Si Apostol Pablo mitudlo kabahin sa mga panalangin nga magagikan sa pagkatawo pag-usab sa espirituhanong paagi ug sa pagtugyan ngadto sa kabubut-on sa Langitnong Amahan. Siya mitudlo kabahin sa pagsalikway sa Israel sa pakigsaad sa Dios nga gihimo uban kang Abraham ug sa iyang kaliwatan. Si Pablo mitudlo nga ang pinili nga katawhan sa Dios mas mailhan pinaagi sa ilang pagkamatinud-anon sa pakigsaad kay sa pinaagi sa kaliwatan, ug siya mitudlo kabahin sa pagdala sa ebanghelyo ngadto sa mga Hentil.
Si Pablo naghulagway sa mga panalangin sa pagkatawo pag-usab sa espirituhanong paagi
Nakaila ka ba og usa ka tawo nga nakapanunod og butang nga bililhon o importante gikan sa laing tawo? Sama pananglit, usahay ang usa ka ginikanan o apohan mohatag og butang nga bililhon ngadto sa ilang mga anak o mga apo.
Kon makapanunod ka og kabtangan ni bisan kinsa, kang kinsang kabtangan ang imong pilion, ug nganong gustohon mo man kini?
Hunahunaa ang mga panalangin nga imong madawat kon makapanunod ka sa tanan nga gipanag-iya sa atong Langitnong Amahan. Samtang magtuon ka sa Mga Taga-Roma 8:1–18, pangitaa kon unsay kinahanglan natong buhaton aron mahimong manununod sa tanan nga anaa sa atong Langitnong Amahan.
Basaha ang Mga Taga-Roma 8:1, 5–7, 13, nga mangita alang sa unsay gitudlo ni Apostol Pablo kabahin sa paglakaw nga “uyon sa unod”, o pagtugyan ngadto sa natural nga kalagmitan sa pagpakasala, ug mahitungod sa pagsunod “uyon sa Espiritu.”
Niini nga mga bersikulo si Pablo mitudlo mahitungod sa duha ka magkaatbang nga mga kinaiya: ang “panghunahuna uyon sa unod” ug ang “panghunahuna alang sa Espiritu” (Mga Taga-Roma 8:6). Ang panghunahuna uyon sa unod mao ang kahingawa sa pisikal nga mga kalingawan, kahinam, ug kahigal sa pisikal nga lawas. Unsa sa imong hunahuna ang gipasabut sa panghunahuna alang sa espiritu ?
Ang mga pulong nga “patyon ang mga binuhatan sa lawas” (Mga Taga-Roma 8:13) nagpasabut sa pagbuntog o pagtangtang gikan sa kaugalingon sa mga kahuyang, mga tintasyon, ug mga sala nga may kalabutan sa atong mortal nga mga lawas (tan-awa sa Mosiah 3:19). Gikan niini nga bersikulo atong makat-unan nga kon sundon nato ang impluwensya sa Espiritu, atong mabuntog ang kalagmitan sa pagpakasala.
Basaha ang Mga Taga-Roma 8:14–17, nga mangita kon unsay tawag ni Pablo niadtong nagsunod sa Espiritu. Ang mga pulong nga mga anak diha sa bersikulo 14 nagpasabut sa mga bata ug naglakip sa mga babaye (tan-awa sa D&P 25: 1).
Ang mga kasulatan naghisgut kanato isip “mga anak sa Dios” (Mga Taga-Roma 8:16) sa sobra sa usa ka pagsabut. Una, ang matag tawo tinuod nga hinigugmang espiritu nga anak sa Langitnong Amahan. Ikaduha, kita natawo pag-usab isip mga anak sa Dios pinaagi sa usa ka relasyon sa pagpakigsaad uban ni Jesukristo kon kita maghinulsol, mabunyagan, ug modawat sa Espiritu Santo.
Ang pagsagop komon sa kalibutang Romano, ug mahimong usa kadto ka pamilyar nga konsepto sa magbabasa ni Pablo. Ang tawo nga legal nga mosagop og usa ka tawo mihatag niana nga tawo sa tanang mga katungod ug prebilehiyo nga anaa sa usa ka tinuod nga anak. Busa, kon kita makadawat sa “Espiritu sa pagkainanak” (Mga Taga-Roma 8:15) pinaagi sa pagsulod sa pakigsaad sa ebanghelyo, kita mahimong mga anak sa Dios ug “isigkamanununod uban kang Kristo” (Mga Taga-Roma 8:17).
Diha sa Basahon ni Mormon, si Haring Benjamin mitudlo usab kon sa unsang paagi kita mahimong “mga anak ni Kristo” (tan-awa sa Mosiah 5:5–10).
Imahe
Presidente Joseph Fielding Smith
Si Presidente Joseph Fielding Smith mitudlo nga si Jesukristo “mahimo natong Amahan … tungod kay siya naghatag kanato og kinabuhi, kinabuhing dayon, pinaagi sa pag-ula nga iyang gibuhat alang kanato.” Siya mipasabut, “Kita nahimong mga anak, mga anak nga lalaki ug mga anak nga babaye ni Jesukristo, pinaagi sa atong mga pakigsaad sa pagkamasulundon ngadto kaniya” (Doctrines of Salvation, comp. Bruce R. McConkie, 3 vols. [1954–56], 1:29).
Basaha ang Mga Taga-Roma 8:17 pag-usab. Ang usa ka isigkamanununod mao ang usa ka tawo kinsa makadawat og parehas nga kabilin sa ubang mga manununod.
Kon kita mga anak nang daan sa Dios nga Amahan, nganong dili man kita diha-diha dayon makadawat og kapareha nga kabilin ni Jesukristo? Nganong gikinahanglan man nga mahimong mga anak nga lalaki ug mga anak nga babaye ni Jesukristo?
Imahe
Elder Dallin H. Oaks
Si Elder Dallin H. Oaks sa Korum sa Napulog Duha ka mga Apostoles mipasabut: “Kitang tanan mga manununod sa atong langitnong mga ginikanan. ‘Kita mga anak sa Dios,’ mitudlo si Apostol Pablo, ‘ug nga kon kita mga anak, nan, mga manununod diay kita, mga manununod sa Dios ug mga isigkamanununod uban kang Kristo’ (Mga Taga-Roma 8:16–17). Nagpasabut kini, sama sa gisulti kanato diha sa Bag-ong Tugon, nga kita mga ‘manununod … sa kinabuhing dayon’ (Tito 3:7) ug kon kita moduol ngadto sa Amahan, kita ‘makapanag-iya niining maong panulundon’ (Pinadayag 21:7)—tanan nga anaa Kaniya— konsepto nga lisud masabtan sa atong mortal nga hunahuna. Apan kita makasabut bisan gamay nga ang pagkab-ot niining kapalaran sa kahangturan posible lamang kon kita mosunod sa atong Manluluwas, si Jesukristo, kinsa nagtudlo nga ‘walay bisan kinsa nga makaadto sa Amahan, gawas kon pinaagi kanako’ (Juan 14:6)” (“Mga Sumusunod ni Kristo,” Ensign, Mayo 2013, 98-99).
Base sa atong kaugalingong katakus, kita walay madawat bisan unsa tungod kay kitang tanan nakasala ug nakabsan sa himaya sa Dios (tan-awa sa Mga Taga-Roma 3:23). Hinoon, kon kita gisagop ni Jesukristo, ang atong mga kasaypanan mabuntog pinaagi sa Iyang hingpit nga kinabuhi ug Pag-ula. Busa, pinaagi sa atong mga pakigsaad ug pagkamasulundon kang Jesukristo, kita mamahimo nga isigkamanununod ug kita “moantus … uban [ni Jesukristo]” (Mga Taga-Roma 8:17). Wala kini magpasabut nga kita mag-antus sa unsay giantus sa Manluluwas isip kabahin sa Iyang maulaong sakripisyo. Hinoon, kita mag-antus uban Kaniya pinaagi sa pagsunod Kaniya ug sa pagsakripisyo sa kalibutanong mga butang, pagsunod sa mga sugo, ug matinud-anong paglahutay sa oposisyon.
Gikan sa Mga Taga-Roma 8:14–18 atong makat-unan nga kon kita matinud-anon nga mga anak sa pakigsaad sa Dios, kita mamahimo nga isigkamanununod uban ni Jesukristo sa tanan nga anaa sa Langitnong Amahan.
Pagdrowing og tsart nga dunay tulo ka kolum sa imong scripture study journal, sulati ang usa ka kolum og Mga Kinahanglanon, ang kolum sa tunga og Oposisyon, ug ang ikatulo nga kolum og Kabilin. Dayon buhata ang mosunod:
Sa “Mga Kinahanglanon” nga kolum, paglista og upat o lima ka piho nga mga sugo o mga sumbanan nga kinahanglan natong sundon aron makonsiderar nga matinud-anong mga anak sa pakigsaad sa Dios.
Sa “Oposisyon” nga kolum, paglista og pipila ka mga ehemplo sa oposisyon nga tingali atong masinati samtang maningkamot kita sa pagpakabuhi nga matinud-anong mga anak sa pakigsaad sa Dios.
Sa “Kabilin” nga kolum, paglista og pipila ka mga panalangin nga atong mapanunod gikan sa Langitnong Amahan kon kita maningkamot nga magpakabuhi isip Iyang matinud-anong mga anak sa pakigsaad.
Magtan-aw sa unsay imong gilista diha sa imong scripture study journal, itandi ang mga panalangin sa pagkahimong isigka-manununod uban ni Kristo ngadto sa mga kinahanglanon nga kinahanglan nimong kab-uton ug sa oposisyon nga mahimo nimong masinati. Unsay imong isulti sa usa ka tawo nga mangutana kon may pulos ba ang pagkamatinud-anon sa mga sugo sa Ginoo?
Basaha ang Mga Taga-Roma 8:18, nga mangita kon unsay gisulti ni Pablo mahitungod kon sa unsang paagi ang atong sakripisyo ikatandi sa unsay atong madawat gikan sa Langitnong Amahan isip usa ka kabilin.
Ang Mga Taga-Roma 8:19–30 nagrekord nga si Pablo mitudlo nga ang Espiritu motabang kanato sa atong mga kahuyang ug nga si Jesukristo gitawag didto sa premortal nga kinabuhi aron mahimong Manluluwas sa mga anak sa Dios. (Sa Mga Taga-Roma 8:29–30 ang mga pulong nga gikabut-an nang daan nagpasabut nga giorden nang daan, o gitawag. Daghan pa ka og matun-an sa mga pagtulun-an ni Apostol Pablo kabahin sa giorden nang daan diha sa Mga Taga-Efeso.)
Basaha ang Mga Taga-Roma 8:28, 31–39, nga mangita og mga kamatuoran nga gitudlo ni Pablo mahitungod sa gugma sa Dios kalabut sa oposisyon, mga hagit, ug mga kalisdanan sa pagkamortal. Mahimo nimong markahan ang mga pulong nga makahuluganon alang kanimo.
Ang Joseph Smith Translation sa Mga Taga-Roma 8:31 mabasa, “Kon ang Dios dapig kanato, kinsay makabuntog [makapildi] kanato?” (Joseph Smith Translation, Romans 8:31 [in Romans 8:31, footnote a]).
Pipila sa mga kamatuoran nga atong mailhan dinhi niini nga mga bersikulo naglakip sa mosunod: Kon kita nahigugma sa Dios, niana ang tanang mga butang maghiusa sa paglihok alang sa atong kaayohan. Pinaagi kang Jesukristo kita makabuntog sa tanang mga hagit ug kalisdanan sa pagkamortal. Walay makapabulag kanato gikan sa gugma sa Dios, nga gipakita diha sa Pag-ula ni Jesukristo.
Kompletuha ang usa o sobra pa sa mosunod nga mga kalihokan diha sa imong scripture study journal:
Paghunahuna mahitungod sa mga hagit ug mga kalisdanan nga imong nasinati, ug dayon pagsulat og duha ka mga pamahayag gikan sa Mga Taga-Roma 8:28, 31–39 nga nakakuha sa imong pagtagad ug ipasabut kon ngano.
Ihulagway kon sa unsang paagi nakasinati ka sa gugma sa Dios panahon sa imong mga hagit.
Pagsulat og pipila ka mga pamaagi nga makapakita ka sa imong gugma alang sa Dios. Paghimo og tumong sa pagbuhat sa unsay imong gisulat, ug salig nga ang tanan nga mga butang maghiusa sa paglihok alang sa imong kaayohan.
Si Pablo nagtudlo mahitungod sa pagsalikway sa Israel sa pakigsaad sa Dios ug mahitungod sa pagdala sa ebanghelyo ngadto sa mga Hentil
Sumala sa narekord diha sa Mga Taga-Roma 9–11, si Apostol Pablo migamit sa mga termino nga Israel ug mga Israelite imbis mga Judeo. Sa kapanahunan sa Daang Tugon, ang Dios mipili sa mga kaliwat ni Jacob, o Israel, nga mahimong kabahin sa Iyang pakigsaad uban kang Abraham (tan-awa sa Mga Taga-Roma 9:4–5). Kini nga pakigsaad naglakip sa mga panalangin sama sa yuta, awtoridad sa priesthood, ug responsibilidad sa pagpanalangin sa katawhan sa tibuok kalibutan pinaagi sa ebanghelyo, nga naghimong posible sa kinabuhing dayon.
Basaha ang Mga Taga-Roma 9:6, 8, nga mangita alang sa unsay gitudlo ni Pablo kabahin sa mga sakop sa balay ni Israel.
Unsa sa imong hunahuna ang gipasabut ni Pablo sa “dili ang tanang misanay gikan kang Israel nasakop sa Israel” (Mga Taga-Roma 9:6)?
Pipila sa mga Judeo wala makasabut nga dili tanang mga tawo nga natawo sa balay ni Israel takus nga mahimong kabahin sa pakigsaad sa Dios sa Israel. Sila sayop nga misalig nga ang ilang kaliwatan diha-diha dayon mihatag kanila sa mga panalangin sa pakigsaad.
Basaha ang Mga Taga-Roma 10:8–13, nga mangita kon unsaon ni bisan kinsa, Israelite o dili Israelite, nga mahimong kabahin sa mga tawo sa pakigsaad sa Dios.
Niini nga mga bersikulo, ang Gresyanhon [Griyego] nga pulong nga gihubad isip magasugid nagpasabut og usa ka dayag nga pag-angkon sa pagdawat, o pakigsaad, ug ang Gresyanhon nga pulong nga gihubad isip magatuo nagpasabut og usa ka masaligon nga pasalig. Kining dakong pagsalig sa Manluluwas mogiya sa katawhan sa dayag nga pag-angkon sa ilang pagdawat Kaniya sa mga paagi nga Iyang gitudlo. Kini nga mga paagi naglakip sa pagsunod sa mga sugo sa Dios, paghinulsol, ug pagdawat sa makaluwas nga mga ordinansa sa ebanghelyo, nga naglakip sa bunyag ug sa gasa sa Espiritu Santo.
Sumala sa mga pagtulun-an ni Pablo, kon kita modawat ug mosunod ni Jesukristo ug sa Iyang ebanghelyo, kita makadawat sa mga panalangin sa pakigsaad sa Dios ug maluwas.
Pipila ka mga tawo migamit sa Mga Taga-Roma 10:9, 13 sa pag-angkon nga ang ato lamang buhaton aron maluwas mao ang pagpahayag sa atong pagtuo kang Jesukristo. Sa imong scripture study journal, pagsulat mahitungod kon sa unsang paagi ang mga kamatuoran nga gihisgutan niini nga leksyon makatabang nimo sa pagtubag niining sayop nga pag-angkon.
Sa nahibilin sa Mga Taga-Roma 10–11, atong mabasa nga si Pablo mitudlo nga ang pagpaminaw sa pulong sa Dios mahinungdanon sa pagpalambo og hugot nga pagtuo diha ni Jesukristo. Siya dugang mipasabut kabahin sa pagsalikway sa mga Israelite sa ebanghelyo ni Jesukristo ug migamit og kasusama nga sugilanon sa gisumpay nga mga sanga gikan sa ihalas nga kahoy nga oliba ngadto sa maayo nga kahoy nga oliba aron sa pagrepresentar sa pagkasagop sa mga Hentil ngadto sa balay ni Israel (tan-awa sa Jacob 5). Siya usab mitudlo nga ang ebanghelyo itanyag pag-usab ngadto sa mga Judeo.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Mga Taga-Roma 8–11 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: