Mga Buhat 10–12

Gipadayag sa Dios ngadto ni Pedro sa usa ka panan-awon nga ang ebanghelyo kinahanglang isangyaw ngadto sa mga Hentil. Gitudlo ni Pedro ang ebanghelyo ngadto ni Cornelio ug sa iyang pamilya ug dayon mihusay sa panagbingkil sa Judeo nga mga Santos mahitungod sa pagsangyaw sa ebanghelyo ngadto sa mga Hentil. Ang buhat sa Ginoo magpadayon bisan pa sa pagpanggukod. Si Herodes Agripa I, ang apo ni Herodes ang Halangdon, mipatay ni Apostol Santiago ug dayon midakop ug mipriso ni Pedro. Sa gabii sa wala pa patya si Pedro, usa ka anghel ang mitabang kaniya nga makaeskapo gikan sa prisohan. Gihampak si Herod sa usa ka anghel nga gikan sa Dios, ug ang ebanghelyo nagpadayon sa pag-uswag.

Unsa ang nakahatag kanimo og pagsalig sa pagsunod sa usa ka tawo?

Hunahunaa nga kauban ka sa usa ka grupo sa mga tawo nga nahisalaag. Pipila ka mga miyembro sa grupo mitanyag sa paggiya sa tanan balik sa luwas nga lugar, ang matag usa nagsugyot og lain-laing agianan. Unsa ang makadeterminar o makaimpluwensya kon kinsa nga tawo ang imong sundon?

Samtang magtuon ka sa Mga Buhat 10–12, pangitaa ang mga kamatuoran nga makatabang nimo nga makaangkon og pagsalig sa pagsunod niadtong gitawag sa Ginoo sa paggiya sa Iyang Simbahan.

Hangtud niining puntuha sa mga panahon sa Bag-ong Tugon, ang ebanghelyo gisangyaw, uban sa pipila ka mga eksepsyon, alang lang ngadto sa mga Judeo. Bisan si Jesus misangyaw lamang ngadto sa “nangawalang karnero sa banay ni Israel” ug misugo sa Iyang mga Apostoles sa pagbuhat sa ingon (tan-awa sa Mateo 10:5–6). Hinoon, ang Manlululwas misulti sa Iyang mga tinun-an human miabut ang Espiritu Santo diha kanila sila mosangyaw sa ebanghelyo “hangtud sa kinatumyan sa yuta” (Mga Buhat 1:8). Sa Mga Buhat 10 mabasa nato ang mahitungod sa importante nga kausaban sa paagi ang Simbahan maglihok nga makatabang niini nga mahitabo.

Basaha ang Mga Buhat 10:1–2, nga mangita sa mga detalye mahitungod sa usa ka Hentil nga ginganlan og Cornelio.

Si Cornelio usa ka centurion. Ang usa ka centurion “usa ka opisyal diha sa kasundalohan sa Romano nga nagmando og usa ka pundok sa singkwenta ngadto sa usa ka gatus ka mga tawo. Ang ingon niana nga pundok naglangkob sa ikakan-uman nga bahin sa kasundalohan sa Romano” (Giya ngadto sa mga Kasulatan, “Centurion,” scriptures.lds.org).

Sumala sa pamaagi sa Simbahan nianang higayona, isip usa ka Hentil, si Cornelio dili makaapil sa Simbahan ni Kristo nga dili una magpakabig ngadto sa Judaismo. Bisan og si Cornelio dili makaapil sa Simbahan isip usa ka Hentil, sa unsa nga paagi niya gipakita ang iyang hugot nga pagtuo sa Dios?

Imahe

Si Pedro ug si Cornelio

Sumala sa na-rekord sa Mga Buhat 10:3–48, si Pedro dunay panan-awon nga wala niya masabti pag-una. Hinoon, pinaagi sa pagsunod sa Espiritu, si Pedro gipaila ngadto ni Cornelio, kinsa nakakita og panan-awon diin ang anghel miingon nga ang Ginoo nakadungog sa mga pag-ampo ni Cornelio. Misulod si Pedro sa balay ni Cornelio ug mitudlo kaniya ug sa iyang pamilya sa ebanghelyo. Ang Espiritu Santo mikunsad sa matag usa diha sa balay. Nakaamgo si Pedro nga ang iyang panan-awon, diin siya gisugo sa pagkaon og mga hayop nga giisip nga dili limpyo, usa ka langitnong instruksyon sa pagsangyaw sa ebanghelyo ngadto sa mga Hentil ug sa pagtugot kanila nga mabunyagan nga dili na makabig pa ngadto sa Judaismo.

1. Kompletuha ang mosunod diha sa imong scripture study journal:

   1. Basaha ang Mga Buhat 10:34–35, ug i-rekord ang imong bisan unsang mga hunahuna o mga pagbati mahitungod sa unsay gisulti ni Pedro nga iyang nakat-unan niining duha ka mga bersikulo.

   2. Basaha ang 2 Nephi 26:33, ug dayon tubaga ang mosunod nga pangutana: Unsay ipasabut sa “ang Dios wala diay pinalabi sa mga tawo” (Mga Buhat 10:34)?

Ikonsiderar unsay gisulti sa mosunod nga pamahayag mahitungod sa Dios nga “wala diay pinalabi sa mga tawo”:

“Ang ebanghelyo ni Jesukristo alang sa tanan. Ang Basahon ni Mormon namahayag, ‘itum ug puti, ulipon ug gawasnon, lalaki ug babaye; … ang tanan managsama ngadto sa Dios’ (2 Nephi 26:33). Kini mao ang opisyal nga pagtulun-an sa Simbahan.

“Ang mga tawo sa tanang kaliwat gi-welcome ug gibunyagan ngadto sa Simbahan sukad sa sinugdanan. …

“Ang Simbahan klaro nga nanghimaraut sa diskriminasyon pamanit, lakip sa bisan unsa ug sa tanang diskriminasyon sa mga indibidwal sa sulod ug gawas sa Simbahan. “Niadtong 2006, kanhi presidente sa Simbahan nga si Presidente Gordon B. Hinckley mipahayag nga ‘walay tawo kinsa mobiaybiay kabahin sa ubang kaliwatan makakonsiderar sa iyang kaugalingon nga tinuod nga tinun-an ni Kristo. Ni makonsiderar niya ang iyang kaugalingon nga nahiuyon sa mga pagtulun-an sa Simbahan ni Kristo. … Atong ilhon nga ang matag usa kanato anak sa atong Amahan sa Langit kinsa nahigugma sa tanan Niyang mga anak’ [“Ang Panginahanglan sa Mas Labaw nga Pagkamabination,” Ensign or Liahona, Mayo 2006, 58]” (“Race and the Church: All Are Alike unto God,” mormonnewsroom.org/article/race-church).

Gikan sa unsay imong nabasa sa Mga Buhat 10:28, unsa kaha sa imong hunahuna ang gibati sa mga Santos nga Judeo sa dihang nakadungog sila sa inter-aksyon ni Pedro sa usa ka Hentil?

Basaha ang Mga Buhat 11:1–3, nga mangita kon sa unsa nga paagi ang mga tinun-an mitubag sa unsay gihimo ni Pedro.

Sumala sa na-rekord sa Mga Buhat 11:4–15, gihulagway ni Pedro ngadto sa mga tinun-an ang panan-awon nga nakita niya ug ni Cornelio. Giingnan niya sila nga si Cornelio ug ang iyang panimalay midawat sa mga pagtulun-an ni Jesukristo ug dayon nakasinati sa gahum sa Espiritu Santo sa samang paagi nga nabati ni Pedro ug ubang mga tinun-an.

Basaha ang Mga Buhat 11:16–17, nga mangita sa panapos nga pakigpulong ni Pedro ngadto sa mga tinun-an.

Unsa sa imong hunahuna ang gipasabut ni Pedro sa dihang siya miingon, “Si kinsa man ako, nga arang makasanta sa Dios?” (Mga Buhat 11:17)?

Basaha ang Mga Buhat 11:18, nga mangita kon giunsa pagtubag sa mga tinun-an ang pagpasabut ni Pedro.

Giunsa sa mga tinun-an pagtubag sa dihang ilang nahibaloan nga si Pedro gigiyahan sa Dios?

Ang mosunod mao ang usa ka baruganan nga atong makat-unan gikan niini nga asoy: Kon kita masayud nga kadtong nagdumala sa Simbahan gigiyahan sa Dios, masaligon kitang makapaluyo ug mosunod kanila. Kini nga baruganan gikumpirmar sa ulahing mga adlaw nga kasulatan, nga nag-rekord nga ang Dios mipadayag sa Iyang kabubut-on niadtong kinsa naghupot sa mga yawe sa priesthood sa pagdumala sa Simbahan (tan-awa sa D&P 1:38; 28:2, 7; 42:11; 107:65–66).

2. Tubaga ang mosunod nga mga pangutana diha sa imong scripture study journal:

   1. Giunsa nimo pagkakahibalo nga kadtong nagdumala sa Simbahan gigiyahan sa Dios?

   2. Unsa nga tambag gikan sa mga propeta nga imong napilian nga sundon tungod kay ikaw nakahibalo nga ang mga propeta gigiyahan sa Dios?

3. Sa imong scripture study journal, isulat ang tumong nga makatabang nimo nga makaangkon og mas lig-on nga pagpamatuod nga kadtong kinsa nagdumala sa Simbahan gigiyahan sa Dios.

Ang Mga Buhat 11:19–26 nag-rekord nga tungod sa pagpanggukod, ang pipila ka mga tinun-an nagkatag sa tibuok rehiyon apan matinud-anong misangyaw sa ebanghelyo ni Jesukristo bisan asa sila makaadto. Ang Mga Buhat 11:27–30 nag-rekord nga ang mga propeta miadto “gikan sa Jerusalem ngadto sa Antioquia” ug usa sa mga propeta, nga si Agabo mipamatuod nga dunay moabut nga kagutom. Mga paningkamot gihimo aron makahatag og tabang ngadto sa mga tawo sa Judea.

Imahe

kompas

Ang usa ka kompas motudlo sa amihanan tungod kay ang magnetic North Pole sa kalibutan maka-attract sa amihanang tumoy sa magnet sa kompas. Pagdrowing og X sa duol sa kompas (apan dili duol sa north compass point), ug hunahunaa nga ang X nagrepresentar sa handheld nga magnet.

Sa unsang paagi kini nga magnet makaimpluwesnya sa kinaiya sa dagum sa kompas?

Sa unsa nga paagi nga kini makaapekto sa atong abilidad sa paghimo og matarung nga pagpili kon unsa nga direksyon ang atong padulngan?

Samtang magtuon ka sa Mga Buhat 12, pangitaa ang impluwensya nga makababag sa atong abilidad sa paghimo og sakto nga mga desisyon.

Sukad sa pagkamartir ni Esteban, ang mga miyembro sa Simbahan sa sulod ug gawas sa Jerusalem nakasinati og nagkadaghan nga pagpanggukod. Basaha ang Mga Buhat 12:1–4, mangita kon sa unsa nga paagi si Haring Herodes Agripa nakasalmot niini nga pagpanggukod.

Kinsa ang gipapatay ni Herodes?

Ang Santiago nga gihisgutan sa bersikulo 2 mao si Apostol Santiago, ang igsoon ni Apostol Juan ug ang anak ni Zebedeo. Sumala sa mga rekord, si Santiago mao ang unang Apostol nga gimartir sa unang Kristiyano nga Simbahan. Siya usa usab ka miyembro sa Unang Kapangulohan uban nilang Pedro ug Juan.

Sumala sa Mga Buhat 12:3, kinsa ang nahimuot sa kamatayon ni Santiago?

Ang mga pulong nga “ang mga Judeo” sa bersikulo 3 nagpasabut sa impluwensyal nga mga lider sa Judeo sa Jerusalem kinsa nag-awhag sa paggukod sa Simbahan ni Jesukristo. Si Herodes Agripa “gusto kaayo nga isipon nga usa ka orthodox Jew” (Bible Dictionary sa LDS English version sa Biblia, “Herod”) ug naningkamot nga makapahimuot niining mga lider nga Judeo. Duol sa X sa kompas, isulat: Kon kita maningkamot sa pagpahimuot sa uban kay sa Dios, nan …

Unsay gibuhat ni Herodes sa dihang iyang nakita nga ang pagpapatay ni Santiago nakapahimuot sa mga lider sa Judeo?

Ikonsiderar ang litrato sa kompas ug ang X, sa unsa nga paagi nga ang tinguha ni Herodes nakapahimuot sa uban kay sa Dios makaapekto sa iyang direksyon sa kinabuhi?

Base sa unsay atong nakat-unan gikan sa ehemplo ni Herodes, kompletuha ang mosunod nga baruganan: Kon kita maningkamot sa pagpahimuot sa uban kay sa Dios, nan .

4. Tubaga ang mosunod nga mga pangutana diha sa imong scripture study journal:

   1. Gawas sa ehemplo ni Herodes, unsa ang ubang mga ehemplo nga nagpakita kon sa unsa nga paagi nga ang pagpaningkamot sa pagpahimuot sa uban kay sa Dios makapahimo sa usa ka tawo sa pagpakasala?

   2. Unsa ang pipila ka mga paagi nga ang usa ka tinguha sa pagpahimuot sa uban makapahilayo kanimo gikan sa imong Langitnong Amahan? Unsay imong buhaton sa pagpakigbatok nga makasala?

Palandunga ang mga paagi nga tingali nagtugot nimo sa imong tinguha sa pagpahimuot sa uban nga makapahilayo kanimo gikan sa imong Langitnong Amahan?

Basaha ang Mga Buhat 12:5–6. Unsa ang gibuhat sa mga miyembro sa Simbahan niining higayuna?

Basaha ang Mga Buhat 12:7–10. Unsa nga mga babag ang naagian ni Pedro atol sa iyang pag-eskapo?

Imahe

angel and Peter in prison

Basaha ang Mga Buhat 12:11–15. Kanus-a nakaamgo si Pedro nga unsay nahitabo tinuod ug dili usa ka panan-awon?

Unsay nahitabo sa dihang si Pedro nanuktok sa pultahan sa balay ni Maria?

Basaha ang Mga Buhat 12:16–17. Kinsa ang gihatagan ni Pedro sa kredito sa iyang pag-eskapo gikan sa prisohan?

Tan-awa ang Mga Buhat 12:5 pag-usab, ug ikonsiderar kon sa unsa nga paagi kini nga bersikulo may kalabutan sa pag-eskapo ni Pedro gikan sa prisohan.

Unsa sa imong hunahuna ang gisugyot sa mga pulong “apan alang kaniya gihimo ang mainit nga pag-ampo” (Mga Buhat 12:5) mahitungod sa sinsero ug kamainiton sa mga pag-ampo sa mga miyembro sa Simbahan?

Kini nga asoy naghulagway sa kamatuoran nga atong sinsero ug mainitong mga pag-ampo nagdapit sa mga milagro ug mga panalangin sa Dios sa atong mga kinabuhi ug sa mga kinabuhi sa uban.

Unsa ang gipasabut sa pag-ampo nga sinsero ug mainiton?

Kini nga baruganan wala magpasabut nga kon ang atong mga pag-ampo sinsero ug mainiton, awtomatik kitang makadawat unsay atong giampoan. Laing nakatampo nga hinungdan sa pagdawat sa mga milagro ug mga panalangin sa Dios naglakip sa kabubut-on ug tayming sa Dios ingon man usab sa indibidwal nga kabubut-on.

Basaha ang mosunod nga pamahayag, kon ngano nga importante ang pag-ampo: “Ang pag-ampo mao ang lihok diin ang kabubut-on sa Amahan ug ang kabubut-on sa anak nagkasinabtanay sa usag usa. Ang tumong sa pag-ampo dili ang pag-usab sa kabubut-on sa Dios, apan ang pagsiguro sa atong kaugalingon ug sa uban sa mga panalangin nga andam nang ihatag sa Dios, apan sa kondisyon nga kita mangayo niini. Ang mga panalangin nagkinahanglan og lihok o paningkamot sa atong bahin sa dili pa nato kini maangkon. Ang pag-ampo mao ang usa ka matang sa trabaho ug maoy gitudlo nga pamaagi sa pag-angkon sa labing taas sa tanang mga panalangin” (Giya ngadto sa mga Kasulatan, “Pag-ampo”scriptures.lds.org).

5. Tubaga ang duha o ang tanan sa mosunod nga mga pangutana diha sa imong scripture study journal:

   1. Sumala niini nga pamahayag gikan sa Giya ngadto sa mga Kasulatan, unsa ang importante nga katuyoan sa pag-ampo?

   2. Ngano nga importante nga mahinumduman nga ang katuyoan sa pag-ampo dili ang pag-usab sa kabubut-on sa Dios?

   3. Kanus-a nga ang pag-ampo nagdapit og mga milagro ug mga panalangin sa Dios sa imong kinabuhi o ngadto sa mga kinabuhi sa uban nga imong giampo?

Pamalandung kinsa o unsa ang imong iampo. Ikonsiderar unsaon nimo sa pag-ampo nga mas sinsero ug mainiton aron sa pagdapit sa mga panalangin ug mga milagro nga andam nang ihatag sa Dios kanimo ug sa uban.

Ang Mga Buhat 12:18–25 nag-rekord nga si Herodes nakahibalo sa pag-eskapo ni Pedro ug gisilutan ang mga gwardya nga sa iyang gibati maoy responsable sa pagtugot ni Pedro nga makaeskapo. Niini nga mga bersikulo atong makat-unan nga si Herodes mihatag og pakigpulong ngadto sa mga tawo, kinsa midayeg kaniya ug miingon nga siya namulong sama sa usa ka dios. Tungod kay wala ihatag ni Herodes ang himaya ngadto sa Dios, usa ka anghel mihampak kaniya og sakit ug siya namatay.

Importante nga masabtan nga ang silot sa Dios ngadto sa dautan sumala sa Iyang kabubut-on ug tayming. Dili tanang dautan nga mga tawo silutan dayon (tan-awa sa Alma 14:10–11).

Sumala sa Mga Buhat 12:24, unsay mahitabo sa misyonaryo nga buhat sa Simbahan bisan pa sa pagpanggukod nga giatubang sa mga miyembro sa Simbahan?

Ribyuha ang mga kamatuoran nga imong nakat-unan niini nga leksyon, ug pamalandung unsaon nimo sa paggamit niini sa imong kinabuhi.

6. Isulat ang mosunod sa ubos sa imong mga assignment karong adlawa diha sa imong scripture study journal:

   Akong natun-an ang Mga Buhat 10–12 ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: