Mateo 25

Samtang nagtudlo si Jesukristo sa tago sa Iyang mga disipulo didto sa Bungtod sa mga Olivo mahitungod sa Iyang Ikaduhang Pag-anhi, gitudlo Niya ang mga sambingay sa napulo ka mga dalagang birhen ug sa mga talanton. Gipasabut usab Niya nga pagabulagon Niya ang mga matarung gikan sa mga dautan kon Siya mobalik.

Hunahunaa unsa kaha ang imong bation kon ikaw pa ang batan-ong lalaki sa mosunod nga giistorya ni Elder Jeffrey R. Holland sa Korum sa Napulog Duha ka mga Apostoles, kinsa nakadungog kalabut niining batan-ong returned missionary nga mipakigbahin og usa ka personal nga kasinatian diha sa miting sa pagpamatuod.

Imahe

Elder Jeffrey R. Holland

“Siya … misulti kabahin sa iyang pagpauli gikan sa usa ka date human siya na-orden nga elder sa edad nga 18. Usa ka butang ang nahitabo niini nga date nga dili niya ikapasigarbo. Siya wala modetalye, ni mohimo niini diha sa publiko. Hangtud karon wala ako masayud sa panghitabo, apan ingon kini ka importante ngadto kaniya nga naapektuhan ang iyang espiritu ug pagsalig sa iyang kaugalingon.

“Samtang naglingkod siya og makadiyot diha sa iyang sakyanan sa driveway sa iyang kaugalingong panimalay, naghunahuna sa mga butang ug mibati og tinud-anay nga kasubo sa nahitabo, ang iyang mama nga dili miyembro sa simbahan nagdagan nga nataranta gikan sa balay diretso ngadto sa iyang sakyanan. Diha-diha miingon ang iyang mama nga ang manghod nga lalaki bag-o lang nahulog sa panimalay, napantok ang ulo ug nagkirig-kirig. Ang amahan nga dili miyembro sa simbahan diha-diha dayon mitawag og ambulansya, apan dugay-dugay pa kining moabut.

“‘Dali ug buhata ang imong mahimo,’ siya mituaw. ‘Wala ba moy himoon sa inyong Simbahan sa panahon nga sama niini? Ikaw aduna sa ilang priesthood. Dali ug buhata ang imong mahimo.’ …

“… Apan, niining gabhiona sa dihang ang usa ka tawo nga iyang gihigugma og maayo nagkinahanglan sa iyang hugot nga pagtuo ug sa iyang kalig-on, kining batan-ong lalaki walay mahimo. Tungod sa pagbati nga iyang gipanlimbasugan ug sa dili maayong butang nga bag-o lamang niyang gihimo—bisan unsa man kadto—dili siya makaduol sa atubangan sa Ginoo ug pangayoon ang panalangin nga gikinahanglan” (“Ang Pagsalig sa Katakus,” Liahona, Abr. 2014, 58–59).

Unsa kaha ang imong hunahunaon kon ikaw pa ang batan-ong lalaki niini nga sitwasyon? Nganong importante kaayo ang kanunay nga mangandam?

Ang Mateo 25 usa ka sumpay sa pagtudlo sa Manluluwas didto sa Bukid sa Olivo, ug kini naglakip sa tulo ka sambingay kabahin sa pagpangandam nga nagtudlo kanato kon unsaon pagpangandam sa pagsugat sa Ginoo kon Siya moanhi pag-usab.

Samtang didto sa Bukid sa Oliba, gitudlo ni Jesukristo sa Iyang mga disipulo ang mahitungod sa Iyang Ikaduhang Pag-anhi (tan-awa sa Mateo 24). Pinaagi sa sambingay sa napulo ka mga dalagang birhen, gitudlo ni Jesus nga kita kinahanglan gayud nga mangandam alang sa Iyang Ikaduhang Pag-anhi.

Imahe

boangboang ug buotan nga mga dalagang birhen nga may mga lamparahan

Basaha ang Mateo 25:1–4, nga mangita sa labing importante nga mga tipik sa sambingay. Mahimo nimong markahan ang unsay imong nakit-an.

Sumala sa mga kostumbre sa kasal sa mga Judeo, ang lalaking kaslonon, o ang “pamanhonon, kinuyugan sa iyang suod nga mga higala, moadto inig kagabii sa panimalay sa pangasaw-onon. Pagkahuman sa mga seremonyas sa kasal, ang mga nanambong sa kasal mopadayon ngadto sa balay sa lalaking gikasal alang sa bangkete. Ang mga bisita sa kasal kinsa miapil sa panon gipaabut nga magdala sa ilang kaugalingon nga mga lamparahan o mga sulo” sa pagpaila nga sila apil sa panon sa kasal ug sa pagdugang og kahayag ug kanindot sa okasyon (New Testament Student Manual [Manwal sa Church Educational System, 2014], 78).

Tiwasa pagbasa ang sambingay diha sa Mateo 25:5–13, mangita og unsay gibuhat sa lima ka buotan nga mga dalagang birhen ug unsay gibuhat sa lima ka boangboang nga mga dalagang birhen.

Kay sa magbasa sa Mateo 25:5–13, mahimong motan-aw ka og bahin sa video “They That Are Wise” (time code 0:00–5:46), nga nagpakita sa sambingay sa napulo ka mga dalagang birhen. Kini nga video anaa sa LDS.org. Samtang nagtan-aw sa video, pangitaa og unsay gibuhat sa lima ka buotan nga mga dalagang birhen ug unsay gibuhat sa lima ka boangboang nga mga dalagang birhen.

Ikonsiderar ang mosunod nga mga tipik sa sambingay, ug isulat unsa kaha sa imong hunahuna ang girepresentar sa kada usa:

Ang pamanhonon

Ang buotan nga mga dalagang birhen

Ang boangboang nga mga dalagang birhen

Mga lampara

Lana

Ang mga pulong “ang pamanhonon nadugay man sa pag-abut” (Mateo 25:5) ug “sa pagkatungang gabii dihay singgit nga nag-ingon” (Mateo 25:6) nagpasabut ngadto sa Ikaduhang Pag-anhi ni Jesukristo. Pamalandungi kon unsay imong makat-unan mahitungod sa Ikaduhang Pag-anhi gikan niini nga mga pulong. Mahimo nimong isulat ang Jesukristo diha sa margin tupad sa mga bersikulo 5–6.

Imahe

Elder Dallin H. Oaks

Si Elder Dallin H. Oaks sa Korum sa Napulog Duha ka mga Apostoles mitudlo kinsa ang girepresentar sa napulo ka mga dalagang birhen: ‘Ang napulo ka mga dalagang birhen klaro nga nagrepresentar sa mga miyembro sa Simbahan ni Kristo, kay ang tanan gidapit sa kumbira sa kasal ug ang tanan nasayud kon unsa ang gikinahanglan aron makasulod sa dihang miabut ang pamanhonon. Apan katunga lamang ang andam sa dihang siya miabut” (“Preparation for the Second Coming,” Ensign o Liahona, May 2004, 8).

Mahimo nga imong isulat ang mga Miyembro sa Simbahan diha sa margin tupad sa Mateo 25:1–2.

Ribyuha ang Mateo 25:8–9, ug pamalandungi kon nganong ang buotan nga mga dalagang birhen wala manghatag sa ilang lana ngadto sa boangboang nga mga dalagang birhen. Gitudlo ni Presidente Spencer W. Kimball unsay girepresentar sa lana ug ngano kining dili mahimong ipakighbahin:

Imahe

Presidente Spencer W. Kimball

“Dili kini hinakog o walay pagbati. Ang matang sa lana nga gikinahanglan sa pagbanwag sa agianan ug paghayag sa kangitngit dili mabahin. Unsaon sa usa ka tawo sa pagpakigbahin sa pagkamasulundon sa baruganan sa ikapulo; sa usa ka hunahuna nga malinawon gumikan sa matarung nga pagpuyo; sa natigum nga kahibalo? Unsaon sa usa ka tawo sa pagpakigbahin og hugot nga pagtuo o pagpamatuod? Unsaon sa usa ka tawo sa pagpakigbahin og mga kinaiya o kaputli, o kasinatian sa misyon? Unsaon sa usa ka tawo pagpakigbahin og mga pribilehiyo sa templo? Ang kada usa kinahanglan gayud nga makaangkon niana nga matang sa lana alang sa iyang kaugalingon mismo. …

“Diha sa sambingay, ang lana mapalit sa merkado. Sa atong mga kinabuhi ang lana sa pagpangandam natigum sa matag tulo sa matarung nga pagpuyo. … Ang kada lihok sa paghalad ug pagkamasulundon usa ka tulo nga gidugang sa atong panudlanan” (Faith Precedes the Miracle [1972], 255–56).

1. Pamalandungi kon unsay girepresentar sa lana diha sa sambingay. Diha sa imong scripture study journal, paglista og mga lihok sa paghalad ug pagkamasulundon nga makakompleto sa mosunod nga sentence: Sumala ni Presidente Spencer W. Kimball, ang pipila sa mga butang nga ang lana diha sa sambingay makarepresentar mao ang …

Ang mosunod usa ka kamatuoran nga atong makat-unan gikan sa sambingay ug sa mga komentaryo ni Presidente Kimball: Dili kita makahulam og espirituhanong pagpangandam gikan sa uban. Ang espirituhanong pagpangandam naglakip og pagpamatuod, pagkakabig, hugot nga pagtuo, ug ubang mga gasa nga moabut sa personal pinaagi sa Espiritu Santo.

Si Elder David A. Bednar sa Korum sa Napulog Duha ka mga Apostoles mipasabut:

Imahe

Elder David A. Bednar

“Gusto kong mogamit karon sa usa sa daghang posible nga mga hubad sa sambingay sa napulo ka mga dalagang birhen aron mahatagan og importansya ang relasyon tali sa pagpamatuod ug sa pagkakabig. Ang napulo ka mga dalagang birhen, ang lima but-an ug ang lima boangboang, nanagdala sa ilang mga lamparahan ug miadto sa pagsugat sa pamanhonon. Palihug hunahunaa ang mga lamparahan nga gigamit sa mga dalagang birhen isip lamparahan sa pagpamatuod. Ang boangboang nga mga dalagang birhen midala sa ilang mga lamparahan sa pagpamatuod apan wala sila magdala og lana. Ikonsiderar nga ang lana ingon og ang lana sa pagkakabig. …

Ang lima ba ka but-an nga mga dalagang birhen hakog ug dili buot makigbahin, o nagpasabut ba sila og husto nga ang lana sa pagkakabig dili mahulaman? Ang espiritwal nga kalig-on ba nga miresulta sa padayon nga pagsunod sa mga sugo mahatag ngadto sa laing tawo? Ang kahibalo ba nga naangkon pinaagi sa makugihong pagtuon ug pamalandong sa kasulatan mahatag sa tawo nga nanginahanglan? Ang kalinaw ba nga mahatag sa ebanghelyo sa matinud-anong Santos sa Ulahing mga Adlaw mabalhin ngadto sa indibidwal nga nakasinati og kalisdanan o dakong hagit? Ang klaro nga tubag sa kada usa niining mga pangutana mao nga dili.

“Sama sa gihatagan og importansya sa but-an nga mga dalagang birhen, kada usa kanato kinahanglan ‘mamalit alang kanato.’ Kining dinasig nga mga babaye wala maghulagway og transaksyon sa negosyo; hinoon, gipasabut nila og maayo ang atong indibidwal nga responsibilidad sa pagpabilin sa atong lamparahan sa pagpamatuod nga magsiga ug magbaton og igong gidaghanon sa lana sa pagkakabig. Kining bililhong lana makuha usa ka tu-lo kada higayon—‘pagtulun-an human sa usa ka pagtulun-an [ug] lagda human sa usa ka lagda’ (2 Nephi 28:30), nga mapailubon ug makanunayon. Walay linaktod; walay kinalit nga pagpangandam nga posible.

“‘Busa, pagmatinud-anon, pag-ampo kanunay, nga ang inyong mga lampara maandam ug magsiga, ug ang lana anaa kaninyo, nga kamo andam sa pag-anhi sa Pamanhonon’ (D&P 33:17)” (“Nakabig ngadto sa Ginoo,” Ensign o Liahona, Nob. 2012, 109).

Ang mosunod usa ka laing kamatuoran nga atong makat-unan gikan sa sambingay: Kita nangandam alang sa Ikaduhang Pag-anhi pinaagi sa pagpadako sa atong pagpamatuod ug pagkakabig pinaagi sa inadlaw nga pagkamatarung.

Imahe

lamparahan

2. Pagdrowing og usa ka dako nga hulagway sa lamparahan diha sa imong scripture study journal. Magtimaan nga ang lana diha sa sambingay nagrepresentar sa pagpangandam alang sa Ikaduhang Pag-anhi ni Jesukristo, paghimo og lista sulod sa lamparahan sa mga paagi nga ikaw makadugang og “lana” ngadto sa imong “lamparahan.” Kon mahimo, pakigbahin sa imong mga ideya ngadto sa mga miyembro sa pamilya o mga higala, ug pangutan-a sila unsa ang ilang ikasugyot nga ikadugang sa imong lista.

Aron makasabut og uban nga mga paagi diin ikaw makatigum og lana tu-lo matag tu-lo pinaagi sa matarung nga pagpuyo, makapadayon ka og tan-aw sa video “They That Are Wise” (time code 5:46–8:44). Samtang ikaw nagtan-aw sa video, idugang ngadto sa lista ang mga ideya diha sa imong scripture study journal.

Sa modernong pagpadayag ang Ginoo mikumpirmar nga “niana nga adlaw [ang Ikaduhang Pag-anhi], kon Ako moanhi diha sa akong himaya, nga ang sambingay matuman diin Ako namulong mahitungod sa napulo ka mga birhen” (D&P 45:56).

Basaha ang Mateo 25:10–12, nga mangita sa unsay gisulti sa pamanhonon ngadto sa boangboang nga mga dalagang birhen. Kini makatabang nga mahibalo nga ang Hubad ni Joseph Smith nagklaro nga ang pamanhonon miingon, “Wala kamo makaila kanako” (Joseph Smith Translation, Mateo 25:11 ).

Unsay gisulti sa pahayag “Wala kamo makaila kanako” mahitungod sa lima ka boangboang nga mga dalagang birhen? Sa unsa nga paagi nga ang pagkamakaila sa Ginoo lahi sa makahibalo lamang mahitungod Kaniya? (Tan-awa sa Juan 17:3.)

Gikan niini nga mga bersikulo atong nakat-unan nga aron maandam sa pag-anhi sa Ginoo ug mahimong takus nga magpabilin diha sa Iyang presensya, kita kinahanglan gayud nga makaila Kaniya.

3. Tubaga ang mosunod nga mga pangutana diha sa imong scripture study journal:

   1. Sa unsa nga mga paagi ikaw mas nakaila og maayo sa Manluluwas?

   2. Sa unsa nga paagi nga ang pagkaila sa Manluluwas nag-impluwensya sa imong espiritwal nga pagkaandam alang sa Iyang Ikaduhang Pag-anhi?

Magpadayon sa istorya gikan sa sinugdanan sa leksyon—mahitungod sa batan-ong priesthood holder kinsa dili andam sa higayon sa panginahanglan— mipasabut si Elder Holland nga ang batan-ong lalaki midali og dulhog sa dalan ngadto sa balay sa mas hingkod nga lalaki sa iyang ward. Ang mas hingkod nga lalaki mihatag sa mas batan-ong igsoong lalaki og panalangin nga nakapakalma sa iyang kondisyon hangtud ang mga paramedic miabut. Si Elder Holland mipadayon:

Imahe

Elder Jeffrey R. Holland

“Dayon ang returned missionary nga akong giingon misulti niini: ‘Walay bisan usa kinsa wala makasinati sa akong giatubang nianang gabhiona ang masayud sa kaulaw ug sa kasubo nga akong gipas-an tungod sa pagbati nga dili takus nga mogamit sa priesthood nga akong gihuptan. Gani mas labaw kini ka sakit nga hinumduman alang kanako tungod kay akong manghud nga lalaki ang nanginahanglan kanako ug akong minahal nga dili miyembro nga mga ginikanan kinsa nalisang kaayo ug kinsa adunay katungod sa paglaum pa gyud kanako. Apan samtang ako nagbarug sa inyong atubangan karon, ako makasaad kaninyo niini,’ siya miingon. ‘Ako dili hingpit, apan sukad niadtong gabhiona ako wala na gayud makahimo og bisan unsa nga makapugong kanako sa pagduol sa atubangan sa Ginoo uban sa pagsalig ug mangayo sa Iyang tabang kon kini gikinahanglan. Ang personal nga katakus maoy usa ka gubat niini nga kalibutan diin kita nagpuyo,’ siya miangkon, ‘apan kini usa ka gubat nga ako dumadaug. Gibati nako ang tudlo sa panghimaraut nga mitulisok kanako makausa sa akong kinabuhi, ug dili ko tuyo nga bation kini pag-usab kon ako adunay mahimo mahitungod niini. Ug, dayag lang,’ gitapos niya, ‘makahimo ako sa tanan mahitungod niini’” (“The Confidence of Worthiness,” 59).

Hunahunaa unsay imong kinahanglan nga buhaton aron sa espirituhanong paagi maandam sa pag-anhi sa Ginoo. Mahimong linginan nimo ang usa o duha sa mga aksyon nga imong gilista diha sa imong drowing sa lamparahan ug maghimo og tumong sa paglihok sa paagi nga modugang sa imong espiritwal nga pagkaandam.

Kon ang imong mga ginikanan mosulod sa kwarto ug mohatag kanimo og dakong kantidad sa kwarta, unsay imong buhaton niini?

Samtang ang Manluluwas mipadayon sa pagtudlo sa Iyang mga disipulo mahitungod sa iyang Ikaduhang Pag-anhi, giistorya Niya ang sambingay sa mga talanton. Niini nga sambingay usa ka tawo kinsa lumalargahay sa iyang panaw mihatag og kwarta ngadto sa tulo sa iyang mga ulipon: lima ka talanton ngadto sa unang ulipon, duha ka talanton ngadto sa ikaduha, ug usa ka talanton ngadto sa ikatulo. (Ang talanton usa ka kantidad nga kwarta.)

Imahe

karaan nga mga pilak

Basaha ang Mateo 25:16–18, nga mangita sa unsay gibuhat sa mga ulipon sa ilang kwarta.

Diha sa Mateo 25:19–23 atong nahibaloan nga sa dihang mibalik ang agalon, gisugo niya ang iyang mga ulipon sa pagreport kon unsay ilang gibuhat sa ilang kwarta. Ang mga ulipon nga may lima ka talanton ug duha ka talanton migamit niini aron madoble ang kwarta sa ilang agalon. Apan ang ulipon nga may usa ka talanton mitago niini ug sa ingon walay bisan unsa nga tubo nga ikahatag ngadto sa iyang agalon.

Basaha ang Mateo 25:24–25, nga mangita kon nganong gitago sa sulugoon ang talanton.

Niini nga sambingay, ang mga talanton mahimong ipakigsama ngadto sa mga gasa ug mga abilidad nga gihatag sa Ginoo kanato. Ang kahadlok nagpugong kanato gikan sa paggamit sa mga gasa ug mga abilidad nga gihatag sa Ginoo kanato.

Unsa sa imong hunahuna ang mahitabo kon kita dili mopalambo sa atong mga gasa ug mga abilidad tungod sa kahadlok?

Basaha ang Mateo 25:26–30 aron mahibaloan unsa ang nahitabo sa walay kapuslanan nga ulipon.

Usa ka kamatuoran nga atong makat-unan gikan niini nga sambingay mao nga kon kita dili mopalambo ug mogamit sa atong espiritwal nga mga gasa alang sa kaayohan, niana kita mawagtangan niini.

Paghunahuna og pipila ka mga paagi ikaw makagamit sa imong mga gasa ug mga abilidad sa pagpauswag sa buhat sa Ginoo. Usa ka talanton nga imong magamit mao ang imong pagpamatuod (tan-awa sa D&P 60:2–3). Ikonsiderar ang paghimo og plano sa matinud-anong paagi sa paggamit ug pagpalambo sa imong mga gasa ug mga abilidad.

Imahe

pagpanibsib sa kanding taliwala sa mga karnero

Diha sa Mateo 25:31–46 atong nahibaloan nga sa Iyang Ikaduhang Pag-anhi pagabulagon ni Jesus ang matarung gikan sa dautan sa samang paagi nga ang magbalantay sa karnero nagbulag sa karnero gikan sa mga kanding. Unsaon sa Ginoo pag-ila sa kalainan tali niadtong kinsa nahigugma Kaniya (karnero) ug niadtong kinsa wala mahigugma Kaniya (mga kanding)?

Basaha ang Mateo 25:40, nga mangita sa unsay gitudlo sa Manluluwas mahitungod sa unsaon nato sa pagpakita sa atong gugma alang Kaniya.

Gikan niini nga bersikulo atong nahibaloan nga samtang kita naghigugma ug nagserbisyo sa uban, atong gipakita ang atong gugma alang sa atong Ginoo.

Pamalandungi kon giunsa nimo pagtagad ang uban sulod sa milabay nga 24 ka oras. Ikonsiderar kon imong bang pilion ang paglihok sa lahi nga paagi kon ikaw anaa sa sama nga sitwasyon sa umabut. Sulod sa sunod nga 24 ka oras, pangita og mga oportunidad sa pagsunod sa mga pag-aghat sa Balaang Espiritu ug sa pagserbisyo sa uban.

4. Isulat ang mosunod diha ubos sa mga assignment karong adlawa sa imong scripture study journal:

   Akong natun-an ang Mateo 25 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: