Pasiuna sa Mga Taga-Filipos

Sa iyang Epistola ngadto sa Mga Taga-Filipos, si Apostol Pablo mihatag og pagdasig sa mga Santos sa Filipos ug miawhag kanila nga lig-ong maghiusa ug magtambayayong sa pagpanalipod sa pagtuo. Siguro usa sa labing importante nga mga baruganan nga gitudlo ni Pablo sa mga taga-Filipos mao nga ang pag-ampo ngadto sa Dios ug ang pagsalig Kaniya magdala og “kalinaw sa Dios, nga lapaw sa tanang pagpanabut” (Mga Taga-Filipos 4:7). Ang pagtuon sa mga mensahe ni Pablo bahin sa pagdasig dinhi niini nga epistola makatabang nimo sa imong mga paningkamot nga matinud-anong makalahutay hangtud sa katapusan. Samtang maningkamot ka sa pagsunod kang Kristo, makabaton ka usab og pagsalig ug, sama ni Pablo, mamahayag, “Mahimo ko ang tanang butang pinaagi kang Kristo nga nagapalig-on kanako” (Mga Taga-Filipos 4:13).

Bisan tuod nga si Timoteo nahisgutan kauban ni Pablo diha sa pangumusta sa epistola (tan-awa sa Mga Taga-Filipos 1:1), si Pablo ang misulat sa Epistola ngadto sa Mga Taga-Filipos. Gisuportahan kini pinaagi sa paggamit sa singular nga pronoun nga Ako sa tibuok nga sulat ug nagpasabut kang Timoteo diha sa Mga Taga-Filipos 2:19. Tingali si Timoteo nagsilbi nga escriba ni Pablo, nagsulat ubos sa mando ni Pablo.

Tingali gisulat ni Pablo ang Mga Taga-Filipos sa tunga-tunga sa A.D. 60 ug 62, samtang gibilanggo siya didto sa Roma (tan-awa sa Mga Taga-Filipos 1:7, 13, 16; tan-awa usab sa Mga Buhat 28:16–31; Giya ngadto sa mga Kasulatan, “Mga Taga-Filipos, Epistola ngadto sa,” scriptures.lds.org).

Ang Filipos mao ang unang dapit sa Europe diin pormal nga gisangyaw ni Pablo ang ebanghelyo ug miestablisar og usa ka branch sa Simbahan (tan-awa sa Mga Buhat 16:11–40; Bible Dictionary sa LDS nga English version sa Biblia, “Pauline Epistles”). Usa sa mga katuyoan ni Pablo sa pagsulat niini mao ang pagpahayag og pasalamat alang sa gugma ug pinansyal nga tabang nga gipadangat sa mga Santos didto sa Filipos ngadto kaniya atol sa iyang ikaduhang misyonaryo nga biyahe ug sa iyang pagkabilanggo didto sa Roma (tan-awa sa Mga Taga-Filipos 1:3–11; 4:10–19; tan-awa usab sa Bible Dictionary sa LDS nga English version sa Biblia, “Pauline Epistles”).

Gidayeg usab ni Pablo ang mga miyembro didto sa Filipos alang sa ilang hugot nga pagtuo kang Jesukristo ug mihatag kanila og tambag basi sa impormasyon bahin nila nga iyang nadawat gikan sa disipulo nga taga-Filipos nga ginganlan og Epafrodito (tan-awa sa Mga Taga-Filipos 4:18). Ang tambag ni Pablo naglakip sa pag-awhag nga magmapainubsanon ug maghiusa (tan-awa sa Mga Taga-Filipos 2:1–18; 4:2–3). Gipasidan-an usab ni Pablo ang mga taga-Filipos nga magbantay sa dautang mga Kristiyano, sama niadtong nagtudlo nga ang sirkunsisyon gikinahanglan alang sa pagkakabig. Ang maong mga indibidwal (nga kasagaran gipasabut isip mga Judaizer) sa sayop nga paagi miangkon nga ang bag-ong mga kinabig kinahanglang mopaubos sa kanhi nga balaod sa Daang Tugon nga sirkunsisyon sa dili pa mahimong Kristiyano (tan-awa sa Mga Taga-Filipos 3:2–3).

Ang Mga Taga-Filipos kasagaran gitawag nga epistola sa bilanggoan, kauban sa Mga Taga-Efeso, Mga Taga-Colosas, ug Filemon. Bisan pa man nga gisulat gikan sa bilanggoan, ang sulat ni Pablo ngadto sa mga taga-Filipos gihulagway sa mga iskolar nga mao ang labing malipayon sa iyang mga sinulat. Gipahayag ni Pablo ang pasalamat, gugma, ug pagsalig sa mga miyembro sa Simbahan; mihulagway sa mga sakripisyo nga iyang gihimo aron sa pagsunod kang Jesukristo; ug mimando sa mga Santos nga taga-Filipos diha sa mga baruganan sa matarung nga pagpuyo. Mahimong mailhan sa mga estudyante diha sa Mga Taga-Filipos 4:8 ang pipila ka pulong nga gigamit sa ika-trese nga artikulo sa hugot nga pagtuo, nga gisulat ni Propeta Joseph Smith.

Gihulagway ni Pablo sa balaknong paagi ang pagpaubos sa Manluluwas gikan sa premortal nga kabalaan ngadto sa mortal nga kinabuhi, diin Siya nag-antus “sa kamatayon diha sa krus” (tan-awa sa Mga Taga-Filipos 2:3–8). Kay natuman na man ang Iyang balaanong misyon, si Jesukristo nagbarug na karon nga nahimaya, ug moabut ang adlaw sa dihang “ang tanang tuhod magapiko” sa Iyang atubangan ug “ang tanang dila magasugid nga Ginoo si Jesukristo” (Mga Taga-Filipos 2:10–11). Gipadayag ni Pablo nga ang iyang tinubdan sa pagsalig ug kalig-on nagagikan ni Jesukristo (tan-awa sa Mga Taga-Filipos 4:13).

Mga Taga-Filipos 1. Mipahayag og pasalamat si Pablo alang sa pakigdait sa mga Santos nga taga-Filipos. Nagtudlo siya nga ang pagsupak nga iyang nasinati sa pagserbisyo sa Ginoo, lakip na ang iyang pagkabilanggo, nakapadayon sa kawsa sa ebanghelyo. Giawhag niya ang mga miyembro sa Simbahan nga lig-ong maghiusa sa pagpanalipod sa pagtuo.

Mga Taga-Filipos 2. Midugang pa sa pag-awhag si Pablo sa mga miyembro sa Simbahan nga maghiusa ug mitudlo ngadto sa ehemplo ni Jesukristo, kinsa mipaubos aron moanhi sa mortalidad, isip usa ka ehemplo sa gugma, pagkamasulundon, ug pagkamapainubsanon. Ang tanan sa umaabut nga adlaw moila kang Jesukristo isip Ginoo. Gimandoan ni Pablo ang mga miyembro sa Simbahan nga lihukon ang ilang kaugalingong kaluwasan.

Mga Taga-Filipos 3. Mipasidaan si Pablo bahin sa mga Judaizer. Iyang gihulagway ang kinabuhi niya sa una isip usa ka Pariseo ug kon unsa siya ka andam nga mibiya sa tanan aron mosunod kang Jesukristo. Iyang giawhag ang mga Santos nga sundon ang iyang ehemplo sa pagpadayon paingon sa kaluwasan. Gipasabut ni Pablo nga usabon ni Jesukristo ang atong mortal nga mga lawas ngadto sa mahimayaong mga lawas sama sa Iyang lawas.

Mga Taga-Filipos 4. Giawhag ni Pablo ang mga Santos nga kanunayng magmaya diha sa Ginoo. Iya silang giawhag nga pulihan ang ilang kabalaka og pag-ampo ug pagpasalamat, misaad nga matagamtam nila ang kalinaw sa Dios, nga molapaw sa tanang panabut. Gitambagan ni Pablo ang mga miyembro sa Simbahan sa paghunahuna sa mga butang nga matinuoron, makiangayon, tinuod, putli, matahum, maayo og dungog, ug mahiyason. Iyang giila nga iyang mabuhat ang tanang butang pinaagi ni Jesuristo, kinsa naglig-on kaniya.