មេរៀនទី ៣៣
ម៉ាថាយ ២៧:៥១–២៨:២០
សេចក្ដីផ្ដើម
នៅពេលព្រះគ្រីស្ទសុគត វាំងនននៃព្រះវិហារបរិសុទ្ធត្រូវបានរហែកជាពីរ ។ ពួកអ្នកដឹកនាំសាសន៍យូដា បានប្ដឹងលោកពីឡាត់ឲ្យការពារផ្នូរដែលទុកព្រះសពរបស់ព្រះយេស៊ូវ ។ ព្រះយេស៊ូវគ្រីស្ទបានរស់ឡើងវិញ ហើយបានបង្ហាញព្រះកាយដល់បុគ្គលជាច្រើន រួមទាំងពួកសាវករបស់ទ្រង់ផងដែរ ។ ទ្រង់បានបង្គាប់ពួកសាវករបស់ទ្រង់ឲ្យនាំយកដំណឹងល្អទៅទូទាំងផែនដី ។
យោបល់សម្រាប់ការបង្រៀន
ម៉ាថាយ ២៧:៥១–៥៦
បន្ទាប់ពីការសុគតរបស់ព្រះយេស៊ូវគ្រីស្ទ នោះវាំងនងនៃព្រះវិហារបរិសុទ្ធបានរហែក ហើយផែនដីក៏រញ្ជួយ
ចូរសុំឲ្យសិស្សគិត ប្រសិនបើពួកគេ ឬនរណាម្នាក់ដែលពួកគេស្គាល់ មានមនុស្សម្នាក់ដែលជិតដិតនឹងពួកគេបានស្លាប់ ។ បន្ទាប់មក សូមសួរសិស្ស ៖
-
ហេតុអ្វីការបាត់បង់អ្នកជាទីស្រឡាញ់ម្នាក់ អាចរឿងមួយដ៏ពិបាក ?
ចូរសុំឲ្យសិស្សស្វែងរកសេចក្ដីពិត នៅពេលពួកគេសិក្សាម៉ាថាយ ២៧:៥១–២៨:២០ដែលនឹងជួយពួកគេរកបាននូវការលួងលោមចិត្ត នៅពេលមនុស្សជាទីស្រឡាញ់ម្នាក់បានស្លាប់ ។ ដើម្បីផ្ដល់បរិបទសម្រាប់មេរៀននៅថ្ងៃនេះ អ្នកអាចសុំឲ្យសិស្សសង្ខេបដោយខ្លីៗពីអ្វីដែលព្រះយេស៊ូវគ្រីស្ទបានដកពិសោធន៍នៅចន្លោះគ្រាដែលទ្រង់ត្រូវគេចាប់ខ្លួន និងគ្រាទ្រង់ត្រូវបានគេឆ្កាង ។
សូមអញ្ជើញសិស្សម្នាក់អាន ម៉ាថាយ ២៧:៥១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលបានកើតឡើងនៅក្នុងព្រះវិហារបរិសុទ្ធ កាលព្រះយេស៊ូវបានសុគត ។
-
តើមានអ្វីបានកើតឡើង កាលព្រះយេស៊ូវបានសុគត ? (Invite students to look at Matthew 27:51, footnote b, to understand that “rent in twain” means “torn into two pieces.”)
សូមពិចារណាចម្លង តារាង នៃផ្នែកខាងក្នុងនៃព្រះវិហារបរិសុទ្ធនៅលើក្ដារខៀន ។
សូមពន្យល់ថា នៅក្នុងសម័យព្រះយេស៊ូវ ព្រះវិហារបរិសុទ្ធមានបន្ទប់ពីរ ៖ ទីបរិសុទ្ធ និង ទីបរិសុទ្ធដ៏ពិសិដ្ឋ ។ ទីបរិសុទ្ធដ៏ពិសិដ្ឋតំណាងឲ្យវត្តមានរបស់ព្រះ ។ បន្ទប់ទាំងពីរនេះ ត្រូវខណ្ឌដាច់ពីគ្នាដោយវាំងនន ឬរនាំងមួយ ។ មួយឆ្នាំម្ដង នៅថ្ងៃបុណ្យយញ្ញបូជា សង្ឃជាន់ខ្ពស់បានដើរកាត់ពីទីបរិសុទ្ធតាមវាំងនននៃព្រះវិហារបរិសុទ្ធ ហើយចូលទៅក្នុងទីបរិសុទ្ធនៃអស់ទាំងទីបរិសុទ្ធ ជាកន្លែងដែលគាត់បានបង្ហូរឈាមនៃដង្វាយលោះបាបមួយ ដើម្បីឲ្យធួនសម្រាប់អំពើបាបនៃក្រុមជំនុំទាំងអស់របស់អ៊ីស្រាអែល ( សូមមើល លេវីវិន័យ ១៦ ) ។ កាលវាំងននព្រះវិហារបរិសុទ្ធបានរហែកជាពីរ នៅពេលព្រះយេស៊ូវគ្រីស្ទបានសុគត វាគឺជានិមិត្តសញ្ញាដ៏អស្ចារ្យមួយថា ព្រះយេស៊ូវគ្រីស្ទ សង្ឃជាន់ខ្ពស់ដ៏អស្ចារ្យ បានឆ្លងកាត់តាមវាំងនននៃសេចក្ដីស្លាប់ ហើយមិនយូរប៉ុន្មាននឹងយាងចូលទៅក្នុងទីវត្តមាននៃព្រះជាព្រះវរបិតា ។
ដើម្បីជួយសិស្សឲ្យយល់ដឹងកាន់តែប្រសើរអំពីសារៈសំខាន់នៃការរហែកវាំងនននោះ សូមអញ្ជើញសិស្សម្នាក់អានឲ្យឮៗនូវសេចក្ដីថ្លែងការណ៍ខាងក្រោមដោយអែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់ ៖
« ឥឡូវនេះទីបរិសុទ្ធដ៏ពិសិដ្ឋបានបើកសម្រាប់មនុស្សគ្រប់រូប តាមរយៈព្រះលោហិតដ៏ធួននៃកូនចៀម ឥឡូវនេះមនុស្សទាំងអស់អាចចូលទៅក្នុងទីដ៏ខ្ពស់បំផុត ហើយបរិសុទ្ធជាងទីណាៗទាំងអស់ ជានគរដែលរកឃើញនូវជីវិតដ៏នៅអស់កល្បជានិច្ច ។ … ពិធីបរិសុទ្ធនានាដែលបានធ្វើឡើងតាមវាំងនននៃព្រះវិហារបរិសុទ្ធបុរាណនោះ គឺតំណាងឲ្យអ្វីដែលព្រះគ្រីស្ទត្រូវធ្វើ ដែលឥឡូវនេះទ្រង់កំពុងធ្វើ ដើម្បីឲ្យមនុស្សទាំងអស់មានសិទ្ធិឆ្លងកាត់វាំងនននោះចូលទៅក្នុងវត្តមានរបស់ព្រះ អម្ចាស់ដើម្បីគ្រងភាពតម្កើងឡើងដ៏ពេញលេញទុកជាមរតក » ( Doctrinal New Testament Commentary វ៉ុលទី ៣ [ ឆ្នាំ១៩៦៥–៧៣ ] ១:៨៣០ ) ។
-
តើសេចក្ដីពិតដ៏សំខាន់អ្វីខ្លះ ដែលអ្នកអាចរៀនពីដង្វាយធួនរបស់ព្រះយេស៊ូវគ្រីស្ទចេញពីការរហែកវាំងនននោះ ? ( បន្ទាប់ពីសិស្សឆ្លើយ សូមសរសេរសេចក្ដីពិតខាងក្រោមនេះនៅលើក្ដារខៀន ៖ ដោយសារដង្វាយធួនរបស់ព្រះយេស៊ូវគ្រីស្ទយើងទាំងអស់គ្នាអាចចូលទៅក្នុងទីវត្តមានរបស់ព្រះបាន ប្រសិនបើយើងប្រែចិត្ត ហើយរក្សាសេចក្ដីសញ្ញារបស់យើង ) ។
-
តើដង្វាយធួនរបស់ព្រះយេស៊ូវគ្រីស្ទ អាចធ្វើឲ្យយើងត្រឡប់ទៅទីវត្តមានរបស់ព្រះវិញបានដោយរបៀបណា ?
ចូរចង្អុលបង្ហាញថា ទោះជាដង្វាយធួនរបស់ព្រះយេស៊ូវគ្រីស្ទធ្វើឲ្យយើងអាចត្រឡប់ទៅវត្តមានរបស់ព្រះវិញក្ដី ក៏យើងត្រូវធ្វើផ្នែករបស់យើងដើម្បីមានភាពសក្ដិសមរស់នៅជាមួយនឹងព្រះវរបិតាសួគ៌របស់យើងដ៏អស់កល្បជានិច្ច ។
-
តើ យើង ត្រូវធ្វើអ្វីខ្លះដើម្បី ឲ្យបានសក្ដិសមរស់នៅជាមួយនឹងព្រះវរបិតាសួគ៌ដ៏អស់កល្បជានិច្ច ?
សូមសង្ខេប ម៉ាថាយ ២៧:៥២–៥៦ ដោយពន្យល់ថា បន្ទាប់ពីការមានព្រះជន្មឡើងវិញរបស់ព្រះយេស៊ូវគ្រីស្ទ មានមនុស្សសុចរិតជាច្រើនដែលបានស្លាប់ហើយក៏បានរស់ឡើងវិញ ហើយបានបង្ហាញខ្លួនដល់មនុស្សជាច្រើននៅយេរូសាឡិមផងដែរ ។ ខគម្ពីរទាំងនេះក៏លើកឡើងផងដែរថា នៅក្នុងចំណោមជនដែលបានឃើញការសុគតរបស់ព្រះយេស៊ូវគឺមេបញ្ជាការរ៉ូមម្នាក់ និងស្ត្រីជាច្រើន ។
សូមអញ្ជើញសិស្សម្នាក់អាន ម៉ាថាយ ២៧:៥៤ ឲ្យឮៗ ។ ចូរសុំឲ្យសិស្សរកមើលរបៀបដែលមេបញ្ជាការរ៉ូម និងអ្នកដែលបាននៅជាមួយនឹងទ្រង់បានធ្វើ កាលពួកគេបានឃើញព្រឹត្តិការណ៍ដូចតទៅនេះពីការឆ្កាងរបស់ព្រះអង្គសង្គ្រោះ ៖
-
តើអ្វីទៅជាការឆ្លើយតបរបស់មេបញ្ជាការនោះ និងជនដែលបាននៅជាមួយទ្រង់ ?
-
តើពូកគេបានឃើញអ្វីដែលប្រហែលជាបានធ្វើឲ្យពួកគេប្រកាសថា « [ ព្រះយេស៊ូវ ] ពិតជាព្រះរាជបុត្រានៃព្រះ ?
ម៉ាថាយ ២៧:៥៧–៦៦
ពួកអ្នកដឹកនាំសាសន៍យូដារួមផ្សំគំនិតជាមួយនឹងពីឡាត់ ដើម្បីការពារផ្នូររបស់ព្រះយេស៊ូវ ។
សូមសង្ខេប ម៉ាថាយ ២៧:៥៧–៦១ ដោយពន្យល់ថា បន្ទាប់ពីព្រះយេស៊ូវសុគត មានសិស្សម្នាក់ដែលមានសម្បត្តិស្ដុកស្ដមឈ្មោះ យ៉ូសែប ដែលនៅភូមិអើរីម៉ាថេបាន « សូម [ យក ] ព្រះសពព្រះយេស៊ូវ » ( ខទី ៥៨ ) ។ គាត់បានរុំព្រះសពព្រះយេស៊ូវនឹងក្រណាត់យ៉ាងស្អាត រួចតម្កល់ទុកនៅក្នុងផ្នូរមួយ ( ឬក្នុងកន្លែងបញ្ចុះសព) ដែលជារបស់គាត់ ហើយបន្ទាប់មកបានបាំងច្រកចូលផ្នូរនោះដោយថ្មមួយផ្ទាំងធំ ។
សូមឲ្យសិស្សបីបួននាក់ប្ដូរវេនគ្នាអានឮៗពី ម៉ាថាយ ២៧:៦២–៦៦ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលអ្វីដែលពួកមេសង្ឃ និងពួកផារិស៊ីបានដាក់ស្នើដល់ពីឡាត់ ។
-
តើពួកមេសង្ឃ និងពួកផារិស៊ីបានស្នើអ្វីខ្លះដល់ពីឡាត់ ?
-
ហេតុអ្វីបានជាពួកគេចង់បានការណ៍នេះ ?
ម៉ាថាយ ២៨:១–២០
ព្រះយេស៊ូវគ្រីស្ទមានព្រះជន្មរស់ឡើងវិញ ហើយបានបង្ហាញព្រះកាយដល់មនុស្សជាច្រើន
ចូរពន្យល់ថា នៅព្រឹកព្រលឹមនាថ្ងៃដំបូងនៃសប្ដាហ៍នោះ ឬថ្ងៃអាទិត្យ ម៉ារា ម៉ាក់ដាឡា និងស្ត្រីម្នាក់ទៀតឈ្មោះថា ម៉ារា បានទៅផ្នូរនោះដើម្បីចាក់ប្រេងលាបព្រះកាយរបស់ព្រះយេស៊ូវជាការបង្ហាញសេចក្ដីស្រឡាញ់ និង កោតសរសើររបស់ពួកគេ ។ ចូរសុំឲ្យសិស្សពីរបីនាក់ប្ដូរវេនគ្នាអាននៅក្នុង ម៉ាថាយ ២៨:១-៦ឲ្យឮៗ ។
-
តើស្ត្រីទាំងនោះបានរកឃើញអ្វីខ្លះ ពេលពួកគេបានទៅដល់ផ្នូរខ្មោច ? ( សូមពន្យល់ថា ការបកប្រែរបស់យ៉ូសែប ស្ម៊ីធ បញ្ជាក់ថា ស្ត្រីពីរនាក់នោះបានឃើញទេវតាពីរអង្គ ពុំមែនមួយអង្គទេ )។
-
តើអ្នកនឹងមានប្រតិកម្មយ៉ាងណាដែរ ប្រសិនបើអ្នកបានឃើញទេវតាពីរអង្គ ? តើពួកអ្នកយាមមានប្រតិកម្មយ៉ាងណា ?
-
យោងតាម ខទី ៥-៦តើពួកទេវតាបានប្រាប់អ្វីខ្លះដល់ស្ត្រីទាំងនោះ ?
-
តើសេចក្ដីពិតអ្វីខ្លះ ដែលយើងរៀននៅក្នុងបន្ទូលទាំងនេះ ? ( បន្ទាប់ពីសិស្សឆ្លើយ សូមសរសេរសេចក្ដីពិតខាងក្រោមនេះនៅលើក្ដារខៀន ៖ ព្រះយេស៊ូវបានរស់ឡើងវិញពីការសុគត )។
ដើម្បីជួយសិស្សយល់គោលលទ្ធិនៃការរស់ឡើងវិញ សូមបំបែកពួកគេជាក្រុមៗមានគ្នាពីរនាក់ ឬបីនាក់ ហើយអញ្ជើញពួកគេឲ្យបំពេញឯកសារចែកចាយខាងក្រោម នៅក្នុងក្រុមរបស់ពួកគេ ៖
« ទ្រង់រស់ឡើងវិញ » (ម៉ាថាយ ២៨:៦)
សៀវភៅសិក្សាព្រះគម្ពីរសញ្ញាថ្មីសម្រាប់គ្រូថ្នាក់សិក្ខាសាលា—មេរៀនទី ៣៣
សូមសិក្សាចំណងជើង« Resurrection » នៅក្នុងBible Dictionary ។ បន្ទាប់មកពីភាក្សាអំពីសំណួរដូចខាងក្រោម ហើយកត់ត្រាចម្លើយរបស់អ្នកនៅក្នុងចន្លោះដែលបានផ្ដល់ឲ្យ ។
|
តើមានភាពខុសគ្នាអ្វីខ្លះ រវាងការត្រូវបានប្រោសពីសេចក្ដីស្លាប់ និងការត្រូវបានរស់ឡើងវិញ ? | |
|
តើនឹងមានអ្វីកើតឡើងខ្លះចំពោះមនុស្សលោកគ្រប់រូប ដែលជាលទ្ធផលមួយមកពីការរស់ឡើងវិញរបស់ព្រះយេស៊ូវគ្រីស្ទ ? | |
|
តើការយល់ដឹងអំពីគោលលទ្ធិនៃការរស់ឡើងវិញអាចផ្ដល់នូវការលួងលោមចិត្តដល់អ្នកទាំងឡាយដែលបានបាត់បង់មនុស្សជាទីស្រឡាញ់យ៉ាងដូចម្ដេច ? |
© ២០១៥ ដោយ Intellectual Reserve, Inc. រក្សាសិទ្ធិគ្រប់យ៉ាង ។
ចូរសុំឲ្យសិស្សពីរបីនាក់ចែកចាយនឹងសិស្ស ក្នុងថ្នាក់អំពីអ្វីដែលពួកគេបានរៀន តាមរយៈការបំពេញឯកសារចែកចាយ ។
សូមឲ្យសិស្សម្នាក់អានសេចក្ដីថ្លែងការណ៍ខាងក្រោមឲ្យឮៗដោយប្រធាន ហ្គរដុន ប៊ី ហ៊ិងគ្លី ៖
« អព្ភូតហេតុនៅព្រឹកនៃការរស់ឡើងវិញនោះ ជាថ្ងៃអាទិត្យបុណ្យអ៊ីស្ទើរដំបូង គឺជាអព្ភូតហេតុមួយសម្រាប់មនុស្សលោកគ្រប់រូប ។ វាគឺជាអព្ភូតហេតុនៃព្រះចេស្ដារបស់ព្រះ ជាព្រះរាជបុត្រាសំណព្វ បានប្រទានជីវិតរបស់ទ្រង់ដើម្បីធ្វើឲ្យធួនចំពោះអំពើបាបនៃមនុស្សទាំងអស់ ជាពលិកម្មនៃក្ដីស្រឡាញ់សម្រាប់បុត្រា និងបុត្រីគ្រប់រូបរបស់ព្រះ ។ នៅក្នុងការធ្វើដូច្នោះ ទ្រង់បានបំបាក់ចំណងនៃសេចក្ដីស្លាប់ ។ …
« ហើយដូចជាទ្រង់បានយកព្រះកាយរបស់ទ្រង់មកវិញ ហើយយាងចេញពីផ្នូរដែរ នោះយើងទាំងអស់គ្នានឹងរីករាយចំពោះការរួបរួមនៃរូបកាយ និងវិញ្ញាណដើម្បីក្លាយជាមនុស្សរស់នៅថ្ងៃនៃការរស់ឡើងវិញផ្ទាល់ខ្លួនរបស់យើងផងដែរ ។
« ហេតុដូច្នោះហើយ យើងរីករាយ ដូចជាមនុស្សជាច្រើនផងដែរ ហើយក៏ដូចជាមនុស្សគ្រប់រូបផងដែរ នៅពេលយើងចងចាំអំពីព្រឹត្តការណ៍ដ៏រុងរឿងបំផុត ដ៏លួងលោមចិត្តបំផុត ដ៏បញ្ជាក់អះអាងបំផុតនៃគ្រប់ព្រឹត្តិការណ៍ទាំងអស់ក្នុងប្រវត្តិសាស្ត្រមនុស្ស—គឺជាជោគជ័យឈ្នះលើសេចក្ដីស្លាប់ » ( « The Victory over Death »Ensign ខែ មេសា ឆ្នាំ ១៩៩៧ ទំព័រ ៤ ) ។
សូមអញ្ជើញសិស្សម្នាក់អាន ម៉ាថាយ ២៨:៧-១០ ឲ្យឮៗ ។
-
យោងតាម ខទី ៧តើពួកទេវតាបញ្ជាឲ្យស្ត្រីទាំងនោះធ្វើអ្វីខ្លះ ?
-
ហេតុអ្វីក៏អ្នកគិតថា ស្ត្រីទាំងនោះបានចាកចេញ « ទាំងភ័យ ហើយមានសេចក្តីអំណរជាខ្លាំងផង » ដូច្នេះ ?
-
តើមានអ្វីកើតឡើងចំពោះស្ត្រីទាំងនោះ នៅពេលពួកគេបានទៅប្រាប់ដល់ពួកសិស្សអំពីបទពិសោធន៍របស់ពួកគេ ?
ចូរសង្ខេបម៉ាថាយ ២៨:១១-១៥ដោយពន្យល់ថា ខណៈដែលស្ត្រីទាំងនោះប្រញាប់ទៅប្រាប់ដំណឹងដល់ពួកសិស្សអំពីការរស់ឡើងវិញរបស់ព្រះយេស៊ូវ នោះពួកមេសង្ឃទាំងឡាយបានស្ដាប់ឮអំពីអ្វីដែលបានកើតឡើងមកពីពួកទាហានដែលបានចាំយាមផ្នូរ ។ ពួកអ្នកដឹកនាំសាសន៍យូដាបានភ័យខ្លាចថាមនុស្សអាចដឹងអំពីសេចក្ដីពិត នោះពួកគេបានឲ្យប្រាក់ដល់អ្នកយាមឲ្យនិយាយរឿងកុហកថា ពួកសិស្សរបស់ព្រះអង្គសង្គ្រោះបានយកព្រះសពរបស់ទ្រង់ចេញពីផ្នូរ ខណៈដែលអ្នកយាមកំពុងដេកលក់ ។
ចូរសុំសិស្សម្នាក់អាន ម៉ាថាយ ២៨:១៦-១៨ ឲ្យឮៗ ។ សូមអញ្ជើញសិស្សឲ្យផ្ទៀងតាម ហើយរកមើលនូវពរជ័យដែលកើតមានដល់សាវកដប់មួយនាក់ ពេលពួកគេបានគោរពតាមពាក្យសម្តីដែលស្ត្រីទាំងឡាយបានប្រាប់ពួកគេ ហើយបានចេញទៅស្រុកកាលីឡេ ។
-
តើមានពរជ័យអ្វីខ្លះ កើតមានដល់ពួកសិស្សដប់មួយនាក់ ដោយសារតែពួកគេបានគោរពតាមពាក្យសម្ដីរបស់ស្ត្រីទាំងនោះ ?
សូមអញ្ជើញសិស្សម្នាក់អាន ម៉ាថាយ ២៨:១៩-២០ ឲ្យឮៗ ។ ចូរសុំសិស្សក្នុងថ្នាក់ផ្ទៀងតាម រកមើលអ្វីដែលព្រះអង្គសង្គ្រោះបានបង្គាប់ដល់ពួកសាវករបស់ទ្រង់ឲ្យធ្វើបន្ទាប់ពីពួកគេបានឃើញទ្រង់ ។
-
តើពួកសិស្សត្រូវបានបញ្ជាឲ្យធ្វើអ្វីខ្លះ បន្ទាប់ពីពួកគេបានមើលឃើញព្រះអង្គសង្គ្រោះ?
-
តើយើងអាចរៀនអ្វីខ្លះពីបទពិសោធន៍របស់ពួកគេ អំពីទំនួលខុសត្រូវដែលយើងមាន នៅពេលយើងទទួលបានទីបន្ទាល់មួយអំពីព្រះយេស៊ូវគ្រីស្ទ? ( បន្ទាប់ពីសិស្សឆ្លើយ សូមសរសេរគោលការណ៍ខាងក្រោមនេះនៅលើក្ដារខៀន ៖ នៅពេលយើងទទួលបានទីបន្ទាល់មួយអំពីព្រះយេស៊ូវគ្រីស្ទ នោះយើងមានទំនួលខុសត្រូវដើម្បីថ្លែងទីបន្ទាល់អំពីទ្រង់ដល់អ្នកដទៃ )។
សូមអញ្ជើញសិស្សឡើងមកក្ដារខៀន សរសេរពីរបៀបដែលយើងអាចថ្លែងទីបន្ទាល់ពីព្រះយេស៊ូវគ្រីស្ទដល់មនុស្សដទៃ ។ អ្នកគួរអញ្ជើញសិស្សឲ្យពន្យល់ ឬផ្ដល់ឧទាហរណ៍ពីគំនិតដែលពួកគេសរសេរ ។ បន្ទាប់មក សួរសំណួរដូចខាងក្រោមនេះ ៖
-
យោងតាមខទី ២០តើមានការសន្យាអ្វីខ្លះ ដែលព្រះអង្គសង្គ្រោះបានប្រទានដល់ពួកសាវករបស់ទ្រង់ ?
-
តើព្រះអម្ចាស់បាន « គង់នៅនឹងអ្នក » ឬបានជួយអ្នកនៅក្នុងកិច្ចខិតខំដើម្បីចែកចាយដំណឹងល្អតាមរបៀបណា ?
សូមលើកទឹកចិត្តសិស្សឲ្យចែកចាយទីបន្ទាល់របស់ពួកគេ អំពីព្រះយេស៊ូវគ្រីស្ទជាមួយនឹងមនុស្សដទៃ ។ ដើម្បីជួយពួកគេឲ្យធ្វើកិច្ចការនេះ ចូរសុំឲ្យសិស្សប្រើគំនិតមួយ ដែលបានសរសេរនៅលើក្ដារខៀន ដើម្បីបង្កើតជាគោលដៅផ្ទាល់ខ្លួនមួយ នៅក្នុងការថ្លែងទីបន្ទាល់អំពីព្រះយេស៊ូវគ្រីស្ទ និងទីបន្ទាល់របស់ទ្រង់ដល់សមាជិកគ្រួសារ មិត្ត និងមនុស្សដទៃ ។ សូមអញ្ជើញសិស្សឲ្យសរសេរគោលដៅរបស់ពួកគេនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ។
![]()
រូបភាពរូបសញ្ញាចំណេះចំណានខគម្ពីរ
ដើម្បីជួយសិស្សទន្ទេញចាំវគ្គចំណេះចំណានខគម្ពីរនេះ សូមបំបែកសិស្សជាគូ ហើយអញ្ជើញសិស្សម្នាក់ពីដៃគូនីមួយៗឲ្យសរសេរវគ្គនោះនៅលើក្រដាស ។ ចូរសុំឲ្យសិស្សកាត់ក្រដាសនោះជាបន្ទះៗ ដោយទុកឃ្លានៅក្នុងវគ្គបទគម្ពីរនោះនៅដដែល ។ ចូរសុំឲ្យសិស្សច្របល់បន្ទះក្រដាសទាំងនោះចូលគ្នា ហើយបន្ទាប់មកតម្រៀបវាឡើងវិញតាមលំដាប់លំដោយ ( ដោយយោងទៅលើព្រះគម្ពីររបស់ពួកគេ ប្រសិនបើចាំបាច់ ) ។ ចូរសំណូមពរឲ្យសិស្សបន្តអនុវត្តតាមរបៀបនេះ រហូតដល់ពួកគេឈប់ត្រូវការប្រើព្រះគម្ពីររបស់ពួកគេ ។ សូមលើកទឹកចិត្តសិស្សឲ្យដកយកបន្ទះក្រដាសមួយចេញ ហើយសូត្រឃ្លាដែលបាត់ដោយការចងចាំ ។ បន្ទាប់ពីសិស្សបានទន្ទេញចាំមួយឃ្លាហើយ សូមលើកទឹកចិត្តពួកគេឲ្យដកឃ្លាមួយទៀត ហើយសូត្រឃ្លាទាំងពីរឡើងវិញពីការចងចាំ ។ ចូរអនុញ្ញាតឲ្យពួកគេបន្តដំណើរការនេះរហូតពួកគេអាចសូត្រវគ្គខគម្ពីរទាំងស្រុងដោយការចងចាំ ។
សេចក្តីពន្យល់ និង ព័ត៌មានសាច់រឿង
ម៉ាថាយ ២៨:៦ ។ « ទ្រង់មានព្រះជន្មរស់ឡើងវិញ »
ប្រធាន អ៊ែសរ៉ា ថាហ្វ ប៊ែនសឹន បានប្រកាសថា គ្មានព្រឹត្តិការណ៍សំខាន់ជាងការមានព្រះជន្មឡើងវិញរបស់ព្រះយេស៊ូវគ្រីស្ទនោះឡើយ ៖
« ព្រឹត្តិការណ៍ដ៏អស្ចារ្យជាងគេបំផុតនៅក្នុងប្រវត្តិសាស្ត្រ គឺជារឿងដែលមានអនុភាពយ៉ាងអស្ចារ្យបំផុត ហើយមានរយៈពេលយូរអង្វែង ។ តាមរយៈបទដ្ឋាននេះ គ្មានព្រឹត្តិការណ៍ណាមួយអាចមានសារៈសំខាន់ដល់បុគ្គលទាំងឡាយ ឬប្រជាជាតិនានា ជាងការមានព្រះជន្មឡើងវិញរបស់លោកចៅហ្វាយបានឡើយ ។ ការរស់ឡើងវិញជាយថាហេតុនៃព្រលឹងគ្រប់រូបដែលបានរស់នៅ ហើយស្លាប់នៅលើផែនដីគឺជាការសបញ្ជាក់យ៉ាងច្បាស់មួយនៅក្នុងព្រះគម្ពីរ ហើយប្រាកដណាស់ គឺគ្មានព្រឹត្តិការណ៍ណាទៀតឡើយ ដែលមនុស្សម្នាក់គួរត្រៀមខ្លួនដោយប្រុងប្រយ័ត្ននោះ ។ គ្មានអ្វីដែលធំធេងជាងការរស់ឡើងវិញនោះឡើយ ។ មនុស្សគ្រប់រូបនឹងបានរស់ឡើងវិញ » ( « The Greatest Event in History » New Era ខែ មេសា ឆ្នាំ ២០០៤ ទំព័រ ៤៥ ) ។
ម៉ាថាយ ២៨:១៩ ។ « ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ »
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀនថា សមាជិកសាសនាចក្រអាចប្រើប្រព័ន្ធផ្សព្វផ្សាយសង្គមដើម្បីចែកចាយដំណឹងល្អ ៖
« ព្រះអម្ចាស់កំពុងពន្លឿនកិច្ចការរបស់ទ្រង់ ហើយវាពុំមែនជារឿងចៃដន្យឡើយដែលការបង្កើតថ្មី និងការច្នៃប្រឌិតដ៏មានអនុភាពខាងការទំនាក់ទំនង កំពុងកើតមាននៅក្នុងសម័យកាន់កាប់ត្រួតត្រានៃពេលពេញកំណត់នេះ ។ បណ្ដាញប្រព័ន្ធផ្សព្វផ្សាយសង្គម គឺជាឧបករណ៍សាកលដែលអាចជះឥទ្ធិពលវិជ្ជមានផ្ទាល់ខ្លួនដល់បុគ្គលម្នាក់ៗ និងដល់ក្រុមគ្រួសារដ៏ច្រើន ។ ហើយខ្ញុំជឿថា ពេលវេលាបានមកដល់ហើយដែលយើងក្នុងនាមជាសិស្សរបស់ព្រះគ្រីស្ទ ត្រូវប្រើឧបករណ៍មកពីការបំផុសគំនិតទាំងនេះឲ្យបានសមរម្យ ហើយឲ្យកាន់តែមានប្រសិទ្ធភាពដើម្បីថ្លែងទីបន្ទាល់អំពីព្រះជាព្រះវរបិតាដ៏អស់កល្បជានិច្ច ផែនការនៃសុភមង្គលរបស់ទ្រង់សម្រាប់កូនចៅរបស់ទ្រង់ និងព្រះរាជបុត្រាទ្រង់គឺ ព្រះយេស៊ូវគ្រីស្ទ ជាព្រះអង្គសង្គ្រោះនៃពិភពលោក ដើម្បីប្រកាសពីភាពពិតនៃការស្ដារឡើងវិញនៃដំណឹងល្អនៅថ្ងៃចុងក្រោយ ហើយសម្រេចកិច្ចការរបស់ព្រះអម្ចាស់ » ( « To Sweep the Earth as with a Flood » [ Brigham Young University Campus Education Week devotional ថ្ងៃទី ១៩ ខែ សីហា ឆ្នាំ ២០១៤ ] LDS.org ) ។