2 Juan–3 Juan

Si Apostol Juan mipasidaan sa mga Santos kabahin sa mga tawo nga manglingla ug magsangyaw nga si Kristo wala moanhi sa mortalidad diha sa pisikal nga lawas. Siya usab midayeg kang Gayo, usa ka miyembro sa Simbahan, tungod sa iyang pagkamatinud-anon.

Paghunahuna og usa ka inila nga atleta. Unsa kaha ang buhaton niini nga atleta aron magpabilin ang labing maayong panglawas aron maayo kaayo ang mahimo?

Imahe

soccer ball and player

Unsa kaha ang mahitabo kon kini nga atleta, human maningkamot nga mamaayo ang panglawas, mihunong sa pagpraktis ug misugod sa pagkaon og junk food, pagsige og tan-aw sa TV, pagsige og dula og mga video game, ug sa paggamit sa mga butang nga makadaot sa lawas?

Hunahunaa kon sa unsang paagi ang buhat nga kinahanglang buhaton sa malampuson nga mga atleta aron sa pagpreserbar sa ilang labing maayong pisikal nga kondisyon matandi ngadto sa buhat nga angay buhaton sa mga miyembro sa Simbahan aron sa pagpreserbar sa mga panalangin nga ilang naangkon pinaagi sa ebanghelyo. Samtang imong tun-an ang 2 Juan, pangita og usa ka baruganan nga makatabang kanimo sa pagpreserbar sa mga panalangin nga imong naangkon isip miyembro sa Simbahan.

Sumala sa narekord diha sa 2 Juan 1:1–4, si Apostol Juan misugod niini nga sulat pinaagi sa pagpamulong ngadto sa “pinili nga senyora ug sa iyang mga anak”, nga tingali usa ka direkta nga pagpamulong ngadto sa usa ka babaye nga miyembro sa Simbahan ug iyang mga anak o sinimbolo nga pinulongan sa paghulagway og usa ka kongregasyon sa Simbahan.

Basaha ang 2 Juan 1:5–6, nga mangita sa sugo nga gipahinumdom ni Juan sa mga Santos.

Basaha ang 2 Juan 1:7, nga mangita kon nganong mitambag si Juan sa mga miyembro sa Simbahan nga “managgawi … subay” (2 Juan 1:6), o motuman, sa mga sugo sa Dios.

Unsa ang gitudlo sa mga limbongan ug mga antikristo?

Sa dihang si Juan mihimo niini nga sulat, usa ka pilosopiya nga nailhan isip Docetism nag-anam kainila. Ang mga Docetist mituo nga ang Dios nahimaya pag-ayo nga Siya dili makasinati og pag-antus, kamatayon, o bisan unsang mortal nga kasinatian. Busa, sila mihukom nga si Jesukristo, isip ang Anak sa Dios, wala gayud moanhi nga adunay pisikal nga lawas apan ang Iyang espiritu mora og (ang kahulugan sa usa ka Gresyanhon nga pulong diin gikuha ang docetism) sa pagbuhat sa mga butang nga buhaton o sination sa usa ka mortal.

Unsa ang pipila ka mga ehemplo sa sayop nga mga pagtulun-an sa atong panahon nga misukwahi sa mga kamatuoran sa ebanghelyo?

Nganong kuyaw man sa espirituhanong paagi kini nga mga pagtulun-an?

Basaha ang 2 Juan 1:8, nga mangita kon unsay gitambag ni Juan nga buhaton sa mga miyembro sa Simbahan tungod niining sayop nga mga pagtulun-an. Ang “bantayi ninyo ang inyong mga kaugalingon” nagpasabut nga magmabinantayon o magmainampingon nga dili mosagup sa sayop nga mga pagtulun-an. Ang gihagoan nagpasabut nga gibuhat, o gitrabahoan ug nadawat.

Usa ka baruganan nga atong makat-unan gikan sa 2 Juan 1:6–8 mao nga kon kita mosunod sa mga sugo sa Dios ug magmabinantayon, kita makapadayon sa pagtagamtam sa mga panalangin sa ebanghelyo nga atong nadawat.

1. Tubaga ang mosunod diha sa imong scripture study journal:

   1. Ilista ang mga panalangin sa ebanghelyo nga imong nadawat ug gilauman nga madawat.

   2. Nganong kinahanglan man nga magpadayon kita sa pagsunod sa mga sugo sa Dios ug pagsunod sa ebanghelyo aron maangkon ug padayon nga matagamtam ang mga panalangin sa ebanghelyo nga atong nadawat?

Basaha ang 2 Juan 1:9, nga mangita kon unsay gitudlo ni Juan nga mahitabo niadtong nagpabilin, o nagpadayon, diha sa doktrina ni Kristo. Ang doktrina ni Kristo mao ang pagbaton og hugot nga pagtuo, maghinulsol, magpabunyag, modawat sa gasa sa Espiritu Santo pinaagi sa tawo nga adunay tukmang awtoridad sa priesthood, ug molahutay hangtud sa katapusan (tan-awa sa 2 Nephi 31:15–21).

Usa ka kamatuoran nga atong makat-unan gikan sa 2 Juan 1:9 mao nga kon kita magpabilin diha sa doktrina ni Kristo, ang Amahan ug Anak magauban kanato.

Usa ka paagi nga ang Amahan ug Anak magauban kanato mao ang pinaagi sa pagpakig-uban sa Espiritu Santo.

Pamalandungi ang duha ka mga kamatuoran nga gipaila niini nga leksyon. Kumusta na ang imong mga paningkamot sa pagtuman sa mga sugo sa Dios, sa pagmabinantayon, ug sa pagpabilin diha sa ebanghelyo? Unsa nga mga panalangin sa ebanghelyo ang gusto nimong matagamtam karon ug sa umaabut? Unsay imong buhaton karon aron mas matinud-anong mosunod sa mga sugo ug magpabilin diha sa doktrina ni Kristo?

Sumala sa narekord diha sa 2 Juan 1:10–13, si Juan miawhag sa mga Santos sa paglikay sa mga tawo nga nagpakatap og sayop nga doktrina. Siya usab mipahayag sa iyang tinguha nga personal nga mobisita sa mga Santos nga iyang gisulatan.

Unsay mahitabo sa ibabaw sa tubig kon adunay motandog niini? Posible ba ang pagtandog sa tubig nga dili makaapekto niini? Sa unsang paagi ang pagtandog sa ibabaw sa tubig sama sa pagsunod sa ebanghelyo?

Imahe

ripples in water

Diha sa 3 Juan, si Apostol Juan namulong ngadto sa usa ka matinud-anong miyembro sa Simbahan nga ginganlan og Gayo. Basaha ang 3 Juan 1:1–4, nga mangita kon sa unsang paagi si Juan naapektohan sa pagkamatinud-anon ni Gayo sa pagsunod sa ebanghelyo. Ang mga pulong nga mga anak diha sa bersikulo 4 mahimong nagpasabut sa mga miyembro sa Simbahan nga gitabangan ni Juan nga makabig ngadto sa ebanghelyo.

Basi sa paagi nga si Juan naapektuhan sa pagkamatinud-anon ni Gayo, unsa nga kamatuoran ang atong mahibaloan gikan sa 3 Juan 1:1–4 mahitungod kon sa unsang paagi ang pagsunod sa ebanghelyo makaapekto sa atong kaugalingon ug sa uban?

2. Paghunahuna og higayon nga mibati ka og hingpit nga kalipay tungod kay nakakita ka sa mga paningkamot sa laing tawo sa pagsunod sa ebanghelyo. Sa imong scripture study journal o sa laing piraso nga papel, paghimo og sulat nga nagpasalamat nianang tawhana alang sa iyang mga paningkamot sa pagsunod sa ebanghelyo, ug ipasabut kon sa unsang paagi ang iyang pagkamatinud-anon nakaapekto kanimo. Kon himoon nimo ang sulat sa laing piraso nga papel, paghimo og mubo nga summary sa sulat diha sa imong scripture study journal. Ikonsiderar ang paghatag sa sulat ngadto sa tawo nga imong gisulatan.

Paghunahuna og usa ka higayon sa dihang nakadungog ka nga namulong sa usa ka miting sa Simbahan o kinatibuk-ang komperensya ang usa ka lider sa Simbahan o misyonaryo nga wala nimo mailhi. Usahay matintal kita nga dili ra kaayo hatagan og pagtagad o pagtahud ang ubang mga lider o mga magtutudlo sa Simbahan kon dili kita pamilyar kanila.

Basaha ang 3 Juan 1:5–8, nga mangita kon unsay gibuhat ni Gayo nga nakapahimuot ni Juan. Ang gihisgutan nga mga igsoon ug mga dumuloong diha sa bersikulo 5 nagpasabut ngadto sa nanagbiyahe nga mga magtutudlo o mga misyonaryo nga dili pamilyar si Gayo.

Si Juan misulat usab kabahin sa usa ka lokal nga lider sa Simbahan nga ginganlan og Diotrefes, kinsa wala mahimuot si Juan. Basaha ang 3 Juan 1:9–10, nga mangita kon nganong wala mahimuot si Juan kaniya.

Si Diotrefes nahimong masinupakon ug mihimo og personal nga apostasiya. Usa ka kamatuoran nga atong makat-unan gikan sa maayong ehemplo ni Gayo ug sa dili maayong ehemplo ni Diotrefes mao kining mosunod: ang mga miyembro sa Simbahan kinahanglang modawat ug mosuporta sa tanan nga mga sulugoon sa Ginoo.

3. Sa imong scripture study journal, pagsulat og pipila ka mga paagi nga atong “alimahan” (3 Juan 1:8) ang mga sulugoon sa Ginoo.

Pangita og mga oportunidad sa paggamit sa nahisgutan nga kamatuoran pinaagi sa pagdawat ug pagsuporta sa lokal ug kinatibuk-ang mga lider sa Simbahan.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 2 Juan–3 Juan ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: