មេរៀនទី ៨៤
កិច្ចការ ៣
សេចក្ដីផ្ដើម
នៅឯក្លោងទ្វារនៃព្រះវិហារបរិសុទ្ធ ពេត្រុស ដែលបានទៅអមដោយយ៉ូហាន បានព្យាបាលបុរសម្នាក់ដែលកើតមកពិការ ។ បន្ទាប់មក ពេត្រុសបានបង្រៀនដល់ប្រជាជនដែលបានធ្វើជាសាក្សីអំពីការព្យាបាលបុរសនេះ ។ គាត់បានថ្លែងទីបន្ទាល់អំពីព្រះយេស៊ូវគ្រីស្ទ បានអញ្ជើញពួកគេឲ្យប្រែចិត្ត ហើយព្យាករអំពីការស្ដារឡើងវិញនៃដំណឹងល្អនៅថ្ងៃចុងក្រោយ ។
យោបល់សម្រាប់ការបង្រៀន
កិច្ចការ ៣:១-១១
ពេត្រុស និងយ៉ូហាន បានព្យាបាលបុរសម្នាក់ដែលកើតមកពិការ
សូមអញ្ជើញសិស្សឲ្យគិតអំពីគ្រាមួយ ដែលពួកគេបានសូមអ្វីមួយជាក់លាក់ ( ប្រហែលជាអំណោយខួបកំណើត ឬអំណោយបុណ្យគ្រីស្ទម៉ាស់ ) ប៉ុន្តែបានទទួលអ្វីមួយផ្សេងជំនួសវិញ ។ ចូរសុំឲ្យពួកគេពីរបីនាក់ ចែកចាយបទពិសោធន៍របស់ពួកគេ ហើយពន្យល់ថាតើពួកគេមានអារម្មណ៍យ៉ាងណា នៅពេលពួកគេពុំបានទទួលនូវអ្វីដែលពួកគេចង់បាននោះ ។
-
តើយើងអាចប្រៀបធៀបបទពិសោធន៍ទាំងនេះ ទៅនឹងការស្វែងរកពរជ័យមកពីព្រះវរបិតាសួគ៌តាមរយៈការអធិស្ឋានយ៉ាងដូចម្ដេច ? ( ពេលខ្លះ ព្រះវរបិតាសួគ៌ពុំឆ្លើយតបការអធិស្ឋានរបស់យើងតាមរបៀបដែលយើងបានរំពឹងទុក ឬប្រទានអ្វីដែលយើងទូលសូមនោះទេ ) ។
ចូរសុំឲ្យសិស្សពិចារណាអំពីបទពិសោធន៍នានា ដែលនៅក្នុងនោះពួកគេពុំទទួលបានចម្លើយ ឬពរជ័យមកពីព្រះវរបិតាសួគ៌ ដូចដែលពួកគេរំពឹងទុកនោះ ។
សូមអញ្ជើញសិស្សក្នុងថ្នាក់ឲ្យរកមើលគោលការណ៍មួយ នៅពេលពួកគេសិក្សាកិច្ចការ ៣ដែលនឹងជួយពួកគេ នៅពេលពួកគេមិនបានទទួលចម្លើយ ឬពរជ័យទាំងឡាយដែលពួកគេរំពឹងចង់បានមកពីព្រះអម្ចាស់នោះ ។
សូមអញ្ជើញឲ្យសិស្សម្នាក់អាន កិច្ចការ ៣:១-៣ ឮៗ ។ ចូរសុំឲ្យសិស្សផ្ទៀងតាម ហើយរកមើលថានរណាដែលពេត្រុស និងយ៉ូហានបានជួបនៅឯក្លោងទ្វារនៃព្រះវិហារបរិសុទ្ធ ។
-
តើពេត្រុស និងយ៉ូហាន បានជួបនឹងនរណានៅឯក្លោងទ្វារព្រះវិហារបរិសុទ្ធ ?
-
តើវាមានន័យយ៉ាងណាដែលបុរសនេះ « គាត់សូមទាន » ? (ខ ៣) ។ ( អ្នកគប្បីពន្យល់ថាទានគឺជាវត្ថុដែលមនុស្សបរិច្ចាគដល់ជនក្រីក្រ ) ។
សូមចង្អុលបង្ហាញថា យើងរៀនមកពីកិច្ចការ ៤:២២ថា បុរសពិការ គឺមានវ័យច្រើនជាង ៤០ ឆ្នាំហើយ ។
-
ចូរពិចារណាថា បុរសនេះពុំអាចដើររួចអស់ ៤០ ឆ្នាំ តើជើងខ្វិនរបស់គាត់ស្ថិតនៅក្នុងស្ថានភាពបែបណាទៅ ?
សូមអញ្ជើញសិស្សឲ្យពិចារណាថា តើគេនឹងមានអារម្មណ៍យ៉ាងណាដែលស្ថិតនៅក្នុងស្ថានភាពបុរសខ្វិននោះ ។
-
តើរបៀបជាក់លាក់មួយចំនួនអ្វីខ្លះ ដែលមនុស្សអាចឆ្លើយតបចំពោះមនុស្សម្នាក់នៅក្នុងស្ថានភាពដូចបុរសនេះ ?
សូមអញ្ជើញឲ្យសិស្សម្នាក់អាន កិច្ចការ ៣:៤-៧ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលរបៀបដែលពេត្រុសបានធ្វើដល់បុរសម្នាក់នេះ ។
-
តើពេត្រុសបានធ្វើអ្វីសម្រាប់បុរសម្នាក់នេះ ?
-
តើអ្វីខ្លះដែលបានលេចធ្លោចំពោះអ្នកអំពីសកម្មភាព និងពាក្យសម្ដីរបស់ពេត្រុស ?
សូមអញ្ជើញសិស្សម្នាក់អានកិច្ចការ ៣:៨ឮៗ ហើយសូមឲ្យសិស្សក្នុងថ្នាក់រកមើលនូវអ្វីដែលបុរសបានធ្វើ បន្ទាប់ពីពេត្រុស « លើកគាត់ឡើង » (ខ ៧) ។
-
តើបុរសនោះបានធ្វើអ្វីខ្លះ បន្ទាប់ពីពេត្រុស « បានលើកគាត់ឡើង » ?
-
តើបុរសនេះបានទទួលពរជ័យតាមរបៀបណា ដែលវាអស្ចារ្យជាងទានដែលគាត់បានសូមតាំងពីដើមនោះ ?
សូមលើកទឹកចិត្តដល់សិស្សឲ្យនឹកគិតអំពីបទពិសោធន៍ដែលពួកគេបានទទួលចម្លើយ ឬពរជ័យមួយមកពីព្រះវរបិតាសួគ៌ ដែលខុសគ្នាពីចម្លើយ ឬពរជ័យដែលពួកគេបានរំពឹងទុកនោះ ។
-
តើសេចក្ដីពិតអ្វីខ្លះ ដែលយើងអាចរៀនមកពីកិច្ចការ ៣:១-៨ដែលអាចជួយយើងនៅពេលយើងពុំទទួលបានចម្លើយ ឬពរជ័យដែលយើងរំពឹងទុក្ខមកពីព្រះវរបិតាសួគ៌ ? ( សិស្សអាចនឹងប្រើពាក្យខុសគ្នា ប៉ុន្តែពួកគេគួរស្គាល់ពីសេចក្ដីពិតខាងក្រោមនេះ ៖ព្រះវរបិតាសួគ៌ប្រហែលនឹងមិនឆ្លើយតប ចំពោះការអធិស្ឋានរបស់យើង តាមវិធីដែលយើងចង់បាន ឬរំពឹងចង់បានពីទ្រង់ឡើយ ប៉ុន្តែចម្លើយរបស់យើងតែងតែសម្រាប់សេចក្ដីល្អបំផុតដល់យើងជានិច្ច ។ ចូរសរសេរសេចក្ដីពិតនេះនៅលើក្ដារខៀន ហើយពិចារណាធ្វើការអញ្ជើញសិស្សឲ្យសរសេរវានៅរឹមគម្ពីររបស់ពួកគេជិតនឹងខ ៦) ។
-
តើព្រះវរបិតាសួគ៌អាចឆ្លើយតបការអធិស្ឋានរបស់យើង ខុសពីរបៀបដែលយើងចង់បាន ឬរំពឹងទុកពីទ្រង់យ៉ាងដូចម្ដេច ? ( ឧទាហរណ៍ ទ្រង់អាចប្រទានកម្លាំងដល់យើងដើម្បីស៊ូទ្រាំការសាកល្បងមួយ ជាជាងដកវាចេញ ឬទ្រង់អាចនឹងប្រទានប្រាជ្ញាដល់យើង ដើម្បីជួយយើងដោះស្រាយបញ្ហាមួយ ជាជាងដោះស្រាយបញ្ហាជំនួសយើង ) ។
ចូរពន្យល់ថា នៅក្នុងដំណើររឿងដែលបានកត់ត្រានៅក្នុងកិច្ចការ ៣:១-៨វាបង្ហាញជាក់ស្ដែងថា អ្វីដែលបុរសនេះបានទទួលគឺអស្ចារ្យជាងអ្វីដែលគាត់បានសុំទាន ។ ទោះជាយ៉ាងណាក៏ដោយ នៅក្នុងករណីផ្សេងទៀត វាអាចនឹងមិនច្បាស់ថា អ្វីដែលយើងកំពុងទទួលបានគឺអស្ចារ្យជាងអ្វីដែលយើងសុំនោះទេ ។
-
តើការចងចាំសេចក្ដីពិតដែលបានសរសេរនៅលើក្ដារខៀនអាចជួយយើង នៅពេលយើងទទួលចម្លើយចំពោះការអធិស្ឋានមួយ ដែលខុសពីចម្លើយដែលយើងរំពឹងទុកបានយ៉ាងដូចម្ដេច ?
សូមអញ្ជើញសិស្សឲ្យពិចារណាអំពីបទពិសោធន៍ ដែលចម្លើយរបស់ព្រះអម្ចាស់ចំពោះការអធិស្ឋានរបស់ពួកគេខុសគ្នាពីចម្លើយដែលពួកគេចង់បាន ប៉ុន្តែត្រឡប់ទៅជាសម្រាប់សេចក្ដីល្អកាន់តែប្រសើររបស់គេវិញ ។ សូមឲ្យសិស្សពីរបីនាក់ចែកចាយបទពិសោធន៍របស់ពួកគេ ។ អ្នកក៏អាចចែកចាយពីបទពិសោធន៍ផ្ទាល់ខ្លួនដែរ ។
សូមអញ្ជើញឲ្យសិស្សម្នាក់អាន កិច្ចការ ៣:៩-១១ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលរបៀប ដែលមនុស្សបានមានប្រតិកម្មចំពោះការព្យាបាលបុរសនេះ ។
-
តើប្រជាជនបានមានប្រតិកម្មចំពោះការព្យាបាលបុរសនេះយ៉ាងដូចម្ដេច ?
កិច្ចការ ៣:១២-២៦
ពេត្រុសថ្លែងទីបន្ទាល់អំពីព្រះយេស៊ូវគ្រីស្ទ ហើយផ្សាយពីការប្រែចិត្ត
សូមអញ្ជើញសិស្សក្នុងថ្នាក់ឲ្យនឹកស្រមៃថា ពួកគេស្ថិតនៅក្នុងចំណោមមនុស្សនៅព្រះវិហារបរិសុទ្ធ ដែលបានធ្វើជាសាក្សីអំពីការព្យាបាលបុរសខ្វិននោះ ។ សូមចង្អុលបង្ហាញថា មនុស្សទាំងនេះបានឃើញបុរសខ្វិននេះសូមទានជាញឹកញាប់ នៅពេលពួកគេបានចូលតាមឯក្លោងទ្វារព្រះវិហារបរិសុទ្ធ ប៉ុន្តែបន្ទាប់ពីគាត់ត្រូវបានព្យាបាល នោះពួកគេបានឃើញគាត់លោត ហើយដើរ ។
-
ប្រសិនបើអ្នកស្ថិតនៅក្នុងចំណោមមនុស្សនៅព្រះវិហារបរិសុទ្ធ តើអ្នកគិតថា ទស្សនៈរបស់អ្នកអំពីពេត្រុស និងយ៉ូហាន ប្រហែលជាអាចផ្លាស់ប្ដូរយ៉ាងដូចម្ដេច បន្ទាប់ពីបានឃើញអព្ភូតហេតុនេះ ?
សូមបំបែកសិស្សជាគូ ។ សូមអញ្ជើញដៃគូនីមួយៗឲ្យអានកិច្ចការ ៣:១២-១៦ឮៗជាមួយគ្នា ហើយស្វែងរករបៀប ដែលពេត្រុសបានពន្យល់អំពីការព្យាបាលបុរសខ្វិនចំពោះហ្វូងមនុស្ស ។ បន្ទាប់ពីទុកពេលគ្រប់គ្រាន់ហើយនោះ សូមសួរ ៖
-
តើពេត្រុសបានយកការសរសើរដាក់ខ្លួនឯង ចំពោះការព្យាបាលបុរសនោះឬទេ ?
-
តើពេត្រុសនិយាយថា បុរសនេះត្រូវបានព្យាបាលដោយអំណាចអ្វី ? ( បន្ទាប់ពីសិស្សបានឆ្លើយ សូមសរសេរសេចក្ដីពិតខាងក្រោមនៅលើក្ដារខៀន ៖ពួកអ្នកបម្រើរបស់ព្រះយេស៊ូវគ្រីស្ទ អាចធ្វើអព្ភូតហេតុតាមរយៈសេចក្ដីជំនឿទៅលើព្រះនាមរបស់ទ្រង់ )។
ចូរពន្យល់ថា ពេត្រុសបានប្រើស្ថានភាពនេះ ដើម្បីបង្រៀនមនុស្សអំពីព្រះយេស៊ូវគ្រីស្ទ ដែលត្រូវបានកាត់ទោសដល់សុគត ដោយរាស្ត្ររបស់ទ្រង់ក្នុងពេលថ្មីៗនោះ ប៉ុន្តែបានយកឈ្នះលើសេចក្ដីស្លាប់តាមរយៈការរស់ឡើងវិញរបស់ទ្រង់ ។
សូមអញ្ជើញសិស្សម្នាក់ឲ្យអានកិច្ចការ ៣:១៧-២១ឮៗ រួមទាំងការផ្លាស់ប្ដូរក្នុងការបកប្រែដោយ យ៉ូសែប ស្ម៊ីធ ចំពោះ ខទី ១៧ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលការអញ្ជើញរបស់ពេត្រុសដល់ប្រជាជន ។
-
តើពេត្រុសអញ្ជើញមនុស្សឲ្យធ្វើអ្វីខ្លះ ?
ដើម្បីជួយសិស្សយល់អំពីសារលិខិតរបស់ពេត្រុស សូមចង្អុលបង្ហាញថា ពេត្រុស កំពុងនិយាយទៅកាន់ប្រជាជន ដែលត្រូវបានស្រែក ឬយល់ព្រមចំពោះ ការឆ្កាងព្រះយេស៊ូវគ្រីស្ទ ( សូមមើលកិច្ចការ ៣:១៤-១៥) ។ ចូរអញ្ជើញសិស្សម្នាក់ឲ្យអានសេចក្ដីថ្លែងការណ៍ដូចខាងក្រោមដោយព្យាការី យ៉ូសែប ស៊្មីធ ៖
« [ ពេត្រុស ] ពុំបាននិយាយទៅពួកគេ ‹ ប្រែចិត្ត ហើយទទួលបុណ្យជ្រមុជទឹក សម្រាប់ការផ្ដាច់បាបរបស់អ្នកទេ › ប៉ុន្តែគាត់បាននិយាយថា ‹ ចូរប្រែចិត្ត ហើយវិលមកចុះ ដើម្បីឲ្យបាបរបស់អ្នករាល់គ្នាបានលុបចេញ ប្រយោជន៍ឲ្យមានពេលលំហើយ មកពីចំពោះព្រះអម្ចាស់ › ។ [កិច្ចការ ៣:១៩] ។
« … ពួកគេពុំអាចត្រូវបានទទួលបុណ្យជ្រមុជទឹក សម្រាប់ការផ្ដាច់បាបបានទេ ដ្បិតពួកគេបានបង្ហូរឈាមជនឥតទោស » ( នៅក្នុងHistory of the Church៦:២៥៣ ) ។
ចូរចង្អុលបង្ហាញឃ្លា « ប្រយោជន៍ឲ្យមានពេលលំហើយ មកពីចំពោះព្រះអម្ចាស់ ហើយឲ្យទ្រង់បានចាត់ព្រះយេស៊ូវគ្រីស្ទ » (ខទី ១៩-២០) ។
-
តើអ្នកគិតថា ឃ្លានេះសំដៅទៅលើអ្វី ?
សូមអញ្ជើញឲ្យសិស្សម្នាក់អានឮៗពីសេចក្ដីថ្លែងការណ៍ខាងក្រោមនេះដោយអែលឌើរ ប្រ៊ូស អ័រ ម៉ាក់ខន់ឃី នៃកូរ៉ុមនៃពួកសាវកដប់ពីរនាក់ ៖
« នៅក្នុងគ្រាដែលកំណត់នេះ ពេលលំហើយនេះ គឺនឹងកើតឡើងនៅការយាងមកជាលើកទីពីររបស់កូនមនុស្ស នៅក្នុងថ្ងៃដែលព្រះអម្ចាស់បានបញ្ជូនព្រះគ្រីស្ទមកកាន់ផែនដីម្ដងទៀត ។
« … វាគឺជាថ្ងៃដែល ‹ ផែនដីនឹងបានផ្លាស់ប្តូរសារជាថ្មី ហើយនឹងទទួលសិរីល្អដ៏ប្រកបដោយភាពបរមសុខ › ។ (មាត្រានៃសេចក្ដីជំនឿទីដប់) ។ វាគឺជាថ្ងៃនៃ ‹ ផែនដីថ្មី › ដែលអេសាយបានមើលឃើញ (អេសាយ ៦៥:១៧) ផែនដីនឹងមានជ័យជំនះ នៅពេលសេចក្តីទុច្ចរិតបញ្ឈប់ នៅពេលដែលសម័យសហសវត្សរ៍បានចូលមកដល់ » ( នៅក្នុង Conference Report, ខែ តុលា ឆ្នាំ ១៩៦៧ ទំព័រ ៤៣ ) ។
ចូរដាក់បង្ហាញរូបភាពការយាងមកជាលើកទីពីរនៅលើក្ដារខៀន (Gospel Art Book [ ឆ្នាំ ២០០៩ ] ទំព័រ ៦៦, សូមមើលផងដែរLDS.org) ។ សូមដាក់ស្លាកវាដោយការសរសេរពេលលំហើយនៅលើក្ដារខៀនជិតនឹងរូបភាពនោះ ។
-
តើផែនដីនឹងជាពេលលំហើយក្នុងការយាងមកជាលើកទីពីររបស់ព្រះយេស៊ូវគ្រីស្ទយ៉ាងដូចម្ដេច ? ( វានឹងបោសសម្អាតសេចក្ដីទុច្ចរិត ) ។
សូមចង្អុលបង្ហាញឃ្លា « គ្រាតាំងរបស់ទាំងអស់ឡើងវិញ » (ខទី ២១) ។
-
តើអ្នកគិតថា « គ្រាតាំងរបស់ទាំងអស់ឡើងវិញ » សំដៅទៅលើអ្វី ? ( អ្នកគប្បីចង្អុលបង្ហាញថាកិច្ចការ ៣:២១ដើម្បីជួយសិស្សឲ្យយល់ថា រឿងនេះសំដៅទៅលើការស្ដារឡើងវិញនៃដំណឹងល្អនៅក្នុងថ្ងៃចុងក្រោយ ។ ព្រះយេស៊ូវគ្រីស្ទ នឹងបន្ដគង់នៅស្ថានសួគ៌អំឡុងគ្រានៃការក្បត់សាសនា ដែលនឹងមក ប៉ុន្តែទ្រង់នឹងយាងត្រឡប់មកកាន់ផែនដីវិញ ដើម្បីនាំមកនូវការស្ដារឡើងវិញនៃគ្រប់របស់ទាំងអស់ដែលទាក់ទងនឹងដំណឹងល្អ ។ អ្នកគប្បីចង្អុលបង្ហាញថា ពេត្រុសបានប្រើឃ្លា « គ្រាតាំងរបស់ទាំងអស់ឡើងវិញ » ដើម្បីពិពណ៌នាអំពីឧទាហរណ៍នានា ពេលព្រះយេស៊ូវគ្រីស្ទនឹងយាងមកផែនដីមុនការយាងមកជាលើកទីពីររបស់ទ្រង់ ។
-
តើព្រះយេស៊ូវគ្រីស្ទបានយាងមកផែនដីនៅពេលណា ដែលជាផ្នែកនៃការស្ដារឡើងវិញនូវដំណឹងល្អនៅថ្ងៃចុងក្រោយ ? ( សិស្សអាចនឹងប្រាប់អំពីការយាងមករបស់ព្រះអង្គសង្គ្រោះ នៅក្នុងការនិមិត្តទីមួយរបស់ យ៉ូសែប ស្ម៊ីធ [ សូមមើលយ៉ូសែប ស្ម៊ីធ—ប្រវត្តិ ១:១៧] និងនៅព្រះវិហារបរិសុទ្ធខឺតឡង់ [ សូមមើលគ. និង ស. ១១០:២-៥]) ។
ចូរដាក់បង្ហាញរូបភាពការនិមិត្តដំបូងនៅលើក្ដារខៀន (Gospel Art Book ទំព័រ ៩០, សូមមើលផងដែរLDS.org) ។ សូមដាក់ស្លាកវាដោយការសរសេរគ្រាតាំងរបស់ទាំងអស់ឡើងវិញនៅលើក្ដារខៀនជិតនឹងរូបភាពនោះ ។
-
យោងតាមខទី ២១តើនរណាបាននិយាយបន្ថែមពីលើការនិយាយរបស់ពេត្រុស អំពីការស្ដារឡើងវិញនូវដំណឹងល្អនាថ្ងៃចុងក្រោយ ? ( ដោយការប្រើពាក្យផ្ទាល់របស់ពួកគេ សិស្សគួរតែប្រាប់នូវគោលលទ្ធិដូចខាងក្រោម ៖ពួកព្យាការីនៅគ្រប់សម័យកាលទាំងអស់ បានប្រាប់ទុកជាមុនពីការស្តារឡើងវិញ នៃដំណឹងល្អ ) ។
សូមសង្ខេបកិច្ចការ ៣:២២-២៦ដោយការពន្យល់ថា ពេត្រុសបានថ្លែងទីបន្ទាល់ថា ម៉ូសេ « អស់ទាំងហោរា ចាប់តាំងពីលោកសាំយូអែល គឺអស់អ្នកដែលបានទាយតមក » (ខទី ២៤) បានប្រាប់អំពីព្រះយេស៊ូវគ្រីស្ទ ហើយបានព្រមានអំពីផលវិបាកនៃការបដិសេធទ្រង់ (ខទី ២៣) ។
អ្នកគប្បីបញ្ចប់ដោយការចែកចាយទីបន្ទាល់របស់អ្នកថា ព្រះយេស៊ូវគ្រីស្ទ បានយាងមកផែនដីជាផ្នែកនៃការស្ដារឡើងវិញនៃដំណឹងល្អនៅថ្ងៃចុងក្រោយ ហើយថាទ្រង់នឹងយាងត្រឡប់មកវិញ នៅការយាងមកជាលើកទីពីររបស់ទ្រង់ដើម្បីសម្អាតសេចក្ដីទុច្ចរិតពីផែនដី ។
ចំណេះចំណានខគម្ពីរ—កិច្ចការ ៣:១៩-២១
ដើម្បីជួយសិស្សយល់អំពីរបៀបដើម្បីប្រើកិច្ចការ ៣:១៩-២១នៅក្នុងការផ្សព្វផ្សាយសាសនា សូមបង្ហាញពីស្ថានភាពដូចខាងក្រោម ៖ ហើយអ្នករៀនថ្មីបានសួរថា « តើនៅកន្លែងណាក្នុងព្រះគម្ពីរប៊ីប ស្តីពីដំណឹងល្អនឹងត្រូវបានស្ដារឡើងវិញនៅថ្ងៃចុងក្រោយ ? »
សូមឲ្យសិស្សធ្វើការជាដៃគូ ។ ចូរសុំឲ្យដៃគូនីមួយៗរៀបចំចម្លើយមួយចំពោះសំណួរនេះ ដោយប្រើកិច្ចការ ៣:៩-២១និងយ៉ាងហោចណាស់វគ្គបទគម្ពីរប៊ីបមួយទៀត ។ អ្នកអាចលើកទឹកចិត្តពួកគេឲ្យមើលនៅត្រង់« ការស្ដារឡើងវិញនៃដំណឹងល្អ »នៅក្នុង Topical Guide ។
បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញសិស្សម្នាក់ឲ្យដើរតួជាអ្នករៀនថ្មី ហើយម្នាក់ទៀតដើរតួជាអ្នកផ្សព្វផ្សាយសាសនានៅខាងមុខសិស្សក្នុងថ្នាក់ ។ ចូរសុំឲ្យដៃគូដើរតួជាអ្នកផ្សព្វផ្សាយសាសនា ដើម្បីចែកចាយចម្លើយដែលបានរៀបចំរបស់ពួកគេជាមួយនឹងសិស្ស ដែលកំពុងដើរតួជាអ្នករៀនថ្មី ។