មេរៀនទី ១៦
ម៉ាថាយ ១៣:២៤-៥៨
សេចក្ដីផ្ដើម
ព្រះអង្គសង្គ្រោះបានប្រទានរឿងប្រៀបប្រដូច ដើម្បីបង្រៀនពីនគរស្ថានសួគ៌ ការស្ដារឡើងវិញ និងការរីកចម្រើននៃសាសនាចក្ររបស់ទ្រង់នៅថ្ងៃចុងក្រោយ ការប្រមូលផ្ដុំពួកសុចរិត និងការបំផ្លិចបំផ្លាញពួកទុច្ចរិត នៅពេលនៃការយាងមកជាលើកទីពីររបស់ទ្រង់ ។
យោបល់សម្រាប់ការបង្រៀន
ម៉ាថាយ ១៣:២៤-៣០, ៣៦-៤៣
ព្រះអង្គសង្គ្រោះបង្រៀន ហើយពន្យល់ពីរឿងប្រៀបប្រដូចនៃស្រូវសាលី និង ស្រងែ
មុនចាប់ផ្ដើមថ្នាក់ សូមសរសេរសំណួរខាងក្រោមនៅលើ ក្ដារខៀន ៖
តើអ្នកធ្លាប់មានចិត្តតប់ប្រមល់ ឬ អន់ចិត្តដោយសារតែមានអំពើអាក្រក់ច្រើនពេកនៅក្នុងពិភពលោកនេះដែរឬទេ ?
ហេតុអ្វីព្រះអម្ចាស់មិនដកយកអំពើអាក្រក់នៅជុំវិញខ្លួនយើងតែម្ដងទៅ ?
ហេតុអ្វីខ្ញុំគួរជ្រើសរើសធ្វើជាមនុស្សសុចិរត កាលមនុស្សមួយចំនួនជុំវិញខ្លួនខ្ញុំហាក់ដូចជាពុំបានដកពិសោធន៍ជួបនឹងផលអវិជ្ជមាននៃការជ្រើសរើសទុច្ចរិតរបស់ពួកគេផងនោះ ?
នៅពេលចាប់ផ្ដើមមេរៀននេះ ចូរសុំឲ្យសិស្សសញ្ជឹងគិតពីសំណួរនៅលើក្ដារខៀន រួចអញ្ជើញពួកគេឲ្យចែកចាយគំនិតរបស់ពួកគេជាមួយនឹងសិស្សក្នុងថ្នាក់ ។ នៅពេលសិស្សសិក្សា ម៉ាថាយ ១៣:២៤–៣០, ៣៦–៤៣សូមអញ្ជើញពួកគេរកមើលសេចក្ដីពិតមួយដែលនឹងជួយលួងលោមចិត្តពួកគេ កាលកំពុងខិតខំរស់នៅដោយសុចរិតនៅក្នុងពិភពលោកទុច្ចរិតមួយ ។
សូមដាក់តាំង រូបភាព ស្រូវសាលី និងស្រងែ ឬគូរវានៅលើក្ដារខៀន ។ ចូរពន្យល់ថា ស្រងែជាប្រភេទស្មៅពុល ។ ស្រូវ និងស្រងែ គឺមើលទៅស្ទើរតែដូចគ្នា នៅពេលវាដុះពន្លកចេញមក ប៉ុន្តែវាអាចមើលទៅខុសគ្នាពេលវាទំ ។
សូមពន្យល់ថា ព្រះអង្គសង្គ្រោះបានបង្រៀនរឿងប្រៀបប្រដូចមួយពីស្រូវសាលី និងស្រងែ ។ សូមអញ្ជើញសិស្សពីរបីនាក់ប្ដូរវេនគ្នាអាននៅក្នុង ម៉ាថាយ ១៣:២៤–៣០ ឲ្យឮៗ និងនៅក្នុងផ្នែកមួយនៃការបកប្រែដោយ យ៉ូសែប ស្ម៊ីធ ម៉ាថាយ ១៣:២៩ ដែលបានកែប្រែផ្នែកខ្លះៗនៃខទី ២៩ ទៅជា « ចូរអ្នកប្រមូលស្រូវសាលីរួមគ្នាដាក់ក្នុងជង្រុករបស់យើងជាមុនសិន ហើយស្រងែត្រូវឃើញឆេះទាំងបាច់ៗ សូមអញ្ជើញសិស្សក្នុងថ្នាក់ឲ្យផ្ទៀងតាម រកមើលថាតើមានអ្វីបានកើតឡើងចំពោះស្រូវសាលី និង ស្រងែ ។
-
តើមានអ្វីកើតឡើងចំពោះស្រូវសាលី និងស្រងែ ? ( វាត្រូវបានព្រោះ [ បានដាំ ] ហើយអនុញ្ញាតឲ្យលូតលាស់រួមគ្នា ។ រួចស្រូវសាលីត្រូវបានប្រមូលដាក់ជង្រុក រីឯស្រងែត្រូវបានយកទៅដុតចោល ) ។
-
ហេតុអ្វីអ្នកគិតថាអ្នកព្រោះគ្រាប់ពូជបានប្រាប់ពួកអ្នកបម្រើរបស់គាត់ឲ្យទុកស្រូវសាលី និង ស្រងែ « ឲ្យវាដុះជាមួយគ្នា ដរាបដល់ពេលច្រូត »ដូច្នេះ ? ( ប្រសិនបើអ្នកច្រូតកាត់ ព្យាយាមដកស្រងែចេញមុនពេលស្រូវ និងស្រងែទំ នោះហាក់ដូចជាគាត់បំផ្លាញស្រូវសាលីអស់ច្រើនផងដែរ ) ។
-
យោងតាម ការបកប្រែដោយ យ៉ូសែប ស្ម៊ីធ ម៉ាថាយ ១៣:២៩រវាងស្រូវសាលី និងស្រងែ—តើមួយណាត្រូវបានប្រមូលផលមុន ?
សូមពន្យល់ថា បន្ទាប់ពីព្រះអង្គសង្គ្រោះបានប្រទានរឿងប្រៀបប្រដូចអំពីស្រូវសាលី និងស្រងែមក ពួកសិស្សរបស់ទ្រង់បានទូលសួរទ្រង់ឲ្យពន្យល់ពីអត្ថន័យរបស់វា ។ សូមអញ្ជើញសិស្សពីរបីនាក់ឲ្យប្ដូរវេនគ្នាអានឮៗក្នុង ម៉ាថាយ ១៣:៣៦-៤៣ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលការពន្យល់របស់ព្រះអង្គសង្គ្រោះអំពីរឿងប្រៀបប្រដូចនេះ ។
-
តើនរណាទៅដែលបានព្រោះ ឬដាំគ្រាប់ពូជល្អនោះ ? ( ព្រះអង្គសង្គ្រោះ ) ។
-
តើនរណាទៅដែលបានព្រោះ ឬដាំស្រងែនោះ ? ( អារក្ស ) ។
-
តើស្រូវសាលី និង ស្រងែតំណាងឲ្យអ្វី ? ( មនុស្សសុចរិត និង មនុស្សទុច្ចរិត ។ សូមពន្យល់ថា មនុស្សទុច្ចរិតគឺជាមនុស្សដែលមិនព្រមប្រែចិត្ត [ សូមមើល គោលលទ្ធិ និង សេចក្តីសញ្ញា ២៩:១៧ ] ) ។
សូមពន្យល់ថា ការបកប្រែដោយ យ៉ូសែប ស្ម៊ីធ បញ្ជាក់ប្រាប់ថា « ពេលច្រូត » ឬ « ចុងបញ្ចប់នៃលោកិយ » ដែលបានចែងក្នុង ខទី ៣៩ សំដៅទៅលើការបំផ្លិចបំផ្លាញពួកទុច្ចរិត នៅឯការយាងមកជាលើកទីពីររបស់ព្រះអង្គសង្គ្រោះ ។ ការបកប្រែដោយ យ៉ូសែប ស្ម៊ីធ ក៏ជួយយើងឲ្យយល់ថា នៅថ្ងៃចុងក្រោយព្រះអម្ចាស់នឹងបញ្ជូនពួកទេវតា និង ពួកសារទូតដើម្បីមកជួយញែកពួកសុចរិតចេញពីពួកទុច្ចរិត ( សូមមើល ការបកប្រែដោយ យ៉ូសែប ស្ម៊ីធ ម៉ាថាយ ១៣:៣៩–៤៤ [ នៅក្នុងវចនានុក្រមព្រះគម្ពីរប៊ីប នៃកំណែព្រះគម្ពីរប៊ីបជាភាសាអង់គ្លេសរបស់ អិល.ឌី.អែស. ] ) ។
-
យោងតាមរឿងបៀបប្រដូចនេះ តើនឹងមានអ្វីកើតឡើងដល់ពួកសុចរិត និង ពួកទុច្ចរិតនៅថ្ងៃចុងក្រោយ ? ( សិស្សអាចនឹងប្រើពាក្យខុសគ្នា ប៉ុន្តែត្រូវប្រាកដថាពួកគេស្គាល់ពីសេចក្ដីពិតខាងក្រោមនេះ ៖ ព្រះអម្ចាស់នឹងប្រមូលពួកសុចរិតអំឡុងថ្ងៃចុងក្រោយ រួចហើយបំផ្លាញពួកទុច្ចរិតពេលទ្រង់យាងមក ។ ដោយប្រើពាក្យរបស់សិស្ស សូមសរសេរសេចក្ដីពិតនេះនៅលើក្ដារខៀន ) ។
-
តើសេចក្ដីពិតនេះអាចនាំមក ហើយផ្ដល់ការលួងលោមចិត្តដល់យើង កាលយើងរស់នៅក្នុងពិភពលោកមួយដ៏អាក្រក់បានដោយរបៀបណា ? ( នៅទីបំផុត ព្រះអម្ចាស់នឹងដកយកសេចក្ដីទុច្ចរិតចេញពីផែនដី ហើយប្រទានរង្វាន់ដល់ពួកស្មោះត្រង់ ) ។
សូមពន្យល់សិស្សថា ដោយសារសិទ្ធិជ្រើសរើសរបស់យើង យើងកំណត់ការជ្រើសរើសរបស់យើងថាតើយើងនឹងចង់ឲ្យបានប្រមូលផ្ដុំជាមួយនឹងពួកសុចរិត ឬត្រូវរងទុក្ខជាមួយនឹងពួកគេទុច្ចរិត ។
-
តើយើងត្រូវធ្វើអ្វីខ្លះ ដើម្បីឲ្យព្រះអម្ចាស់បានប្រមូលផ្ដុំយើង ?
ដើម្បីជួយឲ្យសិស្សយល់អំពីអ្វី ដែលយើងត្រូវធ្វើដើម្បីឲ្យព្រះអម្ចាស់ប្រមូលផ្ដុំយើង សូមអញ្ជើញសិស្សម្នាក់អានឲ្យឮៗ នូវសេចក្ដីថ្លែងការណ៍ខាងក្រោមដោយអែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់ ៖
« ព្រះអម្ចាស់ ប្រមូលរាស្ត្រទ្រង់ នៅពេលពួកគេទទួលទ្រង់ ហើយគោរពតាមព្រះបញ្ញត្តិរបស់ទ្រង់ ។ …
« … ព្រះអម្ចាស់ប្រមូលរាស្ត្ររបស់ទ្រង់ដើម្បីថ្វាយបង្គំ ស្ថាបនាសាសនាចក្រ ទុកជាការការពារមួយ ហើយទទួលការប្រឹក្សា និង ការណែនាំ ។ …
« ព្យាការីយ៉ូសែប ស្ម៊ីធ បានប្រកាសថា នៅគ្រប់ជំនាន់ទាំងអស់ ព្រះរាជបំណងនៃការប្រមូលផ្ដុំ គឺជាការសង់ព្រះវិហារបរិសុទ្ធដើម្បីឲ្យកូនចៅរបស់ព្រះអម្ចាស់អាចទទួលពិធីបរិសុទ្ធដ៏ខ្ពស់បំផុត ហើយទទួលបានជីវិតដ៏នៅអស់កល្បជានិច្ច [ សូមមើល Teachings of Presidents of the Church: Joseph Smith [ ឆ្នាំ២០០៧ ] ទំព័រ៤១៦–១៧ ] » ( « The Spirit and Purposes of Gathering » [ Brigham Young University–Idaho devotional ថ្ងៃទី៣១ ខែតុលា ឆ្នាំ២០០៦ ] byui.edu ) ។
-
យោងតាមអែលឌើរ បែដណា តើយើងត្រូវធ្វើអ្វីខ្លះដើម្បីឲ្យព្រះអម្ចាស់ប្រមូលផ្ដុំយើង ?
-
តើមានពរជ័យអ្វីខ្លះបានកើតមានក្នុងជីវិតរបស់អ្នក នៅពេលព្រះអម្ចាស់បានប្រមូលផ្ដុំអ្នក ?
សូមដាក់បង្ហាញ រូបភាព ពួកអ្នកផ្សព្វផ្សាយសាសនា ៖ អែលឌើរ, ពួកអ្នកផ្សព្វផ្សាយសាសនា ៖ ស៊ិស្ទើរនិង ព្រះវិហារបរិសុទ្ធសលត៍ លេក ( Gospel Art Book [ ឆ្នាំ ២០០៩ ] ល.រ. ១០៩, ១១០, ១១៩ សូមមើលផងដែរ LDS.org ) ។
-
តើយើងអាចធ្វើអ្វីខ្លះ ដើម្បីជួយព្រះអង្គសង្គ្រោះក្នុងការប្រមូលផ្ដុំកូនចៅរបស់ព្រះវរបិតាសួគ៌ ?
-
តើអ្នកបានទទួលពរជ័យអ្វីខ្លះ នៅពេលអ្នកជួយព្រះអម្ចាស់ប្រមូលផ្ដុំពួកសុចរិតតាមរយៈកិច្ចការផ្សព្វផ្សាយសាសនា ឬកិច្ចការព្រះវិហារបរិសុទ្ធ ?
សូមបញ្ជាក់ប្រាប់សិស្សថា ដោយសារយើងទាំងអស់គ្នាធ្វើខុស ព្រះអង្គសង្គ្រោះអញ្ជើញយើងឲ្យប្រែចិត្ត ដើម្បីយើងអាចត្រូវបានប្រមូលផ្ដុំជាមួយនឹងពួកសុចរិត ។ សូមអញ្ជើញសិស្សឲ្យសញ្ជឹងគិតពីអ្វីដែលពួកគេអាចធ្វើ ដើម្បីប្រមូលខ្លួនឯង ក្រុមគ្រួសាររបស់ពួកគេ និងមនុស្សដទៃទៀតទៅរកព្រះអង្គសង្គ្រោះ និងសាសនាចក្ររបស់ទ្រង់ ។ សូមអញ្ជើញសិស្សឲ្យធ្វើសកម្មភាពតាមការបំផុសគំនិតដែលពួកគេបានទទួល ។
ម៉ាថាយ ១៣:៣១–៣៥, ៤៤–៥២
ព្រះយេស៊ូវប្រើរឿងប្រៀបប្រដូចដើម្បីបង្រៀនអំពីនគរស្ថានសួគ៌
សូមដាក់បង្ហាញ រូបភាព នៃវត្ថុខាងក្រោម ឬគូរវានៅលើក្ដារខៀន ៖ គ្រាប់ពូជម្យ៉ាង, ដំបែ ( ឬមេនំប៉័ង—សូមពន្យល់ថាដំបែត្រូវបានគេប្រើនៅក្នុងការចំអិនអាហារ ឬដាក់ជាមួយម្សៅធ្វើនំប៉័ងដើម្បីឲ្យវាឡើងពីមុនយកទៅដុត ) កែវមុក្ដា, ហិបកំណប់តូច និងសំណាញ់ ។
សូមពន្យល់ថា នៅក្នុងរឿងប្រៀបប្រដូចខុសៗគ្នាព្រះអង្គសង្គ្រោះបានប្រៀបធៀបវត្ថុទាំងនេះនីមួយៗទៅនឹងនគរស្ថានសួគ៌ ។ សូមរំឭកសិស្សថា នគរស្ថានសួគ៌តំណាងឲ្យសាសនាចក្រ និងដំណឹងល្អរបស់ព្រះអង្គសង្គ្រោះ ។ សូមសរសេរបទគម្ពីរយោងខាងក្រោមនេះនៅលើក្ដារខៀន ៖ ម៉ាថាយ ១៣:៣១–៣២, ម៉ាថាយ ១៣:៣៣, ម៉ាថាយ ១៣:៤៤, ម៉ាថាយ ១៣:៤៥–៤៦, ម៉ាថាយ ១៣:៤៧–៥០ ។ សូមចែកសិស្សជាដៃគូ ឬជាក្រុមតូចៗ ហើយចាត់តាំងសេចក្ដីយោងមួយដែលមានសរសេរនៅលើ ក្ដារខៀនដល់ដៃគូ ឬក្រុមនីមួយៗ ។ សូមអញ្ជើញដៃគូ ឬក្រុមនីមួយៗឲ្យបំពេញសកម្មភាពខាងក្រោមនេះ ( អ្នកអាចនឹងផ្ដល់បញ្ជីនេះនៅលើឯកសារចែកឲ្យ ) ៖
-
ចូរអានរួមគ្នានូវខគម្ពីរដែលបានចាត់ឲ្យអ្នក ។
-
ចូរពិភាក្សាតើវត្ថុអ្វីទៅដែលព្រះអង្គសង្គ្រោះបានប្រៀបប្រដូចទៅនឹងសាសនាចក្រ និង ដំណឹងល្អរបស់ទ្រង់ ។
-
ចូរពិភាក្សាតើសេចក្ដីពិតអ្វីទៅដែលអ្នកគិតថា ព្រះអង្គសង្គ្រោះបានបង្រៀននៅក្នុងរឿងប្រៀបប្រដូចនេះអំពីសាសនាចក្រ និងដំណឹងល្អរបស់ទ្រង់ ។ សូមសរសេរសេចក្ដីពិតនោះ នៅក្នុងសៀវភៅកត់ចំណាំការរៀនសូត្ររបស់ពួកគេ ឬសៀវភៅកត់ត្រាការសិក្សាព្រះគម្ពីរ ។
បន្ទាប់ពីឲ្យពេលគ្រប់គ្រាន់ហើយ សូមអញ្ជើញសិស្សម្នាក់ដែលបានចាត់ឲ្យអានរឿងប្រៀបប្រដូចអំពីដំបែ និងសិស្សម្នាក់ទៀតដែលបានចាត់ឲ្យអានរឿងប្រៀបប្រដូចអំពីគ្រាប់ពូជម្យ៉ាង ឲ្យអានរឿងនោះឮៗឲ្យសិស្សដទៃទៀតស្ដាប់ ។
សូមអញ្ជើញសិស្សពីរបីនាក់ឲ្យអាន សេចក្ដីពិតនានាដែលពួកគេបានកត់ទុកដល់សិស្សក្នុងថ្នាក់ ។ ( សិស្សអាចនឹងប្រើពាក្យខុសគ្នា ប៉ុន្តែត្រូវប្រាកដថាពួកគេស្គាល់ពីសេចក្ដីពិតមួយដែលស្រដៀងនឹងសេចក្ដីពិតខាងក្រោមនេះ ៖ សាសនាចក្រនៃព្រះយេស៊ូវគ្រីស្ទដែលបានស្ដារឡើងវិញ នឹងរីកចម្រើនពីការចាប់ផ្ដើមដ៏តូចរហូតដល់បានបំពេញផែនដីទាំងមូល ។ សូមសរសេរសេចក្ដីពិតនេះនៅលើក្ដារខៀន ) ។
សូមអញ្ជើញសិស្សម្នាក់ឲ្យអាននូវសេចក្ដីថ្លែងការណ៍ខាងក្រោមដោយប្រធាន យ៉ូសែប អេហ្វ ស៊្មីធ ដែលលោកបានបង្រៀនពីរបៀបដែលពួកអ្នកដើរតាមព្រះយេស៊ូវគ្រីស្ទត្រូវបានប្រៀបប្រដូចទៅនឹងដំបែ ៖
« ទោះជានិយាយថា យើងមានចំនួនតិច បើប្រៀបធៀបនឹងពិភពលោកក្ដី ប៉ុន្តែយើងអាចប្រៀបធៀបនឹងមេដំបែដែលព្រះអង្គសង្គ្រោះបានមានបន្ទូលថានៅទីបំផុត វានឹងឡើងមានពាសពេញពិភពលោក » ( Gospel Doctrine កំណែទី ៥ [ ឆ្នាំ១៩៣៩ ] ទំព័រ ៧៤ ) ។
-
ក្នុងនាមជាពួកបរិសុទ្ធថ្ងៃចុងក្រោយ តើយើងអាចធ្វើអ្វីខ្លះ ដើម្បីជួយសាសនាចក្ររបស់ព្រះអង្គសង្គ្រោះឲ្យរីកចម្រើន ?
សូមអញ្ជើញសិស្សម្នាក់ដែលបានចាត់ឲ្យអានរឿងប្រៀបប្រដូច ពីទ្រព្យសម្បត្តិនៅទីវាល សិស្សម្នាក់ដែលចាត់ឲ្យអានរឿងប្រៀបប្រដូចអំពីកែវមុក្តាដ៏មានតម្លៃមហិមា និងសិស្សម្នាក់ទៀតដែលបានចាត់ឲ្យអានរឿងប្រៀបប្រដូចអំពីសំណាញ់ឲ្យអានឮៗដល់សិស្សក្នុងថ្នាក់ ។ សូមអញ្ជើញសិស្សពីរបីនាក់ឲ្យអាន សេចក្ដីពិតនានាដែលពួកគេបានកត់ទុកដល់សិស្សក្នុងថ្នាក់ ។ ( សិស្សអាចនឹងប្រើពាក្យខុសគ្នា ប៉ុន្តែត្រូវប្រាកដថាពួកគេស្គាល់ពីគោលការណ៍មួយ ដែលស្រដៀងនឹងសេចក្ដីពិតខាងក្រោមនេះ ៖ ដោយសារពរជ័យនៃដំណឹងល្អគឺជាតម្លៃដ៏អស់កល្បជានិច្ច នោះវាមានតម្លៃសក្ដិសមសម្រាប់រាល់ការលះបង់ទាំងអស់ ។ ដោយប្រើពាក្យរបស់សិស្ស សូមសរសេរសេចក្ដីពិតនេះនៅលើក្ដារខៀន ) ។
ដើម្បីជួយសិស្សយល់ពីគោលការណ៍នេះ ចូរសរសេរចំណងជើងខាងក្រោមនៅលើ ក្ដារខៀន ៖
|
ពរជ័យទាំងឡាយនៃដំណឹងល្អ |
ពលិកម្មដើម្បីទទួលបានពរជ័យ |
ចូរសុំឲ្យសិស្សសរសេរពរជ័យមួយចំនួននៃដំណឹងល្អ ( ឧទាហរណ៍ អាចរួមបញ្ចូលចំណេះដឹងនៅក្នុងបទគម្ពីរ ការដឹកនាំពីពួកព្យាការីនៅរស់ ពិធីបរិសុទ្ធនៃសេចក្ដីសង្គ្រោះ និងអាពាហ៍ពិពាហ៍ដ៏នៅអស់កល្បជានិច្ច ) ។ ចំពោះពរជ័យនីមួយៗដែលបានសរសេរ ចូរសុំឲ្យសិស្សពន្យល់ពីពលិកម្មអ្វីខ្លះ ដែលពួកគេត្រូវធ្វើដើម្បីទទួលបានពរជ័យនោះ ។ សូមសរសេរចម្លើយរបស់សិស្សនៅលើក្តារខៀន ។
ចូរសុំឲ្យសិស្សជ្រើសយកពរជ័យមួយដែលបានសរសេរនៅលើក្ដារខៀន ហើយពន្យល់ពីហេតុផលដែលថា ការទទួលបានពរជ័យនោះមានតម្លៃសក្ដិសមចំពោះរាល់ពលិកម្មទាំងអស់ ។
-
តើអ្នក ឬមនុស្សម្នាក់ដែលអ្នកស្គាល់ធ្លាប់លះបង់អ្វីមួយ ដើម្បីទទួលបានពរជ័យមួយនៃដំណឹងល្អនៅពេលណាដែរ ?
ចូរសរសេរសំណួរដូចខាងក្រោមនៅលើ ក្ដារខៀន ហើយអញ្ជើញសិស្សឲ្យឆ្លើយសំណួរមួយ ក្នុងសៀវភៅកំណត់ចំណាំ ក្នុងថ្នាក់របស់ពួកគេ ឬកំណត់ហេតុការសិក្សាព្រះគម្ពីរ ៖
តើពរជ័យអ្វីនៃដំណឹងល្អ ដែលអ្នកប្រាថ្នាចង់បាន ?
ហេតុអ្វីអ្នកប្រាថ្នាចង់បានពរជ័យនោះ ?
តើអ្នកត្រូវពលិកម្មដោយរបៀបណា ដើម្បីទទួលបានពរជ័យនោះ ?
ម៉ាថាយ ១៣:៥៣-៥៨
ព្រះយេស៊ូវបង្រៀននៅស្រុកណាសារ៉ែត ហើយត្រូវបានបដិសេធដោយរាស្ត្ររបស់ទ្រង់
សូមសង្ខេប ម៉ាថាយ ១៣:៥៣–៥៨ ដោយពន្យល់ថាប្រជាជននៅស្រុកណាសារ៉ែតបានបដិសេធព្រះអង្គសង្គ្រោះ និងការបង្រៀនរបស់ទ្រង់ ។ ដោយសារតែការឥតជំនឿរបស់ពួកគេ ព្រះអង្គសង្គ្រោះពុំបានបង្កើតអព្ភូតហេតុជាច្រើននៅក្នុងចំណោមពួកគេទេ ( សូមមើលផងដែរ មរ៉ូណៃ ៧:៣៧ ) ។
សេចក្តីពន្យល់ និង ព័ត៌មានសាច់រឿង
ម៉ាថាយ ១៣ ។ ការប្រមូលផ្ដុំកូនចៅនៃអ៊ីស្រាអែល
ព្យាការី យ៉ូសែប ស្ម៊ីធ បានសង្ខេបប្រធានបទនៃ ម៉ាថាយ ១៣ ពេលលោកបានបង្រៀនដូចតទៅនេះ ៖
« ព្រះបន្ទូលរបស់ព្រះអង្គសង្គ្រោះដែលបានកត់ត្រាទុកនៅក្នុងជំពូកទី ១៣ នៃដំណឹងល្អរបស់ទ្រង់យោងតាមម៉ាថាយ … ធ្វើឲ្យយើងយល់កាន់តែច្បាស់នៅលើប្រធានបទដ៏សំខាន់អំពីការប្រមូលផ្ដុំ ដូចជាអ្វីៗ ដែលបានកត់ត្រាទុកនៅក្នុងព្រះគម្ពីរប៊ីបផងដែរ » ។ ( នៅក្នុង History of the Church ២:២៦៤ ) ។
អែលឌើរ រ័សុល អិម ណិលសុន ក្នុងកូរ៉ុមនៃពួកសាវកដប់ពីរនាក់បានបង្រៀនថា យើងអាចជួយប្រមូលផ្ដុំអ៊ីស្រាអែលនៅទាំងសងខាងនៃវាំងនន ៖
« គោលលទ្ធិនៃការប្រមូលផ្ដុំនេះ គឺជាការបង្រៀនមួយដ៏សំខាន់របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ … យើងមិនគ្រាន់តែបង្រៀនពីគោលលទ្ធិនេះប៉ុណ្ណោះទេ ប៉ុន្តែយើងក៏ចូលរួមចំណែកនៅក្នុងកិច្ចការនេះដែរ ។ យើងធ្វើដូច្នេះ នៅពេលយើងជួយប្រមូលអ្នករើសតាំងរបស់ព្រះអម្ចាស់នៅផ្នែកទាំងសង្ខាងនៃវាំងនន ។ …
« … យើងប្រមូលតារាងពង្សាវលី បង្កើតសន្លឹកបញ្ជីក្រុមគ្រួសារ ហើយធ្វើកិច្ចការព្រះវិហារបរិសុទ្ធផ្សេងៗគ្នា ដើម្បីប្រមូលបុគ្គលទាំងឡាយទៅកាន់ព្រះអម្ចាស់ និងទៅរកក្រុមគ្រួសាររបស់ពួកគេ » (« The Gathering of Scattered Israel » Ensign ឬ Liahona ខែ វិច្ឆិការ ឆ្នាំ ២០០៦ ទំព័រ ៨០–៨១ ) ។
តារាង ខាងក្រោមបង្ហាញពីរបៀបដែលរឿងប្រៀបប្រដូចនៃ ម៉ាថាយ ១៣ បង្រៀនអំពីការប្រមូលផ្ដុំនៃអ៊ីស្រាអែល និងការរីកចម្រើននៃសាសនាចក្ររបស់ព្រះអង្គសង្គ្រោះ ចាប់តាំងពីសម័យនៃការងារបម្រើក្នុងជីវិតរមែងស្លាប់របស់ទ្រង់ រហូតដល់ការយាងមកជាលើកទីពីររបស់ទ្រង់ ។
|
រឿងប្រៀបប្រដូចនៅក្នុង ម៉ាថាយ ១៣ |
ការប្រមូលផ្ដុំ |
|---|---|
|
អ្នកព្រោះគ្រាប់ពូជ ( ខទី ៣-២៣ ) ។ |
ព្រះយេស៊ូវគ្រីស្ទ និង ពួកសាវករបស់ទ្រង់បានព្រោះគ្រាប់ពូជនៃដំណឹងល្អនៅក្នុងជំនាន់របស់ខ្លួន ។ |
|
ស្រូវសាលី និង ស្រងែ (ខទី ២៤–៣០, ៣៦–៤៣ ) |
មនុស្សសុចរិត និង ជនទុច្ចរិតរីកចម្រើនរួមគ្នានៅក្នុងជំនាន់ព្រះគម្ពីរសញ្ញាថ្មី នៅទីបំផុតបានដឹកនាំទៅរកការក្បត់សាសនាដ៏ធំ ។ នៅថ្ងៃចុងក្រោយ មនុស្សសុចរិតនឹងត្រូវបានប្រមូលផ្ដុំនៅក្នុងសាសនាចក្រ ហើយជនទុច្ចរិតនឹងត្រូវបានបំផ្លាញ ។ |
|
គ្រាប់ពូជម្យ៉ាង ( ខទី ៣១–៣២ ) ។ |
សាសនាចក្រនៃព្រះយេស៊ូវគ្រីស្ទនឹងត្រូវបានស្ដារឡើងវិញ ។ ពីការចាប់ផ្ដើមដ៏តូច វានឹងលូតលាស់រីកសាយ ហើយមានឫទ្ធិយ៉ាងអស្ចារ្យជាសាសនាចក្រនៅជុំវិញពិភពលោក ។ |
|
ដំបែ ( ខទី ៣៣ ) ។ |
សាសនាចក្រនៅថ្ងៃចុងក្រោយ នឹងរីកសាយនៅទូទាំងផែនដី បានគាំទ្រដោយដំបែនៃទីបន្ទាល់នៃពួកសាក្សីបីនាក់ និងបទគម្ពីរថ្ងៃចុងក្រោយ ។ |
|
ទ្រព្យសម្បត្តិដែលលាក់ទុក ( ខទី ៤៤ ) ហើយមុក្តាដ៏មានតម្លៃមហិមា ( ខទី ៤៥-៤៦ ) ។ |
ពួកសុចរិតនឹងប្រមូលទៅនគរព្រះ ។ ពួកបរិសុទ្ធថ្ងៃចុងក្រោយនឹងលះបង់ ហើយធ្វើការស្ថាបនាទីក្រុងស៊ីយ៉ូន ។ |
|
សំណាញ់ (ខទី ៤៧-៥០) ។ |
មនុស្សគ្រប់ប្រភេទនឹងត្រូវបានប្រមូលទៅក្នុងសាសនាចក្រ ។ នៅចុងបញ្ចប់នៃពិភពលោក ជនទុច្ចរិតនឹងត្រូវបណ្ដេញចេញ ហើយបំផ្លាញចោល ។ |
( សម្រួលចេញពីNew Testament Student Manual[ Church Educational System manual ឆ្នាំ ២០១៤ ]ទំព័រ៣៤-៤៤ ) ។
ម៉ាថាយ ១៣:៣១-៣២ ។ រឿងប្រៀបប្រដូចអំពីគ្រាប់ពូជម្យ៉ាង និងដំបែ
ព្យាការី យ៉ូសែប ស្ម៊ីធ បានផ្ដល់ការពន្យល់ដូចខាងក្រោមនេះ អំពីរឿងប្រៀបប្រដូចអំពីគ្រាប់ពូជម្យ៉ាង និងដំបែ ៖
«‹ នគរស្ថានសួគ៌ប្រៀបដូចគ្រាប់ពូជម្យ៉ាង ។ … › [ ម៉ាថាយ ១៣:៣១ ] ។ ឥឡូវនេះយើងអាចរកឃើញយ៉ាងច្បាស់ថា រូបភាពនេះដែលបានផ្តល់ឲ្យនេះតំណាងឲ្យសាសនាចក្រដូចដែលវានឹងមកដល់នៅថ្ងៃចុងក្រោយ ។ …
« ចូរយើងយកព្រះគម្ពីរមរមន ដែលបុរសម្នាក់បានយកទៅលាក់នៅទីវាលរបស់គាត់ ថែរក្សាវាទុកដោយសេចក្ដីជំនឿរបស់គាត់ ធ្វើឲ្យវារីក ស្គុះស្គាយនៅថ្ងៃចុងក្រោយ ឬរហូតដល់កាលកំណត់ ចូរយើងមើលឃើញវាចេញមកពីដី ដែលត្រូវបានរាប់ទុកជាគ្រាប់ពូជដ៏តូចបំផុតនៃគ្រាប់ពូជទាំងអស់ ប៉ុន្តែមើលចុះវាដុះចេញមក មែនហើយ ថែមទាំងដុះចេញដោយមានមែកយ៉ាងខ្ពស់ត្រដែត ហើយដូចជាព្រះដ៏មានមហិទ្ធិឫទ្ធិរហូតវាបានក្លាយជារុក្ខជាតិដ៏អស្ចារ្យបំផុត នៃគ្រាប់ពូជទាំងអស់ ។ ហើយវាគឺជាសេចក្ដីពិត ហើយបានរីកសាយ ហើយចេញមកពីផែនដី ហើយសេចក្ដីសុចរិតចាប់ផ្ដើមទតចុះមកពីស្ថានសួគ៌ [ សូមមើល ទំនុកតម្កើង ៨៥:១១, ម៉ូសេ ៧:៦២ ] ហើយព្រះនឹងបញ្ជូនព្រះចេស្ដា អំណោយទាន និងពួកទេវតាទ្រង់ឲ្យចុះមកដើម្បីដាក់ផ្សាំជាប់នៅក្នុងមែកទាំងនោះ ។ …
«‹ … នគរស្ថានសួគ៌ប្រៀបដូចគ្រាប់ពូជម្យ៉ាង ។ … › [ ម៉ាថាយ ១៣:៣៣ ] ។ វាអាចត្រូវបានយល់ថា សាសនាចក្រនៃពួកបរិសុទ្ធថ្ងៃចុងក្រោយបានរីកឡើងចេញពីដំបែតូចដែលបានដាក់នៅក្នុងពួកសាក្សីទាំងបីនាក់ ។ មើលចុះ តើការណ៍នេះដូចនឹងរឿងប្រៀបប្រដូចនេះប៉ុណ្ណាទៅ ! វាកំពុងធ្វើឲ្យដុំពករីកឡើងយ៉ាងលឿន ហើយមិនយូរប៉ុន្មាននឹងរីកឡើងពេញផែនដីទាំងមូល » ( Teachings of Presidents of the Church: Joseph Smith [ ឆ្នាំ២០០៧ ] ទំព័រ ៣០១, ៣០២-៣ ) ។
អែលឌើរ ដាល្លិន អេក អូក នៃកូរ៉ុមនៃពួកសាវកដប់ពីរនាក់ បានបង្រៀនអំពីរបៀបដែលពួកអ្នកដើរតាមព្រះយេស៊ូវគ្រីស្ទអាចដូចនឹងដំបែ ៖
« យើងត្រូវរស់នៅក្នុងលោកិយ ប៉ុន្តែមិនមែន ជា កម្មសិទ្ធិលោកិយឡើយ ។ យើងត្រូវរស់នៅក្នុងលោកិយ ពីព្រោះដូចជាព្រះយេស៊ូវ បានបង្រៀននៅក្នុងរឿងប្រៀបប្រដូចថា នគរទ្រង់គឺ ‹ ដូចជាដំបែ › ដែលមុខងាររបស់វាគឺដើម្បីពង្រីកម្សៅមីទាំងមូលក្រោមឥទ្ធិពលរបស់វា ( សូមមើល លូកា ១៣:២១, ម៉ាថាយ ១៣:៣៣សូមមើលផងដែរ កូរិនថូសទី ១ ៥:៦–៨ ) ។ ពួកអ្នកដើរតាមទ្រង់មិនអាចធ្វើកិច្ចការនោះបានទេ ប្រសិនបើពួកគេរាប់អានតែជាមួយមនុស្សដែល មានជំនឿ និងការអនុវត្តដូចខ្លួននោះ » (« Loving Others and Living with Differences » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ២៥ ) ។