Si Jose ug si Maria mibyahe ngadto sa Betlehem, ug si Jesus natawo didto. Ang mga magbalantay misunod sa panudlo sa anghel sa pagpangita sa bag-ong natawo nga si Jesus, ug ilang gisangyaw ang pagkatawo ni Jesus ngadto sa uban. Si Simeon mipanalangin ni Jesus diha sa templo, ug si Ana mipakigbahin sa iyang pagsaksi nga ang Manunubos natawo na. Si Jesus mitubo “sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52).
Unsa ka kamasaligon sa imong kahibalo sa mga panghitabo nga naglibut sa pagkatawo sa Manluluwas? Sulayi ang imong kaugalingon pinaagi sa pagkompleto sa mosunod nga eksamin. Isulat kon ang matag pamahayag tinuod (T) o sayop (S).
____ 1. Si Maria ug si Jose miadto sa Jerusalem aron sa pagbayad og mga buhis.
____ 2. Si Maria ug Jose mibyahe og 27 ka milya (44 ka kilometro) gikan sa Nazaret ngadto sa Betlehem.
____ 3. Ang batang si Jesus gipahimutang diha sa usa ka pasungan tungod kay puno ang balay abutanan.
____ 4. Ang mga magbalantay misunod sa bitoon padulong sa pasungan diin naghigda si Jesus.
____ 5. Gawas ni Maria ug ni Jose, ang unang narekord nga nakakita ni Jesus mao ang mga magbalantay sa mga karnero.
____ 6. Ang anghel misulti sa mga magbalantay sa dili pagsulti ni bisan kinsa unsay ilang nakita.
Samtang ikaw magtuon sa Lucas 2, pangitaa ang mga tubag niining mga pangutana aron sutaon kon natubag ba nimo og husto.
Basaha ang Lucas 2:1–5, nga mangita kon nganong si Jose ug Maria mibyahe ngadto sa Betlehem.
Si Cesar gusto nga ipanglista, o ihapon, ang mga tawo. Kini gihimo tungod sa mga katuyoan sa pagbuhis.
Adto sa Bible Maps, nu. 11, “The Holy Land in New Testament Times,” nahimutang diha sa Bible appendix. Pangitaa ang mga siyudad sa Nazaret ug Betlehem diha sa mapa.
Hinumdumi nga ang “Betlehem [anaa] sa mga 85–90 ka milya (137–145 ka kilometro) habagatan sa Nazaret, malakaw sa labing ubos upat ngadto sa lima ka adlaw, tingali mas taas kon hunahunaon ang kahimtang ni Maria” (New Testament Student Manual [manwal sa Church Educational System, 2014], 143).
Pamalandonga unsay imong hunahuna nga labing tukma nga mga kahimtang alang sa pagkatawo sa Tiglalang ug Manluluwas sa kalibutan. Basaha ang Lucas 2:6–7, nga mangita sa mga kahimtang sa pagkatawo ni Jesus.
Basaha ang Lucas 2:8–14, nga mangita kon giunsa sa pag-anunsyo ang pagkatawo sa Manluluwas.
Imahe
anghel uban sa mga magbalantay sa mga karnero
Hinumdumi nga ang Lucas 2:10 naghulagway sa mga pagbati nga atong masinati tungod kay ang Manluluwas natawo na. Ikonsiderar ang pagsulat sa mosunod nga kamatuoran diha sa imong mga kasulatan: Tungod kay ang Manluluwas natawo sa kalibutan, makasinati kita og dakong kalipay.
Sa imong pagpadayon sa pagtuon sa Lucas 2, pangita og mga ehemplo kon sa unsang paagi nga ang kahibalo sa pagkatawo sa Manluluwas nagdala og kalipay ngadto sa uban.
Basaha ang Lucas 2:15–20, nga magmarka sa mga pulong nga nagpakita kon giunsa sa mga magbalantay sa mga karnero pagtubag ang mga panudlo sa anghel.
Hinumdumi nga ang mga magbalantay sa karnero mitubag diha dayon ngadto sa mensahe sa anghel. Sa unsa nga pagsaksi nga nadawat sa mga magbalantay sa karnero, o pagpamatuod, isip resulta sa pagtubag niining mensahe?
Ribyuha ang Lucas 2:17–20, nga mangita sa unsay gibuhat sa mga magbalantay sa karnero human madawat nila ang ilang pagsaksi ni Jesukristo. Ngano kaha nga ang mga magbalantay sa karnero mipakigbahin sa uban sa unsay ilang nasinati ug nadungog?
Kompletuha ang mosunod nga mga assignment diha sa imong scripture study journal:
Base sa unsay imong nakat-unan gikan sa mga lihok sa mga magbalantay sa mga karnero kompletoha ang mosunod nga mga baruganan: Kon atong madawat ang atong pagpamatuod ni Jesukristo, gusto nato nga .
Palandonga ang usa ka panahon sa dihang imong gibati ang tinguha sa pagpakigbahin sa imong pagpamatuod ni Jesukristo ug sa Iyang ebanghelyo ngadto sa uban. Isulat kon nganong nakabaton ka niana nga tinguha.
Si Simeon ug Ana nagpahayag nga si Jesus mao ang mahimong Manluluwas sa kalibutan
Sa Lucas 2:21–24 atong mabasa nga walo ka adlaw human sa pagkatawo ni Jesus, si Maria ug si Jose mipresentar Kaniya didto sa templo pinasubay sa balaod sa Judeo (tan-awa sa Exodo 13:2). Duha ka mga indibidwal kinsa didto sa templo nianang adlawa nakaila sa batang si Jesus isip ang Mesiyas.
Basaha ang istorya ni Simeon sa Lucas 2:25–32. (Hinumdumi nga ang mga pulong “nagpaabut sa paglipay sa Israel” sa Lucas 2:25 nagpasabut sa paghulat alang sa Manluluwas nga moabut.) Dayon basaha ang istorya ni Ana sa Lucas 2:36–38. Sa duha ka mga istorya, pangitaa kon sa unsang paagi nga ang kahibalo sa pagkatawo sa Manluluwas midala og hingpit nga kalipay ngadto niini nga mga indibidwal .
Sa unsang mga paagi nga sila si Simeon ug Ana mipamatuod ni Jesukristo?
Atong mabasa sa Lucas 2:34–35 nga si Simeon mipanalangin usab ni Maria ug Jose. Ang Hubad ni Joseph Smith nagpatin-aw sa propesiya ni Simeon ngadto ni Maria: “Oo, usa ka bangkaw ang iduslak ngadto kaniya ngadto usab sa imong kaugalingong samaran nga kalag; nga ang kahiladmang mga pagbati mapadayag” (Joseph Smith Translation, Lucas 2:35).
Diha sa imong scripture study journal, ipasabut kon nganong ang kahibalo sa pagkatawo sa Manluluwas nakahatag kanimo og hingpit nga kalipay. Ikonsiderar ang pagpakigbahin niini nga pagpamatuod uban sa usa ka higala o atol sa family home evening.
Sumala sa Lucas 2:39, human mapresentar si Jesus didto sa templo, si Maria ug si Jose mibalik dala si Jesus ngadto sa ilang panimalay sa Nazaret.
Ang batan-on nga si Jesus mitubo nga “puno sa kaalam ug kusgan, ug ang grasya sa Dios diha kaniya”
Imahe
Ang Pagkabata ni Jesukristo
Imahe
ang bata nga si Jesus nga may linukot nga papel [scroll]
Pagsulat og mga butang nga gusto nimong palamboon mahitungod sa imong kaugalingon:
Sa unsang paagi nga ang kahibalo kon sama sa unsa si Jesus sa dihang Siya anaa sa imong pangidaron nagtabang kanimo nga mahimong usa ka tawo nga gusto nimo nga mamahimo?
Ang mga kasulatan naglangkob og pipila lamang ka mga detalye mahitungod sa kabatan-onan ni Jesus, apan kadto nga mga detalye mahimong usa ka dako kaayo nga panalangin ug giya kanato samtang kita naningkamot sa pagpalambo sa atong mga kaugalingon. Basaha ang Lucas 2:40, nga mangita kon giunsa paghulagway ni Lucas ang sayo nga bahin sa kinabuhi ni Jesus. Hinumdumi nga ang waxed nagpasabut sa pagtubo o pagdako.
Sunod, basaha sa Lucas 2:41–49, nga mangita kon unsay gibuhat ni Jesus sa dihang 12 anyos pa Siya.
Kon kini anaa, mahimong imong tan-awon ang “Young Jesus Teaches in the Temple” (2:30) gikan sa The Life of Jesus Christ Bible Videos, anaa sa LDS.org, aron makita ang paghulagway sa unsay nahitabo sa dihang nakit-an ni Jose ug Maria si Jesus didto sa templo. Kon walay video, basaha ang Lucas 2:48–50, nga mangita sa unsay gisulti ni Jesus ngadto ni Maria ug ni Jose sa dihang Siya ilang nakita-an.
Unsa ang gipadayag niini nga istorya mahitungod sa kahibalo ni Jesus sa Iyang balaan nga pagkatawo isip usa ka batan-on nga lalaki?
Imahe
Propeta Joseph Smith
Ang Propeta Joseph Smith mipahayag sa mosunod mahitungod ni Jesukristo isip usa ka batan-on: “Sa dihang usa pa ka batan-on si [Jesukristo] nakaangkon sa tanan nga salabutan nga gikinahanglan aron makapahimo Kaniya sa pagdumala sa gingharian sa mga Judeo, ug makahimo sa pagpangatarungan uban sa labing mga maalamon ug labing mangilngig nga mga doktor sa balaod ug pagkabalaan, ug mohimo sa ilang mga teoriya ug binuhatan nga ingon og binuang itandi sa kaalam nga Iyang naangkon; apan usa pa lamang siya ka gamay nga batang lalaki, ug kulang pa sa pisikal nga kalig-on bisan sa pagpanalipod sa Iyang kaugalingon; ug mahimo siyang magkasakit, gutumon ug mamatay” (sa Teachings of the Prophet Joseph Smith, 62:608).
Lucas 2:52 nagtudlo kanato nga si Jesus “midako diha sa kaalam.” Niana nga bersikulo ato usab nakat-unan ang laing tulo ka mga pamaagi nga siya mitubo. Sa pagdako diha sa “barug” nagpasabut sa pagtubo sa lawas. Ang mga pulong “sa kahimuot sa Dios” may kalabutan sa espirituhanon nga kaayohan, ug ang mga pulong “ug sa tawo” may kalabutan ngadto sa sosyal nga mga relasyon. Busa, basi sa atong pagtuon niini nga bersikulo atong makat-unan ang mosunod nga baruganan: Kita makasunod sa ehemplo ni Jesukristo pinaagi sa pag-angkon og kaalam ug pagtubo sa pisikal, espirituhanon, ug sa sosyal nga paagi.
Pamalandonga ang mosunod nga mga pangutana:
Nganong importante man alang kanato ang paglambo sa matag usa niining upat ka mga dapit?
Sa unsang paagi nga ikaw napanalanginan samtang naningkamot ka sa pagsunod sa ehemplo ni Jesus sa pagpalambo sa Iyang Kaugalingon dinhi niini nga mga dapit?
Kopyaha ang mosunod nga tsart diha sa imong scripture study journal. Dayon sulati sa ubos sa matag kategoriya og tumong alang sa imong personal nga pagpalambo ug usa ka plano kon sa unsa nga paagi imong buhaton kana nga tumong sulod sa umaabut nga mga semana.
Makasunod ako sa ehemplo ni Jeus pinaagi sa pagpalambo …
Kategoriya:
Sa intellectual nga paagi
Sa pisikal nga paagi
Sa espirituhanon nga paagi nga
Sa sosyal nga paagi
Ang akong tumong ug plano sa pagkompleto sa akong tumong:
Isulat sa imong scripture study journal ang mosunod diha sa ubos sa mga assignment karon:
Akong natun-an ang Lucas 2 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong teacher: