួលបានការណ៍ដូច្នោះហើយ ទោះជាយ៉ាងណាក៏ដោយ ពួកគេនឹងប្រហែលជាអាចទទួលបាននូវការអះអាង និងសេចក្ដីជំនឿបន្ថែមនៅពេលនោះ ដើម្បីធ្វើឲ្យជាសះស្បើយ និងបានល្អគ្រប់ផ្នែក ។ ជាញឹកញាប់មនុស្សក៏ត្រូវបានព្យាបាលពីជំងឺខាងវិញ្ញាណរបស់ពួកគេតាមកម្រិត មួយដំណាក់កាលម្ដងៗផងដែរ នៅពេលពួកគេរៀបចំជីវិតរបស់ពួកគេឲ្យស្របទៅតាមផែនការ និងគោលបំណងរបស់ព្រះ » (Doctrinal New Testament Commentary វ៉ុលទី ៣ [ ឆ្នាំ ១៩៦៥-៧៣ ] ១:៣៧៩–៨០ ) ។

តើការត្រូវបានព្យាបាលបន្ដិចម្ដងៗ បង្កើនសេចក្ដីជំនឿបន្តិចម្តងៗរបស់នរណាម្នាក់ទៅលើព្រះយេស៊ូវគ្រីស្ទយ៉ាងដូចម្ដេច ?
ហេតុអ្វីក៏វាសំខាន់ដើម្បីយល់ថា ពរជ័យមួយចំនួនដូចជាការទទួលបានទីបន្ទាល់នៃដំណឹងល្អ ឬការទទួលបានការព្យាបាលខាងរូបកាយ ឬខាងវិញ្ញាណ ជាញឹកញាប់កើតមានបន្ដិចម្ដងៗ ឬមួយដំណាក់ការម្តងៗជាជាងក្នុងពេលភ្លាមៗ ឬទាំងស្រុងដូច្នេះ ?

សូមសង្ខេបម៉ាកុស ៨:២៧-២៨ដោយពន្យល់ថា ព្រះយេស៊ូវបានសួរដល់ពួកសិស្សរបស់ទ្រង់ថា តើអ្នកដទៃបាននិយាយថាទ្រង់ជានរណា ។ ពួកគេបានតបថា អ្នកខ្លះនិយាយថា ទ្រង់គឺជាយ៉ូហាន បាទីស្ទ ឬព្យាការីផ្សេងទៀត ។

សូមអញ្ជើញសិស្សម្នាក់អាន ម៉ាកុស ៨:២៩ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលនូវអ្វី ដែលពេត្រុសបានប្រកាសអំពីព្រះយេស៊ូវ ។

តើពេត្រុសនិយាយថា ព្រះយេស៊ូវជានរណា ? ( ពាក្យព្រះគ្រីស្ទជាភាសាក្រិកស្មើនឹងពាក្យថាព្រះមេស៊ី )។

សូមសង្ខេបម៉ាកុស ៨:៣០-៣១ដោយពន្យល់ថា ព្រះយេស៊ូវបានបង្រៀនដល់ពួកសិស្សថា ទ្រង់នឹងត្រូវបានពួកសាសន៍យូដាបដិសេធ និងសម្លាប់ ។ សូមអញ្ជើញសិស្សម្នាក់អាន ម៉ាកុស ៨:៣២-៣៣ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលរបៀប ដែលពេត្រុសបានមានប្រតិកម្មចំពោះដំណឹងនេះ ។

ចូរពន្យល់ថា ដោយសារតែការរំពឹងទុករបស់ប្រជាជនសាសន៍យូដាអំពីព្រះមែស៊ីដ៏មានជ័យជំនះ ដូច្នេះវាពិបាកចំពោះពេត្រុស ក៏ដូចជាពួកសាសន៍យូដាជាច្រើនទៀតនាពេលនោះដើម្បីយល់ ហើយទទួលយកគំនិតអំពីព្រះមែស៊ី ដែលនឹងរងទុក្ខ ហើយត្រូវសុគតនោះ។

តើពេត្រុសដូចជាមនុស្សខ្វាក់ដែលពិពណ៌នានៅក្នុងម៉ាកុស ៨:២២-២៥យ៉ាងដូចម្ដេច ? ( ពេត្រុសបាន « មើលឃើញ » សេចក្ដីពិតបន្ដិចម្ដងៗ ។ គាត់មានជំនឿទៅលើព្រះអង្គសង្គ្រោះ ប៉ុន្តែការយល់ដឹងរបស់គាត់អំពីបេសកកម្មរបស់ព្រះអង្គសង្គ្រោះ បានអភិវឌ្ឍមួយជំហានម្ដងៗ ) ។
តើព្រះអម្ចាស់បានជួយអ្នក ឬនរណាម្នាក់ដែលអ្នកស្គាល់ឲ្យមើលឃើញសេចក្ដីពិតកាន់តែច្បាស់បន្ដិចម្ដងៗយ៉ាងដូចម្ដេច ?

សូមបញ្ចប់មេរៀនថ្ងៃនេះដោយការអញ្ជើញសិស្សឲ្យអានម៉ាកុស ៨:៣៤-៣៨ដោយស្ងាត់ស្ងៀម ហើយពិចារណាថាតើមេរៀនថ្ងៃនេះ អាចជួយពួកគេឲ្យដាក់ព្រះអម្ចាស់ជាមុន នៅក្នុងជីវិតរបស់ពួកគេយ៉ាងដូចម្ដេច ។

មេរៀនបន្ទាប់ (ម៉ាកុស ១០-លូកា ៤)

ចូរពន្យល់ថា សិស្សនឹងបញ្ចប់ការសិក្សាដំណឹងល្អរបស់ម៉ាកុស ហើយចាប់ផ្ដើមសិក្សាការសរសេររបស់លូកា ។ សូមអញ្ជើញពួកគេឲ្យរកមើលនូវរឿងលម្អិតថ្មី នៅពេលពួកគេអានម្ដងទៀតអំពីព្រឹត្តិការណ៍ចុងក្រោយនៃជីវិតរបស់ព្រះយេស៊ូវគ្រីស្ទ និងដង្វាយធួនរបស់ទ្រង់ ហើយគូសចំណាំនូវការនិយាយចំអកដែលមានចំពោះព្រះយេស៊ូវ ខណៈដែលទ្រង់ជាប់នៅលើឈើឆ្កាង ។ នៅក្នុងដំណឹងល្អរបស់លូកា ពួកគេនឹងអានជំពូកដ៏ល្បីបំផុតមួយនៅក្នុងគម្ពីរប៊ីប—លូកា ២—និងដំណើររឿងអំពីអ្នកស្រុកដុនដាបយ៉ាងខ្លាំង ពួកបំបរបង់ និងអ្នកមានបាបទាំងឡាយ ។