មេរៀនទី ១៣៣
ទីតុស
សេចក្តីផ្ដើម
នៅក្នុងសំបុត្ររបស់ប៉ុលទៅកាន់ទីតុស ដែលជាអ្នកដឹកនាំក្នុងមូលដ្ឋានម្នាក់របស់សាសនាចក្រនៅកោះក្រេត នោះប៉ុលបានដាស់តឿនគាត់ឲ្យប្រើគោលលទ្ធិត្រឹមត្រូវ ដើម្បីបង្រៀន និងកែតម្រូវអ្នកដទៃ ។ ប៉ុលក៏បានទូន្មានដល់ទីតុសឲ្យបង្រៀនដល់ពួកបរិសុទ្ធឲ្យធ្វើជាគំរូសុចរិត ឲ្យមានសង្ឃឹមចំពោះការប្រោសលោះតាមរយៈដង្វាយធួននៃព្រះយេស៊ូវគ្រីស្ទ និងបន្ដនៅក្នុងការធ្វើកិច្ចការល្អផងដែរ ។ (កំណត់ចំណាំ ៖ នៅក្នុងការរៀបចំសម្រាប់មេរៀននេះ វាអាចនឹងជាជំនួយដើម្បីរំឭកគោលការណ៍នានានៅគេហទំព័រseektruth.lds.org) ។
យោបល់សម្រាប់ការបង្រៀន
ទីតុស ១
ប៉ុលដាស់តឿនទីតុសឲ្យប្រើគោលលទ្ធិត្រឹមត្រូវដើម្បីបង្រៀន និងកែតម្រូវពួកបរិសុទ្ធ និងអ្នកដទៃទៀតនៅកោះក្រេត
សូមអញ្ជើញសិស្សឲ្យគិតអំពីគ្រាមួយ ពេលដែលពួកគេបានស្ដាប់ឮនរណាម្នាក់និយាយទាស់នឹងសាសនាចក្រ ឬទាស់នឹងគោលលទ្ធិសាសនាចក្រ ។
-
តើវិធីដ៏ត្រឹមត្រូវមួយដើម្បីការពារសាសនាចក្រ និងគោលលទ្ធិសាសនាចក្រ នៅពេលដែលមនុស្សម្នាក់និយាយទាស់នឹងសាសនាចក្រគឺជាអ្វី ?
សូមអញ្ជើញសិស្សឲ្យរកមើលសេចក្ដីពិត នៅពេលពួកគេសិក្សាគម្ពីរទីតុស ដែលអាចជួយពួកគេឲ្យដឹងអំពីរបៀបការពារសាសនាចក្រ និងគោលលទ្ធិសាសនាចក្រដោយត្រឹមត្រូវ នៅពេលនរណាម្នាក់និយាយទាស់នឹងសាសនាចក្រ ។
សូមអញ្ជើញសិស្សឲ្យរកមើលកោះក្រេតនៅក្នុងផែនទីព្រះគម្ពីរប៊ីប លេខ ១៣ « ដំណើរទាំងឡាយដែលសាវកប៉ុលទៅផ្សាយសាសនា » ។ ចូរពន្យល់ថា នៅជិតនឹងចុងបញ្ចប់នៃជីវិតរបស់ប៉ុល នោះប៉ុលបានសរសេរសំបុត្រមួយច្បាប់ទៅកាន់ទីតុស ដែលកំពុងបម្រើជាអ្នកដឹកនាំសាសនាចក្រនៅកោះក្រេត ។ ទីតុស ត្រូវបានផ្លាស់ប្រែចិត្តជឿដោយសារប៉ុលកាលពីប៉ុន្មានឆ្នាំមុន ហើយបន្ទាប់ពីបុណ្យជ្រមុជទឹករបស់គាត់ នោះគាត់បានបម្រើជាមួយប៉ុលនៅក្នុងកិច្ចការផ្សេងៗ ។ នៅក្នុងសំបុត្ររបស់លោក ប៉ុលបានលើកទឹកចិត្តដល់ទីតុស ហើយទូន្មានគាត់អំពីការហៅបម្រើរបស់គាត់ ។
សូមសង្ខេបទីតុស១:១–៦ដោយពន្យល់ថា ប៉ុលបានថ្លែងទីបន្ទាល់អំពីសេចក្ដីសង្ឃឹម ដែលគាត់មានចំពោះជីវិតអស់កល្បជានិច្ច ដោយសារតែការសន្យារបស់ព្រះនៅក្នុងជីវិតមុនជីវិតលើផែនដីរបស់យើង ។ ប៉ុលក៏បានពន្យល់ផងដែរថា លោកបានបញ្ជូនទីតុសទៅកោះក្រេត ដើម្បីរៀបចំសាសនាចក្រឲ្យមានសណ្ដាប់ធ្នាប់នៅទីនោះ ។ កាតព្វកិច្ចមួយរបស់ទីតុសគឺដើម្បីហៅបុរសៗឲ្យបម្រើជាប៊ីស្សព ។
សូមអញ្ជើញសិស្សឲ្យអានទីតុស ១:៧–៨ដោយស្ងាត់ស្ងៀម ហើយរកមើលចរិតលក្ខណៈដែលប៊ីស្សពម្នាក់គួរមាន ។ អ្នកអាចលើកទឹកចិត្តសិស្សឲ្យគូសចំណាំអ្វី ដែលពួកគេបានរកឃើញ ។
-
យោងតាមខគម្ពីរទាំងនេះ តើចរិតលក្ខណៈរបស់ប៊ីស្សពគួរតែមានអ្វីខ្លះ ? ( អ្នកអាចនឹងចាំបាច់ត្រូវពន្យល់ថាចិត្តរឹងទទឹងមានន័យថាចចេស ឬឆ្មើងឆ្មៃ ហើយពាក្យថា « ស៊ីសំណូក » សំដៅទៅលើប្រាក់ដែលបានទទួលដោយភាពមិនស្មោះត្រង់ ឬដោយមធ្យោបាយមិនសុចរិតផ្សេងទៀត ) ។
-
ហេតុអ្វីអ្នកគិតថា វាសំខាន់ដែលប៊ីស្សពគួរតែមានចរិតលក្ខណៈទាំងនេះ ?
សូមអញ្ជើញសិស្សម្នាក់ឲ្យអាន ទីតុស ១:៩ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលចរិតលក្ខណៈផ្សេងទៀតដែលប៊ីស្សពគួរតែមាន ។ ចូរពន្យល់ថា « សេចក្ដីបង្រៀនដ៏ត្រឹមត្រូវ » សំដៅទៅលើគោលលទ្ធិពិត ។
-
តើចរិតលក្ខណៈផ្សេងទៀតអ្វីខ្លះ ដែលប៊ីស្សពគួរតែមាន ?
-
តើអ្នកគិតថា « [ ទាំង ] កាន់ខ្ជាប់ » តាមព្រះបន្ទូលនៃព្រះ មានន័យដូចម្ដេច ?
-
យោងតាមខទី ៩ ហេតុអ្វីបានជាវាសំខាន់ចំពោះប៊ីស្សព ដើម្បីកាន់ខ្ជាប់តាមព្រះបន្ទូលនៃព្រះ ? ( ដើម្បីអាចប្រើគោលលទ្ធិពិត ដើម្បីលើកទឹកចិត្តអ្នកដទៃទៀតឲ្យរស់នៅតាមដំណឹងល្អ ហើយឆ្លើយបដិសេធនឹង « ពួកអ្នកដែលស្រដីទទឹង » ។ អ្នកដែលស្រដីទទឹង គឺជាមនុស្សម្នាក់ដែលនិយាយទាស់ ឬបដិសេធគំនិតមួយ [ នៅក្នុងករណីនេះ គឺនិយាយទាស់នឹងភាពពិតពេញលេញនៃដំណឹងល្អ ] ។ អ្នកដែលស្រដីទទឹង អាចជាសមាជិក និងមិនមែនជាសមាជិកនៃសាសនាចក្រ ) ។
-
ដូចជាប៊ីស្សពដែរ តើយើងអាចធ្វើអ្វីបានខ្លះ នៅពេលយើងកាន់ខ្ជាប់តាមព្រះបន្ទូលនៃព្រះ ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថា ពួកគេគួរស្គាល់គោលការណ៍ដូចខាងក្រោមនេះ ៖ នៅពេលយើងកាន់ខ្ជាប់តាមព្រះបន្ទូលនៃព្រះ នោះយើងនឹងអាចប្រើគោលលទ្ធិពិត ដើម្បីលើកទឹកចិត្តមនុស្សដទៃឲ្យរស់នៅតាមដំណឹងល្អនៃព្រះយេស៊ូវគ្រីស្ទ ហើយឆ្លើយបដិសេធចំពោះជនដែលទាស់នឹងវា ។ សូមសរសេរគោលការណ៍នេះនៅលើក្ដារខៀន ) ។
សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយប្រធាន ប៊យដ៏ ឃេ ផាកកឺ នៃកូរ៉ុមនៃពួកសាវកដប់ពីរនាក់ឲ្យឮៗ ៖ ចូរសុំឲ្យសិស្សក្នុងថ្នាក់ស្ដាប់រកមើលអំណាច ដែលគោលលទ្ធិពិតមាននៅក្នុងការជួយដល់បុគ្គលម្នាក់ៗរស់នៅតាមដំណឹងល្អនៃព្រះយេស៊ូវគ្រីស្ទ ។
« គោលលទ្ធិពិត ពេលត្រូវបានយល់ច្បាស់ វាកែប្រែឥរិយាបថ និង ចរិតរបស់មនុស្ស ។
« ការសិក្សាពីគោលលទ្ធិនៃដំណឹងល្អ នឹងកែលម្អឥរិយាបថបានលឿនជាងការសិក្សាពីឥរិយាបថ ដើម្បីកែលម្អឥរិយាបថទៅទៀត ។ …នោះហើយជាមូលហេតុ ដែលយើងសង្កត់ធ្ងន់ជាខ្លាំងទៅលើការសិក្សាពីគោលលទ្ធិទាំងឡាយនៃដំណឹងល្អ » ( « Little Children » Ensign ខែ វិច្ឆិកា ឆ្នាំ ១៩៨៦ ទំព័រ ១៧ ) ។
-
យោងតាមប្រធាន ផាកកឺ ហេតុអ្វីក៏វាសំខាន់ដើម្បីសិក្សា ហើយរៀនអំពីគោលលទ្ធិពិត ?
សូមបំបែកសិស្សជាក្រុម ដែលមានគ្នាពីរ ឬបីនាក់ ។ សូមអញ្ជើញក្រុមនីមួយៗឲ្យធ្វើការរួមគ្នាឆ្លើយនឹងសំណួរខាងក្រោម ហើយសរសេរចម្លើយរបស់ពួកគេនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ហេតុសិក្សាព្រះគម្ពីររបស់ពួកគេ ។ សូមគិតពីការសរសេរសំណួរនេះនៅលើក្ដារខៀន ។
-
តើយើងអាចធ្វើអ្វីខ្លះ ដើម្បីត្រៀមខ្លួនបង្រៀនគោលលទ្ធិពិត ដើម្បីយើងអាចលើកទឹកចិត្តដល់អ្នកដទៃឲ្យរស់នៅតាមដំណឹងល្អ ? ( សូមមើល អាលម៉ា ១៧:២–៤ ។
-
តើមានឧទាហរណ៍មួយចំនួនណាខ្លះ ចេញមកពីបទគម្ពីរអំពីគ្រាទាំងឡាយ នៅពេលដែលមាននរណាម្នាក់បង្រៀនគោលលទ្ធិពិតទៅមនុស្សម្នាក់ទៀត ដែលបង្ហាញពីការសង្ស័យ ឬកំហឹងចំពោះសាសនាចក្រ និងគោលលទ្ធិ ? ( សូមបញ្ចូលឧទាហរណ៍យ៉ាងហោចណាស់មួយ អំពីគ្រាដែលនរណាម្នាក់បានប្រែចិត្ត ដោយសារពួកគេត្រូវបានបង្រៀនអំពីគោលលទ្ធិពិត ) ។
-
តើនៅពេលណាដែលការរៀនពីគោលលទ្ធិពិតបានជួយបញ្ចុះបញ្ចូលអ្នក ឬនរណាម្នាក់ដែលអ្នកស្គាល់ឲ្យរស់នៅកាន់តែពេញលេញក្នុងដំណឹងល្អនៃព្រះយេស៊ូវគ្រីស្ទ ?
ក្រោយពីមានពេលគ្រប់គ្រាន់ហើយ សូមអញ្ជើញសិស្សបីបួននាក់ឲ្យប្រាប់ចម្លើយរបស់គេជាមួយនឹងសិស្សក្នុងថ្នាក់ ។ បន្ទាប់ពីពួកគេរៀបរាប់ហើយ ចូរពន្យល់ថា ខណៈដែលសេចក្ដីពិតអាចជួយយើងឲ្យលើកទឹកចិត្តដល់អ្នកដទៃឲ្យរស់នៅតាមដំណឹងល្អ ហើយបដិសេធអ្នកទាំងឡាយ ដែលជំទាស់នឹងសាសនាចក្រក្ដី ក៏ពុំមែនមនុស្សទាំងអស់នឹងទទួលយកសេចក្ដីពិតនោះទេ ។ ដោយសារតែបុគ្គលគ្រប់រូបមានសិទ្ធិសេរីភាព នោះពួកគេអាចជ្រើសរើសទទួលយក ឬក៏បដិសេធគោលលទ្ធិពិតរបស់ព្រះយេស៊ូវគ្រីស្ទ ។
សូមអញ្ជើញសិស្សឲ្យគិតអំពីវគ្គចំណេះចំណានខាងគោលលទ្ធិ ដែលពួកគេបានរៀនកន្លងមកនៅក្នុងឆ្នាំនេះ ។
-
តើវគ្គចំណេះចំណានខាងគោលលទ្ធិមួយណា ដែលអាចជួយលើកទឹកចិត្តដល់អ្នកដទៃ ឲ្យរស់នៅតាមដំណឹងល្អជាពិសេសនោះ ?
-
តើវគ្គចំណេះចំណានខាងគោលលទ្ធិមួយណា អាចជួយឆ្លើយបដិសេធនឹងអស់អ្នកដែលជំទាស់នឹងសាសនាចក្រ ?
សូមលើកទឹកចិត្តដល់សិស្សឲ្យបន្ដទន្ទេញចាំវគ្គបទគម្ពីរសំខាន់ៗ ដូច្នេះពួកគេនឹងត្រៀមខ្លួនដើម្បីបង្រៀនគោលលទ្ធិពិតដល់អ្នកដទៃ ។
ចូរសង្ខេបទីតុស ១:១០–១៦ដោយពន្យល់ថា ប៉ុលបានបង្រៀនទីតុសថា ប៊ីស្សពចាំបាច់ត្រូវពឹងផ្អែកទៅលើគោលលទ្ធិពិត ដោយសារមានអ្នកបោកបញ្ឆោត និងគ្រូក្លែងក្លាយជាច្រើននៅក្នុងចំណោមពួកគេ ។ លោកបានទូន្មានដល់ទីតុសឲ្យផ្ចាញ់ផ្ចាលដល់គ្រូបង្រៀនក្លែងក្លាយ ដើម្បីឲ្យពួកគេបោះបង់ចោលកំហុសឆ្គងរបស់ពួកគេ ហើយ « មានសេចក្ដីជំនឿត្រឹមត្រូវវិញ » ( ខទី ១៣ ) ។ ប៉ុលក៏បានពន្យល់ផងដែរថា អ្នកកខ្វក់ទាំងឡាយដែលអះអាងថា ពួកគេស្គាល់ព្រះ ប៉ុន្តែគេបានបដិសេធទ្រង់តាមកិច្ចការរបស់ពួកគេ ។
ទីតុស ២
ប៉ុលបានទូន្មានទីតុសឲ្យបង្រៀនពួកបរិសុទ្ធនៅកោះក្រេតឲ្យរស់នៅតាមគោលលទ្ធិពិត
សូមអញ្ជើញសិស្សម្នាក់ឲ្យអាន ទីតុស ២:១ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលនូវអ្វីផ្សេងទៀតដែលប៉ុលណែនាំដល់ ទីតុស ឲ្យធ្វើជាមួយនឹងគោលលទ្ធិពិត ។
-
តើប៉ុលបានណែនាំដល់ទីតុសឲ្យធ្វើអ្វីខ្លះទៀតជាមួយនឹងគោលលទ្ធិពិត ? ( បង្រៀនវាទៅដល់ពួកបរិសុទ្ធនៅកោះក្រេត ) ។
សូមសរសេរពាក្យខាងក្រោមនៅលើក្តារខៀន ៖ បុរស ស្ត្រី យុវនារីនិងយុវជន ។
សូមអញ្ជើញយុវនារីនៅក្នុងថ្នាក់ឲ្យអានទីតុស ២:៣–៥ដោយស្ងាត់ស្ងៀម ហើយរកមើលការទូន្មានរបស់ប៉ុល អំពីរបៀបដែលស្ត្រីវ័យចំណាស់គួររស់នៅ និងអ្វីដែលពួកគេគួរបង្រៀនដល់ស្ត្រីវ័យក្មេង ។ សូមអញ្ជើញយុវជនឲ្យអានទីតុស ២:២, ៦–៨ដោយស្ងាត់ស្ងៀម ហើយរកមើលការទូន្មានរបស់ប៉ុលអំពីរបៀបដែលបុរសចំណាស់ និងបុរសវ័យក្មេងគួររស់នៅតាម ។
កំណត់ចំណាំ ៖ ប្រសិនបើមានសំណួរលើកឡើងអំពីអត្ថន័យនៃស្ត្រីដែល « ចុះចូលចំពោះប្ដី » (ខ ៥) អ្នកអាចយោងទៅលើឯកសារនៅក្នុងមេរៀនសម្រាប់អេភេសូរ ៥–៦។
-
យោងតាមប៉ុល តើបុរសវ័យចំណាស់គួររស់នៅដោយរបៀបណា ? ចុះស្ត្រីវ័យចំណាស់វិញ ? រីឯស្ត្រីវ័យក្មេងវិញនោះ ? ហើយចុះបុរសវ័យក្មេងវិញនោះ ? ( សូមសរសេរចម្លើយរបស់សិស្សនៅលើក្ដារខៀនក្រោមក្បាលរឿងឆ្លើយឆ្លងគ្នា ឬសុំឲ្យសិស្សឡើងមកសរសេរចម្លើយរបស់ពួកគេនៅលើក្ដារខៀន ។ អ្នកអាចនឹងចាំបាច់ត្រូវជួយដល់សិស្សឲ្យយល់ពីអត្ថន័យនៃពាក្យមួយចំនួន ។ ឧទាហរណ៍ ពាក្យចិត្តធ្ងន់ធ្ងរ មានន័យថា ស្ងប់ស្ងាត់ ឬហ្មត់ចត់ ពាក្យដឹងខ្នាតមានន័យថា គ្រប់គ្រងលើខ្លួនឯង ហើយពាក្យមានចិត្តនឹងធឹងមានន័យថាប្រកបដោយការគោរព ) ។
-
តើឃ្លា « ត្រូវឲ្យអ្នកសំដែងខ្លួន ទុកជាគំរូពីការល្អគ្រប់ជំពូក » មានន័យយ៉ាងណា ? ( ខទី ៧ ) ។ ( ធ្វើជាគំរូល្អមួយក្នុងការរស់នៅតាមដំណឹងល្អ ) ។
-
អាស្រ័យទៅលើដំបូន្មានរបស់ប៉ុលទៅកាន់ទីតុស តើពួកអ្នកដើរតាមរបស់ព្រះយេស៊ូវគ្រីស្ទត្រូវធ្វើអ្វីខ្លះ ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថាពួកគេស្គាល់សេចក្ដីពិតដូចខាងក្រោមនេះ ៖ អ្នកដើរតាមព្រះយេស៊ូវគ្រីស្ទគួរធ្វើជាគំរូល្អដល់អ្នកដទៃ) ។
សូមអញ្ជើញសិស្សឲ្យគិតអំពីសមាជិកវ័យចំណាស់ក្នុងវួដ ឬសាខារបស់ពួកគេ ដែលបានធ្វើជាគំរូល្អក្នុងការរស់នៅតាមដំណឹងល្អ ហើយបានលះបង់ចំពោះដំណឹងល្អ ។ សូមអញ្ជើញសិស្សពីរបីនាក់ឲ្យចែកចាយអំពីមនុស្សម្នាក់ ដែលពួកគេគិតដល់ ហើយពន្យល់អំពីរបៀបដែលបុគ្គលម្នាក់នោះបានជួយពួកគេ ។
សូមអញ្ជើញសិស្សឲ្យជ្រើសរើសឥរិយាបទមួយ ដែលបានសរសេរនៅលើក្ដារខៀន ហើយរៀបចំគោលដៅមួយ ដើម្បីភ្ជាប់ឥរិយាបទនោះទៅក្នុងជីវិតរស់នៅរបស់ពួកគេឲ្យបានកាន់តែល្អប្រសើរ ដើម្បីឲ្យគំរូល្អរបស់ពួកគេអាចប្រទានពរដល់អ្នកដទៃ ។
សូមសង្ខេបទីតុស ២:៩–១០ដោយពន្យល់ថា ប៉ុលបានទូន្មានដល់ទីតុសឲ្យបង្រៀនដល់សមាជិកសាសនាចក្រ ដែលធ្វើការជាពួកអ្នកបម្រើឲ្យមានភាពស្មោះត្រង់ ហើយស្រុះស្រួលនៅក្នុងការទំនាក់ទំនងរបស់ពួកគេជាមួយនឹងចៅហ្វាយនាយរបស់ពួកគេ ។ តាមរយៈភាពស្មោះត្រង់ និងភាពស្រុះស្រួល នោះសមាជិកសាសនាចក្រទាំងនេះនឹងគោរពដល់ព្រះ ហើយធ្វើជាគំរូល្អដល់ពួកចៅហ្វាយនាយរបស់ពួកគេ ។
សូមអញ្ជើញសិស្សម្នាក់ឲ្យអាន ទីតុស ២:១១–១៥ ឲ្យឮៗ ។ ចូរសុំឲ្យសិស្សនេះ អានការបកប្រែដោយយ៉ូសែប ស្ម៊ីធ ទីតុស ២:១១ ) ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាតើព្រះគុណរបស់ព្រះមានអានុភាពដូចម្តេចខ្លះ ដល់មនុស្សទាំងអស់ ហើយរកមើលអ្វីដែលព្រះគ្រីស្ទបានធ្វើសម្រាប់យើងទាំងអស់គ្នា ។
-
តើព្រះគុណរបស់ព្រះបានមានអានុភាពដូចម្តេចខ្លះដល់មនុស្សទាំងអស់ ?
-
យោងតាមខទី ១២តើពួកបរិសុទ្ធគប្បីធ្វើអ្វីខ្លះ ដើម្បីទទួលបានព្រះគុណនៃព្រះ ?
-
តើយើងរៀនអ្វីខ្លះមកពីការបង្រៀនរបស់ប៉ុលនៅក្នុងខទី ១៤អំពីអ្វីដែលព្រះយេស៊ូវគ្រីស្ទបានធ្វើសម្រាប់យើង ? ( សិស្សគួររកឃើញសេចក្ដីពិតស្រដៀងគ្នាមួយនឹងសេចក្ដីពិតដូចខាងក្រោម ៖ ព្រះយេស៊ូវគ្រីស្ទបានលះបង់អង្គទ្រង់សម្រាប់យើង ដើម្បីទ្រង់អាចប្រោសលោះយើង ហើយធ្វើឲ្យយើងបានបរិសុទ្ធ ។ ចូរពិចារណាធ្វើការអញ្ជើញសិស្សឲ្យគូសចំណាំឃ្លានៅក្នុងខទី ១៤ដែលបង្រៀនពីសេចក្ដីពិតនេះ ) ។
សូមចង្អុលបង្ហាញថា « រាស្ត្ររបស់ផងទ្រង់ » (ខទី ១៤) សំដៅទៅលើរាស្ត្រដ៏ល្អ ដែលទ្រង់បានទិញ ឬបានប្រោសលោះ ( សូមមើលពេត្រុសទី ១:១៨–១៩,២:៩) និងអ្នកដែលចុះសេចក្ដីសញ្ញាដើម្បីរក្សាបទបញ្ញត្តិរបស់ទ្រង់ ( សូមមើលនិក្ខមនំ ១៩:៥–៦) ។
ទីតុស ៣
ប៉ុលបានប្រាប់ទីតុសអំពីអ្វីដែលពួកបរិសុទ្ធនៅកោះក្រេតត្រូវធ្វើ បន្ទាប់ពីពួកគេបានទទួលបុណ្យជ្រមុជទឹក
សូមសង្ខេបទីតុស ៣:១–២ដោយពន្យល់ថា ប៉ុលបានទូន្មានទីតុសឲ្យបង្រៀនពួកបរិសុទ្ធនៅកោះក្រេត ឲ្យគោរពតាមច្បាប់ដែនដី ហើយមានចិត្តទន់ភ្លន់ និងរាបសានៅក្នុងទំនាក់ទំនងរបស់ពួកគេជាមួយនឹងអ្នកដទៃ ។
សូមអញ្ជើញសិស្សជាច្រើននាក់ប្ដូរវេនគ្នាអានឲ្យឮៗចេញមកពី ទីតុស៣:៣–៨ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលនូវអ្វីដែលប៉ុលបាននិយាយអំពីរបៀបដែលដំណឹងល្អនៃព្រះយេស៊ូវគ្រីស្ទ បានផ្លាស់ប្ដូរគាត់ និងពួកបរិសុទ្ធនៅកោះក្រេត ។
-
យោងតាមខទី ៣តើប៉ុលបានពិពណ៌នាខ្លួនគាត់ និងសមាជិកសាសនាចក្រដទៃទៀតថាយ៉ាងដូចម្ដេច ពីមុនពេលពួកគេបានរៀនអំពីដំណឹងល្អនៃព្រះយេស៊ូវគ្រីស្ទ ?
-
យោងតាមខទី ៥–៦តើអ្វីខ្លះបានផ្លាស់ប្ដូរប្រជាជន ?
-
ស្របតាមខទី ៧តើមានអ្វីនឹងកើតឡើងចំពោះប្រជាជន ដែលជាលទ្ធផលមកពីការផ្លាស់ប្ដូរតាមរយៈព្រះគុណនៃព្រះយេស៊ូវគ្រីស្ទ ?
សូមអញ្ជើញសិស្សឲ្យគិតពិចារណាអំពីរបៀបដែលពួកគេបានផ្លាស់ប្ដូរ ដោយសារតែដំណឹងល្អនៃព្រះយេស៊ូវគ្រីស្ទ ។
-
យោងតាមខទី ៨តើប៉ុលបានទូន្មានឲ្យពួកបរិសុទ្ធធ្វើអ្វីខ្លះ បន្ទាប់ពីពួកគេបានផ្លាស់ប្ដូរ ហើយទទួលបុណ្យជ្រមុជទឹក ?
សូមសង្ខេបទីតុស ៣:៩–១៥ដោយពន្យល់ថា ប៉ុលបានផ្តល់ដំបូន្មានដល់ពួកបរិសុទ្ធឲ្យចៀសវាងពីការឈ្លោះប្រកែកជាមួយនឹងមនុស្សលាក់ពុត ។ ប៉ុលក៏បានស្នើសុំឲ្យទីតុសមកជួបនឹងលោកនៅខេត្តម៉ាសេដូន ។
សូមបញ្ចប់មេរៀនដោយថ្លែងទីបន្ទាល់អំពីសេចក្ដីពិត ដែលបានបង្ហាញនៅក្នុងមេរៀននេះ ។
សេចក្តីពន្យល់ និង ព័ត៌មានសាច់រឿង
ទីតុស ១–៣ ។ ធនធានសម្រាប់ការឆ្លើយតបនឹងសំណួរពិបាកៗ
« វាជាពុំមែនជារឿងចម្លែក ឬក៏គួរឲ្យគាប់ចិត្តដែរ ដែលសិស្សនៃដំណឹងល្អមានសំណួរអំពីគោលលទ្ធិនៃព្រះគ្រីស្ទ ប្រវត្តិសាស្ត្រ ឬជំហរលើបញ្ហាសង្គមនោះទេ ។ ប្រធាន ឌៀថើរ អេស្វ អុជដូហ្វ នៃគណៈប្រធានទីមួយបានទទួលស្គាល់ថា ‹ វាជារឿងធម្មតាដើម្បីមានសំណួរ ។ …មានសមាជិកសាសនាចក្រមួយចំនួន នៅពេលខ្លះ ពុំស្វិតស្វាញនឹងសំណួរធ្ងន់ធ្ងរ ឬសំណួរដែលប៉ះពាល់ដល់ចិត្តឡើយ » ( ‹ មកចូលរូមជាមួយយើង › Ensign ឬ លីអាហូណា ខែ វិច្ឆិកា ឆ្នាំ ២០១៣ ទំព័រ ២៣ ) ។ ដូច្នេះ វាមានសារៈសំខាន់ណាស់សម្រាប់គ្រូបង្រៀន ដើម្បីរៀនពីរបៀបឆ្លើយតបឲ្យបានសមស្របទៅនឹងសំណួររបស់សិស្ស ។ អែលឌើរ ផល វី ចនសុន នៃពួកចិតសិបនាក់ បានបង្រៀនថា ‹ វិធីសាស្ត្រដោះស្រាយរបស់យើងជាមួយសិស្សដែលមានការសង្ស័យ អាចសំខាន់ខ្លាំងណាស់ ក្នុងរបៀបដែលគេជ្រើសរើសដើម្បីឆ្លើយតប › ( ‹ លំនាំដើម្បីរៀននូវរឿងខាងវិញ្ញាណ › [ ការចាក់ផ្សាយតាមផ្កាយរណបសាសនានៃថ្នាក់សិក្ខាសាលា និងថ្នាក់វិទ្យាស្ថាន ថ្ងៃទី ៧ ខែ សីហា ឆ្នាំ ២០១២ ] ) ។ ពេលគ្រូបង្រៀនអនុវត្តការស្ដាប់ ការថ្លែងទីបន្ទាល់ ការអញ្ជើញ និងការតាមដាន នោះពួកគេកាន់តែអាចជួយសិស្សជាច្រើននាក់ឲ្យរក្សាសេចក្ដីជំនឿ និងឆ្លើយតបនឹងសំណួរទាំងឡាយរបស់គេ » (seektruth.lds.org) ។
ទីតុស២:១–១២ ។ ឥទ្ធិពលនៃ « សេចក្ដីបង្រៀនដ៏ត្រឹមត្រូវ »
អែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ បានបង្រៀនអំពីតម្លៃនៃការបង្រៀនគោលលទ្ធិនៃដំណឹងល្អ ៖
« គោលលទ្ធិ និងគោលការណ៍ដែលបានបង្រៀនយ៉ាងល្អ មានអានុភាពប្រកបដោយឥទ្ធិពលកាន់តែខ្លាំងទៅលើឥរិយាបទជាជាងច្បាប់នានា ។ នៅពេលយើងបង្រៀនគោលលទ្ធិ និងគោលការណ៍ទាំងឡាយនៃដំណឹងល្អ នោះយើងអាចសក្ដិសមដើម្បីជាសាក្សី និងទទួលបានការដឹកនាំពីព្រះវិញ្ញាណ ដើម្បីពង្រឹងដល់ការបង្រៀនរបស់យើង » (« Gospel Teaching »Ensignខែ វិច្ឆិកា ឆ្នាំ ១៩៩៩ ទំព័រ ៧៩ ) ។