មេរៀនសិក្សានៅផ្ទះ
វិវរណៈ ១២–២២ ( មេរៀនទី ៣២ )
សេចក្ដីផ្ដើម
សាវកយ៉ូហានបាននិមិត្តឃើញព្រឹត្តិការណ៍ជាច្រើនដែលនឹងកើតឡើងភ្លាមៗ ពីមុននិងនៅក្នុងរជ្ជកាលនៃសហស្សវត្សរ៍របស់ព្រះយេស៊ូវគ្រីស្ទ ។ លោកក៏បានឃើញផងដែរអំពីចម្បាំងចុងក្រោយរវាងសាតាំង និងទ័ពរបស់ព្រះនៅចុងបញ្ចប់នៃសហស្សវត្សរ៍ ហើយលោកបានឃើញការកាត់សេចក្ដីចុងក្រោយ ជាគ្រាដែលព្រះនឹងកាត់សេចក្ដីមនុស្សគ្រប់គ្នាចេញពីសៀវភៅដែលបានកត់ត្រាទុក ។
យោបល់សម្រាប់ការបង្រៀន
វិវរណៈ ២០:១–៦
យ៉ូហានឃើញអ្វីដែលនឹងកើតឡើងភ្លាមៗពីមុន និងនៅក្នុងរជ្ជកាលនៃសហស្សវត្សរ៍របស់ព្រះយេស៊ូវគ្រីស្ទនៅក្នុងការនិមិត្ត
សូមឲ្យសិស្សគិតអំពីការប្រកួតមួយ ( ដូចជាព្រឹត្តិការណ៍ខាងសិល្បៈ ឬខាងអត្តពលកម្ម ) ដែលពួកគេបានចូលរួម ទោះបីជាពួកគេបានដឹងខ្លួនជាមុនថា ពួកគេនឹងត្រូវចាញ់ក៏ដោយ ។ បន្ទាប់មក សូមឲ្យពួកគេគិតអំពីគ្រាមួយដែលពួកគេបានចូលរួមនៅក្នុងការប្រកួតមួយដែលពួកគេជឿថា ពួកគេនឹងឈ្នះ ។
-
តើការរំពឹងទុករបស់អ្នកអំពីលទ្ធផលនៃការប្រកួតមួយអាចផ្លាស់ប្ដូរការខិតខំរបស់អ្នកយ៉ាងដូចម្ដេច ?
-
ហេតុអ្វីមនុស្សសុខចិត្តបោះបង់ចោលការប្រកួត នៅពេលពួកគេគិតថាពួកគេនឹងចាញ់នោះ ? តើនៅពេលណាដែរ ដែលអ្នកគិតថា អ្នកនឹងចាញ់ ប៉ុន្តែបែរជាឈ្នះវិញនោះ ?
សូមពន្យល់សិស្សថា នៅពេលពួកគេសិក្សា វិវរណៈ ២០ ពួកគេនឹងរៀនបន្ថែមទៀតអំពីចម្បាំងរវាងអំពើល្អ និងអំពើអាក្រក់ និងលទ្ធផលចុងក្រោយនៃចម្បាំងនោះ ។ នៅពេលសិស្សសិក្សា វិវរណៈ ២០ សូមអញ្ជើញពួកគេឲ្យរកមើលសេចក្ដីពិត ដែលអាចទាក់ទាញចិត្តពួកគេឲ្យបន្តស្មោះត្រង់ចំពោះព្រះអង្គសង្គ្រោះនៅក្នុងចម្បាំងនេះ ។
សូមអញ្ជើញសិស្សម្នាក់អាន វិវរណៈ ២០:១–៣ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថានឹងមានអ្វីកើតឡើងដល់សាតាំងនៅពេលសហស្សវត្សរ៍ ។
-
តើនឹងមានអ្វីកើតឡើងដល់សាតាំងអំឡុងពេលសហស្សវត្សរ៍ ?
-
យោងតាមខទី ៣តើអ្វីទៅដែលសាតាំងពុំអាចធ្វើបាន ដោយសារតែត្រូវបានចាប់ចង ?
សូមអញ្ជើញសិស្សម្នាក់អាន វិវរណៈ ២០:៤–៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាតើយ៉ូហានបានឃើញថានរណាខ្លះទទួលបានការកាត់សេចក្ដី ។
-
យោងតាម ខទី ៤ តើយ៉ូហានបានឃើញថា នរណាខ្លះទទួលបានការកាត់សេចក្ដី ?
-
តើប្រជាជនទាំងនេះបានទទួលរង្វាន់អ្វីខ្លះ ដោយសារតែសេចក្ដីស្មោះត្រង់របស់ពួកគេ ?
-
តើពួកគេនឹងមានចំណែកអ្វីខ្លះនៅសហស្សវត្សរ៍ ? ( ការរស់ឡើងវិញលើកទីមួយ ) ។
-
តើយើងអាចរៀនគោលការណ៍អ្វីខ្លះនៅក្នុង វិវរណៈ ២០:៤–៦ អំពីពរជ័យដែលយើងអាចទទួលបាន ប្រសិនបើយើងស្មោះត្រង់ចំពោះព្រះយេស៊ូវគ្រីស្ទ ? ( សិស្សអាចនឹងប្រើពាក្យផ្សេង ប៉ុន្តែពួកគេគួរស្គាល់គោលការណ៍មួយស្រដៀងគ្នានឹងគោលការណ៍ដូចតទៅនេះ ៖ ប្រសិនបើយើងស្មោះត្រង់ចំពោះព្រះយេស៊ូវគ្រីស្ទ នោះយើងនឹងមានចំណែកនៅក្នុងការរស់ឡើងវិញលើកទីមួយ ហើយគ្រងរាជ្យជាមួយនឹងព្រះគ្រីស្ទនៅសហស្សវត្សរ៍ ) ។
សូមពន្យល់ថា ការរស់ឡើងវិញលើកទីមួយបានចាប់ផ្ដើមជាមួយនឹងការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ហើយបានរួមបញ្ចូលពួកសុចរិត ដែលបានស្លាប់ពីមុនការមានព្រះជន្មរស់ឡើងវិញរបស់ព្រះគ្រីស្ទ ( សូមមើល ម៉ូសាយ ១៥:២១–២៥, អាលម៉ា ៤០:១៦–២០ ) ។ ពួកបរិសុទ្ធភាគច្រើនដែលបានស្លាប់ បន្ទាប់ពីការមានព្រះជន្មរស់ឡើងវិញរបស់ព្រះគ្រីស្ទនឹងបានរស់ឡើងវិញនៅឯការយាងមកជាលើកទីពីររបស់ព្រះយេស៊ូវគ្រីស្ទ ( សូមមើល Bruce R. McConkie, Mormon Doctrine កំណែទី ២ [ ឆ្នាំ ១៩៦៦ ] ទំព័រ ៦៣៩; James E. Talmage The Articles of Faith កំណែទី ១២ [ ឆ្នាំ ១៩២៤ ] ទំព័រ ៣៨៥ ) ។ អស់អ្នកដែលនឹងលេចមកនៅក្នុងការរស់ឡើងវិញលើកទីមួយ រួមមាន « ពួកព្យាការី និងអស់អ្នកណាដែលបានជឿតាមពាក្យសម្ដីរបស់គេ » ( ម៉ូសាយ ១៥:២២ ) ជនដែលបានស្លាប់ទៅនៅក្នុងភាពល្ងិតល្ងង់ ដោយគ្មាន « អ្នកណាប្រកាសប្រាប់អំពីសេចក្ដីសង្គ្រោះដល់គេ » ( ម៉ូសាយ ១៥:២៤, សូមមើលផងដែរ គ. និង ស. ៤៥:៥៤ ) និងពួកក្មេងតូចៗដែលបានស្លាប់ពីមុនវ័យចេះទទួលខុសត្រូវ ( សូមមើល ម៉ូសាយ ១៥:២៥, មរ៉ូណៃ ៨:៤–២៤ ) ។ ពួកទុច្ចរិត និងជនដែលពុំប្រែចិត្តនឹងពុំបានរស់ឡើងវិញឡើយ រហូតដល់ការរស់ឡើងវិញជាលើកទីពីរដែលនឹងកើតឡើងនៅចុងបញ្ចប់នៃសហស្សវត្សរ៍ ( សូមមើល គ. និង ស. ៧៦:៨៥ ) ។
-
តើការដឹងថា អ្នកអាចមានចំណែកនៅក្នុងការរស់ឡើងវិញលើកទីមួយ ហើយគ្រងរាជ្យជាមួយនឹងព្រះយេស៊ូវគ្រីស្ទនៅសហសវត្សរ៍ អាចជួយអ្នកឲ្យស្មោះត្រង់នៅពេលនេះនៅក្នុងចម្បាំងទាស់នឹងអំពើអាក្រក់បានយ៉ាងដូចម្ដេច ?
សូមថ្លែងទីបន្ទាល់ថា ជនដែលបន្តស្មោះត្រង់នឹងមានចំណែកមួយនៅក្នុងការរស់ឡើងវិញលើកទីមួយ ហើយគ្រងរាជ្យនឹងព្រះអង្គសង្គ្រោះនៅក្នុងសហស្សវត្សរ៍ ។
វិវរណៈ ២០:៧–១១
យ៉ូហានឃើញចម្បាំងចុងក្រោយរវាងសាតាំង និងទ័ពនៃព្រះនៅចុងបញ្ចប់នៃសហស្សវត្សរ៍ ។
សូមសរសេរឃ្លាមិនពេញលេញខាងក្រោមនេះ នៅលើក្ដារខៀន ៖នៅចុងបញ្ចប់នៃសហស្សវត្សរ៍ …
សូមអញ្ជើញសិស្សម្នាក់អាន វិវរណៈ ២០:៧–១០ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលព្រឹត្តិការណ៍ ដែលយ៉ូហានបានពិពណ៌នាថានឹងកើតឡើងនៅចុងបញ្ចប់នៃសហស្សវត្សរ៍ ។
សូមអញ្ជើញសិស្សពីរបីនាក់ឲ្យឡើងមកក្ដារខៀនសរសេរអំពីអ្វីដែលពួកគេបានរកឃើញ ។ បន្ទាប់មក សួរពួកគេនូវសំណួរខាងក្រោមនេះ ៖
-
តើយ៉ូហានបានពិពណ៌នាអំពីព្រឹត្តិការណ៍អ្វីខ្លះ ? ( សូមពន្យល់ថា ឈ្មោះ សាសន៍កុក និង សាសន៍ម៉ាកុក នៅក្នុង ខទី ៨ សំដៅទៅលើទ័ពដែលសាតាំងនឹងប្រើនៅចុងបញ្ចប់នៃសហស្សវត្សរ៍ ដើម្បីច្បាំងជាលើកចុងក្រោយទាស់នឹងរាស្ត្ររបស់ព្រះអម្ចាស់ [ សូមមើល គ. និង ស. ៨៨:១១០–១១៤ ] ) ។
-
បន្ទាប់ពីចម្បាំងនេះ តើនឹងមានអ្វីខ្លះកើតចំពោះអារក្ស និងពួកបរិវាររបស់វា ? ( បន្ទាប់ពីសិស្សឆ្លើយរួច សូមបំពេញឃ្លានៅលើក្ដារខៀនដើម្បីឲ្យវាមានន័យដូចតទៅនេះ ៖ នៅចុងបញ្ចប់នៃសហស្សវត្សរ៍ ទ័ពរបស់ព្រះនឹងយកឈ្នះលើសាតាំង និងពួកពលបរិវាររបស់វា ) ។
-
ហេតុអ្វីវាគឺជារឿងដ៏សំខាន់ដែលយើងត្រូវដឹងអំពីលទ្ធផលចុងក្រោយនៃចម្បាំងរវាងព្រះ និងសាតាំង ?
វិវរណៈ ២០:១២–១៥
យ៉ូហានឃើញសេចក្តីជំនុំជម្រះចុងក្រោយ
សូមពន្យល់ថា ជាផ្នែកមួយនៅក្នុងផែនការនៃសេចក្ដីសង្គ្រោះរបស់ព្រះវរបិតាសួគ៌ មនុស្សគ្រប់រូបដែលធ្លាប់រស់នៅលើផែនដីនេះនឹងឈរទទួលការកាត់សេចក្ដីនៅចំពោះព្រះ ។ សូមឲ្យសិស្សនឹកស្រមៃអំពីទិដ្ឋភាពនៃសេចក្តីជំនុំជម្រះចុងក្រោយ ។
-
តើអ្នកចង់គិត ហើយទទួលអារម្មណ៍អំពីអ្វីដែរ នៅពេលអ្នកឈរទទួលការកាត់សេចក្ដីនៅចំពោះមុខព្រះនោះ ?
ចូរសុំឲ្យសិស្សម្នាក់អាន វិវរណៈ ២០:១២–១៣ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា ព្រះនឹងកាត់សេចក្ដីយើងយ៉ាងដូចម្ដេច ។
-
តើយើងអាចរៀនសេចក្ដីពិតអ្វីខ្លះនៅក្នុងខទី ១២ អំពីរបៀបដែលយើងនឹងទទួលការកាត់សេចក្ដី ? ( សិស្សអាចនឹងប្រើពាក្យខុសៗគ្នា ប៉ុន្តែពួកគេគួរស្គាល់ពីសេចក្ដីពិតខាងក្រោមនេះ ៖ព្រះនឹងកាត់សេចក្ដីយើងចេញពីសៀវភៅដែលបានសរសេរទុកស្របតាមការប្រព្រឹត្តរបស់យើង ) ។
-
តើយ៉ូហានបានឃើញសៀវភៅអ្វីខ្លះ ? ( ព្រះគម្ពីរ និងកំណត់ត្រាសាសនាចក្រដែលកត់ត្រាពិធីបរិសុទ្ធនៃការសង្គ្រោះ ហើយប្រហែលជាទង្វើផ្សេងៗទៀត និងបញ្ជីជីវិត [ សូមមើល នីហ្វៃទី ២ ២៩:១០–១១, គ. និង ស. ១២៨:៦–៧, Bible Dictionary « Book of life » ] ) ។
-
តើអ្នកបានរៀនអ្វីខ្លះទៀតអំពីសេចក្តីជំនុំជម្រះចុងក្រោយ ? ( កំណត់ចំណាំ ៖ នៅក្នុងមេរៀនទី ៣២ ៖ ថ្ងៃទី ៤ លំហាត់ទី ៣ សិស្សបានរកឃើញបទគម្ពីរបន្ថែមទៀតដែលបង្រៀនអំពីសេចក្តីជំនុំជម្រះចុងក្រោយ ) ។
សូមចង្អុលបង្ហាញថា ព្រះអម្ចាស់បានបើកសម្ដែងដល់ព្យាការីយ៉ូសែប ស្ម៊ីធថា បន្ថែមពីលើការប្រព្រឹត្តរបស់យើង យើងនឹងទទួលការកាត់សេចក្ដីស្របតាមបំណងប្រាថ្នានៃដួងចិត្តរបស់យើង ( សូមមើល គ. និង ស. ១៣៧:៩, សូមមើលផងដែរ អាលម៉ា ៤១:៣–៥ ) ។
-
តើការដឹងថា យើងនឹងទទួលបានការកាត់សេចក្ដីស្របតាមបំណងប្រាថ្នានៃដួងចិត្តរបស់យើងនោះ ជះឥទ្ធិពលទៅលើអ្វីដែលយើងធ្វើយ៉ាងដូចម្ដេចដែរ ?
សូមថ្លែងទីបន្ទាល់អំពីគោលលទ្ធិនេះ និងរបៀបដែលវាជះឥទ្ធិពលដល់ការជ្រើសរើសរបស់អ្នក ។
សូមអញ្ជើញសិស្សម្នាក់អាន វិវរណៈ ២២:១៤ ឲ្យឮ ។ ចូរសុំឲ្យសិស្សក្នុងថ្នាក់ផ្ទៀងតាម ហើយចងចាំអំពីគោលការណ៍ ដែលពួកគេបានរៀនមកពីខគម្ពីរនេះនៅក្នុងការសិក្សារបស់ពួកគេនៅផ្ទះ ។
-
តើអ្នកបានរៀនអ្វីខ្លះនៅក្នុងខគម្ពីរនេះ ? ( ប្រសិនបើយើងគោរពតាមបទបញ្ញត្តិរបស់ព្រះអម្ចាស់ នោះយើងអាចទទួលបាននូវរាល់ពរជ័យនៃដង្វាយធួនរបស់ព្រះយេស៊ូវគ្រីស្ទ ហើយចូលទៅក្នុងនគរសេឡេស្ទាល ។ សូមសរសេរគោលការណ៍នេះនៅលើក្ដារខៀន ) ។
-
ហេតុអ្វីក៏ការណ៍នេះគឺជាសេចក្ដីពិតដ៏ត្រឹមត្រូវមួយ ដើម្បីបញ្ចប់ការសិក្សារបស់យើងអំពីព្រះគម្ពីរសញ្ញាថ្មី ?
សូមពិចារណាអញ្ជើញសិស្សឲ្យចែកចាយសេចក្ដីពិតមួយចំនួន ដែលបានជះឥទ្ធិពលដល់ពួកគេនៅក្នុងការសិក្សារបស់ពួកគេនាឆ្នាំនេះអំពីព្រះគម្ពីរសញ្ញាថ្មី ។ សូមអញ្ជើញសិស្សម្នាក់ណាក៏បាន ដែលមានបំណងចង់ចែកចាយទីបន្ទាល់របស់ខ្លួនអំពីសេចក្ដីពិតទាំងនេះ និងអំពីភាពជាព្រះរបស់ព្រះអម្ចាស់ ព្រះយេស៊ូវគ្រីស្ទ ។
សូមលើកទឹកចិត្តសិស្សឲ្យបន្តសិក្សាព្រះគម្ពីរទាំងឡាយជារៀងរាល់ថ្ងៃ ។ ប្រសិនបើពួកគេចូលថ្នាក់សិក្ខាសាលានៅឆ្នាំក្រោយ ឬប្រសិនបើពួកគេកំពុងរៀបចំខ្លួនទៅបេសកកម្ម សូមអញ្ជើញពួកគេឲ្យចាប់ផ្ដើមអានព្រះគម្ពីរមរមននៅថ្ងៃនេះ ។