Human mahibaloi ang pagkamatay ni Juan Bautista, naninguha si Jesus nga mag-inusara, apan gisunod Siya sa pundok sa katawhan. May kapuangod Siya kanila, giayo ang ilang masakiton, ug milagrosong mipakaon sa sobra sa 5,000 kanila. Nianang pagkagabii, milakaw si Jesus diha sa dagat ngadto sa sakayan diin didto ang Iyang mga disipulo.
Si Jesus naninguha nga mag-inusara ug unya gipakaon ang sobra sa 5,000 ka katawhan
Paghunahuna og panahon sa dihang ikaw magul-anon kaayo. Unsay imong gibuhat aron sa paglahutay ug pagbuntog sa imong kaguol?
Paglista og lainlaing mga paagi nga ang katawhan mosulay aron makalahutay ug makabuntog sa kagul-anan:
Samtang imong tun-an ang Mateo 14:1–21, pangita og mga paagi nga makatabang kanimo sa paglahutay ug pagbuntog sa kagul-anan.
Ang Mateo 14:1–11 nagrekord nga si Haring Herodes dili makatarunganong mibilanggo ni Juan Bautista tungod sa pag-aghat sa iyang bag-ong asawa, si Herodias, kinsa gusto mosanta ni Juan Bautista sa pagpanghimaraut sa iyang ilegal nga kaminyoon ngadto ni Haring Herodes. (tan-awa sa Marcos 6:17–19). Human mosayaw diha sa iyang atubangan ang anak nga babaye sa iyang asawa nga si Salome, gisaad niya atubangan sa publiko nga siya makaangkon sa “bisan unsang butang nga pangayoon niya” (Mateo 14:7). Mikonsulta ang anak nga babaye ngadto sa iyang inahan ug gipangayo ang ulo ni Juan Bautista, ug agig resulta, gipaputlan og ulo ni Herodes si Juan.
Si Juan Bautista usa ka higala ug paryente ni Jesukristo, ug gipili siya sa Dios nga mahimong propeta kinsa moandam sa dalan alang sa Mesiyas.
Hunahunaa nga suod kang higala ni Juan Bautista. Unsa kaha ang imong reaksyon human mabati ang mahitungod sa iyang dili makatarunganong kamatayon?
Basaha ang Mateo 14:12–13, nga mangita sa unsay gibuhat ni Jesus sa Iyang pagkadungog mahitungod sa kamatayon ni Juan.
Ang pulong nga “usa ka dapit nga awaaw” diha sa bersikulo13 nagpasabut og usa ka dapit nga mingaw.
Unsa ang nahitabo sa dihang si Jesus naningkamot sa pag-inusara?
Unsa ang imong bation kon ikaw magul-anon ug gustong mag-inusara, apan ang uban naninguha sa imong pagtagad?
Gikan niini nga istorya atong nakat-unan nga pinaagi sa pagpakita og kalooy ngadto sa uban bisan kon kita nagsinati og kaguol, kita nagsunod sa ehemplo ni Jesukristo.
I-summarize alang sa usa ka miyembro sa pamilya o higala ang istorya mahitungod ni Jesus nga nagpakita og kalooy human makadungog kalabut sa kamatayon ni Juan Bautista. Dayon hisguti ang mosunod nga mga pangutana uban niana nga tawo: Diha sa imong scripture study journal, i-rekord kang kinsa ka nakig-istorya ug usa ka mubo nga saysay sa inyong nahisgutan.
Sa unsa nga paagi nga ang pagpakita og kapuangod ngadto sa uban magtabang kanato kon kita mismo nag-antus?
Ngano nga malisud ang pagpakita og kapuangod ngadto sa uban kon kita nag-antus?
Kanus-a ka o usa ka tawo nga imong nailhan nakasinati og dako nga kaguol ug sa gihapon nagpakita og kapuangod ngadto sa uban? Sa unsa nga mga paagi nga ang pagserbisyo og usa ka tawo nakatabang?
Basaha ang Mateo 14:15–21, nga mangita kon giunsa ni Jesus pagpadayon sa pagpakita og kapuangod ngadto sa pundok sa katawhan.
Sitwasyon 1: Usa ka batan-ong babaye mibati nga walay mahimo samtang siya nagbantay sa iyang inahan nga nag-antus sa usa ka walay kaayohan nga sakit. Nagsugod siya sa pagduda kon ang Langitnong Amahan nakahibalo ba sa kasakit sa iyang pamilya. Gusto gayud siyang motuo sa Dios, apan ang iyang mga pagduda nagsugod sa pagsanap kaniya.
Sitwasyon 2: Usa ka batan-ong lalaki bag-ong mipasakop sa Simbahan. Kadaghanan sa iyang karaang mga higala dayag nga misaway sa iyang desisyon nga magpasakop sa Simbahan. Nagsugod siya sa pagkalibog kon kinahanglan ba siyang mopadayon nga aktibo ug matinud-anong miyembro sa Simbahan.
Unsa ang pipila ka laing mga paagi ang mga tawo mahimong makasinati og pagduda o kahadlok samtang sila naninguha sa pagsunod ni Jesukristo?
Samtang imong tun-an ang nahibilin sa Mateo 14, pangitaa ang mga pahayag sa kamatuoran nga makatabang nimo sa pagbuntog sa mga kahadlok, mga pagduha-duha, ug pagkawalay kadasig.
Basaha ang Mateo 14:24–25, nga mangita sa unsay nahitabo samtang ang mga disipulo nanabok sa Dagat sa Galilea agi og pagsunod sa panudlo sa Manluluwas.
Ang mga pulong “sungsongon ang hangin”diha sa bersikulo 24 nagpasabut nga ang hangin naghuyop sa sugat nga direksyon sa ilang destinasyon.
Diha sa Mateo 14:23, tan-awa kini panahon sa kagabhion sa dihang si Jesus nag-inusara didto sa bukid ug ang mga disipulo nanabok sa Dagat sa Galilea. Ang gilay-on sa pagtabok sa dagat mga 5 ka milya (8 kilometros), ug sa maayong panahon sila makahimo sa pagtabok niini sa duha ngadto sa tulo ka oras. Ang Manluluwas miduol kanila sa panahon sa ikaupat nga hugna sa bantay, nga “tali sa alas tres ug alas says sa buntag”. Kini nagpasabut nga ang mga disipulo nakigbisog batok sa hangin sa pagtabok sa dagat sa tibuok gabii.
Basaha ang Marcos 6:47–48, nga mangita sa dugang nga mga detalye nga gihatag ni Marcos mahitungod niini nga hitabo.
Kon si Jesus nahibalo nga ang Iyang mga disipulo nanlimbasog, sa imong hunahuna Siya ba makapalingakawas dayon kanila sa ilang mga panlimbasog? Unsa kaha ang katuyoan sa pagtugot nga manlimbasog ang mga disipulo sa makadiyut sa dili pa sila luwason?
Gikan niini nga mga istorya sa mga disipulo nga nanabok sa dagat, atong nakat-unan nga bisan tuod og ang Dios dili tingali kanunay mopalingkawas kanato gikan sa mga panlimbasog, nahibalo Siya unsay atong gisinati ug mohimo, diha sa Iyang kaugalingong panahon, sa pagduol sa pagtabang kanato.
Tubaga ang mosunod nga mga pangutana diha sa imong scripture study journal:
Unsa nga kaayohan ang maato nga nanlimbasog sa makadiyut kay sa diha-diha kita luwason sa Ginoo gikan sa atong mga pagsulay?
Sa unsa nga paagi nga ang pagkahibalo nga ang Ginoo nasayud sa atong mga panlimbasog naglig-on sa atong pagtuo diha Kaniya bisan kon dili Siya diha-diha moluwas kanato gikan niini?
Hunahunaa nga kamo anaa sa barko ug nanlimbasog batok sa kusog nga hangin ug mga balud sulod sa daghang mga oras sa tibuok gabii, ug unya nakakita kamo og tawo nga naglakaw ibabaw sa tubig. Unsa kaha ang imong mahunahuna o bation niini nga sitwasyon?
Basaha ang Mateo 14:26–27, nga mangita kon unsay reaksyon sa mga disipulo sa dihang nakakita sila ni Jesus. Mahimo nimong markahan ang unsay gisulti ni Jesus ngadto kanila.
Basaha ang Mateo 14:28–30, nga mangita sa unsay gitinguha ni Pedro nga buhaton sa dihang nadungog niya ang tingog sa Ginoo.
Giunsa ni Pedro pagpakita sa sinugdanan og hugot nga pagtuo?
Unsa ang nakita ni Pedro nga nakahimo kaniya nga mahadlok, magduha-duha, ug nagsugod sa pagkaunlod?
Hunahunaa unsa kahay girepresentar sa hangin ug mga balud niini nga istorya diha sa imong kinabuhi nga makagiya kanimo sa pagsinati og kahadlok o pagduha-duha.
Gikan sa kasinatian ni Pedro atong nakat-unan nga kon atong ipadayon ang atong hugot nga pagtuo diha ni Jesukristo, kita dili mabuntog sa atong mga kahadlok ug mga pagduha-duha.
Imahe
Presidente Howard W. Hunter
Basaha ang mosunod nga pahayag ni Presidente Howard W. Hunter, ug markahi unsay iyang gisulti nga mao ang kuyaw sa pagkapakyas sa pagpadayon sa atong hugot nga pagtuo diha sa Ginoo. “Kini ang akong lig-ong tinuohan nga kon isip mga indibidwal nga katawhan, isip mga pamilya, mga komunidad, ug mga nasud, kita makahimo, sama ni Pedro, nagtumong sa atong mga mata ngadto kang Jesus, kita usab makalakaw nga madaugon ibabaw sa “dagkong mga balud sa kawalay pagtuo” ug magpabiling ‘dili mahadlok taliwala sa nagkakusog nga hangin sa pagduha-duha.’ Apan kon ilayo nato ang atong mga mata gikan kaniya kang kinsa kinahanglan gayud kitang motuo, ingon nga kini sayon kaayo nga buhaton ug ang kalibutan gitintal og maayo sa pagbuhat, kon kita motan-aw ngadto sa kakusog ug kapintas niadtong makalilisang ug makalaglag nga mga elemento nga naglibut kanato imbis ngadto kaniya kinsa makatabang ug makaluwas kanato, niana dili nato malikayan nga kita maunlod sa dagat sa kagubot ug kasubo ug kawalay paglaum” (“The Beacon in the Harbor of Peace,” Ensign, Nob. 1992, 19).
Diha sa imong scripture study journal, pagsulat og daghang mga paagi nga kita “makatutok sa atong mga mata” diha ni Jesukristo, ingon sa gibuhat ni Pedro sa sinugdanan. Agig pagdugang, pagsulat mahitungod sa usa ka higayon nga ikaw nakakita giunsa sa hugot nga pagtuo sa usa ka tawo diha ni Jesukristo nga nakahimo kaniya sa paglikay nga mabuntog sa kahadlok o pagduha-duha.
Pamalandungi kon unsa nga mga kausaban ang imong mahimo sa imong kinabuhi sa pagpadayon sa imong hugot nga pagtuo diha ni Jesukristo, ug maghimo og tumong sa pagbuhat niadto nga mga kausaban.
Sama ni Pedro, kita tingali usahay mapakyas sa pagpadayon sa atong hugot nga pagtuo diha ni Jesukristo ug tingali motugyan ngadto sa kahadlok, pagduha-duha, ug pagkanawad-an og kadasig.
Basaha ang Mateo 14:30–32, nga mangita sa unsay nahitabo samtang si Pedro naglakaw padulong ngadto sa Manluluwas.
Imahe
Si Kristo naglakaw diha sa tubig
Sumala sa bersikulo 30, unsay gibuhat ni Pedro sa dihang siya nakaamgo nga siya nagkaunlod? (Mahimo nimong markahan ang unsay gisulti ni Pedro.)
Sama ni Pedro, kon atong tinguhaon ang tabang sa Dios sa panahon nga magkaluya ang atong hugot nga pagtuo, Siya makasapwang kanato gikan sa atong mga kahadlok ug mga pagduha-duha.
Tubaga ang mosunod nga pangutana diha sa imong scripture study journal: Unsaon sa Dios pagsapwang kanato gikan sa atong mga kahadlok ug mga pagduha-duha?
Basaha ang Mateo 14:33, nga mangita kon unsa ang reaksyon sa mga disipulo nga diha sa sakayan human si Jesus ug si Pedro misakay sa sakayan.
Diha sa Mateo 14:34–36 atong nakat-unan nga human niini nga hitabo, si Jesus ug ang Iyang mga disipulo mipadayon sa ilang panaw ug miabut sa layong mga kabaybayunan sa Galilea. Sa dihang ang katawhan nahibalo nga si Jesus anaa, gidala nila ang mga tawo nga mga masakiton ngadto Kaniya. Ang ilang hugot nga pagtuo dako kaayo nga ang tanan kinsa mianha nangaayo pinaagi sa paghikap sa sidsid sa Iyang sinina. Ikumparar kini sa unsay nahitabo sa mga tawo nga gihulagway diha sa Mateo 13:57–58.
Isulat ang mosunod diha ubos sa mga assignment karong adlawa sa imong scripture study journal:
Akong natun-an ang Mateo 14 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: