មេរៀនទី ៧៥
យ៉ូហាន ១៥
សេចក្ដីផ្ដើម
នាល្ងាចចុងក្រោយនៃការបម្រើក្នុងជីវិតរមែងស្លាប់របស់ទ្រង់ ក្រោយពីអាហារយប់ថ្ងៃចុងក្រោយ នោះព្រះអង្គសង្គ្រោះបានបង្រៀនពួកសាវករបស់ទ្រង់ថា ទ្រង់គឺជាដើមទំពាំងបាយជូរពិត ហើយថាពួកសិស្សរបស់ទ្រង់គឺជាមែក ។ ទ្រង់បានបញ្ជាដល់ពួកសិស្សរបស់ទ្រង់ឲ្យស្រឡាញ់គ្នាទៅវិញទៅមក ហើយបានព្រមានពួកគេពីការបៀតបៀនដែលពួកគេនឹងជួប ដោយសារតែពួកគេទាក់ទងជាមួយទ្រង់ ។
យោបល់សម្រាប់ការបង្រៀន
យ៉ូហាន ១៥:១-១១
ព្រះយេស៊ូវពន្យល់ថា ទ្រង់គឺជាដើមទំពាំងបាយជូរពិត
ពីមុនថ្នាក់ចាប់ផ្ដើម ចូរសរសេរនៅលើក្ដារខៀននូវពាក្យ ជោគជ័យ កើតទុក្ខ សប្បាយ មនុស្សស្លាប់ មានប្រយោជន៍ គ្មានផលប្រកបដោយផ្លែផ្កា មានផល ផ្លែយ៉ាងច្រើន ច្រើនក្រៃលែង និង បរាជ័យ ។
សូមអញ្ជើញសិស្សឲ្យស្រមៃថា ពួកគេកំពុងសម្លឹងមើលទៅជីវិតរបស់ខ្លួននៅ ៦០ ឆ្នាំក្រោយពីពេលឥឡូវនេះ ។
-
តើពាក្យណាមួយ ដែលអ្នកចង់ប្រើដើម្បីពិពណ៌នាពីជីវិតរបស់អ្នក ? ហេតុអ្វី ?
ចូរគូររូបដើមទំពាំងបាយជូរមួយនៅលើក្ដារខៀន ។ អ្នកអាចនឹងចង់ឲ្យយោបល់ដល់សិស្សឲ្យចម្លងគំនូរនោះ នៅក្នុងសៀវភៅកត់ចំណាំការរៀនសូត្ររបស់ពួកគេ ឬសៀវភៅកំណត់ហេតុសិក្សាព្រះគម្ពីរ ។ សូមពន្យល់ថា ព្រះយេស៊ូវបានប្រើរឿងប្រៀបប្រដូចអំពីផ្លែទំពាំងបាយជូរ ដើម្បីជួយពួកសិស្សរបស់ទ្រង់ឲ្យយល់ពីរបៀបដើម្បីមានជីវិតដែលបង្កើតផ្លែផ្កា មានគំនិតច្នៃប្រឌិត និង មានភាពបរិបូរ ។
សូមអញ្ជើញសិស្សម្នាក់អាន យ៉ូហាន ១៥:១-៥ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលថាតើធាតុនៃពាក្យប្រៀបធៀបតំណាងឲ្យអ្វី ។
-
តើដើមទំពាំងបាយជូរតំណាងឲ្យអ្វី ? ( សូមសរសេរស្លាកសម្រាប់ដើមទំពាំងបាយជូរនៅលើក្ដារខៀនថា ព្រះយេស៊ូវគ្រីស្ទ ) ។
-
តើមែកតំណាងឲ្យអ្វី ? ( សូមសរសេរស្លាកសម្រាប់មែកថា សិស្សរបស់ព្រះយេស៊ូវគ្រីស្ទ ) ។
-
ប្រសិនបើព្រះយេស៊ូវគ្រីស្ទ គឺជាចម្ការទំពាំងបាយជូរ ហើយយើងគឺជាខ្នែងរបស់វានោះ តើផ្លែតំណាងឲ្យអ្វី ? ( ផ្លែអាចតំណាងឲ្យកិច្ចការ និងទង្វើសុចរិតដែលសិស្សរបស់ព្រះយេស៊ូវគ្រីស្ទគួរតែបង្កបង្កើតឡើង ។ សូរសរសេរស្លាកសម្រាប់ផ្លែថា កិច្ចការសុចរិត ) ។
សូមចង្អុលបង្ហាញពាក្យ អ្នកដាំ នៅក្នុង ខទី ១ ។
-
តើអ្នកដាំជានរណា ? ( មនុស្សម្នាក់ដែលថែទាំចម្ការទាំងបាយជូរ ) ។
-
យោងតាម ខទី ១–២តើព្រះវរបិតាសួគ៌ប្រៀបបាននឹងអ្នកដាំដោយរបៀបណា ? ( សូមពន្យល់ថា ព្រះជាព្រះវរបិតាបានដាំដើមទំពាំងបាយជូរពិត [ ព្រះយេស៊ូវគ្រីស្ទ ]ដែលមនុស្សដទៃនឹងទទួលបានការចិញ្ចឹមបីបាច់ ) ។
សូមបង្ហាញដល់សិស្ស នូវមែកតូចមួយដែលអ្នកបានកាច់មកពីដើមឈើមួយ ហើយពន្យល់ថាតើអ្នកនឹងមានអារម្មណ៍រីករាយបែបណា សម្រាប់ពេលដែលអ្នកអាចបេះផលផ្លែមួយចំនួនពីមែកនេះមកទទួលទាន ។ ចូរសួរដល់សិស្សថា តើពួកគេគិតថាអ្នកនឹងអាចទទួលទានផលផ្លែនោះមកពីមែកនោះនៅពេលណាដែរ ។
-
ហេតុអ្វីមែកនេះនឹងពុំផ្ដល់ផលផ្លែអ្វីសោះឡើយ ? ( ដោយសារវាបានកាច់ចេញពីដើម វាមិនអាចទទួលការចិញ្ចឹមបីបាច់ឲ្យបង្កើតផលផ្លែបានទេ ) ។
សូមអញ្ជើញសិស្សម្នាក់អាន យ៉ូហាន ១៥:៤-៥ ឲ្យឮៗ ។ សូមអញ្ជើញសិស្សឲ្យដើរតាម រកមើលថាតើព្រះអង្គសង្គ្រោះបានបន្ទូលថា អ្វីទៅដែលចាំបាច់ដើម្បីធ្វើឲ្យមែកមួយមានផលផ្លែ ។
-
តើព្រះយេស៊ូវបានបន្ទូលថាអ្វីទៅ ដែលចាំបាច់ដើម្បីធ្វើឲ្យមែកមួយមានផលផ្លែ ? ( មែកនោះត្រូវតែ « នៅជាប់ » នឹងដើមទំពាំងបាយជូរ ) ។
-
តើមែកនេះប្រៀបបាននឹងមនុស្សម្នាក់ដែលបានបែកចេញ ឬបានកាត់ចេញពីព្រះអង្គសង្គ្រោះដោយរបៀបណា ?
សូមអញ្ជើញសិស្សឲ្យពិចារណាគូសចំណាំឧទាហរណ៍នីមួយៗនៃពាក្យ នៅជាប់ ឬ បានជាប់នឹង នៅក្នុង ខទី ៤–៥ ។ សូមពន្យល់ថា ពាក្យ នៅជាប់ពេលប្រើនៅក្នុងខគម្ពីរទាំងនេះ មានន័យថា បន្ដនៅយ៉ាងរឹងមាំ ហើយស្ថិតស្ថេរជានិច្ចជាប់នឹងព្រះយេស៊ូវគ្រីស្ទ និងសាសនាចក្ររបស់ទ្រង់ ( សូមមើល ជែហ្វ្រី អ័រ ហូឡិន « Abide in Me » Ensign ឬ Liahona ខែ ឧសភា ឆ្នាំ ២០០៤ ទំព័រ ៣២ ) ។
-
យោងតាម ខទី ៥តើលទ្ធផលនៃការនៅជាប់ ឬការតភ្ជាប់យ៉ាងរឹងមាំនឹងព្រះអង្គសង្គ្រោះជាអ្វី ? ( សិស្សរបស់ព្រះយេស៊ូវគ្រីស្ទនឹងនាំមកនូវផលផ្លែយ៉ាងច្រើន ) ។
សូមសរសេរប្រយោគមិនពេញលេញខាងក្រោមនៅលើក្ដារខៀន ៖ ប្រសិនបើយើងកាន់តាមព្រះបញ្ញត្តិទាំងឡាយ នោះយើងនឹងនៅជាប់នឹងសេចក្ដីស្រឡាញ់របស់ព្រះអង្គសង្គ្រោះ ហើយ … ។
ដើម្បីជួយសិស្សឲ្យយល់ពីវិធីមួយ ដែលព្រះយេស៊ូវគ្រីស្ទជួយយើងឲ្យគោរពតាមព្រះបញ្ញត្តិ ហើយនៅជាប់នឹងសេចក្ដីស្រឡាញ់របស់ទ្រង់ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមឲ្យឮៗ ៖
« វាគឺ … តាមរយៈព្រះគុណរបស់ព្រះអម្ចាស់ តាមរយៈសេចក្តីជំនឿលើដង្វាយធួនរបស់ព្រះយេស៊ូវគ្រីស្ទ និងការប្រែចិត្តពីអំពើបាបទាំងឡាយរបស់ពួកគេ ដែលបុគ្គលទាំងឡាយនឹងទទួលបានកម្លាំង និងជំនួយដើម្បីធ្វើកិច្ចការល្អនានា បើពុំដូចនោះទេពួកគេនឹងមិនមានលទ្ធភាពដើម្បីបន្តឡើយ ប្រសិនបើត្រូវទុកឲ្យពួកគេធ្វើដោយខ្លួនឯងនោះ ។ ព្រះគុណនេះ គឺជាអំណាចមួយដែលអាចធ្វើអ្វីបានទាំងអស់ ដែលអនុញ្ញាតឲ្យបុរស និងស្ត្រីទទួលបានជីវិតអស់កល្បជានិច្ច និងការលើកតម្កើង បន្ទាប់ពីពួកគេបានពង្រីកការខិតខំរបស់ពួកគេឲ្យអស់ពីសមត្ថភាពរបស់ពួកគេផ្ទាល់ » ( Bible Dictionary « Grace » )
-
តើវិធីមួយចំនួន ដែលព្រះយេស៊ូវគ្រីស្ទពង្រឹងយើងឲ្យគោរពតាមព្រះបញ្ញត្តិមានអ្វីខ្លះ ?
សូមសង្ខេប យ៉ូហាន ១៥:៦–៨ដោយពន្យល់ថាព្រះអង្គសង្គ្រោះ បានបង្រៀនថា អស់អ្នកដែលពុំនៅជាប់នឹងទ្រង់ គឺដូចជាមែកដែលត្រូវបានកាត់ចេញ ។ វាស្វិតស្លោក ហើយងាប់ ប៉ុន្តែបុគ្គលម្នាក់ដែលនៅជាប់នៅក្នុងព្រះយេស៊ូវគ្រីស្ទបង្កើតកិច្ចការសុចរិតដែលសរសើរតម្កើងដល់ព្រះ ។
-
តើយើងអាចធ្វើអ្វីខ្លះដើម្បីនៅជាប់ជាមួយ ឬ មានទំនាក់ទំនងយ៉ាងរឹងមាំចំពោះព្រះអង្គសង្គ្រោះ ?
សូមអញ្ជើញសិស្សម្នាក់អាន យ៉ូហាន ១៥:៩-១១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលព្រះយេស៊ូវបានបង្រៀនដល់ពួកសិស្សរបស់ទ្រង់ឲ្យធ្វើ និង ពរជ័យដែលពួកគេនឹងបានទទួល ។
-
តើព្រះយេស៊ូវបានបង្រៀនពួកសិស្សរបស់ទ្រង់ឲ្យធ្វើអ្វីខ្លះ ?
-
តើការគោរពតាមព្រះបញ្ញត្តិអនុញ្ញាតឲ្យយើងនៅជាប់នឹងសេចក្ដីស្រឡាញ់របស់ព្រះអង្គសង្គ្រោះបានដោយរបៀបណា ? ( សូមពន្យល់ថា កាលព្រះវរបិតា និង ព្រះរាជបុត្រាស្រឡាញ់ពួកយើងដោយសេចក្តីស្រឡាញ់ដ៏ឥតខ្ចោះ និងអស់កល្បជានិច្ច ការរក្សាបទបញ្ញត្តិរបស់ពួកទ្រង់ធ្វើឲ្យយើងទទួលបាននូវពរជ័យដ៏ពេញលេញ ដែលពួកទ្រង់មានព្រះទ័យប្រទានដល់យើងដោយសេចក្តីស្រឡាញ់ [ សូមមើល នីហ្វៃទី ១ ១៧:៣៥, គ. និង ស ៩៥:១២, ១៣០:២០–២១] ) ។
-
យោងតាម ខទី ១១ហេតុអ្វីបានជាព្រះយេស៊ូវបង្រៀនពួកសិស្សរបស់ទ្រង់ឲ្យនៅជាប់នឹងទ្រង់ ហើយនាំមកនូវកិច្ចការសុចរិត ?
ចូរសួរសិស្សថា តើពួកគេនឹងបំពេញឃ្លាមិនពេញលេញនៅលើក្ដារខៀននោះយ៉ាងដូចម្ដេច ដើម្បីឲ្យវាក្លាយជាគោលការណ៍មួយ ដោយផ្អែកលើអ្វីដែលពួកគេបានអាននៅក្នុង ខទី ១១ ។ ( សូមបំពេញឃ្លានៅលើក្ដារខៀន ដោយប្រើពាក្យរបស់សិស្សដើម្បីនាំទៅរកគោលការណ៍ខាងក្រោមនេះ ៖ ប្រសិនបើយើងគោរពព្រះបញ្ញត្តិទាំងឡាយ នោះយើងនឹងនៅជាប់ជាមួយសេចក្តីស្រឡាញ់របស់ព្រះអង្គសង្គ្រោះ ហើយទទួលអំណរពោរពេញ ) ។
-
ហេតុអ្វីអ្នកគិតថា ការនៅជាប់ជាមួយព្រះអង្គសង្គ្រោះធ្វើឲ្យយើងទទួលបាននូវសេចក្តីអំណរពេញលេញ ?
ចូរសុំឲ្យសិស្សគិតពីមនុស្សម្នាក់ដែលពួកគេស្គាល់ដែលមានអំណរ ដោយសារគាត់នៅជាប់នឹងព្រះអង្គសង្គ្រោះ ។ សូមអញ្ជើញសិស្សពីរបីនាក់ឲ្យចែកចាយអំពីមនុស្សម្នាក់ ដែលពួកគេគិតដល់ ហើយពន្យល់ពីហេតុផលដែលបុគ្គលម្នាក់នោះគឺជាគំរូមួយដ៏ល្អសម្រាប់គោលការណ៍នេះ ។ អ្នកក៏គួរពិចារណាអញ្ជើញសិស្សឲ្យចែកចាយពីរបៀប ដែលនៅជាប់នឹងព្រះអង្គសង្គ្រោះបាននាំយកអំណរឲ្យពួកគេ ។
សូមអញ្ជើញសិស្សឲ្យសញ្ជឹងគិតពីវិធី ដែលពួកគេអាចបន្តនៅជាប់យ៉ាងរឹងមាំនឹងព្រះអង្គសង្គ្រោះ ហើយក្រោយមកទទួលបានអំណរកាន់តែប្រសើរឡើង ។
យ៉ូហាន ១៥:១២-១៧
ព្រះយេស៊ូវបញ្ជាពួកសិស្សរបស់ទ្រង់ឲ្យស្រឡាញ់គ្នាទៅវិញទៅមក
សូមសរសេរនៅលើ ក្ដារខៀន នូវសេចក្ដីថ្លែងការណ៍ខាងក្រោមនេះដោយប្រធាន រ័សុល អិម ណិលសុន ក្នុងកូរ៉ុមនៃពួកសាវកដប់ពីរនាក់ ។ ( សេចក្ដីថ្លែងការណ៍នេះមាននៅក្នុង « The Mission and Ministry of Jesus Christ » Ensign ខែ មេសា ឆ្នាំ ២០១៣ ទំព័រ ៣៨ ) ។
« ច្បាស់ណាស់ ភស្ដុតាងដ៏ល្អបំផុតនៃការគោរពស្រឡាញ់របស់យើងចំពោះព្រះយេស៊ូវ គឺការយកគំរូតាមទ្រង់របស់យើង » ( ប្រធាន រ័សុល អិម ណិលសុន ) ។
សូមគូសបន្ទាត់ក្រោមពាក្យ សេចក្តីស្រឡាញ់ដ៏ខ្ពង់ខ្ពស់ និង ការធ្វើគំរូតាម នៅក្នុងឃ្លាលើក្ដារខៀន ។ សូមអញ្ជើញសិស្សឲ្យពន្យល់ពីអត្ថន័យនៃពាក្យ ដែលបានគូសបន្ទាត់ពីក្រោម ។ ( សេចក្តីស្រឡាញ់ដ៏ខ្ពង់ខ្ពស់ គឺជាសេចក្តីស្រឡាញ់ និង ការគោរពយ៉ាងខ្លាំង ហើយ ការធ្វើគំរូតាមទ្រង់ មានន័យថា ត្រាប់តាម ឬ ចម្លងតាម ) ។
-
ហេតុអ្វីអ្នកគិតថា សេចក្ដីស្រឡាញ់ដ៏ខ្ពង់ខ្ពស់ចំពោះព្រះយេស៊ូវ គឺជាវិធីមួយដ៏ល្អបំផុតដើម្បីបង្ហាញថា យើងស្រឡាញ់ ហើយគោរពទ្រង់ ?
សូមអញ្ជើញសិស្សម្នាក់ឲ្យអានយ៉ូហាន ១៥:១២ឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថាតើព្រះអង្គសង្គ្រោះបានសុំឲ្យយើងផ្ដល់សេចក្ដីស្រឡាញ់ដ៏ខ្ពង់ខ្ពស់ដល់ទ្រង់យ៉ាងដូចម្ដេច ។
-
តើព្រះយេស៊ូវបានបង្គាប់ឲ្យយើងធ្វើអ្វីខ្លះ ? ( សិស្សអាចនឹងប្រើពាក្យខុសៗគ្នា ប៉ុន្តែពួកគេគួរស្គាល់ពីសេចក្ដីពិតខាងក្រោមនេះ ៖ ព្រះអង្គសង្គ្រោះបានបង្គាប់ឲ្យយើងស្រឡាញ់គ្នា ដូចជាទ្រង់ស្រឡាញ់យើង ។ សូមលើកទឹកចិត្តសិស្សឲ្យពិចារណាគូសចំណាំសេចក្ដីពិតនេះនៅក្នុង ខទី ១២ ) ។
-
តើអ្នកគិតថា ដើម្បីស្រឡាញ់មនុស្សម្នាក់តាមរបៀបដែលព្រះយេស៊ូវគ្រីស្ទស្រឡាញ់អ្នក មានន័យយ៉ាងដូចម្តេច ?
សូមអញ្ជើញសិស្សអាន យ៉ូហាន ១៥:១៣–១៧ដោយស្ងៀមស្ងាត់រកមើលរបៀបដែលព្រះអង្គសង្គ្រោះបានស្រឡាញ់យើង ។ បន្ទាប់ពីឲ្យពេលគ្រប់គ្រាន់ហើយ សូមបំបែកពួកគេជាគូ ហើយសុំឲ្យពួកគេពិភាក្សាគ្នាពីអ្វីដែលពួកគេបានរកឃើញ ។ បន្ទាប់មក សួរសំណួរដូចខាងក្រោមនេះ ៖
-
យោងតាម ខទី ១៣តើព្រះអង្គសង្គ្រោះបានមានបន្ទូលថា ការបង្ហាញសេចក្ដីស្រឡាញ់ដ៏ធំបំផុតគឺជាអ្វី ?
-
តើទ្រង់បានបង្ហាញសេចក្ដីស្រឡាញ់បែបនេះតាមរបៀបណា ?
ដើម្បីជួយសិស្សឲ្យយល់កាន់តែច្បាស់ពីអត្ថន័យនៃការលះបង់ជីវិតរបស់យើង សូមអញ្ជើញសិស្សម្នាក់ឲ្យអានឮៗនូវសេចក្ដីថ្លែងការណ៍ដោយអែលឌើរ ក្លូឌីអូ អរ អែម កូស្តា នៃពួកចិតសិបនាក់ ៖
« [ ព្រះយេស៊ូវគ្រីស្ទ ] បានប្រទានដល់យើងពីគំរូដ៏អស្ចារ្យនៃសេចក្ដីស្រឡាញ់ កាលទ្រង់បានប្រកាសថា ‹ គ្មានអ្នកណាមានសេចក្ដីស្រឡាញ់ធំជាងនេះ គឺដែលអ្នកណានឹងប្ដូរជីវិតជំនួសពួកសំឡាញ់របស់ខ្លួននោះទេ › [ យ៉ូហាន ១៥:១៣ ] ។ ក្រោយមកទៀត ទ្រង់បានធ្វើធួនសម្រាប់អំពើបាបរបស់យើងរាល់គ្នា ហើយនៅទីបំផុតបានលះបង់ជីវិតរបស់ទ្រង់សម្រាប់យើងគ្រប់គ្នា ។
« យើងអាចលះបង់ជីវិតរបស់យើងចំពោះអស់អ្នកដែលយើងស្រឡាញ់បានដោយពុំមែនដោយស្លាប់ខាងរូបកាយរបស់យើងសម្រាប់ពួកគេឡើយ ប៉ុន្តែដោយការរស់នៅសម្រាប់ពួកគេ—គឺផ្តល់ពេលវេលារបស់យើង មានវត្តមានជានិច្ចនៅក្នុងជីវិតរបស់ពួកគេ បម្រើពួកគេ មានភាពគួរសម មានសេចក្តីសប្បុរស ហើយបង្ហាញសេចក្តីស្រឡាញ់ពិតចំពោះអស់អ្នកដែលជាគ្រួសាររបស់យើង និង ដល់មនុស្សទាំងអស់ —ដូចដែលព្រះអង្គសង្គ្រោះបានបង្រៀន » (« Don’t Leave for Tomorrow What You Can Do Today » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៧៤ ) ។
-
យោងតាមអែលឌើរ កូស្តា តើវិធីមួយចំនួនដែលយើងអាចលះបង់ជីវិតរបស់យើងសម្រាប់មនុស្សដទៃទៀតមានអ្វីខ្លះ ?
-
តើធ្លាប់មាននរណាម្នាក់បានលះបង់ជីវិតខ្លួនតាមរបៀបមួយបែបនេះសម្រាប់អ្នកនៅពេលណា ?
សូមអញ្ជើញសិស្សសញ្ជឹងគិតពីព្រះបញ្ញត្តិរបស់ព្រះអង្គសង្គ្រោះឲ្យស្រឡាញ់គ្នាដូចជាទ្រង់ស្រឡាញ់យើង ។ សូមទុកពេលឲ្យពួកគេពីរបីនាទី ដើម្បីសរសេរនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ អំពីមនុស្សម្នាក់ដែលពួកគេជឿថា ព្រះអង្គសង្គ្រោះសព្វព្រះទ័យឲ្យពួកគេបង្ហាញសេចក្ដីស្រឡាញ់ និងពីផែនការមួយពី របៀប ដែលពួកគេនឹងធ្វើរឿងនោះ ។
យ៉ូហាន ១៥:១៨-២៧
ព្រះយេស៊ូវព្រមានពួកសិស្សរបស់ទ្រង់អំពីការបៀតបៀន ដែលពួកគេនឹងជួបប្រទះចំពោះការថ្លែងទីបន្ទាល់អំពីទ្រង់
សូមពន្យល់ថាបន្ទាប់ពីព្រះអង្គសង្គ្រោះបានបង្រៀនអំពីការនៅជាប់នឹងទ្រង់ ហើយបង្ហាញសេចក្តីស្រឡាញ់ចំពោះគ្នាទៅវិញទៅមក នោះទ្រង់បានបង្រៀនពួកគេអំពីអ្វីដែលបានកើតឡើងដល់ពួកគេ ដោយសារតែសាក្សីពិសេសដែលពួកគេមានអំពីទ្រង់ និងទំនួលខុសត្រូវដើម្បីចែកចាយ។
សូមអញ្ជើញសិស្សម្នាក់ឲ្យអានយ៉ូហាន ១៥:១៨-២០ឲ្យឮៗ ហើយសុំឲ្យសិស្សក្នុងថ្នាក់រកមើលអ្វីដែលព្រះយេស៊ូវបានបង្រៀនថា តើលោកិយនេះនឹងប្រព្រឹត្តចំពោះពួកសិស្សរបស់ទ្រង់យ៉ាងដូចម្ដេច ។ ( សូមពន្យល់ថា នៅក្នុងខគម្ពីរទាំងនេះ ពាក្យ « លោកិយ » សំដៅទៅលើមនុស្សដែលប្រព្រឹត្តបាប ហើយបដិសេធព្រះ ) ។
-
តើព្រះយេស៊ូវបានមានបន្ទូលថា លោកិយនឹងប្រព្រឹត្តចំពោះពួកសិស្សរបស់ទ្រង់យ៉ាងដូចម្ដេច ?
អ្នកគួរចង្អុលបង្ហាញដល់សិស្សថា ដោយសារ « លោកិយបានស្អប់ » ពួកសិស្សរបស់ព្រះអង្គសង្គ្រោះ នោះសិស្សនឹងទំនងជាជួបការប្រឆាំងនឹងពួកមរមន និងប្រព័ន្ធផ្សព្វផ្សាយ ព្រមទាំងវិបសាយដែលពេញដោយការស្អប់ ។ សិស្សមួយចំនួននឹងជួបនូវការបដិសេធ ការចំអក និងការបំភិតបំភ័យតាមរយៈឥរិយាបថខឹងសម្បារ រួមទាំងការផ្ញើសារបំភ័យផងដែរ ។
ប្រសិនបើអាចធ្វើបាន អ្នកគួរពិចារណាណែនាំសិស្សពីរបៀប និងទីកន្លែងស្វែងរកចម្លើយសម្រាប់ការចោទប្រកាន់ ដែលពេញដោយការស្អប់ទាស់នឹងសាសនាចក្រ ។ បន្ថែមពីលើការស្វែងរកជំនួយពីពួកមជ្ឈិមវ័យ ដែលទុកចិត្ត សិស្សអាចស្វែងរកធនធានតាមអ៊ិនធើរណែតនៅ , lds.org/topics និង seektruth.lds.org ។
សូមសង្ខេប យ៉ូហាន ១៥:២១–២៥ ដោយពន្យល់ថាព្រះយេស៊ូវគ្រីស្ទបានមានបន្ទូលថា អស់អ្នកដែលស្អប់ទ្រង់ ក៏ស្អប់ព្រះវរបិតាដែរ ហើយថាពួកគេនឹងត្រូវទទួលខុសត្រូវចំពោះជម្រើសរបស់ពួកគេ ។
សូមពន្យល់ថា ទោះបីជាមានការស្អប់ខ្ពើម និង ការបៀតបៀនពីសំណាក់មនុស្សដទៃចំពោះពួកអ្នកដើរតាមព្រះអង្គសង្គ្រោះក្តី ក៏ព្រះយេស៊ូវគ្រីស្ទបានប្រទានរបៀបនានាសម្រាប់ពិភពលោក ដើម្បីទទួលនូវទីបន្ទាល់អំពីទ្រង់ ។ សូមអញ្ជើញសិស្សអាន យ៉ូហាន ១៥:២៦-២៧ដោយស្ងៀមស្ងាត់រកមើលសាក្សីដែលនឹងថ្លែងទីបន្ទាល់ អំពីព្រះយេស៊ូវគ្រីស្ទទៅកាន់ពិភពលោក ។
-
តើនរណាដែលព្រះអង្គសង្គ្រោះបានមានបន្ទូលថា នឹងថ្លែងទីបន្ទាល់ពីទេវភាពរបស់ទ្រង់ ? ( ព្រះវិញ្ញាណបរិសុទ្ធ និងពួកសិស្សរបស់ព្រះអង្គសង្គ្រោះ ) ។
សូមអញ្ជើញសិស្សសញ្ជឹងគិតអំពីគោលការណ៍ និងសេចក្ដីពិតនានា នៅក្នុងមេរៀននេះ ។ សូមលើកទឹកចិត្តពួកគេឲ្យពិនិត្យមើលឡើងវិញ នូវអារម្មណ៍ដែលពួកគេត្រូវបានបំផុសគំនិតឲ្យធ្វើ ហើយធ្វើតាមការបំផុសគំនិត ដែលពួកគេបានទទួលពីព្រះវិញ្ញាណបរិសុទ្ធ ។
សេចក្តីពន្យល់ និង ព័ត៌មានសាច់រឿង
យ៉ូហាន ១៥:៤-៥ ។ ប្រសិនបើយើងនៅជាប់នៅក្នុងព្រះអង្គសង្គ្រោះ នោះយើងនឹងបង្កើតកិច្ចការសុចរិត
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀនពីអត្ថន័យនៃការនៅជាប់នឹងព្រះអង្គសង្គ្រោះ ៖
« ‹ ចូរនៅជាប់នឹងខ្ញុំ › [ យ៉ូហាន ១៥:៤ ] គឺជាបញ្ញត្តិដែលអាចយល់បាន ហើយមានន័យល្មមគ្រប់គ្រាន់នៅក្នុងព្រះគម្ពីរប៊ីបរបស់ស្តេចជេមស៍ជាភាសាអង់គ្លេស ប៉ុន្តែពាក្យថា ‹ នៅជាប់នឹង › ជាពាក្យដែលឈប់ប្រើច្រើនទៀតហើយ ។ ដូច្នេះ ធ្វើឲ្យខ្ញុំកាន់តែមានអំណរគុណចំពោះការដាស់តឿននេះមកពីព្រះអង្គសង្គ្រោះ កាលខ្ញុំបានណែនាំឲ្យស្គាល់ការបកប្រែនៃសារលិខិតនេះជាភាសាមួយទៀត ។ ក្នុងភាសាអេស្ប៉ាញ ឃ្លាស្រដៀងគ្នានោះត្រូវបានប្រែថា ‹ permaneced en mi › ដូចជាភាសាអង់គ្លេសដែរ កិរិយាសព្ទ ‹ នៅជប់នឹង › permanecer មានន័យថា ‹ បន្ត នៅ › ប៉ុន្តែសូម្បីតែ [ ពួកអ្នកនិយាយភាសាអង់គ្លេស ] ដូចជារូបខ្ញុំក៏អាចស្ដាប់ដឹងពីឫសគល់ដូចគ្នានៃពាក្យ ‹ អចិន្ត្រៃយ៍ភាព › ដែរ ។ ដូច្នេះអត្ថន័យនៃពាក្យនេះគឺ ‹ នៅ—ប៉ុន្តែនៅជារៀងរហូត › ។ នោះគឺជាការអំពាវនាវនៃសារលិខិតនៃដំណឹងល្អដល់ [ មនុស្សគ្រប់រូប ] នៅក្នុងពិភពលោក ។ ចូរមកប៉ុន្តែត្រូវនៅបន្ត ។ ចូរមកដោយជំនឿស៊ប់ និងការស៊ូទ្រាំ ។ ចូរមកជាអចិន្ត្រៃយ៍សម្រាប់ប្រយោជន៍របស់អ្នក និងប្រយោជន៍នៃរាល់ជំនាន់ក្រោយអ្នកទៀត ។ …
« … ព្រះគ្រីស្ទគឺជាអ្វីៗគ្រប់យ៉ាងចំពោះយើង ហើយយើងត្រូវ ‹ នៅជាប់នឹង › ទ្រង់ជាអចិន្ត្រៃយ៍ ឥតងាករេ ខ្ជាប់ខ្ជួនជារៀងរហូត ។ ដើម្បីផលផ្លែនៃដំណឹងល្អរីកឡើង ហើយឲ្យពរដល់ជីវិតយើង យើងត្រូវតែនៅជាប់នឹងទ្រង់ ជាព្រះអង្គសង្គ្រោះនៃយើងរាល់គ្នា និងចំពោះសាសនាចក្ររបស់ទ្រង់ដែលមានព្រះនាមដ៏បរិសុទ្ធរបស់ទ្រង់ ។ ទ្រង់គឺជាដើមទំពាំងបាយជូរដែលជាប្រភពពិតនៃកម្លាំង និងជាប្រភពតែមួយនៃជីវិតដ៏នៅអស់កល្បជានិច្ច » ( « Abide in Me » Ensign ឬ Liahona ខែ ឧសភា ឆ្នាំ ២០០៤ ទំព័រ ៣២ ) ។
អែលឌើរ ជេមស៍ អិម ប៉ារ៉ាម័រ នៃពួកចិតសិបនាក់បានបង្រៀនអំពីរបៀបដែលព្រះបញ្ជូនសេចក្ដីស្រឡាញ់ និងព្រះចេស្ដារបស់ទ្រង់ដល់ជន ដែលគោរពតាមព្រះបញ្ញត្តិ ៖
« នៅពេលយើងស្វែងរកព្រះវរបិតាយើងដែលគង់នៅស្ថានសួគ៌ដោយការអធិស្ឋាន និងដោយការរៀនសូត្រ និងការគោរពតាមព្រះបញ្ញត្តិ ទ្រង់បញ្ជូនសេចក្ដីស្រឡាញ់របស់ទ្រង់ និងព្រះចេស្ដារបស់ទ្រង់ជាច្រើនដល់យើង ។ មានមនុស្សរាប់ពាន់នាក់បានថ្លែងទីបន្ទាល់ថា បន្ទូលរបស់ទ្រង់ ‹ បើអ្នករាល់គ្នាកាន់តាមបញ្ញត្តខ្ញុំ នោះនឹងនៅជាប់ក្នុងសេចក្តីស្រឡាញ់របស់ខ្ញុំ ›( យ៉ូហាន ១៥:១០ )គឺពិត ។ បន្ទាប់មក ដូចដែលព្រះអង្គសង្គ្រោះបានបន្ទូល នោះយើងចាប់ផ្ដើមភ្ជាប់ខ្លួនយើងធ្វើជាមែកទៅនឹង ‹ ដើមទំពាំងជូរពិត › ហើយទទួលបានកម្លាំង និងអំណាចដូចគ្នា ហើយអាចរំពឹងថានឹងទទួលបានផលផ្លែដូចគ្នា ។ ( សូមមើល យ៉ូហាន ១៥:១-៦ ) ។ ( « Love One Another » Ensign ខែ ឧសភា ឆ្នាំ ១៩៨១ ទំព័រ ៥៤ ) ។
យ៉ូហាន ១៥:៨-១៤ ។ « នោះទើបនឹងបង្កើតផលឡើងជាច្រើន »
ប្រធាន យ៉ូហាន ថេលើរ បានបង្រៀនថា យើងត្រូវមានចិត្តរាបសា ស្មោះត្រង់ ឧស្សាហ៍ ហើយគោរពប្រតិបត្តិ ប្រសិនបើយើងចង់ធ្វើជាមែកដែលមានផលផ្លែល្អ ៖
« ក្នុងនាមជាពួកបរិសុទ្ធម្នាក់អ្នកពោលថា ‹ ខ្ញុំគិតថា ខ្ញុំយល់ពីកាតព្វកិច្ចរបស់ខ្ញុំ ហើយខ្ញុំនឹងធ្វើវាឲ្យបានល្អបំផុត › ។ នោះអាចការពិត ។ អ្នកឃើញមែកតូចៗ វាមានពណ៌បៃតង កំពុងលូតលាស់ ហើយបង្ហាញពីរូបភាពនៃជីវិត វាទទួលខុសត្រូវផ្នែករបស់វានៅក្នុងដើមឈើនោះ ហើយភ្ជាប់នឹងទង មែក និងឫស ចុះតើដើមឈើអាចរស់ដោយគ្មានវាបានទេ ? មែនហើយ ពិតជាអាច ។ វាមិនត្រូវការអួតខ្លួនឯង ហើយលើកតម្កើង ដោយពោលថា ‹ ខ្ញុំលូតលាស់ខៀវខ្ចីអ្វីម៉្លេះ ហើយខ្ញុំស្ថិតនៅក្នុងទីតាំងល្អម៉្លេះហ្ន៎ ខ្ញុំធ្វើបានល្អអ្វីម៉្លេះទេ ហើយខ្ញុំស្ថិតនៅកន្លែងដ៏ត្រឹមត្រូវ ហើយខ្ញុំកំពុងធ្វើរឿងត្រឹមត្រូវ › ។ ចុះតើអ្នកអាចធ្វើវាដោយគ្មានឫសបានទេ ? ទេ អ្នកមានទំនួលខុសត្រូវចំពោះផ្នែក និងទីតាំងត្រឹមត្រូវរបស់អ្នកនៅក្នុងដើមឈើនោះ ។ វាក៏ដូចជាមនុស្សដែរ ។ នៅពេលពួកគេកំពុងធ្វើផ្នែកខ្លួន នៅពេលពួកគេកំពុងពង្រីងការហៅខ្លួន ដោយរស់នៅតាមសាសនារបស់ពួកគេ ហើយដើរក្នុងការគោរពប្រតិបត្តិដល់ព្រះវិញ្ញាណរបស់ព្រះអម្ចាស់ នោះពួកគេមានបំណែកមួយនៃព្រះវិញ្ញាណរបស់ទ្រង់បានប្រទានដល់ពួកគេដើម្បីបានជាប្រយោជន៍ ។ ហើយកាលពួកគេមានចិត្តរាបសា ស្មោះត្រង់ ឧស្សាហ៍ ហើយគោរពតាមក្រឹត្យវិន័យ និងព្រះបញ្ញត្តិនៃព្រះ ពួកគេឈរនៅក្នុងកន្លែងដ៏ត្រឹមត្រូវរបស់ខ្លួននៅលើដើមឈើនោះ ពួកគេកំពុងរីកលូតលាស់ ត្រួយពន្លក ផ្កា ស្លឹក និងអ្វីៗអំពីពួកគេគឺត្រឹមត្រូវ ហើយពួកគេបង្កើតផ្នែកមួយ និងចំណែកតូចៗនៃដើមឈើនោះ » ( ថ្ងៃទី ១៦ ខែ ធ្នូ ឆ្នាំ ១៨៥៧ ទំព័រ ៣២៣ ) ។
យ៉ូហាន ១៥:១៣ ។ « គ្មានអ្នកណាមានសេចក្ដីស្រឡាញ់ធំជាងនេះ »
ប្រធាន ហ្គរដុន ប៊ី ហ៊ិងគ្លី បានចែកចាយអារម្មណ៍របស់លោកអំពី យ៉ូហាន ១៥:១៣ ៖
« ព្រះយេស៊ូវជាមិត្តរបស់ខ្ញុំ ។ គ្មាននរណាផ្សេងទៀតបានផ្ដល់ដល់ខ្ញុំច្រើនបែបនេះទេ ។ ‹ គ្មានអ្នកណាមានសេចក្ដីស្រឡាញ់ធំជាងនេះ គឺដែលអ្នកណានឹងប្ដូរជីវិតជំនួសពួកសំឡាញ់របស់ខ្លួននោះទេ › (យ៉ូហាន ១៥:១៣) ។ ទ្រង់បានប្រទានជីវិតរបស់ទ្រង់ដល់ខ្ញុំ ។ ទ្រង់បានបើកផ្លូវទៅកាន់ជីវិតដ៏នៅអស់កល្បជានិច្ច ។ មានតែព្រះទេ ទើបអាចធ្វើការណ៍នេះបាន ។ ខ្ញុំសង្ឃឹមថា ខ្ញុំត្រូវបានចាត់ទុកថាមានភាពសក្ដិសមជាមិត្តម្នាក់ដល់ទ្រង់ » ( « My Testimony » Ensign ខែ ឧសភា ឆ្នាំ ២០០០ ទំព័រ ៧១ ) ។