Mga Buhat 3–5

Sa ganghaan sa templo, si Pedro ug si Juan miayo sa tawo nga natawo nga bakul. Dayon gitudloan ni Pedro ang mga tawo nga nakasaksi sa pagkaayo niining tawhana. Isip resulta, si Pedro ug Juan, gidakop ug gimandoan sa Sanhedrin sa paghunong sa pagtudlo sa pangalan ni Jesus. Ang mga sakop sa Simbahan nagsunod sa balaod sa pagpahinungod, apan duha kanila namatay isip resulta sa pagpamakak ngadto ni Pedro ug ngadto sa Dios. Si Pedro ug si Juan nagpadayon sa paghimo og mga milagro, nga nakapasuko sa mga sacerdote nga punoan. Gidakop na usab sila ug gipriso, apan gibuhian sila sa usa ka anghel. Misulti nila ang anghel sa pag-adto sa templo ug pagsangyaw sa ebanghelyo.

Paghunahuna og usa ka panahon sa dihang nangayo ka og piho nga butang (tingali regalo sa adlawng natawhan o Pasko) apan nakadawat hinoon og lain. Sa unsang paagi kini nga kasinatian mapahisama sa pagpangayo og mga panalangin gikan sa Langitnong Amahan pinaagi sa pag-ampo?

Samtang magtuon ka sa Mga Buhat 3, pangitaa ang baruganan nga makatabang nimo kon dili ka makadawat sa mga tubag o mga panalangin nga imong gipaabut gikan sa Ginoo.

Basaha ang Mga Buhat 3:1–3, nga mangita kon kinsa ang nahimamat ni Pedro ug Juan sa ganghaan sa templo.

Pamalandong kon unsay bation kon kamo sama sa kahimtang sa bakul nga tawo. Gikan sa imong kasinatian, unsa ang pipila ka paagi nga ang mga tawo motubag sa pagpakilimos niini nga tawo, o tabang sama sa kwarta o pagkaon?

Basaha ang Mga Buhat 3:4–7, nga mangita unsay gihimo ni Pedro niining tawhana.

Unsay nakapadani nimo sa gisulti ug gibuhat ni Pedro?

Imahe

Si Pedro uban sa bakul nga tawo

Basaha ang Mga Buhat 3:8, nga mangita kon unsay gibuhat sa tawo human si Pedro “mialsa kaniya” (Mga Buhat 3:7).

Sa unsa nga paagi nga ang panalangin nga nadawat niini nga tawo mas dako pa kay sa limos (kwarta) nga iyang gipangayo?

Atong mapahisama kini nga asoy sa atong mga kinabuhi. Mahimong dili tubagon sa Langitnong Amahan ang atong mga pag-ampo sa mga paagi nga atong gusto o gipaabut Kaniya, apan ang Iyang mga tubag sa kanunay alang sa atong mas dakong kaayohan.

Sa asoy nga narekord sa Mga Buhat 3:1–8, klaro nga unsay nadawat niini nga tawo mas dako pa kay sa iyang gipangayo. Hinoon, sa ubang mga higayon dili tingali klaro nga unsay atong nadawat mas dako kay sa unsay atong gipangayo.

1. Sa imong scripture study journal, isulat ang usa ka kasinatian diin ang tubag sa Ginoo sa imong mga pag-ampo lahi gikan sa tubag nga imong gitinguha apan nahimo nga mas makaayo alang kanimo.

Hunahunaa nga apil ka sa mga tawo didto sa templo kinsa nakasaksi sa pagkaayo sa bakul nga tawo. Tingali imong nakita pirme ang bakul nga tawo nga nagpakilimos sa imong pagsulod nianang ganghaan sa templo. Dayon, usa ka adlaw, nakakita ka kaniya nga naglukso-lukso ug nagdagan-dagan human siya mamaayo. Unsa sa imong hunahuna mausab kaha ang imong pagtan-aw ni Pedro ug Juan human makasaksi niini nga milagro?

Basaha ang Mga Buhat 3:9–11, nga mangita kon unsay reaksyon sa mga tawo sa pagkaayo niini nga tawo.

Basaha ang Mga Buhat 3:12–18, nga mangita kon giunsa pagpasabut ni Pedro ang pagkaayo niining bakul nga tawo ngadto sa katawhan. Panid-i kinsa ang gihatagan ni Pedro og kredito sa pagkaayo niini nga tawo.

Gikan sa mga aksyon ug mga pulong ni Pedro, makat-unan nato nga ang mga sulugoon ni Jesukristo makahimo og mga milagro pinaagi sa hugot nga pagtuo sa Iyang pangalan.

Basaha ang Mga Buhat 3:19, nga mangita sa pagdapit ni Pedro ngadto sa katawhan. (Mga Buhat 3:19–21 usa ka scripture mastery passage. Mahimo nimong markahan kini sa lahi nga paagi aron sayon ra nimo kining makit-an.)

Mihatag og paglaum si Pedro niadtong iyang gisultihan pinaagi sa pagtudlo kanila nga sila usab mahimong malimpyohan pinaagi sa hugot nga pagtuo sa Ginoong Jesukristo ug sa Iyang Pag-ula.

Panid-i ang mga pulong “panahon sa kahayahay” sa Mga Buhat 3:19. Si Elder Bruce R. McConkie sa Korum sa Napulog Duha ka mga Apostoles mipasabut:

Imahe

Elder Bruce R. McConkie

“Kining gitudlo nga panahon, kining panahon sa kahayahay, mahitabo sa ikaduhang pag-anhi sa Anak sa Tawo, sa adlaw nga ang Ginoo mopadala ni Kristo pag-usab nganhi sa yuta.

“… Mao kini ang adlaw nga ‘ang yuta pagabag-ohon ug makadawat sa iyang paraisohanon nga himaya.’ (Ikanapulo nga Artikulo sa Hugot nga Pagtuo.) Mao kini ang adlaw sa ‘bag-ong yuta’ nga nakita ni Isaias (Isa. 65:17), ang yuta nga magpadayon kon ang pagkadautan mohunong, sa higayon nga ang panahon sa milenyum magsugod” (sa Conference Report, Okt. 1967, 43).

Imahe

Ang Ikaduha nga Pag-anhi

Basaha ang Mga Buhat 3:20–21, nga mangita kon unsa pay mahitabo atol niining higayuna.

Ang pulong “panahon sa pagtuman na sa tanang gisulti” sa Mga Buhat 3:21 nagpasabut sa Pagpahiuli sa ebanghelyo sa ulahing mga adlaw. Gikan sa Mga Buhat 3:20–21, atong makat-unan nga ang mga propeta sa tanang panahon nanagna sa Pagpahiuli sa ebanghelyo sa ulahing mga adlaw.

Sumala sa narekord sa Mga Buhat 3:22–26, si Pedro nagpamatuod nga si Moises “ug ang tanang mga propeta sukad pa kang Samuel ug sa mga nagsunod kaniya” (Mga Buhat 3:24) namulong mahitungod ni Jesukristo ug nagpasidaan sa mga sangputanan sa pagsalikway Kaniya (tan-awa sa Mga Buhat 3:23). Sa moderno nga pagpadayag si anghel Moroni misubli niini nga tudling ngadto ni Joseph Smith, nagmatuod sa mga sangputanan sa pagsalikway kang Jesukristo (tan-awa sa Joseph Smith—Kasaysayan 1:41).

2. Hunahunaa nga ikaw usa ka misyonaryo ug nga usa ka investigator nangutana, “Asa sa Biblia ang nag-ingon nga ang ebanghelyo ipahiuli sa katapusang mga adlaw?” Sa imong scripture study journal, tubaga kini nga pangutana gamit ang Mga Buhat 3:19–21 ug usa ka laing tudling sa Biblia. Ikonsiderar ang pagpangita ubos sa “Restoration of the Gospel” diha sa Topical Guide.

Imahe

Sila si Pedro ug Juan sa atubangan sa Sanhedrin

Sa Mga Buhat 4:1–31 ug Mga Buhat 5:12–42 atong makat-unan ang mosunod: Gidakop sila si Pedro ug Juan tungod sa pag-ayo ug pagsangyaw pinaagi sa pangalan ni Jesukristo. Maisugong namahayag si Pedro sa ebanghelyo ngadto sa Sanhedrin, nga mao “ang senado sa Judeo ug ang labing taas nga korte sa eklesiastikanhong mga butang” (Giya ngadto sa mga Kasulatan, “Sanhedrin,” scriptures.lds.org). Human sila buhii, sila si Pedro ug Juan nagpadayon sa pagsangyaw sa pangalan ni Jesus ug gidakop pag-usab. Gibunalan sila, giingnan pag-usab sa paghunong sa pagsulti pinaagi sa pangalan ni Jesukristo, ug dayon gibuhian. Hinoon, wala sila mohunong sa pagtudlo sa pangalan ni Jesus.

Ikonsiderar ang mosunod nga senaryo: Usa ka batan-ong lalaki nag-andam sa pagserbisyo og misyon. Nakahibalo siya nga ang bishop mangutana mahitungod sa iyang katakus sa pagserbisyo og misyon, ug siya naghunahuna kon mosulti ba o dili sa bishop mahitungod sa usa ka seryoso nga sala nga iyang nabuhat kaniadto.

Samtang magtuon ka sa Mga Buhat 4:32–5:11, pangitaa ang baruganan nga makatabang nimo nga makasabut sa panginahanglan nga magmatinuoron uban sa mga sulugoon sa Dios.

Sa Mga Buhat 4:32 atong makat-unan nga ang mga Santos (mga miyembro sa Simbahan) sa panahon ni Pedro nagsunod sa balaod sa pagpahinungod, nga nagpasabut nga sila nakigsaad sa Dios nga boluntaryo nga mopakigbahin sa ilang pisikal nga mga kabtangan aron ang mga panginahanglan sa tanan matubag.

Basaha ang Mga Buhat 4:34–35, nga mangita kon giunsa nila pagpahinungod sa ilang mga kabtangan ngadto sa Ginoo.

Basaha ang Mga Buhat 5:1–2, mangita unsay gibuhat sa magtiayon nga ginganlan og Ananias ug Safira sa kwarta nga ilang nadawat gikan sa pagbaligya sa yuta. Ang pulong nahibaloan sa bersikulo 2 nagpasabut nga nakahibalo og usa ka butang.

Unsay gibuhat ni Ananias ug Safira nga usa ka seryoso nga sala?

Basaha ang Mga Buhat 5:3–4, nga mangita unsay gisulti ni Pedro ngadto kang Ananias.

Sumala sa bersikulo 4, kinsa man gayud ang gilimdan ni Ananias?

Gikan sa tubag ni Pedro, atong makat-unan nga kon kita mamakak ngadto sa mga sulugoon sa Dios, pareha ra nga namakak ngadto Kaniya.

Basaha ang Mga Buhat 5:5–11, nga mangita unsay nahitabo ngadto nila ni Ananias ug Safira isip sangputanan sa pagsupak sa ilang pakigsaad ug pagpamakak ngadto ni Pedro ug ngadto sa Dios.

Imahe

Presidente Gordon B. Hinckley

Si Presidente Gordon B. Hinckley mitudlo mahitungod sa pipila ka mga sangputanan nga atong masinati kon kita mamakak ngadto sa Ginoo o sa Iyang mga sulugoon: “Sa atong panahon kadtong masakpan nga manlimbong dili mamatay sama sa nahitabo nilang Ananias ug Safira, apan adunay usa ka butang nga anaa sa sulod kanila ang mamatay. Ang tanlag samukon, ang kinaiya mohuyang, ang pagtahud sa kaugalingon mawala, ang kaligdong mamatay” (“We Believe in Being Honest,” Ensign, Okt. 1990, 4).

3. Ribyuha ang senaryo mahitungod sa batan-ong lalaki nga nag-andam sa iyang interbyu sa misyon. Sa imong scripture study journal, paghimo og sulat ngadto niining batan-ong lalaki, magpasabut unsay iyang kinahanglang buhaton mahitungod sa pagpamakak ngadto sa priesthood lider.

Palandunga unsa nga mga panalangin ang moabut tungod sa pagkamatinuoron sa hingpit uban sa mga sulugoon sa Ginoo.

Gikan sa asoy nila ni Ananias ug Safira, atong makat-unan ang panginahanglan nga magmatinuoron sa hingpit uban sa atong mga priesthood lider. Dugang pa, kinahanglang magmatinuoron kita sa atong tanang mga pakigsandurot sa uban. Unsay gipasabut niini nganha kanimo nga magmatinuoron sa imong pakigsandurot sa uban?

Si President Hinckley dugang nga mitudlo: “Kadtong nagsunod sa baruganan sa pagkamatinuoron nasayud nga ang Ginoo mopanalangin kanila. Ila ang bililhong katungod sa paghangad ngadto sa kahayag sa kamatuoran, dili maulaw ni bisan kinsa nga tawo. Sa laing bahin, kon dunay panginahanglan nga mag-usab ni bisan kinsa nga miyembro niini nga Simbahan, sugdi kini diin kita magbarug karon” (“We Believe in Being Honest,” 5).

4. Isulat ang mosunod sa ubos sa imong mga assignment karong adlawa diha sa imong scripture study journal:

   Akong natun-an ang Mga Buhat 4–5 ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: