Juan 3

Usa ka gabii usa ka Pariseo nga ginganlan og Nicodemo miduol kang Jesus ug nakig-istorya Kaniya. Si Jesus mitudlo kang Nicodemo nga ang tanang tawo kinahanglan gayud nga matawo pag-usab aron makasulod sa gingharian sa Dios. Sa wala madugay, si Juan Bautista mipasabut sa iyang mga disipulo nga ang iyang tahas mao ang pag-andam sa agianan alang ni Jesukristo.

Hunahunaa nga usa ka adlaw samtang naghisgot ka og relihiyon uban sa pipila ka mga higala, usa kanila miingon, “Basta maayo lang ko nga tawo, makaadto ko sa langit.” Hunahunaa kon unsaon nimo sa pagtubag ang imong higala.

Samtang magtuon ka sa Juan 3, pangitaa ang mga butang nga gitudlo ni Jesus nga kinahanglan natong buhaton aron makasulod sa gingharian sa Dios.

Duol sa sinugdanan sa Iyang pangalagad, ang Manluluwas miadto sa Jerusalem aron sa pagsaulog sa Pagpalabay. Daghang mga tawo sa Jerusalem mituo ni Jesus sa diha nga ilang nakita ang mga milagro nga Iyang gibuhat (tan-awa sa Juan 2:23–25).

Basaha ang Juan 3:1–2, nga mangita kon kinsa ang mibisita sa Manluluwas samtang didto Siya sa Jerusalem.

Imahe

Jesus and Nicodemus

Isip “punoan sa mga Judeo” (Juan 3:1), si Nicodemo usa ka sakop sa Sanhedrin. Ang Sanhedrin usa ka pamunoan nga konseho nga gilangkuban sa mga Pariseo ug mga Saduceo nga maoy nagdumala sa kadaghanan sa sibil ug relihiyusong mga kalihokan sa katawhang Judeo.

Ngano kaha nga si Nicodemo mibisita man ni Jesus sa gabii?

Ang pag-ila ni Nicodemo nga si Jesus “usa ka magtutudlo nga gikan sa Dios” (Juan 3:2) nagsugyot nga gusto niyang makat-on gikan ni Jesus.

Basaha ang Juan 3:3–5, nga mangita kon unsay gitudlo sa Manluluwas ni Nicodemo. (Ang Juan 3:5 usa ka scripture mastery passage. Mahimo nimo kining markahan sa lahi nga paagi aron sa pagtabang kanimo nga makit-an kini sa umaabut.)

Si Jesus mitudlo ni Nicodemo nga ang tanan kinahanglan nga matawo pag-usab. Unsay hunahuna ni Nicodemo nga maoy gipasabut sa Manluluwas sa mga pulong nga “igaanak pag-usab” (Juan 3:3)?

Ang matawo [igaanak] pag-usab mao ang “pagbaton sa Espiritu sa Ginoo [nga nag]himo og usa ka dako nga kausaban diha sa kasingkasing sa usa ka tawo nga sa ingon siya wala nay tinguha sa pagbuhat og dautan, apan hinoon nagtinguha sa pagpangita sa mga butang sa Dios” (Giya ngadto sa mga Kasulatan, “Natawo sa Dios, Natawo Pag-usab,” scriptures.lds.org; tan-awa sa Mosiah 5:2; 27:25–26).

Imahe

Prophet Joseph Smith

Si Propeta Joseph Smith mitudlo, “ang pagpakatawo pag-usab, moabut pinaagi sa Espiritu sa Dios pinaagi sa mga ordinansa” (Mga pagtulun-an sa mga Presidente sa Simbahan: Joseph Smith [2007], 113).

Mahimo nimong markahan ang duha ka mga butang diha sa Juan 3:5 nga gitudlo ni Jesus nga gikinahanglan aron makasulod sa gingharian sa Dios.

Ang natawo sa tubig nagpasabut nga gibunyagan, ug ang natawo sa Espiritu nagpasabut nga midawat sa gasa sa Espiritu Santo.

Kompletuha ang mosunod nga kamatuoran basi sa unsay imong nakat-unan gikan sa Juan 3:5: mga kinahanglanon aron matawo pag-usab sa espirituhanong paagi ug makadawat og kahimayaan sa celestial nga gingharian. Ikonsiderar ang pagsulat niini nga kamatuoran sa imong mga kasulatan tupad sa Juan 3:5.

Imahe

President Boyd K. Packer

Si Presidente Boyd K. Packer sa Korum sa Napulog Duha ka mga Apostoles namahayag: “Ang maayong binuhatan nga walay mga ordinansa sa ebanghelyo dili makatubos ni makahimaya sa katawhan; ang mga pakigsaad ug mga ordinansa gikinahanglan” (“The Only True Church,” Ensign, Nob. 1985, 82).

1. Sa imong scripture study journal, pagsulat og tubag sa usa ka higala kinsa miingon nga ang pagkamaayong tawo lamang igo na aron makasulod sa gingharian sa Dios. Hinumdumi ang paggamit sa unsay gisulti ni Jesus sa Juan 3:5 diha sa imong tubag.

Diha sa Juan 3:6–12 atong mabasa nga human si Jesus mitudlo kang Nicodemo nga ang tanan kinahanglang matawo sa espirituhanong paagi, si Nicodemo nangutana kang Jesus unsay makapahimo sa usa ka tawo nga matawo pag-usab. Si Jesus mitubag pinaagi sa pagpangutana kon sa unsang paagi si Nicodemo nahimong usa ka lider sa relihiyon sa mga katawhan ug wala makasabut sa unsay Iyang gitudlo.

Basaha ang Juan 3:13–15, nga mangita kon sa unsang paagi gitubag ni Jesus ang pangutana ni Nicodemo kon unsay nakapahimong posible sa espirituhanong pagkatawo pag-usab. Timan-i sa Juan 3:13 nga si Jesus mipamatuod sa Iyang Kaugalingon isip Anak sa Dios kinsa nanaog gikan sa langit.

Sa Juan 3:13, si Jesus mitudlo kang Nicodemo nga walay usa nga makasaka ngadto sa langit pinaagi sa ilang kaugalingong mga paningkamot. Si Kristo mao lamang ang bugtong tawo nga makasaka sa langit sa Iyang kaugalingon.

Imahe

Moses and the Brass Serpent

Sa panahon nga si Moises ug ang mga anak sa Israel naglatagaw sa kamingawan, ang Ginoo mipadala og mapintas, o lala, nga mga bitin agi og sangputanan sa pagpakasala sa mga Israelite batok sa Dios. Ang mga Israelite nahilo sa dihang napaakan sa mga bitin. Ang Ginoo mimando ni Moses sa paghimo og usa ka bitin gikan sa tumbaga nga daw susama sa mapintas nga mga bitin ug ibutang kini sa ibabaw sa usa ka bandila [tukon]. Siya misaad nga bisan kinsa nga Israelite nga motan-aw sa bitin nga tumbaga diha sa tukon mamaayo. (Tan-awa sa Numeros 21:4–9.)

Sa unsang paagi nga ang kasinatian ni Moises sa pag-isa sa bitin nga tumbaga susama sa unsay buhaton ni Jesukristo alang sa tanan?

Imahe

The Crucifixion

Timan-i ang panalangin nga gisulti diha sa Juan 3:15 nga moabut niadtong mosalig ngadto sa Manluluwas.

Si Jesus mitudlo kang Nicodemo nga ang tanang katawhan makaangkon og kinabuhing dayon pinaagi sa Pag-ula ni Jesukristo.

Ang Manluluwas mitudlo usab ni Nicodemo og usa ka importante nga doktrina kabahin sa Langitnong Amahan. Basaha ang Juan 3:16–17, nga mangita sa usa ka doktrina nga atong makat-unan mahitungod sa Langitnong Amahan.

Ang Juan 3:16–17 nagtudlo nga ang Langitnong Amahan nahigugma og maayo sa Iyang mga anak nga Iyang gipadala ang Iyang Bugtong Anak aron mag-antus alang sa ilang mga sala.

Pamalandungi kon sa unsang paagi ang pagpadala sa Iyang Anak, si Jesukristo, ngadto sa yuta nagpakita sa gugma sa Langitnong Amahan alang sa matag usa kanato.

Imahe

Elder Dallin H. Oaks

Samtang imong basahon ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ikonsiderar ang imong gibati sa imong pagkaamgo kon unsa ka kamahal sa Langitnong Amahan: “Walay mas labaw nga ebidensya sa walay kinutuban nga gahum ug kahingpitan sa gugma sa Dios kay sa gisulti ni Apostol nga si Juan: ‘Kay gihigugma gayud sa Dios ang kalibutan, nga tungod niana gihatag niya ang iyang bugtong Anak’ (Juan 3:16). … Hunahunaa kon unsa ang kaguol sa atong Langitnong Amahan sa pagpadala sa Iyang Anak aron molahutay sa dili matugkad nga pag-antus alang sa atong mga sala. Kana mao ang labing dako nga ebidensya sa Iyang gugma alang sa matag usa kanato!” (“Gugma ug Balaod,” Ensign o Liahona, Nob. 2009, 26).

2. Basaha ang Juan 3:16 ug Doktrina ug mga Pakigsaad 34:3, nga mangita alang sa unsay atong makat-unan mahitungod sa gugma sa Amahan ug sa gugma ni Jesukristo. Dayon, diha sa imong scripture study journal, isulat unsay imong gibati nga nasayud nga ang Langitnong Amahan hilabihan nga nahigugma kanimo nga Iyang gipadala ang Iyang Bugtong Anak aron mag-antus ug mamatay alang kanimo.

Usa ka dugang nga baruganan nga atong makat-unan gikan sa Juan 3:16–17 mao ang kon kita motuo ni Jesukristo, nga naglakip sa paghinulsol sa atong mga sala ug pagsunod sa Iyang mga pulong, kita makaangkon sa kinabuhi nga walay katapusan pinaagi sa Iyang Pag-ula.

3. Ribyuha ang mga kamatuoran nga nalista niini nga leksyon nga gitudlo ni Jesus kang Nicodemo. Isulat sa imong scripture study journal sa unsang paagi kini nga mga kamatuoran adunay kalabutan sa usag usa. Dayon isulat ang mosunod nga mga pulong: Ako mopakita sa akong pagtuo kang Jesukristo pinaagi sa … Tapusa kini nga mga pulong pinaagi sa pagsulat unsay imong buhaton aron sa pagpakita sa imong pagtuo diha ni Jesukristo.

4. Ang scripture mastery passage diha sa Juan 3:5 nagtudlo og importante nga doktrina nga gikinahanglan sa tanang anak sa Langitnong Amahan. Ang pagmemorya niini makatabang nimo sa pagpakigbahin niini ngadto sa uban sa tibuok nimong kinabuhi. Isulat ang tibuok bersikulo diha sa imong scripture study journal: Balik-balika pag-recite ang bersikulo, ug badlisi ang pipila sa mga pulong sa matag higayon nga imong i-recite kini. Buhata kini hangtud nga maka-recite na ka kini gikan sa panumduman. Mahimo nimong i-recite kini ngadto sa usa ka sakop sa pamilya o higala aron sa pagsiguro nga ikaw kahibalo na niini.

Kon mahimo, pun-a sa tubig ang usa ka klaro nga baso o sudlanan ug dugangi og usa o duha ka tulo nga food coloring ang tubig. Tan-awa ang kolor nga molukop sa tibuok sudlanan. Hunahunaa kon sa unsang paagi ang food coloring makumparar sa atong impluwensya ngadto sa ubang tawo.

Basaha ang mosunod nga mga pamahayag ni Presidente David O. McKay, nga mangita sa unsay imong makat-unan kabahin sa imong impluwensya sa kinabuhi sa uban:

Imahe

President David O. McKay

“Ang matag tawo nga nagpuyo niini nga kalibutan nakahatag og impluwensya, alang sa maayo o alang sa dautan. Dili lang kon unsay iyang gisulti, dili lang kon unsay iyang gibuhat. Kon dili kon unsa siya” (Mga Pagtulun-an sa mga Presidente sa Simbahan: David O. McKay [2003], 274).

“Dako og epekto ang atong mga pulong ug mga buhat niini nga kalibutan. Sa matag gutlo sa kinabuhi inyong giusab sa hinayhinay ang mga kinabuhi sa tibuok kalibutan” (Mga Pagtulun-an: David O. McKay, 275).

Sumala sa narekord sa Juan 3:22–26, ang pipila sa mga disipulo ni Juan Bautista nabalaka. Misulti sila ni Juan nga si Jesus namunyag ug nga Siya “midawat sa tanang tawo kinsa miduol ngadto kaniya” (Joseph Smith Translation, Juan 3:27 ). Sila nabalaka nga daghang mga tawo ang nagsunod ni Jesus imbis ni Juan Bautista.

Basaha ang Juan 3:27–30, nga mangita kon sa unsang paagi nga gihulagway ni Juan Bautista sa mapainubsanong paagi ang iyang tahas kalabut ni Jesukristo.

Sa pasumbingay ni Juan Bautista, ang pamanhonon nagrepresentar ni Jesus, ang pangasaw-unon mahimong nagrepresentar niadtong moduol ngadto kang Kristo, ug ang higala sa pamanhonon nagrepresentar ni Juan Bautista. Unsay nasabtan ni Juan Bautista kabahin sa iyang tahas kalabut ni Jesukristo? Unsa kaha nga matang sa impluwensya sa mga pulong ni Juan nga maanaa kanimo kon usa ka sa mga disipulo ni Juan?

Usa ka kamatuoran nga atong makat-unan gikan sa ehemplo ni Juan Bautista mao nga kita makaimpluwensya sa uban alang sa kaayohan pinaagi sa paggiya kanila ngadto ni Jesukristo.

Nganong importante man kaayo nga atong gamiton ang atong impluwensya sa paggiya sa uban ngadto ni Jesukristo?

5. Paghunahuna og usa ka tawo kinsa imong nakita nga naggiya sa uban ngadto ni Jesukristo. Sa imong scripture study journal, ihulagway ang mga kinaiya niining tawhana nga nakatampo nga siya nakahimo sa pag-impluwensya sa uban sa paghigugma ug pagdawat sa Manluluwas.

Paghunahuna og mga paagi nga makagiya ka sa uban ngadto sa Manluluwas. Makatinguha ka sa giya sa Espiritu Santo sa imong mga paningkamot sa pagbuhat sa ingon.

Sa Juan 3:31–36, si Juan Bautista mipahayag nga si Jesus gipadala sa Dios ug nga ang tanan kinsa motuo Kaniya makadawat og kinabuhing walay katapusan.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 3 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: