Lucas 22

Samtang naghinapos na ang Iyang mortal nga pagpangalagad, gipasiugdahan ni Jesus ang sakrament, gitudloan ang Iyang mga tinun-an nga moalagad sa usag usa, ug gimandoan si Pedro sa pagpalig-on sa iyang mga kaigsoonan. Ang maulaon nga sakripisyo sa Manluluwas misugod didto sa Tanaman sa Getsemani. Gidakop Siya ug gitaral sa atubangan ni Caipas. Samtang ang Manluluwas gitaral, si Pedro milimud nga nakaila Kaniya.

Hunahunaa nga ikaw ug usa sa sakop sa imong pamilya naglingkod sa salog sa inyong panimalay. Ang sakop sa imong pamilya gustong mobarug ug naghangyo sa imong tabang. Unsaon nimo nga matabangan siya kon nagpabilin ka nga naglingkod sa sawog? Unsay kalainan niini kong mobarug ka og una?

Kini nga analohiya makatabang kanimo nga masabtan kon unsay atong mahimo aron makatabang sa uban nga mahimong mas maayo sa espirituhanon nga paagi.

Samtang ikaw magtuon sa Lucas 22, pangitaa ang mga kamatuoran nga motabang kanimo nga masayud kon sa unsa nga paagi matabangan ang uban nga makabarug sa espirituhanon nga paagi.

Sa Lucas 22:1–30 atong makat-unan nga sa hinapos sa Iyang mortal nga pagpangalagad ang Manluluwas nakigkita uban sa Iyang mga Apostoles aron sa pagsaulog sa Pagpalabay. Atol nianang panahona, Siya mipahibalo nga usa kanila moluib Kaniya, gipasiugdahan Niya ang sakrament ug mimando nga kini pagahimoon agi og paghinumdum Kaniya, ug Siya mitudlo kanila nga kadtong kinsa moalagad sa uban mao ang labing labaw sa tanan. Ang Manluluwas midayeg usab sa Iyang mga Apostoles tungod sa pagpadayon og uban Kaniya ug misaad kanila nga usa ka adlaw sila molingkod og mga trono ug mohukom sa napulog duha ka mga tribo sa Israel.

Basaha ang Lucas 22:31–32, nga mangita sa unsay gisulti sa Manluluwas nga gitinguha ni Satanas.

Ang Hubad ni Joseph Smith mihatag sa mosunod nga mga katin-awan ngadto sa bersikulo 31: “Ug ang Ginoo miingon, Simon, Simon, tan-awa! Gitinguha kamo ni Satanas, sa pagbaton kaninyo aron iya kamong alig-igon maingon sa trigo” (Hubad ni Joseph Smith, Luke 22:31). Sa laing pagkasulti, si Satanas gusto molit-ag ni Pedro aron nga mas sayon na lang ang paglit-ag sa uban nga mga miyembro sa Simbahan.

“Ang trigo ayagon pinaagi sa paglain sa lugas gikan sa tipasi. Ang bililhon nga lugas gitipigan, samtang ang mga yanong tipasi gilabay Kon ang mga Santos motugyan ngadto sa tintasyon ug moambit sa kasal-anan sa kalibutan, mawad-an sila sa ilang pagkalahi ug mamahimong sama sa tipasi” (New Testament Student Manual [manwal sa Church Educational System, 2014], 183). Diha sa analohiya sa Manluluwas, ang hugot nga pagtuo ug pagpamatuod ni Pedro ug sa uban mahimong mahisama sa lugas nga si Satanas mitinguha sa pagpahimulag o mokuha gikan niini.

Paglista og usa o duha ka butang nga imong nakat-unan mahitungod ni Pedro nga nagpakita nga siya adunanay pagpamatuod ni Jesukristo ug sa Iyang ebanghelyo:

Ikonsiderar ang pagmarka sa Lucas 22:32 kon unsa ang gisulti sa Manluluwas nga gikinahanglan pa ni Pedro nga masinati sa dili pa siya makalig-on sa iyang mga kaigsoonan.

Ang pag-angkon og pagpamatuod sa ebanghelyo nagpasabut nga ang tawo nakadawat og “kahibalo ug espirituhanon nga pagsaksi nga gihatag sa Espiritu Santo” (Giya ngadto sa mga Kasulatan, “Pagpamatuod,” scriptures.lds.org). Angpagkakabig ngadto sa ebanghelyo nagpasabut og “ang pag-usab sa pagtuo sa tawo, kasingkasing, ug kinabuhi aron modawat ug mouyon sa kabubut-on sa Dios” (Giya ngadto sa mga Kasulatan, “Pagkakabig, Kinabig,” scriptures.lds.org).

Basi sa unsay gisulti sa Ginoo ngadto ni Pedro sa Lucas 22:32, atong maila ang mosunod nga kamatuoran: Kon kita nakabig ngadto sa ebanghelyo ni Jesukristo, makapalig-on kita sa uban.

1. Kon kita makabig ang atong mga pagtuo ug mga lihok mahiuyon ngadto sa kabubut-on sa Dios ug mahimo kitang makatabang ug makapalig-on sa uban. Tubaga ang mosunod nga mga pangutana diha sa imong scripture study journal:

   1. Sa unsa nga paagi nga ang analohiya sa pagtabang sa usa ka tawo nga makabarug may kalabutan niini nga baruganan?

   2. Unsa sa imong hunahuna ang motabang sa usa ka tawo nga mahimong mas makabig ngadto sa ebanghelyo?

Basaha ang Lucas 22:33–34, nga mangita kon sa unsa nga paagi gitubag ni Pedro ang pahimangno sa Manluluwas ug unsa ang gipanagna sa Manluluwas nga buhaton ni Pedro. Mahimo nimong markahan unsay imong nakit-an.

Ang usa ka mas detalyado nga bersyon niini nga istorya narekord diha sa Mateo 26. Basaha ang Mateo 26:35, nga mangita sa unsay gisulti ni Pedro ngadto sa Manluluwas human makadungog sa panagna.

Human sa Pagpalabay, si Jesus ug ang mga Apostoles miadto sa Tanaman sa Getsemani. Basaha ang Lucas 22:39–43, nga mangita sa unsay gihimo sa Manluluwas didto. Mahimo nimong markahan sa bersikulo 43 kon kinsa ang naglig-on Kaniya.

Gikan niini nga istorya atong makat-unan nga kon andam kita sa pagsunod sa kabubut-on sa Langitnong Amahan, Siya motabang kanato nga makabaton og kalig-on sa pagbuhat sa Iyang kabubut-on.

Unsa ang uban nga mga paagi nga ang Langitnong Amahan makalig-on kanato?

Palandonga ang usa ka panahon nga imong nabati ang paglig-on sa Langitnong Amahan samtang ikaw nagtinguha sa pagbuhat sa Iyang kabubut-on.

Ang istorya ni Lucas bahin sa pag-antus sa Manluluwas didto sa Tanaman sa Getsemani naglakip sa usa ka importanting detalye nga wala maapil diha sa mga istorya nga gihatag ni Mateo ug Marcos. Basaha ang Lucas 22:44, nga mangita kon sa unsa nga paagi gihulagway ni Lucas ang pag-antus sa Manluluwas didto. Ikonsiderar ang pagmarka sa mga pulong nga nagtudlo sa mosunod nga kamatuoran: Si Jesukristo nagsingot og dagkong mga tulo sa dugo samtang Siya nag-antus didto sa Tanaman sa Getsemani.

Ang Manluluwas mihulagway sa Iyang kaugalingon nga pag-antus diha sa usa ka pinadayag nga gihatag pinaagi ni Propeta Joseph Smith. Basaha ang Doktrina ug mga Pakigsaad 19:18, nga mangita kon sa unsa nga paagi gihulagway sa Manluluwas ang Iyang pag-antus. Basaha usab ang Mosiah 3:7. Ikonsiderar ang pagsulat sa Doktrina ug mga Pakigsaad 19:18 ug Mosiah 3:7 diha sa imong mga kasulatan tupad sa Lucas 22:44 isip mga cross-reference.

2. Tubaga ang mosunod nga mga pangutana diha sa imong scripture study journal:

   1. Unsa ang imong mga hunahuna nga nakahibalo ka nga si Jesukristo nag-antus sa hilabihan alang kanimo?

   2. Sa unsa nga paagi nga ang pakahibalo niini nga kamatuoran makapalig-on sa imong pagpamatuod sa gugma sa Manluluwas alang kanimo?

Si Elder Bruce R. McConkie sa Korum Napulog Duha ka mga Apostoles mitudlo sa mosunod mahitungod sa pag-antus sa Manluluwas:

Imahe

Elder Bruce R. McConkie

“Kita wala masayud, kita dili makasulti, walay mortal nga hunahuna nga makasabut, sa hingpit nga kahulugan sa unsay gibuhat ni Kristo sa Getsemani.

“Kita nasayud nga Siya nagsingot og dagkong mga tulo sa dugo gikan sa matag lungag sa panit samtang Iyang gihurot ang linugdang nianang mapait nga kopa nga gihatag sa Iyang Amahan kaniya.

“Kita nasayud nga Siya miantus, sa lawas ug espiritu, nga labaw pa sa posibleng maantus sa usa ka tawo, gawas kon kini ngadto sa kamatayon.

“Kita nasayud nga sa pipila ka paagi, dili kini nato masabtan, ang iyang pag-antus nakatagbaw sa mga gipangayo sa kaangayan, mitubos sa mahinulsulong mga kalag gikan sa kasakit ug mga silot sa sala, ug mihimo sa kalooy nga maanaa niadtong kinsa nagtuo sa iyang balaan nga ngalan.

“Kita nasayud nga Siya natumba sa yuta samtang ang mga kasakit ug mga panghingutas sa walay katapusan nga palas-anon nakapakurog kaniya ug buot unta nga dili Siya moinom sa mapait nga kopa.

“Kita nasayud nga usa ka anghel gikan sa kahitas-an ang miabut aron sa paglig-on Kaniya sa iyang kalisdanan, ug kita naghunahuna nga kini mao si banugang Miguel, kinsa sa sinugdanan napukan aron ang mga tawo mahimo.

“Sa atong pinakaduol nga paghusga, kining mahangturong mga paghingutas—kining pag-antus nga dili matandi—nagpadayon sulod sa mga tulo o upat ka oras” (“Ang Makapalimpyo nga Gahum diha sa Getsemani,” Ensign, Abril 2011, 16).

Sa Lucas 22:45–48 atong makat-unan nga human ang Manluluwas nag-antus sa Getsemani, Siya gibudhian ni Judas Iscariote.

Basaha ang Lucas 22:49–51, nga mangita sa unsay gibuhat ni Pedro (tan-awa sa Juan 18:10) sa dihang ang sacerdote nga punoan ug ang uban miabut aron sa pagdakop ni Jesus. Ikonsiderar ang pagmarka unsa ang gibuhat sa Manluluwas alang sa ulipon sa labawng sacerdote.

Sa Lucas 22:52–53 atong makat-unan nga ang Manluluwas nangutana kon ngano ang sacerdoteng punoan ug ang uban nagdakop Kaniya panahon sa gabii kay sa panahon sa adlaw sa dihang didto Siya sa templo.

Sa Lucas 22:54 atong makat-unan nga si Pedro misunod sa Manluluwas sa dihang Siya gidala ngadto sa balay sa labawng sacerdote aron mataral.

3. I-drowi ang mosunod nga tsart diha sa imong scripture study journal. Samtang ikaw magbasa sa matag tudling sa kasulatan, pangitaa kon kinsa ang nakigsulti ni Pedro ug unsa ang gisulti ni Pedro samtang ang Manluluwas gitaral. Isulat ang imong mga tubag sa tukma nga mga kolum. (Pahinumdom: Ang tanang upat ka Ebanghelyo naglangkob sa istorya sa paglimud ni Pedro, apan ang istorya ni Juan naglangkob sa labing detalyado.)

Kon mahuman nimo ang tsart, tubaga ang mosunod nga pangutana diha sa imong scripture study journal: Ngano sa imong hunahuna si Pedro milimud nga nakaila ni Jesus ngadto sa matag usa niini nga mga tawo?

Imahe

Paglimud ni Pedro

Basaha ang Lucas 22:61–62, nga mangita sa unsay nahitabo human milimud si Pedro nga nakaila sa Manluluwas.

Paghunahuna nga ikawang anaa sa kahimtang ni Pedro human siya milimud nga nakaila ni Jesus satulo ka higayon. Unsa kaha ang imong mga hunahuna ug mga pagbati samtang ang Manluluwas mitan-aw kanimo? Ngano ingon niana ang imong gibati?

Si Elder Bruce R. McConkie mitudlo sa mosunod mahitungod ni Pedro:

Imahe

Elder Bruce R. McConkie

“Si Pedro mao ang maayong panig-ingnan sa unsa nga paagi ang gahum sa pagkakabig nagepekto ngadto sa maabiabihon nga mga kalag. Atol sa mortal nga pagpangalagad sa Ginoo, si Pedro adunay pagpamatuod, natawo sa Espiritu, sa pagkabalaan ni Kristo ug sa gamhanang plano sa kaluwasan nga anaa kang Kristo. ‘Ikaw mao ang Kristo, ang Anak sa Dios nga buhi,’ siya miingon, samtang ang Espiritu Santo mihimo kaniya sa pagsulti. (Mat. 16:13–19.) Sa dihang ang uban nalaglag, si Pedro nagpabiling nagbarug uban ang kasiguroan sa pagka-apostol, ‘Kami nagtuo ug nasiguro nga ikaw mao kana nga Kristo, ang Anak sa buhing Dios.’ (Juan 6:69.) Si Pedro nahibalo, ug ang iyang kahibalo miabut pinaagi sa pagpadayag.

“Apan si Pedro wala makabig, tungod kay siya wala mahimo nga bag-ong nilalang sa Espiritu Santo. Hinoon, sa kadugayan si Pedro nakaangkon og pagpamatuod, ug niana gayud nga gabii nga gidakop si Jesus, miingon siya ngadto ni Pedro: ‘Ug sa mahibalik na ikaw kanako lig-una ang imong mga igsoon.’ (Lucas 22:32.) Human dayon niana, ug sa walay pagtagad sa iyang pagpamatuod, si Pedro milimud nga siya nakaila kang Kristo. (Lucas 22:54–62.) Human sa paglansang, si Pedro nangisda, aron lamang tawagon og balik ngadto sa pagpangalagad sa nabanhaw nga Ginoo. (Juan 21:1–17.) Sa katapusan atol sa adlaw sa Pentecostes ang gisaad nga espirituhanong pagtuga nadawat; si Pedro ug ang tanang matinud-anon nga mga tinun-an nahimo nga bag-ong mga nilalang sa Espiritu Santo; sila tinud-anay nga nakabig; ug ang sunod-sunod nilang mga kalampusan nagpakita sa kalig-on sa ilang pagkakabig. (Mga Buhat 3; 4.)” (Mormon Doctrine, 2nd ed. [1966], 162–63).

Sa Mga Buhat atong makat-unan nga human si Pedro nakadawat og gasa sa Espiritu Santo, siya hingpit nga nakabig ug migahin sa tibuok niyang kinabuhi isip usa ka matinud-anong disipulo ni Jesukristo (tan-awa sa Mga Buhat 4:13–17; 5:25–29).

4. Tubaga ang mosunod nga mga pangutana diha sa imong scripture study journal:

   1. Unsa nga mga leksyon ang atong makat-unan gikan sa kasinatian ni Pedro?

   2. Kinsa nga tawo ang imong nailhan nga ingon og tinuoray nga nakabig ngadto sa ebanghelyo ni Jeuskristo? Unsa ang nabuhat niini nga tawo nga nagpakita sa iyang pagkakabig?

Palandonga unsa ang imong mahimo nga motuhop ang imong pagkakabig ngadto sa ebanghelyo ni Jesukristo. Buhata ang bisan unsa nga mga impresyon nga mahimong nimong madawat.

Sa Lucas 22:63–71 atong makat-unan nga ang Manluluwas gibiaybiay ug gibunalan sa mga sacerdote nga punoan.

5. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Lucas 22 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: