Giawhag ni Apostol Pedro ang mga Santos nga mangandam kanunay sa pagpamatuod kang Jesukristo ug magpakabuhing matarung aron makaiway o makaabug sa mga pasangil nga gihimo batok kanila. Gitudlo niya nga si Jesukristo misangyaw sa ebanghelyo didto sa kalibutan sa mga espiritu human Siya mamatay. Gipahimangnoan usab ni Pedro ang mga elder sa Simbahan nga bantayan ang mga karnero sa Dios sa samang pag-amuma nga gihimo ni Jesukristo, ang Punoan nga Tigbalantay.
Gitambagan ni Pedro ang mga Santos nga maghiusa sa pagkamatarung ug mangandam kanunay sa pagpamatuod kang Kristo
Basaha ang mosunod nga istorya ni Presidente Thomas S. Monson:
Imahe
President Thomas S. Monson
“Makabaton kita og mga oportunidad sa tibuok natong kinabuhi sa pagpakigbahin sa atong mga gituohan, bisan tuod nga wala kita masayud sa kanunay kon kanus-a kita tawagon sa pagbuhat sa ingon. Ang maong oportunidad miabut kanako niadtong 1957, dihang nagtrabaho ko sa negosyo sa pagmantala [publishing business] ug gihangyo nga moadto sa Dallas, Texas, [USA,] nga kaniadto gitawag og ‘ang siyudad sa mga simbahan,’ aron mamulong sa kombensyon bahin sa negosyo. Human sa kombensyon, misuroy-suroy ko sakay sa bus libut sa sudlunon nga mga dapit sa siyudad. Sa pag-agi namo sa nagkalainlaing mga simbahan, ang among drayber mikomentaryo, ‘Dapit sa wala inyong makita ang simbahan sa Methodist’ o ‘Diha sa tuo mao ang katedral sa Katoliko.’
Sa pag-agi namo sa nindot nga pulang building nga hinimo sa brick nga nahimutang sa bungtod, miingon ang drayber, ‘Diha nga building magpundok ang mga Mormon.’ Usa ka babaye sa likod sa bus ang miingon, ‘Drayber, pwede mi nimong sultihan og dugang bahin sa mga Mormon?’
“Ang drayber mipahunong sa bus sa daplin sa karsada, milingi ug mitubag, ‘Day, ang ako ra gyung nahibaloan bahin sa mga Mormon mao nga magpundok sila nianang pulang building nga hinimo sa brick. Aduna bay usa dinhi sa bus nga nahibalo bahin sa mga Mormon?’” (“Magmaisugon sa Pagbarug nga Mag-inusara,” Ensign o Liahona, Nob. 2011, 67).
Kon ikaw sakay pa adto nga bus, unsa kaha ang imong himoon o isulti?
Sa unsang mga paagi kining matang sa oportunidad mohatag ninyog kahinam? Sa unsang mga paagi kini makahagit para kanimo?
Samtang imong tun-an ang 1 Pedro 3:1–17, pangita og baruganan nga makatabang nimo kon ang oportunidad anaa kanimo sa pagpakigbahin sa ebanghelyo ngadto sa uban.
Sa 1 Pedro 3:1–11 atong mabasa nga giawhag ni Apostol Pedro ang mga asawa nga tabangan ang dili motuo nilang mga bana sa pagduol kang Kristo pinaagi sa matarung nilang mga binuhatan. Gitambagan niya ang mga bana nga tahuron ang ilang mga asawa. Gitambagan usab niya ang mga miyembro nga “managkaduyog sa hunahuna” (1 Pedro 3:8) ug magpakabuhi sumala sa mga sumbanan sa ebanghelyo.
Basaha ang 1 Pedro 3:14–16, nga mangita kon unsay gitambag ni Pedro nga buhaton sa mga Santos kon makasugat sila og mga tawo nga dili motuo sa ilang mga gituohan o molutos kanila tungod sa ilang mga gituohan.
Ang pulong nga pagtubag diha sa bersikulo 15 mahubad usab nga “panalipud”. Gitambagan ni Pedro ang mga Santos nga ipakigbahin ug panalipdan ang ilang relihuyusong mga gituohan. Timan-i usab nga misugyot si Pedro nga buhaton nila kini uban sa kaaghup ug kahadlok. Ang kaaghup nagpasabut og kalumo, pagpaubos, ug pailub (tan-awa sa Giya ngadto sa mga Kasulatan, “Maaghup, Pagkamaaghup,” scriptures.lds.org). Ang pulong nga kahadlok nagpasabut nga balaang pagtahud o pagrespeto (tan-awa sa 1 Pedro 3:15).
Usa ka importante nga kamatuoran nga atong makat-unan gikan sa 1 Pedro 3:15 mao nga isip mga sumusunod ni Jesukristo, kita kinahanglang maningkamot nga maandam kanunay sa pagpakigbahin ug pagpanalipud sa atong gituohan uban sa kaaghup ug balaang pagtahud. Ikonsiderar ang pagsulat o pagtimaan niini nga kamatuoran diha sa imong mga kasulatan tupad sa 1 Pedro 3:15.
Basaha ang nahibilin sa istorya ni Presidente Monson mahitungod sa iyang kasinatian sa bus:
Imahe
President Thomas S. Monson
“Naghulat ko nga dunay motubag. Akong gitan-aw ang ekspresyon sa nawong sa matag tawo alang sa timailhan kon duna bay nahibalo, duna bay mokomentaryo. Wala. Akong naamguhan nga anaa ra kanako ang paghimo sama sa gisugyot ni Apostol Pedro, nga, ‘andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo.’ Naamguhan usab nako ang kamatuoran sa panultihon ‘Kon moabut ang panahon sa pagdesisyon, ang oras sa pagpangandam milabay na.’
“Sulod sa misunod nga 15 minutos o sobra pa, ako adunay pribilehiyo sa pagpakigbahin sa akong pagpamatuod niadtong anaa sa bus mahitungod sa Simbahan ug sa atong mga gituohan. Mapasalamaton ko sa akong pagpamatuod ug mapasalamaton nga andam ko sa pagpakigbahin niini” (“Magmaisugon sa Pagbarug nga Mag-inusara,” 67).
Tubaga ang duha o ang tanang pangutana diha sa imong scripture study journal:
Unsa man ang pipila ka mga butang nga imong mahimo aron kanunay kang maandam nga mopakigbahin sa imong mga gituohan?
Nganong importante man kaha ang pagpakigbahin sa imong mga gituohan uban sa kaaghup ug balaang pagtahud?
Kanus-a nimo napakigbahin ang imong mga gituohan o pagpamatuod ngadto sa uban?
Hunahunaa kon unsaon nimo sa pag-andam aron mapakigbahin ug makapanalipud ka sa imong mga gituohan. Lihuka ang bisan unsang mga pag-aghat nga imong madawat.
Gisangyaw ni Jesukristo ang ebanghelyo didto sa kalibutan sa mga espiritu human Siya mamatay
Hunahunaa nga ikaw usa ka full-time nga misyonaryo. Hunahunaa kon unsaon nimo sa pagtubag ang tawo nga moingon sa mosunod: “Mituo ko nga ang imong gitudlo nako tinuod, apan naghunahuna ko mahitungod sa mga tawo nga nangamatay nga wala mahatagi’g higayon sa pagpaminaw sa kamatuoran. Ingon og dili makiangayon nga silutan sila sa Dios o did-an sila sa pagpuyo uban Kaniya kon wala gayud sila mahatagi og higayon sa pagkat-on mahitungod sa Iyang plano sa kaluwasan.”
Basaha ang 1 Pedro 3:18–20, lakip ang Hubad ni Joseph Smith sa 1 Pedro 3:20. Dayon basaha ang 1 Pedro 4:5–6, lakip ang hubad ni Joseph Smith sa 1 Pedro 4:6. Samtang magbasa ka, pangitaa ang mga kamatuoran nga gitudlo ni Pedro nga imong ikapakigbahin sa tawo nga gihisgutan sa ibabaw sa mao nga sitwasyon. Ang “bilanggoan sa mga espiritu” diha sa 1 Pedro 3:19 nagpasabut niadtong naa sa kalibutan sa mga espiritu kinsa wala modawat o walay oportunidad nga mabati kini samtang naa sa mortalidad.
Unsay atong nakat-unan gikan niini nga mga bersikulo mahitungod niadtong anaa sa kalibutan sa espiritu kinsa wala modawat sa ebanghelyo o walay oportunidad nga madawat kini niini nga kinabuhi?
Imahe
President Joseph F. Smith
Presidente Joseph F. Smith
Si Presidente Joseph F. Smith namalandong sa kahulugan sa 1 Pedro 3:18–20 ug 1 Pedro 4:6 dihang nakadawat siya og pagpadayag nga naghatag og katin-awan sa mga doktrina mahitungod sa kalibutan sa mga espiritu. Kini nga pagpadayag narekord isip ang Doktrina ug mga Pakigsaad 138. Nakita ni Presidente Smith nga si Jesukristo, sa tunga-tungang panahon sa Iyang pagkamatay ug Pagkabanhaw, misangyaw sa ebanghelyo ug sa personal gialagaran ang matarung nga mga espritu didto sa kalibutan sa mga espiritu. Giorganisar dayon ni Jesukristo ug gihatagan og awtoridad ang matarung nga mga sulugoon sa pagtudlo sa ebanghelyo ngadto sa mga espiritu nga naa sa bilanggoan sa mga espiritu (tan-awa sa D&P 138:1–12, 18–19, 27–30).
Sumala sa 1 Pedro 4:6, nganong ang ebanghelyo gisangyaw man ngadto sa mga patay na?
Ang kamatuoran nga atong makat-unan gikan niini nga bersikulo mao nga ang ebanghelyo isangyaw ngadto sa mga patay na aron makabaton sila og sama nga oportunidad niadtong nakabati na sa ebanghelyo dinhi sa mortalidad. (Timan-i nga ang 1 Pedro 4:6 usa ka scripture mastery passage. Mahimo nimo kining markahan sa lahi nga paagi, aron dali ra nimo kining mapangita sa umaabut.)
Ribyuha ang mga sitwasyon nga imong gilista diha sa sinugdanan niini nga leksyon. Diha sa imong scripture study journal, isulat unsaon nimo sa paggamit ang 1 Pedro 4:6 aron matubag ang sitwasyon nga imong gibasa. Ilakip ang imong mga pagbati kon sa unsang paagi ang doktrina sa kaluwasan alang sa mga patay usa ka ebidensya sa kalooy sa Dios ug kamapuanguron para sa Iyang mga anak.
Sa 1 Pedro 4:7–19 atong mabasa nga giawhag ni Pedro ang mga Santos sa pagbaton og mainitong gugma nga putli tungod kay ang gugmang putli manalipud, o mopugong, og daghang mga sala. Ang buot niyang ipasabut mao ang moabut nga “magasilaob nga kalisdanan” (1 Pedro 4:12) nga sagubangon sa mga Santos, ug gitudloan niya ang mga Santos sa pagmaya kon nag-antus sila og mga pagsulay ug pagpanglutos tungod sa ilang pagtuo kang Jesukristo.
Isulat ang mga pulong gikan sa 1 Pedro 4:6 sa usa ka gamayng card o papel. Sa pikas kilid isulat ang unsay imong mahimo aron matabangan ang imong mga katigulangan kinsa nakadawat sa ebanghelyo didto sa kalibutan sa mga espiritu ug naghulat aron makagawas sa bilanggoan sa espiritu. Diha sa imong scripture study journal, isulat nga imong nakompleto kini nga bahin sa assignment. Sa mosunod nga semana, buhata ang pagmemorya sa 1 Pedro 4:6 pinaagi sa pagsag-ulo niini matag buntag ug gabii sa dili ka pa mohimo sa imong personal nga pag-ampo. Ribyuha usab unsay imong gisulat mahitungod sa mga paagi unsaon nimo nga makaapil sa buhat sa kaluwasan alang sa imong mga katigulangan.
Gitambagan ni Pedro ang mga elder nga bantayan ang mga panon sa Dios ug awhagon ang mga Santos nga magpabiling lig-on diha sa pagtuo
Aron maandam ang mga Santos sa mga pagsulay nga ilang masinati, gitudloan ni Apostol Pablo ang mga elder sa Simbahan mahitungod sa ilang mga responsibilidad isip mga lider sa Simbahan. Basaha ang 1 Pedro 5:1–3, nga mangita sa tambag ni Pedro ngadto sa mga elder sa Simbahan.
Ang “tagda ninyo ang panon sa Dios” (bersikulo 2) nagpasabut nga atimanon ug bantayan ang mga miyembro sa Simbahan. Gitudlo ni Pedro nga ang mga miyembro sa Simbahan kinahanglang andam nga moserbisyo inubanan sa gugma kay sa inubanan sa pagpanuko o paghunahuna og ganti. Kinahanglan nga mahimo silang mga ehemplo sa mga miyembro imbis “hinari-hari” (bersikulo 3) nga pagdumala kanila.
Usa ka kamatuoran nga gitudlo niini nga mga bersikulo mao nga ang mga lider sa Simbahan dunay responsibilidad sa pag-atiman ug pagbantay sa mga panon sa Dios uban sa gugma ug ehemplo.
Basaha ang 1 Pedro 5:4, nga mangita kon giunsa ni Pedro sa pag-refer ngadto sa Manluluwas.
Imahe
Christ holding lamb
Unsa nga Kristohanong mga kalidad ug kinaiya ang makatabang sa mga lider sa Simbahan sa pagbantay ug pag-atiman sa mga miyembro sa Simbahan?
Kanus-a kamo napanalanginan tungod sa Kristohanong paghigugma o ehemplo sa usa ka lider sa Simbahan?
Kon kamo motahud, mosalig, ug mosunod sa mga lider sa Simbahan nga gitawag sa Ginoo, motabang sila sa pagbantay ug pag-atiman kanimo sa espirituhanong paagi.
Sa 1 Pedro 5:5–14, gitudloan ni Pedro ang mga Santos nga tahuron ang mga tigulang, nga itugyan ang ilang mga kaugalingon ngadto kang Jesukristo, ug magpabiling lig-on sa ilang pagtuo, bisan sa mga kasakit. Gipaniguro ni Pedro nga kon ila kining buhaton, ang Ginoo mohingpit ug molig-on kanila.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 1 Pedro 3-5 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: