Si Jesus mitambong sa Fiesta sa mga Payag [Fiesta sa mga Tabernakulo] sa Jerusalem ug mitudlo sa mga tawo didto sa templo unsaon nila pagkadawat og saksi nga ang Iyang mga pagtulun-an gikan sa Dios nga Amahan. Tungod kay ang mga tawo naglalis kon kinsa Siya, si Jesus migamit sa mga imahe sa tubig ug kahayag sa pagpamatuod sa Iyang kabalaan. Mitudlo usab Siya kanila kabahin sa Espiritu Santo.
Naghunahuna ba kamo kon aduna bay mga igsoon si Jesus?
Sumala sa mga kasulatan, si Jose ug Maria adunay mga anak nga natawo human kang Jesus ug kinsa gipadako diha sa mao nga panimalay uban Kaniya. Hinoon, tungod kay si Jesukristo anak ni Maria ug sa Dios nga Amahan, dili ni Jose, kini nga mga indibidwal mga igsoon ni Jesus sa inahan (tan-awa sa Mateo 13:55–56; Marcos 6:3).
Pamalandungi kon sama sa unsa kaha nga magdako diha sa samang panimalay uban ni Jesus.
Sa imong hunahuna mas sayon ba nga motuo diha Kaniya kon nagtubo ka uban Kaniya? Ngano o nganong dili man?
Diha sa Juan 7 atong nakat-unan kon giunsa pagtan-aw si Jesus sa pipila sa Iyang “mga igsoon” (Juan 7:3, 5). Ang mga pulong nga mga igsoon dinhi tingali nagpasabut ngadto sa mga igsoon ni Jesus sa inahan, apan mahimong naglakip usab kini sa suod nga mga paryente.
Basaha ang Juan 7:1–5, nga mangita kon unsa ang narekord ni Juan kalabut sa mga kaigsoonan ni Jesus.
Hunahunaa ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles.
Imahe
Elder Bruce R. McConkie
“Ang pagpamatuod sa kabalaan ni Kristo ug sa makaluwas nga gahum sa iyang ebanghelyo dili dihadiha nga makuha tungod sa relasyon sa pamilya. Moabut lamang kini pinaagi sa personal nga pagsunod sa mahangturong mga balaod diin gipasikad ang pagdawat niini. …
“Daghan nga espesyal nga pagpasabut kabahin sa mga anak ni Jose ug ni Maria gihimo isip mga ‘kaigsoonan’ ni Jesus. … Bisan tuod sila gipadako diha sa samang panimalay ug ubos sa mabinationg impluwensya ni Jose ug ni Maria, bisan tuod sila nahibalo sa mga pagtulun-an, pangalagad, ug sa mga milagro ni Jesus mismo, apan kining suod niyang mga kaparyentihan wala pa gihapon modawat kaniya isip ang Mesiyas” (Doctrinal New Testament Commentary, 3 vols. [1965–73], 1:437).
Pamalandungi ang mosunod nga pangutana: Ngano kaha nga ang pipila sa mga sakop sa kaugalingong pamilya ni Jesus wala pa motuo diha Kaniya, bisan tuod sila nahibalo sa Iyang mga pagtulun-an ug mga milagro?
Human nagtimaan nga sa panahon sa mga panghitabo nga narekord sa Juan 7, ang mga kaigsoonan ni Jesus wala pa “midawat kaniya isip ang Mesiyas,” si Elder McConkie mipasabut: “Hinoon, silang tanan, makita nga nakabig wala madugay (Mga Buhat 1:14); usa kanila, giila ni Pablo nga si ‘Santiago nga igsoon sa Ginoo’ (Gal. 1:19), nangalagad diha sa pagka-apostol; ug ang laing usa, si Judas, kinsa nagtawag sa iyang kaugalingon, ‘si Judas, ang … igsoon ni Santiago’ (Judas 1), mao ang naghimo sa sulat ni Judas” (Doctrinal New Testament Commentary, 1:437).
Ang Juan 7 nagrekord sa mga panghitabo panahon sa Fiesta sa mga Payag diha sa Jerusalem (tan-awa sa Juan 7:2). Panahon niini nga fiesta, “gihunahuna sa [mga Judeo] nga maoy labing mahinungdanon ug makalipay sa tanan” (Bible Dictionary sa LDS English version sa Biblia, “Feasts”), daghang mga Judeo ang mibiyahe ngadto sa Jerusalem aron sa pagsaulog sa mga panalangin sa Dios diha sa mga anak sa Israel samtang mipuyo sila didto sa kamingawan human sa ilang kaluwasan gikan sa pagkaulipon sa Ehipto (tan-awa sa Levitico 23:39–43). Sila usab misaulog ug mihatag og pasalamat alang sa tinuig nga pag-ani sa mga bunga ug mga lugas (tan-awa sa Exodo 23:16). Kini nga fiesta milungtad og walo ka adlaw.
Timan-i diha sa Juan 7:3–4 nga gusto sa mga igsoon ni Jesus nga moadto Siya sa Fiesta sa mga Payag sa Jerusalem, daw nag-ingon nga kon Siya gayud mao ang Mesiyas, Siya kinahanglang moadto sa Jerusalem ug mopadayag niini ngadto sa tanan nga mga katawhan didto.
Sumala sa narekord sa Juan 7:6–10, si Jesus mihukom sa paglangay sa pag-adto sa fiesta, apan giawhag Niya ang Iyang mga kaigsoonan nga moadto. Pipila ka adlaw human nagsugod ang fiesta, sekreto Siya nga miabut—nasayud nga ang pipila sa mga lider nga Judeo sa Jerusalem gusto nga mopatay kaniya, apan ang Iyang panahon nga mamatay wala pa moabut.
Basaha ang Juan 7:11–13, nga mangita kon unsay gipanulti sa mga tawo sa Jerusalem mahitungod kang Jesus.
Sama sa panahon ni Jesus, adunay lain-laing mga opinyon kabahin ni Jesukristo sa atong panahon. Pipila sa mga tawo nasayud ug nagpamatuod nga Siya mao ang Anak sa Dios ug ang Manluluwas sa tanang katawhan. Ang uban nagtuo nga Siya usa ka talagsaong magtutudlo o propeta. Hinoon, ang ubang mga tawo nagsalikway sa kabalaan ni Jesukristo ug sa katinuod sa Iyang mga pagtulun-an o nahadlok sa pagsunod Kaniya sa dayag nga paagi. Samtang magpadayon ka sa pagtuon sa Juan 7, pangitaa kon sa unsang paagi makahibalo ka nga si Jesukristo mao ang imong Manluluwas ug nga ang Iyang mga pagtulun-an tinuod.
Si Jesukristo nagtudlo sa mga Judeo didto sa templo
Ang templo mao ang sentro sa mga pagsaulog nga nahitabo atol sa Fiesta sa mga Payag. Basaha ang Juan 7:14–15, nga mangita kon unsay gibuhat ni Jesus didto. Ikonsiderar ang pagmarka sa imong mga kasulatan sa reaksyon sa mga tawo.
Ang mga Judeo natingala nga si Jesus makatudlo og ingon ka lawom ug kamaalamon bisan walay “mga letra,” o gibansay sa mga rabi nga Judeo o nakatambong sa ilang eskwelahan. Basaha ang Juan 7:16–18, nga mangita kon unsay gisulti ni Jesus nga mahimong buhaton sa mga tawo aron masayud kon ang Iyang doktrina, o mga pagtulun-an, tinuod ba. Ikonsiderar sa pag-highlight kon kinsa ang mihatag ni Jesus sa doktrina nga Iyang gitudlo.
Tubaga ang mosunod diha sa imong scripture study journal:
Unsaon sa usa ka tawo pagkahibalo nga ang doktrina ni Jesukristo tinud-anay nga gikan sa Dios?
Gikan sa mga pagtulun-an sa Ginoo diha sa templo, atong nakat-unan nga kon kita mobuhat sa kabubut-on sa Langitnong Amahan, niana kita makadawat og pagpamatuod sa Iyang doktrina. Ipasabut ngano sa inyong hunahuna kini nga baruganan tinuod.
Imahe
President James E. Faust
Si Presidente James E. Faust sa Unang Kapangulohan miingon: “Kita makaangkon og usa ka pagpamatuod sa mga baruganan sa ebanghelyo pinaagi sa masulundong pagpaningkamot sa pagsunod niini. Ang Manluluwas miingon, ‘Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan ang akong gitudlo’ [John 7:17]. Usa ka pagpamatuod sa kaepektibo sa pag-ampo moabut pinaagi sa mapainubsanon ug sinsero nga pag-ampo. Usa ka pagpamatuod sa ikapulo moabut pinaagi sa pagbayad sa ikapulo” (“Lord, I Believe; Help Thou Mine Unbelief,” Ensign o Liahona, Nob. 2003, 22).
Unsa ang gitudlo ni Presidente Faust nga angay natong buhaton aron makaangkon og usa ka pagpamatuod sa mga baruganan sa ebanghelyo?
Hinumdumi nga ang pipila sa mga kaigsoonan ni Jesus wala pa motuo nga Siya mao ang gisaad nga Mesiyas, apan sa wala madugay sila nakaangkon og pagpamatuod ug nakabig. Sa unsang paagi kaha ang baruganan sa itaas nakatabang niadto nga mga sakop sa pamilya nga makaangkon og pagpamatuod kabahin ni Jesukristo ug sa Iyang mga pagtulun-an?
Imahe
Bonnie L. Oscarson
Human mokutlo sa Juan 7:17, si Sister Bonnie L. Oscarson, kinatibuk-ang presidente sa Young Women, mitudlo: “Usahay bali ang atong buhaton. Sama pananglit, atong gamiton kini nga paagi: Malipay kong nagsunod sa balaod sa ikapulo, apan kinahanglan ko unang mahibaloan nga kini tinuod. Tingali mag-ampo kita aron makaangkon og pagpamatuod sa balaod sa ikapulo ug nanghinaut nga ang Ginoo mopanalangin kanato niana nga pagpamatuod sa dili pa gayud kita makasulat diha sa resibo sa ikapulo. Kini dili gayud mosalir. Ang Ginoo nagpaabut nga kita mopakita og hugot nga pagtuo. Kinahanglan kanunay kitang mobayad og hingpit ug tinud-anay nga ikapulo aron makaangkon og pagpamatuod sa ikapulo. Kining sama nga sumbanan magamit ngadto sa tanang mga baruganan sa ebanghelyo, mabalaod man sa kaputli, sa baruganan sa hustong pagsinina, sa Pulong sa Kaalam, o sa balaod sa puasa” (“Magpakabig Kamo,” Ensign o Liahona, Nob. 2013, 77).
Alang sa matag usa o sa duha sa mosunod nga mga assignment, kon ang imong gibati nga isulat pribado kaayo, mahimo nimong isulat ang imong tubag sa imong personal nga journal o sa laing piraso nga papel ug isulat sa imong scripture study journal nga imong nakompleto ang assignment.
Kompletuha ang mosunod nga pamahayag diha sa imong scripture study journal pinaagi sa pagsulat kabahin sa usa ka sugo sa ebanghelyo o baruganan nga imong nasayran nga tinuod pinaagi sa imong mga paningkamot sa pagsunod niini: Nasayud ko tinuod tungod kay sa akong pagsunod niini ako . Ikonsiderar ang pagpakigbahin sa unsay imong gisulat sa usa ka tawo kinsa sa imong hunahuna molambo pinaagi sa pagpaminaw sa imong pagpamatuod.
Sa imong scripture study journal, pagsulat og usa ka kamatuoran sa ebanghelyo, kasugoan, o pagtulun-an nga gusto nimo nga makadawat og mas lig-on nga pagpamatuod. Dayon isulat ang unsay imong buhaton aron makadawat og mas dako nga pagpamatuod niana nga kamatuoran, kasugoan, o pagtulun-an pinaagi sa paggamit sa baruganan nga imong nakat-unan sa Juan 7:17.
Ang Juan 7:19–36 nagpasabut nga si Jesus mibadlong sa mga lider nga Judeo tungod sa pagsalikway sa Iyang mga pagtulun-an ug mga milagro ug sa pagtinguha sa pagpatay Kaniya. Kini nga mga bersikulo nagsaysay usab nga daghang mga tawo ang naghunahuna kon Siya mao ba ang Mesiyas ug nga ang mga sacerdote nga punoan ug ang mga Pariseo mipadala og mga opisyal aron sa pagdakop Kaniya.
Si Jesus nagtudlo kabahin sa gasa sa Espiritu Santo
Hunahunaa ang usa ka higayon dihang giuhaw ka. Hunahunaa nga nagkupot ka og kopa nga walay sulod. Makatagbaw ba sa imong kauhaw ang kopa nga walay sulod? Unsa pay imong gikinahanglan?
Pahuway og kadali ug pag-inom og tubig. Samtang imo kining buhaton, hunahunaa kon unsa ka importante ang tubig diha sa imong kinabuhi. Mahimo ka nga mohalad og pag-ampo sa pagpasalamat sa Langitnong Amahan sa paghatag og tubig alang kanimo ug sa imong pamilya.
Ang yuta sa Israel walay dako nga suplay sa preskong tubig aron matubag ang mga panginahanglan sa katawhan. Masustineran lamang ang kinabuhi pinaagi sa ulan nga modugang sa ilang mga suplay sa tubig. Si Elder Bruce R. McConkie mipasabut kon sa unsang paagi nga ang tubig kabahin sa “usa sa labing ligdong ug mahinuklugong mga higayon sa pagsimba sa mga Judeo” atol sa pagsaulog nga nagahitabo:
Imahe
Elder Bruce R. McConkie
“Sa matag usa sa walo ka mga adlaw sa fiesta sa mga Payag, … naandan na, alang sa pari isip kabahin sa tulumanon sa templo, sa pagkuha og tubig gamit ang bulawan nga mga sudlanan [mga pitcher] gikan sa sapa sa Siloe, diin midagayday ubos sa templo, ug ibu-bu kini diha sa altar. Dayon ang mga pulong ni Isaias gikanta: ‘Uban ang kalipay kamo managtimba og tubig gikan sa mga atabay sa kaluwasan.’ (Isa. 12:3.) Ug niini gayud nga higayon sa pinakarelihiyusong bahin nga si Jesus mitunga ug mihalad og ilimnon nga buhing tubig nga makatagbaw sa labing lawom nga espirituhanong kahidlaw sa uhaw nga kalag”(Doctrinal New Testament Commentary, 1:446).
Basaha ang Juan 7:37–39, nga mangita kon unsay gitanyag sa Manluluwas ngadto sa katawhan.
Ang Joseph Smith Translation sa Juan 7:39 nagpahayag nga “ang Espiritu Santo gisaad ngadto niadtong nagatuo, human nga si Jesus mahimaya” (Joseph Smith Translation, Juan 7:39 italics gidugang).
Ang mga pulong nga “gikan sa iyang kasingkasing” (Juan 7:38) nagsugyot nga ang buhi nga tubig maanaa sa sulod ug modagayday gikan sa tumutuo, kay sa gikan sa usa ka tinubdan sa gawas. Ikonsiderar ang pagmarka sa Juan 7:39 kon unsay girepresentaran sa buhi nga tubig.
Ang Bible Dictionary nagpasabut nga “tungod sa mga rason nga wala kaayo napasabut sa mga kasulatan, ang Espiritu Santo wala maglihok sa kahingpitan diha sa mga Judeo sa mga katuigan sa mortal nga pagpakabuhi ni Jesus (Juan 7:39; 16:7). Ang mga pamahayag nga ang Espiritu Santo wala moabut hangtud pagkahuman nga nabanhaw si Jesus siguradong piho nga nagpasabut niana lamang nga dispensasyon, tungod kay klaro kaayo nga ang Espiritu Santo naglihok diha sa nag-unang mga dispensasyon. Dugang pa, kini may kalabutan lamang sa gasa sa Espiritu Santo nga wala nianang panahona, tungod kay ang gahum sa Espiritu Santo naglihok sa panahon sa mga pagpangalagad ni Juan Bautista ug ni Jesus; kay kon dili man walay usa nga nakadawat og pagpamatuod sa mga kamatuoran nga gitudlo niining mga tawhana (Mat. 16:16–17; tan-awa usab sa 1 Cor. 12:3)” (Bible Dictionary, “Holy Ghost”).
Basi sa mga pagtulun-an sa Manluluwas diha sa Juan 7:37–39, atong nakat-unan nga kon kita moduol kang Jesukristo ug motuo Kaniya, kita mapuno sa Espiritu Santo. Kadtong napuno sa Espiritu Santo makaimpluwensya sa uban alang sa kaayohan.
Sa imong scripture study journal, paghulagway og usa ka higayon nga ikaw naimpluwensyahan (o napuno) sa Espiritu Santo ug, isip resulta, nakaimpluwensya og laing tawo alang sa kaayohan.
Diha sa Juan 7:40–53 atong mabasa nga ang mga Pariseo nagtinguha pag-usab sa pagpadakop kang Jesus. Ang mga opisyal kinsa gipadala aron sa pagdakop Kaniya nakadungog ni Jesus nga nagsangyaw. Sila namalik nga wala modakop Kaniya ug misulti sa mga Pariseo nga wala pa sila makadungog ni bisan kinsa nga nagsangyaw sama sa Manluluwas, nga nakapasuko sa mga Pariseo. Si Nicodemo, ang Pariseo kinsa miadto sa Manluluwas sa kagabhion (tan-awa sa Juan 3:1–2), mipahinumdom sa iyang kauban nga mga Pariseo ug sa mga sacerdote nga punoan nga ang ilang kaugalingon nga mga balaod dili motugot sa usa ka indibidwal nga masilutan hangtud siya mahatagan og kahigayunan nga mapaminaw.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Juan 7 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: