Si Apostol Pablo miawhag sa mga Santos sa Filipos nga magtinabangay sa pagsunod sa ebanghelyo ni Jesukristo. Gitambagan niya sila nga sundon ang ehemplo sa Manluluwas sa pagkamapainubsanon ug walay paghunahuna sa kaugalingon, ug nagtudlo siya nga ang Dios nagtrabaho diha sa sulod kanila aron sila maluwas. Gihulagway ni Pablo ang mga sakripisyo nga iyang gihimo aron mosunod ni Jesukristo.
Gihulagway ni Pablo ang mga panalangin nga moabut tungod sa kalisdanan
Unsa nga mga pulong ang inyong magamit aron ibutang diha sa mga blangko sa mosunod nga pamahayag ni Presidente Brigham Young?
Imahe
President Brigham Young
“Sa matag higayon nga inyong patiran ang ‘Mormonismo’ gipatiran ninyo kini ____________________; wala kamo niini magpatid ____________________. Ang Ginoo nga Makagagahum maoy nagbuot niini” (Mga Pagtulun-an sa mga Presidente sa Simbahan: Brigham Young [1997], 307).
(Madiskubrihan nimo ang mga tubag sa dili madugay dinhi nga leksyon.)
Unsa ang ubang mga ehemplo, gikan sa kasaysayan o gikan sa atong panahon, bahin sa mga tawo nga mipatid, o misupak, sa Simbahan sa Manluluwas ug sa Iyang mga sumusunod?
Samtang magtuon ka sa Mga Taga-Filipos 1, pangitaa ang kamatuoran nga makatabang nga masabtan nimo kon sa unsang paagi nga ang pagsupak makaapekto sa buhat sa Ginoo.
Pangitaa ang Filipos diha sa nag-uban nga mapa nga nagpakita sa misyonaryo nga mga panaw ni Apostol Pablo.
Giestablisar ni Pablo ang usa ka branch sa Simbahan didto sa Filipos atol sa iyang ikaduhang misyonaryo nga panaw (tan-awa sa Mga Buhat 16). Sa wala madugay gisulat niya ang iyang epistola ngadto sa mga taga-Filipos, samtang nabilanggo siya, posible didto sa Roma. Diha sa Mga Taga-Filipos 1:1–11, atong mabasa nga mipahayag og pasalamat ug gugma si Pablo alang sa mga Santos nga taga-Filipos.
Basaha ang Mga Taga-Filipos 1:12–14, nga mangita kon unsay miresulta gikan sa pagsupak nga nasinati ni Pablo atol sa iyang misyonaryo nga mga paningkamot.
Sama sa gihulagway niini nga mga bersikulo, ang pagsupak nga nasinati ni Pablo miresulta “sa pagpauswag [pagpalambo] sa maayong balita” (Mga Taga-Filipos 1:12). Ang mga tawo sa tibuok “pritoryo,” o punoang buhatan sa kasundalohan, nasayud nga nabilanggo si Pablo tungod sa pagsangyaw bahin ni Jesukristo. Ang pagkabilanggo ni Pablo nakapadasig usab sa ubang mga miyembro sa Simbahan nga mas maisugon sa pagsangyaw sa ebanghelyo.
Gikan sa Mga Taga-Filipos 1:12–14 atong makat-unan nga ang pagsupak nga atong masinati sa pagsunod ni Jesukristo makatabang sa pagpadayon sa Iyang buhat.
Diha sa pamahayag ni Presidente Young, butangi ang mga blangko og mga pulong nga pataas (nga nagpasabut og pagpadayon niini nga konteksto) ug paubos.
Hunahunaa nga ikaw usa ka manunulat alang sa usa ka blog o pamantalaan. Sa imong scripture study journal, pagsulat og mga headline alang sa duha o tulo ka tinuod nga mga sitwasyon diin ang pagsupak nakatabang sa pagpadayon sa buhat sa Manluluwas. Kini nga mga istorya mahimong magagikan sa mga kasulatan o gikan sa kinabuhi sa mga tawo nga imong nailhan. (Ang mosunod usa ka ehemplo sa headline: “Mga pagprotesta batok sa misyonaryo nga buhat nakapalambo sa interes sa mga tawo nga magkat-on bahin sa mensahe sa ebanghelyo gikan sa lokal nga mga misyonaryo.”)
Sama sa narekord diha sa Mga Taga-Filipos 1:15–26, nagtudlo si Pablo nga bisan unsa pa ang mahitabo kaniya magapasidungog kini sa Manluluwas.
Basaha ang Mga Taga-Filipos 1:27–30, nga mangita sa unsay giawhag ni Pablo nga buhaton sa mga Santos sa Filipos alang sa ebanghelyo. Hinumdumi nga ang pulong nga paggawi diha sa bersikulo 27 nagpasabut sa pagpahigayon.
Sa Joseph Smith Translation, ang Mga Taga-Filipos 1:28 mabasa, “Ug nga dili kamo palisang sa bisan unsa pinaagi sa inyong mga kaaway, kinsa misalikway sa maayong balita, nga nagdala diha kanila og pagkalaglag; apan kaninyo nga midawat sa maayong balita, kaluwasan; ug kini gikan sa Dios” .
Hibaloi diha sa Mga Taga-Filipos 1:27–30 kon unsay masinati sa mga miyembro sa Simbahan alang sa Manluluwas. Ikonsiderar kon sa unsang paagi nga ang mga Santos nga taga-Filipos mapanalanginan unta pinaagi sa paghinumdom nga ang pagsupak nga ilang nasinati sa pagsunod ni Jesukristo makatabang sa pagpadayon sa Iyang buhat.
Nagtudlo si Pablo bahin sa pagpaubos sa Manluluwas ug nagtudlo sa mga Santos kalabut sa ilang kaluwasan
Basaha ang Mga Taga-Filipos 2:2–4, nga mangita sa unsay tambag ni Apostol Pablo ngadto sa mga Santos nga taga-Filipos. Diha sa bersikulo 3 ang mga pulong nga kawang pagpagarbo sa kaugalingon nagpasabut og kagarboso ug ang mga pulong nga “pagpaubos sa kasingkasing” nagpasabut og pagkamapainubsanon.
Basaha ang Mga Taga-Filipos 2:5–9, ug ikonsiderar ang pagmarka o pagsulat sa mga pulong nga nagpakita sa pagkamapainubsanon ug walay paghunahuna sa kaugalingon ni Jesukristo.
Atong makat-unan ang mosunod nga baruganan gikan sa mga pagtulun-an ni Pablo niining mga bersikulo: Kon mosunod kita sa ehemplo ni Jesukristo sa pagkamapainubsanon ug sa pagpakabana alang sa uban nga walay paghunahuna sa kaugalingon, nan mahimo kita nga mas magkahiusa.
Tubaga ang mosunod nga mga pangutana diha sa imong scripture study journal:
Unsa ang ubang mga paagi diin makasunod kita sa ehemplo sa Manluluwas sa pagkamapainubsanon ug walay paghunahuna sa kaugalingon diha sa atong mga pamilya, mga eskwelahan, ug mga ward o mga branch?
Kanus-a ka nakakita og mga tawo nga naghunahuna sa mga panginahanglan sa uban una ang ilang kaugalingon? Sa unsang paagi nga kining mga paningkamot nakapalambo og panaghiusa?
Sama sa narekord diha sa Mga Taga-Filipos 2:9–11, nagtudlo si Pablo nga sa katapusan “tanang tuhod magapiko” ug “tanang dila magasugid nga Ginoo si Jesukristo.” Paggahin og panahon sa pag-visualize niana nga gutlo, ug paghunahuna kon unsay imong gilauman bahin niining kasinatian nganha kanimo.
Basaha ang Mga Taga-Filipos 2:12–13, nga mangita sa unsay gitambag ni Pablo nga buhaton sa mga taga-Filipos nga makapahimo sa ilang kasinatian sa pagyukbo sa atubangan sa Ginoo aron magmalipayon. Ang mga pulong nga “kahadlok ug pagkurog” diha sa bersikulo 12 nagpasabut sa talagsaon nga balaang pagtahud ug pagmaya (tan-awa sa Salmo 2:11; Giya ngadto sa mga Kasulatan, “Kahadlok,” scriptures.lds.org).
Ang ubang mga tawo masayop sa pagsabut sa instruksyon ni Pablo nga “panlimbasugi ninyo ang inyong kaugalingong kaluwasan” (Mga Taga-Filipos 2:12) nga nagpasabut nga maluwas kita tungod sa atong kaugalingong mga binuhatan. Maluwas lamang kita pinaagi sa Pag-ula ni Jesukristo. Hinoon, kinahanglan natong matubag ang mga gikinahanglan alang sa kaluwasan, nga gihatag sa Dios (tan-awa sa Mga Artikulo sa Hugot nga Pagtuo 1:3–4). Sama sa narekord diha sa Mga Taga-Filipos 2:13, nagtudlo si Pablo nga motabang ang Dios niadtong naningkamot sa pagtubag sa mga gikinahanglan alang sa kaluwasan pinaagi sa pagtabang kanila sa “pagtinguha,” ug sa pagtuman sa “iyang kaugalingong kahimuot,” o sa Iyang mga sugo.
Gikan sa Mga Taga-Filipos 2:12–13 atong makat-unan nga ang Dios motabang kanato sa pagtinguha ug sa pagbuhat kon unsay gikinahanglan kanato alang sa kaluwasan, nga nahimong posible pinaagi sa Pag-ula ni Jesukristo. Ikonsiderar ang pagsulat niining kamatuoran diha sa imong mga kasulatan.
Pinaagi sa impluwensya sa Espiritu Santo, makatabang ang Dios kanato nga mausab ug malimpyo ang atong mga tinguha aron ganahan kita nga mosunod Kaniya (tan-awa sa Mosiah 5:2). Kanus-a man nimo gibati nga giusab sa Dios ang imong kasingkasing aron ganahan ka nga mosunod Kaniya? Giunsa man Niya sa pagtabang kanimo aron mas matinud-anong mosunod sa Iyang mga sugo?
Sama sa narekord diha sa Mga Taga-Filipos 2:14–30, gipahinumduman ni Pablo ang mga Santos nga sila “nagasidlak ingon nga mga kahayag dinhi sa kalibutan” (Mga Taga-Filipos 2:15) ug gisultihan sila nga mopadala siya og mga mensahero aron mahibalo sa ilang kahimtang.
Gihulagway ni Pablo ang mga sakripisyo nga iyang gihimo aron mosunod ni Jesukristo
Unsang butanga nga nagrepresentar sa unsay imong gimithi nga giisip usab sa kalibutan nga bililhon (sama sa usa ka butang nga nagrepresentar sa pamilya, mga higala, edukasyon, pagkaon, teknolohiya, o katigayunan)?
Unsa may andam nimong itugyan alang niining bililhong kabtangan?
Samtang magtuon ka sa Mga Taga-Filipos 3, pangitaa ang unsay gitugyan ni Pablo aron makaangkon og ganti nga madawat usab nato.
Sama sa narekord diha sa Mga Taga-Filipos 3:1–2, gipasidan-an ni Pablo ang mga miyembro sa Simbahan didto sa Filipos bahin sa dautang mga magtutudlo (“mga iro”) kinsa nangangkon nga ang mga kinabig sa Simbahan kinahanglang mosubay sa piho nga mga buluhaton sa mga Judeo, lakip na ang sirkunsisyon (“nanagpamutol og unod”). Diha sa Mga Taga-Filipos 3:3 nagtudlo siya nga kadtong “nagasimba sa Dios diha sa espiritu, ug nagapasigarbo kang Kristo Jesus” mao “ang sirkunsisyon,” o mga katawhan sa pakigsaad sa Dios.
Basaha ang Mga Taga-Filipos 3:4–6, nga mangita sa unsay gisulti ni Pablo bahin sa iyang panulundon sa pagka-Judeo.
Hinumdumi ang mga bentaha sa sosyal ug sa relihiyon nga kausa naangkon ni Pablo sa katilingban nga Judeo. Dunay siyay kaliwat nga Israelite, usa siya ka Pariseo, madasigon siya alang sa Judaism, ug higpit siya nga misunod sa balaod sa relihiyon sa pagka-Judeo.
Basaha ang Mga Taga-Filipos 3:7–11, ug ikonsiderar ang pagmarka o pagsulat sa mga pulong nga nagpakita kon unsay tan-aw ni Pablo sa mga bentaha nga kausa iyang naangkon sa katilingban nga Judeo.
Andam si Pablo nga “napildihan sa tanang butang” (Mga Taga-Filipos 3:8) aron makaila siya ni Jesukristo; “makaplagan diha kaniya” (Mga Taga-Filipos 3:9), o maanaa sa usa ka relasyon sa pakigsaad uban Kaniya; mahatagan og kaangayan pinaagi sa -pagtuo diha Kaniya; mag-antus alang Kaniya; ug mahimong kabahin “sa pagkabanhaw sa makiangayon,” o sa matarung (Joseph Smith Translation, Philippians 3:11 [sa Philippians 3:11, footnote a]).
Basaha ang Mga Taga-Filipos 3:12–14, nga mangita sa unsay giila ni Pablo bahin sa iyang espirituhanong pag-uswag. Hinumdumi nga ang pulong nga mahimong dinhi niini nga konteksto nagpasabut og aron makabaton.
Imbis nga magtutok kon unsay iyang gibiyaan, nagpadayon si Pablo aron makabaton “sa ganti nga mao ang langitnong pagtawag sa Dios” (Mga Taga-Filipos 3:14), nga mao ang kinabuhing dayon. Kompletuha ang mosunod nga baruganan base sa unsay atong makat-unan gikan sa ehemplo ni Pablo: Kon kita , nan makaila kita Kaniya ug makabaton og kinabuhing dayon.
Misaysay si Presidente Gordon B. Hinckley bahin sa paghimamat sa usa ka opisyal sa navy nga naggikan sa laing nasud ngadto sa Estados Unidos alang sa advanced training ug kinsa mipasakop sa Simbahan atol sa iyang pag-istar sa Estados Unidos. Hunahunaa kon unsay andam nga itugyan nianang batan-ong lalaki aron mosunod ni Jesukristo.
Imahe
President Gordon B. Hinckley
“Gipaila-ila siya nako sa wala pa siya mobalik sa iyang yutang natawhan. … Miingon ko: ‘Ang imong katawhan dili mga Kristiyano. Unsa ang mahitabo kon ikaw mopauli sa inyo nga usa ka Kristiyano, ug ilabi na, usa ka Mormon nga Kristiyano?’
“Ang iyang nawong naminghoy, ug siya mitubag, ‘Ang akong pamilya masagmuyo. Mahimo nga ila kong isalikway ug isipon nga patay. Alang sa akong kaugmaon ug sa akong trabaho, ang tanan nga oportunidad mahimo nga dili ihatag kanako.’
“Nangutana ako, ‘Andam ka ba nga mobayad sa ingon ka dako nga bugti alang sa ebanghelyo?’
“Ang iyang itumon nga mga mata, nga naumog sa mga luha, misanag gikan sa iyang gwapo nga tabunong nawong samtang siya mitubag, ‘Tinuod kini, dili ba?’
“Naulaw nga nakapangutana niana, mitubag ko, ‘Oo, tinuod kini.’
“Diin siya mitubag, ‘Nan unsa pay lain nga kinahanglan?’” (“It’s True, Isn’t It?” Ensign, Hulyo 1993, 2).
Tubaga ang mosunod nga mga pangutana diha sa imong scripture study journal:
Unsa may natugyan nimo (o sa usa ka tawo nga imong nailhan) aron mosunod sa Manluluwas?
Nganong ang mga bugti sa pagkaila ni Jesukristo ug ang pag-uswag ngadto sa kinabuhing dayon angay lamang sa mga sakripisyo nga imong gihimo?
Pamalandungi kon duna bay butang nga kinahanglan nimong itugyan aron mas makasunod ni Jesukristo. Diha sa laing piraso nga papel, isulat ang usa ka tumong sa pagtugyan niining butanga. Ibutang ang papel diin kanunay nimo kining makita sa sunod nga pipila ka semana. Dayon isulat ang Nakompleto nga assignment 4 diha sa imong scripture study journal.
Diha sa Mga Taga-Filipos 3:15–21 atong mabasa ang pasidaan ni Pablo bahin sa kalaglagan nga naghulat niadtong nakatutok lamang sa yutan-ong mga kalingawan. Gitudlo usab ni Pablo nga usabon ni Jesukristo ang atong dili hingpit nga pisikal nga mga lawas ngadto sa imortal nga mga lawas sama sa Iyang lawas.
Isulat ang mosunod sa ubos sa mga assignment karong adlawa diha sa imong scripture study journal: