Gitudloan ni Apostol Pablo ang mga Santos sa Efeso nga ang tanang mga makasasala mahimong maluwas pinaagi sa grasya sa Dios ug nga ang mga Judeo ug mga Hentil nahimong usa diha sa panimalay sa Dios. Gipasabut usab ni Pablo nga ang Simbahan ni Jesukristo gitukod diha sa pundasyon sa mga apostoles ug mga propeta, ug gipakigbahin niya ang iyang tinguha nga ang mga Santos makasinati sa gugma ni Jesukristo.
Nagtudlo si Pablo kon sa unsang paagi nga ang dugo ni Jesukristo nakaluwas sa Judeo ug Hentil
Hunahunaa ang usa ka panahon sa dihang mibati ka nga wala maapil o nalahi sa uban.
Sa panahon nga gisulat ni Apostol Pablo ang iyang epistola ngadto sa mga taga-Efeso, ang pipila ka mga miyembro sa Simbahan nga mga Judeo mibati nga mas labaw sila sa mga kinabig nga hentil tungod kay ang mga Judeo mga Israelite sa pagkatawo ug ang mga lalaki nakaagi og sirkunsisyon.
Basaha ang Mga Taga-Efeso 2:1–3, nga mangita kon giunsa paghulagway ni Pablo ang espirituhanong kahimtang sa mga Santos nga hentil (kamo [you] ug kamo [ye] diha sa mga bersikulo 1–2) ug sa mga Santos nga Judeo (kita diha sa bersikulo 3) sa wala pa ang ilang pagkakabig ngadto sa Manluluwas ug sa Iyang Simbahan. Ang mga pulong nga “magbubuot sa kagamhanan sa kahanginan” diha sa bersikulo 2 nagpasabut sa yawa ug sa iyang impluwensya sa tibuok kalibutan.
Sumala sa mga bersikulo 1–2, unsa man ang espirituhanong kahimtang sa mga Hentil sa wala pa ang ilang pagkakabig?
Sumala sa bersikulo 3, unsa man ang espirituhanong kahimtang ni Pablo ug sa mga Judeo sa wala pa ang ilang pagkakabig?
Gihulagway ni Pablo ang mga Hentil ug ang mga Judeo nga patay sa espirituhanon, o nahibulag gikan sa Dios, tungod sa ilang mga sala (tan-awa sa bersikulo 1). Nagsunod sila sa mga pamaagi o mga tinguha sa unod ug sa ingon mipaubos sa ilang kaugalingon ngadto sa kasuko sa Dios.
Basaha ang Mga Taga-Efeso 2:4–6, nga mangita sa espirituhanong kahimtang sa mga Santos nga hentil ug Judeo human sa ilang pagkakabig. Ang pulong nga nagbuhi diha sa bersikulo 5 nagpasabut nga gibuhi, ug nga ang mga pulong nga “mga langitnong dapit” diha sa bersikulo 6 nagpasabut sa celestial nga gingharian (tan-awa sa Bruce R. McConkie, Doctrinal New Testament Commentary, 3 vols. [1965–73], 2:500).
Hibaloi nga human sa ilang pagkakabig, ang Ginoo nagbuhi sa mga Judeo ug mga Hentil, o mipabuhi kanila gikan sa ilang kahimtang sa pagkamatay sa espirituhanong paagi ug pagkamakasasala. Gipasabut nato kini isip espirituhanong pagkatawo pag-usab o pagkaluwas gikan sa atong mga sala.
Basaha ang Mga Taga-Efeso 2:7–10, nga mangita kon unsay hinungdan nga nahimo sa mga Hentil ug mga Judeo kini nga kausaban.
Kining mga bersikulo nagtudlo sa mosunod nga kamatuoran: Tungod sa grasya sa Dios, ang tanang katawhan mahimong maluwas pinaagi sa hugot nga pagtuo diha ni Jesukristo.
Ang tinuod nga pagtuo diha ni Jesukristo kanunayng moresulta sa pagsunod Kaniya ug sa paghimo og maayong mga buhat. Hibaloi nga gihatagan og gibug-aton ni Pablo nga dili nato maluwas ang atong kaugalingon, bisan unsa pa kamaayo ang atong mga gibuhat (tan-awa sa Mga Taga-Efeso 2:8–9). Si Presidente Dieter F. Uchtdorf sa Unang Kapangulohan mipasabut sa atong panginahanglan alang sa grasya sa Dios:
Imahe
President Dieter F. Uchtdorf
“Sanglit kitang tanan ‘nakasala, ug nakabsan sa himaya sa Dios’ [Mga Taga-Roma 3:23] ug tungod ‘walay butang nga mahugaw nga makasulod sa gingharian sa Dios’ [1 Nephi 15:34], kitang tanan dili takus sa pagbalik ngadto sa presensya sa Dios.
“Bisan kon kita moalagad sa Dios uban sa tibuok natong mga kalag, kini dili igo, tungod kay kita sa gihapon ‘dili mapuslanon nga mga sulugoon’ [Mosiah 2:21]. Dili kita makaangkon sa atong agianan ngadto sa langit; ang gipangayo sa hustisya nagbarug isip babag, diin kita walay gahum sa pagbuntog sa atong kaugalingon.
“Apan ang tanan wala mawagtang.
“Ang grasya sa Dios mao ang atong importante ug walay katapusan nga mga paglaum.
“Pinaagi sa sakripisyo ni Jesukristo, ang plano sa kalooy nagtagbaw sa mga gipangayo sa hustisya [tan-awa sa Alma 42:15] ‘ug [modala] og mga kahigayunan ngadto sa mga tawo nga sila mahimo nga makabaton og hugot nga pagtuo ngadto sa paghinulsol’ [Alma 34:15].
“Ang atong mga sala, bisan pa kini mapula, kini pagapution ingon sa nieve [tan-awa sa Isaias 1:18]. Tungod kay ang atong hinigugma nga Manluluwas ‘naghatag sa iyang kaugalingon ingon nga lukat alang sa tanan’ [1 Timoteo 2:6], usa ka agianan ngadto sa Iyang mahangturong gingharian nga giandam kanato [tan-awa sa 2 Pedro 1:11].
“Ang ganghaan giablihan! …
“Aron mapanunod kini nga himaya, kita nagkinahanglan og labaw kay sa naabli nga ganghaan; kita kinahanglan nga mosulod pinaagi niini nga ganghaan uban sa sinserong tinguha nga mag-usab—kausaban nga hilabihan ka mahinuklugon nga gihulagway kini sa mga kasulatan og ‘matawo pag-usab; oo, matawo sa Dios, mausab gikan sa [atong kalibutanon] ug napukan nga kahimtang, ngadto sa usa ka kahimtang sa pagkamatarung, ingon nga natubos sa Dios, nahimo nga iyang anak nga mga lalaki ug anak nga mga babaye’ [Mosiah 27:25]. …
“Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan” (“Ang Gasa sa Grasya,” Ensign o Liahona, May 2015, 108, 110).
Tubaga ang mosunod nga pangutana diha sa imong scripture study journal: Sa unsang paagi nga ang pagpakita og hugot nga pagtuo diha ni Jesukristo ug paghinulsol sa atong mga sala makatabang nga madawat nato ang gasa sa grasya sa Dios?
Imahe
detail, model of Herod’s temple
Ang nag-uban nga hulagway nagpakita og bahin sa usa ka modelo sa templo ni Herodes didto sa Jerusalem. Ang arrow mipunting ngadto sa “nag-ulang nga bongbong” (Mga Taga-Efeso 2:14) sa gawas nga hawanan sa templo. Tungod kay ang mga Hentil dili mga Israelite sa pagkatawo, ang pagpuyo ubos sa balaod ni Moises, gidid-an sila nga molapas niini nga bongbong ngadto na sa mas sagradong mga dapit sa templo. Gikonsiderar sila nga “mga dumuloong [mga langyaw] nga nahigawas sa katilingban sa Israel, ug mga dumuloong sa mga pakigsaad mahitungod sa saad” (Mga Taga-Efeso 2:12). Ang pisikal nga nag-ulang nga bongbong nagsimbolo sa espirituhanong panaglahi tali sa mga Judeo ug mga Hentil sa wala pa ang pagpadayag ngadto ni Pedro nga ang ebanghelyo isangyaw ngadto sa mga Hentil.
Basaha ang Mga Taga-Efeso 2:12–15, nga mangita kon unsay nakabungkag sa babag tali sa mga Judeo ug sa mga Hentil.
Sumala niining mga bersikulo, unsa man ang mihiusa sa mga Hentil ug sa mga Judeo?
Pinaagi sa dugo ni Kristo (sa Pag-ula), ang dili literal nga bongbong nga mibulag sa mga Judeo ug mga Hentil sa espirituhanong paagi gitangtang, ug nahimo silang “usa ka bag-ong tawo” (Mga Taga-Efeso 2:15), o usa ka hiniusa nga lawas, o grupo, diha ni Kristo. Mahimo nimong isulat ang mosunod nga kamatuoran duol sa Mga Taga-Efeso 2:12–15: Samtang moduol kita kang Jesukristo ug moambit sa Iyang grasya, mahimo kitang mahiusa uban sa mga Santos sa Dios.
Basaha ang Mga Taga-Efeso 2:16–19, nga mangita sa mga pulong nga naghatag og gibug-aton sa kamatuoran nga samtang moduol kita kang Jesukristo ug moambit sa Iyang grasya, mahimo kitang mahiusa uban sa mga Santos sa Dios.
Ikonsiderar sa imong hunahuna nganong kini nga kamatuoran importante nga masabtan ug magamit nato sa Simbahan karon.
Tubaga ang mosunod nga mga pangutana diha sa imong scripture study journal:
Unsaon nato sa pagtabang sa uban nga mahimo o mobati pag-usab nga sama sa “katagi-lungsod” (Mga Taga-Efeso 2:19) diha sa Simbahan imbis nga mga estranghero?
Kanus-a man nga ang usa ka tawo mitabang nimo nga mobati nga sama sa usa ka katagi-lungsod uban sa mga Santos imbis nga usa ka estranghero?
Kanus-a man nga mitabang ka sa usa ka tawo nga mobati sa samang paagi?
Hunahunaa ang usa ka tawo nga imong nailhan nga mahimong makabenepisyo pinaagi sa pagtambong og usa ka kalihokan sa Simbahan. Imbitara kining tawhana sa umaabut nga kalihokan o miting sa Simbahan, ug paghimo og makanunayong paningkamot sa pagtabang niining indibidwal nga mobati nga giabi-abi diha sa imong ward o branch.
Basaha ang Mga Taga-Efeso 2:20–22, nga mangita sa unsay gitudlo ni Pablo nga mao ang pundasyon sa Simbahan.
Kompletuha ang mosunod nga kamatuoran base sa mga pagtulun-an ni Pablo niadtong mga bersikulo: Ang Simbahan sa Ginoo gitukod diha sa , nga si Jesukristo mao ang .
Ang bato sa pamag-ang usa ka dakong bato nga gipahimutang diha sa pamag-angan sa pundasyon aron sa paghatag og kalig-on ug kasiguroan sa tibuok building.
Imahe
cornerstone
Sa unsang paagi nga si Jesukristo mao ang “ulohang bato sa pamag-ang” (Mga Taga-Efeso 2:20) sa Simbahan?
Samtang magkonsiderar ka sa Mga Taga-Efeso 2:21–22, hunahunaa kon unsay mahitabo sa tibuok Simbahan tungod niining Bato sa Pamag-ang.
Tubaga ang mosunod nga mga pangutana diha sa imong scripture study journal.
Sa unsang mga paagi nga ang mga apostoles ug mga propeta nagporma sa nahabiling pundasyon sa Simbahan?
Sa unsang paagi nga kining pundasyon makahatag og kasiguroan ngadto sa Simbahan ug makapanalipod batok sa mga pag-ataki sa yawa?
Si Pablo mipahayag sa iyang mga tinguha alang sa mga Santos nga taga-Efeso
Sama sa narekord diha sa Mga Taga-Efeso 3:1–16, si Apostol Pablo misangyaw bahin ni Jesukristo ug nagtudlo nga pinaagi Kaniya, ang mga Hentil mahimong “isigkamanununod” (bersikulo 6) uban sa Israel ug mga tig-ambit sa mga saad sa Dios. Ang pangalagad ni Pablo mao ang pagsangyaw sa ebanghelyo ni Jesukristo ngadto sa mga Hentil.
Basaha ang Mga Taga-Efeso 3:17–19, nga mangita sa unsay gitinguha ni Pablo nga mahibaloan ug mabati sa mga Santos.
Sumala niining mga bersikulo, unsa man ang gusto ni Pablo nga mahibaloan ug mabati sa mga Santos?
Gikan sa Mga Taga-Efeso 3:1–19 atong makat-unan nga ang mga apostoles ug mga propeta nagtinguha sa pagtabang sa mga anak sa Dios nga mahibalo ug mobati sa gugma ni Jesukristo.
Tubaga ang mosunod nga mga pangutana diha sa imong scripture study journal.
Sa unsang paagi nga ang mga apostoles ug mga propeta nagtabang sa mga anak sa Dios nga masabtan ang mga panalangin sa kahimayaan ug mobati sa gugma ni Jesukristo sa atong panahon?
Kanus-a man nga ang mga pagtulun-an sa mga apostoles ug mga propeta nakatabang nimo nga masabtan ang mga panalangin sa kahimayaan o mobati sa gugma ni Jesukristo sa imong kinabuhi?
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Mga Taga-Efeso 2–3 ug nahuman kini nga leksyon sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: