Mga Taga-Roma 4–7

Si Pablo mipasabut kon sa unsang paagi si Abraham gihatagan og kaangayan pinaagi sa grasya. Dayon siya mihulagway sa mga panalangin nga moabut niadtong nahatagan og kaangayan ug mitudlo nga ang bunyag nagsimbolo sa pagkahimong patay ngadto sa sala ug pagkabuhi diha ni Kristo.

Hunahunaa nga ikaw mamatay na sa kauhaw sa usa ka desiyerto ug nga adunay usa ka botelya nga tubig sa ibabaw sa duol nga bungtod. Asa niini nga mga opsyon ang moluwas kanimo?

Imahe

drawing, man crawling in desert

1. Ang imong pagtuo nga ang tubig makaluwas nimo.

2. Ang imong paningkamot sa pagkuha sa tubig ug moinom niini.

3. Ang tubig.

Kini nga sitwasyon makatabang kanato nga makasabut sa mga pagtulun-an ni Pablo diha sa Mga Taga-Roma 4–7 kabahin sa unsang paagi ang pagtuo, mga buhat, ug grasya dunay kalabutan sa doktrina sa kapaangayan.

Atong nakat-unan sa Mga Taga-Roma 1–3 nga ang mahatagan og kaangayan nagpasabut nga napasaylo gikan sa silot sa sala ug gihimong matarung pinaagi sa Pag-ula ni Jesukristo (tan-awa sa D&P 76:69).

Pipila sa mga Santos nga Judeo sa Roma gihatagan og sobrang gibug-aton ang kaimportante sa ilang kaugalingong mga paningkamot ug sa balaod ni Moises aron mahatagan og kaangayan. Sa unsang paagi kaha nga ang pipila ka mga tawo karon adunay susama nga sayop nga pagsabut sa kapaangayan?

Asa sa tulo ka mga opsyon diha sa sitwasyon ang mahimong nagrepresentar sa ideya nga kita mahimong maluwas pinaagi sa atong mga buhat? ____

Si Pablo naningkamot aron makorihian kining sayop nga pagsabut pinaagi sa pagpahinumdom sa mga Judeo kabahin sa karaan nga patriyarka nga si Abraham, kinsa nakita sa kadaghanan sa mga Judeo nga nahatagan og kaangayan.

Ang Joseph Smith Translation sa Mga Taga-Roma 4:2–5 nagklaro nganong si Abraham gihatagan og kaangayan ug nahukman nga matarung: “Kay kon si Abraham nahimo pang matarung [nahatagan og kaangayan] tungod sa iyang mga binuhatan, siya magpasigarbo sa iyang kaugalingon; apan dili sa Dios. Kay unsa may ginaingon sa kasulatan? Si Abraham mituo sa Dios, ug kadto giisip kaniya nga maoy pagkamatarung. Karon ngadto kaniya nga nahimong matarung [nahatagan og kaangayan] tungod sa binuhatan, ang isuhol giisip, dili usa ka hatag, kondili usa ka bayad. Apan ngadto kaniya nga wala magtinguha nga mahatagan og kaangayan pinaagi sa binuhatan, apan mituo kaniya nga dili mohatag og kaangayan sa dili diosnon, ang iyang pagtuo pagaisipon nga maoy pagkamatarung niya.”

Unsa man ang wala kahatagi og kaangayan ni Abraham?

Hinumdumi nga si Pablo mitudlo nga “nakasala man ang tanan, ug nakabsan sa himaya sa Dios” (Mga Taga-Roma 3:23). Bisan kon sa katapusan hingpit kita nga nagtuman sa mga sugo, ang atong nangagi nga mga sala ug kalapasan maghimo gihapon kanato nga dili angay nga kahatagan og kaangayan pinaagi sa balaod sa buhat. Sa laing pagkasulti, aron mahatagan og kaangayan pinaagi sa balaod kita kinahanglan nga wala gayud makasala o bisan inosenting nakalapas sa balaod sa Dios.

Sa Mga Taga-Roma 4:6–15 atong makat-unan nga ang kaliwatan ug ang pagsunod sa balaod ni Moises walay gahum sa paglimpyo gikan sa sala.

Basaha ang Hubad ni Joseph Smith nga anaa sa Giya ngadto sa mga Kasulatan, nga mangita og mas kompleto nga pagpasabut kon sa unsang paagi kita mahatagan og kaangayan.

Usa ka doktrina nga atong makat-unan gikan sa Mga Taga-Roma 4:16 mao nga kita mahatagan og kaangayan pinaagi sa hugot nga pagtuo ug mga binuhatan pinaagi sa grasya. (Mahimo usab nimong isulat kini nga doktrina sa imong mga kasulatan tupad sa Mga Taga-Roma 4:16.)

Hinumdumi nga ang grasya nagpasabut sa mga panalangin, kalooy, tabang, ug kalig-on nga maanaa kanato tungod sa Pag-ula ni Jesukristo. I-refer ngadto sa sitwasyon sa sinugdanan sa leksyon. Asa sa tulo ka mga opsyon ang mahimong magrepresentar sa Pag-ula ni Jesukristo ug sa grasya sa Dios? ____

Asa nga opsyon ang mahimong magrepresentar sa atong hugot nga pagtuo diha Kaniya? ____

Kon anaa ka niana nga sitwasyon, maluwas ka ba pinaagi sa imong pagtuo ug mga paningkamot kon walay tubig sa ibabaw sa bungtod? Sa unsang paagi ang tubig niining sitwasyona sama sa Pag-ula ni Jesukristo ug sa grasya sa Dios?

Si Presidente Dieter F. Uchtdorf sa Unang Kapangulohan mitudlo:

Imahe

Presidente Dieter F. Uchtdorf

“Ang kaluwasan dili makuha pinaagi sa pagkamasulundon; kini gipalit pinaagi sa dugo sa Anak sa Dios [tan-awa sa Mga Buhat 20:28]. …

“Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan” (“Ang Gasa sa Grasya,” Ensign o Liahona, Mayo 2015, 109–10).

Bantayi nga samtang ang sitwasyon nga nanginahanglan og tubig diha sa desyerto nagtabang kanato nga makasabut kon sa unsang paagi ang hugot nga pagtuo, mga buhat, ug grasya nakatampo aron kahatagan og kaangayan, wala kini maghulagway sa tanang paagi nga atong madawat ang grasya sa Manluluwas. Si Jesukristo wala lamang maghatag og makaluwas sa kinabuhi nga tubig nga nagrepresentar sa grasya sa Dios, nga naghatag og kaangayan kanato ug naglimpyo kanato gikan sa sala; Siya usab nagtugot kanato nga makabaton og hugot nga pagtuo ug kalig-on nga atong gikinahanglan aron sa pagkuha sa tubig, o pag-access sa grasya sa Dios. Kita mapanalanginan niini nga grasya sa wala pa, atol, ug human kita mogamit og hugot nga pagtuo diha ni Jesukristo ug mohimo og maayong mga binuhatan.

Imahe

Elder David A. Bednar

Si Elder David A. Bednar sa Korum sa Napulog Duha ka mga Apostoles mitudlo: “Ang gahum sa Pag-ula naghimo sa paghinulsol nga posible ug mosanta sa kawalay paglaum gumikan sa sala; kini naglig-on usab kanato sa pagtan-aw, pagbuhat, ug paghimong mamaayo sa mga paagi nga dili gayud nato mailhan o matuman sa atong limitadong tawhanong kapasidad” (“Busa Sila Mihupay sa Ilang mga Kahadlok,” Ensign o Liahona, Mayo 2015, 47).

Sa unsang paagi ang Pag-ula ug grasya sa Dios makatabang kanato nga mogamit og hugot nga pagtuo kang Jesukristo ug mohimo og maayong mga buhat?

Ang pipila ka mga buhat nga angay natong buhaton aron sa pagpakita sa atong hugot nga pagtuo diha kang Kristo ug mahatagan og kaangayan pinaagi sa grasya sa Dios naglakip sa paghinulsol sa atong mga sala, pagsunod sa mga sugo, ug pagdawat sa makaluwas nga mga ordinansa sa ebanghelyo (tan-awa sa Moroni 10:32–33).

1. Hunahunaa nga duha sa imong mga higala naglalis mahitungod kon unsaon nato nga “maluwas.” Usa ka higala miingon nga ang ato lamang buhaton aron maluwas mao ang pagpahayag sa atong pagtuo kang Jesukristo. Ang laing higala mi-insister nga ang atong pagkamasulundon sa mga sugo mao ang magluwas kanato. Sa imong scripture study journal, isulat kon unsaon nimo pagpasabut ang relasyon sa hugot nga pagtuo, mga buhat, ug grasya ngadto sa imong mga higala.

Sama sa narekord diha sa Mga Taga-Roma 5, si Pablo mitudlo sa kalinaw nga moabut niadtong kinsa mo-access sa grasya sa Dios pinaagi sa hugot nga pagtuo diha ni Jesukristo (tan-awa sa mga bersikulo 1–2). Dugang siyang mipasabut nga ang grasya nga maanaa kanato tungod sa Pag-ula ni Kristo sobra pa sa gikinahanglan sa pagbuntog sa mga epekto sa Pagkapukan.

Hunahunaa nga ang imong higala nagplano nga moserbisyo unya og misyon apan naghimo karon og mga pagpili nga nagsupak sa mga sumbanan sa Ginoo. Sa dihang mipadayag ka og kabalaka sa kinaiya sa imong higala, siya miingon, “Dili ra na problema. Tungod sa Pag-ula, makahinulsol ra ko sa dili pa ko molarga sa akong misyon.”

Pamalandongi kon unsaon nimo sa pagtubag ang imong higala. Samtang magtuon ka sa Mga Taga-Roma 6, pangitaa kon nganong ang iyang kinaiya nagpadayag og sayop kaayo nga pagsabut sa doktrina sa grasya.

Basaha ang Mga Taga-Roma 6:1–6, 11–12, nga mangita kon sa unsang paagi ang mga pagtulun-an ni Pablo mokorihir sa hunahuna sa imong higala.

Sa imong kaugalingong mga pulong, ipasabut kon sa unsang paagi ang mga pagtulun-an ni Pablo niini nga mga bersikulo makatabang sa imong higala:

Unsa kaha ang gipasabut nga “namatay na ngadto sa sala” (Mga Taga-Roma 6:2) ug “pinaagi sa bautismo gilubong kita uban kaniya ngadto sa kamatayon” (Mga Taga-Roma 6:4)?

Usa ka kamatuoran nga atong makat-unan gikan niini nga mga bersikulo mao nga ang bunyag pinaagi sa pagpaunlod mahimong magsimbolo sa atong kamatayon sa sala ug sa kabag-o sa espirituhanong kinabuhi.

Ang bag-ong espirituhanong kinabuhi nga atong gisugdan sa dihang kita gibunyagan naglakip sa pagdawat sa kapasayloan sa atong mga sala ug pagpasalig nga mosunod sa mga sugo sa Dios. Kadtong milapas sa ilang pakigsaad sa bunyag pinaagi sa tinuyo nga pagpakasala uban sa tuyo nga maghinulsol unya nagbugal-bugal sa Pag-ula sa Manluluwas ug nagbutang sa ilang mga kaugalingon sa espirituhanong kapeligro.

Kinsa ang mobayad sa suhol sa usa ka trabahador? Nganong ang agalon dili man mobayad sa suhol sa empleyado sa ubang tawo?

Basaha ang Mga Taga-Roma 6:13, ug ilha ang duha ka “mga agalon” o mga amo nga mahimong sundon ug serbisyohan sa usa ka tawo. Niini nga bersikulo ang pulong nga itugyan nagpasabut nga ihalad o ihatag ang imong kaugalingon, ug ang mga bahin nagpasabut sa mga parte sa lawas ug hunahuna.

Basaha ang Mga Taga-Roma 6:14–23, nga mangita sa “suhol” (Mga Taga-Roma 6:23), o mga sangputanan, sa sala ug sa gasa sa Dios. Ilista ang unsay imong nakit-an sa mosunod nga tsart.

Ang kamatayon isip usa ka suhol sa sala nagpasabut sa “pagkahimulag gikan sa Dios ug sa Iyang mga impluwensya” ug nagpasabut nga “pagkamatay ingon sa mga butang nga may kalabutan ngadto sa pagkamatarung” (Giya ngadto sa mga Kasulatan, “Kamatayon, Espirituhanon nga,” scriptures.lds.org).

Gikan sa Mga Taga-Roma 6:16 atong makat-unan nga kon motugyan kita ngadto sa sala, niana kita mahimong mga ulipon sa sala. Ikonsiderar ang pagsulat niini nga baruganan tupad sa Mga Taga-Roma 6:16 sa imong mga kasulatan.

2. Tubaga ang mosunod nga pangutana diha sa imong scripture journal: Sa unsang paagi ang pagtugyan ngadto sa usa ka sala naghimo kanato nga ulipon niana nga sala?

Pamalandonga ang mga higayon sa dihang ang pagtugyan sa usa ka tawo ngadto sa sala miresulta sa pagkawala sa kagawasan.

Tan-awa ang lista nga imong gisulat ubos sa “Mga gasa sa Dios” diha sa nag-una nga tsart. Unsa man ang mga benepisyo sa pagserbisyo sa pagkamatarung kay sa sala?

3. Isulat ang mosunod nga baruganan diha sa imong scripture study journal: Kon atong itugyan ang atong mga kaugalingon ngadto sa Dios, mamahimo kitang gawasnon gikan sa sala ug modawat sa gasa sa kinabuhing dayon. Dayon tubaga ang mosunod nga mga pangutana:

   1. Sa unsang mga paagi nga atong matugyan ang atong kaugalingon ngadto sa Dios?

   2. Sa unsang mga paagi nga nakasinati ka og kagawasan gikan sa sala pinaagi sa pagtugyan sa imong kaugalingon ngadto sa Dios?

4. Sa imong scripture study journal, pagsulat og usa ka tumong kon unsaon nimo nga mas matugyan ang imong kaugalingon ngadto sa Dios aron madawat nimo ang Iyang grasya sa imong kinabuhi.

Sama sa narekord diha sa Mga Taga-Roma 7, si Pablo migamit sa pasumbingay sa kaminyoon aron sa pagtudlo nga ang mga miyembro sa Simbahan gihimong gawasnon gikan sa balaod ni Moises ug gihiusa ngadto kang Kristo. Misulat usab siya kabahin sa panlimbasog tali sa “lawas” (Mga Taga-Roma 7:18), o pisikal nga gana, ug sa “kinasuloran sa … pagkatawo” (Mga Taga-Roma 7:22), o pagka-espirituhanon.

Ang Hubad ni Joseph Smith sa Mga Taga-Roma 7:24–25 naghatag og dugang panabut sa gamhanang pagpamatuod ni Pablo samtang siya nagsaksi nga ang unod mahimo nga mabuntog:

“Ug kon Ako dili makabuntog sa sala nga ania kanako, apan sa unod moalagad sa balaod sa sala; O dautan nga tawo nga ako! kinsa ang moluwas kanako gikan sa lawas niini nga kamatayon?

“Ako nagpasalamat sa Dios pinaagi ni Jesukristo nga atong Ginoo, sa ingon, aron uban sa hunahuna ako sa akong kaugalingon moalagad sa balaod sa Dios” (Hubad ni Joseph Smith, Mga Taga-Roma 7:26–27 [sa Giya ngadto sa mga Kasulatan]).

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Mga Taga-Roma 4–7 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: