សេចក្ដីផ្ដើមស្ដីពីសំបុត្រទីពីររបស់ប៉ុលដល់ពួកថែស្សាឡូនិច
ហេតុអ្វីត្រូវសិក្សាគម្ពីរនេះ ?
នៅក្នុងសំបុត្រទីពីររបស់លោកដល់ពួកថែស្សាឡូនិច ប៉ុលបានសរសេរពាក្យទូន្មាន និងការបញ្ជាក់ទៅដល់សមាជិកសាសនាចក្រ ដែលយល់ខុសពីកត្តាជាក់លាក់នៃការយាងមកជាលើកទីពីររបស់ព្រះយេស៊ូវគ្រីស្ទ ។ ការសិក្សាលើការបង្រៀនរបស់លោកអាចជួយសិស្សឲ្យយល់ដឹងពីលក្ខណៈនៃការក្បត់សាសនា និងរបៀបត្រៀមខ្លួនឲ្យបានត្រឹមត្រូវសម្រាប់ការយាងត្រឡប់មកវិញរបស់ព្រះអម្ចាស់ ។
តើនរណាជាអ្នកសរសេរគម្ពីរនេះ ?
ប៉ុលបានសរសេរថែស្សាឡូនីចទី ២ ( សូមមើល ថែស្សាឡូនីចទី ២ ១:១ សូមមើលផងដែរ ថែស្សាឡូនីចទី ២ ២:៥, ៣:១៧ ) ។ នៅដើមសំបុត្រនេះក៏មាននូវពាក្យស្វាគមន៍មួយមកពីស៊ីឡាស និងធីម៉ូថេផងដែរ ( ថែស្សាឡូនីចទី ២ ១:១ ) ។
តើនៅពេលណា និង នៅកន្លែងណាដែលគម្ពីរនេះត្រូវបានសរសេរ ?
« ប៉ុលបានសរសេរសំបុត្រនេះដល់ពួកថែស្សាឡូនីច កាលលោកនៅកូរិនថូសក្នុងដំណើរផ្សព្វផ្សាយសាសនាលើកទីពីររបស់លោក » ប្រមាណជា គ.ស. ៥០-៥១ ( សេចក្ដីណែនាំដល់បទគម្ពីរទាំងឡាយ « សំបុត្ររបស់ប៉ុល » scriptures.lds.org ) ។
តើគម្ពីរនេះត្រូវបានសរសេរចំពោះនរណា ហើយតើហេតុអ្វី ?
ប៉ុលបានសរសេរថែស្សាឡូនីចទី ២ ដល់សមាជិកសាសនាចក្រនៅថែស្សាឡូនីច ។ ប្រធានបទនៃថែស្សាឡូនីចទី ១ និង ថែស្សាឡូនីចទី ២ គឺមានភាពស្រដៀងគ្នាដោយបង្ហាញថា ប៉ុលបានសរសេរថែស្សាឡូនីចទី ២ ដើម្បីគូសបញ្ជាក់ ហើយពន្យល់អំពីសំបុត្រទីមួយរបស់លោក ។ វាទំនងដូចជាពួកថែស្សាឡូនីចបានទទួលសំបុត្រក្លែងក្លាយមួយ ដែលអះអាងថាជាសំបុត្រមកពីប៉ុល ហើយទំនងជាសំបុត្រនេះបានបណ្ដាលឲ្យមនុស្សមួយចំនួនជឿថា ការយាងមកជាលើកទីពីរបានកើតឡើងរួចហើយ ( សូមមើល ថែស្សាឡូនីចទី ២ ២:២ ) ។
« នៅក្នុងការសម្រាករយៈពេលខ្លីនៅចន្លោះសំបុត្រទាំងពីរ សាសនាចក្របានទទួលរងនូវការបៀតបៀន ( ២ ថែស្សា. ១:៤ ) ទិដ្ឋភាពនៃការយាងមកភ្លាមៗមួយរបស់ព្រះអម្ចាស់បានបង្កើតឲ្យមានការរំជើបរំជួលដ៏អពមង្គលមួយ ( ២:២ ) » ( សេចក្ដីណែនាំដល់បទគម្ពីរទាំងឡាយ « សំបុត្ររបស់ប៉ុល » ) ។ ប៉ុលបានសរសេរថែស្សាឡូនីចទី ២ ដើម្បីពង្រឹងដល់សេចក្ដីជំនឿរបស់សមាជិកទាំងនេះ ហើយកែតម្រូវនូវការយល់ខុសពីគោលលទ្ធិនានា ។
តើគម្ពីរនេះមានលក្ខណៈពិសេសអ្វីខ្លះ ?
សំបុត្រទីពីរដល់ពួកថែស្សាឡូនីចទី ២ ផ្ដល់ព័ត៌មានលម្អិតដ៏សំខាន់អំពីការយាងមកជាលើកទីពីររបស់ព្រះយេស៊ូវគ្រីស្ទ ។ ឧទាហរណ៍មួយចំនួនរួមមានទាំងគំនិតថា ព្រះអម្ចាស់នឹងយាងត្រឡប់មកវិញក្នុង « អណ្ដាតភ្លើង » ហើយថាមនុស្សទុច្ចរិតនឹង « រងទុក្ខទោស ជាសេចក្ដីហិនវិនាសអស់កល្បជានិច្ច ឃ្លាតពីព្រះភក្ត្រនៃព្រះអម្ចាស់ » ( ថែស្សាឡូនីចទី ២ ១:៨–៩ ) ។
នៅក្នុងសំបុត្រនេះ យើងបានអានថា ប៉ុលក៏បានព្យាករពីការក្បត់សាសនាដ៏ធំ ដោយបង្រៀនថា សាសនាចក្រនឹងស្ថិតក្នុង « សេចក្តីក្បត់សាសនា » ឃ្លាតចេញពីដំណឹងល្អ ពីមុនការយាងមកជាលើកពីររបស់ព្រះអម្ចាស់ ( សូមមើល ថែស្សាឡូនីចទី ២ ២:២–១២ ) ។ ការបង្រៀនរបស់ប៉ុលអំពីការក្បត់សាសនា រំឭកដល់សមាជិកសាសនាចក្រសម័យបច្ចុប្បន្នពីហេតុផលដែលការស្ដារឡើងវិញនៃដំណឹងល្អនាថ្ងៃចុងក្រោយមានភាពចាំបាច់ ។
គម្រោង
ថែស្សាឡូនីចទី ២ ១ ប៉ុលថ្លែងពាក្យស្វាគមន៍ ហើយឲ្យយោបល់ដល់ពួកបរិសុទ្ធនៅស្រុកថែស្សាឡូនីច ។ លោកបង្រៀនថា មនុស្សទុច្ចរិតនឹងដកពិសោធន៍នូវការសងសឹករបស់ព្រះអម្ចាស់នៅឯការយាងមកជាលើកទីពីរ ។
ថែស្សាឡូនីចទី ២ ២ ប៉ុលកែតម្រូវគំនិតខុសឆ្គងដែលថា ការយាងមកជាលើកទីពីរបានកើតឡើងរួចហើយ ហើយបានព្យាករថា ការក្បត់សាសនាមួយនឹងកើតមាន មុននឹងការយាងត្រឡប់មកវិញរបស់ព្រះអម្ចាស់ ។ លោកលើកទឹកចិត្តពួកបរិសុទ្ធនៅថែស្សាឡូនីចឲ្យបន្តស្មោះត្រង់ ។
ថែស្សាឡូនីចទី ២ ៣ ប៉ុលទូន្មានសមាជិកសាសនាចក្រឲ្យធ្វើការដើម្បីផ្គត់ផ្គង់ដល់សេចក្ដីត្រូវការខាងសាច់ឈាមរបស់ពួកគេ ហើយកុំឲ្យរសាយចិត្តខាងឯការល្អឡើយ ។