មេរៀនទី ២៧ ៖ យ៉ូសែប ស្ម៊ីធ—ម៉ាថាយ, ម៉ាថាយ ២៤

មេរៀនទី ២៧

យ៉ូសែប ស្ម៊ីធ—ម៉ាថាយ, ម៉ាថាយ ២៤

សេចក្ដីផ្ដើម

ព្រះយេស៊ូវគ្រីស្ទបានព្យាករពីការបំផ្លិចបំផ្លាញនៃក្រុងយេរូសាឡិម និងព្រះវិហារបរិសុទ្ធ ។ ទ្រង់បានបើកសម្ដែងទីសម្គាល់ពីការយាងមកជាលើកទីពីររបស់ទ្រង់ ហើយបានបង្គាប់ពួកអ្នកស្មោះត្រង់ឲ្យរង់ចាំមើល ហើយរៀបចំខ្លួនសម្រាប់ថ្ងៃនោះ ។

យោបល់សម្រាប់ការបង្រៀន

ការកែលម្អក្នុងនាមជាគ្រូបង្រៀនម្នាក់

នៅពេលអ្នកមានបំណងចង់ធ្វើឲ្យកិច្ចការបង្រៀនល្អប្រសើរ ហើយខ្ជាប់ខ្ជួនតាមរបៀបដែលគាប់ព្រះទ័យដល់ព្រះវរបិតាសួគ៌ នោះទ្រង់នឹងបំផុសគំនិតអ្នកនៅក្នុងការរៀបចំរបស់អ្នក ពង្រឹងទំនាក់ទំនងរបស់អ្នកជាមួយសិស្ស តម្កើងកិច្ចខិតខំរបស់អ្នក ហើយប្រទានពរដល់អ្នកដោយព្រះវិញ្ញាណរបស់ទ្រង់ ។ ទ្រង់នឹងជួយអ្នកឲ្យមើលឃើញពីរបៀប ដែលអ្នកអាចរីកចម្រើននៅពេលអ្នកព្យាយាមដើម្បីបង្រៀន តាមរបៀបមួយដែលនាំសិស្សឲ្យយល់ និងពឹងផ្អែកទៅលើការបង្រៀន និងដង្វាយធួនរបស់ព្រះយេស៊ូវគ្រីស្ទ ។

យ៉ូសែប ស្ម៊ីធ—ម៉ាថាយ ១:១–២០

ព្រះយេស៊ូវព្យាករពីការបំផ្លិចបំផ្លាញនៃក្រុងយេរូសាឡិម និងព្រះវិហារបរិសុទ្ធ

រូបភាព

ការយាងមកជាលើកទីពីរ

ចូរដាក់បង្ហាញរូបភាព ការយាងមកជាលើកទីពីរ ( Gospel Art Book [ ឆ្នាំ ២០០៩ ] ទំព័រ ៦៦សូមមើលផងដែរ LDS.org ) ។ ចូរសុំឲ្យសិស្សសញ្ជឹងគិតពីសំណួរដែលពួកគេមានអំពីការយាងមកជាលើកទីពីររបស់ព្រះយេស៊ូវគ្រីស្ទ ហើយសរសេរសំណួរទាំងនេះនៅក្នុងសៀវភៅកំណត់ចំណាំក្នុងថ្នាក់របស់ពួកគេ ឬសៀវភៅកំណត់ហេតុការសិក្សាព្រះគម្ពីររបស់ពួកគេ ។ សូមកុំព្យាយាមឆ្លើយសំណួរទាំងនេះនៅពេលនេះឡើយ ។ សូមអញ្ជើញសិស្សឲ្យរកមើលចម្លើយនៅពេលពួកគេសិក្សាយ៉ូសែប ស្ម៊ីធ—ម៉ាថាយ ។

សូមចង្អុលបង្ហាញថាយ៉ូសែប ស្ម៊ីធ—ម៉ាថាយគឺការបកប្រែដោយយ៉ូសែប ស្ម៊ីធ សម្រាប់ ម៉ាថាយ ២៣:៣៩ និងម៉ាថាយ ២៤ ។ សូមសង្ខេបយ៉ូសែប ស្ម៊ីធ—ម៉ាថាយ ១:១–៣ដោយពន្យល់ថាកាលព្រះយេស៊ូវគ្រីស្ទបានបង្រៀននៅក្នុងព្រះវិហារបរិសុទ្ធក្នុងទីក្រុងយេរូសាឡិម ពួកសិស្សរបស់ទ្រង់បានយល់ដឹងថា ទ្រង់នឹងយាងត្រឡប់មកផែនដីម្ដងទៀត ។ បន្ទាប់មកព្រះយេស៊ូវបានយាងចេញពីព្រះវិហារបរិសុទ្ធនោះ ហើយពួកសិស្សរបស់ទ្រង់បានមករកទ្រង់ដោយចង់ដឹងបន្ថែមទៀត អំពីពេលវេលាដែលព្រះវិហារបរិសុទ្ធនឹងត្រូវបានបំផ្លាញចោល ។

សូមអញ្ជើញសិស្សម្នាក់អាន យ៉ូសែប ស្ម៊ីធ —ម៉ាថាយ ១:៤ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលសំណួរពីរដែលពួកសិស្សបានសួរដល់ព្រះយេស៊ូវនៅលើភ្នំអូលីវ ។ សូមអញ្ជើញសិស្សឲ្យប្រាប់ពីអ្វីដែលពួកគេបានរកឃើញ ហើយសរសេរសំណួរដូចខាងក្រោមនេះនៅលើក្ដារខៀន ៖

តើទីក្រុងយេរូសាឡិម និងព្រះវិហារបរិសុទ្ធនឹងត្រូវបំផ្លាញចោលនៅពេលណា ?
តើទីសម្គាល់នៃការយាងមកជាលើកទីពីររបស់ព្រះយេស៊ូវគ្រីស្ទ និងការបំផ្លិចបំផ្លាញជនទុច្ចរិតគឺជាអ្វី ?

សូមពន្យល់ថា ព្រះយេស៊ូវគ្រីស្ទបានលើកឡើងនូវសំណួរទីមួយនៅក្នុង ខទី ៥–២១ហើយសំណួរទីពីរត្រូវបានឆ្លើយនៅក្នុង ខទី ២១–៥៥ ។ សូមបែងចែកសិស្សជាដៃគូៗ ។ សូមណែនាំឲ្យពួកគេអាន យ៉ូសែប ស្ម៊ីធ—ម៉ាថាយ ១:៥–១២ ឲ្យឮៗជាមួយនឹងដៃគូ ដោយរកមើលទីសម្គាល់ដែលទាក់ទងនឹងការបំផ្លិចបំផ្លាញទីក្រុងយេរូសាឡិម និងព្រះវិហារបរិសុទ្ធ ។ សូមឲ្យសិស្សរៀបរាប់ពីអ្វីដែលពួកគេរកឃើញ ។

ទោះជាព្រះយេស៊ូវបានមានបន្ទូលថា ពួកសិស្សរបស់ទ្រង់នឹងត្រូវរងទុក្ខនៅពេលនេះក្ដី តើទ្រង់បានមានបន្ទូលអ្វីខ្លះពីជនដែល « បន្តខ្ជាប់ខ្ជួន ហើយពុះពារ » ? ( ខទី ១១ ) ។
តើគោលការណ៍អ្វីដែលយើងអាចរៀនមកពី ខទី ១១នេះ ? ( សិស្សអាចនឹងប្រើពាក្យខុសៗគ្នា ប៉ុន្តែពួកគេគួរស្គាល់ពីគោលការណ៍ខាងក្រោមនេះ ៖ ប្រសិនបើយើងបន្តខ្ជាប់ខ្ជួន ហើយមិនចុះចាញ់ នោះយើងនឹងត្រូវបានសង្គ្រោះ ។ ដោយប្រើពាក្យរបស់សិស្ស សូមសរសេរគោលការណ៍នេះនៅលើក្ដារខៀន ) ។
តើការខ្ជាប់ខ្ជួន ហើយពុះពារមានន័យដូចម្ដេច ? ( ខ្ជាប់ខ្ជួន គឺការរឹងប៉ឹង មុតមាំ មិនងាករេ ហើយមិនចុះញ៉ម ) ។

ដើម្បីជួយសិស្សឲ្យយល់ពីអត្ថន័យពាក្យ បានសង្គ្រោះ នៅក្នុង ខទី ១១ សូមពន្យល់ថា នៅពេលយើងមានភាពខ្ជាប់ខ្ជួន នោះយើងអាចនឹងមិនត្រូវជួយសង្គ្រោះឲ្យរួចផុតពីការលំបាកទេ ប៉ុន្តែនៅទីបំផុតយើងនឹងបានសង្គ្រោះនៅក្នុងនគរព្រះវិញ ។

សូមអញ្ជើញសិស្សម្នាក់ឲ្យអានកថាខណ្ឌដូចខាងក្រោមឲ្យឮៗ ។ ចូរសុំឲ្យសិស្សក្នុងថ្នាក់ស្ដាប់រកមើលរបៀប ដែលជនបានបន្តខ្ជាប់ខ្ជួននៅក្នុងការគោរពតាមការប្រឹក្សារបស់ព្រះអង្គសង្គ្រោះត្រូវបានសង្គ្រោះឲ្យរួចពីការបំផ្លិចបំផ្លាញ ៖

នៅក្នុង យ៉ូសែប ស្ម៊ីធ—ម៉ាថាយ ១:១៣–១៨ យើងរៀនថា ព្រះយេស៊ូវបានព្រមានពួកសិស្សរបស់ទ្រង់ ឲ្យត្រៀមខ្លួនភៀសខ្លួនឡើងទៅលើភ្នំ ហើយកុំត្រឡប់មកផ្ទះរបស់ពួកគេវិញ ដោយសារទីក្រុងយេរូសាឡិមនឹងមានការវាយប្រហារ ហើយបំផ្លាញចោល ។ ទ្រង់បានព្យាករថា សេចក្តីឈឺចាប់នៃថ្ងៃទាំងនោះគឺអាក្រក់ហួសពីអ្វី ដែលអ៊ីស្រាអែលធ្លាប់ឃើញទៅទៀត ។ នៅគ.ស. ៧០ ប្រមាណជា ៤០ ឆ្នាំក្រោយពីព្រះយេស៊ូវបានមានបន្ទូលពីរឿងទាំងនេះ ពួករ៉ូមបានឡោមព័ទ្ធទីក្រុងយេរូសាឡិម ហើយបានសំឡាប់ពួកយូដាជាងមួយលាននាក់ ។ ព្រះវិហារបរិសុទ្ធនោះត្រូវបានបំផ្លាញចោលសូម្បីតែថ្មមួយដុំត្រួតលើគ្នាក៏គ្មាននៅសេសសល់ដែរ—គឺដូចជាអ្វីដែលព្រះអង្គសង្គ្រោះបានព្យាករ ( សូមមើល ម៉ាថាយ ២៤:២ ) ។ ប៉ុន្តែជនដែលបានស្ដាប់តាមការព្រមានរបស់ព្រះយេស៊ូវ បានរត់គេចដោយសុវត្ថិភាពទៅកាន់ប៉េលឡា ជាក្រុងមួយមានចម្ងាយប្រហែលជា ៨០ គីឡូម៉ែត្រនៅទិសឦសាន្តនៃទីក្រុងយេរូសាឡិម ( សូមមើល Bible Dictionary « Pella » ) ។

តើបទពិសោធន៍របស់ពួកយូដា គួសបង្ហាញពីសារៈសំខាន់នៃការបន្តខ្ជាប់ខ្ជួននៅក្នុងការគោរពតាមព្រះបន្ទូលរបស់ព្រះអង្គសង្គ្រោះយ៉ាងដូចម្ដេច ?
តើពេលណាដែលអ្នកធ្លាប់ទទួលបានពរជ័យដោយការបន្តខ្ជាប់ខ្ជួន នៅក្នុងការគោរពតាមព្រះបញ្ញត្តិ?

សូមសង្ខេប យ៉ូសែប ស្ម៊ីធ--ម៉ាថាយ ១:១៩–២០ ដោយពន្យល់ថា ព្រះយេស៊ូវបានព្យាករថា ទោះបីជាពួកយូដានឹងរងទុក្ខនូវការសាកល្បងដ៏ធំក្ដី ពួកគេនឹងត្រូវបានរក្សាឲ្យគង់វង្សដោយសារសេចក្ដីសញ្ញារបស់ព្រះអម្ចាស់ជាមួយនឹងពួកគេ ។

យ៉ូសែប ស្ម៊ីធ—ម៉ាថាយ ១:២១-៣៧

ព្រះយេស៊ូវព្យាករពីទីសម្គាល់នៃការយាងមកជាលើកទីពីររបស់ទ្រង់

សូមពន្យល់ថា បន្ថែមទៅលើការពន្យល់ពីទីសម្គាល់ដែលនឹងព្រមានពីការបំផ្លាញទីក្រុងយេរូសាឡិម ព្រះអង្គសង្គ្រោះបានមានបន្ទូលឆ្លើយនឹងសំណួរទីពីររបស់ពួកសិស្ស ដោយព្យាករពីទីសម្គាល់ទាក់ទិននឹងការយាងមកជាលើទីពីររបស់ទ្រង់ ។

ចូរសុំសិស្សម្នាក់អានយ៉ូសែប ស្ម៊ីធ—ម៉ាថាយ ១:២១-២៣ឲ្យឮៗ។ សូមអញ្ជើញឲ្យសិស្សក្នុងថ្នាក់ផ្ទៀងតាម រកមើលមូលហេតុដែលព្រះអម្ចាស់បានបើកសម្ដែងទីសម្គាល់នៃការយាងមកជាលើកទីពីររបស់ទ្រង់ ។

ហេតុអ្វីវាមានប្រយោជន៍ដល់ពួកសិស្សរបស់ព្រះយេស៊ូវគ្រីស្ទ ដើម្បីដឹងពីទីសម្គាល់ដែលបង្ហាញពីការយាងមកជាលើកទីពីររបស់ទ្រង់ ?

សូមអញ្ជើញសិស្សម្នាក់អាន យ៉ូសែប ស្ម៊ីធ — ម៉ាថាយ ១:២៤-២៦ ឲ្យឮៗ ។ ចូរសុំឲ្យសិស្សក្នុងថ្នាក់រកមើលរបៀបដែលព្រះអង្គសង្គ្រោះនឹងលេចមកនៅឯការយាងមកជាលើកទីពីររបស់ទ្រង់ ។

តើព្រះអង្គសង្គ្រោះ នឹងលេចមកនៅឯការយាងមកជាលើកទីពីរតាមរបៀបណា ?
តើការដឹងរឿងនេះ អាចជួយអ្នករើសតាំងឲ្យចៀសផុតពីការបោកបញ្ឆោតដោយរបៀបណា ?

សូមអញ្ជើញសិស្សអាន យ៉ូសែប ស្ម៊ីធ—ម៉ាថាយ ១:២៧-៣១ដោយស្ងាត់ស្ងៀម រកមើលទីសម្គាល់ដែលនឹងកើតឡើង ពីមុនការយាងមកជាលើកទីពីរ ។

តើមនុស្សនឹងជួបប្រទះការលំបាកអ្វីខ្លះពីមុនការយាងមកជាលើកទីពីរ ?
ផ្អែកលើ ខទី ២៧ និង ៣១តើទីសម្គាល់សំខាន់ៗអ្វីខ្លះ ដែលនឹងកើតមានពីមុនការយាងមកជាលើកទីពីរ ? ( សិស្សអាចនឹងប្រើពាក្យខុសគ្នា ប៉ុន្តែពួកគេគួរស្គាល់ពីសេចក្ដីពិតខាងក្រោមនេះ ៖ ពីមុនការយាងមកជាលើកទីពីររបស់ព្រះយេស៊ូគ្រីស្ទ អ្នករើសតាំងរបស់ព្រះអម្ចាស់នឹងត្រូវបានប្រមូលផ្ដុំ ហើយដំណឹងល្អនឹងត្រូវប្រកាសទៅកាន់ពិភពលោកទាំងមូល ) ។
តើយើងឃើញការព្យាករនេះត្រូវបានបំពេញដោយរបៀបណា ?

សូមពន្យល់ថា យ៉ូសែប ស្ម៊ីធ—ម៉ាថាយ ១:៣២–៣៦ ពិពណ៌នាពីទីសម្គាល់បន្ថែមទៀតដែលទាក់ទងនឹងការយាងមកជាលើកទីពីរ ។

សូមរំឭកសិស្សពីការព្រមានរបស់ព្រះអង្គសង្គ្រោះថា នៅថ្ងៃចុងក្រោយព្រះគ្រីស្ទក្លែងក្លាយ និងពួកព្យាការីក្លែងក្លាយនឹង « បោកបញ្ឆោតរាល់អ្នករើសតាំង » ( ខទី ២២ ) ។ សូមអញ្ជើញសិស្សម្នាក់អាន យ៉ូសែប ស្ម៊ីធ—ម៉ាថាយ ១:៣៧ ឲ្យឮៗ។ ចូរសុំឲ្យសិស្សក្នុងថ្នាក់ផ្ទៀងតាម រកមើលរបៀបដែលអ្នករើសតាំងអាចចៀសផុតពីការត្រូវបានគេបោកបញ្ឆោត ។

តើអ្នករើសតាំងអាចចៀសផុតពីការបោកបញ្ឆោតតាមរបៀបណា ?
តើគោលការណ៍អ្វីខ្លះ ដែលយើងអាចរៀនមកពីខនេះ ? ( សិស្សអាចនឹងប្រើពាក្យខុសៗគ្នា ប៉ុន្តែពួកគេគួរស្គាល់ពីគោលការណ៍ខាងក្រោមនេះ ៖ ប្រសិនបើយើងសន្សំទុកព្រះបន្ទូលរបស់ព្រះអម្ចាស់ នោះយើងនឹងមិនត្រូវបានបោកបញ្ឆោតឡើយ ។ សូមសរសេរគោលការណ៍នេះនៅលើក្ដារខៀន ) ។

ដើម្បីជួយសិស្សឲ្យយល់ពីគោលការណ៍នេះ សូមអញ្ជើញសិស្សម្នាក់ឲ្យអានដំណើររឿងខាងក្រោម ដែលត្រូវបានចែករំលែកដោយអែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ ៖

រូបភាព
អែលឌើរ អិម រ័សុល បាឡឺដ

« អ្នកផ្សព្វផ្សាយសាសនាដ៏ល្អរបស់ខ្ញុំម្នាក់ដែលបានបម្រើជាមួយខ្ញុំ កាលខ្ញុំជាប្រធានបេសកកម្មនៅតូរ៉ង់តូ [ ប្រទេសកាណាដា ] បានមកជួបខ្ញុំនៅប៉ុន្មានឆ្នាំក្រោយមក ។ ខ្ញុំបានសួរគាត់ថា ‹ អែលឌើរ តើអ្នកមានអ្វីដែលខ្ញុំអាចជួយបាន ? ›

« គាត់បានពោលថា ‹ ប្រធាន ខ្ញុំគិតថាខ្ញុំបានបាត់បង់ទីបន្ទាល់របស់ខ្ញុំហើយ › ។

« ខ្ញុំមិនអាចជឿទេ ។ ខ្ញុំបានសួរគាត់ថា រឿងនេះអាចកើតឡើងយ៉ាងដូចម្ដេចបាន ។

« គាត់បានពោលថា ‹ ខ្ញុំបានអានសៀវភៅមួយចំនួនដែលប្រឆាំងនឹងពួកមរមន › ។ ‹ ខ្ញុំមានសំណួរមួយចំនួន ហើយគ្មាននរណាម្នាក់ឆ្លើយនឹងសំណួរទាំងនោះឡើយ ។ ខ្ញុំមានអារម្មណ៍ច្របូកច្របល់ ហើយខ្ញុំគិតថាខ្ញុំកំពុងបាត់បង់ទីបន្ទាល់របស់ខ្ញុំហើយ › » ( « When Shall These Things Be? » Ensign ខែ ធ្នូ ឆ្នាំ ១៩៩៦ ទំព័រ ៦០ ) ។

ចូរសុំឲ្យសិស្សសញ្ជឹងគិតថាតើពួកគេ ឬមនុស្សដែលពួកគេស្គាល់ធ្លាប់ជួបប្រទះរឿងស្រដៀងគ្នាទៅនឹងអ្វីដែលអតីតអ្នកផ្សព្វផ្សាយសាសនាម្នាក់នេះបានជួបដែរឬទេ ។

តើការប្រឹក្សាអ្វីខ្លះ ដែលអ្នកនឹងផ្ដល់ទៅឲ្យមនុស្សម្នាក់ដែលស្ថិតនៅក្នុងស្ថានភាពបែបនេះ ? ហេតុអ្វី ?

សូមអញ្ជើញសិស្សម្នាក់ឲ្យបន្តអានដំណើររឿងរបស់អែលឌើរ បាឡឺដ ឲ្យឮៗ ៖

« ខ្ញុំបានសួរគាត់ថា តើគាត់មានសំណួអ្វីខ្លះ ហើយគាត់ក៏បានប្រាប់ខ្ញុំ ។ វាគឺជាបញ្ហាបទដ្ឋានដែលប្រឆាំងនឹងសាសនាចក្រ ប៉ុន្តែខ្ញុំត្រូវការពេលវេលាខ្លះប៉ុណ្ណោះដើម្បីប្រមូលឯកសារ ដើម្បីខ្ញុំអាចផ្ដល់នូវចម្លើយដែលមានអត្ថប្រយោជន៍ ។ ដូច្នេះយើងបានធ្វើការណាត់ជួបមួយនៅ ១០ ថ្ងៃក្រោយដោយខ្ញុំបានប្រាប់គាត់ថា ខ្ញុំនឹងឆ្លើយរាល់សំណួរទាំងអស់របស់គាត់ ។ នៅពេលគាត់បានចាប់ផ្ដើមចាកចេញទៅ ខ្ញុំប្រាប់ឲ្យគាត់ឈប់ ។

« ខ្ញុំបានពោលថា ‹ អែលឌើរ ថ្ងៃនេះអ្នកបានសួរខ្ញុំនូវសំណួរមួយចំនួន › ។ ‹ ឥឡូវខ្ញុំមានសំណួរមួយសម្រាប់អ្នក › ។

« ‹ តើអ្វីទៅប្រធាន ? ›

« ‹ តើវាមានពេលយូរប៉ុណ្ណាហើយ ចាប់តាំងពីអ្នកបានអានព្រះគម្ពីរមរមន ? › ខ្ញុំបានសួរ ។

« គាត់បានឈ្ងោកមុខចុះ ។ មើលទៅឥដ្ឋមួយសន្ទុះ ។ រួចក៏មើលមុខខ្ញុំ ។ គាត់បានសារភាពថា ‹ ប្រធានខ្ញុំខានអានយូរហើយ › ។

« ខ្ញុំបានពោលថា ‹ មិនអីទេ › ។ ‹ អ្នកបានដាក់កិច្ចការឲ្យខ្ញុំធ្វើ ។ ដើម្បីឲ្យយុត្តិធម៌ ខ្ញុំក៏មានកិច្ចការសម្រាប់អ្នកដែរ ។ ខ្ញុំចង់ឲ្យអ្នកសន្យានឹងខ្ញុំថា អ្នកនឹងអានព្រះគម្ពីរមរមនយ៉ាងហោចណាស់ឲ្យបានមួយម៉ោងជារៀងរាល់ថ្ងៃចាប់ពីពេលនេះ រហូតដល់ការណាត់ជួបរបស់យើងនៅពេលក្រោយ › ។ គាត់បានយល់ព្រមថាគាត់នឹងធ្វើវា ។

« ដប់ថ្ងៃក្រោយមក គាត់បានត្រឡប់មកការិយាល័យរបស់ខ្ញុំ ហើយខ្ញុំបានត្រៀមខ្លួនជាស្រេច ។ ខ្ញុំបានដកយកក្រដាសខ្ញុំចេញមក ដើម្បីចាប់ផ្ដើមឆ្លើយសំណួររបស់គាត់ ប៉ុន្តែគាត់បានបញ្ឈប់ខ្ញុំ ។

« គាត់បានពោលថា ‹ ប្រធាន វាពុំចាំបាច់ទៀតទេ › ។ បន្ទាប់មក គាត់បានពន្យល់ ៖ ‹ ខ្ញុំដឹងថា ព្រះគម្ពីរមរមន ពិត ! ខ្ញុំដឹងថា យ៉ូសែប ស្ម៊ីធ ជាព្យាការីរបស់ព្រះ ។

« ខ្ញុំបានពោលថា ‹ វាជាការល្អណាស់ › ។ ‹ ប៉ុន្តែទោះជាយ៉ាងណា អ្នកនៅតែត្រូវស្ដាប់ចម្លើយចំពោះសំណួររបស់អ្នកដដែល ។ ខ្ញុំបានចំណាយពេលយ៉ាងច្រើនចំពោះរឿងនេះ ដូច្នេះអ្នកគ្រាន់តែអង្គុយចុះនៅត្រង់នោះ ហើយស្ដាប់ទៅបានហើយ › ។

« ហេតុដូច្នេះហើយខ្ញុំបានឆ្លើយរាល់សំណួររបស់គាត់ រួចសួរថា ‹ អែលឌើរ តើអ្នកបានរៀនអ្វីខ្លះពីការណ៍នេះ ? ›

« ហើយគាត់បានពោលថា ‹ ថ្វាយពេលវេលាស្មើគ្នាដល់ព្រះអម្ចាស់ › » ( « When Shall These Things Be ? » ទំព័រ ៦០ ) ។

តើបទពិសោធន៍នេះគូសបង្ហាញពីគោលការណ៍ដែលយើងបានរកឃើញនៅក្នុង ខទី ៣៧ យ៉ាងដូចម្ដេច?
តើអ្នកធ្លាប់បានទទួលពរជ័យយ៉ាងណាដែរ ពេលអ្នកឲ្យតម្លៃដល់ព្រះបន្ទូលរបស់ព្រះអម្ចាស់ ?

យ៉ូសែប ស្ម៊ីធ—ម៉ាថាយ ១:៣៨-៥៥

ព្រះយេស៊ូវណែនាំពួកសិស្សរបស់ទ្រង់ អំពីការត្រៀមខ្លួនសម្រាប់ការយាងមកជាលើកទីពីរ

សូមពន្យល់ថា ដោយប្រើរឿងប្រៀបប្រដូច ព្រះយេស៊ូវបានណែនាំពួកសិស្សរបស់ទ្រង់ពីរបៀបរក្សាព្រះបន្ទូលរបស់ទ្រង់ ហើយត្រៀមខ្លួនសម្រាប់ការយាងមកជាលើកទីពីរ ។

សូមបែងចែកសិស្សជាដៃគូៗ ។ ចូរចាត់សិស្សម្នាក់ពីដៃគូនីមួយៗសិក្សាយ៉ូសែប ស្ម៊ីធ—ម៉ាថាយ ១:៣៨-៤៦ ហើយសិស្សម្នាក់ទៀតសិក្សាយ៉ូសែប ស្ម៊ីធ—ម៉ាថាយ ១:៤៧-៥៤ ។ សូមអញ្ជើញសិស្សឲ្យរកមើលគោលលទ្ធិ និងគោលការណ៍នានានៅក្នុងខគម្ពីរដែលពួកគេត្រូវបានចាត់តាំង ហើយសរសេរវាទុក ។

លុះដល់ពេលកំណត់ហើយ សូមឲ្យសិស្សសង្ខេបរឿងប្រៀបប្រដូចដែលពួកគេបានអានដល់ដៃគូខ្លួន ហើយពិភាក្សាសំណួរដូចខាងក្រោមនេះ ៖

តើអ្នកបានរកឃើញសេចក្ដីពិតអ្វីខ្លះ ?
តើព្រះអង្គសង្គ្រោះបានបង្ហាញសេចក្ដីពិតទាំងនេះ នៅក្នុងខគម្ពីរដែលអ្នកបានសិក្សាដោយរបៀបណា ?

សូមអញ្ជើញសិស្សពីរបីនាក់ឲ្យប្រាប់ពីសេចក្ដីពិតដែលពួកគេបានរកឃើញ ដែលវាអាចរួមបញ្ចូលដូចខាងក្រោមនេះ ៖ មានតែព្រះវរបិតាសួគ៌ប៉ុណ្ណោះ ដែលជ្រាបពីពេលវេលានៃការយាងមកជាលើកទីពីររបស់ព្រះអង្គសង្គ្រោះនឹងកើតឡើងពេលណា ។ ប្រសិនបើយើងរកមើលសញ្ញា ហើយគោរពតាមព្រះបញ្ញត្តិរបស់ព្រះអម្ចាស់ នោះយើងនឹងត្រៀមខ្លួនជាស្រេចសម្រាប់ការយាងមកជាលើកទីពីររបស់ព្រះអង្គសង្គ្រោះ ។

សូមរំឭកឡើងវិញពីសេចក្ដីពិតដែលបានរកឃើញនៅក្នុង យ៉ូសែប ស្ម៊ីធ—ម៉ាថាយហើយសុំឲ្យសិស្សពិចារណាពីរបៀបដែលសេចក្ដីពិតទាំងនេះជួយឆ្លើយសំណួរដែលពួកគេបានសរសេរនៅដើមមេរៀននេះ ។ សូមអញ្ជើញពួកគេឲ្យថ្លែងទីបន្ទាល់ពីសេចក្ដីពិតដែលពួកគេបានរៀន ។

ចូរសុំឲ្យសិស្សម្នាក់អានសេចក្ដីថ្លែងការណ៍ខាងក្រោមដោយអែលឌើរ ដាល្លិន អេក អូក នៃកូរ៉ុមនៃពួកសាវកដប់ពីរនាក់ឲ្យឮៗ ( ប្រសិនបើអាចសូមចែកសំណៅថតចម្លងដល់សិស្ស ) ៖

រូបភាព
អែលឌើរ ដាល្លិន អេក អូកស៍

« ចុះបើថ្ងៃនៃការយាងមករបស់ទ្រង់ជាថ្ងៃស្អែកវិញ ? ប្រសិនបើយើងបានដឹងថា យើងត្រូវជួបនឹងព្រះអម្ចាស់នៅថ្ងៃស្អែក — តាមរយៈការស្លាប់មុនអាយុ ឬតាមរយៈការយាងមកដែលមិនអាចរំពឹងទុកបានមុនរបស់ទ្រង់ — តើយើងនឹងធ្វើអ្វីនៅថ្ងៃនេះ ? តើយើងនឹងសារភាពអ្វីខ្លះ ? តើយើងនឹងបញ្ឈប់ការអនុវត្តអ្វី ? តើយើងនឹងយកដំណើររឿងណាមួយមកដោះស្រាយ ? តើការអត់ទោសណាខ្លះដែលយើងនឹងសំដែង ? តើយើងនឹងថ្លែងទីបន្ទាល់ណាមួយ ?

« ចុះបើយើងនឹងត្រូវធ្វើការណ៍ទាំងនោះនៅពេលនោះ ហេតុអ្វីយើងមិនធ្វើឥឡូវនេះ ? » ( « Preparation for the Second Coming » Ensign ឬ Liahona ខែ ឧសភា ឆ្នាំ ២០០៤ ទំព័រ ៩ ) ។

សូមអញ្ជើញសិស្សឲ្យសរសេរចម្លើយមួយ ឆ្លើយនឹងសំណួរខាងក្រោមនេះ ៖ ប្រសិនបើខ្ញុំបានដឹងថា ខ្ញុំនឹងជួបព្រះអង្គសង្គ្រោះនៅថ្ងៃស្អែក តើខ្ញុំនឹងផ្លាស់ប្ដូរអ្វីខ្លះនៅថ្ងៃនេះ ? សូមលើកទឹកចិត្តពួកគេឲ្យអនុវត្តអ្វីដែលពួកគេបានសរសេរ ។

សេចក្តីពន្យល់ និង ព័ត៌មានសាច់រឿង

យ៉ូសែប ស្ម៊ីធ—ម៉ាថាយ ១:១១ ។ « អ្នកដែលបានខ្ជាប់ខ្ជួន ហើយពុះពារ »

អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់បានពន្យល់ពីអត្ថន័យនៃការខ្ជាប់ខ្ជួន ៖

« ពាក្យ ‹ ខ្ជាប់ខ្ជួន › ត្រូវបានប្រើដើម្បីប្រាប់ពីការនៅជាប់នឹងកន្លែងមួយ រឹងមាំ មិនអាចរង្គោះរង្គើ និង មាំមួន (Oxford English Dictionary Online ការបោះពុម្ពលើកទី ២ [ ឆ្នាំ ១៩៨៩ ] « Steadfast » ) ។ … ហេតុដូច្នោះហើយ មនុស្សម្នាក់ដែលខ្ជាប់ខ្ជួន ហើយនឹងនរគឺរឹងមាំ មាំមួនខ្លាំង ហើយមិនងាយប្ដូរពីគោលបំណង ឬ បេសកកម្មសំខាន់មួយ » ( « Steadfast and Immovable: Always Abounding in Good Works » New Era ខែ មករា ឆ្នាំ ២០០៨ ទំព័រ ២ ) ។

ព្រះអង្គសង្គ្រោះបានបង្រៀន ៖ « អ្នកដែលបានបន្តខ្ជាប់ខ្ជួន ហើយពុះពារ នឹងត្រូវបានសង្គ្រោះ » ( យ៉ូសែប ស្ម៊ីធ—ម៉ាថាយ ១:១១ ) ។ ការត្រូវបានសង្គ្រោះ ពុំមែនមានន័យថាជាការធ្វើឲ្យរួចផុតពីរាល់ការលំបាកទាំងអស់ឡើយ ។ ព្យាការី យ៉ូសែប ស៊្មីធបានពន្យល់ ៖

« វាគឺជាគំនិតខុសឆ្គងមួយ ដែលពួកបរិសុទ្ធនឹងចៀសផុតពីការជំនុំជំរះ ខណៈដែលពួកទុច្ចរិតរងទុក្ខ ដ្បិតគ្រប់សាច់ឈាមគឺស្ថិតនៅក្រោមការរងទុក្ខ ហើយ ‹ ពួកបរិសុទ្ធនឹងពិបាកចៀសផុតណាស់ › … ពួកសុចរិតជាច្រើន នឹងធ្លាក់ខ្លួនរងគ្រោះនឹងជំងឺ គ្រោះចង្រៃ ជាដើម ដោយសារតែមូលហេតុនៃភាពទន់ខ្សោយខាងសាច់ឈាម តែនឹងត្រូវបានសង្គ្រោះនៅក្នុងនគរនៃព្រះ » ( នៅក្នុងHistory of the Church ៤:១១, សូមមើលផងដែរ Journals, វ៉ុលទី ១ ៖ ឆ្នាំ១៨៣២–១៨៣៩ vol. 1 of the Journals series of The Joseph Smith Papers ed. Dean C. Jessee, Ronald K. Esplin និង Richard Lyman Bushman [ ឆ្នាំ ២០០៨ ] ទំព័រ ៣៥២–៥៣ ) ។

យ៉ូសែប ស្ម៊ីធ—ម៉ាថាយ ១:២២ ។ « ក៏នឹងមានព្រះគ្រីស្ទក្លែងក្លាយ និង ពួកព្យាការីក្លែងក្លាយ »

ពាក្យថា « ព្រះគ្រីស្ទក្លែងក្លាយ » និង « ពួកព្យាការីក្លែងក្លាយ » សំដៅទៅលើមនុស្ស—ទាំងនៅក្នុង និងក្រៅសាសនាចក្រ—ដែលអះអាងថាខ្លួននិយាយតំណាងឲ្យព្រះអម្ចាស់ដោយគ្មានសិទ្ធិអំណាច ឬអ្នកដែលលើកកម្ពស់ការបង្រៀនដែលផ្ទុយពីពាក្យសម្ដីនៃពួកព្យាការីដែលនៅរស់ ។ ប្រព័ន្ធក្លែងក្លាយនៃការថ្វាយបង្គំក៏អាចជាព្រះគ្រីស្ទក្លែងក្លាយផងដែរ ( សូមមើល Bruce R. McConkie, The Millennial Messiah [ ឆ្នាំ ១៩៨២ ] ទំព័រ ៤៨ ) ។ ឃ្លាថា « អ្នករើសតាំងស្របតាមសេចក្ដីសញ្ញា » នៅក្នុងខទី ២២សំដៅទៅលើសមាជិកនៃសាសនាចក្រនៃព្រះយេស៊ូវគ្រីស្ទ ។

អែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានពន្យល់ពីពាក្យ « ព្រះគ្រីស្ទក្លែងក្លាយ » និង « ពួកព្យាការីក្លែងក្លាយ » ៖

« នៅពេលយើងគិតពីពួកព្យាការីក្លែងក្លាយ និងគ្រូក្លែងក្លាយ យើងតែងគិតពីជនដែលជឿលើគោលលទ្ធិមួយខុស ឬជឿថាមានសិទ្ធិអំណាច ដើម្បីបង្រៀនដំណឹងល្អពិតនៃព្រះគ្រីស្ទស្របតាមការបកស្រាយផ្ទាល់ខ្លួនរបស់ពួកគេ ។ ជារឿយៗ យើងសន្មតថា បុគ្គលបែបនេះមានទំនាក់ទំនងនឹងក្រុមតូចមួយដែលខ្វែងគំនិតនឹងសង្គមដែលជាទូទៅសង្គមពុំទទួលស្គាល់ ។ ទោះជាយ៉ាងក៏ដោយ ខ្ញុំសូមថ្លែងជាថ្មីថា ៖ មានពួកព្យាការីក្លែងក្លាយ និង គ្រូក្លែងក្លាយដែលមាន ឬយ៉ាងហោចណាស់ប្រកាសថា មានសមាជិកភាពនៅក្នុងសាសនាចក្រនេះ ។ មានជនដែលគ្មានសិទ្ធិអំណាចបានប្រកាសថា មានការអនុញ្ញាតរបស់សាសនាចក្រសម្រាប់ផលិតផល និង ការអនុវត្តរបស់ពួកគេ ។ ចូរប្រយ័ត្នចំពោះរឿងបែបនេះ » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦២ ) ។

យ៉ូសែប ស្ម៊ីធ—ម៉ាថាយ ១:២២ ។ « ប្រសិនបើអាចធ្វើទៅបាន ពួកគេនឹងបោកបញ្ឆោតរាល់អ្នករើសតាំង »

ប្រធាន យ៉ូសែប អេហ្វ ស៊្មីធ បានព្រមានដល់សមាជិកសាសនាចក្រ ៖

« យើងមិនអាចទទួលអ្វីថា ជាផ្លូវការបានទេ លុះត្រាវាមកតាមរយៈបណ្ដាញដែលបានតែងតាំងដោយផ្ទាល់ អង្គការនៃបព្វជិតភាពដែលបានបង្កើត ជាបណ្ដាញដែលព្រះបានតែងតាំងដើម្បីធ្វើឲ្យពិភពលោកដឹងពីព្រះទ័យ និងព្រះឆន្ទៈរបស់ទ្រង់ ។

« … ហើយនៅគ្រាដែលបុគ្គលទាំងឡាយមើលទៅប្រភពផ្សេងទៀត គ្រានោះពួកគេបានបើកចិត្តទៅរកឥទ្ធិពលទាក់ទាញរបស់សាតាំង ហើយបង្ហាញខ្លួនថា ជាពួកបរិវាររបស់អារក្ស នោះពួកគេបានមើលពុំឃើញពីរបៀបដ៏ពិតដែលរីករាយនឹងពរជ័យនៃបព្វជិតភាព ពួកគេបានឈានជើងដើរចេញពីព្រំដែននៃនគរព្រះ ហើយស្ថិតនៅកន្លែងដ៏មានគ្រោះថ្នាក់ ។ នៅពេលណាអ្នកឃើញបុរសម្នាក់ក្រោកឡើងអះអាងថា បានទទួលវិវរណៈដោយផ្ទាល់ពីព្រះអម្ចាស់សម្រាប់សាសនាចក្រ ឯករាជ្យនៃរបៀប និងបណ្ដាញនៃបព្វជិតភាព អ្នកអាចចាត់ទុកថា គាត់គឺជាអ្នកក្លែងបន្លំ » ( Gospel Doctrine ការបោះពុម្ពលើកទី ៥ [ ឆ្នាំ ១៩៣៩ ] ទំព័រ ៤២ ) ។