មេរៀនទី ៧០
យ៉ូហាន ១០
សេចក្ដីផ្ដើម
ព្រះយេស៊ូវបានបង្រៀនថា ទ្រង់គឺជាអ្នកគង្វាលល្អ ហើយថាទ្រង់នឹងលះបង់ជីវិតរបស់ទ្រង់ដើម្បីចៀមរបស់ទ្រង់ ។ ទ្រង់ក៏បានថ្លែងទីបន្ទាល់ថា ព្រះវរបិតាសួគ៌បានប្រទានអំណាចឲ្យយកឈ្នះលើសេចក្ដីស្លាប់ដល់ទ្រង់ផងដែរ ។ មនុស្សមួយចំនួនបានចោទព្រះយេស៊ូវអំពីថា ទ្រង់ប្រមាថព្រះ ដោយសារតែការប្រកាសថាទ្រង់គឺជាព្រះរាជបុត្រានៃព្រះ ។
យោបល់សម្រាប់ការបង្រៀន
យ៉ូហាន ១០:១-២៤
ព្រះយេស៊ូវបានបង្រៀនថា ទ្រង់គឺជាអ្នកគង្វាលល្អ ហើយថាទ្រង់នឹងលះបង់ជីវិតរបស់ទ្រង់ដើម្បីប្រជារាស្ត្ររបស់ទ្រង់
សូមអញ្ជើញសិស្សម្នាក់ឲ្យឡើងមកខាងមុខក្ដារខៀន ។ ចូរយកកន្សែងបិទមុខសិស្ស រួចប្រមូលព្រះគម្ពីរបីបួនក្បាល រួមទាំងព្រះគម្ពីររបស់សិស្សដែលបានបិទមុខនោះផងដែរ ។ ចូរសុំឲ្យសិស្សដែលបានបិទមុខជិតនោះស្ទាបព្រះគម្ពីរនីមួយៗ ហើយសាកល្បងសម្រេចថាតើព្រះគម្ពីរមួយណាជារបស់ខ្លួន ។ បន្ទាប់ពីសិស្សនោះបានសាកល្បងធ្វើកិច្ចការនោះមក ចូរសួរ ៖
-
ហេតុអ្វីអ្នកអាច ( ឬមិនអាច ) សម្រេចថា ព្រះគម្ពីរមួយណាជារបស់ខ្លួន ?
-
ប្រសិនបើខ្ញុំឲ្យអ្នកស្ទាបមុខមិត្តរួមថ្នាក់ម្នាក់ៗ តើអ្នកគិតថា អ្នកអាចស្មានដឹងត្រូវបានប៉ុន្មាននាក់ ? ( ចូរកុំសុំឲ្យសិស្សធ្វើរឿងនេះ ) ។
សូមអញ្ជើញសិស្សឲ្យដោះកន្សែងចេញ ហើយត្រឡប់ទៅកន្លែងអង្គុយរបស់ខ្លួនវិញ ។ សូមពន្យល់ថា មានគ្រាមួយអ្នកគង្វាលនៅក្នុងបញ្ចឹមប្រទេសត្រូវបានគេទទួលថា តើគាត់ស្គាល់ចៀមរបស់គាត់ច្បាស់ប៉ុណ្ណា ។ គាត់បានឆ្លើយថា « ប្រសិនបើអ្នកយកក្រណាត់មកបិទភ្នែករបស់ខ្ញុំ ហើយយកចៀមណាមួយក៏បាន ហើយគ្រាន់តែឲ្យខ្ញុំដាក់ដៃលើមុខរបស់វា នោះខ្ញុំអាចប្រាប់ភ្លាមថាវាជាចៀមរបស់ខ្ញុំ ឬមិនមែនជាចៀមរបស់ខ្ញុំ ( ជី អិម ម៉ាក់គី [ គ្មានកាលបរិច្ឆេទ ] ទំព័រ ៣៥ ) ។
-
ប្រសិនបើអ្នកគឺជាអ្នកគង្វាល តើអ្នកគិតថា អ្នកធ្វើអ្វីដើម្បីស្គាល់ចៀមនៅក្នុងហ្វូងចៀមរបស់អ្នក ដូចដែលអ្នកគង្វាលចៀមម្នាក់នេះបានធ្វើ ?
សូមអញ្ជើញសិស្សអាន យ៉ូហាន ១០:១៤ ដោយស្ងៀមស្ងាត់ ហើយរកមើលអ្វី ដែលព្រះយេស៊ូវបានហៅដល់អង្គទ្រង់ ។ ចូរសុំពួកគេឲ្យរាយការណ៍ពីអ្វីដែលពួកគេរកឃើញ ។ សូមសរសេរសេចក្ដីថ្លែងការណ៍នេះនៅលើក្ដារខៀន ៖ ព្រះយេស៊ូវគ្រីស្ទគឺជាអ្នកគង្វាលល្អ ។
-
ហេតុអ្វីអ្នកគិតថា « អ្នកគង្វាលល្អ » គឺជាងារមួយដ៏សមត្រឹមត្រូវសម្រាប់ព្រះអង្គសង្គ្រោះ ?
កាលសិស្សសិក្សា យ៉ូហាន ១០ សូមលើកទឹកចិត្តពួកគេឲ្យរកមើលសេចក្ដីពិត ដែលបង្រៀនយើងពីរបៀបដែលព្រះអង្គសង្គ្រោះគឺជាអ្នកគង្វាលដ៏ល្អរបស់យើង ។
ដើម្បីជួយសិស្សឲ្យយល់ពី មជ្ឈដ្ឋាន វប្បធម៌នៅក្នុង យ៉ូហាន ១០:១–៥សូមពន្យល់ថា នៅសម័យព្រះអង្គសង្គ្រោះ ពួកអ្នកគង្វាលបាននាំហ្វូងសត្វរបស់ខ្លួនទៅរកស៊ី ផឹកទឹក ហើយសម្រាកនៅពេលថ្ងៃ ។ នៅពេលយប់ អ្នកគង្វាលមួយចំនួនកៀងហ្វូងចៀមរបស់ខ្លួនទៅក្រោលរួមគ្នាមួយ ។ ក្រោលចៀមគឺជារូងមួយ ឬបរិវេណដែលមានជញ្ជាំងថ្មបិទជុំជិត ដែលមានបន្លាមុតស្រួចដាក់នៅខាងលើចុងចម្រឹងជញ្ជាំងនោះ ដើម្បីការពារសត្វព្រៃចូលមកក្នុងក្រោល ។
សូមចែកសិស្សជាគូ ។ សូមអញ្ជើញដៃគូនីមួយៗអាន យ៉ូហាន ១០:១–៥ឲ្យឮៗរួមគ្នា ហើយរកមើលអ្វីដែលអ្នកគង្វាលល្អធ្វើ ។ ក្រោយពីទុកពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យប្រាប់ពីអ្វី ដែលពួកគេបានរកឃើញ ។ សូមសរសេរចម្លើយរបស់ពួកគេនៅលើក្ដារខៀន ក្រោមឃ្លា ព្រះយេស៊ូវគ្រីស្ទគឺជាអ្នកគង្វាលល្អ ។ ( ចម្លើយអាចរួមមានដូចខាងក្រោម ៖ ទ្រង់យាងចូលតាមទ្វារ ទ្រង់ហៅចៀមរបស់ទ្រង់តាមឈ្មោះ ហើយទ្រង់នៅពីមុខចៀមរបស់ទ្រង់ ) ។
-
យោងតាម ខទី ៣តើអ្នកគង្វាលនាំចៀមខ្លួនចេញពីក្រោលតាមរបៀបណា ?
-
យោងតាម ខទី ៤–៥ហេតុអ្វីបានជាចៀមធ្វើតាមតែអ្នកគង្វាលនេះប៉ុណ្ណោះ ?
-
តើព្រះអង្គសង្គ្រោះបានហៅ អស់អ្នកដែលព្យាយាមចូលទៅក្នុងក្រោលតាមផ្លូវផ្សេងក្រៅពីទ្វារចូលនោះ ថាដូចម្ដេច ?
សូមពន្យល់ថា ពួកផារិស៊ីស្ថិតនៅក្នុងចំណោមក្រុមមនុស្សដែលព្រះយេស៊ូវកំពុងមានបន្ទូល ( សូមមើល យ៉ូហាន ៩:៤១ ) ។
-
តើពួកផារិស៊ីប្រៀបបាននឹងពួកចោរឆក់ ពួកចោរប្លន់ និងពួកមនុស្សចំឡែកនៅក្នុងក្រោលបានយ៉ាងដូចម្ដេច ?
សូមអញ្ជើញសិស្សអានយ៉ូហាន ១០:៦ដោយស្ងាត់ស្ងៀម ហើយរកមើលការឆ្លើយតបរបស់ពួកផារិស៊ី ទៅនឹងការបង្រៀនព្រះអង្គសង្គ្រោះ ។ ចូរសុំពួកគេឲ្យរាយការណ៍ពីអ្វីដែលពួកគេរកឃើញ ។
ដូចដែលបានកត់ត្រានៅក្នុង យ៉ូហាន ១០:៧–១៦ចូរពន្យល់ថា ព្រះអង្គសង្គ្រោះបានបន្តបង្រៀនអំពីភាពខុសគ្នារវាងទ្រង់ និងពួកផារិស៊ី ។ សូមអញ្ជើញសិស្សម្នាក់អាន ខទី ៧-១០ ឲ្យឮៗ រូមទាំងការបកប្រែដោយយ៉ូសែប ស្ម៊ីធនៅក្នុងខទី ៨ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលការបង្រៀនរបស់ព្រះយេស៊ូវនៅក្នុងខគម្ពីរទាំងនេះ ។
-
តើគំនិតស៊ីជម្រៅបន្ថែមទៀតអ្វីខ្លះ ដែលការបកប្រែដោយយ៉ូសែប ស្ម៊ីធ នៅក្នុង ខទី ៨ បានផ្ដល់ឲ្យ ?
-
តើអ្នកគិតថា ព្រះអង្គសង្គ្រោះមានន័យយ៉ាងណា នៅពេលទ្រង់មានបន្ទូលថា « ខ្ញុំគឺជាទ្វារ » ( ខទី ៧, ៩ ) ?
សូមពន្យល់ថា « អ្នកគង្វាលនៅអ៊ីស្រាអែលឈរនៅច្រកចូលនៃក្រោលចៀម ហើយត្រួតពិនិត្យមើលចៀមនីមួយៗ នៅពេលវាដើរចូលក្រោល ហើយព្យាបាលរបួសតាមការចាំបាច់ ។ បន្ទាប់ពីចៀមត្រូវបានកៀងចូលក្រោលនៅពេលយប់រួចហើយ នោះអ្នកគង្វាលនឹងដេកនៅច្រកទ្វារ ជារបាំងការពារផ្លូវប្រយោជន៍កុំឲ្យសត្វសាហាវ ឬ ចោរលួចអាចធ្វើបាបចៀមខ្លួន » (New Testament Student Manual [ Church Educational System manual ឆ្នាំ ២០១៤ ] ទំព័រ ២៣១–៣២) ។
-
តើសកម្មភាពរបស់អ្នកគង្វាលទាំងនេះស្រដៀងគ្នាទៅនឹងអ្វី ដែលព្រះអង្គសង្គ្រោះបានធ្វើចំពោះយើងដូចម្តេចទៅ ?
-
តើអ្នកគិតថា ព្រះអង្គសង្គ្រោះប្រទានព្រះជន្មទ្រង់ « ពេញបរិបូរណ៍ » (យ៉ូហាន ១០:១០) ដល់អស់អ្នកដែលធ្វើតាមទ្រង់ដោយរបៀបណា ?
សូមអញ្ជើញសិស្សម្នាក់អាន យ៉ូហាន ១០:១១-១៥ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលអ្វីផ្សេងទៀត ដែលព្រះអង្គសង្គ្រោះបានមានព្រះបន្ទូលពីអ្នកគង្វាលល្អធ្វើ ។ ចូរចង្អុលបង្ហាញថា អ្នកស៊ីឈ្នួលម្នាក់ គឺជាមនុស្សដែលជំរុញចិត្តខ្លួនឲ្យធ្វើការងារ ដើម្បីទទួលបានប្រាក់កម្រៃតែប៉ុណ្ណោះ ។
សូមអញ្ជើញសិស្សពីរបីនាក់ឲ្យឡើងមកក្ដារខៀន ហើយសរសេរនូវអ្វីផ្សេងទៀតដែលពួកគេបានរកឃើញអំពីអ្នកគង្វាលល្អ នៅក្រោម ព្រះយេស៊ូវគ្រីស្ទគឺជាអ្នកគង្វាលល្អ ។ ( ចម្លើយអាចរួមមានដូចខាងក្រោម ៖ ទ្រង់លះបង់ជិវិតសម្រាប់ចៀមរបស់ទ្រង់ ទ្រង់ស្គាល់ចៀមរបស់ទ្រង់ ហើយចៀមរបស់ទ្រង់ស្គាល់ទ្រង់ ) ។
-
តើអ្វីទៅដែលអ្នកគង្វាលម្នាក់សុខចិត្តធ្វើ ប៉ុន្តែអ្នកស៊ីឈ្នួលពុំព្រមធ្វើ ?
-
តើសេចក្ដីពិតអ្វីខ្លះដែលយើងអាចរៀន អំពីព្រះអង្គសង្គ្រោះមកពីខគម្ពីរទាំងនេះ ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថាពួកគេស្គាល់សេចក្ដីពិតដូចខាងក្រោមនេះ ៖ ក្នុងនាមជាអ្នកគង្វាលល្អមួយរូប ព្រះយេស៊ូវគ្រីស្ទស្គាល់ពួកយើងម្នាក់ៗ ហើយថ្វាយព្រះជន្មរបស់ទ្រង់សម្រាប់ពួកយើង ។ សូមសរសេរសេចក្ដីពិតនេះនៅលើក្ដារខៀន ក្រោមឃ្លា ព្រះយេស៊ូវគ្រីស្ទគឺជាអ្នកគង្វាលល្អ ) ។
សូមរំឭកសិស្សពីអ្នកគង្វាលនៅបញ្ចឹមប្រទេស ដែលបានស្គាល់កូនចៀមនីមួយៗរបស់ខ្លួនផងដែរ ។
-
តើអ្នកគិតថា ព្រះអង្គសង្គ្រោះស្គាល់អ្នកច្បាស់ប៉ុណ្ណា ?
-
តើរបៀបដែលអ្នករស់នៅសព្វថ្ងៃអាចត្រូវបានប្រែប្រួលយ៉ាងណាខ្លះ ដោយដឹងថាព្រះអង្គសង្គ្រោះស្គាល់អ្នក ហើយមានព្រះឆន្ទៈថ្វាយព្រះជន្មទ្រង់សម្រាប់អ្នកដូច្នេះ ?
សូមពន្យល់ថា បន្ទាប់ពីទ្រង់បានបង្រៀនថា ទ្រង់នឹងលះបង់ព្រះជន្មរបស់ទ្រង់សម្រាប់យើង នោះព្រះអង្គសង្គ្រោះបានចង្អុលបង្ហាញពីរឿងមួយផ្សេងទៀតដែលទ្រង់នឹងធ្វើ ។ សូមអញ្ជើញសិស្សម្នាក់អាន យ៉ូហាន ១០:១៦ ឲ្យឮៗ ។ ចូរសុំឲ្យសិស្សក្នុងថ្នាក់រកមើលអ្វីផ្សេងទៀត ដែលព្រះអង្គសង្គ្រោះបានមានបន្ទូលថា ទ្រង់នឹងធ្វើសម្រាប់ចៀមរបស់ទ្រង់ ( មានន័យថា រាស្ត្ររបស់ទ្រង់ ) ។
-
តើព្រះអង្គសង្គ្រោះបានមានបន្ទូលថា ទ្រង់នឹងធ្វើអ្វីខ្លះសម្រាប់ចៀមរបស់ទ្រង់ ?
-
តើខគម្ពីរនេះចង្អុលបង្ហាញអ្វីខ្លះអំពីទីតាំងរបស់ចៀមទ្រង់ ?
សូមពន្យល់ថា ព្រះអង្គសង្គ្រោះកំពុងបង្រៀនពួកសាសន៍យូដានៅក្នុងក្រុងយេរូសាឡិមថា ទ្រង់នឹងជួបកូនចៅរបស់ព្រះនៅទឹកដីផ្សេងទៀត បង្រៀនពួកគេអំពីដំណឹងល្អទ្រង់ ហើយនាំពួកគេចូលមកឯហ្វូងចៀមទ្រង់ ( សាសនាចក្រទ្រង់ ) ។ សូមពន្យល់ថា ព្រះគម្ពីរមរមនបានពន្យល់អំពីខគម្ពីរនេះ ។
សូមអញ្ជើញសិស្សបីបួននាក់ប្ដូរវេនគ្នាអាននៅក្នុង នីហ្វៃទី ៣ ១៥:១៥–១៧, ២១, ១៦:១–៣ ។ អ្នកគួរស្នើរឲ្យសិស្សសរសេរសេចក្ដីយោងនេះនៅរឹមនៃព្រះគម្ពីររបស់ខ្លួន នៅក្បែរ យ៉ូហាន ១០:១៦ ។
-
តើខគម្ពីរទាំងនេះជួយយើងយល់កាន់តែច្បាស់ពី យ៉ូហាន ១០:១៦បានដោយរបៀបណា ? ( ពាក្យ « ចៀមផ្សេងទៀត » សំដៅទៅលើពួកសាសន៍នីហ្វៃ និងពូជអំបូរដែលវង្វេង ពុំមែនពួកសាសន៍ដទៃទេ ) ។
ចូរសុំឲ្យសិស្សអាន យ៉ូហាន ១០:១៧-១៨ដោយរកមើលគោលលទ្ធិមួយអំពីព្រះអង្គសង្គ្រោះ ។ សុំឲ្យពួកគេរាយការណ៍ពីអ្វីដែលពួកគេរកឃើញ ។ ( សិស្សអាចនឹងប្រើពាក្យខុសគ្នា ប៉ុន្តែពួកគេគួរស្គាល់ពីគោលលទ្ធិខាងក្រោមនេះ ៖ ក្នុងនាមជាព្រះរាជបុត្រានៃព្រះ ព្រះយេស៊ូវគ្រីស្ទមានព្រះចេស្ដាដើម្បីដាក់ព្រះជន្មទ្រង់ចុះ ហើយយកមកវិញបាន ។ សូមលើកទឹកចិត្តសិស្សឲ្យគូសចំណាំពាក្យទាំងឡាយ ដែលបង្រៀនអំពីគោលការណ៍នេះនៅក្នុងខគម្ពីរទាំងនេះ ) ។
-
ហេតុអ្វីព្រះអង្គសង្គ្រោះមានទាំងលទ្ធភាពដើម្បីសុគត និងលទ្ធភាពដើម្បីមានព្រះជន្មរស់ឡើងវិញបន្ទាប់ពីសុគតដូច្នេះ ? ( មកពីមាតាទ្រង់ ម៉ារា ជាស្ត្រីដែលជីវិតរមែងស្លាប់ នោះព្រះយេស៊ូវគ្រងមរតកនៃមតភាពរួមមាននូវសមត្ថភាពដែលអាចស្លាប់ ។ មកពីអេឡូហិម ជាព្រះវរបិតារបស់ទ្រង់ នោះទ្រង់គ្រងមរតកនៃអមតៈភាព និង ព្រះចេស្តាដើម្បីរស់នៅជារៀងរហូត ។ ហេតុដូច្នេះហើយ ទ្រង់បានគ្រងមរតកនូវលទ្ធភាពដើម្បីសុគត ហើយមានព្រះជន្មឡើងវិញ ដែលជាកត្តាចាំបាច់ដើម្បីឲ្យព្រះយេស៊ូវអាចមានលទ្ធភាពធ្វើដង្វាយធួនបាន ។ [ សូមមើលមេរៀនស្ដីពី ម៉ាថាយ ១–២ ] ) ។
សូមសង្ខេប យ៉ូហាន ១០:១៩–២៤ ដោយពន្យល់ថា បន្ទាប់ពីព្រះអង្គសង្គ្រោះបានបង្រៀនការណ៍ទាំងនេះហើយ នោះមនុស្សបានខ្វែងគំនិតគ្នា ថាតើព្រះយេស៊ូវគឺជានរណា ។ ពួកគេបានមករកព្រះយេស៊ូវនៅឯព្រះវិហារបរិសុទ្ធ ហើយបានបង្ខំទ្រង់ឲ្យប្រាប់ពីអត្តសញ្ញាណពិតរបស់ទ្រង់ថាជាព្រះគ្រីស្ទ ។
យ៉ូហាន ១០:២៥-៤២
ព្រះយេស៊ូវប្រកាសថា ទ្រង់គឺជាព្រះរាជបុត្រានៃព្រះ
សូមអញ្ជើញសិស្សម្នាក់ទៀតឲ្យឡើងមកខាងមុខក្ដារខៀន ។ ចូរយកកន្សែងបិទមុខសិស្សម្នាក់នោះ រួចប្រាប់ឲ្យសិស្សបីបួននាក់ផ្សេងទៀតប្ដូរវេនគ្នានិយាយពាក្យមួយជាក់លាក់ ( ឧទាហរណ៍ « អ្នកគង្វាល » ) ។ ចូរសុំឲ្យសិស្សដែលបិទមុខជិតស្ដាប់ទៅសិស្សម្នាក់ៗដែលនិយាយពាក្យនោះ ហើយសម្រេចថាតើគាត់អាចស្គាល់សិស្សដែលនិយាយពាក្យនោះបានដែរឬអត់ តាមរយៈសំឡេងរបស់ពួកគេ ។
-
ហេតុអ្វីមានសំឡេងខ្លះ ងាយនឹងស្គាល់ជាងសំឡេងដទៃទៀត ?
សូមប្រាប់សិស្សនោះឲ្យដោះកន្សែងចេញ ហើយត្រឡប់ទៅកន្លែងអង្គុយវិញ ។ សូមអញ្ជើញសិស្សម្នាក់អាន យ៉ូហាន ១០:២៥-៣០ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលការឆ្លើយតបរបស់ព្រះអង្គសង្គ្រោះចំពោះសំណួររបស់ប្រជាជន ឲ្យប្រាប់ពួកគេថាតើទ្រង់គឺជាព្រះគ្រីស្ទមែន ឬ មិនមែន ។
-
តើព្រះអង្គសង្គ្រោះបានពិពណ៌នាយ៉ាងដូចម្តេចខ្លះអំពីចៀមរបស់ទ្រង់ ? ( ចៀមរបស់ព្រះអង្គសង្គ្រោះស្ដាប់សំឡេងទ្រង់ ហើយដើរតាមទ្រង់ ) ។
-
យោងតាម ខទី ២៨តើអ្នកដែលស្ដាប់តាមសំឡេងរបស់ព្រះអង្គសង្គ្រោះ ហើយដើរតាមទ្រង់នឹងទទួលបានអ្វី ?
-
តើគោលការណ៍អ្វីខ្លះ ដែលយើងអាចរៀនពីខគម្ពីរទាំងនេះ ? ( សិស្សអាចនឹងរកឃើញគោលការណ៍ខុសៗគ្នា ប៉ុន្តែត្រូវប្រាកដដើម្បីគូសបញ្ជាក់ថា ប្រសិនបើយើងស្គាល់សំឡេងនៃអ្នកគង្វាលល្អ ហើយធ្វើតាមទ្រង់ នោះទ្រង់នឹងដឹកនាំយើងឆ្ពោះទៅរកជីវិតអស់កល្បជានិច្ច ។ សូមសរសេរគោលការណ៍នេះនៅលើក្ដារខៀន ក្រោមឃ្លា ព្រះយេស៊ូវគ្រីស្ទគឺជាអ្នកគង្វាលល្អ ។ អ្នកគួរណែនាំសិស្សឲ្យសរសេរគោលការណ៍នេះ នៅរឹមទំព័រព្រះគម្ពីររបស់ពួកគេក្បែរ យ៉ូហាន ១០:២៧-២៨ ) ។
សូមរំឭកសិស្សពីសិស្សទីពីរដែលបានបិទមុខ និងលទ្ធភាពរបស់គាត់ក្នុងការស្គាល់សំឡេងមិត្តរួមថ្នាក់របស់ខ្លួន ។
-
តើយើងអាចធ្វើអ្វីខ្លះ ដើម្បីស្គាល់សំឡេងរបស់ព្រះអង្គសង្គ្រោះ ? ( សូមមើលផងដែរ គ. និង ស. ១៨:៣៤-៣៦ ) ។
-
តើអ្នកបានធ្វើអ្វីខ្លះដើម្បីឲ្យកាន់តែស្គាល់សំឡេងរបស់ព្រះអង្គសង្គ្រោះ ?
-
តើយើងអាចបង្ហាញថា យើងដើរតាមព្រះអង្គសង្គ្រោះតាមរបៀបណា ?
សូមទុកពេលឲ្យសិស្សសញ្ជឹងគិតអំពីរបៀប ដែលពួកគេអាចស្ដាប់ឮសំឡេងរបស់ព្រះអង្គសង្គ្រោះហើយដើរតាមទ្រង់កាន់តែប្រសើរឡើង ។ សូមអញ្ជើញឲ្យសរសេរចំណុចមួយណាក៏បានក្នុងសៀវភៅកំណត់ហេតុការសិក្សាព្រះគម្ពីររបស់ពួកគេ (១) គោលដៅមួយដើម្បីយកចិត្តទុកដាក់ស្តាប់កាន់តែច្រើនដល់សំឡេងរបស់ព្រះអង្គសង្គ្រោះ និង របៀបជាក់លាក់នានាដែលពួកគេអាចធ្វើបែបនោះបាន ឬ (២) គោលដៅ មួយដើម្បីធ្វើតាមសំឡេងរបស់ទ្រង់ឲ្យបានកាន់តែប្រសើរឡើង និង របៀបដែលពួកគេដាក់ផែនការដើម្បីធ្វើវា ។
សូមសង្ខេប យ៉ូហាន ១០:៣១–៤២ ដោយពន្យល់ថា បន្ទាប់ពីព្រះអង្គសង្គ្រោះបានថ្លែងទីបន្ទាល់ថាទ្រង់ និងព្រះវរបិតារបស់ទ្រង់គឺតែមួយ នោះពួកអ្នកដឹកនាំសាសន៍យូដាចង់យកដុំថ្មចោលដាក់ទ្រង់ ដោយសារការប្រើប្រមាថព្រះ ។ ប៉ុន្តែ ទ្រង់បានឆ្លើយតបចំពោះការចោទប្រកាន់របស់ពួកគេ ទំនុកដំកើង ៨២:៦ដែលអានថា « យើងបាននិយាយថា ឯងរាល់គ្នាជាព្រះ ហើយជាកូននៃព្រះដ៏ខ្ពស់បំផុតទាំងអស់គ្នា » ។ ក្រោយមកព្រះអង្គសង្គ្រោះបានសួរពួកសាសន៍យូដាថា ហេតុអ្វីពួកគេចោទទ្រង់អំពីការប្រើពាក្យប្រមាថដល់ព្រះ កាលទ្រង់មានព្រះបន្ទូលថា ទ្រង់គឺជាព្រះរាជបុត្រានៃព្រះនៅពេលដែលព្រះគម្ពីរចែងថា ពួកយើងគឺជាកូនចៅនៃព្រះ ហើយខ្លួនយើងអាចក្លាយដូចជាព្រះ ។
សូមបញ្ចប់ដោយថ្លែងទីបន្ទាល់ពីសេចក្ដីពិត និងគោលការណ៍ដែលបានបង្រៀននៅក្នុង យ៉ូហាន ១០ ហើយលើកទឹកចិត្តសិស្សឲ្យអនុវត្តវា ។
សេចក្តីពន្យល់ និង ព័ត៌មានសាច់រឿង
យ៉ូហាន ១០:៣០ ។ « ខ្ញុំហើយ និងព្រះវរបិតា គឺតែមួយព្រះអង្គទេ »
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបញ្ជាក់យ៉ាងច្បាស់ពីអត្ថន័យនៃការប្រកាសថា ព្រះអង្គសង្គ្រោះគឺតែមួយជាមួយនឹងព្រះវរបិតារបស់ទ្រង់ ៖
« មាត្រានៃសេចក្តីជំនឿទីមួយ និង ដំបូងគេរបស់យើងនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺ « យើងខ្ញុំជឿដល់ព្រះ គឺព្រះវរបិតាដ៏គង់នៅអស់កល្បជានិច្ច និង ដល់ព្រះរាជបុត្រាទ្រង់គឺព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ » [មាត្រានៃសេចក្តីជំនឿ ១:១] ។ យើងជឿលើតួអង្គនៃក្រុមព្រះទាំងបីអង្គ ដែលរួមគ្នាជាក្រុមព្រះតែមួយដែលមានគោលបំណង លក្ខណៈ ទីបន្ទាល់ និងបេសកកម្មតែមួយ ។ យើងជឿថា ពួកអង្គទ្រង់នឹងត្រូវបានបំពេញដោយអារម្មណ៍នៃសេចក្តីមេត្តាករុណា និង សេចក្តីស្រឡាញ់ព្រមទាំងព្រះគុណ សេចក្តីអត់ធ្មត់ ការអភ័យទោស និង សេចក្តីប្រោសលោះដូចគ្នា ។ ខ្ញុំគិតថាវាត្រឹមត្រូវដើម្បីនិយាយថាយើងជឿថា ពួកទ្រង់មានព្រះទ័យតែមួយក្នុងគ្រប់ទិដ្ឋភាពដ៏សំខាន់ និង អស់កល្បជានិច្ច ប៉ុន្តែ សូមកុំជឿថាពួកទ្រង់គឺជាតួអង្គបី ដែលរួមគ្នាតែមួយឡើយ ជំនឿដែលថាពួកទ្រង់គឺជាត្រៃទេពជាតួអង្គតែមួយពុំមានឡើយ នៅក្នុងព្រះគម្ពីរដោយសារវាមិនពិតទេ ( « The Only True God and Jesus Christ Whom He Hath Sent » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៤០ ) ។
អែលឌើរ ប៊ី អេជ រ៉ូប៊ឺត ក្នុងគណៈប្រធាននៃពួកចិតសិបនាក់បានជួយយើងឲ្យយល់ដឹងពីការពិចារណារកហេតុផលរបស់ព្រះអង្គសង្គ្រោះ ដោយការមិនព្រមឆ្លើយតបនឹងពួកផារិស៊ី ដែលបានចោទទ្រង់ថាប្រើពាក្យប្រមាថ ៖
« ចូរសង្កេតមើលថា ការសន្ទនាខាងលើ កាលព្រះយេស៊ូវត្រូវបានចោទថាទ្រង់តាំងខ្លួនទ្រង់ធ្វើជាព្រះ នោះទ្រង់ពុំបានបដិសេធការចោទនោះទេ ប៉ុន្តែផ្ទុយទៅវិញ ទ្រង់បានបញ្ជាក់ដល់ពួកគេថា ព្រះនៅក្នុងក្រឹត្យវិន័យដែលទ្រង់បានប្រទានដល់ពួកសាសន៍អ៊ីស្រាអែលបានមានបន្ទូលទៅពួកគេមួយចំនួនថា— ‹ អ្នករាល់គ្នាគឺជាព្រះ › ។ ហើយលើសពីនេះទៀត ព្រះយេស៊ូវបានជជែកតវ៉ា ប្រសិនបើជនដែលព្រះបន្ទូលនៃព្រះហៅថាជាព្រះនៅក្នុងក្រឹត្យវិន័យយូដា ហើយព្រះគម្ពីរក៏បានប្រកាសដែរ នោះវាមិនអាចរំលងបានឡើយ —ហេតុអ្វីបានជាសាសន៍យូដាត្អូញត្អែរ កាលទ្រង់ដែលជាព្រះគ្រីស្ទ ជាអង្គដែលបានធ្វើឲ្យបរិសុទ្ធជាពិសេសដោយព្រះជាព្រះវរបិតា ហៅអង្គទ្រង់ថាជាព្រះរាជបុត្រានៃព្រះនោះ ? » ( វ៉ុលទី ៣ [ ឆ្នាំ១៩០៩–១១ ] ១:៤៦៥–៦៦ ) ។
យ៉ូហាន ១០:២៧ ។ « ចៀមខ្ញុំ … ស្ដាប់ខ្ញុំ ហើយមកតាមខ្ញុំ » ។
ប្រធាន ហារ៉ូល ប៊ី លី បានបង្រៀនអំពីវិធីផ្សេងៗ ដែលយើងអាចស្ដាប់ឮសំឡេងរបស់ព្រះអង្គសង្គ្រោះ ។
« ប្រសិនបើយើងនឹងរស់នៅដោយសក្ដិសម នោះព្រះអម្ចាស់នឹងដឹកនាំយើង—តាមរយៈការលេចមករបស់ព្រះអង្គដោយផ្ទាល់ ឬដោយសំឡេងរបស់ទ្រង់ ឬដោយសំឡេងរបស់ទ្រង់ចូលមកក្នុងគំនិតរបស់យើង ឬដោយដក់ជាប់នៅក្នុងដួងចិត្ត និងព្រលឹងរបស់យើង ។ មែនហើយ តើយើងគួរមានអំណរគុណបែបណាទៅ ប្រសិនបើព្រះអម្ចាស់បញ្ជូនសុបិនមួយដល់យើង ដែលបើកសម្ដែងដល់យើងពីភាពស្រស់ស្អាតនៃភាពអស់កល្បជានិច្ច ឬការព្រមាន និងការដឹកនាំមួយសម្រាប់ការលួងលោមជាពិសេសរបស់យើង ។ មែនហើយ ប្រសិនបើយើងរស់នៅដូច្នោះមែន នោះព្រះអម្ចាស់នឹងដឹកនាំយើងទៅរកសេចក្ដីសង្គ្រោះរបស់យើង និងប្រយោជន៍របស់យើង » ( [ ឆ្នាំ ២០០០ ] ទំព័រ ៥១-៥២ ) ។
អែលឌើរ យ៉ូសែប ប៊ី វ៉ឺតលីន ក្នុងកូរ៉ុមនៃពួកសាវកដប់ពីរនាក់បានបង្រៀនអំពីរបៀបដែលយើងអាចដើរតាមព្រះអង្គសង្គ្រោះ ៖
« តើយើងដើរតាមព្រះអង្គសង្គ្រោះតាមរបៀបណា ? ដោយអនុវត្តសេចក្ដីជំនឿ ។ ដោយជឿលើទ្រង់ ។ ដោយជឿលើព្រះវរបិតាសួគ៌យើង ។ ដោយជឿថា ព្រះមានបន្ទូលមកកាន់មនុស្សលោកនៅលើផែនដីសព្វថ្ងៃនេះ ។
« យើងដើរតាមព្រះអង្គសង្គ្រោះដោយប្រែចិត្តពីអំពើបាបរបស់យើង—ដោយដកពិសោធន៍ភាពសោកសៅដោយសារអំពើបាបនោះ ហើយបោះបង់វាចោល ។
« យើងដើរតាមព្រះអង្គសង្គ្រោះដោយចូលទៅក្នុងទឹកនៃពិធីបុណ្យជ្រមុជទឹក ហើយទទួលការផ្ដាច់បាបពីអំពើបាបរបស់យើង ដោយទទួលអំណោយទាននៃព្រះវិញ្ញាណបរិសុទ្ធ ហើយអនុញ្ញាតឲ្យព្រះចេស្ដានោះបំផុសគំនិត ណែនាំ ដឹកនាំ ហើយលួងលោមដល់យើង ។
« តើយើងដើរតាមព្រះអង្គសង្គ្រោះតាមរបៀបណា ? ដោយគោរពប្រតិបត្តិទ្រង់ ។ ទ្រង់ និងព្រះវរបិតាសួគ៌របស់យើងបានប្រទានព្រះបញ្ញត្តិដល់យើង—ពុំមែនដើម្បីដាក់ទោស ឬធ្វើទុក្ខទោសយើងទេ ប៉ុន្តែដើម្បីជួយយើងឲ្យមករកភាពពេញលេញនៃសេចក្តីអំណរ ទាំងនៅក្នុងជីវិតនេះ និងដល់ភាពអស់កល្បជានិច្ច ក្នុងពិភពលោកដែលគ្មានទីបញ្ចប់នេះ » ( « Follow Me » Ensign ខែ ឧសភា ឆ្នាំ ២០០២ ទំព័រ ១៦–១៧ ) ។