មេរៀនទី ១៤៧
ពេត្រុសទី២ ២-៣
សេចក្ដីផ្ដើម
ពេត្រុសបានព្រមានថា ពួកព្យាការី និងពួកគ្រូបង្រៀនក្លែងក្លាយនឹងដឹកនាំប្រជាជនឲ្យវង្វេង ។ លោកបានព្យាករថា នៅថ្ងៃចុងក្រោយ មនុស្សទុច្ចរិតនឹងចំអកដល់មនុស្សសុចរិតដែលជឿថា ព្រះយេស៊ូវគ្រីស្ទនឹងយាងមកវិញ ។ ពេត្រុសបានលើកទឹកចិត្តពួកបរិសុទ្ធ ឲ្យព្យាយាមរៀបចំខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ។
យោបល់សម្រាប់ការបង្រៀន
ពេត្រុសទី២ ២
ពេត្រុសព្រមានអំពីការបោកបញ្ឆោតរបស់ពួកគ្រូបង្រៀនក្លែងក្លាយ
សូមសរសេរសំណួរដូចតទៅនេះនៅលើក្ដារខៀន ៖ ហេតុអ្វីមនុស្សជ្រើសយកអំពើបាប ទោះជាពួកគេដឹងថា រឿងដែលពួកគេកំពុងធ្វើគឺជារឿងខុសឆ្គងក្ដី ?
សូមអញ្ជើញសិស្សឲ្យពិចារណាពីសំណួរនេះ រួចហើយសូមឲ្យពួកគេពីរបីនាក់ប្រាប់ពីចម្លើយរបស់ពួកគេ ។
សូមពន្យល់ថា នៅក្នុង ពេត្រុសទី ២ ២ យើងអានថា សាវកពេត្រុសបានព្រមានពួកបរិសុទ្ធ អំពីមនុស្សដែលកំពុងស្វែងរកបោកបញ្ឆោតពួកគេ ។ នៅពេលសិស្សសិក្សា ពេត្រុសទី ២ ២ សូមអញ្ជើញពួកគេឲ្យរកមើលសេចក្ដីពិតមួយ ដែលអាចជួយពួកគេឲ្យស្គាល់ ហើយចៀសផុតពីការបោកបញ្ឆោតដែលដឹកនាំទៅរកអំពើបាប ។
សូមអញ្ជើញសិស្សម្នាក់អាន ពេត្រុសទី២ ២:១-៣ ឲ្យឮៗ ។ ចូរសុំសិស្សក្នុងថ្នាក់ផ្ទៀងតាម រកមើលការព្រមានរបស់ពេត្រុស អំពីជនដែលនឹងព្យាយាមបោកបញ្ឆោតពួកបរិសុទ្ធ ។
-
តើពេត្រុសបានព្រមានពួកបរិសុទ្ធអំពីនរណា ?
-
តើពួកព្យាការី និងពួកគ្រូបង្រៀនក្លែងក្លាយទាំងនេះបង្រៀនអំពីអ្វី ? ( សូមពន្យល់ថា « បក្សពួកដែលបង្ខូចបំផ្លាញ » [ ខទី ១ ] គឺជាការបង្រៀនក្លែងក្លាយ ហើយបំផ្លិចបំផ្លាញ ) ។
-
តើយើងអាចរៀនសេចក្ដីពិតអ្វីខ្លះមកពីពេត្រុសថា ពួកគ្រូបង្រៀនក្លែងក្លាយខិតខំធ្វើអ្វីខ្លះដល់យើង ? ( សូមជួយសិស្សឲ្យស្គាល់សេចក្ដីពិតមួយស្រដៀងគ្នានឹងសេចក្ដីពិតដូចតទៅនេះ ៖ ពួកគ្រូបង្រៀនក្លែងក្លាយស្វែងរកបោកបញ្ឆោតយើង ។ សូមសរសេរសេចក្ដីពិតនេះនៅលើក្ដារខៀន ) ។
សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយអែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ឲ្យឮៗ ។ សូមឲ្យសិស្សក្នុងថ្នាក់ស្ដាប់រកមើលថា ពួកគ្រូបង្រៀនក្លែងក្លាយបង្រៀនអ្វីខ្លះនៅសព្វថ្ងៃនេះដើម្បីបោកបញ្ឆោតយើង ។
« ពួកព្យាការីក្លែងក្លាយ និងពួកគ្រូបង្រៀនក្លែងក្លាយ គឺជាពួកអ្នកដែលប្រកាសថា ព្យាការី យ៉ូសែប ស្ម៊ីធ ជាអ្នកបោកប្រាស់ចម្លងសំណៅ ពួកគេមានការសង្ស័យថាការនិមិត្តដំបូងជាបទពិសោធន៍ដ៏ពិតមួយឬយ៉ាងណា ។ ពួកគេប្រកាសថា ព្រះគម្ពីរមរមន និងកិច្ចការផ្សេងៗទៀតដែលមានចែងក្នុងសាសនា ពុំមែនជាបញ្ជីព្រះគម្ពីរមកពីបុរាណនោះទេ ។ ពួកគេក៏ព្យាយាមប្រឌិតនិយមន័យធម្មជាតិនៃក្រុមព្រះផងដែរ ហើយពួកគេបដិសេធថា ព្រះបានប្រទាន និងបន្តប្រទានវិវរណៈនៅសព្វថ្ងៃនេះដល់ព្យាការីរបស់ទ្រង់ដែលត្រូវបានតែងតាំង និងគាំទ្រ ។ …
« ពួកព្យាការីក្លែងក្លាយ និងគ្រូបង្រៀនក្លែងក្លាយក៏ជាពួកអ្នកដែលព្យាយាមផ្លាស់ប្ដូរគោលលទ្ធិដែលព្រះប្រទាន និងគោលលទ្ធិដែលផ្អែកលើព្រះគម្ពីរ ដែលការពារភាពស័ក្ដិសិទ្ធិនៃអាពាហ៍ពិពាហ៍ លក្ខណៈដ៏ទេវភាពនៃក្រុមគ្រួសារ និងគោលលទ្ធិចាំបាច់សម្រាប់សីលធម៌ផ្ទាល់ខ្លួនផងដែរ ។ « ពួកគេគាំទ្រដល់ការផ្ដល់និយមន័យជាថ្មីដល់សីលធម៌ ដើម្បីដំណោះសារចំពោះអំពើកាមគុណ ផិតក្បត់ និងទំនាក់ទំនងភេទដូចគ្នា » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦៣, ៦៤ ) ។
សូមអញ្ជើញសិស្សឲ្យពិចារណាពីគ្រា ដែលពួកគេធ្លាប់ជួបប្រទះនឹងការបង្រៀន ឬសារលិខិតមកពីពួកគ្រូបង្រៀនក្លែងក្លាយ ។
-
ហេតុអ្វីក៏វាជារឿងមានប្រយោជន៍ដើម្បីដឹងពីសារលិខិត និងការបង្រៀនរបស់ពួកគ្រូបង្រៀនក្លែងក្លាយ ?
សូមសង្ខេប ពេត្រុសទី ២ ២:៤–១៧ ដោយពន្យល់ថា ពេត្រុសបានផ្ដល់ជាឧទាហរណ៍បីបួនអំពីរឿងដែលបានកើតឡើងចំពោះប្រជាជន ដែលបានដើរតាមពួកគ្រូបង្រៀនក្លែងក្លាយកាលពីបុរាណ ។ ពេត្រុសក៏បានផ្ដល់ជាឧទាហរណ៍អំពីបុគ្គល ដែលពុំបានរងឥទ្ធិពលពីពួកគ្រូបង្រៀនក្លែងក្លាយផងដែរ ។ បន្ទាប់មក ពេត្រុសបានរៀបរាប់ពីឥរិយាបថទុច្ចរិតរបស់ពួកគ្រូបង្រៀនក្លែងក្លាយ ។
សូមដាក់បង្ហាញដងសន្ទូចមួយ និងនុយខ្លះៗ ឬដាក់បង្ហាញ ឬគូររូបភាពមួយអំពីវត្ថុទាំងនេះនៅលើក្ដារខៀន ។ ( ប្រសិនបើវិធីចាប់ត្រីមួយទៀតងាយនឹងធ្វើឲ្យសិស្សរបស់អ្នកយល់ជាង សូមប្រើវត្ថុ ឬរូបភាពដែលបង្ហាញពីវិធីនោះ ) ។
សូមពន្យល់ថា វិធីមួយដែលអ្នកស្ទួចត្រីចាប់ត្រីបានគឺ ដោយការប្រើនុយដើម្បីទាក់ទាញត្រីឲ្យចូលទៅក្នុងអន្ទាក់ ឬខាំផ្លែសន្ទួច ) ។ សូមអញ្ជើញសិស្សឲ្យពិចារណាថា វិធីសាស្ត្ររបស់អ្នកស្ទួចត្រីម្នាក់ គឺដូចគ្នាទៅនឹងជនដែលជាគ្រូបង្រៀនក្លែងក្លាយយ៉ាងដូចម្ដេច ។
សូមអញ្ជើញសិស្សម្នាក់អាន ពេត្រុសទី២ ២:១៨-១៩ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលថា ពួកគ្រូបង្រៀនក្លែងក្លាយអូសទាញពួកបរិសុទ្ធឲ្យធ្វើតាមការបង្រៀនរបស់ពួកគេយ៉ាងដូចម្ដេច ។
-
តើពួកគ្រូបង្រៀនក្លែងក្លាយអូសទាញ ហើយបោកបញ្ឆោតសមាជិកសាសនាចក្រយ៉ាងដូចម្ដេច ? ( សូមចង្អុលបង្ហាញថា ពួកគ្រូបង្រៀនក្លែងក្លាយមួយចំនួនអាចមានចិត្តស្មោះត្រង់ ប៉ុន្តែបានបោកបញ្ឆោតខ្លួនឯង ) ។
-
តើការបង្រៀនទាំងឡាយរបស់ពួកព្យាការី និងពួកគ្រូបង្រៀនក្លែងក្លាយ ដូចគ្នានឹងនុយចាប់ត្រីយ៉ាងដូចម្ដេច ?
-
យោងតាម ខទី ១៩ តើពួកគ្រូបង្រៀនក្លែងក្លាយទាំងនេះសន្យាអ្វីខ្លះ ? ( « ឥស្សរភាព » ។ និយាយម្យ៉ាងទៀត គឺពួកគេបង្រៀនថា អំពើបាបដឹកនាំទៅរកសេរីភាពធំជាងការគោរពប្រតិបត្តិតាមបទបញ្ញត្តិ ) ។
សូមដាក់បន្ថែមទៅលើសេចក្ដីពិតនៅលើក្ដារខៀន ដើម្បីឲ្យមានន័យដូចតទៅនេះ ៖ ពួកគ្រូបង្រៀនក្លែងក្លាយស្វែងរកបោកបញ្ឆោតយើងឲ្យជឿថា អំពើបាបដឹកនាំទៅរកឥស្សរភាពដ៏កាន់តែអស្ចារ្យ ។
សូមអញ្ជើញសិស្សឲ្យអាន ខទី ១៩ ម្ដងទៀតដោយស្ងៀមស្ងាត់ រកមើលថាមានរឿងអ្វីបានកើតឡើងចំពោះប្រជាជន ដែលធ្លាក់ខ្លួនក្រោមឥទ្ធិពលនៃការបង្រៀនក្លែងក្លាយ និងអំពើបាប ។
-
តើមានរឿងអ្វីបានកើតឡើងចំពោះប្រជាជនដែលធ្លាក់ខ្លួនក្រោមឥទ្ធិពលនៃការបង្រៀនក្លែងក្លាយ និងអំពើបាប ? ( ពួកគេក្លាយជាទាសករចំពោះរឿងទាំងនោះ ) ។
-
តើការបង្រៀនក្លែងក្លាយមួយចំនួនដែលទំនងជាលើកកម្ពស់ដល់សេរីភាព ប៉ុន្តែតាមពិតទៅវាដឹកនាំទៅរកសេវកភាពវិញនោះមានអ្វីខ្លះ ?
សូមអញ្ជើញសិស្សម្នាក់អាន ពេត្រុសទី២ ២:២០-២២ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា ពេត្រុសបានបង្រៀនអ្វីខ្លះ អំពីជនដែលត្រឡប់ទៅរកអំពើបាប បន្ទាប់ពីបានរួចផុតពីវាម្ដងហើយ ។
-
ហេតុអ្វីអ្នកគិតថា ជនដែល « បានរួចពីសេចក្តីស្មោកគ្រោករបស់លោកីយ៍នេះ ដោយបានស្គាល់ព្រះ … យេស៊ូវគ្រីស្ទ » ( ខទី ២០ ) អាចនឹងត្រូវបានល្បួងឲ្យត្រឡប់ទៅផ្លូវនៃអំពើបាបរបស់ពួកគេវិញ ?
-
តើអ្នកនឹងផ្ដល់ពាក្យទូន្មានអ្វីខ្លះ ដើម្បីជួយមនុស្សម្នាក់ឲ្យបន្តស្មោះត្រង់នឹងព្រះយេស៊ូវគ្រីស្ទ និងដំណឹងល្អរបស់ទ្រង់ ជាជាងត្រឡប់ទៅរកអំពើបាបពីមុនវិញ ?
ពេត្រុសទី២ ៣
ពេត្រុសថ្លែងទីបន្ទាល់អំពីការយាងមកជាលើកទីពីរ
សូមពន្យល់ថា នៅពេលពេត្រុសបានបញ្ចប់សំបុត្ររបស់លោក លោកបានរំឭកពួកបរិសុទ្ធអំពីការយាងមកជាលើកទីពីររបស់ព្រះយេស៊ូវគ្រីស្ទ ហើយបានបង្រៀនពួកគេថាត្រូវត្រៀមខ្លួនសម្រាប់ព្រឹត្តិការណ៍នោះយ៉ាងដូចម្ដេច ។ សូមសង្ខេប ពេត្រុសទី២ ៣:១–៩ ដោយពន្យល់ថា ពេត្រុសបានបង្រៀនថា នៅថ្ងៃចុងក្រោយ មនុស្សមួយចំនួននឹងសើចចំអកដាក់ជនដែលជឿលើការយាងមកជាលើកទីពីរ ។
សូមឲ្យសិស្សពីរបីនាក់ពន្យល់ថា ហេតុអ្វីបានជាពួកគេជឿលើការយាងមកជាលើកទីពីរ ទោះជាមានមនុស្សជាច្រើនពុំបានជឿពីរឿងនេះក្ដី ?
សូមអញ្ជើញសិស្សម្នាក់អាន ពេត្រុសទី២ ៣:១០-១៤ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលថា ពេត្រុសបានបង្រៀនអ្វីខ្លះអំពីការយាងមកជាលើកទីពីរ ។ សូមពន្យល់ថា កិរិយា នៅក្នុង ខទី ១១ មានន័យថា ការប្រព្រឹត្ត ហើយ « ការទន្ទឹងចាំ » នៅក្នុង ខទី ១២ មានន័យថា ការរង់ចាំអ្វីមួយយ៉ាងអន្ទះសា ។
-
យោងតាម ខទី១០តើពេត្រុសបានបង្រៀនអ្វីខ្លះ អំពីការយាងមកជាលើកទីពីរ ?
-
យោងតាម ខទី ១១–១៤ តើពេត្រុសបានទូន្មានអ្វីខ្លះ ដល់ពួកបរិសុទ្ធដើម្បីរៀបចំខ្លួនពួកគេសម្រាប់ការយាងមកជាលើកទីពីរ ? ( ខំប្រឹងរស់នៅក្នុងជីវិតបរិសុទ្ធ និងរង់ចាំដោយអន្ទះសាដល់ការយាងមកជាលើកទីពីរ ហើយខិតខំដោយឧស្សាហ៍ដើម្បីបានរកឃើញជា « ឥតសៅហ្មង ហើយឥតកន្លែងបន្ទោសបាន » [ ខទី ១៤ ] ) ។
សូមពន្យល់ថាឃ្លា « ឥតសៅហ្មង ហើយឥតកន្លែងបន្ទោសបាន » ( ខទី ១៤ ) មានន័យថា ការជ្រះស្អាតពីអំពើបាប ។ ជនដែលជ្រះស្អាតពីអំពើបាបត្រូវបានផ្សះផ្សានឹងព្រះ ហើយនឹងរកឃើញនូវសេចក្ដីសុខសាន្តជាមួយនឹងព្រះអង្គសង្គ្រោះ កាលទ្រង់នឹងយាងមក ។
-
តើអ្នកនឹងសង្ខេបគោលការណ៍ដែលពេត្រុសបានបង្រៀន អំពីរបៀបដែលយើងអាចរៀបចំខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះយ៉ាងដូចម្ដេច ? ( សូមជួយសិស្សឲ្យស្គាល់គោលការណ៍ស្រដៀងគ្នាមួយនឹងគោលការណ៍ដូចតទៅនេះ ៖ យើងអាចរៀបចំខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ដោយការរស់នៅក្នុងជីវិតដែលគោរពដល់ព្រះ ហើយរង់ចាំនូវការយាងមករបស់ទ្រង់ដោយអន្ទះសា » ។ សូមពន្យល់ថា « ការចាំមើល » អាចមានន័យថា យើងកំពុងរង់ចាំ ដោយអន្ទះសាដល់ការយាងមកជាលើកទីពីររបស់ព្រះអង្គសង្គ្រោះ ) ។
-
តើរឿងមួយចំនួនដែលយើងអាចធ្វើដើម្បីរស់នៅក្នុងជីវិតដែលគោរពដល់ព្រះ នៅពេលយើងរង់ចាំដោយអន្ទះសាដល់ការយាងមកជាលើកទីពីររបស់ព្រះអង្គសង្គ្រោះមានអ្វីខ្លះ ?
សូមសង្ខេប ពេត្រុសទី ២ ៣:១៥–១៨ ដោយពន្យល់ថា ពេត្រុសបានព្រមានអំពីការធ្លាក់ចូលទៅក្នុងអំពើទុច្ចរិត ។ លោកបានអញ្ជើញពួកបរិសុទ្ធឲ្យ « ចំរើនឡើងក្នុងព្រះគុណ ហើយក្នុងការស្គាល់ដល់ [ ព្រះអម្ចាស់ ] » ( ខទី ១៨ ) ។
សូមបញ្ចប់មេរៀនដោយថ្លែងទីបន្ទាល់អំពីសេចក្ដីពិត ដែលបានបង្រៀននៅក្នុងពេត្រុសទី២ ២–៣ ។ សូមអញ្ជើញសិស្សឲ្យខិតខំដើម្បីស្គាល់ ហើយចៀសវាងពីការបង្រៀនក្លែងក្លាយ ហើយព្យាយាមរៀបចំខ្លួនសម្រាប់ការយាងមកជាលើកទីពីរ ។
សេចក្តីពន្យល់ និង ព័ត៌មានសាច់រឿង
(ពេត្រុសទី២ ៣:១២) ។ « ថ្ងៃនៃព្រះបានឆាប់មកដល់ »
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានថ្លែងទីបន្ទាល់អំពីការយាងមកជាលើកទីពីររបស់ព្រះគ្រីស្ទ ៖
« [ នៅឯការយាងមកជាលើកទីពីរ ] បទពិសោធន៍ដែលមិនអាចនឹកដល់ [ នឹងកើតមាន ] ៖ ‹ ព្រះអម្ចាស់មានបន្ទូលថា អស់ទាំងមនុស្សនឹងបានឃើញយើងគ្រប់គ្នា › [ គ. និង ស. ១០១:២៣ ] ។ តើការណ៍នេះកើតឡើងដោយរបៀបណា ? យើងមិនដឹងនោះទេ ។ ប៉ុន្តែខ្ញុំថ្លែងទីបន្ទាល់ថា វានឹងកើតឡើង—គឺពិតជាកើតឡើងតាមពាក្យព្យាករ ។ យើងនឹងលុតជង្គង់ចុះដោយគាវរភាព ‹ ហើយព្រះអម្ចាស់ ទ្រង់នឹងបន្លឺសំឡេងរបស់ទ្រង់ ហើយអស់ទាំងចុងផែនដីនឹងបានឮ › [ គ. និង ស. ៤៥:៤៩ ] ។ ‹ ហើយសំឡេងនោះនឹង… ដូចជាសូរទឹកច្រើន ហើយដូចផ្គរលាន់យ៉ាងខ្លាំង [ គ. និង ស. ១៣៣:២២ ] ។ ‹ ហើយព្រះអម្ចាស់គឺជាព្រះអង្គសង្គ្រោះទ្រង់នឹងឈរនៅកណ្តាលរាស្ត្រទ្រង់ › [ គ. និង ស. ១៣៣:២៥ ] ។ …
« នៅក្នុងថ្ងៃនោះ អ្នកសួរដេញដោលច្រើននឹងត្រូវបានស្ងាត់មាត់ ‹ ព្រោះគ្រប់ទាំងត្រចៀកនឹងបានឮ… ហើយគ្រប់ទាំងជង្គង់ត្រូវលុតចុះ ហើយគ្រប់ទាំងអណ្តាតត្រូវទទួលស្គាល់ › [ គ. និង ស. ៨៨:១០៤ ] ថាព្រះយេស៊ូវគឺជាព្រះគ្រីស្ទ ព្រះរាជបុត្រានៃព្រះ ព្រះអង្គសង្គ្រោះ និង ព្រះប្រោសលោះនៃពិភពលោក » ( « Thy Kingdom Come » Ensign ឬ Liahona ខែ ឧសភា ឆ្នាំ ២០១៥ ទំព័រ ១២២ ) ។