Si Apostol Juan nakakita diha sa panan-awon sa milenyal nga adlaw ug sa Katapusang Paghukom. Siya usab nakakita sa “usa ka bag-ong langit ug ang usa ka bag-ong yuta” (Pinadayag 21:1) ug sa celestial nga siyudad sa Dios nga i-establisar dinhi sa yuta. Gitapos ni Juan ang iyang rekord uban sa usa ka hangyo nga ang Ginoo mobalik sa yuta.
Si Juan nakakita sa milenyal nga adlaw ug sa Katapusang Paghukom
Imahe
The Last Judgment
Isip kabahin sa plano sa Langitnong Amahan sa kaluwasan, ang matag tawo nga nakapuyo dinhi sa yuta mobarug atubangan sa Dios aron pagahukman. Hunahunaa kon sama sa unsa kaha ang Katapusang Paghukom.
Sa imong scripture study journal, isulat ang gilauman nimo nga panghunahuna ug pagbati kon magbarug ka sa atubangan sa Dios aron pagahukman.
Sumala sa narekord diha sa Pinadayag 20:1–11, nakita ni Juan nga si Satanas gapuson panahon sa Milenyum ug ang mga matarung mabanhaw isip kabahin sa Unang Pagkabanhaw. Nakita usab niya nga si Satanas “buhian sa makadiyot” sa katapusan sa Milenyum (Pinadayag 20:3). Human si Satanas ug ang iyang mga sumusunod makig-away batok sa mga Santos sa katapusang higayon, siya “itambog ngadto sa linaw nga kalayo ug asupre … hangtud sa kahangturan” (Pinadayag 20:10). Dayon ang Katapusang Paghukom mahitabo.
Basaha ang Pinadayag 20:12, nga mangita kon unsaon kita paghukom sa Dios. (Ang Pinadayag 20:12 usa ka scripture mastery passage. Mahimo nimo kining markahan sa lahi nga paagi aron sayon nimo kining makit-an sa umaabut.)
Kompletuha ang mosunod nga doktrina nga atong nakat-unan gikan niini nga bersikulo: Ang Dios mohukom kanato pinasikad sa sumala sa .
Ang mga basahon nga gipasabut diha sa Pinadayag 20:12 naglakip sa mga kasulatan, mga rekord sa Simbahan nga nagrekord sa makaluwas nga mga ordinansa, ug sa basahon sa kinabuhi.
Basaha ang mosunod nga pagpasabut sa basahon sa kinabuhi: “Sa usa ka pagsabut ang basahon sa kinabuhi mao ang sumada sa tanang mga hunahuna ug mga binuhatan sa usa ka tawo—ang talaan sa iyang kinabuhi. Hinoon, ang mga kasulatan nagpasabut nga usa ka langitnong rekord ang gitipigan kabahin sa mga matinud-anon, kansang mga ngalan nahisulat, ingon man usab usa ka saysay sa ilang matarung nga mga buhat (D&P 88:2; 128:7)” (Bible Dictionary sa LDS English version sa Biblia, “Book of Life”).
Basaha ang Pinadayag 20:13, nga mangita kon unsay mahitabo sa dili pa ang Katapusang Paghukom.
Ang mga dautan ug dili mahinulsulon pagabanhawon sa katapusan nga Pagkabanhaw, sa katapusan sa Milenyum, ug mobarug usab aron pagahukman sumala sa ilang mga buhat (tan-awa sa D&P 76:85).
Hunahunaa ang nag-unang doktrina nga imong nahibaloan (Ang Dios mohukom kanato pinasikad sa mga basahon nga nahisulat sumala sa atong mga buhat). Dayon tubaga ang mosunod nga pangutana sa imong scripture study journal: Sa unsang paagi ang pagsabut ug pagtuo niini nga doktrina makaapekto sa atong mga binuhatan karon ug sa tibuok natong kinabuhi? Hunahunaa usab kon unsay mas maayo nimong mabuhat sa imong kinabuhi sa pag-andam alang sa Katapusang Paghukom ug aron makita ang imong ngalan nga nahisulat diha sa basahon sa kinabuhi.
Gamita ang mga scripture study tool sama sa mga footnote, ang Giya ngadto sa mga Kasulatan (scriptures.lds.org), ug ang Topical Guide sa LDS English version sa Biblia aron sa pagpangita og dugang nga mga kasulatan nga nagtudlo mahitungod sa Katapusang Paghukom. Paghimo og lista sa mga reference diha sa imong scripture study journal. Mahimo usab nimong isulat o timan-an kini nga mga reference diha sa imong mga kasulatan duol sa Pinadayag 20:12. Isulat sa imong scripture study journal ang dugang nga mga kamatuoran kabahin sa Katapusang Paghukom nga imong nakat-unan pinaagi niini nga mga cross-reference.
Si Juan nakakita og usa ka bag-o nga langit ug usa ka bag-o nga yuta ug sa celestial nga siyudad sa Dios
Imahe
young woman with hands gripping her head
Paghunahuna og usa ka higayon sa imong kinabuhi sa dihang nakasinati ka og dako nga kasubo o kasakit.
Paglista og pipila ka mga butang niini nga kinabuhi nga mahimong hinungdan sa atong dako nga kasubo o kasakit:
Samtang magtuon ka sa Pinadayag 21, pangita og kamatuoran nga makatabang sa paghatag kanimo og kahupayan atol sa lisud nga mga panahon.
Ang Pinadayag 21–22 usa ka pagpadayon sa panan-awon ni Apostol Juan sa mga panghitabo nga mahitabo human sa Ikaduhang Pag-anhi ni Jesukristo.
Basaha ang Pinadayag 21:1–2, nga mangita kon unsay nakita ni Juan nga mahitabo.
Ang paghisgut ni Juan sa “usa ka bag-ong langit ug usa ka bag-ong yuta” (Pinadayag 21:1) mahimong nagpasabut ngadto sa panghitabo nga mahitabo sa Ikaduhang Pag-anhi sa Ginoo, diha nga ang yuta mausab ngadto sa paraisohanon nga kahimtang nga maoy kahimtang niini sa wala pa ang Pagkapukan ni Adan ug Eva. Si Juan mahimong nagpasabut usab sa kausaban nga mahitabo sa katapusan sa Milenyum, sa diha nga ang yuta mausab ngadto sa celestial nga kahimtang (tan-awa sa D&P 29:22–24).
Basaha ang Pinadayag 21:3–4, nga mangita kon unsay buhaton sa Dios alang sa Iyang katawhan.
Gikan niini nga mga bersikulo atong makat-unan nga ang Dios mopuyo uban sa Iyang mga katawhan ug mohupay kanila, ug sila dili na makasinati og kamatayon, kasubo o kasakit.
Imahe
Elder Joseph B. Wirthlin
Si Elder Joseph B. Wirthlin sa Korum sa Napulog Duha ka mga Apostoles mipasabut nga ang Dios mobalos sa mga matarung alang sa tanang mortal nga mga kasubo ug kasakit: “Ang Ginoo mobalos sa matag matinud-anon sa matag mawala. Nga kana diin gikuha gikan niadtong nahigugma sa Ginoo mahimong idugang ngadto kanila sa Iyang kaugalingong pamaagi. Samtang kini dili moabut sa panahon nga kini atong gitinguha, ang matinud-anon mahimong masayud nga ang matag luha karon sa katapusan mahimong ibalik gatusan pil-a uban sa mga luha sa kalipay ug pasalamat” (“Bisan Unsa ang Mahitabo, ug Dawata Kini,” Ensign o Liahona, Nob. 2008, 28).
Tubaga ang mosunod nga pangutana sa imong scripture study journal: Sa unsang paagi ang pagkasayud nga ang Dios mohupay sa Iyang mga katawhan ug mobalos sa ilang mga kasubo ug kasakit makatabang kanato kon kita makasinati og mga hagit karon?
Basaha ang Pinadayag 21:7, nga mangita kon unsay gisaad sa Ginoo niadtong matinud-anong makabuntog.
Base sa unsay imong nakat-unan gikan sa basahon sa Pinadayag mahitungod sa mga hagit ug mga kasamok sa katapusang mga adlaw, unsa nga mga matang sa mga butang ang gikinahanglan natong buntugon aron makapuyo uban sa Dios?
Ang Pinadayag 21:8 naghulagway sa kahimtang sa mga masinupakon ug dili mahinulsulon. Ang “ikaduhang kamatayon” mao ang espiritwal nga kamatayon, o ang pagkahimulag gikan sa Dios, nga masinati niadtong tuyo nga misupak batok sa kahayag ug kamatuoran.
Basaha ang Pinadayag 21:9–21, nga mangita sa paghulagway ni Juan sa celestial nga siyudad sa Dios.
Basaha ang Pinadayag 21:22–27, nga mangita kon unsa unya ang presensya sa Langitnong Amahan ug ni Jesukristo alang niadtong nagpuyo niini nga siyudad.
Sa Pinadayag 22 atong mabasa ang dugang paghulagway ni Apostol Juan sa balaan nga siyudad sa Dios. Isip kabahin sa iyang paghulagway, si Juan mihisgut og usa ka trono (tan-awa sa Pinadayag 22:1).
Imahe
drawing of throne
Basaha ang Pinadayag 22:1–2, ug drowinga kon unsa pay nakita ni Juan agi og dugang sa trono.
Timan-i nga nahibaloan ni Juan nga ang kahoy namunga og daghan sa tanang panahon ug nga ang mga dahon niini makaayo sa mga nasud. Ang Basahon ni Mormon nagrekord nga si Lehi ug Nephi parehong nakakita og panan-awon sa kahoy sa kinabuhi. Si Nephi nakakat-on nga ang kahoy ug ang tuburan sa buhi nga tubig nagrepresentar sa gugma sa Dios (tan-awa sa 1 Nephi 11:25). Ang labing dakong pagpakita sa gugma sa Dios mao ang Pag-ula ni Jesukristo (tan-awa sa Juan 3:16; 1 Juan 4:9). Ang bunga sa kahoy mahimong nagrepresentar usab sa mga panalangin sa Pag-ula, sama sa kinabuhing dayon (tan-awa sa D&P 14:7).
Sa Pinadayag 22:3–12, atong mabasa nga agig dugang sa pagkakita niining celestial nga siyudad, si Juan nakadawat usab og pagsaksi gikan sa anghel nga namulong kaniya nga ang mga butang nga gipadayag ngadto kaniya tinuod. Si Juan nakakita usab nga ang Manluluwas moganti sa tanan nga mga tawo sumala sa ilang mga buhat.
Basaha ang Pinadayag 22:14, nga mangita kon unsay kinahanglan natong buhaton aron tugutan nga makasulod sa celestial nga gingharian.
Ang “makabaton … sa katungod sa pagpahimulos sa kahoy nga naghatag sa kinabuhi” (Pinadayag 22:14) nagpasabut nga mahimong takus sa pagdawat sa tanang mga panalangin sa Pag-ula ni Jesukristo, lakip ang kinabuhing dayon.
Gikan niini nga bersikulo atong makat-unan nga kon kita mosunod sa mga sugo sa Ginoo, niana makadawat kita sa tanang panalangin sa Pag-ula ni Jesukristo ug makasulod sa celestial nga gingharian. Ang pagsunod sa Iyang mga sugo naglakip sa pagdawat sa tanang mga ordinansa nga gikinahanglan aron makasulod sa celestial nga gingharian.
Bisan og ang pipila ka mga panalangin sa Pag-ula—sama sa gasa sa pagkabanhaw—libre nga gihatag ngadto sa tanang mga anak sa Dios, ang ubang mga panalangin—sama sa kinabuhing dayon—maanaa lamang niadtong makugihong nagtinguha sa paggamit sa hugot nga pagtuo diha ni Jesukristo, naghinulsol, ug nagsunod sa Iyang mga sugo.
Sa Pinadayag 22:15–19 atong mabasa nga kadtong wala magsunod sa mga sugo sa Ginoo dili makasulod sa celestial nga siyudad. Si Jesukristo mipamatuod nga Siya mihatag niini nga pagpadayag ngadto kang Juan, ug si Juan nagdapit sa tanan sa pagduol ngadto sa mga tubig sa kinabuhi aron moinom nga gawasnon. Mipahimatngon si Juan sa iyang mga mambabasa nga dili mousab sa mensahe sa basahon nga iyang gisulat.
Basaha ang Pinadayag 22:20, nga mangita kon unsay gihangyo ni Juan sa Manluluwas.
Base sa unsay imong nakat-unan sa basahon sa Pinadayag, ngano kaha nga gikahinaman ni Juan ang pag-abut sa Ginoo?
Congratulations sa paghuman niini nga kurso sa seminary sa Bag-ong Tugon. Hunahunaa ang unsay imong nakat-unan ug gibati karong tuiga, ug paggahin og gamayng panahon sa pagsulat diha sa imong scripture study journal sa pipila sa mga pagtulun-an sa Bag-ong Tugon nga nakaapekto kaayo kanimo karong tuiga. Isulat usab kon sa unsang paagi ang imong pagpamatuod naapektuhan sa imong mga pagtuon sa seminary. Pangita og oportunidad sa pagtudlo ug pagpamatuod sa unsay imong nakat-unan.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Pinadayag 20–22 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: