Pasiuna sa Tito

Ang sulat ni Pablo ngadto ni Tito, sama sa iyang mga sulat ngadto ni Timoteo, naglangkob sa walay kausaban nga tambag gikan ni Apostol Pablo ngadto sa lokal nga lider sa Simbahan. Gisulat ni Pablo nga ang “paglaum alang sa dayong kinabuhi” unang gisaad sa Dios didto sa kinabuhi sa wala pa dinhi sa yuta “sa wala pa ang kapanahonan” (Tito 1:2). Gitudlo niya nga ang mga Santos kinahanglang motan-aw sa unahan ngadto “sa bulahan nga paglaum” sa kahimayaan ug sa Ikaduhang Pag-anhi (Tito 2:13). Gisulat usab ni Pablo ngadto ni Tito ang bahin “sa paghugas sa pagkatawo pag-usab” ug sa “pagkabag-o diha sa Espiritu Santo” (Tito 3:5), nga nagpasabut sa ordinansa sa bunyag ug sa makapahinlo nga epekto sa pagdawat sa gasa sa Espiritu Santo, agig pagpangandam aron “mahimong mga manununod sa kinabuhing dayon sumala sa ginalauman” (Tito 3:7). Pinaagi sa pagtuon sa dinasig nga tambag ni Pablo ngadto ni Tito, mapalambo nimo ang imong pagtuo nga ang mga doktrina ug mga ordinansa sa ebanghelyo nagdala og paglaum alang sa kinabuhing dayon.

Ang basahon ni Tito gisulat ni Pablo (tan-awa sa Tito 1:1)

Posible nga gisulat ni Pablo ang Epistola [Sulat] ngadto ni Tito sa tunga-tunga sa iyang pagsulat sa 1 ug 2 Timoteo, mga A.D. 64-65 (tan-awa sa Giya ngadto sa mga Kasulatan, “Mga Epistola ni Pablo,” scriptures.lds.org). Gisulat ni Pablo ang Epistola ngadto ni Tito human sa una niyang pagkabilanggo didto sa Roma. Wala niya gipahibalo kon asa siya sa dihang iyang gisulat kini nga epistola.

Kini nga epistola gisulat ni Pablo ngadto ni Tito, nga gipasabut ni Pablo isip “akong tinuod nga anak diha sa tinuohan nga atong tanan” (Tito 1:4). Si Tito usa ka Gresyanhon (tan-awa sa Mga Taga-Galacia 2:3) ug nakabig sa ebanghelyo pinaagi mismo ni Pablo (tan-awa sa Bible Dictionary diha sa LDS English version sa Biblia, “Titus”). Human sa iyang pagkakabig, nagtrabaho si Tito uban ni Pablo sa pagsangyaw sa ebanghelyo ug sa pag-organisar sa Simbahan (tan-awa sa Bible Dictionary diha sa LDS English version sa Biblia, “Titus”). Mitabang siya sa pagtigum sa mga donasyon alang sa mga kabus didto sa Jerusalem (tan-awa sa 2 Mga Taga-Corinto 8:6, 16–23) ug mikuyog usab ni Pablo ngadto sa konseho sa Jerusalem (tan-awa sa Mga Taga-Galacia 2:1). Gisalig ni Pablo kang Tito ang pagdala sa iyang unang epistola ngadto sa mga Santos nga nagpuyo sa Corinto (tan-awa sa 2 Mga Taga-Corinto 7:5–15). Gisulatan niya si Tito aron sa paglig-on kaniya sa iyang buluhaton sa pagpangulo ug pag-atiman sa branch sa Simbahan didto sa Creta bisan pa man sa pagsupak (tan-awa sa Tito 1:5, 10–11; 2:15; 3:10).

Kini nga sulat usa sa pastoral nga mga epistola (ngadto sa usa ka pastor, o lider, sa Simbahan), kauban sa 1 ug 2 Timoteo (tan-awa sa Bible Dictionary diha sa LDS English version sa Biblia, “Pauline Epistles”). Ang Epistola ni Tito naghatag sa labing una nga ebidensya nga ang Simbahan naestablisar na sa Gesyanhong isla sa Creta sa Dagat sa Mediterania (tan-awa sa Tito 1:5). Si Tito dunay responsibilidad sa pagtawag og bag-ong mga obispo [bishop] sa isla. Gilista ni Pablo ang pipila ka espirituhanong mga kwalipikasyon alang sa mga obispo (tan-awa sa Tito 1:6–9). Agig dugang, mihatag siya og piho nga tambag ngadto sa mga lalaki, mga babaye, ug mga sulugoon bahin sa tukmang kinaiya alang sa mga Santos (tan-awa sa Tito 2:2–10).

Tito 1. Gisugo ni Pablo si Tito sa pag-orden sa mga lider sa Simbahan ug dayon sa paglista sa pipila ka mga kwalipikasyon alang sa mga obispo. Gisugo niya si Tito sa pagkorihir sa mga tuo-tuo ug sa pagbadlong sa mini nga mga magtutudlo kinsa “magapahayag nga sila nanagpakaila sa Dios; apan ilang ginapanghimakak siya pinaagi sa ilang mga binuhatan” (Tito 1:16).

Tito 2. Giawhag ni Pablo si Tito sa pagsugo sa mga edaran nga mga miyembro sa Simbahan sa pagpakita og ehemplo alang sa mas batan-on nga mga Santos. Gihangyo usab niya si Tito sa pagtudlo sa mga sulugoon nga magpaubos ngadto sa ilang mga agalon. Gipasabut ni Pablo ang pamaagi diin ang mga disipulo kinahanglang magpakabuhi samtang mangandam sila alang sa pagbalik sa Ginoo. Gihulagway niya ang katubsanan nga napahinabo pinaagi ni Jesukristo.

Tito 3. Gitudlo ni Pablo nga ang mga miyembro sa Simbahan kinahanglang maayo nga mga lumulupyo ug matarung nga mga sumusunod ni Jesukristo. Pinaagi sa bunyag, mahimo kitang makadawat og kinabuhing dayon pinaagi sa grasya sa Ginoo.