Si Apostol Pablo mipadayon sa pagtudlo sa mga Santos sa Corinto kabahin sa Pagkabanhaw. Siya nagmaya diha sa kadaugan ni Kristo batok sa kamatayon. Si Pablo miawhag usab sa mga miyembro sa Simbahan sa Corinto sa paghatag og ubay-ubay nga mga donasyon alang sa timawa nga mga Santos nga nagpuyo sa Jerusalem.
Nakahunahuna ka ba kon sa unsang paagi nga lahi ang imong kinabuhi kon wala ka pa motuo sa kinabuhi human sa kamatayon? Sa unsang paagi kaha mopili sa pagpuyo ang mga tawo kon wala sila motuo nga mabuhi sila pag-usab human sila mamatay?
Sa 1 Mga Taga-Corinto 15:1–29 atong makat-unan nga si Apostol Pablo mikorihir sa sayop nga tinuohan sa ubang mga Santos nga taga-Corinto nga walay pagkabanhaw sa mga patay. Sa 1 Mga Taga-Corinto 15:30–34 atong mabasa nga si Pablo mihangyo sa mga Santos sa pagkonsiderar ngano nga ang usa ka tawo kinsa mituo ni Jesukristo molahutay sa pagpanggukod ug moatubang og posibleng kamatayon kon wala pay pagkabanhaw. Mipasidaan usab siya sa mga Santos nga dili magpalingla sa kinaiya sa mga tawo nga moingon, “Mangaon ug manag-inom kita; kay ugma mga patay na kita”(1 Mga Taga-Corinto 15:32), nga nagpahayag sa sayop nga tinuohan nga makahimo kita sa unsay atong gusto tungod kay wala nay kinabuhi human sa kamatayon ug, busa, walay balaan nga paghukom.
Tungod kay ang Pagkabanhaw tinuod, nganong kuyaw man ang pagdawat niini nga kinaiya?
Samtang magtuon ka sa nahibilin sa 1 Mga Taga-Corinto 15, pangita og mga kamatuoran nga makatabang kanimo nga makasabut kon sa unsang paagi ang pagkaadunay kahibalo sa Pagkabanhaw makaimpluwensya sa imong mga pagpili dinhi sa pagkamortal.
Basaha ang 1 Mga Taga-Corinto 15:35, nga mangita sa posibleng mga pangutana sa mga tawo kabahin sa Pagkabanhaw.
Diha sa 1 Mga Taga-Corinto 15:36–38 atong makat-unan nga si Pablo mitabang sa pagtubag niini nga mga pangutana pinaagi sa paggamit sa usa ka liso nga morepresentar sa mortal nga lawas, diin—human sa kamatayon ug paglubong diha sa yuta—mobangon sa Pagkabanhaw.
Imahe
drawings, sun, moon, stars
Ikonsiderar kon unsaon nimo paghulagway ang kalainan tali sa gikusgon sa kahayag nga namugna sa adlaw kon itandi sa gikusgon sa kahayag gikan sa buwan. Unsa ang kahayag sa buwan kon itandi sa kahayag sa mga bitoon?
Basaha ang 1 Mga Taga-Corinto 15:39–42, nga mangita kon giunsa paggamit ni Pablo ang kahayag sa adlaw, bulan, ug mga bitoon aron sa pagpasabut sa kalainan sa nabanhaw nga mga lawas. Basaha usab ang Hubad ni Joseph Smith sa 1 Mga Taga-Corinto 15:40 (sa Giya ngadto sa mga Kasulatan, scriptures.lds.org). Niini nga kinatibuk-ang kahulugan ang pulong nga himaya mahimong magpasabut sa kahayag, katahum, o kasanag. (Timan-i nga ang 1 Mga Taga-Corinto 15:40–42 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)
Usa ka kamatuoran nga gitudlo ni Apostol Pablo niini nga mga bersikulo mao nga adunay lain-laing mga ang-ang sa himaya alang sa nabanhaw nga mga lawas. Sa laing pagkasulti, ang ubang nabanhaw nga mga lawas adunay mas labaw nga kasanag ug katahum kay sa uban.
Basaha ang mosunod nga pamahayag ni Presidente Joseph Fielding Smith, nga mangita kon sa unsang paagi ang nagkalain-lain nga mga himaya sa nabanhaw nga mga lawas lahi gikan sa usag usa. (Sa dihang si Presidente Smith mihisgut sa “celestial nga mga lawas”, siya nagpasabut niadtong makaangkon sa kinatas-an nga ang-ang sa himaya sa celestial nga gingharian [tan-awa sa D&P 131:1–4].)
Imahe
President Joseph Fielding Smith
“Sa pagkabanhaw adunay lain-laing matang sa mga lawas; dili tanan managsama. Ang lawas nga madawat sa tawo motino sa iyang lugar pagkahuman niini. Adunay mga lawas nga celestial, mga lawas nga terrestrial, ug mga lawas nga telestial. …
“… Ang pipila makaangkon og mga lawas nga celestial uban sa tanang gahum sa kahimayaan ug mahangturon nga pagsanay. Kini nga mga lawas mosanag sama sa adlaw sama sa lawas sa atong Manluluwas. … Kadtong mosulod sa terrestrial nga gingharian makaangkon og mga lawas nga terrestrial, ug dili sila mosanag sama sa adlaw, apan sila mas mahimayaon kay sa mga lawas niadong makadawat sa telestial nga himaya” (Doctrines of Salvation, comp. Bruce R. McConkie, 3 vols. [1954–56], 2:286–87).
Timan-i nga si Presidente Smith mipasabut nga ang himaya o lawas nga atong madawat sa Pagkabanhaw motino sa gingharian diin kita mopuyo.
Imahe
drawings, sun, moon, stars with light
Ang “gahum sa kahimayaan” nga gipasabut ni Presidente Smith naglakip sa abilidad nga makapuyo sa matang sa kinabuhi nga gipuy-an sa Dios, ug ang “mahangturon nga pagsanay” mao ang abilidad sa pagpadayon sa pagbaton og mga anak sa kahangturan. Kini nga mga panalangin anaa lamang niadtong nahimaya diha sa kinatas-an nga ang-ang sa celestial nga gingharian (tan-awa sa D&P 131:1–4; 132:19–20).
Basaha ang Doktrina ug mga Pakigsaad 88:21–22, nga mangita kon unsay kinahanglan natong buhaton aron makadawat og celestial nga lawas kon kita mabanhaw. Ang “pagsunod sa balaod sa celestial nga gingharian” (bersikulo 22) nagpasabut sa pagdawat sa tanang mga ordinansa ug sa paghimo ug pagtuman sa tanan nga mga pakigsaad nga gikinahanglan aron makasulod sa celestial nga gingharian.
Sa imong scripture study journal, isulat kon sa unsang paagi ang pagkasayud mahitungod sa himaya ug mga panalangin nga maanaa lamang sa nabanhaw nga mga binuhat diha sa kinatas-an nga ang-ang sa celestial nga gingharian makaapekto sa mga pagpili nga buhaton sa usa ka tawo sa pagkamortal.
Sama sa narekord diha sa 1 Mga Taga-Corinto 15:42–52, si Pablo dugang nga mipatin-aw kon sama sa unsa ang nabanhaw nga lawas. Iyang gipasabut ang usa ka mortal nga lawas isip “lawasnon” (mga bersikulo 44, 46) ug madunot ra, ug iyang gipasabut ang usa ka nabanhaw nga lawas isip “espirituhanon” (mga bersikulo 44, 46) ug “dili na madunot” (bersikulo 52).
Itudlo ang unsay imong nakat-unan kabahin sa kalainan tali sa mga nabanhaw nga lawas ngadto sa usa ka sakop sa pamilya o higala. Gamita kini nga scripture mastery passage (1 Mga Taga-Corinto 15:40–42) samtang magtudlo ka. Human nimo og tudlo, hangyoa ang tawo nga imong gitudloan nga mopakigbahin sa bisan unsa nga mahimo niyang madugang sa unsay imong gitudlo. Ipakigbahin ang imong pagpamatuod kabahin sa Pagkabanhaw ngadto sa tawo nga imong gitudloan. Sa imong scripture study journal, irekord unsay imong nakat-unan gikan sa imong kasinatian.
Si Pablo nalipay sa kadaugan ni Jesukristo batok sa kamatayon
Lingini ang mosunod nga mga kondisyon nga gusto nimo nga masinati:
Sakit
Gutom
Kasakit
Walay sakit
Walay kagutom
Walay kasakit
Basaha ang 1 Mga Taga-Corinto 15:53, nga mangita sa doktrina nga gitudlo ni Pablo kabahin sa kahimtang sa atong mga lawas kon kita mabanhaw.
Gikan niini nga bersikulo atong makat-unan nga kita mabanhaw sa dili madunot ug imortal nga kahimtang. Ang atong nabanhaw nga mga lawas dili madunot, nagpasabut nga dili na gayud kini mamatay o makasinati og sakit, o kasakit. Kini nga kahibalo nagtabang kanato nga makasabut nga ang atong mga kabalaka mahitungod sa kamatayon “gilamoy” (1 Mga Taga-Corinto 15:54) sa paglaum sa mahimayaong pagkabanhaw.
Paghunahuna og panahon nga ikaw o imong kaila napaakan og usa ka insekto. Unsa kaha ang labing sakit nga matang sa ikot [paak]?
Sa unsang paagi ang pisikal nga kamatayon “moikot,” o daw nagmadaugon batok kanato?
Sa unsang paagi ang ikot sa pisikal nga kamatayon “gilamoy diha sa kadaugan” (1 Mga Taga-Corinto 15:54) pinaagi ni Jesukristo?
Usa ka kamatuoran nga atong makat-unan gikan niini nga mga bersikulo mao nga ang pisikal nga kamatayon dili magmadaugon batok kanato tungod sa Pagkabanhaw ni Jesukristo.
Basaha ang 1 Mga Taga-Corinto 15:57–58, nga mangita kon unsay gitudlo ni Pablo nga makatangtang sa ikot sa kamatayon.
Ang kadaugan ni Jesus mao ang Iyang Pag-ula, nga pinaagi niini Iyang gibuntog ang sala ug pisikal nga kamatayon. Sumala sa bersikulo 58, unsay gidapit ni Pablo nga buhaton sa iyang mga mambabasa tungod sa kadaugan ni Jesukristo batok sa kamatayon?
Usa ka kamatuoran nga atong makat-unan gikan sa 1 Mga Taga-Corinto 15:56–58 mao ang mosunod: Kon kita makanunayon ug dili matarug sa pagsunod sa ebanghelyo, ang ikot sa kamatayon nga gikan sa sala matangtang pinaagi sa Pag-ula ni Jesukristo.
Tubaga ang mosunod nga mga pangutana diha sa imong scripture study journal:
“Unsay gipasabut nga mahimong makanunayon ug dili matarug sa pagsunod sa ebanghelyo?
Unsay papel sa paghinulsol diha sa pagkahimong makanunayon ug dili matarug?
Diha sa 1 Mga Taga-Corinto 15:30–58 atong mabasa ang mga pagtulun-an ni Apostol Pablo kabahin sa Pagkabanhaw ug sa iyang argumento batok sa pilosopiya niadtong nagtudlo nga walay pagkabanhaw. Nagtuo sila nga makabuhat kita sa bisan unsay atong gusto tungod kay “ugma mga patay na kita” (1 Mga Taga-Corinto 15:32), ug tungod kay sila nagtuo nga walay pagkabanhaw, sila nagtuo nga walay paghukom. Sa imong scripture study journal, gamita ang unsay imong nakat-unan niini nga leksyon aron sa pagpasabut nganong sayop kini nga pilosopiya.
Ikonsiderar unsay imong buhaton aron mopuyo nga mas matarung aron ang ikot sa kamatayon matangtang ug makadawat kamo og usa ka mahimayaong pagkabanhaw sa umaabut. Pagsulat og usa ka tumong kalabut sa usa ka butang nga imong mabuhat aron mahimong mas makanunayon ug dili matarug sa pagsunod sa ebanghelyo. Ikonsiderar ang pagpakigbahin sa unsay imong gisulat ngadto sa usa ka tawo kinsa sa imong hunahuna makabenepisyo gikan sa pagpaminaw sa imong pagpamatuod.
Si Pablo nag-organisar og pagpangolekta og kwarta alang sa mga kabus nga nagpuyo sa Jerusalem
Diha sa 1 Mga Taga-Corinto 16:1–24 atong mabasa nga si Apostol Pablo mitudlo sa mga Santos nga taga-Corinto sa pagtabang og atiman sa mga kabus nga anaa sa Jerusalem, sa “pagbarug nga malig-on sa inyong pagtuo” (bersikulo 13), ug sa pagbuhat sa tanan nga mga butang “uban sa gugma” (bersikulo 14).
Isulat ang mosunod sa ubos sa mga assignment karong adlawa diha sa imong scripture study journal: