Si Apostol Pablo mihisgut sa mga kasungian tali sa mga Santos nga taga-Corinto kabahin sa relihiyusong mga kustombre. Iyang gihatagan og gibug-aton nga ang mga lalaki ug babaye adunay mahangturon ug balaanong mga tahas ug mahinungdanon sa usag usa diha sa plano sa Ginoo. Mitudlo usab siya sa mga miyembro sa Simbahan kalabut sa husto nga pagpangandam alang sa sakrament.
Basaha ang mosunod nga mga pamahayag nga nagpakita kon unsay pagbati sa ubang mga tawo kalabut sa kaminyoon:
“Ang pagkamalampuson sa akong panarbaho importante kaayo kanako. Dili ko gustong mabahin ang akong pagtagad tali sa akong mga tumong sa pagpanarbaho ug sa kaminyoon.”
“Dili ko gusto nga mopasalig sa usa ka dugay nga pakigrelasyon. Nabalaka ako nga mohimo og desisyon nga ako unyang basulan.”
“Ang kaminyoon mohigut kanako. Dili na unya ko makahimo sa bisan unsa nga akong gustong buhaton.”
“Nasayud ko nga ang kaminyoon mao ang labing importante nga desisyon nga akong mahimo sukad, ug naghinam-hinam ako niini.”
Sa imong scripture study journal, irekord unsay imong pagbati mahitungod sa kaminyoon.
Sa 1 Mga Taga-Corinto 11 mas daghan pa kita og mabasa kalabut sa gisulat ni Apostol Pablo sa pagtubag sa mga kabalaka sa mga miyembro sa Simbahan sa Corinto. Basaha ang 1 Mga Taga-Corinto 11:3, nga mangita kon unsa ang gitudlo ni Pablo kabahin sa mga responsibilidad sa usa ka bana.
Ang mga pulong nga “ang ulo sa babaye mao ang iyang bana” nagpasabut nga ang bana adunay sagradong responsibilidad sa pagdumala diha sa panimalay. Ang pagdumala nagpasabut sa matarung nga pag-agak ug paggiya sa uban sa espiritwal ug temporal nga mga butang.
Tan-awa sa bersikulo 3 kon kinsa ang modumala ug mogiya sa bana samtang magdumala siya sa iyang pamilya. Nganong importante man alang sa usa ka bana ug amahan sa pagtan-aw ngadto ni Kristo isip iyang lider ug giya?
Samtang kita makasabut kon sa unsang paagi ang atong Langitnong Amahan nagdumala sa Iyang gingharian, kita makakita nga Siya Dios sa kahusay ug dili sa kagubot (tan-awa sa D&P 132: 8).
Sama sa narekord diha sa 1 Mga Taga-Corinto 11:4–16, si Pablo naghisgut kabahin sa mga pangutana sa mga Santos nga taga-Corinto mahitungod sa mga kostumbre sa mga lalaki ug mga babaye kon sila nag-ampo ug nanagna atol sa ilang mga tulumanon sa pagsimba. Kini nga mga kostumbre naglakip sa buhat sa mga babaye sa pagsul-ob og mga pandong sa ulo.
Ang mga mambabasa sa Bag-ong Tugon usahay masayop sa pagsabut sa mga pagtulun-an ni Pablo nga nag-ingon nga ang tahas sa lalaki mas importante kay sa tahas sa babaye. Si Elder M. Russell Ballard sa Korum sa Napulog Duha ka mga Apostoles mihatag og katin-awan niining sayop nga pagsabut:
Imahe
Elder M. Russell Ballard
“Ang mga lalaki ug mga babaye parehas sa mga mata sa Dios ug sa mga mata sa Simbahan, apan ang pagkaparehas wala magpasabut nga managsama ra sila. Ang mga responsibilidad ug balaang gasa sa mga lalaki ug mga babaye managlahi sa ilang matang apan dili sa importansya o sa impluwensya niini. Ang doktrina sa atong Simbahan nagbutang sa mga babaye nga parehas ra apan lahi gihapon sa mga lalaki. Wala isipa sa Dios nga ang lalaki mas importante kay sa babaye o ang babaye mas importante kay sa lalaki. …
Ang mga lalaki ug mga babaye managlahi og gasa, managlahi og kalig-on, ug managlahi og panglantaw ug mga hilig. Usa kana sa importanting mga hinungdan nganong nagkinahanglan kita sa usag usa” (“Ang mga Lalaki ug mga Babaye diha sa Buhat sa Ginoo,” Liahona, Abr. 2014, 48).
Basaha ang 1 Mga Taga-Corinto 11:11, nga mangita kon unsay gitudlo ni Pablo kabahin sa relasyon tali sa bana ug asawa. Ang mga pulong nga “diha sa Ginoo” nagpasabut sa plano sa Ginoo sa pagtabang kanato nga mamahimong sama Kaniya ug makaangkon og kinabuhing dayon.
Gikan sa 1 Mga Taga-Corinto 11:11 atong makat-unan ang mosunod nga kamatuoran: Diha sa plano sa Ginoo, ang mga lalaki ug mga babaye dili makaangkon og kinabuhing dayon kon wala ang usag usa (tan-awa usab sa D&P 131:1–4).
Ang kaminyoon tali sa usa ka lalaki ug sa usa ka babaye usa ka bahin sa plano sa Dios. Hunahunaa ang mosunod nga mga pangutana: Sa unsang paagi ang pagkahimong usa ka matarung nga amahan o inahan makapauswag sa plano sa Dios? Sa unsang paagi kana nga mas nakaandam kanato nga mamahimong sama sa atong Langitnong Amahan?
Imahe
scissors
Imahe
one blade of scissors
Hunahunaa kon unsaon paglihok sa gunting. Unsa ka maayo ang paggamit sa gunting kon ang mga sulab gibulag ug imong guntingon ang papel o panapton nga ang usa lang ka sulab ang gamiton? Sa unsang paagi ang usa ka parisan sa gunting mahimong sama sa usa ka bana ug asawa nga naningkamot nga makaangkon sa kinabuhing dayon?
Imahe
Elder David A. Bednar
Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles, nga mangita kon sa unsang paagi ang bana ug asawa gituyo nga magtambayayong aron makaangkon sa kinabuhing dayon: “Sa balaanong tuyo, lalaki ug babaye gituyo nga mouswag og dungan ngadto sa pagkahingpit ug kahingpitan sa himaya. Tungod sa ilang kalainan sa mga taras ug mga kapasidad ang mga lalaki ug babaye tagsa-tagsa nagdala ngadto sa relasyon sa kaminyoon og mga talagsa-ong panan-aw ug mga kasinatian. Ang lalaki ug ang babaye nagtampo og lahi apan parehas ngadto sa pagkausa ug panaghiusa nga dili mahimo sa laing paagi. Ang lalaki mokompleto ug mohingpit sa babaye ug ang babaye mokompleto ug mohingpit sa lalaki samtang sila nagkat-on ug naglig-on ug nagpanalangin sa usag usa” (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 52).
Sa imong scripture study journal, pagsulat mahitungod sa pipila ka lain-laing mga kinaiya ug mga responsibilidad sa mga lalaki ug babaye nga nagsuporta ug naglig-on sa usag usa diha sa pamilya.
Sa “Ang Pamilya: Usa ka Pamahayag ngadto sa Kalibutan,” ang Unang Kapangulohan ug ang Korum sa Napulog Duha ka mga Apostoles mideklarar: “Pinaagi sa balaan nga plano ang mga amahan mao ang mangulo sa ilang mga pamilya diha sa gugma ug sa pagkamatarung ug may kapangakohan sa pagsangkap sa mga kinahanglanon sa kinabuhi ug sa pagpanalipod alang sa ilang mga pamilya. Ang unang mga kapangakohan sa mga inahan mao ang pag-atiman sa ilang mga anak. Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban. Kakulangan, kamatayon, o laing mga kahimtang mahimong manginahanglan sa pagsagop o sa pag-usab niini nga mga kalihokan sa pag-amuma alang sa pamilya” (Ang Pamilya: Usa ka Pamahayag ngadto sa Kalibutan).
Hunahunaa ang nagkalain-lain nga mga panghunahuna kabahin sa kaminyoon nga gipasabut sa mga pamahayag nga imong nabasa diha sa sinugdanan sa leksyon. Dayon tubaga ang mosunod nga pangutana diha sa imong scripture study journal: Pagkahuman og tuon sa 1 Mga Taga-Corinto 11:1–16, unsaon man nimo pagtubag ang tawo nga wala makasabut sa kaimportante sa kaminyoon diha sa plano sa Dios?
Si Pablo nagtudlo sa mga Santos nga taga-Corinto sa dili pagbaliwala sa sakrament
Unsa ang moabut sa hunahuna kon imong basahon ang mosunod nga mga pulong?
“Usa ka tinuoray nga espiritwal nga kasinatian.”
“Usa ka pagbag-o sa kalag.”
“Ang labing nindot sa akong adlaw nga Igpapahulay.”
Pamalandungi ang imong labing bag-o nga kasinatian sa pag-ambit sa sakrament, ug hunahunaa kon kini nga mga pulong naghulagway ba sa imong kasinatian.
Samtang magtuon ka sa 1 Mga Taga-Corinto 11:17–34, pangita og mga kamatuoran nga makatabang kanimo sa paghimo sa pag-ambit sa sakrament nga usa ka mas espirituhanon ug makahuluganon nga kasinatian.
Sa panahon ni Pablo, ang mga miyembro sa Simbahan nagsunod og usa ka buhat nga susama sa Katapusang Panihapon. Sila matag karon ug unya magpundok aron mangaon og dungan ug dayon moambit sa sakrament. Si Apostol Pablo nanghimaraut sa mga panagpundok tungod kay ang mga Santos mihimo niini nga komon nga mga pagpangaon imbis nga ipadayon ang kasagrado nga kinahanglang magauban sa pag-ambit sa sakrament. Ang Hubad ni Joseph Smith nagklaro sa pamahayag ni Pablo kabahin sa katuyoan sa ilang panagtigum: “Sa dihang managtigum kamo, dili ba kini aron mokaon sa panihapon sa Ginoo?” (Joseph Smith Translation, 1 Mga Taga-Corinto 11:20).
Bisan tuod kini nga mga panagpundok gituyo aron sa pagpalambo sa pagpakigdait ug panaghiusa, kasagaran nahimo kini nga mga panaglalis. Sumala sa narekord diha sa 1 Mga Taga-Corinto 11:17–22, si Pablo nanghimaraut sa mga panagbingkil nga anaa tali sa mga Santos nga taga-Corinto panahon niini nga mga pagpangaon.
Basaha ang 1 Mga Taga-Corinto 11:23–26, nga mangita kon unsay giawhag ni Pablo nga hinumduman sa mga miyembro sa Simbahan kabahin sa sakrament. Sa Iningles ang pulong nga shew sa bersikulo 26 parehas ra sa pulong nga show og parehas ra ang paglitok. Apan ang Gresyanhon nga pulong nga maoy gihubad niini nagpasabut sa pagsangyaw, pagpahibalo, o pagpamatuod.
Imahe
Last Supper
Basaha ang 1 Mga Taga-Corinto 11:27–30, nga mangita sa pasidaan nga gihatag ni Pablo ngadto sa mga Santos sa Corinto mahitungod sa sakrament.
Gikan niini nga mga bersikulo atong makat-unan nga kadtong moambit sa sakrament nga dili takus nagdala og pagpanghimaraut ug tunglo sa ilang mga kaugalingon.
Kini nga kamatuoran gikumpirmar diha sa Basahon ni Mormon, diin si Jesukristo mipasidaan nga kadtong moambit sa sakrament nga dili takus, makakaon ug makainom sa tunglo sa ilang mga kalag (tan-awa sa 3 Nephi 18:29). Agig dugang, ang Manluluwas misulti sa mga lider sa priesthood nga sila kinahanglang dili motugot niadtong dili takus sa pag-ambit sa sakrament (tan-awa sa 3 Nephi 18:29). Kon duna kay pangutana sa imong katakus sa pag-ambit sa sakrament, kinahanglang makig-istorya ka sa imong bishop o branch president.
Sa 1 Mga Taga-Corinto 11:29, ang Gresyanhon nga pulong nga gihubad isip “hukom sa silot [panghimaraut]” mahimo usab nga “pagkasinilutan.” Ang pagkasinilutan nagpasabut nga “gisilutan nga sad-an sa Dios” (Giya ngadto sa mga Kasulatan, “Gisilutan, Pagkasinilutan,” scriptures.lds.org). Ang panghimaraut nagpasabut sa “kahimtang nga ipahunong ang pagpalambo sa usa ka tawo ug gidid-an sa pagsulod sa atubangan sa Dios ug sa Iyang himaya. Ang panghimaraut anaa sa nagkalain-lain nga mga ang-ang. Ang tanan nga dili makaangkon sa kahingpitan sa celestial nga kahimayaan mahimo nga sa pipila ka bahin kutohan sa ilang pag-uswag ug sa mga kahigayunan, ug sila mahimo nga panghimarauton ngadto niana nga bahin” (Giya ngadto sa mga Kasulatan, “Panghimaraut,” scriptures.lds.org).
Hinumdumi nga “ikaw dili kinahanglan nga perpekto aron makaambit sa sakrament, apan ikaw kinahanglan nga anaay espiritu sa pagkamapainubsanon ug paghinulsol diha sa imong kasingkasing” (Matinud-anon sa Tinuhoan: Usa ka Pakisayran sa Ebanghelyo [2004], 217). Kon kita moambit sa sakrament uban sa dili mahinulsulon nga kasingkasing ug walay tinguha sa paghinumdom ug pagsunod sa Manluluwas, kita nag-ambit sa sakrament nga dili takus.
Hunahunaa kon nganong ang pag-ambit sa sakrament nga dili takus makadala og panghimaraut sa atong mga kalag.
Basaha og balik ang 1 Mga Taga-Corinto 11:28, nga mangita kon unsay gitambag ni Pablo nga buhaton sa mga miyembro sa Simbahan samtang nag-ambit sa sakrament. Ikonsiderar ang pagmarka sa unsay imong makit-an.
Gikan niini nga bersikulo atong makat-unan nga kinahanglan natong susihon ang atong mga kinabuhi samtang moambit kita sa sakrament.
Sa unsang mga paagi kaha nga kinahanglan natong susihon ang atong mga kinabuhi?
Ang tuyo sa pagsusi sa atong mga kinabuhi dili lamang aron sa pagkonsiderar kon takus ba kita nga moambit sa sakrament apan usab sa pagkonsiderar kon unsa kita ka maayo nga naningkamot sa pagtuman sa atong mga pakigsaad uban sa Dios ug sa unsang paagi kita tingali magtinguha sa paghinulsol ug paglambo.
Basaha ang mosunod nga mga pamahayag, ug pagkonsiderar og mga paagi nga imong masusi ang imong kinabuhi samtang moambit ka sa sakrament.
Imahe
Presidente Howard W. Hunter
Naghulagway sa usa ka kasinatian nga iyang nasinati samtang nag-ambit sa sakrament, si Presidente Howard W. Hunter miingon: “Akong gipangutana ang akong kaugalingon niini: ‘Ako bang gikonsiderar ang Dios nga mas importante sa tanan ug gituman ang tanan Niyang mga sugo?’ Dayon namalandong ko ug nakakuha og tubag. Ang paghimo og pakigsaad ngadto sa Ginoo nga kanunayng motuman sa Iyang mga sugo usa ka seryuso nga obligasyon, ug ang pagbag-o niana nga pakigsaad pinaagi sa pag-ambit sa sakrament sama usab ka seryuso. Ang ligdong nga mga gutlo sa paghunahuna samtang gipaambit ang sakrament importante kaayo. Kini ang mga gutlo sa pagsusi sa kaugalingon, pagpamalandong, pag-ila sa kaugalingon—usa ka panahon sa pagpamalandong ug sa pagdesisyon” (“Thoughts On the Sacrament,” Ensign, Mayo 1977, 25).
Imahe
Tad R. Callister
Si Tad R. Callister, kinatibuk-ang presidente sa Sunday School, samtang sakop pa siya sa Seventy, mitudlo nga ang sakrament mao ang panahon sa pagpamalandong ug pagtimbang-timbang sa kaugalingon: “Ang sakrament mao ang … usa ka panahon sa lawom nga pagpamalandong ug pagsusi sa kaugalingon. … Ang sakrament mao ang panahon nga kita wala lamang maghinumdom sa Manluluwas, apan atong gitandi ang atong kinabuhi ngadto sa Halangdong Ehemplo [Jesukristo]. Mao kini ang panahon sa pagsalikway sa tanang pag-ilad sa kaugalingon; kini ang panahon sa hingpit nga balaanong kamatuoran. Tanan nga mga pagpangatarungan, tanang pagpakaaron-ingnon kinahanglang ihiklin, tugotan ang atong espiritu, kon unsa gayud kini, nga makighimamat espiritu ngadto sa Espiritu uban sa atong Amahan. Niining higayona kita mahimong atong kaugalingong maghuhukom, namalandong kon unsa gayud karon ang atong kinabuhi ug unsa gayud kini angay nga mamahimo” (The Infinite Atonement [2000], 291).
Usa ka paagi sa paggamit niini nga baruganan sa pagsusi sa atong mga kinabuhi samtang kita moambit sa sakrament mao ang paghunahuna og mga pangutana nga mahimo nimong ikonsiderar samtang nangandam ka sa pag-ambit sa sakrament. Sama pananglit, mahimo ka nga mangutana, “Unsaon man nako nga mahimong mas maayo nga disipulo ni Jesukristo?” “Sa unsang paagi ang akong kinabuhi nahisama sa kinabuhi sa Manluluwas? Sa unsang mga paagi kini wala mahisama?” “Unsa nga kahuyang ang akong gipanlimbasugan nga nagpugong kanako sa paglambo sa espirituhanong paagi?” “Unsay akong mabuhat karong semanaha aron mahimong mas maayo og gamay?”
Sa imong scripture study journal, paglista og pipila ka dugang nga mga pangutana nga imong ikapangutana sa kaugalingon sa dili pa ug atol sa sakrament.
Pagrekord diha sa imong scripture study journal og plano kon unsay imong buhaton aron mas andam alang sa imong sunod nga oportunidad sa pag-ambit sa sakrament.
Samtang imong susihon ang imong kinabuhi sa dili pa ug atol sa sakrament, ang Ginoo makatabang nimo nga mahibalo kon unsaon nimo nga mas matuman ang imong mga pakigsaad ug mahimong takus sa pagdawat sa mga panalangin nga Siya nagtinguha nga ihatag kanimo. Pasalig nga mosunod sa bisan unsa nga mga aghat nga imong madawat.
Sa 1 Mga Taga-Corinto 11:33–34 atong mabasa ang dugang nga giya ni Pablo ngadto sa mga Santos nga taga-Corinto kalabut sa ilang pagpangaon sa dihang nagtigum sila aron sa pag-ambit sa sakrament. Iyang gisultihan ang mga Santos sa paghunahuna sa usag usa ug sa paglikay sa panagbingkil.
Isulat ang mosunod sa ubos sa mga assignment karong adlawa diha sa imong scripture study journal: