មេរៀនទី ១៥០
យូដាស
សេចក្ដីផ្ដើម
យូដាសបានដាស់តឿនសមាជិកសាសនាចក្រឲ្យខំតយុទ្ធ ដើម្បីការពារសេចក្តីជំនឿទាស់នឹងពួកគ្រូបង្រៀនក្លែងក្លាយនានា ។ លោកបានពិពណ៌នាអំពីគ្រូបង្រៀនក្លែងក្លាយ ហើយបានទូន្មានពួកបរិសុទ្ធឲ្យស្ថាបនាជីវិតរបស់ពួកគេលើដំណឹងល្អនៃព្រះយេស៊ូវគ្រីស្ទ ។ តាមប្រពៃណី យូដាសត្រូវបានគេយល់ថាជាប្អូនប្រុសពោះតែមួយរបស់ព្រះយេស៊ូវគ្រីស្ទ( សូមមើល ម៉ាថាយ ១៣:៥៥ ) ។ យូដាសទំនងជាសមាជិកសាសនាចក្រដ៏សកម្ម ហើយមានកិត្តិយខ្ពស់ម្នាក់នៅក្រុងយេរូសាឡិម ។
យោបល់សម្រាប់ការបង្រៀន
យូដាស ១:១-១៩
យូដាសដាស់តឿនសមាជិកសាសនាចក្រ ឲ្យខំតយុទ្ធដើម្បីការពារសេចក្តីជំនឿទាស់នឹងពួកគ្រូបង្រៀនក្លែងក្លាយ
សូមអានស្ថានភាពខាងក្រោមឮៗ ហើយសូមឲ្យសិស្សគិតថា ពួកគេនឹងឆ្លើយតបចំពោះស្ថានភាពទាំងនោះយ៉ាងដូចម្ដេច ៖
-
នៅក្នុងប្រព័ន្ធសង្គមមួយ មានមិត្តម្នាក់បានសរសេរប្រយោគរិះគន់ដល់គោលជំហរបស់សាសនាចក្រស្ដីពីការរៀបការភេទដូចគ្នា ។
-
មានអ្នកជិតខាងម្នាក់ដឹងថា អ្នកគឺជាសមាជិកសាសនាចក្រ ។ គាត់ប្រាប់អ្នកថា គាត់បានអានព្រះគម្ពីរមរមន ហើយទទួលអារម្មណ៍ថាវាគឺជាសៀវភៅដែលលើកស្ទួយចិត្តមួយក្បាលដ៏មានប្រយោជន៍ ប៉ុន្តែពុំមែនជាបន្ទូលរបស់ព្រះទេ ។
-
នៅឯការពិភាក្សាក្នុងថ្នាក់មួយនៅសាលារៀន មានមិត្តម្នាក់បានប្រកែកថា ការមើលរូបភាពអាសគ្រាមគឺជារឿងធម្មតា ហើយវាពុំគួរហាមឃាត់នោះទេ ។
-
តើវិធីខុសៗគ្នាបែបណាខ្លះ ដែលមនុស្សម្នាក់អាចឆ្លើយតបចំពោះស្ថានភាពទាំងនេះ ?
សូមអញ្ជើញសិស្សម្នាក់ឲ្យអាន យ៉ូដាស ១:៣-៤ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាយូដាសបានព្រមានសមាជិកសាសនាចក្រអំពីអ្វីខ្លះ ។
-
យោងតាម ខទី ៤តើយូដាសបានព្រមានសមាជិកសាសនាចក្រអំពីអ្វីខ្លះ ?
សូមជួយសិស្សឲ្យយល់ថា « មនុស្សទមិលល្មើស » ដែលមានបំណងអាក្រក់បានក្លាយជាផ្នែកមួយនៃសមាជិកភាពក្នុងសាសនាចក្រ ។ សមាជិកទាំងនេះក្នុងសាសនាចក្របានលើកកម្ពស់ទម្លាប់ពុករលួយ ហើយអសីលធម៌ដោយបង្រៀនថា គោលលទ្ធិនៃព្រះគុណបានអនុញ្ញាតឲ្យធ្វើអំពើបាប ដោយសារព្រះនឹងអត់ទោសដោយសេចក្ដីមេត្តាករុណា ។ ពួកគេក៏បានបដិសេធសេចក្ដីពិតជាក់លាក់អំពីព្រះវរបិតាសួគ៌ និង ព្រះយេស៊ូវគ្រីស្ទផងដែរ ។ ឃ្លាថា « ពួកអ្នកដែលមានទោសកត់ទុក តាំងពីដើមមក » ( ខទី ៤ ) មានន័យថា ការដាក់ទោសដល់មនុស្សបែបនេះត្រូវបានសរសេរទុកជាយូរមកហើយ ។
-
នៅក្នុងពន្លឺនៃការបង្រៀនខុសឆ្គង និងការប្រព្រឹត្តអំពើពុករលួយ ដែលមនុស្សទាំងនេះកំពុងធ្វើឲ្យសាយភាយ តើយូដាសបានទូន្មានឲ្យសមាជិកសាសនាចក្រស្មោះត្រង់ធ្វើអ្វីខ្លះ ? ( « ឲ្យខំតយុទ្ធដើម្បីការពារសេចក្ដីជំនឿ » [ ខទី៣ ] ) ។
សូមពន្យល់ថា « សេចក្តីជំនឿ ដែលបានប្រគល់មកពួកបរិសុទ្ធ១ដងជាសំរេច » ( ខទី ៣ ) សំដៅទៅលើដំណឹងល្អនៃព្រះយេស៊ូវគ្រីស្ទ—សេចក្ដីពិត ក្រឹត្យវិន័យ និងពិធីបរិសុទ្ធ ដែលព្រះអង្គសង្គ្រោះ និងពួកសាវករបស់ទ្រង់បានបង្រៀន ។
-
តើយើងអាចរៀនសេចក្ដីពិតអ្វីខ្លះ អំពីការទទួលខុសត្រូវនៃពួកសិស្សរបស់ព្រះយេស៊ូវគ្រីស្ទ នៅក្នុងប្រឈមនឹងការបង្រៀនខុសឆ្គង និងការប្រព្រឹត្តអំពើពុករលួយទាំងឡាយ ? (សិស្សអាចប្រើពាក្យផ្ទាល់ខ្លួនរបស់ពួកគេ ដើម្បីបង្ហាញអំពីសេចក្ដីពិតដូចតទៅនេះ ៖ ពួកសិស្សរបស់ព្រះយេស៊ូវគ្រីស្ទគួរខំតយុទ្ធ ដើម្បីការពារដំំណឹងល្អនៃព្រះយេស៊ូវគ្រីស្ទទាស់នឹងការបង្រៀនខុសឆ្គង និងការប្រព្រឹត្តអំពើពុករលួយ ) ។
-
តើអ្នកគិតថា ការខំតយុទ្ធដើម្បីការពារដំណឹងល្អមានន័យយ៉ាងណា ? (យើងត្រូវបង្រៀន ហើយថ្លែងទីបន្ទាល់អំពីដំណឹងល្អដោយភាពក្លាហាន ។ ប៉ុន្តែ យើងត្រូវធ្វើកិច្ចការនេះដោយមានចិត្តមេត្តា គ្មានជិះជាន់ ឬការទាស់ទែងគ្នាឡើយ [ សូមមើល អាលម៉ា ៣៨:១២, នីហ្វៃទី៣ ១១:២៩ ] ) ។
-
តើយើងអាចការពារដំណឹងល្អ ដោយគ្មានការទាស់ទែងគ្នាបានយ៉ាងដូចម្ដេច ?
ចូររំឭកសិស្សអំពីស្ថានភាពដែលបានលើកឡើងខាងដើមក្នុងមេរៀននេះ ។
-
នៅក្នុងសា្ថនភាពទាំងនេះ និងស្ថានភាពស្រដៀងគ្នាដែរ តើវិធីណាខ្លះ ដែលយើងអាចការពារដំណឹងល្អទាស់នឹងការបង្រៀនខុសឆ្គង និងការប្រព្រឹត្តអំពើពុករលួយទាំងឡាយ ?
សូមអញ្ជើញសិស្សម្នាក់ឲ្យអានដំណើររឿងខាងក្រោមដោយអែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ។ សូមឲ្យសិស្សក្នុងថ្នាក់ស្ដាប់រកថា យុវនារីនោះបានតយុទ្ធការពារដំណឹងល្អយ៉ាងដូចម្ដេច ។
« ថ្មីៗនេះ ខ្ញុំបាននិយាយជាមួយនឹងក្មេងស្រីថ្នាក់ឡូរ៉លម្នាក់ រស់នៅសហរដ្ឋអាមេរិក ។ ខ្ញុំសូមដកស្រង់ពីអ៊ីម៉ែលរបស់នាង ៖
« ‹ កាលពីឆ្នាំមុន មិត្តភក្ដិរបស់ខ្ញុំនៅលើហ្វេសប៊ុកមួយចំនួន បានចាប់ផ្ដើមប្រកាសអំពីគោលជំហររបស់ពួកគេអំពីរឿងអាពាហ៍ពិពាហ៍ ។ មនុស្សជាច្រើនពេញចិត្តនឹងអាពាហ៍ពិពាហ៍ភេទដូចគ្នា ហើយពួកយុវវ័យអិលឌីអេសជាច្រើនបានបង្ហាញថា ពួកគេបាន « ចូលចិត្ត » ការប្រកាសទាំងនោះ ។ ខ្ញុំមិនបានបញ្ចេញមតិអ្វីសោះឡើយ ។
« ‹ ខ្ញុំបានសម្រេចចិត្តប្រកាសអំពីជំនឿខ្ញុំ លើការរៀបការបែបប្រពៃណី តាមវិធីដ៏ប្រុងប្រយ័ត្នមួយ ។
« ‹ ដោយដាក់រូបភាពលើប្រូហ្វាលរបស់ខ្ញុំ ខ្ញុំបានបន្ថែមចំណងជើងថា « ខ្ញុំជឿលើអាពាហ៍ពិពាហ៍រវាងបុរសម្នាក់ និងស្ដ្រីម្នាក់ » ។ មិនបានមួយសន្ទុះផង ខ្ញុំបានចាប់ផ្ដើមទទួលបានសារជាច្រើន ។ « អ្នកអាត្មានិយមពេកហើយ » ។ « អ្នកកំពុងតែកាត់សេចក្ដីគេ » ។ មានម្នាក់នោះ បានប្រៀបធៀបខ្ញុំទៅនឹងម្ចាស់ទាសករម្នាក់ ។ ហើយខ្ញុំបានទទួលការបង្ហោះនេះមកពីមិត្តដ៏សំខាន់ម្នាក់របស់ខ្ញុំ ដែលជាសមាជិកនៃសាសនាចក្រដ៏រឹងមាំម្នាក់ ៖ « ឯងត្រូវរស់នៅតាមកាលសម័យ ។ អ្វីៗប្រែប្រួល ហើយឯងក៏គួរតែប្រែប្រួលដែរ » ។
នាងបានថ្លែងថា « ‹ ខ្ញុំមិនបានឈ្លោះតបវិញទេ តែខ្ញុំក៏មិនបានដកយកពាក្យសំដីខ្ញុំចេញវិញដែរ › ។
« នាងបានបញ្ចប់ថា ‹ ពេលខ្លះ ដូចជាប្រធានម៉នសុន បានមានប្រសាសន៍ថា « បងប្អូនត្រូវតែឈរម្នាក់ឯង » ។ ខ្ញុំសង្ឃឹមថា ក្នុងនាមជាយុវវ័យ យើងនឹងឈររួមគ្នាមានភក្ដីភាពចំពោះព្រះ និងចំពោះការបង្រៀនទាំងឡាយរបស់ព្យាការីនៅរស់របស់ទ្រង់ › » ( « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ទំព័រ ១៩–២០ ) ។
-
តើយុវនារីនេះបានការពារដំណឹងល្អយ៉ាងដូចម្ដេច ?
-
តើអ្នក ឬមនុស្សម្នាក់ដែលអ្នកស្គាល់ធ្លាប់ការពារដំណឹងល្អនៃព្រះយេស៊ូវគ្រីស្ទនៅពេលណា ? តើអ្នកបានរៀនអ្វីខ្លះតាមរយៈបទពិសោធន៍នោះ ?
សូមឲ្យសិស្សសញ្ជឹងគិតថា ពួកគេអាចធ្វើអ្វីខ្លះ ដើម្បីខំតយុទ្ធការពារដំណឹងល្អនៃព្រះយេស៊ូវគ្រីស្ទ ។ សូមលើកទឹកចិត្តឲ្យពួកគេធ្វើតាមការបំផុសគំនិតទាំងឡាយ ដែលពួកគេទទួលបាន ។
សូមសង្ខេប យូដាស ១:៥–៧ ដោយពន្យល់ថា យូដាសបានប្រៀបធៀបសមាជិកសាសនាចក្រ ដែលបះបោរទាំងនេះទៅនឹងប្រជាជននៅក្នុងសម័យព្រះគម្ពីរសញ្ញាចាស់ ដែលបានបះបោរទាស់នឹងព្រះ ហើយរងគ្រោះដោយការកាត់សេចក្ដីរបស់ទ្រង់ ។ មនុស្សទាំងនេះរួមបញ្ចូលទាំងកូនចៅអ៊ីស្រាអែលជាច្រើន ដែលត្រូវបានបំផ្លាញចោលនៅក្នុងទីរហោស្ថាន និងប្រជាជននៃទីក្រុងស៊ូដុំម និង ក្រុងកូម៉ូរ៉ាដែលត្រូវបានបំផ្លាញចោលដោយភ្លើង ។ យូដាសក៏បានប្រៀបធៀបសមាជិកសាសនាចក្រដែលបះបោរ ទៅនឹងជនដែលបះបោរទាស់នឹងព្រះនៅក្នុង « សណ្ឋានដើមរបស់ខ្លួន » ឬជីវិតមុនផែនដី ហើយត្រូវបានបណ្ដេញចេញពីវត្តមានរបស់ទ្រង់ ( យូដាស ១:៦, សូមមើលផងដែរ អ័ប្រាហាំ ៣:២២–២៦ ) ។
ចូរសរសេរចំណងជើងដូចខាងក្រោមនៅលើក្ដារខៀន ៖ បុគ្គលិកលក្ខណៈនៃពួកគ្រូបង្រៀនក្លែងក្លាយ ។
សូមពន្យល់ថា នៅក្នុង យូដាស ១:៨–១៦យើងបានអានអំពីការពិពណ៌របស់យូដាសទាក់ទងនឹងបុគ្គលិកលក្ខណៈជាច្រើន ដែលនឹងជួយសមាជិកសាសនាចក្រស្គាល់ជនដែលកំពុងបង្រៀនទស្សនវិជ្ជា និងការប្រព្រឹត្តអំពើពុករលួយនៅក្នុងសាសនាចក្រ ។ ដើម្បីបង្ហាញអំពីគំនិតនេះ សូមចង្អុលបង្ហាញឃ្លា « គេជាពពកឥតទឹក ដែលត្រូវខ្យល់បក់ផាត់ទៅមក » និង « ជាដើមឈើឥតផ្លែ » នៅក្នុង យូដាស ១:១២ ។
-
តើពួកគ្រូបង្រៀនក្លែងក្លាយអាចប្រៀបបាននឹងពពកឥតទឹក និងដើមឈើឥតផ្លែបានយ៉ាងដូចម្ដេច ?
សូមបំបែកសិស្សជាក្រុមដែលមានគ្នាបី ឬបួននាក់ ។ សូមណែនាំឲ្យសិស្សអាន យូដាស ១:៨, ១០, ១៤–១៩ ជាមួយសមាជិកក្រុមរបស់ពួកគេ រកមើលបុគ្គលិកលក្ខណៈបន្ថែមទៀតនៃពួកគ្រូបង្រៀនក្លែងក្លាយ ។ សូមឲ្យសិស្សពិចារណាពីអ្វីដែលពួកគេរកឃើញ ។ អ្នកអាចនឹងត្រូវពន្យល់ថា « ជាន់ក្រោយបង្អស់ » ( ខទី ១៨ ) សំដៅទៅលើគ្រាដែលយូដាសបានរស់នៅ ក៏ដូចជាថ្ងៃ ចុងក្រោយដែលយើងរស់នៅផងដែរ ។
បន្ទាប់ពីឲ្យពេលគ្រប់គ្រាន់ហើយ សូមអញ្ជើញសិស្សឲ្យឡើងមក ក្ដារខៀន ហើយសរសេរបុគ្គលិកលក្ខណៈនៃពួកគ្រូបង្រៀនក្លែងក្លាយដែលពួកគេបានរកឃើញ ។ បុគ្គលិកលក្ខណៈដែលសិស្សអាចសរសេររួមមានដូចតទៅ ( អ្នកអាចនឹងត្រូវប្រើឃ្លាទាំងនេះមួយចំនួនដើម្បីជួយសិស្សឲ្យយល់អំពីអ្វីដែលពួកគេបានអាន ) ៖
បុគ្គលិកលក្ខណៈនៃពួកគ្រូបង្រៀនក្លែងក្លាយ
ធ្វើឲ្យខ្លួនស្មោកគ្រោកនឹងរឿងអសីលធម៌ ( ខទី ៨ )
មើលងាយសិទ្ធិអំណាច ហើយជេរប្រមាថដល់ពួកប្រសើរឧត្តម ( ខទី ៨ )
ជេរប្រមាថដល់ទាំងអ្វីៗ ដែលគេមិនយល់ ( ខទី ១០ )
បង្ខូចខ្លួនដោយរស់នៅតាមចំណេះដឹងខាងសាច់ឈាមដែលពួកគេមាន ( ខទី ១០ )
ប្រព្រឹត្តធ្វើដោយចិត្តល្មើស ( ខទី ១៥ )
ពោលពាក្យប្រមាថទាស់នឹងព្រះ ( ខទី ១៥ )
រអ៊ូរទាំ ហើយត្អូញត្អែរ ( ខទី ១៦ )
ដើរតាមតែសេចក្ដីប៉ងប្រាថ្នារបស់ខ្លួន ( ខទី ១៦ )
អួតអាង ( ខទី ១៦ ) ។
សរសើរមនុស្សដទៃដើម្បីបានប្រយោជន៍ផ្ទាល់ខ្លួន ( ខទី ១៦ )
ចំអកឲ្យសាសនាចក្ររបស់ព្រះអម្ចាស់ និងបទដ្ឋានរបស់សាសនាចក្រ ( ខទី ១៨ )
ញែកខ្លួនពួកគេចេញពីពួកអ្នកជឿ ( ខទី ១៩ )
គិតហើយធ្វើតាមរបៀបខាងសាច់ឈាម ( ខទី ១៩ )
គ្មានព្រះវិញ្ញាណទេ ( ខទី ១៩ )
-
តើការគ្មានព្រះវិញ្ញាណដឹកនាំទៅរកការអភិវឌ្ឍបុគ្គលិកលក្ខណៈ ដែលមាននៅលើក្ដារខៀនយ៉ាងដូចម្ដេច ?
-
ហេតុអ្វីក៏វាសំខាន់ដើម្បីស្គាល់បុគ្គលិកលក្ខណៈរបស់ពួកគ្រូបង្រៀនក្លែងក្លាយ ?
សូមជួយសិស្សឲ្យយល់ថា ពុំមែនមនុស្សគ្រប់គ្នាដែលមានបុគ្គលិកលក្ខណៈមួយ ឬច្រើននៃបុគ្គលិកលក្ខណៈទាំងនេះ ឬអ្នកដែលបង្រៀនពុំត្រឹមត្រូវគឺជាគ្រូបង្រៀនក្លែងក្លាយទាំងអស់ ដូចដែលយូដាសបានពិពណ៌នានោះទេ ។ បុគ្គលបែបនេះអាចធ្វើខុសដោយអចេតនា នៅក្នុងការយល់ឃើញរបស់គាត់អំពីប្រធានបទមួយ ។ ប៉ុន្តែ បុគ្គលិកលក្ខណៈទាំងនេះអាចជួយយើងឲ្យស្គាល់ពីគ្រូបង្រៀនក្លែងក្លាយ ដែលមានបំណងធ្វើឲ្យសេចក្ដីជំនឿ និងការគោរពប្រតិបត្តិរបស់មនុស្សដទៃចុះខ្សោយដោយបោកបញ្ឆោតពួកគេ ហើយលើកកម្ពស់អំពើអាក្រក់ឡើង ។
សូមឲ្យសិស្សរំឭកឡើងវិញនូវ យូដាស១:១៧-១៨ ដោយស្ងៀមស្ងាត់ ។
-
តើនរណាធ្លាប់ព្រមានដល់សមាជិកសាសនាចក្រ កាលពីមុនអំពីពួកគ្រូបង្រៀនក្លែងក្លាយ ?
-
តើយើងអាចរៀនសេចក្ដីពិតអ្វីខ្លះនៅក្នុងខគម្ពីរទាំងនេះ ទាក់ទងនឹងរបៀបដែលពួកសាវក និងពួកព្យាការីអាចជួយយើងនៅក្នុងការខិតខំរបស់យើងឲ្យតយុទ្ធទាស់នឹងពួកគ្រូបង្រៀនក្លែងក្លាយ ? ( សិស្សអាចនឹងប្រើពាក្យផ្ទាល់ខ្លួន ប៉ុន្តែពួកគេគួរស្គាល់សេចក្ដីពិតមួយដូចតទៅនេះ ៖ ពួកសាវក និងពួកព្យាការីព្រមានយើង ហើយជួយយើងឲ្យស្គាល់ជន ដែលខិតខំធ្វើឲ្យសេចក្ដីជំនឿ និងការគោរពប្រតិបត្តិរបស់យើងចុះខ្សោយ ។ សូមសរសេរសេចក្ដីពិតនេះនៅលើក្ដារខៀន ) ។
សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយអែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ឲ្យឮៗ ។ ចូរសុំឲ្យសិស្សក្នុងថ្នាក់ស្ដាប់រកថា ប្រសាសន៍របស់លោកឆ្លុះបញ្ចាំងអំពីសេចក្ដីពិតនេះយ៉ាងដូចម្ដេច ។
« នៅថ្ងៃនេះ យើងព្រមានបងប្អូនថា មានពួកព្យាការី និងពួកគ្រូបង្រៀនក្លែងក្លាយជាច្រើន ហើយប្រសិនបើយើងពុំប្រយ័ត្នប្រយែងទេ សូម្បីតែជនដែលស្ថិតនៅក្នុងចំណោមសមាជិកស្មោះត្រង់ក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយក៏ដោយ ក៏នឹងធ្លាក់ខ្លួនក្លាយជាជនរងគ្រោះដោយការបោកបញ្ឆោតរបស់ពួកគេដែរ » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦២ ) ។
-
ដោយពិចារណាពីសេចក្ដីពិតនេះ ហេតុអ្វីក៏វាសំខាន់ដើម្បីសិក្សាប្រសាសន៍របស់ពួកសាវក និងពួកព្យាការីទាំងឡាយ ?
-
តើការបង្រៀនក្លែងក្លាយមួយចំនួន ដែលពួកព្យាការី និងពួកសាវកបច្ចុប្បន្នបានព្រមានដល់យើងមានអ្វីខ្លះ ?
យូដាស១:២០–២៥
យូដាសទូន្មានពួកបរិសុទ្ធឲ្យស្ថាបនាជីវិតរបស់ពួកគេនៅលើដំណឹងល្អនៃព្រះយេស៊ូវគ្រីស្ទ ហើយជួយសង្គ្រោះដល់មនុស្សដទៃ
ចូរសរសេរឃ្លាពុំពេញលេញដូចតទៅនេះនៅលើក្ដារខៀន ៖ យើងអាចបន្តស្មោះចំពោះសេចក្ដីជំនឿតាមរយៈ …
សូមអញ្ជើញសិស្សម្នាក់អាន យូដាស ១:២០-២១ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលថា យូដាសបានទូន្មានឲ្យពួកបរិសុទ្ធធ្វើអ្វីខ្លះ ដើម្បីបន្តស្មោះចំពោះសេចក្ដីជំនឿនោះ ។ អ្នកអាចនឹងត្រូវពន្យល់ថា « ទាំងអធិស្ឋាន ដោយនូវព្រះវិញ្ញាណបរិសុទ្ធ » មានន័យថា ការអធិស្ឋានដោយសុំជំនួយនៃការបំផុសគំនិតមកពីព្រះវិញ្ញាណបរិសុទ្ធ ។
-
យោងតាម ខទី ២០–២១ តើអ្នកនឹងបំពេញឃ្លានៅលើក្ដារខៀនយ៉ាងដូចម្ដេច ? ( របៀបមួយដែលសិស្សអាចបំពេញឃ្លានោះគឺដូចតទៅនេះ ៖ យើងអាចបន្តស្មោះចំពោះសេចក្ដីជំនឿដោយស្ថាបនាជីវិតរបស់យើង នៅលើដំណឹងល្អនៃព្រះយេស៊ូវគ្រីស្ទ ) ។
-
តើការធ្វើតាមការណែនាំបន្ថែមទៀតរបស់យូដាសនៅក្នុងខទី ២០-២១អាចជួយយើងឲ្យស្ថាបនាជីវិតរបស់យើង នៅលើដំណឹងល្អបានយ៉ាងដូចម្ដេច ?
-
ហេតុអ្វីការបន្តស្មោះចំពោះសេចក្ដីជំនឿ គឺជាការខិតខំដ៏មានតម្លៃ ?
-
តើការរស់នៅតាមពាក្យទូន្មានរបស់យូដាសធ្លាប់បានជួយអ្នក ឬមនុស្សដែលអ្នកស្គាល់ឲ្យបន្តស្មោះចំពោះសេចក្ដីជំនឿយ៉ាងដូចម្ដេច ?
សូមអញ្ជើញសិស្សឲ្យសរសេរអំពីវិធីមួយ ដែលពួកគេអាចកែលម្អ នៅក្នុងការធ្វើតាមពាក្យទូន្មានរបស់ប៉ុលនៅក្នុងកំណត់ហេតុសិក្សាព្រះគម្ពីរ ឬសៀវភៅកត់ត្រាក្នុងថ្នាក់របស់ពួកគេ ។ សូមលើកទឹកចិត្តពួកគេឲ្យអនុវត្តអ្វីដែលពួកគេបានសរសេរ ។
សូមសង្ខេប យូដាស ១:២២–២៥ ដោយពន្យល់ថា យូដាសបានទូន្មានដល់សមាជិកសាសនាចក្រដ៏ស្មោះត្រង់ ឲ្យជួយមនុស្សដទៃដែលកំពុងជួបបញ្ហាខាងវិញ្ញាណ ដែលអាចនឹងកើតឡើង ដោយសារឥទ្ធិពលនៃពួកគ្រូបង្រៀនក្លែងក្លាយ ហើយបានថ្វាយការសរសើរចំពោះព្រះ ។
សូមបញ្ចប់ដោយការចែកចាយទីបន្ទាល់របស់អ្នកអំពីសេចក្ដីពិតទាំងឡាយ ដែលបានពិភាក្សានៅក្នុងមេរៀននេះ ។
![]()
រូបភាពscripture mastery icon
សូមចាត់វគ្គចំណេះចំណានខគម្ពីរខុសៗគ្នាមួយឲ្យសិស្សម្នាក់ៗ ។ សូមណែនាំសិស្សឲ្យសរសេរអំពីសាច់រឿងជីវិតពិតមួយនៅលើក្រដាសមួយសន្លឹក ដែលអាចមាននូវគោលលទ្ធិ និងគោលការណ៍ទាំងឡាយដែលមាននៅក្នុងវគ្គចំណេះចំណានខគម្ពីរ ដែលបានចាត់ឲ្យពួកគេអាននោះ ។ បន្ទាប់ពីសិស្សបញ្ចប់ការសរសេរហើយ សូមប្រមូលសាច់រឿងរបស់ពួកគេ ។ សូមអានសាច់រឿងពីរបី ហើយអញ្ជើញសិស្សឲ្យចែកចាយអំពីរបៀបដែលគោលលទ្ធិ និង គោលការណ៍ទាំងឡាយនៅក្នុងវគ្គចំណេះចំណានខគម្ពីរអាចយកទៅប្រើ ហើយអនុវត្តដល់សាច់រឿងនីមួយៗ ។ អ្នកអាចបង្ហាញសាច់រឿងមួយចំនួននៅដើម ឬ ចុងមេរៀននៅសប្ដាហ៍ក្រោយ ។
សេចក្តីពន្យល់ និង ព័ត៌មានសាច់រឿង
យូដាស១:៣ ។ « ខំតយុទ្ធ ដើម្បីការពារសេចក្តីជំនឿ »
អែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានបង្រៀនអំពីការការពារដំណឹងល្អនៃព្រះយេស៊ូវគ្រីស្ទទាស់នឹងការបង្រៀនក្លែងក្លាយ និងការប្រព្រឹត្តអំពើពុករលួយ ៖
« នៅពេលអំពើអាក្រក់ចង់បំផ្លាញ ហើយរារាំងកត្តាដ៏សំខាន់នៃកិច្ចការរបស់ព្រះ នោះវានឹងវាយប្រហារមកលើក្រុមគ្រួសារ ។ វាធ្វើដូច្នេះដោយព្យាយាមបដិសេធច្បាប់ព្រហ្មចារីភាព បំភ័ន្តភេទ ធ្វើឲ្យអំពើហឹង្សាថាជារឿងមួយដែលទទួលយកបាន ធ្វើឲ្យពាក្យសម្ដីគ្រោតគ្រាត ហើយប្រមាថថាជារឿងធម្មតា ហើយធ្វើឲ្យឥរិយាបថអសីលធម៌ ហើយសង្គមមិនទទួលយកទៅជារឿងដែលទំនងជាត្រូវតែធ្វើ ដែលចៀសពុំបាន ។
« យើងត្រូវចងចាំអំពីសម្ដីរបស់អេដម៉ាន់ ប៊ឺក ៖ ‹ រឿងចាំបាច់តែមួយគត់ដែលធ្វើឲ្យអំពើអាក្រក់មានជ័យជំនះ គឺរារាំងមនុស្សល្អកុំឲ្យធ្វើអ្វីទាំងអស់ › [ attributed in John Bartlett, comp., Familiar Quotations កំណែទី១៥ ( ឆ្នាំ ១៩៨០ ) ទំព័រ ix ] ។ យើងត្រូវបន្លឺសំឡេងជាមួយនឹងពលរដ្ឋផ្សេងទៀត ដែលមានការព្រួយបារម្ភនៅជុំវិញពិភពលោកដើម្បីទាស់នឹងនិន្នាការបច្ចុប្បន្ន » ( « Let Our Voices Be Heard » Ensign ឬ Liahona ខែ វិច្ឆិកា ឆ្នាំ ២០០៣ ទំព័រ ១៨ ) ។
ពួកសាវកបច្ចុប្បន្នបានណែនាំសមាជិកសាសនាចក្រស្ដីពីរបៀបការពារដំណឹងល្អដោយគ្មានការឈ្លោះប្រកែកគ្នា ។ ឧទាហរណ៍ សូមមើល អែលឌើរ រ៉ូបឺត ឌី ហែល « Christian Courage: The Price of Discipleship » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ៧២–៧៥ , អែលឌើរ ជែហ្វ្រី អ័រ ហូឡិន « The Cost and Blessings of Discipleship » Ensign ឬ Liahona ខែ ឧសភា ឆ្នាំ ២០១៤ ទំព័រ ៦–៩ និង អែលឌើរ ដាល្លិន អេក អូក « Loving Others and Living with Differences » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ២៥–២៨ ។
យូដាស ១:៩, ១៤-១៥ ។ គម្ពីរអ័ប៉ូគ្រីផា
យូដាសប្រហែលជាហៅគម្ពីរអ័ប៉ូគ្រីផាថាជាការសន្មតរបស់ម៉ូសេ ( សូមមើល ខទី ៩ ) និងជាគម្ពីរហេណុក ( សូមមើល ខទី១៤–១៥ ) ។ ព្រះអម្ចាស់បានបើកសម្ដែងថា រឿងជាច្រើនដែលមាននៅក្នុងគម្ពីរអ័ប៉ូគ្រីផាគឺជារឿងត្រឹមត្រូវ ហើយជនដែលបានទទួលការបំភ្លឺដោយព្រះវិញ្ញាណអាចទទួលប្រយោជន៍មកពីការអានវា ។ ប៉ុន្តែ គម្ពីរមួយចំនួននៅក្នុងគម្ពីរទាំងនោះមាននូវពាក្យបន្ថែមដែលបង្ខូចអត្ថបទដើម ( សូមមើល គ. និង ស. ៩១ ) ។ សម្រាប់ព័ត៌មានបន្ថែមអំពីអ័ប៉ូគ្រីផា សូមមើលសេចក្ដីណែនាំដល់បទគម្ពីរទាំងឡាយ « អ័ប៉ូគ្រីផា » ។