Juan 17

Sa wala pa nag-antus sa Getsemani ang Manluluwas, Siya mihalad sa Iyang talagsaong Pag-ampo alang sa Iyang mga Disipulo. Siya nag-ampo nga ang Iyang mga disipulo ug ang tanan nga mosunod Kaniya makaila sa Langitnong Amahan ug makaangkon og kinabuhing dayon, ug Siya nag-ampo nga sila unta mahimong usa uban Kaniya ug sa Iyang Amahan.

Paghunahuna og pipila ka inila nga mga tawo nga aduna kay nahibaloan.

Karon paghunahuna og mga tawo sa imong kinabuhi nga imong nailhan nga labing maayo.

Unsay kalainan tali sa nahibalo kabahin sa usa ka tawo ug tinuoray nga nakaila niana nga tawo? Sa mosunod nga luna, isulat ang pipila ka butang nga mahimo nimong buhaton aron tinud-anay gayud nga makaila sa usa ka tawo:

Ang Manluluwas nagtudlo kabahin sa kaimportante sa pagkaila sa Langitnong Amahan ug Kaniya. Samtang magtuon ka sa Juan 17, pangita og mga kamatuoran nga makatabang kanimo nga mosunod sa dalan diin, pag-abut sa panahon, mogiya kanimo dili lamang nga mas mahibalo kabahin sa apan usab nga mas makaila sa Langitnong Amahan ug ni Jesukristo.

Imahe

Jesus Christ

Human sa Katapusang Panihapon, ang Manluluwas milakaw uban sa Iyang mga disipulo ngadto sa Tanaman sa Getsemani. Sa wala pa sila moabut sa tanaman, si Jesus mihunong aron sa pag-ampo. Tradisyunal kining giila isip ang Pag-Ampo alang sa Iyang mga Disipulo. Usa ka kahulugan sa pulong pangaliya mao ang pagpamulong ngadto sa usa ka tawo alang sa laing tawo. Niini nga higayon, si Jesukristo nakigsulti ngadto sa Langitnong Amahan alang sa Iyang mga disipulo, naghangyo nga sila unta makadawat og kinabuhing dayon.

Basaha ang Juan 17:1–3, nga mangita kon giunsa paghulagway sa Manluluwas ang kinabuhing dayon. (Ang Juan 17:3 usa ka scripture mastery passage. Mahimo nimong markahan kini nga bersikulo sa lahi nga paagi aron sa pagtabang kanimo nga makit-an kini sa umaabut.)

Gikan sa Juan 17:3 atong nakat-unan ang mosunod nga kamatuoran: Aron makadawat og kinabuhing dayon, kinahanglan gayud nga makaila kita sa Langitnong Amahan ug sa Iyang Anak, si Jesukristo.

1. Tubaga ang mosunod nga pangutana diha sa imong scripture study journal: Sa unsang paagi ang pagkaila sa Amahan ug sa Anak lahi kay sa pagkahibalo kabahin Nila?

Imahe

Ni Elder Bruce R. McConkie

Basaha ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles, ug markahi kon unsay iyang gisulti nga maoy gipasabut nga makaila sa Amahan ug sa Anak: “Usa ka butang ang mahibalo kabahin sa Dios ug lahi nga butang ang makaila kaniya. Nahibalo kita kabahin niya kon kita nakat-on nga siya usa ka personal nga binuhat kansang panagway gilalang ang tawo; kon kita nakat-on nga ang Anak mao ang tukma nga hulad sa personahe sa iyang Amahan; kon kita nakat-on nga ang Amahan ug Anak nagbaton og piho nga mga kinaiya ug gahum. Apan nakaila kita kanila, sa pagsabut nga makaangkon og kinabuhing dayon, kon atong natagamtam ug nasinati ang sama nga mga butang nga ilang nasinati. Ang pagkaila sa Dios mao ang paghunahuna kon unsay iyang gihunahuna, sa pagbati kon unsay iyang gibati, sa pagbaton sa gahum nga iyang gibatonan, sa pagsabut sa mga kamatuoran nga iyang nasabtan, ug sa pagbuhat sa iyang gibuhat. Kadtong nakaila sa Dios mahimo nga sama kaniya, ug makabaton sa iyang matang sa kinabuhi, nga mao ang kinabuhing dayon.” (Doctrinal New Testament Commentary, 3 vols. [1965–73], 1:762).

Ang pagkaila sa Dios ug pagkahimong sama Kaniya posible alang kanato samtang kita modawat sa Espiritu Santo ug moambit sa tanan nga mga panalangin sa Pag-ula sa Manluluwas. Hinoon, kini usa ka proseso nga magpadayon niining tibuok nga kinabuhi ug bisan gani human niini nga kinabuhi (tan-awa sa Moroni 7:48; 10:32–33).

2. Tubaga ang mosunod nga mga pangutana diha sa imong scripture study journal:

   1. Nganong ang usa ka tawo dili makabaton og kinabuhing dayon kon dili makaila sa Dios nga Amahan ug ni Jesukristo?

   2. Unsa ang pipila ka mga paagi nga ikaw mas maayong makaila sa Amahan ug sa Anak?

Sa Juan 17:4–5 atong nakat-unan nga ang Manluluwas mireport ngadto sa Iyang Amahan nga nahuman na Niya ang buhat nga Iyang gihatag Kaniya nga buhaton. Mihangyo Siya sa Iyang Amahan sa paghimaya Kaniya uban sa sama nga himaya nga anaa Kaniya didto sa premortal nga kinabuhi.

Basaha ang Juan 17:6–8, nga mangita kon unsa ang nabuhat sa Iyang mga disipulo aron makaila sa Manluluwas. Mahimo nimong markahan ang unsay imong makit-an.

3. Basaha og kusog ang mosunod nga kopya sa scripture mastery passage Juan 17:3:

   “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo, nga imong pinadala.

   Sunod, karasi ang bisan unsang tulo ka mga pulong aron dili na ka makakita niini, ug usba sa pagbasa og kusog ang tudling, lakip ang mga pulong nga imong gikarasan. Balika ang paagi sa pagkaras sa mga pulong ug pagbasa og kusog sa tudling hangtud nga makarasan ang tanan nga mga pulong. Dayon buhata ang imong labing maayo sa pagsulat sa tudling diha sa imong scripture study journal base sa imong nasag-ulo.

Basaha ang Juan 17:9, 11–18, nga mangita kon unsay giampo ni Jesus alang sa Iyang mga disipulo.

Timan-i nga ang Manluluwas naghisgut nga ang Iyang mga disipulo mopadayon nga magpuyo sa kalibutan nga dautan ug nga nagdumot kanila. Gikan sa Juan 17:14–16 atong nakat-unan nga isip mga disipulo ni Jesukristo, kita kinahanglan nga anaa sa kalibutan apan dili iya sa kalibutan. Mahimo nimong isulat kini nga baruganan diha sa margin sa imong mga kasulatan.

Unsa sa imong hunahuna ang gipasabut nga anaa sa kalibutan apan dili iya sa kalibutan?

Ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles makatabang kanimo nga makasabut unsaon sa pagpuyo sa kalibutan ug dili iya sa kalibutan:

Imahe

Elder M. Russell Ballard

“Sa Simbahan, kanunay natong isulti ang panultihon: ‘Pagpakabuhi dinhi sa kalibutan apan dili iya sa kalibutan.’ …

“Tingali kinahanglan nga isulti ang panultihon … isip duha ka managlahi nga mga pahimangno. Una, ‘Pagpakabuhi dinhi sa kalibutan.’ “Pagpanginlabut; pagpakisayud. Tinguhaa ang pagkamasinabtanon ug kamauyunon ug sabta ang pagkalain-lain.” Paghimo og makahuluganong mga kontribusyon sa katilingban pinaagi sa pagserbisyo ug pag-apil. Ikaduha, ‘Pagpakabuhi nga dili iya sa kalibutan.’ Ayaw og sunda ang sayop nga dalan o mokompromiso aron sa pag-uyon o pagdawat sa dili matarung. …

“Ang mga miyembro sa Simbahan kinahanglan nga mas moimpluwensya kay sa maimpluwensyahan. “Kinahanglan kitang molihok aron maminosan ang nga epekto sa sala ug dautan kay sa pasagdan lang nga mabanlas uban niini. Kinahanglan nga magtinabangay kita sa pagsulbad sa problema kay sa likayan o pasagdan lamang kini” (“The Effects of Television,” Ensign, May 1989, 80).

Pamalandungi kon ngano nga ang Ginoo gusto kanato nga magpabilin sa kalibutan apan dili magpaiya sa kalibutan.

4. Sa imong scripture study journal, ipasabut unsaon sa tawo nga maanaa sa kalibutan apan dili iya sa kalibutan sa matag usa sa mosunod nga mga kahimtang: sa eskwelahan, kauban sa mga higala, ug diha sa internet. Dayon pagsulat og piho nga paagi nga ikaw magtinguha nga mas mosunod sa Manluluwas pinaagi sa pagkaanaa sa kalibutan apan dili iya sa kalibutan.

Bisan pa sa atong labing maayo nga mga paningkamot, dili kita makapabilin nga hingpit nga limpyo gikan sa sala ug dautan nga anaa sa kalibutan. Kon dili kita malimpyohan gikan sa atong mga sala, kita isalikway gikan sa presensya sa Dios hangtud sa kahangturan tungod kay walay mahugaw nga butang nga makapuyo sa Iyang presensya (tan-awa sa 1 Nephi 15:33–34).

Basaha ang Juan 17:20–23, nga mangita kon unsay giampo ni Jesukristo. Mahimo nimong markahan ang pulong nga usa bisan asa kini nga makita niini nga mga bersikulo.

Timan-i nga ang Manluluwas nag-ampo dili lamang alang sa Iyang mga Apostoles apan alang usab niadtong motuo sa ilang mga pulong nga silang tanan unta mahimong usa sama nga si Jesus ug ang Amahan usa. Kini nga mga bersikulo nagklaro nga ang Amahan ug ang Anak duha ka managlahi nga binuhat. Si Jesus nag-ampo alang sa espirituhanon nga panaghiusa, dili pisikal nga panaghiusa.

Unsay naghimo niining posible alang kanato nga mahimong usa uban sa Amahan ug Anak?

Imahe

Elder Jeffrey R. Holland

Si Elder Jeffrey R. Holland sa Korum sa Napulog Duha ka mga Apostoles mipasabut sa unsang paagi kita mahimong usa uban sa Amahan ug Anak: “Ang literal nga kahulugan sa Iningles nga pulong Atonement sayon nga masabtan: at-one-ment, ang paghiusa sa mga butang nga nabulag o nabahin” (“Ang Pag-ula ni Jesukristo,” Ensign, Mar. 2008, 34–35).

Usa ka importante nga kamatuoran nga atong makat-unan gikan sa Juan 17:20–23 mao nga samtang kita moduol kang Jesukristo ug modawat sa mga panalangin sa Iyang Pag-ula, kita mahimong usa uban sa Amahan ug Anak.

Gikan sa imong nahibaloan sa Langitnong Amahan ug ni Jesukristo, nganong gusto man nimo nga mahimong usa uban kanila?

Basaha ang mosunod nga pamahayag gikan ni Presidente James E. Faust sa Unang Kapangulohan, nga mangita sa panalangin nga moabut niadtong nagtinguha nga mahimong usa uban sa Langitnong Amahan ug ni Jesukristo.

Imahe

Presidente James E. Faust

“Kita kinahanglan kinasingkasing nga magtinguha dili lamang aron masayud kabahin sa Agalon, apan maningkamot, samtang sa Iyang pagdapit, nga mahimong usa uban Kaniya (tan-awa sa Juan 17:21), aron ‘malinig-unan kamo sa gahum pinaagi sa iyang Espiritu diha sa kinasuluran sa inyong pagkatawo’ (Efe. 3:16). …

“Kini ang akong pagpamatuod nga kita nag-atubang og malisud nga mga panahon. Kita kinahanglang maisugon sa pagkamasulundon. Ang akong pagsaksi mao nga kita pagasulayan sa atong espirituhanong kalig-on, tungod kay ang umaabut nga mga adlaw puno sa kasakit ug kalisud. Apan uban sa masaligan nga kahupayan sa personal nga relasyon uban sa Dios, mahatagan kita og makapakalma nga kaisug”(“That We Might Know Thee,” Ensign, Ene. 1999, 2, 5).

5. Tubaga ang mosunod nga pangutana diha sa imong scripture study journal: Unsay imong buhaton aron mas makaila sa Langitnong Amahan ug ni Jesukristo ug malig-on ang imong relasyon Kanila?

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 17 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: