Pasiuna sa 1 Mga Taga-Tesalonica

Ang Unang Epistola ngadto sa Mga Taga-Tesalonica gituohan nga mao ang labing una sa mga sulat ni Apostol Pablo ug mahimong mao ang labing karaan nga basahon sa Bag-ong Tugon. Ang mga pagtulun-an ni Pablo niini nga sulat naka-focus sa Ikaduhang Pag-anhi ni Jesukristo, lakip na ang mga kalisdanan nga sagubangon sa mga sumusunod ni Jesukristo sa dili pa ang Iyang pagbalik (tan-awa sa 1 Mga Taga-Tesalonica 3:3), ang Pagkabanhaw sa mga Kristiyano atol sa Ikaduhang Pag-anhi (tan-awa sa 1 Mga Taga-Tesalonica 4:13–14), ug ang tayming sa pag-anhi ni Kristo (tan-awa sa 1 Mga Taga-Tesalonica 5:1–2). Pinaagi sa imong pagtuon niini nga basahon, imong makat-unan ang kalabut sa Ikaduhang Pag-anhi ug makadawat og pag-awhag nga magpabiling matinud-anon ngadto sa Ginoo.

Si Pablo ang misulat sa 1 Mga Taga-Tesalonica (tan-awa sa 1 Mga Taga-Tesalonica 1:1; tan-awa usab sa 1 Mga Taga-Tesalonica 2:18).

“Gisulat ni Pablo ang mga epistola ngadto sa mga taga-Tesalonica gikan sa Corinto atol sa iyang ikaduhang misyonaryo nga biyahe,” mga A.D. 50–51 (Giya ngadto sa mga Kasulatan, “Mga Epistola ni Pablo,” scriptures.lds.org).

Gisulat ni Pablo ang 1 Mga Taga-Tesalonica ngadto sa mga miyembro sa Simbahan sa Tesalonica. Ang Tesalonica mao ang labing daghan og populasyon ug malambuon nga siyudad sa karaang Gresyanhon nga gingharian sa Macedonia tungod sa duha ka importanting butang: ang siyudad gitukod sa pinakamaayo nga natural nga dunggoanan sa Dagat sa Aegean, ug nahimutang sa dagkong dalan nga nagsumpay sa Roma ug Asia.

Atol sa ikaduhang misyonaryo nga biyahe ni Pablo, ang Espiritu migiya kang Pablo ug sa iyang mga kauban—sila si Silas, Timoteo, ug Lucas—nga mobiyahe tabok sa Dagat sa Aegean ngadto sa Macedonia (tan-awa sa Mga Buhat 16:6–12). Gisugdan niini ang pagsangyaw sa ebanghelyo didto sa Europa. Human sa pagsangyaw didto sa Filipos (tan-awa sa Mga Buhat 16:12–40), mibiyahe sila si Pablo ug Silas ngadto sa Tesalonica.

Nagtrabaho si Pablo kauban ni Silas didto sa Tesalonica, apan gipugos sila sa pagpahawa sa siyudad pinaagi sa mga lider sa mga Judeo (tan-awa sa Mga Buhat 17:1–9). Sa wala madugay, gibalitaan ni Timoteo si Pablo nga ang mga Santos sa Tesalonica nagpabiling matinud-anon bisan pa man sa pagpanggukod ug nga ang ilang matarung nga impluwensya mikaylap (tan-awa sa Mga Buhat 18:5; 1 Mga Taga-Tesalonica 1:7–8; 3:6–8).

Ang mga kinabig nga taga-Tesalonica mao ang pipila sa unang mga Europeo nga midawat sa ebanghelyo, ug miatubang sila og pagpanggukod isip resulta. Daghan usab sila og mga pangutana mahitungod sa Ikaduhang Pag-anhi. Busa, sa iyang sulat ngadto sa mga taga-Tesalonica, misulat si Pablo og mga pulong sa pag-awhag ug kalig-on ug mitubag sa ilang mga pangutana mahitungod sa Ikaduhang Pag-anhi ni Jesukristo.

Usa sa nag-unang mga tema ni Pablo sa iyang Unang Sulat ngadto sa Mga Taga-Tesalonica mao ang Ikaduhang Pag-anhi. Mi-focus siya sa pag-apil sa mga matarung diha sa mga panghitabo sa Ikaduhang Pag-anhi, ilabi na sa mga Santos nga nangamatay na (tan-awa sa 1 Mga Taga-Tesalonica 2:19; 3:13; 4:13–17; 5:1–10). Dili pareho sa daghang mga sulat ni Pablo, ang 1 Mga Taga-Tesalonica wala maglangkob og dagkong mga pagbadlong kondili nagtanyag hinoon og pagdayeg alang sa mga Santos nga taga-Tesalonica.

1 Mga Taga-Tesalonica 1–3. Gipahayag ni Pablo ang dakong pasalamat alang sa mga Santos nga taga-Tesalonica. Iyang gipahinumduman ang iyang mga magbabasa mahitungod sa mabination niyang pagpangalagad taliwala kanila ug mipahayag og hingpit nga kalipay alang sa ilang pagkamatinud-anon. Iyang giawhag ang mga Santos nga molambo diha sa gugma ngadto sa usag usa ug ngadto sa tanang tawo.

1 Mga Taga-Tesalonica 4–5. Gisultihan ni Pablo ang mga Santos nga magmahimong balaan sa ilang kaugalingon. Iyang gipasabut nga kon moanhi na pag-usab ang Ginoo, ang mga Santos nga nagmatinud-anon sa ilang pagpamatuod kang Kristo, kadtong nangamatay na ug kadtong buhi pa, mabayaw ug mosugat sa Ginoo. Gipahinumduman sa Apostol ang mga miyembro sa Simbahan nga mangandam ug magbantay alang sa adlaw sa pag-anhi ni Kristo.