មេរៀនទី ៨៦ ៖ កិច្ចការ ៦-៧

មេរៀនទី ៨៦

កិច្ចការ ៦-៧

សេចក្ដីផ្ដើម

ពួកសាវកបានតែងតាំងពួកសិស្សប្រាំពីរនាក់ដើម្បីជួយក្នុងកិច្ចការរបស់ព្រះអម្ចាស់ ។ ស្ទេផានជាសិស្សម្នាក់ដែលបានជ្រើសរើស បានសម្តែងអព្ភូតហេតុជាច្រើន ។ ពួកយូដាមួយចំនួនបានចោទគាត់ថាបានប្រមាថព្រះ ហើយបាននាំគាត់ទៅចំពោះមុខពួកសាសន៍ហេឌ្រីន ជាកន្លែងដែលគាត់បានប្រែរូប ។ បន្ទាប់ពីបានវាយផ្ចាលដល់ពួកសាសន៍យូដាចំពោះការបដិសេធព្រះអង្គសង្គ្រោះមក ស្ទេផានបានឃើញព្រះវរបិតាសួគ៌ និង ព្រះយេស៊ូវគ្រីស្ទ ។ បន្ទាប់មកគេបានបណ្តេញលោកចេញពីទីក្រុង ហើយចោលដុំថ្មលើរហូតដល់ស្លាប់ ។

យោបល់សម្រាប់ការបង្រៀន

ប្រើប្រាស់កម្មវិធីសិក្សា

នៅពេលអ្នករៀបចំមេរៀនមួយ ចូរមើលកម្មវិធីសិក្សាប្រកបដោយការអធិស្ឋាន ព្រមជាមួយនឹងការសិក្សារបស់អ្នកអំពីបណ្ដុំខគម្ពីរ ។ នៅពេលអ្នកធ្វើដូច្នេះ នោះព្រះវិញ្ញាណបរិសុទ្ធអាចជួយអ្នកឲ្យរៀបចំមេរៀនដែលស្របតាមសេចក្ដីត្រូវការសិស្សរបស់អ្នក ។ អ្នកអាចជ្រើសរើសប្រើប្រាស់យោបល់ណែនាំក្នុងការបង្រៀន សម្រាប់បណ្តុំបទគម្ពីរ ឬអ្នកអាចកែសម្រួលគំនិតដែលបានណែនាំ ទៅតាមតម្រូវការក្នុងថ្នាក់រៀនរបស់អ្នក ។

កិច្ចការ ៦:១-៨

ពួកសិស្សប្រាំពីរនាក់ត្រូវបានជ្រើសរើសដើម្បីជួយពួកសាវកនៅក្នុងកិច្ចការ

សូមអញ្ជើញសិស្សឲ្យគិតអំពីនរណាម្នាក់នៅក្នុងគ្រួសារ វួដ ឬសហគមន៍របស់ពួកគេ ដែលមានបញ្ហាខាងសាច់ឈាមឬ តម្រូវការជាក់លាក់ ។

តើអ្នកមានអារម្មណ៍យ៉ាងដូចម្ដេច នៅពេលអ្នកគិតអំពីបុគ្គលម្នាក់នេះ ឬគិតអំពីស្ថានភាពរបស់គាត់នោះ ?
តើអ្នកគិតថា ព្រះវរបិតាសួគ៌មានព្រះទ័យបែបណាដែរ ចំពោះបុគ្គលម្នាក់ៗទាំងនេះ ?

នៅពេលពួកគេសិក្សាកិច្ចការ ៦:១-៨សូមអញ្ជើញសិស្សឲ្យរកមើលរបៀបដែលព្រះអម្ចាស់បានប្រទានឲ្យ ដើម្បីបំពេញតាមតម្រូវការរបស់កូនចៅទ្រង់ ។

សូមអញ្ជើញសិស្សម្នាក់ឲ្យអាន កិច្ចការ ៦:១-២ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលនូវកង្វល់ដែលពួកសាសន៍ក្រិក បាននាំមកឲ្យពួកសាវកចាប់អារម្មណ៍ ។ ពួកសាសន៍ក្រិក « គឺជាពួកគ្រីស្ទានសាសន៍យូដាដែលនិយាយភាសាក្រិក » និងពួកហេព្រើរ « ជាពួកគ្រីស្ទានសាសន៍យូដាដែលមកពីប៉ាលេស្ទីន » (New Testament Student Manual [ Church Educational System manual ឆ្នាំ ២០១៤ ] ទំព័រ ២៨៨) ។

តើពួកបរិសុទ្ធសាសន៍ក្រិកមានកង្វល់អ្វីខ្លះ ?

ចូរពន្យល់ថានៅគ្រានេះ សាសនាចក្រកំពុងរីកចម្រើនយ៉ាងលឿន ហើយតម្រូវការខាងសាច់ឈាមរបស់មនុស្សជាច្រើន រួមទាំងស្ត្រីមេម៉ាយក៏មានច្រើនផងដែរ ។ ដោយសារតែពួកសាវកមានការទទួលខុសត្រូវចំពោះការផ្សាយដំណឹងល្អចំពោះ « គ្រប់ជាតិសាសន៍ » (ម៉ាថាយ ២៨:១៩) នោះពួកគេពុំអាចយកចិត្តទុកដាក់ដោយផ្ទាល់ ចំពោះតម្រូវការរបស់សមាជិកសាសនាចក្រគ្រប់រូបនោះបានទេ ។

សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗពី កិច្ចការ ៦:៣-៦ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលរបៀប ដែលពួកសិស្សបានដោះស្រាយបញ្ហានេះ ។ សូមអញ្ជើញសិស្សឲ្យរៀបរាប់ពីអ្វីដែលពួកគេរកឃើញ ។

តើគុណសម្បត្តិអ្វីខ្លះ ដែលអស់អ្នកដែលត្រូវបានជ្រើសរើស គួរមានដើម្បីជួយក្នុងពេលមានតម្រូវការកើនឡើងក្នុងសាសនាចក្រ ដើម្បីសក្ដិសមក្នុងការហៅនេះ ? ( អ្នកអាចនឹងចង់ផ្ដល់យោបល់ឲ្យសិស្សគូសចំណាំឃ្លានៅក្នុងខ ៣ និង ៥ដែលពិពណ៌នាអំពីគុណសម្បត្តិទាំងនេះ ) ។
តើដំណើរការនេះស្រដៀងគ្នានឹងអ្វី ដែលព្រះអម្ចាស់បានធ្វើនៅក្នុងសាសនាចក្រនាពេលសព្វថ្ងៃនេះដើម្បីប្រាកដថា បានបំពេញតាមតម្រូវការរបស់សមាជិកនោះដូចម្ដេចខ្លះ ? ( បន្ទាប់ពីសិស្សបានឆ្លើយ សូមសរសេរសេចក្ដីពិតខាងក្រោមនៅលើក្ដារខៀន ៖សមាជិកសាសនាចក្រមានភាពសក្ដិសម ត្រូវបានហៅឲ្យជួយក្នុងការបម្រើដើម្បីបំពេញតម្រូវការរបស់អ្នកដទៃ) ។

សូមអញ្ជើញសិស្សប៉ុន្មាននាក់ឲ្យមកកាន់ក្ដារខៀន ហើយសរសេរអំពីការហៅក្នុងសាសនាចក្រ ។ ចំពោះការហៅមួយចំនួនដែលពួកគេបានសរសេរ ចូរសួរ ៖

តើមនុស្សដែលបានបម្រើដោយស្មោះត្រង់នៅក្នុងការហៅនេះ បម្រើឲ្យតម្រូវការរបស់នរណា ?
ហេតុអ្វីអ្នកគិតថា វាសំខាន់ចំពោះមនុស្ស ដែលត្រូវបានហៅឲ្យជួយបម្រើដល់សេចក្ដីត្រូវការរបស់អ្នកដទៃ ត្រូវមានគុណសម្បត្តិដែលបានរៀបរាប់នៅក្នុងខ ៣ និងខ ៥?

សូមឲ្យសិស្សអាន កិច្ចការ ៦:៧-៨ ដោយស្ងៀមស្ងាត់ ។ អ្នកគប្បីផ្ដល់យោបល់ឲ្យពួកគេគូសចំណាំលទ្ធផលវិជ្ជមាន ដែលកើតមកពីការហៅរបស់ពួកសិស្សទាំងប្រាំពីរនាក់បម្រើដល់អ្នកដទៃ ។ សូមឲ្យសិស្សរាយការណ៍ពីអ្វីដែលពួកគេរកឃើញ ។

កិច្ចការ ៦:៩-៧:៥៣

ស្ទេផានត្រូវបាននាំទៅមុខពួកសានហេទ្រិន ហើយថ្លែងទីបន្ទាល់ថាពួកគេបានបដិសេធព្រះមែស៊ីហើយ

សូមអញ្ជើញសិស្សពីរបីនាក់ឲ្យក្រោកឈរ ហើយបង្ហាញថាវាដូចម្តេច ប្រសិនបើពួកគេព្យាយាមមិនព្រមទទួលជំនួយរបស់មនុស្សផ្សេងក្នុងស្ថានភាពដូចខាងក្រោម ទោះជាពួកគេត្រូវការជំនួយក្ដីដូចជា ៖ ធ្វើកិច្ចការសាលា ចម្អិនអាហារ ដោះស្រាយបញ្ហាធំមួយនៅក្នុងជីវិតរបស់ពួកគេ ។

ហេតុអ្វីក៏ពេលខ្លះយើងបដិសេធជំនួយរបស់អ្នកដទៃ ?
តើលទ្ធផលអ្វីខ្លះអាចនឹងកើតមាន មកពីការមិនព្រមទទួលជំនួយរបស់អ្នកដទៃ ?

សូមចង្អុលបង្ហាញថា របៀបមួយដែលព្រះវរបិតាសួគ៌ជួយយើង គឺតាមរយៈព្រះវិញ្ញាណបរិសុទ្ធ ។ សូមអញ្ជើញសិស្សឲ្យរកមើលនៅពេលពួកគេសិក្សាកិច្ចការ ៦:៩-៧:៥៣អំពីលទ្ធផលនៃការបដិសេធព្រះវិញ្ញាណបរិសុទ្ធ ។

ចូរពន្យល់ថា ដូចបានកត់ត្រានៅក្នុងកិច្ចការ ៦:៩មនុស្សជាច្រើនដែលពុំជឿទៅលើព្រះយេស៊ូវគ្រីស្ទ បានជំទាស់នឹងស្ទេផាន នៅពេលគាត់បានបង្រៀនដំណឹងល្អ។ សូមអញ្ជើញឲ្យសិស្សម្នាក់អាន កិច្ចការ ៦:១០-១១ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលថាហេតុអ្វីបានជាអស់អ្នកដែលមានជម្លោះជាមួយនឹងស្ទេផាន បានរងឥទ្ធិពលពីគាត់ ។ អ្នកអាចនឹងចាំបាច់ត្រូវពន្យល់ថា ពាក្យបានសូកនៅក្នុងខ ១១មានន័យថា សូកប៉ាន់ ។

តើមនុស្សដែលមានជម្លោះនឹងស្ទេផាន បានរងឥទ្ធិពលដោយសារការបង្រៀនរបស់គាត់យ៉ាងដូចម្ដេច ?
តើស្ទេផានត្រូវបានគេចោទអំពីរឿងអ្វី ?

សូមសង្ខេបកិច្ចការ ៦:១២-១៤ដោយពន្យល់ថា ស្ទេផាន ត្រូវបាននាំមកខាងមុខពួកក្រុមប្រឹក្សាគ្រប់គ្រងសាសន៍យូដា ដែលហៅថា ពួកសានហេឌ្រីន ។

សូមអញ្ជើញឲ្យសិស្សម្នាក់អាន កិច្ចការ ៦:១៥ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលខុសប្រក្រតីអំពីរូបកាយរបស់ស្ទេផាន នៅពេលគាត់ឈរនៅចំពោះក្រុមប្រឹក្សា ។

តើអ្នកគិតថាឃ្លា ស្ទេផានមាន « មុខដូចជាមុខទេវតា » មានន័យយ៉ាងណា ? (ខ ១៥) ។ ( ស្ទេផានបានប្រែរូប ។ ការប្រែរូបដ៏បរិសុទ្ធនេះ គឺជារបៀបមួយដែលព្រះបានបង្ហាញដល់ប្រជាជនថា ទ្រង់បានអនុមតិដល់ស្ទេផាន និងសារលិខិតរបស់គាត់ ។ [ សូមមើល ប្រ៊ូស អ័រ ម៉ាក់ខន់ឃី Doctrinal New Testament Commentary វ៉ុលទី ៣ [ ឆ្នាំ ១៩៦៥–៧៣ ] ២:៦៧ ] ) ។

សូមសង្ខេបកិច្ចការ ៧:១-៥០ដោយពន្យល់ថា នៅក្នុងការឆ្លើយតបចំពោះការចោទប្រកាន់ទាស់នឹងគាត់ នោះស្ទេផានបានរៀបរាប់អំពីប្រវត្តិរបស់អ៊ីស្រាអែលមួយចំនួន ។

សូមអញ្ជើញឲ្យសិស្សម្នាក់អាន កិច្ចការ ៧:៣៥-៣៩ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលស្ទេផានបាននិយាយអំពីការព្យាបាលរបស់ព្យាការីម៉ូសេដល់ពួកអ៊ីស្រាអែលជំនាន់បុរាណ ។

ស្របតាមខ ៣៥តើកូនចៅនៃអ៊ីស្រាអែលបានឆ្លើយតបចំពោះម៉ូសេយ៉ាងដូចម្ដេច នៅពេលគាត់មករំដោះពួកគេចេញពីអេស៊ីព្ទ ?
តើពួកគេឆ្លើយតបចំពោះម៉ូសេយ៉ាងដូចម្ដេច ថ្វីបើបន្ទាប់ពីគាត់បានរំដោះពួកគេឲ្យរួចហើយនោះ ( សូមមើលខ ៣៩) ?

សូមរំឭកសិស្សថា ព្រះយេស៊ូវគ្រីស្ទ គឺជាព្យាការីដែលម៉ូសេបានព្យាករ ( សូមមើលខ ៣៧) ។

សូមអញ្ជើញឲ្យសិស្សម្នាក់អាន កិច្ចការ ៧:៥១-៥៣ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលរបៀបដែលស្ទេផាន បានប្រៀបធៀបពួកអ្នកដឹកនាំយូដានៃជំនាន់របស់គាត់ ទៅនឹងពួកសាសន៍អ៊ីស្រាអែលជំនាន់ដើមដែលគាត់បានពិពណ៌នា ។

ស្របតាមខ ៥១តើពួកអ្នកដឹកនាំយូដាក្នុងជំនាន់ស្ទេផាន ស្រដៀងគ្នានឹងពួកអ៊ីស្រាអែលពីបុរាណ ដែលគាត់បានពិពណ៌នាយ៉ាងដូចម្ដេចខ្លះ ? ( ពួកគេទាំងពីរ គឺបានទាស់នឹងព្រះវិញ្ញាណបរិសុទ្ធ ។ សូមពន្យល់ថា « ពួកមនុស្សក្បាលរឹង ដែលមានចិត្តមានត្រចៀកមិនកាត់ស្បែកអើយ » សំដៅទៅលើដួងចិត្តទុច្ចរិត និងដែលមានអំនួតដែលពោរពេញដោយអំពើបាបរបស់ពួកសាសន៍យូដា ។
ស្របតាមខ ៥២តើពួកយូដាពីជំនាន់បុរាណបដិសេធ ហើយបៀតបៀនដល់នរណា នៅពេលពួកគេបដិសេធព្រះវិញ្ញាណបរិសុទ្ធនោះ ? ( ពួកព្យាការី រួមទាំងម៉ូសេ ) ។
តើស្ទេផាននិយាយថា ពួកក្រុមប្រឹក្សាសាសន៍យូដាបានបដិសេធដល់នរណា ? ( « ព្រះដ៏សុចរិត » [ខ ៥២] មានន័យថា ព្រះអង្គសង្គ្រោះ ) ។

ចូរពន្យល់ថា ស្ទេផាន បានបង្ហាញថា ក៏ដូចជាពួកអ៊ីស្រាអែលពីបុរាណដែលបានបដិសេធព្យាការីម៉ូសេដែរ គឺពួកអ្នកដឹកនាំសាសន៍យូដានៅជំនាន់របស់ស្ទេផាន បានបដិសេធព្រះអង្គសង្គ្រោះ ។

តើសេចក្ដីពិតអ្វី ដែលយើងអាចរៀនអំពីការជំទាស់នឹងព្រះវិញ្ញាណបរិសុទ្ធ ? ( សិស្សអាចនឹងប្រើពាក្យផ្សេង ប៉ុន្តែពួកគេគួរតែស្គាល់សេចក្ដីពិតមួយដែលស្រដៀងគ្នានេះ ៖ការបដិសេធព្រះវិញ្ញាណបរិសុទ្ធអាចដឹកនាំទៅរកការបដិសេធព្រះអង្គសង្គ្រោះ និងពួកព្យាការីរបស់ទ្រង់ )។
តើការជំទាស់នឹងព្រះវិញ្ញាណបរិសុទ្ធ អាចនាំយើងឲ្យបដិសេធការបង្រៀនរបស់ព្រះអង្គសង្គ្រោះ និងពួកព្យាការីរបស់ទ្រង់យ៉ាងដូចម្ដេច ? ( ព្រះវិញ្ញាណបរិសុទ្ធ ថ្លែងទីបន្ទាល់អំពីព្រះយេស៊ូវគ្រីស្ទ និងថ្លែងសាក្សីអំពីសេចក្ដីពិតនៃព្រះបន្ទូលរបស់ទ្រង់ និងពាក្យសម្ដីរបស់ពួកព្យាការីរបស់ទ្រង់ ) ។ ហេតុដូច្នេះហើយ ការជំទាស់នឹងព្រះវិញ្ញាណបរិសុទ្ធនឹងធ្វើឲ្យទីបន្ទាល់របស់មនុស្សម្នាក់ទន់ខ្សោយ ហើយការតាំងចិត្តរបស់គាត់ ឬនាងដើម្បីដើរតាមព្រះអង្គសង្គ្រោះ និងពួកព្យាការីរបស់ទ្រង់ក៏ទន់ខ្សោយផងដែរ ) ។

សូមអញ្ជើញសិស្សឲ្យពន្យល់អំពីរបៀបដែលមនុស្សម្នាក់អាចត្រូវបានល្បួង ឲ្យជំទាស់ព្រះវិញ្ញាណបរិសុទ្ធនៅក្នុងស្ថានភាពដូចខាងក្រោម ៖ (១) ការជ្រើសរើសការកម្សាន្ដ និងប្រព័ន្ធផ្សព្វផ្សាយ (២) ការជ្រើសរើសថាតើត្រូវធ្វើតាមការទូន្មានរបស់ពួកព្យាការីអំពីការដើរលេងជាគូឬទេ និង (៣) ការសម្រេចចិត្តថាតើអនុវត្តគោលការណ៍ទាំងឡាយនៃការប្រែចិត្ត ដែលព្រះយេស៊ូវគ្រីស្ទ និងពួកព្យាការីរបស់ទ្រង់បានបង្រៀនឬទេ ។

តើយើងអាចធ្វើអ្វីខ្លះ ដើម្បីទទួលស្វាគមន៍ជាជាងជំទាស់ឥទ្ធិពលរបស់ព្រះវិញ្ញាណបរិសុទ្ធ ?

សូមអញ្ជើញសិស្សឲ្យពិចារណាអំពីរបៀប ដែលការទទួលយកឥទ្ធិពលនៃព្រះវិញ្ញាណបរិសុទ្ធ នាំពួកគេឲ្យទទួលយកព្រះអង្គសង្គ្រោះ និងពួកព្យាការីរបស់ទ្រង់ ហើយអនុវត្តការបង្រៀនរបស់ពួកគេ ។

សូមលើកទឹកចិត្តដល់សិស្សឲ្យពិចារណាអំពីរឿងមួយ ដែលពួកគេអាចធ្វើនៅសប្ដាហ៍ក្រោយដើម្បីខំប្រឹងប្រែងអញ្ជើញឥទ្ធិពលនៃព្រះវិញ្ញាណបរិសុទ្ធ ចូលក្នុងជីវិតរបស់ពួកគេ ។ សូមអញ្ជើញពួកគេឲ្យសរសេរគោលដៅមួយ នៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ហើយលើកទឹកចិត្តពួកគេឲ្យបំពេញគោលដៅនោះ ។

កិច្ចការ ៧:៥៤-៦០

ស្ទេផានត្រូវបានចោលនឹងដុំថ្មរហូតដល់ស្លាប់

សូមសរសេរពាក្យ សេចក្តីវេទនា នៅលើក្ដារខៀន ហើយសូមសួរសិស្សថា តើពួកគេស្គាល់ពីអត្ថន័យនៃពាក្យនេះឬទេ ។ បន្ទាប់ពីពួកគេឆ្លើយតបហើយ សូមសរសេរនិយមន័យដូចខាងក្រោមនៅជិតនឹងពាក្យនោះ ៖ជាការបណ្ដាលឲ្យមានបញ្ហាដ៏ធំ ឬការរងទុក្ខដ៏ធំ ។

ហេតុអ្វីយើងគប្បីរំពឹងទុកថា មានសេចក្ដីវេទនាក្នុងនាមជាអ្នកដើរតាមព្រះយេស៊ូវគ្រីស្ទ ?

សូមលើកទឹកចិត្តសិស្សឲ្យរកមើល នៅពេលពួកគេសិក្សាកិច្ចការ ៧:៥៤-៦០អំពីគោលការណ៍មួយដែលអាចជួយយើងនៅពេលយើងជួបសេចក្ដីវេទនា ។

សូមពន្យល់ថា បន្ទាប់ពីស្ទេផាន បានស្ដីបន្ទោសដល់ពួកអ្នកដឹកនាំសាសន៍យូដាទុច្ចរិតហើយ នោះពួកគេ « មានចិត្តក្ដៅក្រហាយណាស់ » (ខ ៥៤) និងមានកំហឹង ។

សូមអញ្ជើញឲ្យសិស្សម្នាក់អាន កិច្ចការ ៧:៥៥-៥៦ ឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលរបៀបដែលស្ទេផានបានជួប អំឡុងគ្រានៃការបៀតបៀននេះ ។

តើស្ទេផានបានមានពេញដោយឥទ្ធិពលអ្វី ?
តើស្ទេផានបានឃើញនរណា ?

រូបភាព

សទផនឃញពរយសវគងនខងសដពរហសតនពរ

សូមដាក់តាំងរូបភាពស្ទេផានឃើញព្រះយេស៊ូវគង់ខាងស្ដាំព្រះហស្តនៃព្រះ (សៀវភៅសិល្បៈដំណឹងល្អ [ ឆ្នាំ ២០០៩ ] លេខ ៦៣; សូមមើលផងដែរ LDS.org) ។

តើយើងអាចរៀនអ្វីខ្លះ មកពីដំណើររឿងនៃការនិមិត្តរបស់ស្ទេផាន អំពីគោលលទ្ធិគ្រឹះអំពីក្រុមព្រះ ? ( សិស្សអាចនឹងប្រើពាក្យផ្សេង ប៉ុន្តែចូរប្រាកដថាពួកគេគួរស្គាល់គោលលទ្ធិដូចខាងក្រោមនេះ ៖ព្រះវរបិតាសួគ៌ ព្រះយេស៊ូវគ្រីស្ទ និង ព្រះវិញ្ញាណបរិសុទ្ធ ជាតួអង្គបីផ្សេងគ្នា និង ដាច់ដោយឡែកពីគ្នា ។ អ្នកគួរណែនាំសិស្សឲ្យសរសេរគោលលទ្ធិនេះ នៅរឹមទំព័រព្រះគម្ពីររបស់ពួកគេក្បែរ កិច្ចការ ៧:៥៥-៥៦ ) ។

សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗមកពីកិច្ចការ ៧:៥៧-៦០ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលអ្វី ដែលមនុស្សបានធ្វើចំពោះស្ទេផាន ។ សូមឲ្យសិស្សរៀបរាប់ពីអ្វីដែលពួកគេរកឃើញ ។

តើអ្វីទៅដែលធ្វើឲ្យអ្នកចាប់អារម្មណ៍យ៉ាងខ្លាំង អំពីការអធិស្ឋានរបស់ស្ទេផាន ?
ហេតុអ្វីអ្នកគិតថា លូកាបានពិពណ៌នាអំពីការស្លាប់ដ៏សោកនាដកម្មរបស់ស្ទេផានជាមួយនឹងឃ្លាថា « គាត់ដេកលក់ទៅ » ? (ខ ៦០) ។ ( ចូរចង្អុលបង្ហាញថា ឃ្លានេះអាចនឹងសំដៅទៅលើការសម្រាករបស់ព្រលឹងសុចរិតពីបញ្ហាខាងជីវិតរមែងស្លាប់ និងភាពសុខសាន្ដដែលមនុស្សបានផ្លាស់ប្រែចេញពីជីវិតនេះទៅជីវិតបន្ទាប់ [ សូមមើលគ. និង ស. ៤២:៤៦] ) ។

សូមអញ្ជើញសិស្សឲ្យនឹកគិតអំពីអ្វីដែលស្ទេផានបានជួប ពីមុនគាត់ត្រូវបាននាំយកទៅ ហើយត្រូវបានសំឡាប់ចោលនោះ ( សូមមើលកិច្ចការ ៧:៥៥-៥៦) ។

តើព្រះបានពង្រឹងដល់ស្ទេផាន តាមរយៈបទពិសោធន៍របស់គាត់ជាមួយនឹងពួកសានហេឌ្រីនយ៉ាងដូចម្ដេច ? ( ស្ទេផានបានពេញដោយព្រះវិញ្ញាណបរិសុទ្ធ ហើយបានឃើញព្រះអង្គសង្គ្រោះគង់នៅខាងស្ដាំព្រះហស្តរបស់ព្រះ ) ។
តើយើងអាចរៀនគោលការណ៍អ្វីខ្លះ ចេញមកពីបទពិសោធន៍របស់ស្ទេផាន ដែលអាចជួយឲ្យយើងបន្ដស្មោះត្រង់ចំពោះព្រះយេស៊ូវគ្រីស្ទ អំឡុងសេចក្ដីទុក្ខវេទនានោះ ? ( សិស្សអាចនឹងប្រាប់ពីគោលការណ៍ផ្សេងៗ ប៉ុន្តែសូមប្រាកដថា ពួកគេយល់គោលការណ៍ខាងក្រោមនេះ ៖ប្រសិនបើយើងបន្ដស្មោះត្រង់ចំពោះព្រះយេស៊ូវគ្រីស្ទ អំឡុងការរងទុក្ខវេទនា នោះទ្រង់នឹងគង់នៅជាមួយយើង) ។
តើព្រះអម្ចាស់អាចគង់នៅជាមួយយើង នៅពេលយើងជួបនឹងការរងទុក្ខវេទនាតាមរបៀបណា ?
ទោះជាស្ទេផានបាត់បង់ជីវិតគាត់ក្ដី តើគាត់បានទទួលបានអ្វីខ្លះ ?

ចូរពន្យល់ថា ជាទូទៅស្ទេផាន ត្រូវបានរាប់ថាជាទុក្ករជនគ្រីស្ទានដំបូងគេ ។ បន្ថែមពីលើនោះ គាត់ត្រូវបានគេមើលឃើញជាតំណាងព្រះគ្រីស្ទ គាត់ និងព្រះអង្គសង្គ្រោះបានឈរនៅចំពោះក្រុមប្រឹក្សាដើម្បីត្រូវបានគេកាត់ទោស ដោយបានប្រកាសអំពីសេចក្ដីពិតចំពោះមុខមារសត្រូវ ប្រគល់ជីវិតនៅក្នុងបុព្វហេតុសុចរិត ហើយបានថ្លែងដូចគ្នានៅពេលរងទុក្ខដល់ស្លាប់ ( សូមមើលលូកា ២៣:៣៣-៣៤, ៤៦) ។ អ្នកគប្បីចង្អុលបង្ហាញថា យុវបុរសម្នាក់ឈ្មោះ សូល—ដែលក្រោយមកបានក្លាយទៅជាសាវកប៉ុល—មានវត្តមាន ហើយធ្វើជាសាក្សីដល់ការធ្វើទុក្ករកម្មដល់ស្ទេផាន ( សូមមើលខ ៥៨) ។

សូមថ្លែងទីបន្ទាល់អំពីសេចក្ដីពិត ដែលបានបង្រៀននៅក្នុងមេរៀននេះ ។

សេចក្តីពន្យល់ និង ព័ត៌មានសាច់រឿង

កិច្ចការ ៦:១-៦។ អ្នកទាំងឡាយដែលត្រូវបានហៅឲ្យជួយដល់ពួកដប់ពីរនាក់ក្នុងកិច្ចការខាងសាច់ឈាម

ក៏ដូចជាព្រះអម្ចាស់បានហៅបុរសសក្ដិសមប្រាំពីរនាក់ ឲ្យជួយដល់ពួកដប់ពីរនាក់នៅក្នុងការផ្គត់ផ្គង់ដល់តម្រូវការខាងសាច់ឈាមរបស់សាសនាចក្រដែរ ដូចបានកត់ត្រានៅក្នុងគម្ពីរកិច្ចការ នោះព្រះអម្ចាស់បានហៅគណៈប៊ីស្សពជាអធិបតី ឲ្យជួយដល់ពួកដប់ពីរនាក់ក្នុងការផ្គត់ផ្គង់ដល់តម្រូវការ ខាងសាច់ឈាមរបស់សាសនាចក្រនាសព្វថ្ងៃនេះ ។ គណៈប៊ីស្សពជាអធិបតី និងទីប្រឹក្សាពីររូបរបស់គាត់ បម្រើនៅក្រោមការដឹកនាំរបស់គណៈប្រធានទីមួយ ដើម្បីគ្រប់គ្រងកិច្ចការខាងសាច់ឈាមរបស់សាសនាចក្រ ។ ដង្វាយតមអាហារ គឺជាផ្នែកមួយយ៉ាងសំខាន់នៅក្នុងកម្មវិធីនេះ ហើយផ្ដល់ជំនួយបណ្ដោះអាសន្ន និងផ្ដល់ជំនួយទ្រទ្រង់ជីវិតដល់ជនក្រីក្រនៅទូទាំងពិភពលោក ។ ( សម្រាប់ព័ត៌មានបន្ថែម សូមមើលប្រធានបទ « Presiding Bishopric » នៅ mormonnewsroom.org) ។

កិច្ចការ ៦:១៥ ។ ការប្រែរូបរបស់ស្ទេផាន

អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់ បានពន្យល់ថាហេតុអ្វីក៏មុខរបស់ស្ទេផានមើលឃើញដូចជា « មុខទេវតា » (កិច្ចការ ៦:១៥) ។

« ស្ទេផាន ត្រូវបានប្រែរូបចំពោះពួកគេ ជាសាក្សីឃើញនឹងភ្នែកថា ព្រះគង់នៅជាមួយនឹងគាត់ ។ ស្ទេផានបានទទួលបទពិសោធន៍នៃការប្រែរូប ក្នុងកម្រិតមួយទាបជាងម៉ូសេ ដែលស្បែកមុខ [ ភ្លឺ ] យ៉ាងច្បាស់ បន្ទាប់ពីលោកបានទំនាក់ទំនងជាមួយព្រះអម្ចាស់អស់រយៈពេលសែសិបថ្ងៃនៅលើភ្នំ ។ (និក្ខមនំ ៣៤:២៩–៣៥) » ។ (Doctrinal New Testament Commentary, វ៉ុលទី ៣ [ ឆ្នាំ ១៩៦៥–៧៣ ] ២:៦៧ ) ។

« ដោយការជំទាស់នឹងស្ទេផាន និងទីបន្ទាល់របស់គាត់ នោះពួកអ្នកដឹកនាំយូដាក៏បានជំទាស់នឹងព្រះផងដែរ ដែលបានប្រទានទីសម្គាល់ជាក់ស្ដែងបង្ហាញពីការអនុមតិរបស់ទ្រង់ដល់ស្ទេផាន » (New Testament Student Manual [ Church Educational System manual ឆ្នាំ ២០១៤ ]ទំព័រ ២៨៩) ។

កិច្ចការ ៧:៥៦ ។ « កូនមនុស្ស »

« មានសេចក្ដីយោងច្រើនជាង ៨០ អំពី ‹ កូនមនុស្ស › នៅក្នុងដំណឹងល្អបួន ។ ស្ទើរតែគ្រប់ស្ថានភាព ព្រះយេស៊ូវបានហៅព្រះអង្គទ្រង់ដោយនាមនេះ ។ ប្រហែលនោះជាអ្វី ដែលស្ទេផានបានសំដៅទៅលើព្រះអង្គសង្គ្រោះតាមរបៀបនេះ—គាត់ចង់ឲ្យអ្នកស្ដាប់របស់គាត់ ស្គាល់ព្រះយេស៊ូវគ្រីស្ទជានរណាពិត ។ សម្រាប់ព័ត៌មានបន្ថែមអំពីចំណងជើង ‹ កូនមនុស្ស › សូមមើលម៉ូសេ ៦:៥៧និង ការពន្យល់សង្ខេបក្នុងម៉ាថាយ ៨:២០; ៩:៦; ១០:២៣; ១១:១៩; ១២:៨, ៣២,៤០ និង សម្រាប់ ម៉ាកុស ១៤:៥៣–៦៥ » (New Testament Student Manual [ Church Educational System manual ឆ្នាំ ២០១៤ ] ទំព័រ ២៩១) ។