មេរៀនទី ១១៩
កាឡាទី ៥–៦
សេចក្តីផ្ដើម
ប៉ុលបានលើកទឹកចិត្តដល់ពួកបរិសុទ្ធនៅកាឡាទី ឲ្យស្ថាបនាសេចក្ដីជំនឿរបស់ពួកគេទៅលើព្រះយេស៊ូវគ្រីស្ទឡើងវិញ ហើយទុកចិត្តថា សេចក្ដីសង្គ្រោះគឺអាចទទួលបានតែតាមរយៈទ្រង់ប៉ុណ្ណោះ ពុំមែនតាមរយៈការគោរពតាមក្រឹត្យវិន័យរបស់លោកម៉ូសេឡើយ ។ ប៉ុលបានបញ្ចប់សំបុត្ររបស់លោក ដោយការអញ្ជើញដល់សមាជិកសាសនាចក្រឲ្យប្រែក្លាយទៅជាសត្វលោកថ្មីតាមរយៈព្រះគ្រីស្ទ ហើយជួយអ្នកដទៃឲ្យធ្វើដូចគ្នានោះ ។
យោបល់សម្រាប់ការបង្រៀន
កាឡាទី ៥
ប៉ុលបានលើកទឹកចិត្តដល់ពួកបរិសុទ្ធនៅកាឡាទីឲ្យស្ថាបនាសេចក្ដីជំនឿរបស់ខ្លួនទៅលើព្រះយេស៊ូវគ្រីស្ទឡើងវិញ
សូមគូររូបភាពទាញព្រាត់នៅលើក្ដារខៀន ។
-
តើការទាញព្រាត់ជាអ្វី ? តើអ្នកអាចឈ្នះវាដោយរបៀបណា ?
-
តើជីវិតរបស់យើងស្រដៀងគ្នានឹងការទាញព្រាត់តាមវិធីណា ?
ប្រសិនបើសិស្សពុំបានប្រាប់អំពីវាទេ សូមចង្អុលបង្ហាញថា ទិដ្ឋភាពមួយនៃជីវិតរបស់យើងដែលស្រដៀងគ្នាទៅនឹងការទាញព្រាត់ គឺការពុះពាររបស់យើងទប់ទល់នឹងការល្បួង ។ សូមអញ្ជើញសិស្សឲ្យរកមើលសេចក្ដីពិត នៅពេលពួកគេសិក្សាកាឡាទី ៥ដែលអាចជួយពួកគេឲ្យដឹង អំពីរបៀបដើម្បីយកឈ្នះលើការពុះពារទប់ទល់នឹងការល្បួង ។
សូមរំឭកសិស្សថា ពួកគ្រីស្ទានដែលជាសាសន៍យូដាមួយចំនួន បានដឹកនាំពួកបរិសុទ្ធឲ្យភាន់ច្រឡំនៅក្នុងក្រុងកាឡាទី ដោយបង្រៀនពួកគេថា ពួកគេចាំបាច់ត្រូវរស់នៅតាមក្រឹត្យវិន័យរបស់ម៉ូសេ ហើយត្រូវកាត់ស្បែកដើម្បីអាចបានសង្គ្រោះ ។ ប៉ុលបានពិពណ៌នាអំពីការបង្រៀនខុសឆ្គងអំពីក្រឹត្យវិន័យលោកម៉ូសេទាំងនេះថា « ជាប់ចំណងជាបាវបម្រើ » (កាឡាទី៥:១) ។
សូមអញ្ជើញសិស្សម្នាក់អាន កាឡាទី៥:១ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា តើនរណាដែលប៉ុលបាននិយាយថា នឹងនាំមកនូវសេរីភាពចេញពីការជាប់ចំណងជាបាវបម្រើនេះ ។
-
តើនរណានាំមកនូវសេរីភាពចេញពីការជាប់ចំណងជាបាវបម្រើនេះ ?
សូមសង្ខេបកាឡាទី៥:២-១៥ដោយពន្យល់ថា ប៉ុលបានវាយផ្ចាលពួកបរិសុទ្ធនៅកាឡាទី ដោយសារការងាយនឹងងាកចេញពីសេរីភាពនៃដំណឹងល្អរបស់ព្រះយេស៊ូវគ្រីស្ទ ហើយត្រឡប់ទៅរកការជាប់ចំណងនៃក្រឹត្យវិន័យរបស់ម៉ូសេវិញនោះ ។ បន្ទាប់មកលោកបានបញ្ជាក់ថា ទោះជាអ្នកដើរតាមព្រះគ្រីស្ទបានសេរីភាព ចេញពីការជាប់ចំណងនៃក្រឹត្យវិន័យរបស់ម៉ូសេក្ដី ក៏ការណ៍នោះពុំមែនមានន័យថា ពួកគេមានសេរីភាពដើម្បីប្រព្រឹត្តអំពើបាបដោយសេរីនោះទេ ។
ចូរសុំឲ្យសិស្សម្នាក់អាន កាឡាទី៥:១៦-១៧ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលកម្លាំងប្រកួតប្រជែងពីរដែលប៉ុលបានពិពណ៌នា ។
-
តើកម្លាំងប្រកួតប្រជែងពីរ ដែលប៉ុលបានពិពណ៌នាមានអ្វីខ្លះ ?
ចូរបង្កើតតារាងមួយនៅលើក្ដារខៀនដោយគូសបន្ទាត់ឈរនៅត្រង់កណ្ដាលនៃរូបភាពការទាញព្រាត់ ។ សូមសរសេរដើរនៅក្នុងព្រះវិញ្ញាណនៅខាងលើផ្នែកម្ខាងនៃការទាញព្រាត់ ហើយសរសេរបំពេញសេចក្តីប៉ងប្រាថ្នាខាងសាច់ឈាមនៅខាងលើផ្នែកម្ខាងទៀត ។
-
តើ « ការដើរនៅក្នុងព្រះវិញ្ញាណ » មានន័យដូចម្ដេច ? (ខទី ១៦ ) ។ ( ដើម្បីរស់នៅដោយសក្ដិសម ហើយធ្វើតាមព្រះវិញ្ញាណបរិសុទ្ធ ) ។
-
តើ « បំពេញសេចក្តីប៉ងប្រាថ្នាខាងសាច់ឈាម » (ខទី ១៦) សំដៅទៅលើអ្វី ? ( ការល្បួងឲ្យធ្វើអំពើបាប ) ។
-
តើរឿងទាំងពីរនេះចាត់ទុកថាជាឋាមពលប្រកួតប្រជែងយ៉ាងដូចម្ដេច ?
-
តើគោលការណ៍អ្វីខ្លះ ដែលយើងអាចរៀនចេញមកពីខទី ១៦អំពីរបៀបដែលយើងអាចយកឈ្នះលើការល្បួងខាងសាច់ឈាម ? ( សិស្សអាចនឹងប្រើពាក្យផ្សេង ប៉ុន្តែពួកគេគួរតែប្រាប់នូវគោលការណ៍ស្រដៀងគ្នានេះដូចតទៅ ៖ នៅពេលយើងដើរនៅក្នុងព្រះវិញ្ញាណ នោះយើងនឹងយកឈ្នះលើការល្បួងនានាខាងសាច់ឈាម ។ សូមសរសេរគោលការណ៍នេះនៅលើក្ដារខៀន ) ។
សូមឲ្យសិស្សសញ្ជឹងគិតថា តើពួកគេស្ថិតនៅខាងណាក្នុងការទាញព្រាត់នោះ ហើយតើកម្លាំងណាមួយកំពុងតែយកឈ្នះនៅក្នុងជីវិតរបស់ពួកគេ ។
សូមចែកសិស្សជាក្រុម ដែលមានគ្នាពីរ ឬបីនាក់ ។ ចូរចាត់ឲ្យសិស្សក្នុងក្រុមពាក់កណ្ដាលអានកាឡាទី ៥:១៩-២១ ឮៗជាមួយគ្នា ហើយរកមើលលទ្ធផលនៃ « [ ការបំពេញតាម ] សេចក្ដីប៉ងប្រាថ្នាខាងសាច់ឈាម » ។ សូមអញ្ជើញសិស្សពាក់កណ្ដាលក្រុមទៀតឲ្យអានកាឡាទី៥:២២-២៣ ឮៗជាមួយគ្នា ហើយរកមើលលទ្ធផលនៃការដើរនៅក្នុងព្រះវិញ្ញាណ ។ នៅពេលអ្នកបញ្ចប់ការអាន សូមអញ្ជើញសមាជិកម្នាក់មកពីក្រុមនីមួយៗ ឲ្យសរសេរនៅក្នុងកូឡោនត្រឹមត្រូវនៅលើក្ដារខៀន នូវចម្លើយមួយដែលពួកគេបានរកឃើញ ។ សូមអញ្ជើញពួកគេឲ្យបន្ដសរសេរចម្លើយរបស់ពួកគេ រហូតដល់តារាងនោះឆ្លុះបញ្ចាំងទៅនឹងអ្វីដែលប៉ុលបានរៀបរាប់ ។ អ្នកអាចនឹងចង់យកវចនានុក្រមមកថ្នាក់រៀន ហើយអញ្ជើញសិស្សឲ្យរកមើលពាក្យណាដែលពិបាកយល់ ។
-
យោងតាមខទី ២១តើប៉ុលបង្រៀនថាអ្វីខ្លះ នឹងកើតមានឡើងចំពោះមនុស្សដែលចុះចាញ់ « កិច្ចការខាងសាច់ឈាម » ?
-
យោងតាមខទី ២២-២៣តើផលផ្លែ ឬលទ្ធផលអ្វីខ្លះ ដែលចង្អុលបង្ហាញថា នរណាម្នាក់កំពុងតែដើរនៅក្នុងព្រះវិញ្ញាណ ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថា ពួកគេស្គាល់សេចក្ដីពិតដូចខាងក្រោមនេះ ៖ ផលផ្លែនៃព្រះវិញ្ញាណនោះគឺជាសេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត និងដឹងខ្នាត ។ អ្នកអាចផ្ដល់យោបល់ដល់សិស្សឲ្យគូសចំណាំសេចក្ដីពិតនេះនៅក្នុងព្រះគម្ពីររបស់ពួកគេ ) ។
ចូរយោងទៅផ្នែកម្ខាងនៃតារាងត្រង់កន្លែងផលផ្លែនៃព្រះវិញ្ញាណដែលបានរៀបរាប់ ។
-
ហេតុអ្វីពរជ័យទាំងនេះសក្ដិសមនឹងមាន ?
នៅខាងក្រោមតារាងនោះ សូមគូសសញ្ញាព្រួញធំមួយចង្អុលទៅត្រង់កន្លែង ដែលសេចក្ដីប៉ងប្រាថ្នាខាងសាច់ឈាមត្រូវបានរៀបរាប់ ។ សូមឲ្យសិស្សនឹកស្រមៃថា នៅក្នុងនិមិត្តរូបនៃការទាញព្រាត់នេះ យើងអនុញ្ញាតឲ្យខ្លួនយើងរំកិលទៅរកសេចក្ដីប៉ងប្រាថ្នាខាងសាច់ឈាម ។
-
តើមានអ្វីកើតឡើងចំពោះផលផ្លែនៃព្រះវិញ្ញាណ នៅពេលយើងចុះចាញ់នឹងសេចក្ដីប៉ងប្រាថ្នាខាងសាច់ឈាម ? ( យើងចាប់ផ្ដើមបាត់បង់ផលផ្លែនៃព្រះវិញ្ញាណ ) ។
សូមលុបសញ្ញាព្រួញចេញ ហើយគូសរូបសញ្ញាព្រួញមួយទៀតចង្អុលទៅរកផលផ្លែខាងវិញ្ញាណ ។ សូមឲ្យសិស្សនឹកស្រមៃថា ឥឡូវយើងអនុញ្ញាតឲ្យខ្លួនយើងរំកិលទៅខាងនេះ ។
-
តើមានអ្វីកើតឡើងចំពោះកិច្ចការខាងសាច់ឈាម ពេលយើងដើរនៅក្នុងព្រះវិញ្ញាណ ? ( វាឈប់មានចំណែកនៅក្នុងជីវិតយើងទៀតហើយ ) ។
សូមអញ្ជើញសិស្សឲ្យសរសេរនៅក្នុងសៀវភៅសរសេរ ឬសៀវភៅកំណត់ត្រាការសិក្សាព្រះគម្ពីររបស់ពួកគេអំពីគ្រាមួយដែលពួកគេទទួលអារម្មណ៍ ឬមានបទពិសោធន៍អំពីផលផ្លែនៃព្រះវិញ្ញាណមួយក្នុងចំណោមផលផ្លែទាំងនេះ ។ ចូរសុំពួកគេឲ្យដាក់បញ្ចូលនូវអ្វីដែលពួកគេកំពុងធ្វើ ដើម្បីដើរនៅក្នុងព្រះវិញ្ញាណនៅគ្រានោះ ។ នៅពេលបញ្ចប់ហើយ សូមអញ្ជើញសិស្សពីរបីនាក់ឲ្យចែកចាយពីអ្វីដែលពួកគេបានសរសេរ ។
ចូរសុំឲ្យសិស្សម្នាក់អាន កាឡាទី ៥:២៤-២៥ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលពីអ្វី ដែលពួកសិស្សរបស់ព្រះយេស៊ូវគ្រីស្ទបានព្យាយាមធ្វើជាមួយនឹងសេចក្ដីប៉ងប្រាថ្នាខាងសាច់ឈាម ។
-
តើពួកសិស្សរបស់ព្រះយេស៊ូវព្យាយាមធ្វើអ្វីខ្លះ ជាមួយនឹងសេចក្ដីប៉ងប្រាថ្នាខាងសាច់ឈាមនេះ ? ( ឆ្កាងវា ឬលុបបំបាត់វាចេញពីជីវិតរបស់ពួកគេ ) ។
សូមអញ្ជើញសិស្សឲ្យពិចារណាអំពីអ្វីដែលពួកគេនឹងធ្វើដើម្បីដើរកាន់តែពេញលេញនៅក្នុងព្រះវិញ្ញាណ ។ សូមលើកទឹកចិត្តដល់ពួកគេឲ្យធ្វើតាមការបំផុសគំនិត ដែលពួកគេបានទទួល ដើម្បីពួកគេអាចរីករាយនឹងផលផ្លែខាងព្រះវិញ្ញាណ ។
កាឡាទី ៦
ប៉ុលអញ្ជើញពួកបរិសុទ្ធនៅកាឡាទីឲ្យផ្លាស់ប្ដូរតាមរយៈព្រះយេស៊ូវគ្រីស្ទ
សូមអញ្ជើញសិស្សឲ្យគិតអំពីនរណាម្នាក់ ដែលពួកគេស្គាល់ថ្មីៗនេះ ដែលពុំបានទទួលពរជ័យនៃដំណឹងល្អ ទោះជាបុគ្គលនោះក្លាយជាសមាជិកនៃសាសនាចក្រហើយក្ដី ។ ចូរសុំឲ្យសិស្សក្នុងថ្នាក់រកមើលគោលការណ៍មួយ នៅពេលពួកគេសិក្សាកាឡាទី ៦ដែលអាចដឹកនាំពួកគេនៅក្នុងកិច្ចខិតខំដើម្បីជួយមនុស្សម្នាក់ ដែលពួកគេបានគិតដល់នោះ ឲ្យទទួលបាននូវពរជ័យនៃដំណឹងល្អ ។
សូមអញ្ជើញសិស្សម្នាក់អាន កាឡាទី ៦:១-២ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលថាតើប៉ុលបានបង្រៀនអ្វីខ្លះ អំពីរបៀបដែលសមាជិកនៃសាសនាចក្រគួរឆ្លើយតបទៅនរណាម្នាក់ ដែលបានធ្វើអំពើបាបនោះ ។ ( អ្នកអាចនឹងចាំបាច់ត្រូវពន្យល់ថា « ធ្វើខុសអ្វីមួយ » [ខទី ១] មានន័យថាធ្វើអំពើបាប ) ។
-
យោងតាមប៉ុល តើសមាជិកនៃសាសនាចក្រគួរឆ្លើយតបចំពោះនរណាម្នាក់ ដែលបានធ្វើអំពើបាបយ៉ាងដូចម្ដេច ? ( « ស្ថាបនា » មនុស្សនោះ ឬជួយពួកគេឲ្យត្រឡប់មកកាន់មាគ៌ានៃដំណឹងល្អវិញ ) ។
-
ហេតុអ្វីក៏វាសំខាន់ដើម្បីមាន « វិញ្ញាណស្លូតបូត » (ខទី ១) នៅពេលយើងជួយនរណាម្នាក់ឲ្យត្រឡប់មកកាន់មាគ៌ានៃដំណឹងល្អវិញ ?
-
តើវិធីមួយចំនួនណាខ្លះដែលយើងអាច « ទទួលបន្ទុកគ្នាទៅវិញទៅមក… » ? ( ខទី ២ ) ។
សូមសង្ខេបកាឡាទី ៦:៣-៥ដោយពន្យល់ថា ប៉ុលបានបង្រៀនថា យើងពុំគួរមានភាពឆ្មើងឆ្មៃ និងគិតសុចរិតតែខ្លួនឯង ហើយថាមនុស្សគ្រប់រូបនឹង « ត្រូវទទួលបន្ទុករបស់ [ ពួកគេ ] ផ្ទាល់ » (ខទី ៤) ឬត្រូវតែទទួលខុសត្រូវចំពោះជម្រើសរបស់ពួកគេនោះទេ ។
សូមបង្ហាញគ្រាប់ពូជផ្លែឈើ ឬគ្រាប់ពូជបន្លែមួយចំនួនដែលសិស្សងាយនឹងស្គាល់ ។ ចូរសួរពួកគេឲ្យប្រាប់ថា តើនោះជាគ្រាប់ពូជអ្វី ។
-
តើអ្នកអាចរំពឹងចង់បានអ្វីខ្លះ បើអ្នកដាំគ្រាប់ពូជទាំងនេះ ?
សូមអញ្ជើញសិស្សម្នាក់អាន កាឡាទី ៦:៧-៨ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយរកមើលថាតើប៉ុលបានបង្រៀនអ្វីខ្លះ អំពីអ្វីដែលយើងអាចរំពឹងចង់បាន នៅពេលយើងដាំគ្រាប់ពូជ ។
-
តើប៉ុលបានបង្រៀនអ្វីខ្លះអំពីអ្វី ដែលយើងអាចរំពឹងចង់បាន នៅពេលយើងដាំគ្រាប់ពូជ ? ( អ្វីដែលអ្នកដាំ ឬបណ្ដុះ គឺជាអ្វីដែលអ្នកនឹងច្រូតកាត់ ឬប្រមូលផល ។ នេះត្រូវបានហៅថា ច្បាប់នៃការប្រមូលផល ) ។
-
តើច្បាប់នៃការប្រមូលផលទាក់ទងទៅនឹងការសម្រេចចិត្ត ដែលយើងធ្វើយ៉ាងដូចម្ដេច ?
សូមឲ្យសិស្សអាន កាឡាទី ៦:៩-១០ ដោយស្ងៀមស្ងាត់ ។ ចូរសុំឲ្យពួកគេរកមើលថា ហេតុអ្វីប៉ុលបានបង្រៀនអំពីច្បាប់នៃការប្រមូលផល ។
-
ហេតុអ្វីក៏អ្នកគិតថា ប៉ុលបានបង្រៀនអំពីច្បាប់នៃការប្រមូលផល បន្ទាប់ពីលោកបានអញ្ជើញឲ្យពួកកាឡាទីជួយគ្នាទៅវិញទៅមកឲ្យស្ថិតនៅលើ ឬត្រឡប់មកកាន់មាគ៌ានៃដំណឹងល្អវិញដូច្នេះ ?
-
តើគោលការណ៍អ្វីខ្លះ ដែលយើងអាចរៀនមកពីខគម្ពីរទាំងនេះ អំពីការជួយអ្នកដទៃដែលពុំមានចិត្តរីករាយនឹងពរជ័យនៃដំណឹងល្អ ? ( សិស្សអាចនឹងប្រើពាក្យផ្សេង ប៉ុន្តែពួកគេគួរតែប្រាប់នូវគោលការណ៍ស្រដៀងគ្នានេះដូចតទៅ ៖ ប្រសិនយើងយើងឧស្សាហ៍ព្យាយាមនៅក្នុងការធ្វើកិច្ចការល្អ នោះយើងនឹងច្រូតកាត់នូវពរជ័យនៃទង្វើរបស់យើង )។
-
តើការសន្យាថា យើងនឹងច្រូតកាត់ « តាមពេលកំណត់ » អាចជួយយើងមិនឲ្យ « រសាយចិត្ត » ( ខទី ៩ ) ឬបោះបង់ចោលការខិតខំរបស់យើងដើម្បីបម្រើដល់អ្នកដទៃ ហើយរស់នៅក្នុងដំណឹងល្អក្នុងជីវិតផ្ទាល់ខ្លួនរបស់យើងយ៉ាងដូចម្ដេច ?
-
តើនៅពេលណា ដែលអ្នក ឬនរណាម្នាក់ដែលអ្នកស្គាល់បានឧស្សាហ៍ព្យាយាមក្នុងការធ្វើការល្អ ទោះជាអ្នកពុំបានទទួលពរជ័យភ្លាមៗក្ដីនោះ ? ( អ្នកក៏អាចពិចារណាក្នុងការចែកចាយបទពិសោធន៍មួយផងដែរ ) ។
សូមសង្ខេបកាឡាទី ៦:១១-១៨ដោយពន្យល់ថា ប៉ុលបានបញ្ចប់សំបុត្ររបស់លោកទៅកាន់ពួកបរិសុទ្ធនៅកាឡាទី ដោយប្រាប់ឡើងវិញថា សេចក្ដីសុខសាន្ដ និងក្ដីមេត្តាករុណារបស់ព្រះយេស៊ូវគ្រីស្ទ គឺកើតមានលើមនុស្សទាំងអស់ ដែលបានក្លាយជាសត្វលោកថ្មីតាមរយៈសេចក្ដីជំនឿទៅលើព្រះនាមទ្រង់ ។
សូមលើកទឹកចិត្តសិស្ស « កុំឲ្យយើងណាយចិត្តនឹងធ្វើការល្អឡើយ » (ខទី ៩) ហើយឲ្យគិតពិចារណាប្រកបដោយការអធិស្ឋានអំពីនរណា ដែលពួកគេអាចជួយឲ្យត្រឡប់មកកាន់មាគ៌ារបស់ព្រះអម្ចាស់វិញ ។ សូមអញ្ជើញពួកគេឲ្យធ្វើតាមការបំផុសគំនិត ដែលពួកគេទទួលបានមកពីព្រះវិញ្ញាណបរិសុទ្ធដោយឧស្សាហ៍ព្យាយាម ។
ចំណេះចំណានខគម្ពីរ—កាឡាទី៥:២២-២៣
ដើម្បីជួយសិស្សឲ្យទន្ទេញចាំកាឡាទី ៥:២២-២៣សូមអញ្ជើញសិស្សក្នុងថ្នាក់ឲ្យសូត្រវាមួយពាក្យម្ដងៗ ម្ដងម្នាក់ៗ ។ ឧទាហរណ៍ សិស្សទីមួយនឹងនិយាយថា « តែ » សិស្សទីពីរនិយាយថា « ឯ » សិស្សទីបីនឹងនិយាយថា « ផល » ជាដើម រហូតដល់ខទាំងពីរនេះត្រូវបានបញ្ចប់ ។ សូមកំណត់ម៉ោងសិស្ស ហើយឲ្យពួកគេព្យាយាមសូត្រវាជាច្រើនដង រហូតអស់ម៉ោងដែលកំណត់នោះ ។ នៅពេលដែលអ្នកធ្វើសកម្មភាពនេះម្តងហើយម្តងទៀត សូមគិតអំពីការឆ្លាស់វេណសិស្ស ដើម្បីឲ្យពួកគេនិយាយពាក្យខុសៗគ្នា ។ អ្នកក៏អាចផ្ដល់យោបល់ឲ្យសិស្សហាត់វា នៅពេលចាប់ផ្ដើមថ្នាក់ក្នុងរយៈពេលជាច្រើនថ្ងៃជាប់ៗគ្នា ដើម្បីឲ្យពួកគេអាចសូត្រវាក្នុងពេលកាន់តែខ្លីផងដែរ ។ បន្ទាប់ពីសិស្សបានស្ដាប់ឮបទគម្ពីរសូត្រឡើងវិញជាច្រើនដងហើយ សូមអញ្ជើញពួកគេឲ្យព្យាយាមសូត្រវាចេញមកពីការទន្ទេញចាំទៅដល់នរណាម្នាក់ ដែលអង្គុយនៅជិតពួកគេ ។