Pasiuna sa Pinadayag

Isip “ang Pinadayag ni Jesukristo” (Pinadayag 1:1), kini nga basahon usahay gitawag og Apokalipsis, nga sa Gresyanhon nagpasabut og usa ka pagpadayag, pagbukas, o pagbutyag nianang nakatago (tan-awa sa Giya ngadto sa mga Kasulatan, “Apokalipsis,” scriptures.lds.org). Kini nga basahon usa ka pagbutyag sa Ginoo nga si Jesukristo ug usa ka pagpadayag sa Iyang awtoridad, gahum, ug labing importanteng tahas diha sa plano sa Amahan sa kaluwasan. Ang basahon nagpadayag usab og daghang importante nga mga impormasyon mahitungod sa mga hitabo padulong ngadto sa Ikaduhang Pag-anhi ug sa Milenyum.

Ang pagtuon sa basahon sa Pinadayag makatabang kanimo nga makaangkon og mas lawom nga pagsabut sa nabanhaw ug nahimaya nga Anak sa Dios ug sa Iyang pagpakigsabut sa mga anak sa Dios sa daghang katuigan sa kasaysayan sa yuta, ilabi na sa katapusang mga adlaw. Kini nga basahon naghatag og mensahe sa paglaum ngadto sa mga matarung ug makaawhag kanimo nga magpabiling matinud-anon sa imong pagpamatuod sa Manluluwas taliwala sa pagpanggukod ug mga pagsulay.

Si Apostol Juan, ang hinigugma nga disipulo ni Jesukristo, mao ang nagsulat niini nga basahon. Ang Basahon ni Mormon nagpamatuod nga si Juan giorden nang daan nga maoy mosulat sa mga butang nga narekord diha sa basahon sa Pinadayag (tan-awa sa 1 Nephi 14:18–27; Ether 4:16).

Ang basahon sa Pinadayag gisulat sa panahon nga ang mga Kristiyano nag-atubang og sayop nga mga pagtulun-an, kakulang sa pagpakabana, ug grabeng pagpanggukod (tan-awa sa Pinadayag 1:9; 2:4, 10, 14–15; 3:16; 6:9). Kini nga pagpanggukod malagmit naggikan sa mga opisyales nga Romano sa katapusang duha ka dekada sa unang siglo A.D. Si Juan misulat gikan sa isla sa Patmos diha sa Dagat sa Aegean, mga 60 ka milya (100 ka kilometro) sa habagatang-kasadpan sa Efeso (tan-awa sa Pinadayag 1:9).

Si Apostol Juan misulat og usa ka mensahe sa paglaum ug pagdasig ngadto sa mga Santos sa iyang panahon (tan-awa sa Pinadayag 1:4, 11) ug niadtong anaa sa ulahing mga adlaw. Ang unang tulo ka mga kapitulo sa Pinadayag piho nga gipatunong ngadto sa pito ka mga branch sa Simbahan sa Asia Minor (tan-awa sa Pinadayag 1:4, 11; 2–3). Tungod sa grabe nga pagpanggukod, ang mga Santos dunay dakong panginahanglan sa makadasig nga mensahe nga makita diha sa Pinadayag. Agig dugang, ang propeta sa Basahon ni Mormon nga si Nephi mipamatuod nga ang “Dios mi-orden sa apostol” nga si Juan sa pagsulat mahitungod sa katapusan sa kalibutan (1 Nephi 14:25) ug nga ang iyang mga pulong motungha ngadto sa mga Hentil ug sa salin sa Israel sa ulahing mga adlaw (tan-awa sa 1 Nephi 13:20–24, 38; 14:19–27).

Si Propeta Joseph Smith mitudlo: “Ang basahon sa Pinadayag mao ang usa sa pinakasayon nga mga basahon nga gipasulat sa Dios” (sa History of the Church, 5:342). Bisan og kini daghan kaayong mga paglarawan ug mga simbolo nga dili kanunayng sayon masabtan sa mga tigbasa sa modernong panahon, ang mga tema niini nga basahon yano ug makadasig.

Si Apostol Juan mihulagway sa mga kahimtang sa Simbahan sa iyang panahon (tan-awa sa Pinadayag 2–3) ug misulat mahitungod sa nangagi ug sa umaabut nga mga panghitabo (tan-awa sa Pinadayag 4–22). Ang basahon sa Pinadayag naglakip sa usa sa pipila ka mga tudling sa kasulatan nga naghulagway sa premortal nga Gubat sa Langit (tan-awa sa Pinadayag 12:7–11) ug nagpakita og usa ka dinasig nga summary sa kasaysayan sa kalibutan, partikular nga nagpunting sa ulahing mga adlaw ug sa Milenyum. Ang mahinungdanong mga tema niini naglakip sa tahas ni Jesukristo sa pagpatuman sa plano sa Dios, ang impluwensya sa Dios sa kasaysayan sa yuta, ang Ikaduhang Pag-anhi ni Jesukristo ug ang paglaglag sa dautan, ug ang saad nga ang yuta sa katapusan mahimong celestial. Ang basahon nagpasabut usab nga adunay “permanente nga kadaugan sa maayo batok sa dautan … [ug] sa gingharian sa Dios batok sa mga gingharian sa mga tawo ug ni Satanas” (Bible Dictionary, “Revelation of John”).

Pinadayag 1–3. Si Juan nakakita og usa ka panan-awon ni Jesukristo. Siya misulat og indibidwal nga mga mensahe ngadto sa pito ka mga simbahan sa Asia; kini nga mga mensahe naglakip sa pagdayeg, mga pahimangno, ug mga saad ngadto sa matinud-anong mga Santos sa matag branch.

Pinadayag 4–11. Si Juan nakakita og usa ka panan-awon sa Dios nga naglingkod sa trono diha sa celestial nga gingharian, sa Kordero sa Dios, ug usa ka basahon nga gisilyohan sa pito ka mga timri [silyo]. Siya nakakita og mga panan-awon kabahin sa pag-abli sa matag usa sa pito ka mga timri. Kadtong adunay timri sa Dios diha sa ilang mga agtang makadawat sa proteksyon sa Dios sa katapusang mga adlaw. Si Juan nakakita og mga gubat, mga hampak [kasakitan], ug daghan pang mga panghitabo sa ulahing mga adlaw nga mag-una sa Ikaduhang Pag-anhi sa Ginoo.

Pinadayag 12–16. Si Juan nakakita og usa ka panan-awon sa premortal nga Gubat sa Langit ug sa pagpadayon niini sa yuta. Siya nagtudlo nga ang dautan nga mga pwersa nagtinguha sa paglaglag sa gingharian sa Dios dinhi sa yuta. Sa katapusang mga adlaw ang ebanghelyo ipahiuli ngadto sa yuta diha sa kahingpitan niini pinaagi sa pagpangalagad sa mga anghel. Mga pagpangandam pagahimoon alang sa gubat sa Armagedon.

Pinadayag 17–22. Ang espiritwal nga Babelonia mokatap sa tibuok yuta. Human mapundok ang matarung nga mga Santos, ang Babelonia mapukan ug hilakan sa iyang mga tigsuporta. Ang mga matarung pagadapiton sa panihapon sa kasal sa Kordero sa Dios. Si Satanas gapuson, ang Milenyum magsugod, ug si Kristo personal nga maghari dinhi sa yuta. Ang mga patay pagahukman. Ang yuta makadawat sa iyang celestial nga himaya.