អេភេសូរ ២–ភីលីព ៤ ( មេរៀនទី ២៥ )

ការរៀបចំសម្ភារសម្រាប់គ្រូបង្រៀនដល់សិស្សដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

សេចក្ដីសង្ខេបខាងក្រោមអំពីព្រឹត្តិការណ៍ គោលលទ្ធិ និងគោលការណ៍ទាំងឡាយដែលសិស្សរបស់អ្នកបានរៀន ខណៈពេលពួកគេបានសិក្សា អេភេសូរ ២–ភីលីព ៤ ( មេរៀនទី ២៥ ) ពុំត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀនផ្ដោតលើគោលលទ្ធិ និង គោលការណ៍តែពីរបីនេះប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតពីតម្រូវការរបស់សិស្ស ។

ថ្ងៃទី ១ ( អេភេសូរ ២-៣ )

សាវកប៉ុលបានបន្តសុន្ទរកថារបស់លោកទៅកាន់សមាជិកសាសនាចក្រនៅអេភេសូរ ដោយបង្រៀនពួកគេថា ដោយសារតែព្រះគុណរបស់ព្រះយេស៊ូវគ្រីស្ទ ទើបមនុស្សលោកទាំងអស់អាចបានសេចក្ដីសង្គ្រោះតាមរយៈសេចក្ដីជំនឿលើទ្រង់ ហើយថាកាលយើងមករកព្រះយេស៊ូវគ្រីស្ទ ហើយទទួលយកព្រះគុណរបស់ទ្រង់ នោះយើងបានមករួបរួមនឹងពួកបរិសុទ្ធនៃព្រះ ។ ប៉ុលក៏បានបង្រៀនផងដែរថា សាសនាចក្ររបស់ព្រះអម្ចាស់បានចាក់គ្រឹះនៅលើពួកសាវក និងពួកព្យាការីទាំងឡាយ ដោយមានព្រះយេស៊ូវគ្រីស្ទជាថ្មជ្រុងយ៉ាងឯក ហើយថាពួកសាវក និងពួកព្យាការីខិតខំជួយកូនចៅទាំងអស់របស់ព្រះឲ្យស្គាល់ ហើយទទួលអារម្មណ៍សេចក្ដីស្រឡាញ់ពីព្រះយេស៊ូវគ្រីស្ទ ។

ថ្ងៃទី ២ ( អេភេសូរ ៤-៦ )

តាមរយៈការបង្រៀនជាបន្តបន្ទាប់របស់ប៉ុលស្ដីពីការរៀបចំសាសនាចក្រ នោះសិស្សបានរៀនថា ព្រះអម្ចាស់បានហៅពួកសាវក ពួកព្យាការី និងថ្នាក់ដឹកនាំសាសនាចក្រផ្សេងទៀតដើម្បីជួយធ្វើឲ្យពួកបរិសុទ្ធបានល្អឥតខ្ចោះ ហើយការពារពួកគេពីគោលលទ្ធិខុសឆ្គង ។ ប៉ុលក៏បានបង្រៀនដល់ពួកបរិសុទ្ធផងដែរថា ពួកសិស្សរបស់ព្រះយេស៊ូវគ្រីស្ទត្រូវលះបង់ផ្លូវចាស់ដ៏ខុសឆ្គងរបស់ខ្លួន ហើយដើរតាមផ្លូវថ្មីសុចរិតវិញ ។

ថ្ងៃទី ៣ ( ភីលីព ១-៣ )

នៅក្នុងសំបុត្ររបស់ប៉ុលដល់ពួកបរិសុទ្ធនៅភីលីព ពួកសិស្សបានរៀនថា រឿងផ្ទុយដែលយើងជួបនៅក្នុងការដើរតាមព្រះយេស៊ូវគ្រីស្ទអាចជួយដល់កិច្ចការរបស់ទ្រង់បន្ថែមទៀត ហើយថាប្រសិនបើយើងធ្វើតាមគំរូនៃការបន្ទាបខ្លួន និងការខ្វល់ខ្វាយចំពោះអ្នកដទៃរបស់ព្រះយេស៊ូវគ្រីស្ទ នោះយើងអាចមានសាមគ្គីភាពកាន់តែខ្លាំងឡើង ។ ប៉ុលក៏បានបង្រៀនផងដែរថា ព្រះជួយយើងឲ្យមានបំណងប្រាថ្នាធ្វើអ្វីដែលយើងត្រូវធ្វើដើម្បីទទួលបានសេចក្ដីសង្គ្រោះ ដែលអាចកើតមានឡើងតាមរយៈដង្វាយធួនរបស់ព្រះយេស៊ូវគ្រីស្ទ ហើយប្រសិនបើយើងលះបង់អ្វីៗទាំងអស់ដែលចាំបាច់ដើម្បីដើរតាមព្រះយេស៊ូវគ្រីស្ទ ហើយដើរឆ្ពោះទៅមុខដោយសេចក្ដីជំនឿ នោះយើងអាចមកស្គាល់ទ្រង់ ហើយទទួលបានជីវិតដ៏នៅអស់កល្បជានិច្ច ។

ថ្ងៃទី ៤ ( ភីលីព ៤ )

នៅពេលពួកគេបន្តការសិក្សារបស់ពួកគេអំពីសំបុត្ររបស់ប៉ុលទៅកាន់ពួកបរិសុទ្ធនៅក្រុងភីលីព សិស្សបានរកឃើញថា ក្នុងនាមជាពួកអ្នកដើរតាមដ៏ស្មោះត្រង់របស់ព្រះយេស៊ូវគ្រីស្ទ ប្រសិនបើយើងអធិស្ឋានដោយពាក្យទូលសូមអង្វរ និងការថ្លែងអំណរគុណ នោះព្រះនឹងប្រទានពរជាសេចក្ដីសុខសាន្តដល់យើង ហើយប្រសិនបើពួកបរិសុទ្ធថ្ងៃចុងក្រោយដ៏ស្មោះត្រង់ផ្ដោតលើគំនិតរបស់ពួកគេពីអ្វីក៏ដោយដែលជារឿងសុចរិត ហើយប្រសិនបើពួកគេដើរតាមពួកសាវក និងពួកព្យាការីទាំងឡាយ នោះព្រះនៃសេចក្ដីសុខសាន្តនឹងគង់នៅជាមួយនឹងពួកគេ ។ ប៉ុលបានបញ្ចប់សំបុត្ររបស់លោកដោយបង្រៀនថា យើងអាចធ្វើនូវអ្វីៗគ្រប់យ៉ាងតាមរយៈព្រះយេស៊ូវគ្រីស្ទ ជាអង្គដែលប្រទានកម្លាំងដល់យើង ។

សេចក្តីផ្ដើម

បន្ទាប់ពីបង្រៀនពួកបរិសុទ្ធនៅអេភេសូរថា ពួកគេគួរលះបង់ផ្លូវចាស់របស់ពួកគេចោល ហើយធ្វើជាមនុស្សថ្មី ជាអ្នកដើរតាមព្រះយេស៊ូវគ្រីស្ទ នោះសាវកប៉ុលបានបង្រៀនពួកគេថា ពួកគេក៏គួរពាក់គ្រឿងសឹកទាំងមូលនៃព្រះផងដែរ ។

យោបល់សម្រាប់ការបង្រៀន

អេភេសូរ ៦:១០-២៤

ប៉ុលបានទូន្មានឲ្យពួកបរិសុទ្ធពាក់ « គ្រប់គ្រឿងសឹករបស់ព្រះ »

សូមសរសេរនៅលើក្ដារខៀននូវសេចក្ដីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ។ ( សេចក្ដីថ្លែងការណ៍នេះ មាននៅក្នុង« The Power of the Word »Ensignខែ ឧសភា ឆ្នាំ ១៩៨៦ ទំព័រ ៧៩ ) ។ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍នេះឲ្យឮៗ ។

« សាតាំងកំពុងបង្កសង្គ្រាមទាស់នឹងសមាជិកសាសនាចក្រ ដែលមានទីបន្ទាល់ ហើយដែលកំពុងព្យាយាមគោរពតាមព្រះបញ្ញត្តិទាំងឡាយ » ( ប្រធាន អ៊ែសរ៉ា ថាហ្វ ប៊ែនសឹន ) ។

តើសាតាំងបង្កសង្គ្រាមទាស់នឹងយុវវ័យរបស់សាសនាចក្រតាមរបៀបណា ?

សូមប្រាប់ឲ្យសិស្សម្នាក់អាន អេភេសូរ ៦:១០-១៣ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលថា ប៉ុលបាននិយាយថាពួកបរិសុទ្ធនៅក្នុងជំនាន់របស់លោកកំពុងច្បាំងទាស់នឹងអ្វី ។ សូមពន្យល់ថា ឧបាយកល សំដៅទៅលើល្បិច ឬកលដែលប្រើដើម្បីបោកបញ្ឆោត ឬដាក់អន្ទាក់ ។

តើប៉ុលបាននិយាយថា ពួកបរិសុទ្ធនៅក្នុងជំនាន់របស់លោកកំពុងច្បាំងទាស់នឹងអ្វី ?
តើអ្វីដែលប៉ុលបានរៀបរាប់នៅក្នុង ខទី ១២ ដូចគ្នានឹងអ្វីដែលយើងកំពុងច្បាំងទាស់ក្នុងជំនាន់របស់យើងយ៉ាងដូចម្ដេចដែរ ?
តើប៉ុលបានប្រាប់ដល់ពួកបរិសុទ្ធនៅជំនាន់លោកឲ្យពាក់អ្វី ដើម្បីពួកគេអាចទប់ទល់នឹងអំពើអាក្រក់ទាំងនេះ ? ( បន្ទាប់ពីសិស្សឆ្លើយហើយ សូមសរសេរគោលការណ៍ខាងក្រោមនេះនៅលើក្ដារខៀន ៖ ប្រសិនបើយើងពាក់គ្រប់ទាំងគ្រឿងសឹករបស់ព្រះ យើងនឹងអាចទប់ទល់នឹងអំពើអាក្រក់បាន ) ។

រូបភាព

handout, armor of God

ពាក់គ្រប់គ្រឿងសឹករបស់ព្រះ

ព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា—មេរៀនសិក្សានៅផ្ទះ ( មេរៀនទី ២៥ )

រូបភាព

diagram, armor of God

ចូរ ឯកសារចែកចាយដែលភ្ជាប់មកជាមួយដល់សិស្ស ។ សូមបំបែកសិស្សក្នុងថ្នាក់ជាប្រាំក្រុម ហើយចាត់តាំងក្រុមនីមួយៗនូវចំណែកមួយនៃអាវក្រោះដែលបានរៀបរាប់ក្នុង អេភេសូរ ៦:១៤–១៧ ។ ( សូមកុំចាត់តាំងកិច្ចការ « ដោយក្រវាត់សេចក្តីពិតនៅចង្កេះ » [ ខទី ១៤ ] ឲ្យធ្វើឡើយ ។ ប្រសិនបើចំនួនសិស្សរបស់អ្នកតិច អ្នកគួរឲ្យបំបែកគ្រឿងសឹកលើសពីមួយដល់ក្រុមមួយចំនួន ) ។

សូមសរសេរសំណួរខាងក្រោមនេះនៅលើ ក្តារខៀន ៖

តើបំណែកគ្រឿងសឹកនេះប្រើសម្រាប់អ្វី ?
តើប៉ុលបានហៅបំបែកគ្រឿងសឹកនេះថាជាអ្វី ?
តើផ្នែកណាមួយនៃរូបកាយដែលអាចត្រូវបានការពារដោយគ្រឿងសឹក ដែលតំណាងឲ្យខាងវិញ្ញាណយ៉ាងណា ?
តើការពាក់បំណែកនៃគ្រឿងសឹកខាងវិញ្ញាណនេះអាចជួយអ្នកឲ្យទប់ទល់នឹងអំពើអាក្រក់បានយ៉ាងដូចម្ដេច ?

ដើម្បីបង្ហាញសិស្សពីរបៀបបំពេញឯកសារ សូមអញ្ជើញសិស្សម្នាក់អាន អេភេសូរ ៦:១៤ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលចម្លើយទៅនឹងសំណួរនៅលើក្ដារខៀន នៅពេលពួកគេអនុវត្ត « ដោយក្រវាត់សេចក្តីពិតនៅចង្កេះ » រួចសរសេរចម្លើយនៅលើក្រដាសឯកសាររបស់ពួកគេ ។

សូមពន្យល់ថា គ្រឿងសឹកដែល « ក្រវាត់ » នឹងចង្កេះគឺជាខ្សែក្រវ៉ាត់ដែលរុំផ្នែកកណ្ដាលនៃរាងកាយ ។ បន្ទាប់មក សូមឲ្យសិស្សបីបួននាក់ប្រាប់ចម្លើយរបស់ពួកគេដល់មិត្តរួមថ្នាក់ ។ សិស្សអាចប្រាប់ចម្លើយស្រដៀងគ្នានឹងឃ្លាខាងក្រោម ៖ (១) វាប្រើដើម្បីបិទបាំងចង្កេះ ( សរីរាង្គដ៏សំខាន់សម្រាប់បង្កើតកូន ) ។ (២) ប៉ុលបានហៅវាថាជា « សេចក្តីពិត » ។ (៣) វាតំណាងឲ្យព្រហ្មចារីភាព ឬបរិសុទ្ធភាពខាងសីលធម៌របស់យើង ។ (៤) ការដឹងពីសេចក្ដីពិតពេញលេញនៃផែនការនៃសេចក្ដីសង្គ្រោះអាចការពារយើងពីការបោកបញ្ឆោត ហើយជួយយើងឲ្យបន្តមានភាពបរិសុទ្ធខាងសីលធម៌ ។

សូមអញ្ជើញសិស្សឲ្យធ្វើតាមគន្លងនេះ នៅពេលពួកគេអាន អេភេសូរ ៦:១៤–១៨ ជាមួយក្រុមរបស់ខ្លួន ហើយបំពេញផ្នែកនៃឯកសារ ដែលភ្ជាប់មកជាមួយនឹងបំណែកគ្រឿងសឹកដែលពួកគេបានចាត់ឲ្យ ។ ( សូមពន្យល់ថា ការពាក់ « ទុកជាស្បែកជើង » [ ខទី ១៥ ] មានន័យថា ការពាក់ស្បែកជើង ឬគ្រឿងការពារជើងផ្សេងទៀត ) ។

បន្ទាប់ពីផ្ដល់ពេលគ្រប់គ្រាន់ហើយ ចូរអញ្ជើញអ្នកតំណាងម្នាក់មកពីក្រុមនីមួយៗឲ្យប្រាប់អំពីអ្វីដែលពួកគេបានរៀនទៅដល់សិស្សក្នុងថ្នាក់ ។ នៅពេលក្រុមនីមួយៗប្រាប់ពីអ្វីដែលពួកគេបានរៀនហើយ សូមអញ្ជើញសិស្សឲ្យកត់ត្រាការរកឃើញរបស់ក្រុមនោះនៅក្នុងឯកសាររបស់ពួកគេ ។

ហេតុអ្វីការការពារខ្លួនយើងដោយពាក់ គ្រប់ ទាំងគ្រឿងសឹករបស់ព្រះ វាគឺជារឿងដ៏សំខាន់ ?

សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយអែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ឲ្យឮៗ ។ ចូរសុំឲ្យសិស្សស្ដាប់មើលពីរបៀបដែលយើងពាក់ ហើយពង្រឹងគ្រឿងសឹករបស់ព្រះ ។

រូបភាព
អែលឌើរ អិម រ័សុល បាឡឺដ

« តើយើងពាក់គ្រប់ទាំងគ្រឿងសឹករបស់ព្រះដោយរបៀបណា ដើម្បីឲ្យយើងអាច ‹ ទប់ទល់ក្នុងថ្ងៃអាក្រក់បាន › ដូចដែលប៉ុលបានសន្យា ?

« ខ្ញុំចូលចិត្តគិតអំពីគ្រឿងសឹកខាងវិញ្ញាណនេះ ដែលវាពុំដូចជាបំណែកនៃការសូន្យលោហៈធាតុមួយដុំឡើង ដើម្បីពាក់ឲ្យត្រូវនឹងរូបកាយឡើយ ប៉ុន្តែវាដូចជាច្រវ៉ាក់ប្រទាក់គ្នាទៅវិញ ។ ច្រវ៉ាក់ប្រទាក់គ្នា មាននូវចំណែករង្វង់កងដែកតូចល្អិតៗរាប់រយវេញបញ្ចូលគ្នា ដើម្បីអនុញ្ញាតឲ្យអ្នកប្រើអាចបត់បែនបានកាន់តែល្អដោយមិនបាត់នូវការការពារ ។ ខ្ញុំនិយាយដូច្នោះ ដោយសារវាជាបទពិសោធន៍របស់ខ្ញុំ ថាគ្មានអ្វីដ៏ធំ និងអស្ចារ្យដែលយើងអាចធ្វើ ដើម្បីការពារខ្លួនយើងខាងវិញ្ញាណឡើយ ។ អំណាចខាងវិញ្ញាណពិត ពឹងលើទង្វើតូចតាចជាច្រើនវេញបញ្ចូលគ្នាទៅជាសាច់ក្រណាត់នៃការការពារខាងវិញ្ញាណដែលការពារ និងជាខែលទាស់នឹងសេចក្ដីអាក្រក់គ្រប់បែបយ៉ាង » (« Be Strong in the Lord » Ensign ខែ កក្កដា ឆ្នាំ ២០០៤ ទំព័រ ៨ ) ។

តើអ្នកត្រូវធ្វើអ្វីខ្លះដើម្បីពាក់ ហើយពង្រឹងគ្រឿងសឹករបស់ព្រះជារៀងរាល់ថ្ងៃ ?
តើការណ៍នេះបានជួយអ្នកឲ្យទប់ទល់នឹងអំពើអាក្រក់ ការល្បួង ឬការបោកបញ្ឆោតដោយរបៀបណា ?

សូមសរសេរសំណួរខាងក្រោមនេះនៅលើ ក្តារខៀន ។ សូមអញ្ជើញសិស្សឲ្យឆ្លើយសំណួរទាំងនេះក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ៖

តើគ្រឿងសឹកខាងវិញ្ញាណរបស់អ្នកផ្នែកមួយណា ដែលអ្នកគិតថាមានភាពរឹងមាំ ?

តើគ្រឿងសឹករបស់អ្នកផ្នែកមួយណាដែលខ្សោយបំផុត ?

តើអ្នកអាចធ្វើអ្វីខ្លះដើម្បីពង្រឹងផ្នែកនីមួយៗនៃគ្រឿងសឹកខាងវិញ្ញាណនៅក្នុងជីវិតរបស់អ្នក ?

សូមសង្ខេប អេភេសូរ ៦:១៩–២៤ ដោយពន្យល់ថា ប៉ុលបានបញ្ចប់សំបុត្ររបស់លោក ដោយសុំឲ្យពួកបរិសុទ្ធអធិស្ឋានឲ្យលោកទទួលបាននូវ « ពាក្យសម្ដី » ( ខទី ១៩ ) ហើយអាចប្រកាសដំណឹងល្អដោយភាពក្លាហានកាលកំពុងជាប់ឃុំ ។

សូមចែកចាយទីបន្ទាល់របស់អ្នកអំពីសេចក្ដីពិត ដែលបានបង្ហាញនៅក្នុងមេរៀនថ្ងៃនេះ ហើយលើកទឹកចិត្តសិស្សឲ្យធ្វើតាមការបំផុសគំនិតដែលពួកគេអាចទទួលបាន ។

មេរៀនបន្ទាប់ ( កូល៉ុស–ធីម៉ូថេទី ១ )

សូមអញ្ជើញសិស្សរកមើលចម្លើយចំពោះសំណួរខាងក្រោមនេះ នៅពេលពួកគេបន្តសិក្សាពីការសរសេររបស់ប៉ុលនៅសប្ដាហ៍ក្រោយ ។ តើប៉ុលបាននិយាយអ្វីខ្លះពីការស្រឡាញ់ប្រាក់ ? តើយើងអាចចៀសវាងពីការបោកបញ្ឆោតដោយទម្លាប់ខុសឆ្គង ដោយរបៀបណា ? យោងតាមប៉ុល តើអ្វីទៅដែលត្រូវកើតឡើងពីមុនការយាងមកជាលើកទីពីរ ? តើយើងនឹងដឹងថា វាបានកើតឡើងតាមរបៀបណា ?